Abril

Sapa ujninchejqa ancianosmanta mayta yachakusunman. Chaypajqa, “allinta kausakusqankuta qhawarispa, paykuna jina creeyniyoj” kanapaj kallpachakusunman. Chantapis may sumajpuni kanman yuyaychawasqanchejta kasukunanchej. Imajtinchus Bibliaj nisqanman jinapuni yuyaychawanchej (Heb. 13:7, 17). Ancianosqa munakuwanchej. Jehová Diosman astawan qayllaykunanchejtataj munanku. Paykunaqa, uj hermano tantakuykunamanta faltakusqanta chayri llakisqa kashasqanta reparaspa, usqhayllata yanaparinankupaj kallpachakunku. Chay hermanota sumajta uyarinku, kallpacharinku, Bibliaj nisqanman jinataj yuyaycharinku. Chayqa reparachiwanchej Jehová Diosqa munakuwasqanchejrayku ancianosta churasqanta. Ancianospajqa, mana facilchu pantaj hermanosta yuyaycharinanku. Chayrayku ancianos mana manchachikuspa yuyaycharinawanchejpajqa, kʼumuykukoj sonqo kana, tukuy sonqo yuyaychawasqanchejta japʼikuna, yuyaycharishawajtinchejtaj ama phiñakunachu. Chantapis yuyarikuna Diospuni munakuwasqanchejrayku ancianosnejta yuyaychashawasqanchejta. Ajinamanta allin riwasun, ancianospis ruwanankuta kusiywan juntʼanqanku. w18.03 págs. 31, 32 párrs. 15, 16

Mana tukuy wawaschu kikin kanku. Wakin wawasqa, rato Bibliata entiendenku, bautizakuytataj munanku. Wakintaj bautizakunankupaj mana ñaupariyta atillankuchu. Tatasqa, wawasninku mana ñaupariyta atisqankuta reparaspa, mana tanqanankuchu tiyan bautizakunankupaj. Astawanqa sumajtaraj yanaparinanku tiyan ñauparinankupaj. Ajinamantataj tatasqa may kusisqas kanqanku, astawanraj wawasninku kunan diapaj texto nisqanta kasukojtinku. Chaywanpis tatasqa, mana qonqanankuchu tiyan wawankuta Jesuspa yachachisqanman tukuchinanku kasqanta. Chayrayku tatasqa, piensarinkuman wawasninku bautizakunankupaj Bibliata sumajtañachus manachus entiendesqankuta. w18.03 pág. 9 párr. 6

Uj hermano wasinman wajyarikuwajtinchej rinanchejta nerqanchej chayqa, rinanchejpuni tiyan. Mana rejtinchejqa, chay hermano wasinman wajyarikunawanchejpaj tiempochakusqan, tukuy imatapis ruwasqan qhasilla kanman (Mat. 5:37). Wakin hermanosqa, uj hermano wasinman invitarejtin rinankuta nispañapis, “mana atisajchu” ninku waj hermano wasinman invitasqanrayku. Chaytataj ruwanku aswan sumaj mikhuna kananta yuyasqankurayku. Chayta ruwayqa manapuni allinchu. Imajtinchus wajyarikuwarqanchej chay hermanota, pisipaj qhawashasunman, nitaj munakushasunmanchu. Chayrayku rinanchejta nerqanchej chayqa rinanchejpuni tiyan, imatachus qoriwasqanchejtapis tukuy sonqo japʼikunanchej tiyan (Luc. 10:7). Manapuni riyta atispataj, allin kanman ñaupajmantaña mana riyta atinanchejta willarinanchej. Chayta ruwaspaqa munakusqanchejta, allinninkutataj maskʼasqanchejta rikuchisunchej. Wajyarikuwanchej chay hermanota kusichinapajqa, mayta kallpachakunanchej tiyan. Imaraykuchus mana kikin costumbresniyojchu kanchej. Wakin lugarespitaj invitadosqa imallatapis aparinkupuni, wakin lugarespitajrí mana. Wakin lugarespitaj mana phiñakunkuchu invitayta munasqan runa, mana atinanta nejtin. Wakin lugarespitajrí “mana atisajchu” nejkunata mana allinpajchu qhawanku. w18.03 pág. 18 párrs. 20, 21

Dios jina yuyanapajqa, mana Bibliallatachu rejsinanchej tiyan (1 Rey. 4:29, 30; 11:4-6). Manaqa creeypi sinchʼi sayasqa kananchej tiyan (Col. 2:6, 7). Wiñay tukusqa cristianos kanapajqa, ‘Diospa munakuyninpi kallaychikpuni’ nisqa librota estudiasunman. Kay libroqa, yanapawasunchej Bibliaj yuyaychaykunasninman jina kausakunapaj. Chay librota estudiarqanchejña chaytaj, waj publicacionesta estudiasunman, creeypi sinchʼita sayanallapajpuni (Col. 1:23). Chantapis tʼukurinanchej tiyan imaynatachus yachakusqanchejman jina kausakunanchejpi. Chaypajtaj Jehová Diospa yanapayninta mañakuna. Bibliataqa, Diospa munayninta ruwayta munasqanchejrayku estudiananchej tiyan (Sal. 40:8; 119:97). Chayta ruwaspaqa, “Diospa munayninpa contranpi kaj imasta, kay mundoj sajra imasninta munapayayta ima” qhesachayta atillasunchej (Tito 2:11, 12). w18.02 págs. 24, 25 párrs. 7-9

Noé jina sinchʼi creeyniyoj kanapajqa Bibliata sumajta estudiana, yachakusqanchejta jatunpaj qhawana, yachakusqanchejman jinataj kausakuna (1 Ped. 1:13-15). Chantapis creeyniyoj kaspa sumaj yachayniyojtaj kaspaqa, Satanasmanta, sajra mundonmantawan jarkʼakusunchej (2 Cor. 2:11). Imajtinchus Satanasqa runasta tanqan maqanakuyman, khuchichakuyman, sajra kajllata ruwaymantaj (1 Juan 2:15, 16). Chayrayku runasqa, mana reparankuchu kay mundoj tukukuynin qayllitapiña kasqanta. Creeypi mana sinchʼi sayasqa kaspaqa, noqanchejpis paykuna jina ruwayta qallarisunman. Chayrayku Jesuspa nisqanta ama qonqanachu. Payqa kay tiempota Noejpa tiemponwan kikinchashaspa, mana maqanakuymantachu nitaj khuchichakuymantachu astawan parlarqa, manaqa Diosta sirvishaspa waj imaswan musphaymanta (Mat. 24:36-39). Chayrayku Noé jinachus chayri manachus Jehová Dioswan purishasqanchejta reparakunapajqa, ichapis kaykunata tapurikusunman: “¿Rikuchinichu kausayniypi Jehová Diosta sumajta rejsisqayta? ¿Diospi creesqay yanapawanchu kamachiykunasninta kasukunaypaj, wajkunamanpis rejsichinaypaj?”, nispa (Gén. 6:9). w18.02 págs. 9, 10 párrs. 8-10

Sajra runaspa chaupinpi tiyakusqanchejrayku, ichapis paykunawan trabajanchej, chayri paykunawan escuelapi kashanchej. Ajina kajtenqa, amapuni paykuna jina puriyta qallarinachu. Mana kay mundomanta runas jina kanapajtaj, Jehová Diosman astawan qayllaykuna, Bibliata estudiaspa, hermanoswan masichakuspa ima. Runastaqa, Diosmanta yachakunankupaj yanapananchejpuni kashan. Chayrayku mayllapipis kashaspa, Jehová Diosmanta mañakuspa predicanapuni. Runaswanqa Jehovaj testigosnin jinapuni rejsichikuna. Ajinamanta runasqa, allinta purisqanchejta reparaspa, Jehová Diosta jatunchanqanku, nitaj noqanchejtachu. Imaraykuchus Jehová Diosqa, yachachiwarqanchej “munayninpa contranpi kaj imasta, kay mundoj sajra imasninta munapayayta ima qhesachananchejta. Chantá yachachillawanchejtaj, kay tiempopi allin yuyaywan kausananchejta, cheqan kajta ruwaspa”, payta yupaychaspataj (Tito 2:11-14). Jehová Dios jina kasunchej chay, munaynintataj ruwasunchej chay, wakin runas chayta reparaspa ichapis nenqanku: “Qankunawan riyta munayku, imaraykuchus uyariyku qankunawan Dios kasqanta”, nispa (Zac. 8:23). w18.01 pág. 31 párrs. 17, 18

Apóstol Pabloqa, mana nisharqachu noqanchej kikinchejta munakuy jucha kasqanta. Imajtinchus Jehová Diosqa, noqanchej kikinchejta munakunapaj jina ruwawarqanchej. Jesustaj jinata nerqa: “Runa masiykita munakunayki tiyan, qan kikiykita jina”, nispa (Mar. 12:31). Chantapis noqanchej kikinchejta mana munakusunmanchu chayqa, mana wajkunata munakuyta atisunmanchu. Bibliaqa nin: “Qosaspis warminkuta munakunanku tiyan cuerponkuta jina. Warminta munakojqa pay kikinta munakun. Manapuni pipis kikin cuerpontaqa chejnikunchu. Astawanpis cuerponta mikhunawan kallpachan, munakuntaj”, nispa (Efe. 5:28, 29). Reparanchej jina, noqanchej kikinchejta munakoyqa mana juchachu. Kay 2 Timoteo 3:2 versículo parlan paykunallata munakojkuna runasmanta. Chay jina runasqa mana allintachu ruwashanku. Pillapis pay kikinta munakun chayqa, paylla aswan sumaj kasqanta yuyakun (Rom. 12:3). Payllapi yuyaj runaqa mana wajkunapi yuyanchu. Imallapipis mana allinchu rejtintaj, wajkunata juchachan. Ajinata yuyaj runasqa, mana kusisqachu kausakunku. w18.01 pág. 23 párrs. 4, 5

Jehová Diosqa Biblianejta parlawanchej. Paymanta mañakojtinchejtaj, noqanchej Dioswan parlarinchej. Chaywanpis mana yuyanachu tiyan, Diosmanta mañakuy allinta rinallawanchejpaj kasqanta. Astawanpis Diosmanta mañakuspaqa, creenanchej tiyan pay uyariwasqanchejtapuni. Imajtinchus Jehová Diosqa uyariytapuni munashawanchej (Fili. 4:6). Bibliataj kayta niwanchej: “Llakiyniykita Tata Diosman saqey”, nispa (Sal. 55:22). May chhika hermanostaj ninku, Diosman llakiyninchejta saqeyqa, allinpuni kasqanta. Arí, Jehová Diosmanta mañakoyqa tukuytapuni yanapawasunman. Diosmantaqa mana llakiykunallapi kaspachu mañakunanchej tiyan. Wakin kutisqa problemaspi tarikusqanchejrayku, qonqapunchej Diosman agradecekuyta yanapawasqanchejmanta. Diosman agradecekuyta mana qonqanapajqa, sapa día kinsa imasllamantapis Diosman agradecekusunman. w17.12 págs. 25, 26 párrs. 10, 11

Kay tiempopeqa, may chhika runas Bibliata estudiaytawan, uj mañakuypi Jehová Diosllapaj kausanankuta ninku, chantataj bautizakunku. Chay bautizakojkunamantataj ashkhasqa jóvenes kanku, cristiano familiaspi wiñakojkuna. Chay jovenesqa allintapuni ruwanku bautizakuspa (Sal. 1:1-3). Tata kanki chayqa, ichapis mayta suyashanki wawayki bautizakunanta (3 Juan 4 kikinchay). Uña wawitasqa, Bibliaj nisqasninta sumajta japʼeqayta atinku. Arí, yachakunku wakin runaspa kausayninkumanta, ruwasqasninkumantawan. Chayrayku cristiano tatasqa, kallpachakunkupuni wawasninku Diospa Palabranta sumajta rejsinankupaj. Diospa llajtanpitaj ashkha libros, folletos, videos ima tiyan. Tatasqa, parlayninkupi kaj publicacioneswan chayri videoswan wawasninkuta yachachinkuman. Imajtinchus wawasqa Bibliata sumajta rejsinanku tiyan, Diospa qayllallanpipuni kanankupaj. w17.12 págs. 18, 19 párrs. 1, 4

Wakin hermanaspa qosankoqa, mana Jehovaj testigonchu kanku. Ajinapi tarikoj hermanataqa, ichá qosan mana respetanmanchu. Chayrayku ichá qosanwan discutiyta qallarinman, respetananta munaspa. Discutispataj ichá qosanta atipanman. Jinapis ichá chaynejta qosanqa, mana Jehovaj testigonman tukunmanchu. Chayrayku hermanasqa, qosankuman kʼumuykukoj sonqo kananku tiyan. Ajinamantataj Jehová Diosta kusichenqanku, familia ukhupipis kusisqa kausakonqanku, nitaj chʼajwaspis kanqachu. Qosan warminpa llimphu kausayninta rikuspa, Jehová Diosta sirviyta qallarinman. Ajinamanta hermanaqa qosanwan sumaj kausayta japʼiyta atenqa (1 Ped. 3:1, 2). Wakin hermanospa señorankoqa, mana Jehovaj testigonchu kanku. Ichapis ajinapi tarikoj hermanotaqa, warmin mana respetanmanchu. Jinapis hermanoqa warmin respetananpaj, mana qhaparqachananchu tiyan. Imaraykuchus Jehová Diosqa, qosas Jesús jina kʼachas kanankuta munan. Jesusqa Diospa llajtanta munakuywan, pacienciakuspataj ñaupajman pusan (Luc. 9:46-48). Uj casarasqa hermano warminwan kʼacha kajtenqa, warmin Diosta sirviyta qallarinman. w17.11 págs. 28, 29 párrs. 13, 14

Kay mundomanta runasqa mana Diospa munayninman jinachu kausakunku. Chayrayku allinta qhawarikunanchej tiyan, paykuna jina mana yuyanapaj. Imajtinchus paykuna jina yuyasunchej chayqa, pisimanta pisi Jehová Diosmanta karunchakusunman. Kay mundomanta runasqa, ichapis sajra yuyayninkuta chimpaykuchiwasunman telenejta, Internetnejta, llankʼayninchejmanta compañerosnejta, escuelamanta compañerosnejtapis. Ashkha runasqa Diosta mana rejsinkuchu. Chayraykutaj munasqankuta ruwanku (Sal. 14:1). Wakin runastaj ninku: “Diospi mana creespapis, allillanta kausakusaj”, nispa. Ichapis ashkha runasqa Diospi mana creenkuchu, wakin yachayniyoj runas kausay jinallamanta rikhurisqanta nisqankurayku. Ichapis Diospi mana creej runawan, uj wasimanta parlarisunman. Uj waseqa mana sapanmanta rikhurinmanchu, runaj ruwasqanpuni. Wasimanta nisqataj, runasqa tʼukunapaj jina ruwasqa kanchej. w17.11 pág. 21 párrs. 2-4

Tantakuykunamanqa Diosta yupaychanapaj rinchej. Chayrayku Jesuspa Wañuyninta Yuyarinapaj tantakuymantaqa, manapuni faltakunachu tiyan. Imajtinchus chay tantakuyman rinapaj kallpachakushasqanchejta Jehová Dios, Jesús ima qhawashanku. Chaytataj may jatunpaj qhawanku. Noqanchejpis paykuna jinallataj chay tantakuyman riyta jatunpaj qhawananchej tiyan. Tukuy atisqanchejtataj ruwananchej tiyan chay tantakuyman rinapaj. Chantapis tantakuykunaman mana faltakuspa rejtinchejqa, Jehová Dios sutisninchejta ‘libronpi yuyarisqa kananpaj’ churanqa. Chay libroqa ‘kausay libro’ sutikun. Chay libropi Jehová Diosqa, pikunamanchus wiñay kausayta qonqa, chaykunaj sutisninkuta churashan (Apo. 20:15). Jesuspa Wañuyninta Yuyarinapaj tantakuypaj semanas faltashajtin, Diosmanta mañakusunman, piensarisunmantaj creeypi sinchʼichus manachus kashasqanchejta (2 Cor. 13: 5). w18.01 pág. 13 párrs. 4, 5

Pakakuna llajtapiña kaspa mana yuyasqallamanta runata wañuchejqa, niña manchachikunanchu karqa. Imajtinchus Jehová Dios nerqa, chay llajtas ‘pakakunapaj kasqanta’ (Jos. 20:1-3). Jehová Diosqa nerqa mana yuyasqallamanta runata wañuchejqa, uj kutillata juzgasqa kananta, chay jucharayku. Chantapis wañojpa aswan qaylla kaj familianqa, pakakuna llajtaman mana yaykuyta atejchu. Chay runa wañuchejta wañuchinanpaj. Mana yuyasqallamanta runata wañuchejqa pakakuna llajtapiña kaspa, Jehová Diospa jarkʼayninpi kasharqa. Mana yuyasqallamanta runata wañuchejqa, mana carcelpi jinachu karqa. Imajtinchus payqa pakakuna llajtapi trabajayta, runa masinta yanapayta, Jehová Diostapis yupaychayta aterqa. Arí, pakakuna llajtapeqa kusisqa tiyakuyta aterqa. Wakin hermanosqa, juchankumanta pesachikojtinkupis, sonqonku juchachallanpuni. Wakin hermanostaj ninku: “Jehová Diosqa ni jaykʼaj perdonawanqachu”, nispa. Noqanchej ajinata ninchej chayqa, yuyarikunanchej tiyan Jehová Diosqa juchanchejta qonqayman churasqanta. Chayrayku ama saqenachu tiyan, sonqonchej juchachanallawanchejtapuni. w17.11 págs. 9, 11, 12 párrs. 6, 13, 14

Diospa llajtan ujchasqallapuni kananpajqa, Jesuspa Wañuyninta Yuyarinapaj tantakuypi imachus tʼanta, jinallataj vinopis niyta munasqanpi sumajta ñaupajmantaña tʼukurinanchej tiyan (1 Cor. 11:23-25). Mana levadurayoj tʼantaqa, Jesuspa mana juchayoj cuerponwan ninakun. Mayqentachus noqanchejrayku qorqa. Vinotaj Jesuspa yawarninwan ninakun. Jinapis mana chayllatachu entiendenanchej tiyan. Astawanqa yuyarikuna, Jehová Dios munakuwasqanchejrayku Wawanta qosqanta. Jesuspis munakuwasqanchejrayku kausayninta qosqanta. Chaypi tʼukurispaqa, Jehová Diosta astawan munakusun, hermanosninchejwantaj aswan ujchasqas kasunchej. w18.01 pág. 15 párr. 11

Jehovaqa mayta munakuwanchej. May jinatapuni munakuwasqanchejrayku Wawanta qorqa paynejta wiñay kausayta tarinanchejpaj (Juan 3:16). Jehová nisqasninta mana juntʼanmanchu chayqa, Kuraj Supayqa ninman Jehová llulla kasqanta, sajra kamachej kasqanta, runasmantataj allin imasta jarkʼasqanta. Chantapis sajra runasqa, asikuspa Jehovaj kamachisninman ninkuman: “¿Maytaj Cristoj jamusaj nisqanri? Imaraykuchus ñaupa tatasniyku wañuypi puñukapusqankumantapacha, tukuy imapis kikillanpuni kakushan, imaynachus kay mundo ruwakushajtin karqa, ajina”, nispa (2 Ped. 3:3, 4). Chayrayku Jehovaqa, paylla sumaj kamachej kasqanta tukuyman rikuchishajtin, kamachisninta salvaspa nisqanta juntʼallanqataj (Isa. 55:10, 11). Chantapis Jehovaqa munakuywan kamachiwanchej. Chayrayku mana iskaychakuspa nisunman cheqa sonqo kamachisninta wiñaypaj munakunallantapuni (Éxo. 34:6). w17.06 pág. 23 párr. 7

Génesis 3:15 versiculopi, Jehová uj salvajta kachamunanta nisqanmantapacha, 4.000 watasninman jina Diosqa ‘runasta munakusqanrayku, kʼata Wawanta qorqa’. Ajinamantataj nisqanta juntʼarqa (Juan 3:16). Chayta ruwasqanmantataj, Diosman may agradecesqa kashanchej. Jehovaj rijchʼayninman jina ruwasqa kasqanchejrayku, runasta munakuyta atinchej. Jinapis juchasapas kasqanchejrayku runasta munakunapaj mayta kallpachakunanchej kanqa. Adanpa wawan Abelqa, Jehová Diosta munakusqanrayku sumajnin ovejata payman jaywarqa (Gén. 4:3, 4). Noepis Diosta munakusqanrayku, runasman Diosmanta willallarqapuni, mana uyarejtinkupis (2 Ped. 2:5). Abrahanpis Diosta munakusqanrayku, “wawan Isaacta altar pataman churarqa”, Diosman jaywananpaj (Sant. 2:21). Noqanchejpis paykuna jina, Diosta munakunallapuni imapi rikukuspapis. w17.10 págs. 7, 8 párrs. 3, 4

Kay tiempopeqa Jesucristo Kuraj kaj Sacerdotenchej kasqanrayku, astawanraj yanapawanchej Jehová ‘Dios khuyakunawanchejpaj, jinallataj jatun khuyakuyninta qonawanchejpajpis’ (Heb. 4:16). Jesús juchanchejrayku wañusqanpi creenanchej tiyan. Nitaj yuyanachu wajkunaraykulla wañusqanta (Gál. 2:20, 21). Jesús kausayninta qosqanrayku, Diosqa juchasninchejta perdonayta atiwanchej, wiñaypajtaj kausakuyta atinchej. Jehová khuyakuwasqanchejrayku Wawanta qorqa. Ajinallatataj Dios juchanchejta perdonawajtinchejqa, mana yuyananchejchu tiyan, chay juchamanta castiganawanchejta (Sal. 103:8-12). Arí, Diosqa juchanchejta qonqayman churan. w17.11 págs. 11, 12 párrs. 14-17

Jesusqa Señorpa Cenanta ruwashajtin, uj mañakuypi nerqa, tukuy yachachisqasnin ujchasqas kanankuta, imaynatachus pay Tatanwan ujchasqa kasharqa, ajinata. Diostaj Jesuspa mañakuyninta uyarerqapuni. Imajtinchus Diospa llajtanqa may ujchasqa kashan. Chaytaj sutʼi rikukun Jesuspa Wañuyninta Yuyarinapaj tantakuypi. Imaraykuchus creenku Jehová Wawanta kachamusqanta kay jallpʼaman. Jinapis wakin lugarespeqa, waj parlayniyoj runaswan mana tantakuyta atillankuchu Diosta yupaychanankupaj. Tantakojtinkutaj chay runasta mana allinpajchu qhawanku. Dioswan, Jesuswantajrí ujchasqa kasqanchejta, may sumajpaj qhawanku. Diospa llajtanqa ujchasqa kashan, chaytaj mana tʼukunapajchu. Imaraykuchus Diosqa chay kananta nerqaña (Eze. 37:15-17; Zac. 8:23). w18.01 pág. 14 párrs. 7-9

‘Wasi perqajkunaqa’, judiospa kurajkunasninkuwan leymanta yachachejkunasninkuwan ima ninakun. Paykunaqa Mesiasta qhesacharqanku. Imaraykuchus mana creerqankuchu Jesús, Diospa ajllasqan kasqanta. Astawanpis judiosqa, Pilatota nerqanku Jesusta wañuchichinanta (Luc. 23:18-23). Arí, Jesús wañunanpajqa judíos juchayoj karqanku. Judiosqa Jesusta chejnerqanku, wañucherqankutaj. Jinapis Jesusqa wañuymanta kausarimuspa, ‘aswan patapi kaj esquina rumiman’ tukorqa, nisunman tukuy ajllasqa cristianospa kurajninman. Apóstol Pedrotaj nerqa: “Jesusta qankunaqa kʼaspipi wañucherqankichej, Diostaj wañusqas ukhumanta payta kausaricherqa”, nispa (Hech. 3:15; 4:5-11; 1 Ped. 2:5-7). Chayrayku Jesuslla salvayta atiwanchej. Imajtinchus “waj runanejtaqa manapuni salvación kanchu. Kay jallpʼapitaj mana waj suti runasman qosqa kanchu chaynejta salvasqa kananchejpaj” (Hech. 4:12; Efe. 1:20). w17.12 págs. 9, 10 párrs. 6-9

Jesusqa jatun ñakʼariy tiempomanta parlaspa, jamunanmanta parlallarqataj. Jinatataj nerqa: “Chaypacha cielopi rikhurenqa noqaj señalniy [...] Noqata rikuwanqanku phuyus patata atiywan, jatun kayniywantaj jamushajta. Corneta sinchʼita waqanqa, noqataj angelesniyta kachamusaj, paykunataj ajllasqasniyta tantanqanku”, nispa (Mat. 24:29-31). Jesusqa, kay jallpʼapi kaj ajllasqa cristianosta pusakapuytawan, cielopi tukuynin ajllasqa cristianosta ‘tantaykonqa’. Chayqa kanqa jatun ñakʼariy tiempo niraj tukukushajtin. Chanta Armagedón maqanakuy qallarenqa. Chaypeqa Jesús 144.000 ajllasqa cristianoswan, kay jallpʼamanta tukuy gobiernosta chinkarparichenqa (Apo. 17:12-14). Jesús kay jallpʼapi kaj ajllasqa cristianosta pusakapusqantawan, manaña Jesuspa Wañuyninta Yuyarinapaj tantakuyta ruwasunchu. w18.01 pág. 16 párr. 15

Jesusqa, cielopi ‘wiñay wiñaynintinpaj kausakullanqapuni’ (Apo. 1:5, 18; Rom. 6:9; Col. 1:18; 1 Ped. 3:18). Chantapis Jesusqa apostolesninman nerqa, cielopi tiyakunankupaj kausarimunankuta, paywantaj cielomanta gobernamunankuta (Luc. 22:28-30). Chantapis apóstol Pablo nerqa wajkunapis cielopi tiyakunankupaj kausarichisqa kanankuta. Pay nerqa: ‘Maychus kananta jina: Cristoraj ñaupajta kausarimorqa, ñaupaj poqoy jina, chaymantataj Cristojta kajkuna kausarimonqanku. Paykunataj kausarimonqanku Cristoj kutimunan tiempopi’, nispa (1 Cor. 15:20, 23). 1914 watamantapachataj ‘Cristoj kutimunan tiempopi’ kausakushanchej. Tumpitamantawantaj, sajra runas chinkachisqa kanqanku. w17.12 págs. 10, 11 párrs. 11, 14-16

Jehová Diosqa “may khuyakuyniyoj Tata”. Payqa mayta llakikorqa kamachisnin Abrahán, Isaac, Jacob, Moisés, rey Davidpiwan wañupusqankumanta (Núm. 12: 6-8; Mat. 22:31, 32; Hech. 13:22). Biblia nisqanman jina Jehová Diosqa, mayta munashan munasqa kamachisninta kausarichimuyta (Job 14:14, 15). Paykuna kausarimojtinkoqa may kusisqa kanqanku, niñataj onqonqankuchu. Chantapis Jehová Diosqa may munasqa wawanta wañupojta rikullarqataj. Paywan kashaspaqa mayta kusikoj (Pro. 8:22, 30). Chayrayku munasqa wawan wañupusqanmanta, imaynatapunichus llakikusqanta mana yachayta atisunmanchu (Juan 5:20; 10:17). Jehovaqa llakisqa kashajtinchej sonqochawasunpuni. Chayrayku paymanta mañakushaspaqa, sonqomantapacha tukuy llakiyninchejta willakuna. Llakiyninchejta entiendesqanta, sonqochanawanchejtapis yachayqa, mayta kallpachawanchej (2 Cor. 1:3, 4). w17.07 pág. 13 párrs. 3-5

Kay tiempopi may chhika runas, Jehová Diosta yupaychashanchej, ‘tukuy kapuyninchejwantaj jatunchashanchej’. Arí, Diospa llajtanpi yanapakunapajqa tiempochakunchej, qolqesitunchejwantaj yanapakunchej (Pro. 3:9). Arí, ‘Diosqa cheqan, manataj qonqaponqachu imastachus ruwasqanchejta’. Kay qhepa pʼunchaykunapi Diospa llajtanman, ashkha runas yaykunporqanku, Jehová Dios, Jesucristo ima yanapawasqanchejrayku. Arí, Diospa llajtanpi kaspaqa, kusisqa kanchej, jarkʼasqataj. Chayrayku noqanchejqa, Diosta yupaychanapaj kallpachakunallapuni. Chaypajqa Jehová Diospa ‘nisqanta uyarinachej, kasukunachejtaj’ (Zac. 6:15). Ajinamanta Jesucristo Rey jina, Kuraj kaj Sacerdote jinataj, sajra runasmanta jarkʼawasunchej. Angelespis jarkʼallawasuntaj. Jehová Diostaj salvawasunchej, payta kasukunapaj tukuy imata ruwajtinchej. w17.10 pág. 30 párrs. 18, 19

Pisimantawanqa kay sajra mundopi, tukuy laya negocios, política, llulla religionpis chinkachisqa kanqa. Chantá runaspa qolqenku, qorinkupis manaña valenqachu, watastaña chayta negociosta ruwanankupaj apaykachajtinkupis. Chaykunatataj profeta Ezequiel, Sofonías ima ñaupajmantaña willarqanku (Eze. 7:19; Sof. 1:18). Tukuy kausayninchejpi Dioswan amigos kayta maskʼananchejmanta, qhapajyayllata maskʼasunman chayqa, wañuy patapi kashaspa mayta pesachikusunchej, tukuy ima ruwasqanchej qhasi manakajlla kasqanta reparaspa. Chaytaj kanman tukuy kausayninchejpi jumpʼi suruyta trabajasqanchejmanta, falso qolqeta japʼiy jina (Pro. 18:11). Kay sajra mundoj kapuynenqa tukukaponqapuni. Chayrayku kapuwasqanchej imasta allinta apaykachana, Jehovawan Jesuswanpis sumaj amigos kananchejpaj. Diospa Gobiernonrayku imata ruwasqanchejpis, Jehovawan amigosllapuni kanapaj yanapawasunchej. w17.07 pág. 11 párr. 16

Wakin hermanosqa jatuchaj juchasta ruwasqankuta pakaykorqanku. Ichapis paykunaqa ancianosman mana willakorqankuchu, mana pʼenqaypi rikhuriyta munaspa. Chayri juchankuta pakaykorqanku, hermanos paykunamanta mana sajrata yuyanankuta munaspa (Pro. 28:13). Jinapis juchata pakayqa mana allinchu. Imajtinchus juchallejqa mayta ñakʼarinman, wajkunatapis ñakʼarichinman. Congregacionpitaj, ashkha chʼajwas rikhurinman, manañataj Diospis atiyninwan yanapanmanchu, ñaupajman rinanpaj (Efe. 4:30). Pi hermanollapis jatun juchapi urmajtenqa, allinpuni kanman hermanosta munakusqanrayku, ancianosman willakunan, yanapachikunanpaj (Sant. 5:14, 15). Biblia nin, ‘creeymanta, suyakuymanta nisqaqa munakuy aswan kuraj kasqanta’ (1 Cor. 13:13). Tukuyta munakusunchej chayqa, runasqa reparanqanku Jesuspa yachachisqasnin kasqanchejta, Diostataj yupaychasqanchejta. Pablo nerqa: “Manataj munakuyniyojchu kayman chayqa, tukuy ima ruwasqayqa qhasillapaj kanman”, nispa (1 Cor. 13:2). Arí, “hermanosninchejtaqa ama simillamantachu munakuna, astawanpis ruwasqasninchejpi munakusqanchejqa sutʼi yachakuchun, tukuy sonqotaj kachun” (1 Juan 3:18). w17.10 pág. 11 párrs. 17, 18

Potifarpa warmenqa Joseta sapa kuti nej: “Jamuy, noqawan puñuykunki”, nispa. Josetaj mana manchikuspa Potifarpa warminta qhesachajpuni, wañuchichinanta yachajtinpis (Gén. 39:10-12). Rahabmantañataj parlarina. Payqa Jericó llajtapi tiyakorqa. Uj kuti Israelmanta iskay wateqajkuna wasinman chayarqanku. Rahabqa chay iskay israelitasta pakaykorqa, ayqekunankupajtaj yanaparqa (Jos. 2:4, 5, 9, 12-16). Apostolesqa Jesusmanta yachachisqankurayku, saduceos paykunaman churanakorqanku. Paykunaqa Jesús jina mana manchachikoj runas karqanku, Jesusmantataj yachachillarqankupuni (Hech. 5:17, 18, 27-29). José, Rahab, Jesús, apóstoles imaqa, allin kajtapuni ruwanankupaj kallpachakorqanku. Paykunaqa Diospi atienekusqankurayku, mana manchachikoj runas karqanku. Noqanchej imapi rikukuspapis paykuna jina, Diospi atienekunanchej tiyan, nitaj noqallanchejpichu (2 Tim. 1:7). w17.09 pág. 29 párrs. 6-9

Sapallanchejmanta ñaupa kausayninchejta mana saqepuyta atillasunmanchu. Chayrayku wakinkunaqa mayta kallpachakorqanku ñaupa kausayninkuta saqepunankupaj. Jinapis Bibliata leespalla, Diospa atiyninwan yanapachikuspallataj cambiayta aterqanku (Luc. 11:13; Heb. 4:12). Noqanchejpis ñaupa kausayninchejta saqepunapaj, Bibliawan yanapachikuna. Chaypajtaj sapa día leena, leesqanchejpitaj tʼukurina, Diosmantataj yachayta mañakuna, Palabranman jina kausananchejpaj (Jos. 1:8; Sal. 119:97; 1 Tes. 5:17). Tantakuykunapaj wakichikuspa, manataj faltakusunchej chayqa, noqanchejtapis Diospa atiynin, Bibliapis kallpachawasunchej (Heb. 10:24, 25). Chantapis Dios yanapanawanchejpaj, revistasta, JW Broadcasting nisqata, JW Library nisqa programata chantá Internetpi jw.org nisqapi publicacionesta, videosta ima qowanchej (Luc. 12:42). Ajinamanta sajra ruwaykunata noqanchejmanta chinkachisunman. Jinapis Dios allinpaj qhawanawanchejpaj, Paypa qosqan mosoj kausaywan pʼachawan jina pʼachallikuna (Col. 3:10). w17.08 pág. 21 párrs. 16, 17

Rey Davidqa ashkha llakiykunapi rikukorqa. Jehová Diosqa, Davidta jovencitollaraj kashajtin Israelmanta rey kananpaj ajllarqa. Jinapis Davidqa 15 watasta suyarqa Judá ayllumanta rey kananpaj (2 Sam. 2:3, 4). Chaykamataj rey Saulmanta ayqeykacharqa. Imaraykuchus Saulqa payta wañuchiyta munarqa. Chayraykutaj Davidqa llajtanmanta ayqerqa. Chʼin pampapi, qaqa juskʼuspitaj tiyakorqa. Tiemponmantaj Saulqa uj maqanakupi wañuporqa. Chay tiempomantapacha Davidqa 7 watataraj suyakorqa Israel nacionta kamachinanpaj (2 Sam. 5:4, 5). Chantá pacienciawan Diospi suyakorqa. ¿Imarayku? Imaraykuchus Davidqa Jehová Dios mana saqerparinanpi atienekorqa. May kusisqataj suyakorqa Jehová uj pʼunchay llakiykunasninta tukuchinanta (Sal. 13:6). Chantapis Davidqa tʼukurerqa imaynatachus ñaupajpi, llakiypi kashajtin Jehová yanapasqanta. Jehová Diospi suyakusqanqa mana qhasipajchu karqa. w17.08 págs. 6, 7 párrs. 14, 15

Tiempo pasasqanman jina runasqa mana kikillantapunichu parlanku. Wakin palabrasqa manaña ñaupa tiempopi jinachu entiendekun. Ichapis ñaupajta uj palabrata oqharej kanchej, uj imamanta parlanapaj, kunantaj chay palabraqa manaña kikinchu entiendekun. Kikillantaj karqa hebreo parlaywan, griego parlaywanpis. Bibliataqa hebreopi, griegopi qhelqakorqa. Jinapis runasqa hebreota, griegotapis manaña unay tiempopi jinachu parlanku. Chantapis may chhika runasqa mana entiendenkuchu hebreo parlayta, griego parlaytapis. Chayrayku Biblia waj parlaykunaman tijrachikunanta necesitakorqa. Jinapis wakin runas yuyanku griegota yachajtillanku Bibliata sumajta entiendenankuta. Chaywanpis ichá Bibliata mana chaykamachu entiendenqanku. Jinapis Bibliaqa, tukuynin chayri wakin librosnillanpis casi 3.000 parlaykunaman tijrachisqa kashan. Chaymanta Jehovaman may agradecesqa kashanchej. Jehovataj munan ‘tukuy nacionesmanta, tukuy ayllusmanta, tukuy laya parlayniyojkunamantapis’, Palabranmanta yachakunankuta (Apo. 14:6). Chayta yachayqa yanapawanchej Jehová Diosman astawan qayllaykunapaj. Imajtinchus payqa kʼacha, tukuytataj uj rejllata qhawan. w17.09 pág. 19 párr. 4

Familianchejmanta pillapis qharqosqa kashan chayqa, maytachá kallpachakunanchej kanqa, manaña paywan parlarinapaj. Sonqonchej paywan parlanapaj aysawajtinchejpis, Diospa kamachisqanta kasukuyta munanchej. Rey Davidmanta yachakuna. Saulwan Simeiwanqa Davidpaj sajrata rimarqanku. Davidtaj paykunata wañuchiyta atinman karqa. Jinapis mana paykunapaj phiñakorqachu, nitaj contrankuta imatapis ruwarqachu (1 Sam. 26:9-11; 2 Sam. 16:5-10). Chaywanpis uj kuti Davidqa, sajra munayninwan atipachikuspa Betsabewan puñuykorqa. Waj kutipitaj phiñakuyninwan atipachikuspa, Nabalta wañuchinanpaj kachaykukorqa (1 Sam. 25:10-13; 2 Sam. 11:2-4). ¿Imatataj rey Davidmanta ancianos yachakunkuman? Mana hermanospaj usqhayllata phiñakunankuta, nitaj sajra capataz jina hermanosta kamachinankuta. Chantapis Davidmanta yachakusunman, mana sinchʼita sayashasqanchejta yuyakunata (1 Cor. 10:12). w17.09 págs. 5, 6 párrs. 12, 13