Marzo

Ichapis congregacionninchejmanta uj hermanowan mana allintachu apanakunchej. Sajrita kasqanta yuyasqanchejrayku chayri contranchejpi ima sajratapis ruwasqanrayku. Chayta mana qonqayta atisqanchejraykutaj, ichá payta mana wasinchejman wajyarikuyta munasunmanchu. Bibliaqa niwanchej wajkunawan kʼachas kaspaqa, enemigosninchejwanpis allinta kausakuyta atisqanchejta (Pro. 25:21, 22). Mana allinta apanakunchej chay hermanota wasinchejman wajyarikojtinchejqa, paywan allinyakuyta atisun, paymantataj allinta yuyasun. Chantapis reparayta atisunchej, Jehová Diosqa payta kʼacha kasqanrayku llajtanman pusamusqanta (Juan 6:44). Hermanosninchejta munakusqanchejrayku wasinchejman wajyarikusunchej chayqa, paykunawan sumaj amigos kasunchej. Tukuy sonqo hermanosta wasinchejman wajyarikunapajqa, kunan diapaj texto nisqan mayta yanapawasunman. Hermanosninchejta kurajninchejta jina qhawasunchej chayqa, reparayta atisunchej sinchʼi creeyniyoj kasqankuta, llakiypi rikukuspapis sinchʼita sayasqankuta chayri noqanchejmanta nisqa aswan kʼacha kasqankuta. Chaykunata reparaspataj astawan paykunata munakusunchej, wasinchejmanpis wajyarikuyta atillasunchej. w18.03 págs. 17, 18 párrs. 18, 19

Wakin tatasqa, Jehová Diosta mana kasukuyta atillankuchu, wawanku congregacionmanta qharqochikojtin. Uj hermanamanta parlarina. Paypa warmi wawanqa, congregacionmanta qharqochikusqanrayku wasinmanta ripusqa. Pay nin: “Publicacionesninchejpi mayta maskʼarqani qharqosqaswan parlariy allillan kasqanta ninanta, ajinamanta wawaywan, allchhiywan ima karikunaypaj”, nispa. Chaywanpis qosanqa, reparachisqa wawan congregacionman kutinpunanqa paymantaña kasqanta. Reparachillasqataj Jehová Diosta kasukunanku aswan allin kasqanta. Jinamanta watasninman, wawankoqa congregacionman kutinpusqa. Chaymanta parlaspa, maman nin: “Kunanqa waway casi sapa día wajyarimuwanpuni chayri mensajesta apachimuwan. Noqata qosaytawan mayta munakuwayku, qharqosqa kashajtin Jehová Diosta kasukusqaykurayku. Wawaywanqa sumajtapuni apanakuyku”, nispa. Chayrayku wawanchej congregacionmanta qharqosqa kashan chayqa, Jehová Diosta kasukuna, tukuy sonqotaj paypi atienekuna, amataj yachasqallanchejpi atienekunachu (Pro. 3:5, 6). Chayrayku tukuy tatasqa Jehová Diospa kamachiykunasninta kasukunapaj kallpachakunallanchejpuni tiyan, mana kasukuyta atinapaj jina kajtinpis. Amataj kamachiykunasninta pʼakinachu. w18.03 pág. 31 párrs. 12, 13

Bibliaqa, mana ninchu mashkha watayoj kaspachus bautizakuna kasqanta. Jinapis tatasqa, mana qonqanankuchu tiyan wawasninkuta Jesuspa yachachisqasninman tukuchiyta. Chanta, ¿imatataj Jesuspa yachachisqasnin ruwanku? Jesuspa yachachisqasnenqa, sumajta entiendenku imatachus Jesús yachachisqanta, chayman jinataj kausakunku. Chayrayku tatasqa, wawasninkuman nacekusqankumantapacha Jehová Diosmanta yachachinanku tiyan. Ajinamanta wawasninku Jehová Diosllapaj kausakunankupaj, Jesuspa yachachisqasninmantaj tukunankupaj. Biblia nisqanman jinaqa, wawitasqa atinkuman imatapunichus Biblia yachachisqanta entiendeyta, chayman jinataj kausakuyta. Chaywanpis ñuñoj wawitasqa, mana bautizakuyta atinkumanchu. Timoteoqa jovencitomantapacha Jehová Diosta sirviyta qallarerqa. Ajinamanta Timoteoqa, tatan mana creyente kajtinpis imatachus yachakusqanpi sinchʼita creerqa (2 Tim. 1:5; 3:14, 15). Chantá 20 watayoj jina kashaspataj, congregacionpi sumaj llankʼaykunataña japʼerqa (Hech. 16:1-3). w18.03 pág. 9 párrs. 4, 5

Diosmanta yachakushaspaqa, ñaupa kausayninchejta pisimanta pisi saqeporqanchej. Chantataj bautizakorqanchej. Juchasapa runas kasqanchejrayku, kʼacha runas kanapaj cambiosta ruwanallanchejpuni tiyan (Fili. 3:12, 13). Jóvenes chayri machitus kaspapis, tapurikusunman: “¿Imaynatachus kausakusqaypi yachakunchu Diospa munayninman jina kausakushasqay? ¿Kallpachakushanichu Jesucristo jina yuyanaypaj? ¿Tantakuykunapi kusisqachu kani chayri phiñasqallachu? ¿Parlasqaypi reparakunchu Diospa Gobiernonta ñaupajman churashasqayta? ¿Bibliata estudianipunichu? Bibliaj nisqanman jina, ¿maychus kajtachu vestikuni, kʼachanchakuni ima? ¿Pillapis yuyaychariwajtin kasukunichu? Juchaman tanqasqa kashaspa, ¿imatataj ruwani? ¿Wiñay tukusqa cristiano jinachu imatapis ruwani?”, nispa (Efe. 4:13). w18.02 pág. 24 párrs. 4, 5

Tʼukunapaj jina kay tiempopi Jehová Diosqa, llajtanman pusamushan may chhika runasta, “tukuy nacionesmanta, tukuy ayllusmanta, tukuy laya runasmanta, tukuy parlaykunamantawan”. Tukuyninkutaj uj jatun nación jina kanku, 8 millonesmanta astawan. Paykunaqa ‘tuta pʼunchay’ Jehová Diosta kusisqas sirvishanku (Apo. 7:9, 15; Isa. 60:22). Ni jaykʼaj jina kay tiempopi, may chhika runas Diosman qayllaykushanku, pikunachus runa masinkuta munakunku. Bibliaqa unaymantaña nerqa, kay tiempopi ashkha runas Diosta mana munakunankuta. Apóstol Pablo nerqa, kay qhepa pʼunchaykunapi runasqa kay jina kanankuta: ‘Paykunallata munakojkuna, qolqeta munakojkuna, Diosta munakunankumanta nisqataj, paykunaj munaynillankuta maskʼajkuna’, nispa (2 Tim. 3:1-4). Chay jina runasqa, mana Jehová Diosta munakunkuchu. Chantapis runasta tanqanku paykunallapi yuyanankupaj. w18.01 págs. 22, 23 párrs. 1, 2

Noeqa, Jehová Diosmanta yachakusqanrayku, creeyniyoj karqa, kasukojtaj karqa. Chaytaj yanaparqa mana sajra imasta ruwananpaj. Chantapis Noeqa, mana masichakorqachu Diosta qhesachajkunawan. Nillataj sajra angeleswan chʼaukiyachikorqachu, pikunachus runasman tukuspa jallpʼaman uraykamorqanku chaykunawan. Chay tiempomanta runastaj chay sajra ángeles atiyniyoj kasqankuta reparaspa, ichapis paykunata yupaychayta munarqanku (Gén. 6:1-4, 9). Jinapis Noeqa yacharqa, Jehová Dios runasllaman kamachisqanta miraspa jallpʼaman juntʼanankuta (Gén. 1:27, 28). Chayrayku Noeqa, chay sajra angelespa ruwasqasninkuta mana allinpajchu qhawarqa. Imajtinchus chay sajra angelesqa warmiswan casarakuspa wawasniyoj karqanku. Wawasninkutaj manchay jatunkaray, kallpasapastaj karqanku. Chayrayku Jehová Diosqa Noeman nerqa, Jatun Para kananta, sajra runasta chinkachinanpaj. Noetaj “creesqanrayku Diosta manchachikorqa, uj arcatataj ruwarqa wasinmanta kajkuna salvakunankupaj” (Heb. 11:7). w18.02 págs. 9, 10 párr. 8

Jehovaqa jatun juchapi urmajtinchejpis perdonanawanchejpaj wakichisqa kashan. Yanapanawanchejpajtaj ancianosta churan (Pro. 24:16; Sant. 5:13-15). Juchapi urmaspaqa, ancianospa yanapayninta maskʼanapacha. Imajtinchus ajinallamanta wiñay kausayta japʼisunchej. Jinapis ichá sonqonchej juchachallawasunmanpuni ancianoswan parlarejtinchejñapis. Ajinapi rikukuspaqa, imatachus ruwananchejta qhawarinachej. Apóstol Pabloqa wakin kutis mayta llakikoj, ñaupa kausayninmanta yuyarikuspa. Chayrayku pay nerqa: ‘Noqaqa apóstoles ukhupi aswan juchʼuypaj qhawakuni. Manataj apóstol nisqa kanaypaj jinachu kani, imaraykuchus Diospa llajtanta qhatiykacharqani’, nispa (1 Cor. 15:9). Reparanchej jina Diosqa, Pablota apostolta jina qhawarqa, ñaupa kausayninpi llajtanta qhatiykachajtinpis. Jehová Diostaj munarqa Pablo reparananta paymanta khuyakusqanta. Noqanchejpis juchanchejmanta pesachikojtinchej Jehová Dios khuyakunawanchejpi atienekuna. Chayrayku Jehová Diosman, ancianosmanpis juchanchejta willakunapuni. Chantapis Jehová Dios perdonanawanchejpi atienekuna (Isa. 55:6, 7). w18.01 pág. 11 párrs. 17, 18

Jóvenes, Diospa qayllallanpipuni kanaykichejpajqa, Diosta kasukunaykichej tiyan, paywantaj parlarinaykichej tiyan. Diosta kasukunaykichejpajtaj, Bibliata sumajta ukhunchanaykichej tiyan. Chaypajqa Bibliata leenaykichej tiyan, publicacionesninchejtapis. Chay leesqaykichejpitaj tʼukurinaykichej tiyan. Jinapis Bibliata estudiayqa, mana uj examenpaj estudiay jinallachu. Astawanqa, imaynatachus uj kʼachitu lugarman rispa, mosoj imasta tarinchej, ajinallatataj Bibliata ukhunchashaspaqa, reparanchej imayna kʼachapunichus Jehová Dios kasqanta. Diosta astawan rejsispataj, ‘Diosman astawan qayllaykunchej, paytaj qayllaykamuwanchej’. Jóvenes, salvakunaykichejpajqa Bibliata ukhunchanaykichejpuni tiyan, chaypitaj tʼukurinaykichej tiyan (Sal 119:105). Diospa llajtanpitaj ashkha yanapas kan, Bibliata sumajta ukhunchanaykichejpaj. Chay yanapastataj Internetpi jw.org nisqapi tariwajchej. Chaykunamanta ujqa “Guías de estudio” nisqa. Chaypi kaj yanapasqa, creeypi sumaj sayasqa kanaykichejpaj yanapasonqachej. w17.12 pág. 25 párrs. 8, 9

Tukuy jallpʼaqa Diosta “rejsiywan juntʼa” kanqa. Animalesqa mana Jehová Diosmanta yachakuyta atinkumanchu. Chayrayku chay animalesqa, sajra kausayninkuta saqepoj runaswan ninakun (Isa. 11:6, 7). Ashkha hermanosqa niraj Bibliamanta yachakushajtinku, atojkuna jina may sajras karqanku. Jinapis kunanqa kʼachas kanku. Chay hermanospa experienciasninkutaqa, “Bibliaqa cambianankupaj yanaparqa”, nisqa yachaqanapi leesunman. Chaytataj Internetpi jw.org nisqapi tarisunman. Ñaupa kausayninkuta saqepoj hermanosqa, mosoj runa kaywan pʼachallikuspa, Diospa munayninman jina kausakunku. Ajinamanta cheqan kajta ruwanku, cheqa sonqotaj kanku (Efe. 4:23, 24). Runasqa Diosmanta yachakushaspa, reparakunku Bibliaj nisqaman jina kausakunanku kasqanta. Chayrayku ñaupa kausayninkuta saqepunku, jinallataj creenciasninkutapis. Chayta ruwaytaj mana atikullanchu. Jinapis ñaupa kausayninkuta saqepuyta munajkunataqa, Jehová Dios atiyninwan yanapan. w18.01 pág. 31 párrs. 15, 16

Diospa Palabranqa niwanchej, ajllasqa cristianos ‘maychus kananpi’ kausarimunankuta. Chayrayku nisunman kay jallpʼapi tiyakunankupaj kausarichisqa kanqanku chaykuna, maychus kanallanpitaj kausarichisqa kanankuta. Chayrayku ichá kaykunata tapurikusunman: “Kunallanraj wañojkuna, ¿maykʼajtaj kausarimonqanku? ¿Jesús Kamachiyta qallarisqantawanchu? ¿Familiaresninku rejsikapuyta atenqankutajchu? Chanta unay tiempomanta Diosta kasukoj reyes, ¿maykʼajtaj kausarimonqanku? Paraisopirí, ¿yanapakonqankutajchu? Chanta, ¿Diosta ni jaykʼaj sirvej runas kausarimonqankuchu? Kausarimonqanku chay, ¿maykʼajtaj kausarimonqanku?”, nispa. Ichapis ashkha imastawanraj yachayta munasunman. Jinapis ama llakikunachu chay imasta yachayta munaspa. Astawanqa Jehová Dios tiemponpi sutʼinchanawanchejta suyakuna. Chay tiempoqa tʼukunapaj jinapuni kanqa. Jehová Dios wañusqasta kausarichimunankamaqa, paypi astawan atienekunapaj kallpachakunallapuni. Jehová Diosqa Jesusnejta nerqa tukuy wañusqas yuyayninpi kashasqankuta, wañuymantataj kausarichimunanta (Juan 5:28, 29; 11:23). w17.12 pág. 12 párrs. 20, 21

Jehová Diosqa, qosasman jinata nin: “Qosas, warmiykichejta munakullaychejpuni, amataj paykunapaj sinchʼita phiñakuychejchu”, nispa. Munakuyniyoj qosaqa, warminta sumajpaj qhawan. Imata ruwananpajpis warminwan parlarin, sumajtataj uyarin (1 Ped. 3:7). Qosa wakin imasta mana warminpa nisqanman jinapunichu ruwajtinpis, warminta uyarejtenqa, imata ruwajtinpis allin renqa (Pro. 15:22). Uj warmeqa qosanta respetayta atillanqa, qosan paywan kʼacha kajtin, munakojtin ima. Arí, uj qosa warminta jinallataj wawasnintapis munakojtenqa, familia ukhupi Jehová Diosta kusisqa sirvenqanku. Premionkutapis kusisqa suyakullanqankupuni. w17.11 págs. 28, 29 párrs. 12, 15

Kay 60, 61 wata chaynejta, apóstol Pabloqa Romapi wisqʼasqa kasharqa. Ajina wisqʼasqa kashajtin Colosasmanta cristianosman uj cartata qhelqarqa. Pay nerqa: ‘Diospa munayninta allinta rejsinaykichejta munayku’, nispa (Col. 1:9). Chantá Pablo nillarqataj: “Chaytaqa nini, ama pipis sumajman rijchʼakoj palabraswan pantachisunaykichejpaj. Allinta qhawakuychej, pajtataj pipis presota jina apakapusunkichejman runaj yachayninwan, qhasi manakaj yachachiykunawan ima. Chaykunaqa ñaupa runaspa yachachiyninkumanta jamun, kay mundoj yuyayninmantawan, manataj Cristomantachu”, nispa (Col. 2:4, 8). Chayta niytawan Pabloqa sutʼincharqa, imaynatachus kay mundomanta runas yuyasqankuta, imaraykutajchus chay yuyaykuna runasman gustasqantapis. Kay mundomanta runasqa, yuyachiwasunman, may yachayniyoj kasqanchejta, wajkunamanta nisqataj aswan sumaj kasqanchejta. Chayrayku Pabloqa Colosasmanta hermanosman nerqa, ama kay mundomanta runas jina yuyanankuta, nitaj paykuna jina imatapis ruwanankuta (Col. 2:16, 17, 23). w17.11 págs. 20, 21 párr. 1

Juchapi urmajtinchej Jehová Dios khuyakunawanchejpajqa, imaschá juchaman urmanapaj tanqawanchej, chay imasta saqepuna (Mat. 18:9). Amigosninchej Jehová Dios chejnisqan imasta ruwanapaj tanqawajtinchejqa, paykunawan amaña masichakunachu. Sichus machachina imasta tomay gustawanchej chayqa, ama machanakama tomanachu. Manataj allinchu kanman maypichá tomachiwasunman chayman rinanchej. Chantapis khuchichakuypi mana urmanapajqa, ama khuchichakuymanta videosta qhawanachu. Amallataj telepi chayri Internetpipis millay imasta qhawanachu. Chantá nillataj khuchichakuypi urmanapaj jina imatapis ruwanachu. Jehová Diospa kamachiykunasninta kasukojtinchejqa, tukuy imapi allinpuni riwasunchej. Chantapis mana munanchejchu Jehová Dios noqanchejmanta karunchakunanta. Astawanqa munanchej qayllaykamunawanchejta, munakunawanchejtataj (Isa. 54:7, 8). w17.11 pág. 11 párr. 12

Zacarías 5:4 versiculopi nin: ‘Pipis suwajqa mana lluspʼenqachu castigomantaqa, maldiciontaj wasinkuman yaykonqa chaypitaj qhepakonqa, wasejpa kʼullusnin, jinataj rumisninpis mana kanankama’, nispa. Kaytaj reparachiwanchej, Jehová Diospa qhawayninpi tukuy ima qhatarasqa kasqanta. Ichapis uj hermanoqa suwakuspa mana reparachikunmanchu policiawan, patronninwan, ancianoswan chayri familiaresninwan. Jinapis Diospa qhawayninmantaqa, ni imata pakayta atinmanchu (Heb. 4:13). Noqanchejqa kusisqa kanchej, ‘tukuy imapi allinta puriyta munaj’ hermanoswan kaspa (Heb. 13:18). Jehová Diosqa chejnikun suwakojkunata. Noqanchejqa Diosman may agradecesqa kashanchej, Palabranta qowasqanchejmanta. Palabranpeqa reparachiwanchej imachus allin imatajchus mana allin kasqanta. Yanapawanchejtaj Diosta kusichinapaj jina kausakunapaj. Diospa Palabranman jina kausakojtinchejqa, Diosqa mana sajra runaswan chinkachiwasunchu. w17.10 págs. 22, 23 párrs. 6, 7

Tukuy atisqanchejta ruwana, tukuywan allinpi kausakunapaj. Chaypajqa pillawanpis allinyakunapaj wakichisqa kana. Ichá pi hermanollapis sonqonchejta nanachiwasunman, ajinapi rikukuspaqa chay hermanowan allinyakuyta maskʼanapacha (Rom. 12:17, 18). Pejpa sonqollantapis nanacherqanchej chaytaj, paywan allinyakuyta maskʼanapacha. Tukuy sonqotaj perdonta mañakuna. Qhariwarmispis sumajtapuni kausakunanku tiyan. Mana allinchu kanman qhariwarmisqa, runaspa ñaupaqellankupi kʼachas kanankoqa, wasinkupitaj alqowan misiwan jina kausakunankoqa. Noqanchejpis sonqomantapacha perdonanapaj wakichisqa kananchej tiyan. Pillapis sonqonchejta nanachiwajtinchejqa, perdonanapacha qonqaymantaj churana, mana “perdonariway” niwajtinchejpis. Chantapis hermanosta munakusunchej chayqa, mana ‘yuyarikullasunpunichu contranchejpi ima sajrata ruwasqankumantapis’ (1 Cor. 13:4, 5). Yuyarikullasunpuni chaytaj, chay hermanowan mana allintachu kausakusun. Jehová Diospis juchasninchejta mana perdonawasunchu (Mat. 6:14, 15). w17.10 pág. 10 párrs. 14, 15

Zacariaspa tiemponpi Jehová Dios nerqa, judiosta sajra runasmanta jarkʼananta, templonta tukuchanankupaj. Chayta uyariytawan judiosqa maytachá kallpachakorqanku. Jinapis pisilla kasqankurayku ichá ninkuman karqa: “¿Imaynatataj Diospa templonta tukuchasunchejri?”, nispa. Jehová Diostaj Zacariasnejta, judiosman nerqa ‘karumanta runas jamunankuta Diospa templonta ruwaysikoj’. Imaynatachus Heldai, Tobías, Jedaias ima yanapakoj jamusqanku, ajinata. Chayta uyarispa judiosqa, Jehová Dios yanapashasqanta repararqanku. Chayrayku Persiamanta rey, Diospa templonta amaña ruwanankuta nejtinpis, judiosqa mana manchachikuspa templota ruwaj churakorqankupacha. Ajinata chay rey churanakojtinpis, judiosqa Diospa yanapayninwan templota ruwayta tukucharqanku, 515 watapi Jesús niraj jamushajtin (Esd. 6:22; Zac. 4:6, 7). Chantá Jehová Dios, ‘karumanta runas jamonqanku templonta ruwaysikoj’ nisqanqa, kay tiempopi juntʼakushallantaj. w17.10 págs. 29, 30 párr. 17

Jehová Diosqa Salomonman nerqa, Jerusalenpi uj templota ruwananta. Chay temploqa ‘may jatun, tukuy kay mundopi may mentasqa, may kʼachitutaj kanan karqa’. Chantapis chay temploqa, Jehová “Diosta yupaychanapaj” kanan karqa (1 Cró. 22:1, 5, 9-11). Rey Davidqa wawan Salomonmanta llakisqa kasharqa. Imaraykuchus “waynallaraj” karqa, Diospa templonta ruwananpaj. Chayrayku Davidqa, Diospi atienekorqa, Salomonta yanapananpaj. Salomonqa, Jehovaj templonta ruwananpaj, mana manchachikunanchu karqa. Templotataj ruwaj churakunanpacha karqa. Salomón templota ruwayta manchachikunman karqa chayqa, mana chay templota qallarillanmanpischu karqa. Ajinamantataj Jehovaj kamachisqanta mana juntʼanmanchu karqa. Jehová ima trabajotachus qowasqanchejta mana manchachikuspa juntʼanapaj, Salomón jina Jehovaj yanapayninta necesitanchej. w17.09 págs. 28, 29 párrs. 1, 2, 4, 5

Biblia mana kanmanchu karqa chayqa, kausay llakiy kanman karqa. Diostapis mana rejsisunmanchu karqa, nillataj yachasunmanchu karqa imapajchus kausashasqanchejta, imachus aswan qhepaman kananmantapis. Manallataj yachasunmanchu karqa, imatachus Dios noqanchejrayku ruwasqanta. Jehová Dios Palabranta qowasqanchejrayku, chay tukuy imasta yachanchej. Jehová Diostaj nerqa, Palabran ni jaykʼaj chinkananta. Apóstol Pedroqa Isaías 40:8 versiculomanta parlarerqa. Chay versiculoqa Jehová Diospa nisqasnin wiñaypaj kananta nin (1 Ped. 1:24, 25). Ashkha runas Diospa Palabranta jatunpaj qhawarqanku. Chayraykutaj Bibliata tijracherqanku, ashkha runas parlayninkupi leenankupaj. Jinapis Bibliata tijracheyqa may trabajo karqa. Chantapis runasqa Bibliata tijrachejkunata qhatiykacharqanku. Jinapis Jehová Diosqa “munan tukuy laya runas salvasqa kanankuta, cheqa kajtataj allinta rejsinankuta” (1 Tim. 2:3, 4). w17.09 pág. 18 párrs. 1, 2

Kay tiempopi ashkha cristiano jovenesqa, José jina rikukunku (Gén. 39:7). Kimberlymanta parlarina. Colegiopi compañerasnenqa, sabadospi domingospiwan qhariwarmi jina joveneswan puñuykusqankumanta, alabakuspa cuentarej kanku. Kimberlytajrí mana compañerasnin jinachu karqa. Chayrayku compañerasnenqa paymanta asikoj kanku, sonsa kasqantataj nej kanku. Kimberlytaj ajinapi rikukusqanrayku, wakin kutis ni pi munakusqanta yuyaj, sapayakojtaj. Jinapis Kimberlyqa sumaj yuyayniyoj karqa. Imaraykuchus repararqa ashkha jovenesqa, qhariwarmi jina puñuykuyta manchayta munapayasqankuta (2 Tim. 2:22). Compañerasnintaj, “¿nirajchu piwanpis puñuykunki?” nispa nejtinku, Kimberlytaj paykunata sutʼinchaj imaraykuchus pillawanpis mana puñuykusqanmanta. Mayta kusikunchej Jehová Diospa llajtanpi jóvenes llimphu kausayniyoj kanankupaj, mayta kallpachakushasqankumanta, Jehová Diosninchejpis mayta kusikullantaj. w17.09 págs. 4, 5 párrs. 8, 10

Wakin runasqa imallamantapis chay rato phiñarpakunku, sonqota nanachinapaj jinataj imatapis nirpallanku. Bibliaqa niwanchej rabiakuyta, qhaparqachayta, kʼajaj phiñakuytawan wijchʼupunanchejta (Efe. 4:31). Imaraykuchus rabiakuspa qhaparqachaspataj, chʼajwasllata, maqanakusllatataj tarisunman. Wakinkunaqa mana juchapajchu chaykunata qhawanku. Jehová Diostajrí chaykunata millachikun. Chayrayku ashkha runasqa, Jehovata sirvinankupaj chay jina kausayta saqeporqanku. Diospa qosqan mosoj kausaywantaj pʼachallikorqanku (Col. 3:8-10). Kay mundopi ashkha runas llullakuyman yachasqa kanku. Wakenqa llullakunku impuestota mana paganankupaj, wakintaj pantasqankumanta mana kʼamichikunankupaj. Jehová Diostajrí cristianosta kamachiwanchej ‘sapa ujninchej runa masinchejwan cheqa kajta parlananchejta’ (Efe. 4:25; Col. 3:9). Jehovaqa “mana jaykʼaj llullakoj” Dios (Tito 1:2). Chayrayku noqanchejqa mana llullakunanchejchu tiyan. Astawanqa cheqa kajtapuni parlananchej tiyan, pʼenqaypi rikukunanchej kajtinpis (Pro. 6:16-19). w17.08 págs. 18, 20, 21 párrs. 3, 5, 12, 13, 15

Kay tiempopi Jehovaqa Biblianejta yanapawanchej. Jehovaj “Palabranqa usqhayta corren”, imaraykuchus necesitashajtinchejpuni Palabrannejta yuyaychawanchej. Chantapis “allin kamachi yuyayniyoj” publicacionesta orqhosqan, JW Broadcasting, Internetpi jw.org, ancianos, hermanosninchej ima yanapallawanchejtaj (Mat. 24:45). Arí, kay 147 Salmota qhelqaj nin jina, Jehovaqa ‘usqhaytapuni’ yanapawanchej. Kay 147 Salmota qhelqajqa kusikorqa israelitasta Dios ajllakusqanmanta ‘Palabranta, kamachisqasninta, yachachiykunasnintapis rejsinankupaj’ (Sal. 147:19, 20). Noqanchejpis kusikullanchejtaj Jehová ajllakuwasqanchejmanta sutinta rejsichimunapaj. Jehovaj amigon kayta atinchej Payta rejsisqanchejrayku, Palabranman jinataj kausakusqanchejrayku. Chaymantataj may agradecesqa kashanchej. Kay 147 Salmota qhelqaj jinallataj Jehovata jatunchayta munanchej ashkha imasrayku. Chantapis wajkunata kikinta ruwanankupaj yanapayta munallanchejtaj. w17.07 págs. 20, 21 párrs. 15, 16, 18

Kay tiempomanta Diospa kamachisnenqa, chay versículo nisqanman jinallataj ruwanku. Chaykunamanta uj millonmanta astawan precursores jina sirvishanku. Cristianosqa propagandaswan, kay sajra mundoj imasninwanpis mana aysachikunankupaj kallpachakunku. Paykunaqa yachanku “pichus manukojqa manojpa wata runan” kasqanta (Pro. 22:7). Diabloqa munan qhapajyayta munaspa negocioswan musphaykachananchejta. Wakinkunaqa chaypi urmaspa, qolqeta manukunku wasita chayrí autota rantikunankupaj, wakintaj universidadpi estudianankupaj, chayrí casarakuypi jatun fiestata ruwanankupaj. Mana allinta yuyaycharikuspa manuchaykukullasun chayqa, watasta manullapuni kasun. Sumaj yuyayniyoj kasun chayrí, pisi imasllawan kausakuyta atisunchej, mana manuchakusunchu, nitaj qolqetapis wayrachisunchu. Ajinamanta Jehová Diosta sirviypi tukuy tiemponchejta churasun, nitaj qolqeta maskʼaypichu (1 Tim. 6:10). w17.07 pág. 10 párr. 13

Jehová Diosqa, cheqan kajman jinapuni kamachiwanchej. Chayrayku Paylla kamachinawanchejpaj derechoyoj. Jehovallataj nerqa: “Noqaqa kay pachapi imatapis ruwani khuyakuywan, justiciawan, cheqa kaywantaj, imaraykuchus chaymin kusichiwan”, nispa (Jer. 9:24). Jehová Diosqa leyesta churapuwajninchej. Payqa mana runaspa leyesninkuta valechinchu, imachus cheqan kasqanta ninanpaj. Runasman leyesta qosqantaj, cheqan kajman jinapuni kashan. Bibliaqa nin: “Kamachina tiyanaykeqa justicia patapi, cheqan kaj patapi ima sayachisqa”, nispa. Chayrayku mana iskayrayasunmanchu paypa leyesnin, yuyaychaykunasninpis cheqan kajman jinapuni kasqanmanta (Sal. 89:14). Satanastajrí mana atinchu cheqan kausayta apamuyta. Uyanpis kanraj, Jehová Dios mana allintachu kamachisqanta ninanpaj. w17.06 pág. 28 párr. 5

Jehovaqa ‘cheqa Dios’. Payqa may kʼacha tata jina, payta kasukojkunaman cheqa yachachiykunata yachachin. Chay yachachiykunapis may valorniyojllataj kanku (Sal. 31:5). Cheqa kajmanta willariwasqanchejmantapacha Bibliata, publicacionestawan leespa astawan cheqa yachachiykunata yachakorqanchej. Jinallataj tantakuykunaman, jatun tantakuykunaman rispapis. Tiemponmantaj ashkha imasta yachakorqanchej. Jesús nerqa jinataj maukʼa imasta mosoj imastawan (Mat. 13:52). Jehovaqa mosoj imasta yachakunanchejpaj yanapallawasunpuni, qolqe pʼampasqata jina maskʼasunchej chayqa (Pro. 2:4-7). ¿Imaynatá chayta ruwasunman? Bibliata, publicacionestapis sumajta estudiaspa. Ajinamanta mosoj imasta yachakusunchej (Jos. 1:8, 9; Sal. 1:2, 3). Arí, cheqa kajmanta astawan astawan yachakuyta munanallapuni. w17.06 pág. 12 párrs. 13, 14

Uj joven hermanoqa, Stephen sutiyoj ancianota 1 Corintios 7:28 versiculomanta tapurerqa. Chaypi apóstol Pablo nerqa: “Casarakojkunaqa kausayninkupi astawan llakiyniyoj kanqanku”, nispa. Chay jovenqa Stephenta tapurerqa imaschus chay llakiykuna kasqanta, chantá maykʼajllapis casarakojtin imaynatachus chayta atipananta. Stephenqa casado karqa, niraj tapuyninman kutichishaspataj, chay joventa nerqa imatachus apóstol Pablo Jehovamanta nisqanpi tʼukurinallantataj. Pay nerqa: “Paymin may khuyakuyniyoj Tata, tukuy imapi sonqochaj Diostaj. Paymin sonqochawanchej tukuy llakiyninchejpi”, nispa (2 Cor. 1:3, 4). Arí, Jehová Diosqa kʼacha tata jina mayta munakuwanchej, llakiykunapi kashajtinchejtaj mayta sonqochawanchej. Ichapis yuyarikunchej llakiypi kashajtinchej imaynatachus Palabrannejta sonqochawasqanchejta, yanapawasqanchejtataj. Chayrayku mana iskayrayasunmanchu allinninchejtapuni munasqanmanta, imaynatachus unay tiempo kamachisninpa allinninta munarqa, ajinata (Jer. 29:11). w17.06 págs. 4, 5 párrs. 1, 2

Ayqekamojkunaqa mikhunata, ropata ima necesitanku. Jinapis astawan necesitanku sonqochanata, Diosta yupaychanallankupajpuni yanapanata ima (Mat. 4:4). Ancianosqa parlayninkupi publicacionesta qonkuman, parlayninkuta parlaj hermanostapis rejsichinkuman. Chayta ruwaytaj may sumajpuni, imaraykuchus paykunaqa imastachus rejserqanku chay imasta saqeporqanku. Chayrayku familiankuta, llajtankuta, congregacionta ima faltachanku. Chay hermanosqa Jehová jina hermanosninku munakunankuta, khuyakunankuta ima necesitanku. Chayta mana rikojtinkutaj ichapis yanapata maskʼanqanku llajta masisninkupi, pikunachus mana Diosta sirvinkuchu (1 Cor. 15:33). Diosqa “forasterosta waqaychan”. Chayrayku congregacionpi kusisqa kanankupaj yanapaspaqa, Jehovata yanapashanchej. Imajtinchus ayqekamojkunaqa ichá mana lugarninkuman kutipuyta atinkuchu autoridades qhatiykachasqankurayku. Wakenqa lugarninkuman ni kutipullaytapis munankuchu. Ajinapi rikukusunman chay, ¿imaynatá yanapanawanchejta munasunman? (Mat. 7:12). w17.05 págs. 6, 7 párrs. 15, 16

Kay mundo Kuraj Supaypa atiyninpi kasqanrayku, tukuypis wakin kutispi llakiypi rikukusunman (1 Juan 5:19). Llakiywan atipachikojtinchejtaj Jehová Diospi creesqanchej, munakusqanchej ima pisiyanman. Ichapis llakiypi kashanchej machitus kasqanchejrayku, onqosqa kasqanchejrayku chayri qolqe pisiwasqanchejrayku. Llakikullasunmantaj wakin imasta mana sumajta ruwayta atisqanchejrayku. Chayri wakin imas mana munasqanchejman jina ruwakusqanrayku. Ajinapi rikukojtinchejqa ama yuyananchejchu tiyan Jehová Dios saqerpariwasqanchejta. Astawanqa Salmo 136:23 nisqanta yuyarikuna. Chaypi Jehová Diosmanta nin: ‘Kʼumuykuchisqa kashajtinchej noqanchejmanta yuyarikorqa, imaraykuchus khuyakuynenqa wiñaypaj’, nispa. Chayrayku mana jaykʼajpis iskayrayasunmanchu Jehová Dios mañakusqanchejta uyarisqanmanta, yanapanawanchejmantataj (Sal. 116:1; 136:24-26). w17.05 pág. 19 párr. 8

Pedroqa runata manchachikorqa (Pro. 29:25; Gál. 2:11-14). Payqa imatachus Jehová mana judío kajkunamanta yuyasqanta yacharqa. Jinapis manchachikorqa judíos pisipaj qhawanankuta, mana judío kaj hermanoswan khuska kasqanmanta. Apóstol Pabloqa, Pedroman “puraj uya” kasqanta Antioquiapi nerqa (Hech. 15:12; Gál. 2:13). Pedroqa llampʼu sonqo karqa, Pabloj kʼamisqantataj japʼikorqa. Bibliaqa mana ninchu Pedro congregacionpi ruwanasninta niña ruwasqanta. Chantapis aswan qhepaman Pedro iskay librosta qhelqananpaj Dios yuyaycharqa. Chaywanpis congregacionpa uman Jesusqa, Pedronejta congregacionta yanapallarqapuni (Efe. 1:22). Hermanos Pedrota perdonaspaqa Jehová jina, Jesús jina ruwarqanku. Chayrayku nisunman nichá saqerqankuchu pantaj runaj pantasqan, pantachinanta. w17.04 pág. 27 párrs. 16-18

Jehovaqa chay llajtasta chinkacherqa sajra ruwaykunata tukuchinanpaj. Ajinamantataj rikucherqa “sajra runaspaj imaschus jamunanta”. Imaynatachus chay tiempopi millay ruwaykunasta chinkacherqa, ajinallatataj kay tiempopi millay ruwaykunata tukuchenqa kay sajra mundota chinkachishaspa. ¿Imataj sajra ruwaykunaj cuentanmanta kanqa? Paraisopeqa ashkha ruwanasniyoj kasunchej, chaytaj mayta kusichiwasunchej. Sutʼincharinapaj, kay Jallpʼata uj paraisoman tukuchisunchej. Wasista ruwasunchej familiaresninchejpaj, noqanchejpaj ima. Chantapis wañuymanta kausarimojkunata napaykusunchej, Jehovamanta yachachisunchej, imastachus noqanchejrayku ruwasqanmantapis (Isa. 65:21, 22; Hech. 24:15). Chay tiempopeqa ashkha ruwanasniyoj kasunchej, chaykunataj kusichiwasunchej, chaytaj Jehovata jatunchanqa. w17.04 pág. 12 párrs. 11, 12

Jeftej wawanqa tatanpa nisqanta juntʼananpaj, toldopi Jehovata tukuy tiempo sirvinan karqa. ¿Mana tʼukurispachu Jefté imatachus Diosman qonanta nerqa? Ichapis payqa tʼukurerqa wawan ñaupajta wasinmanta taripaj llojsimunanpi. Jinapis Jefteqa nisqanta mana juntʼayta atillarqachu, nitaj wawanpis. Jefteqa wawanta rikuytawan nerqa sonqon mayta nanasqanta. Wawantaj iskay killapaj riporqa “mana casarakuspalla” wañunan kasqanmanta waqaj. Imaraykuchus ni jaykʼaj wawata rejsinmanchu karqa. Jeftejta mana waj wawan kasqanraykutaj, sutin chinkanman karqa. Jinapis Jeftepaj, wawanpaj ima mana chaychu aswan sumaj karqa. Jefté nerqa: “Kunanqa juraspa Tata Diosman, qosaj nisqayta juntʼanay tiyan”, nispa. Wawantaj nerqa: “Diosman imatachus nisqaykitaqa juntʼallay”, nispa (Jue. 11:35-39). Jefté, wawan ima Jehovaman cheqa sonqos karqanku. Chayrayku Jehovaman imatachus nisqankuta juntʼaytapuni munarqanku, juntʼayta mana atinankupaj jina kajtinpis (Deu. 23:21, 23; Sal. 15:4). w17.04 pág. 4 párrs. 5, 6

Joseqa mayta ñakʼarerqa. Paytaqa 17 watasniyoj kashajtin, hermanosnin esclavota jina venderparqanku. Chantá patronninpa warmin llullakuspa nerqa, José paywan puñuykuyta munasqanta. Chayraykutaj Josetaqa carcelman wisqʼaykorqanku (Gén. 39:11-21; Sal. 105:17, 18). Joseqa Jehová Diosta kasukusharqa, jinapis ñakʼariypi rikukorqa. Chaymanta 13 watasninman Joseqa, ujllapi carcelmanta llojsiytawan Egiptomanta kamachej kananpaj jatun atiyta japʼerqa, Faraonllataj paymanta aswan atiyniyoj karqa (Gén. 41:14, 37-43; Hech. 7:9, 10). Joseqa chay jina jatun ñakʼariypi kashaspapis, mana anchata llakikorqachu. Jehová Diospitaj atienekullarqapuni. ¿Imataj Joseta yanaparqa pacienciawan Diospi suyakunanpaj? Jehová Diospi sinchʼita creesqan. Joseqa yacharqa Jehová tukuy imata qhawashasqanta. Chayrayku hermanosninman nerqa: “Mana noqaqa Diospis kayman jina oqharikuymanchu. Qankuna mana allintachu ruwawayta munarqankichej, Diostajrí chay mana allin kajta allinman tukucherqa, mayqentachus kunan rikushankichej, chay ashkhasta kawsachinaypaj”, nispa (Gén. 50:19, 20). Joseqa, pacienciawan Diospi suyakusqan mana qhasipajchu kasqanta repararqa. w17.08 págs. 4, 6 párrs. 6, 12, 13