Mayo

Mana mayqen jasutʼiypis chay ratoqa kusikunapaj jinachu, manaqa llakikunapaj jina. Chaywanpis aswan llakiy ima jasutʼiytapis chayri ima yuyaychaytapis qhesachayqa (Heb. 12:11). Cainmanta parlarina. Cainqa hermanonta wañuchiyta munarqa chejnikusqanrayku. Chayta Jehová Dios reparasqanraykutaj, Cainta nerqa: “Imaraykutaj jinata phiñakunki, uyaykipis uj jinayanri? Sichus allinta ruwawaj chayqa, mana jina uyayojchu kawaj. Qanqa mana allintachu ruwanki, chayrayku juchaqa atipasuytaña munashan. Manachus jina kawaj chayqa, juchata atipawaj”, nispa (Gén. 4:6, 7). Chaywanpis Cainqa Jehová Diosta mana kasukorqachu. Jinapitaj hermanonta wañurpacherqa. Chayraykutaj wañupunankama mayta ñakʼarerqa (Gén. 4:11, 12). Sichus Caín Jehová Diosta kasukunman karqa chayqa, mana ñakʼarinmanchu karqa. Reparanchej jina, Jehová Diosqa mana qhasitachu kʼamiwanchej manaqa allinninchejpajpuni (Isa. 48:17, 18). Chayrayku ‘uyarinanchej tiyan imatachus Jehová Dios yachachisqanta, yachayniyoj kananchejpaj’ (Pro. 8:33). w18.03 pág. 32 párrs. 18-20

Danielmanqa tatasnin sumajta Diosmanta yachachej kanku. Yachacherqanku Jehovata munakuyta, Diospa Palabranman jinataj kausakuyta. Danielqa, wañupunankama Diospa Palabranta sumajta estudiarqa. Jehová Diostataj sumajta rejserqa, imastachus israelitasrayku ruwasqantapis. Chaytataj reparanchej Daniel 9:3 al 19 versiculosta leespa. Chaypi Danielqa llampʼu sonqowan, tukuy sonqowantaj Diosmanta mañakorqa. Noqanchejqa Danielpa mañakuyninta leerisunman, chaypitaj tʼukurisunman. Babiloniapeqa llulla diosesta yupaychaj kanku. Chayrayku judiospajqa, chaypi kausakuy mana facilchu karqa. Jehová Diostaj, judiosman jinata nerqa: “Maymanchus presos apasqa karqankichej, chay naciompa allinnimpaj trabajaychej”, nispa (Jer. 29:7). Chantapis Jehová Diosqa payllata tukuy sonqo sirvinankuta kamacherqa (Éxo. 34:14). ¿Chay kamachiykunata Daniel juntʼayta aterqachu? Arí, payqa Diosta sumajta rejsisqanrayku payllata kasukorqa, nitaj autoridadestachu. Unay watasninmantaj Jesuspis Diosllata kasukunata nerqa (Luc. 20:25). w18.02 pág. 10 párrs. 11, 12

Ichapis may llakisqa kashanchej, onqoykusqanchejrayku, qolqe pisiwasqanchejrayku chayri runas qhatiykachawasqanchejrayku. Manachayri Diosta sirvispapis ichá llakisqalla kashasunman. Ajinapi rikukushanchej chayqa, Noemanta, Danielmanta, Jobmantawan yachakuy mayta kallpachawasunchej. Paykunaqa noqanchej jinallataj llakiykunapi rikukorqanku. Wakin kutitaj wañuy patapi rikukorqanku. Jinapis paykunaqa Jehová Diosta kasukullarqankupuni, sinchʼi creeyniyojtaj karqanku. Jehová Diostaj munan paykunamanta yachakunanchejta (Eze. 14:12-14). Ezequielqa, capítulo 14 versículo 14 nisqanta, Babiloniapi qhelqarqa, 612 watapi Jesús niraj jamushajtin (Eze. 1:1; 8:1). Chaymanta pisi watasninmantaj 607 watapi, Jerusalén thuñisqa karqa. Chaypachaqa pisi runaslla salvakorqanku. Salvakoj runasqa Noé jina, Daniel jina, Job jinataj Jehová Diosta kasukojkuna karqanku (Eze. 9:1-6). Jehová Diosqa, sajra runasta chinkachishaspa, Noé jina, Daniel jina, Job jina kasukoj runasllata salvanqa (Apo. 7:9, 14). w18.02 págs. 3, 4 párrs. 1-3

Allin kanman jóvenes kayta tapurikunanku: “¿Tantakuykunaman, predicacionmanpis tatasniyta kusichinayraykullachu rini, chayri Jehová Diosta munakusqayraykuchu?”, nispa. Arí, jóvenes chayri machitus kaspapis, Diospaj astawan llankʼananchejpaj kallpachakunanchej tiyan. Diospaj astawan llankʼajtinchejqa, creeypi sinchʼi sayasqa kasunchej (Ecl. 12:13). Wiñay tukusqa cristianos kanapajqa, kallpachakunallanchejpuni tiyan. Imajtinchus Bibliaqa niwanchej: “Aychaj munayninpi yuyayqa wañuyman pusan. Diospa atiyninpi yuyaytajrí kausayman pusan”, nispa (Rom. 8:6-8). Chayrayku Jehová Diosqa atiyninwan sapa ujninchejta yanapawanchej. Nitaj suyanchu ni imapi pantananchejta. Jinapis creeypi sumaj sayasqa kanapajqa, kallpachakunallanchejpuni tiyan. Chantapis Bibliataqa, mana cuentota jinallachu leenanchej tiyan. Astawanqa Bibliapi sumaj yachachiykunata maskʼanapaj kallpachakunanchej tiyan. Chaykunataj yanapawasunchej Jehová Diospa qayllallanpipuni kanapaj. w18.02 pág. 25 párrs. 10, 11

Wawasqa, Diospa munayninta ruwanankupaj, bautizakunankupajtaj, Bibliamanta mana tukuy imatapunichu yachananku tiyan. Imajtinchus bautizakuspañapis Bibliamanta yachakullanqankupuni, imaynatachus tukuy cristianos yachakushallanchejpuni, ajinata (Col. 1:9, 10). Apóstol Pabloqa, 50 watapi, Filipos llajtapi kaj congregacionta iskay kutitaña waturikoj risqa. Chay kutipitaj runasqa, Pablota Silastawan qhasimanta carcelman wisqʼaykuchisqanku. Chay tutataj, ujllata jallpʼa sinchʼita kharkatitisqa, carcelpa punkusnintaj kicharirakusqanku. Carcelerotaj cárcel punkusta kicharasqasta rikuspa, presos ayqesqankuta yuyasqa. Chayrayku espadanta orqhospa wañuchikuyta munasqa. Pablotajrí sinchʼita qhaparispa nisqa: “¡Ama wañuchikuychu! Tukuyniyku kaypi kakushayku”, nispa. Chantá Pablowan Silaswanqa, carceleroman, familianmanwan Jesusmanta yachachisqanku. Carcelerowan familianwanqa Jesuspi creesqanku, reparasqankutaj Jesusta kasukunanku kasqanta. Chay ratopachataj paywan tukuy familianwan bautizakusqanku (Hech. 16:25-33). w18.03 págs. 9, 10 párrs. 7, 8

Diospa llajtanpeqa wajkunaman qorispa kusisqa kanchej. Nitaj paykunallata munakoj runas jinachu, wajkuna qorinallawanchejta suyanchej (Hech. 20:35; 2 Tim. 3:2). Noqallanchejtachus chayri Jehová Diostachus astawan munakusqanchejta reparakunapajqa, allin kanman Filipenses 2:3, 4 versiculospi piensarinanchej. Chaypi nin: “Ama churanakojkuna, nitaj qhasimanta jatunchakojkunaqa kaychejchu. Astawanqa kʼumuykukoj sonqo kaspa, wajkunata qankunamanta aswan kurajta jina qhawaychej. Ama allinnillaykichejtaqa maskʼaychejchu. Manachayqa wajkunaj allinninkutapis maskʼaychej”, nispa. Chantá kayta tapurikusunman: “¿Kasukunichu kay yuyaychayta? ¿Congregacionpi, predicacionpipis hermanosta yanapakunichu?”, nispa. Hermanosta yanapanapajqa mayta kallpachakuna, tiempochakuna, gustawasqanchej imastapis saqena tiyan. Jehová Dios allinpaj qhawawasqanchejta yachaspaqa, kusisqa kasunchej. w18.01 págs. 23, 24 párrs. 6, 7

Ichapis kaykunata tapurikusunman: “¿Creenichu Jehová Diospa llajtanpipuni kashasqayta mayqentachus ajllan munayninta ruwananpaj? ¿Tukuy atisqaytachu kallpachakuni predicanaypaj, Bibliamantataj yachachinaypaj? ¿Rikuchinichu ruwasqasniywan qhepa pʼunchaykunapi kausashasqayta, tumpamantawantaj Satanaspa mundon chinkananta? ¿Jehová Diospi, Jesuspi ima atienekushallanipunichu?”, nispa (Mat. 24:14; 2 Tim. 3:1; Heb. 3:14). Kay tapuykunaman kutichispaqa, reparakusunchej creeypi sinchʼitachus sayashasqanchejta chayri manachus. Jesuspa Wañuyninta yuyarinapajqa, wakichikusunman chaymanta parlaj yachaqanasta leespa, chaypi piensarispa ima. Chay yachaqanasqa sutʼinchan imajtinchus chay tantakuyman rinapuni kasqanta (Juan 3:16; 17:3). Chantá wiñay kausayta tarinapajqa, Jehová Diosmanta yachakunanchej tiyan, Wawan Jesuspitaj creenanchej tiyan. Jesuspa Wañuyninta yuyarinapajqa wakichikusunman chaymanta parlaj yachaqanasta estudiaspa. w18.01 págs. 13, 14 párrs. 5, 6

Jovenesqa, Bibliata leespa, publicacionesta leespa, tantakuykunaman rispa ima, yachakonqanku imaynatachus Jehová Dios wajkunata yanapasqanta, payta kasukunallankupajpuni. Jinapis Jehová Diosman astawan qayllaykusqankuman jina, reparananku tiyan imaynatachus Jehová Dios paykunata yanapasqanta. Chaypajqa allin kanman, yuyarikunankupuni imaynasmantachus Dios yanapasqanta. Jehová Diosqa kʼacha kasqanrayku, saqewanchej payman qayllaykunanchejta, jinallataj Wawanmanpis. Jinapis ichá uj jovenqa yuyanman tatasninraykulla Jehová Diospa llajtanpi kasqanta. Nitaj Jehová Dios payta llajtanman pusamusqanraykuchu. Chaywanpis tukuy bautizasqa jovenesqa, creenankupuni tiyan Jehová Dios llajtanman pusamusqanta. Imajtinchus uj jovenqa, niraj bautizakushaspa Jehová Diosman nerqa payllata sirvinanta, payta munakusqanrayku. Bibliataj niwanchej: “Pillapis Diosta munakun chayqa, Diospis payta rejsin”, nispa (1 Cor. 8:3). Chayrayku Jehová Diospa llajtanpi kasqaykimanta kusikuy. w17.12 pág. 26 párrs. 12, 13

Pillapis “jasutʼisqayki” niwajtinchejqa, chay rato yuyanchej mayta seqʼoykunawanchejta. Chaywanpis Bibliapeqa, jasutʼiy palabrata oqharikun, pitapis munakuywan yuyaychanamanta, yachachinamanta ima parlanapaj (Pro. 1:2-7; 4:11-13). Jehová Diostaj munakuwasqanchejrayku jasutʼispa cheqanchawanchej, yuyaychawanchejtaj. Imajtinchus payqa wiñaypaj kausakunanchejta munan (Heb. 12:6). Arí, Jehová Diosqa uj tata jina allinninchejpajpuni castigaspa wanachiwanchej. Cristianosqa Diospa llajtanmanta kanchej (1 Tim. 3:15). Chayrayku Jehová Diosqa derechoyoj leyesta churapunawanchejpaj, mana kasukojtinchejtaj castiganawanchejpaj. Chantapis Jehová Diospa castigonqa reparachiwanchej imaraykuchus payta kasukuy allinninchejpajpuni kasqanta (Gál. 6:7). w18.03 págs. 23, 24 párrs. 1, 3

Joven, ichá yuyanki tatasniyki anchata kʼamisusqankuta, chayri ñawillankupi purichisusqankuta. Chayrayku ichapis mayta phiñakuwaj. Jehová Diosmantataj karunchakuyta munawaj. Chaywanpis Jehová Diosmanta karunchakojtiykeqa, mana allinchu risonqa. Imajtinchus reparanki runas mayta chejnikususqankuta, tatasniykiwan hermanosllawantaj mayta munakususqankuta. Joven, tatasniykeqa munakususqankurayku jasutʼisunku. Manachus munakusunkuman chayqa, mana jasutʼisunkumanchu (Heb. 12:8). Tatasniykeqa ichapis mana munasqaykiman jinapunichu jasutʼisonqanku. Jinapis kallpachakuy reparanaykipaj, imajtinpunichus jasutʼisusqankuta. Amataj usqhayta phiñarparikuychu. Joven, ama uña wawita jina imallamantapis phiñakuychu. Astawanqa tatasniykej kʼamisusqanta uyariy, amataj pisipaj qhawaychu (Pro. 1:8). w17.11 pág. 29 párrs. 16, 17

Ichá wawaykimanta llakikuwaj, bautizakojtin allinta rinanmantachus manachus. Imaraykuchus ichá repararqanki, wakin jóvenes bautizakuytawan Diospa kamachiykunasninta mana tukuy sonqochu kasukusqankuta. Chantapis ichá reparallarqankitaj, wakin jóvenes Jehová Diosmanta karunchakusqankuta. Chayrayku ichapis yuyawaj wawayki tiemponman Diosmanta karunchakunallantataj. Imaynatachus ñaupa tiempomanta wakin cristianos munakuyninkuta chiriyacherqanku, ajinata. Tatas wawasninkuta, Diospa qayllallanpipuni kanankupaj, salvacionta tarinankupajtaj yanapananku tiyan (1 Ped. 2:2). Pabloqa Timoteoman jinata nerqa: “Imastachus yachakusqaykiman jinallapuni ruway. Chay yachakusqaykipi creenaykipajqa wajkuna yanapasorqanku. Qantaj yachanki, imayna runaschus chay imasta yachachisusqankuta. Qanqa wawitamantapacha Diospa qhelqasqa palabranta rejserqanki. Chayqa yachayniyojman tukuchiyta atisunki, Cristo Jesuspi creesqaykinejta salvacionta tarinaykipaj”, nispa (2 Tim. 3:14, 15). Pabloqa Timoteota reparacherqa, Diospa qhelqasqa palabranta rejsisqanta, yachakusqanpi creenanpajtaj wajkuna yanapasqankuta, yachayniyojmantaj tukusqanta, Cristo Jesuspi creesqannejta salvacionta tarinanpaj. w17.12 págs. 18, 19 párrs. 2, 3

Ashkha iglesiaspeqa sajra runas infiernoman rinankuta ninku. Wakin iglesiaspitaj diezmota mañanku, wakinpitaj uj partidota yanapanankuta ninku. Chayrayku ashkha runasqa ninku: “Ni mayqen iglesiaman rispa, allillan kashani”, nispa. Jehová Diosman qayllaykusparí, allinta kausakunchej, kusisqataj kasunchej (1 Tim. 1:11). Arí, Jehová Diosqa tukuy imata allinninchejrayku ruwan (Hech. 20:35). Payqa llajtanman pusamuwarqanchej. Chaypitaj familianchejwan kusisqa kanchej. Imajtinchus Jehová Diosqa, yachachiwarqanchej warminchejta chayri qosanchejta mana wasanchanata. Chantapis yachachillawarqanchejtaj familia ukhupi munanakunata, respetanakunata, imaynatachus wawasta uywanatapis. Jehová Diospa munasqanman jina kausakoyqa, yanapawanchej congregacionpi mana chʼajwas kananpaj. Yanapallawanchejtaj hermanospura munanakunapaj, ujchasqataj kanapaj. w17.11 págs. 21, 22 párrs. 6, 7

Kay tiempopeqa Pablo jina llakikunchej, phutikunchejtaj. Imajtinchus Diosta kusichiyta munaspapis pantanchejpuni. Wakin hermanos jatun juchapi urmasqankurayku, jinata yuyanku: “Jehová Diosqa ni jaykʼaj perdonawanqachu”, nispa. Bibliaqa nin, Jehová Diospi atienekojkuna mana juchachasqa kanankuta (Sal. 34:22). Noqanchejqa mana iskayrayananchejchu tiyan Jehová Dios khuyakunawanchejmanta. Imaraykuchus noqanchejrayku Jesús wañorqa. Chayrayku apóstol Pabloqa, jinata nerqa: ‘Diosman graciasta qoni. Imaraykuchus paymin kacharichiwan juchamanta Señorninchej Jesucristonejta’, nispa (Rom. 7:25). Pablo chayta nerqa, Jehová Jesucristonejta juchasninta perdonasqanpi atienekusqanrayku. Jesucristo kausayninta qosqanrayku, sonqonchejta qhasi manakaj ruwaykunamanta llimphuchan, sonqo tiyasqa kananchejpaj (Heb. 9:13, 14). Jesucristo Kuraj kaj Sacerdotenchej kasqanrayku, ‘Diosman qayllaykunapaj yanapawasunman, salvawasunmantaj. Imaraykuchus payqa kausashallanpuni, Diosmanta yanapata mañapunawanchejpaj’ (Heb. 7:24, 25). w17.11 págs. 8, 9, 12 párrs. 1, 2, 15

¿Imaynatataj Jehová Diosman nisqanchejta juntʼasunman? Diospa munayninman jina kausakunapaj sapa día kallpachakuspa, juchaman tanqasqa kaspapis (Sal. 61:8). Ichapis trabajopi chayri colegiopi pillapis coqueteawasunman. Ajinapi rikukuspaqa, Jehová Diospa nisqanta kasukuna (Pro. 23:26). Ichapis familianchejmanta noqallanchej Jehová Diosta yupaychashanchej. Ajina kajtenqa Diospa yanapanta mañakuna, nisqanman jinallapuni kausakunapaj. Imapi rikukuspapis Jehová Diosmanta mañakunapuni. Agradecekunataj Palabranwan yuyaychawasqanchejmanta, mayta munakuwasqanchejmantapis. Bibliata leenapajtaj sapa día kallpachakunanchej tiyan. Chaykunatataj ruwananchejta nerqanchejña niraj bautizakushaspa, Jehová “Dios munasqaykiman jina kausakusaj”, nishaspa. Chantapis Diospa wawan kasqanchejta rikuchinchej payta kasukuspa, munakuspa, payta sirvinapajtaj kallpachakuspa. Chantá imaynatachus kausakusqanchejwan Diosta jatunchallanchejtaj. w17.10 págs. 23, 24 párrs. 11, 12

Uj kuti, takiykunata qhelqaj runa, ajinata nerqa: “Pillapis imata niwajtinchejqa, mana sonqonchejta kuyurichillanmanchu. Takiykunatajrí sonqonchejta kuyurichinman”, nispa. Jehová Diosman takispataj, payta alabanchej, astawantaj payta munakunchej, qayllaykunchejtaj. Chaykunata yachaytaj reparachiwanchej Jehová Diosman tukuy sonqo takina kasqanta. Chantapis sapallanchej chayri hermanoswan takispaqa, Jehová Diosta yupaychanchej. Wakin lugarespi qharisqa, pʼenqakunku runaspa ñaupaqenkupi takiyta. Chayrayku ichá wakin hermanospis, congregacionpi takiyta pʼenqakullankumantaj. Sichus congregacionmanta ancianos jatunmanta takiyta pʼenqakunkuman chayqa chayri takina horaspipuni imatapis ruwaj churakunkuman chayqa, congregacionmanta hermanosqa, manaña tukuy sonqochu Jehová Diosman takinkuman (Sal. 30:12). Jehová Diosman takispaqa payta jatunchanchej. Chayrayku tantakuypi takishaspaqa, ama waj imasta ruwanachu. w17.11 págs. 3, 4 párrs. 1-3

Tukuypis allinta kausakuyta munanchej, ni imamanta llakikuspa. Jehová Diosmantaj may agradecesqa kashanchej, ‘sonqo tiyasqa’ kanapaj yanapawasqanchejmanta. Arí, sonqo tiyasqa kaspaqa, ima problemapi rikukuspapis mana anchata llakikunchejchu (Fili. 4:6, 7). ‘Dioswanpis allinpi’ kanchej, paypa munayninman jina kausakusqanchejrayku (Rom. 5:1). Jinapis qhepa pʼunchaykunapi tiyakusqanchejrayku, kausay may llakiy. Runasqa mayta sajrayashanku, chʼajwaspis mayta yapakushan (2 Tim. 3:1-4). Noqanchejtajrí Diabloman churanakunanchej tiyan, llulla yachachiykunasninman ima (2 Cor. 10:4, 5). Mana chayllachu, familianchej ukhupipis chʼajwas kallantaj, wakin familiaresninchej mana Jehová Diosta yupaychasqankurayku. Paykunaqa, Jehová Diosta yupaychasqanchejrayku ichá asikuwasunman manachayri familiata tʼaqanachishasqanchejta niwasunman. Chantapis nillawasunmantaj: “Manaña familiamantachu kanki”, nispa. w17.10 pág. 12 párrs. 1, 2

Uj Biblia waj parlaypi ruwakojtenqa, uj tiempota sumajta entiendekunman. Unayninmantajrí manaña entiendekunmanchu. Imaraykuchus uj parlayqa watas pasasqanman jina cambian. Uj Bibliamanta parlarina. Inglés parlaypi Versión del Rey Jacobo nisqa Biblia, 1611 watapi ruwakorqa. Chay Bibliaqa tiemponpi inglesta parlajkunapaj may rejsisqa karqa, entiendekunanpaj jina ruwasqa kasqanrayku. Inglés parlaypi Versión del Rey Jacobo nisqa Bibliaqa, chay tiempopi entiendenapaj jina karqa. Kunanqa manaña sutʼita entiendekunchu. Imaraykuchus chay Bibliapi rikhurej wakin palabrasta, runasqa manaña parlankuchu. Ajinallataj karqa waj parlaykunaman tijrachisqa Bibliaswanpis. Chayrayku noqanchejqa Jehová Diosman mayta agradecekunchej, Diospa Palabran Biblia kapuwasqanchejmanta. Kay Bibliaqa may sumajpuni, chʼuwitataj kashan, parlasqanchejman jinataj. Kunankama Diospa Palabran Bibliaqa tukuynin chayri wakin librosnillan 150 parlaykunamanta astawan tiyan. Chayrayku casi tukuy runas parlayninkupi leeyta atinku. Kay Biblia chʼuwita, runaj parlayninman jinataj kasqanrayku, runaj sonqonmanpuni chayan. w17.09 págs. 19, 20 párrs. 5, 6

Jovenesqa ajllananku tiyan, imatachus ruwanankuta. Kuraj Supayqa tukuyman churanakuwanchej. Jinapis jovenesqa mana manchachikunankuchu tiyan. Astawanqa kallpachakunanku tiyan allin amigosta ajllanankupaj, allin imaswan kusirikunankupajpis. Kallpachakunallankutaj tiyan bautizakunankupaj, millay imaswan yuyayninkuta mana chʼichichanankupajpis. Jovenesqa sumajta piensarinkuman imatachus kausayninkupi ruwanankuta. Wakin suyuspeqa, jovenesta inkitanku uj profesionniyoj kanankupaj, ashkha qolqetataj gananankupaj. Wakin suyuspitaj tukuy imapis ancha valesqa. Chayrayku ichá wakin jovenesqa trabajollaman qokunkuman, familiankuta yanapanankupaj. Paykunaqa Jehovapaj astawan llankʼankuman, Gobiernonmantataj willayta ñaupajman churankuman. Jehová Diostaj paykunata bendecenqa, familiankumanpis ni imata faltachenqachu. Ñaupa tiempomanta joven Timoteoqa “esclavo jina llankʼarqa sumaj willaykunata willaspa”. Jovenespis Timoteo jinallataj ruwankuman (Fili. 2:19-22). w17.09 págs. 29, 30 párrs. 10-12

Bibliata sapa kuti sumajta estudiayqa, sajra munayninchejwan mana atipachikunapaj yanapawasun. ¿Imaynata? Bibliaqa willawanchej sajra munayninkuwan mana atipachikojkuna, ima bendicionestachus japʼisqankuta. Willallawanchejtaj sajra munayninkuwan atipachikojkuna, ima llakiykunapichus rikukusqankuta. Jehová Diosninchej Palabranpi chaykunata qhelqacherqa, paykunamanta yachakunanchejpaj (Rom. 15:4). Chayrayku may allin kanman Bibliata leenanchej, sumajtataj estudiananchej. Bibliata estudiashaspaqa imaspichus noqanchejta, familianchejtapis yanapananpi tʼukurina. Chantá Bibliaman jina kausakunapaj, Jehovamanta yanapata mañakuna. Sajra munayninchejwan chayri phiñakuywan atipachikusqanchejta reparanchej chayqa, Jehová Diosmanta yanapata mañakuna, publicacionespi yuyaychaykunata maskʼana, kausayninchejta cambianapajtaj mayta kallpachakuna (Sant. 1:5). w17.09 págs. 6, 7 párrs. 15, 16

Kay “mosoj runa” kaymantaqa, ‘mosoj kausaywan pʼachallikunamanta’ parlan. Chay mosoj kausaytaj, Diospa munayninman jina kashan (Efe. 4:24). Jehovaj rijchʼayninman jina ruwasqa kasqanchejrayku, tukuypis chay mosoj kausaywan pʼachawan jina pʼachallikusunman. Ajinamanta imallatapis Jehová Dios jina ruwanapaj (Gén. 1:26, 27; Efe. 5:1). Apóstol Pablo mosoj kausaywan pʼachallikuymanta parlaytawan, tukuyta uj rejllata qhawanata nerqa. Pay nerqa: “Manaña imananchu: griego kay chayri judío kaypis, circuncidasqa kay chayri mana circuncidasqa kaypis. Manallataj imananchu: forastero kay, monte runa kay, esclavo kay chayri mana esclavo kaypis”, nispa. Chayrayku Diospa llajtanpi mana pitapis pisipaj qhawasunmanchu wajcha kasqanrayku, waj laya runa kasqanrayku chayri waj suyumanta kasqanrayku. Imaraykuchus mundontinpi tukuy cristianosqa, ‘ujlla kanchej’ (Col. 3:11; Gál. 3:28). Chantapis mosoj kausaywan pʼachallikuspaqa, tukuy runasta respetowan qhawanchej, ima lugarmanta kajtinkupis, qhapaj chayri wajcha kajtinkupis (Rom. 2:11). w17.08 págs. 22, 23 párrs. 1, 3, 4

Jehovaqa pacienciayoj kananchejta munan. Paypis pacienciayojllataj. Pay jina pacienciayojqa ni pi kanchu (2 Ped. 3:9). Jehová Diosqa may chhika watasta suyakushallanpuni Edén huertapi Kuraj Supay imatachus nisqan, llulla kasqanta sutʼita rikuchinanpaj. Jehovaqa pacienciawan suyakushallanpuni maychus tiemponpi sutinta llimphuchananpaj. Chay tiempo chayamojtintaj “paypi tukuy suyakojkunaqa”, may chhika bendicionesta japʼenqanku (Isa. 30:18). Jesuspis pacienciayojllataj karqa. Kay jallpʼapi kashaspa wañupunankama tatanta kasukullarqapuni. Payqa 33 watapi noqanchejrayku wañorqa, kausarimuspataj cieloman kutiporqa. Chay watamantapacha 1914 watakama suyakorqa, rey jina kamachiyta qallarinanpaj (Hech. 2:33-35; Heb. 10:12, 13). Chantapis tukuy enemigosnin wiñaypaj chinkachisqa kanankukama 1.000 watastawanraj suyakullanqapuni (1 Cor. 15:25). Chay chhika suyakusqanqa mana qhasipajchu kanqa. w17.08 pág. 7 párrs. 16, 17

Uj hermana Susi sutiyoj nerqa: “Wawayku wañupusqanmantapacha manchay llakisqa kasharqayku. Casi watatapuni ajina kasharqayku”, nispa. Uj hermanotaj nin: “Mana yuyallarqanipischu señoray wañupunanta. Pay wañupojtintaj llakiymanta ni imanakuyta aterqanichu. Sonqoyqa mayta nanawarqa”, nispa. Ajina llakiykunapeqa ashkhas rikukunku. Diospa kamachisninmanta ashkhas mana yuyallarqankupischu, Armagedón niraj chamushajtin familiankumanta pillapis wañupunanta. Pinillaykipis wañupun chay, chayri amigoykej familianmanta pillapis wañupun chayqa, ichapis tapurikunki: “¿Imaynatá payta sonqochariyman?”, nispa. Wakin runasqa niyta yachanku: “Tiempo pasasqanman jina llakiyninchejta qonqapullasunchej”, nispa. ¿Ajinapunichu kanman? Uj viuda hermana nin: “Llakiyninchejtaqa mana tiempo pasasqanman jinallachu qonqapunchej. Astawanqa llakiyninchejta qonqapunanchejpaj tiemponchejta allinta apaykachana”, nispa. Imaynatachus cuerponchejpi imanarpakojtinchej, pisimanta pisi sanoyapun. Ajinallatataj ima llakiyninchejpis pisimanta pisi chinkapun. w17.07 págs. 12, 13 párrs. 1-3

Noqanchejqa mana animalitos jinachu kanchej. Animalitosqa mikhunankupaj, yakuta ujyanankupaj, miranankupaj imalla ruwasqa kanku. Noqanchejtatajrí Jehová Diosqa ruwawarqanchej, payta rejsinanchejpaj, yupaychananchejpajtaj, ajinamanta kusisqa kausakunanchejpaj (Sal. 128:1; Mat. 5:3). Chantapis Jehová Diosqa “payman rijchʼakojta” ruwawarqanchej. Diospa Palabran nin payqa “munakuyniyoj”, ‘kusikuyniyojtaj’ kasqanta (2 Cor. 13:11; 1 Tim. 1:11; Gén. 1:27). Jehová Dios jina kanapaj kallpachakusunchej chayqa, may kusisqa kausakusunchej. Diospa Palabran nin: “Aswan kusiy wajman qoriy, qorichikunamanta nisqaqa”, nispa (Hech. 20:35). Arí, wajkunaman qorispaqa kusisqapuni kanchej. Jehová Diosqa munan payta munakunanchejta, runa masinchejtapis munakunallanchejtataj. Chayraykutaj kausayninchejpi imatachus ruwananchejta allinta ajllananchejta munan (Mat. 22:36-39). w17.07 pág. 23 párr. 3

Jehová Diosqa mana kʼumuykachachiwanchejchu, astawanqa sumajta cuidawanchej. Paytaj llajtanmanta llakikun, allinnintataj munan. Chantá sapa ujninchejmantapis llakikullantaj. Unay tiempopi Jehová Diosqa, 300 watasta jina juezkunanejta llajtanta enemigosninkumanta librarqa. Chay tiempopi, Jehovaqa Rut sutiyoj warmimanta khuyakorqa. Payqa mana israelitachu karqa. Jinapis tukuy imata ruwarqa israelitaswan khuska Jehovata yupaychananpaj. Jehovataj Rutta bendicerqa uj qosawan, uj wawitawan ima. Rut kausarimojtin, wawanpa mirayninmanta Jesucristo jamusqanta yachanqa. Yachallanqataj paypa kausayninmanta uj libro qhelqakusqanta. Chay librotaj sutinwan Bibliapi kashasqanta. Chaykunata yachaspataj maytachá sonqon qhallallarenqa (Rut 4:13; Mat. 1:5, 16). w17.06 págs. 28, 29 párrs. 8, 9

Peter hermanonchejmanta parlarina. Payqa 1970 watapi 19 watasniyoj karqa, chaypachallarajtaj Gran Bretaña suyupi Betelman sirvej yaykorqa. Pay nerqa: “Uj kuti, wasimanta wasi predicashajtiy, barbasniyoj runa llojsimorqa, 50 watasniyoj jinataj karqa. Tapurerqanitaj, ‘¿Bibliamanta yachakuyta munawajchu?’, nispa. Chay runaqa yachachej judío kasqa. Tʼukusharqataj noqa Bibliata yachachiyta munasqaymanta. Chayrayku niwarqa: ‘A ver niway, ¿ima parlaypitaj Daniel libro qhelqakorqa?’, nispa. Noqataj nerqani: ‘Wakin partesqa arameo parlaypi qhelqakorqa’, nispa. Chay judioqa allinta kutichisqaymanta tʼukushaj qhepakorqa, noqapis yuyarikusqaymanta. Maypichus chayta leesqayta ni yuyarikorqanichu. Wasiyman kutipojtiytaj, chay kutillaraj llojsimoj Torremanta Qhawaj, ¡Despertad! revistasta qhawaykorqani, tarerqanitaj uj yachaqanata maypichus sutʼinchasharqa Daniel libro arameo parlaypi qhelqakusqanta”, nispa (Dan. 2:4). Arí, Jehová Diosqa atiyninwan yanapawasunmanpuni, imastachus Diospa Palabranmanta leesqanchejta yuyarikunapaj (Luc. 12:11, 12; 21:13-15). w17.06 pág. 13 párr. 17

Casadosqa astawan llakikunkuman warmi onqoj rikhurejtin. Wawitayoj kanankumanta kusikojtinkupis, mayta phutikunkuman warmi onqoj kashajtin imapis kananmanta. Chantapis wawita wiñasqanman jina, astawan qolqeta gastanqankupuni. Mana chayllachu, warmeqa wawitallanwanña astawan kanqa. Qosatajrí astawan kallpachakunan kanqa trabajananpaj, familianman ni imata faltachinanpaj. Chayraykutaj qhariwarmeqa manaña ñaupajta jinachu aswan tiempoyoj kanqanku iskayninku parlarikunankupaj chayri imallatapis khuska ruwanankupaj. Wakin qhariwarmisqa mayta wawitata rejsiyta munankupuni. Jinapis mana wawitayoj kayta atinllankuchu. Casarasqa kaspapis chayri wawasniyoj kaspapis llakiykunasninchejqa kanqapuni. w17.06 págs. 4, 5 párrs. 1, 5, 6

Noqanchejqa cheqa kajta munakunchej. Cheqa kajtaj Diospa Palabran. Jesusqa uj mañakuypi Tatanman nerqa: “Palabraykeqa cheqapuni”, nispa (Juan 17:17). Cheqa kajta munakunapajqa, Diospa Palabrantaraj estudiananchej tiyan (Col. 1:10). Astawanpis Bibliapi Salmo 119 nisqanman jina ruwananchej tiyan, cheqa kajta astawan munakunapaj (Sal. 119:97-100). Bibliapi imatachus leesqanchejpi tʼukurinanchej tiyan, chaypajtaj tiempochakunanchejpuni tiyan. Imaynatachus Diospa Palabran nisqanman jina kausakunanchejpi tʼukurejtinchejqa, cheqa kajta astawan munakusunchej. Bibliamanta orqhosqa publicacionesqa, miskʼi mikhuna jina kanku. Imaynatachus miskʼi mikhunataqa mana usqhay usqhayllatachu mikhunchej. Ajinallatataj publicacionestapis mana usqhay usqhayllatachu leena, manaqa allinllawan. Ajinamanta “sumaj kʼacha palabrasta” yuyarikuyta atisunchej, wajkunatapis yanapariyta atisunchej (Ecl. 12:10). w17.05 págs. 19, 20 párrs. 11, 12

Runasta yanapasunman Diospa Gobiernonmanta predicaspa (Luc. 10:33-37). Ashkha ayqekamojkunata yanapaj uj anciano, nin: “Qallariymantapacha Jehovaj testigon kasqanchejta ninanchej tiyan. Chantá ninallataj tiyan Dios imatachus aswan qhepaman ruwananmanta parlarej risqanchejta, nitaj qolqewan chayri waj imaswan yanapajchu. Chayta mana ruwajtinchejqa, ichá wakin ayqekamojkunaqa interesraykulla uyariwasunman”, nispa. “Forasterosta” munakusqanchejqa may sumajpuni (Sal. 146:9). Eritrea suyupi qhatiykachakusqanrayku, uj hermanaqa tawa wawasninwan ayqekorqa. Chʼin pampanejta 8 diasta riytawan Sudán suyuman chayarqanku. Pay nin: “Hermanosqa familiankumantapis kaykuman jina qhawawarqayku. Mikhunata, ropata, qowarqayku, wasiwan, autowanpis yanapawarqayku. Jehovaj testigosnillan ajina munakuyta rikuchinakunchej, waj lugarmanta kajtinchejpis”, nispa (Juan 13:35). w17.05 pág. 7 párrs. 17, 19, 20

Ashkha watas ñaupajtaqa Elifaz, Bildad, Zofar ima cheqa sonqo Jobwan parlarerqanku. Temanmanta kaj Elifazqa, Jobta taporqa: “Yuyankichu runaqa may jina yachayniyoj kaspapis Diospajqa imapajpis allimpuni kasqanta? Tukuy Atiyniyoj Diosqa imatapunitaj allinta tarisqa qan cheqan runa mana kʼamina kasqaykimantari?”, nispa (Job 22:1-3). Elifazqa yuyarqa ni pi runapi Dios allin kajta tarisqanta. Chantá Súa sutiyoj llajtamanta Bildad nerqa Diospa ñaupaqenpi ni pi runapis llimphu kayta atisqanta (Job 25:4). Elifaz, Bildad imaqa Jobta yuyachiyta munarqanku Diosta sirvinanpaj kallpachakusqan qhasipaj kasqanta. Chay runasqa Jobta creechiyta munarqanku Jehovapaj mana valorniyojchu kasqanchejta, manaqa uj khuru chayri thuta jinalla kasqanchejta (Job 4:19; 25:6). Jehovaqa Elifazta, Bildadta, Zofarta ima llulla imasta parlasqankuta nerqa. Chantá rikucherqa Jobwan may kusisqa kashasqanta, “kamachiy Job” nispa nejtin (Job 42:7). Chayrayku noqanchejqa mana iskayrayanchejchu “Diospajqa imapajpis allimpuni kasqan[chejmanta]”. w17.04 págs. 28, 29 párrs. 1, 2

May chhika watasta kay sajra mundopi kausakusqanchejrayku, may jinatapunichus sajra ruwaykuna llakichiwasqanchejta mana reparayta atillanchejchu. Sutʼincharinapaj, estación de tren nisqaj qayllanpi tiyakojkunaqa, ichapis manaña reparankuchu trenpa sonasqanta. Qʼopa wijchʼuna chaynejpi tiyakojkunaqa ichapis manaña sientenkuchu asnasqanta. Chaywanpis Jehová tukuy ima sajra kausayta chinkachejtin, may kusisqa kausakusunchej. ¿Imataj llakiypa cuentanmanta kanqa? Kay diapaj ajllasqa textoqa imachus qhepaman kananta willawanchej. Chayrayku, ¿manachu kay versiculoj nisqan kusichiwanchej? Imatachus Jehová noqanchejpaj munasqanmanta parlashan. Chayrayku kay tiempopi Diosmanta, llajtanmanta ima mana karunchakunapaj mayta kallpachakuna. Imatachus suyakushasqanchejqa may valorniyoj, chayrayku chay suyakuypi tʼukurina, runasmanpis chay suyakuymanta willarina (1 Tim. 4:15, 16; 1 Ped. 3:15). Ajinamantataj kay sajra mundo chinkachisqa kajtin, mana chinkachisqachu kasun, wiñaypajtaj kusisqa kausakusun. w17.04 pág. 13 párrs. 16, 17

Arí, chayqa cheqapuni. Jinapis, ¿imatá ruwasun uj hermano contranchejpi pantajtin? ¿Jehová jinachu cheqan kajta qhawasun? Sutʼincharinapaj, ¿imatá ruwasun waj lugarmanta kaj runamanta uj anciano mana allintachu parlajtin? ¿Manañachu Jehová Diosta yupaychasun uj anciano mana tʼukurispalla phiñachinawanchejpaj jina chayri sonqonchejta nanachinawanchejpaj jina parlajtin? Chay hermano niña anciano jina llankʼananta yuyanamantaqa, ¿suyasunchu pacienciawan Jesús allinchananta? Chayrí, ¿ashkha watastaña Jehová Diosta cheqa sonqo sirvisqanpichu yuyasun? ¿Contranchejpi juchallej hermano ancianollapuni kajtin, congregacionpitaj astawan ruwaykunata japʼejtin kusikusunchu? Perdonasun chayqa, cheqan kajta Jehová jina qhawasqanchejta rikuchisun (Mat. 6:14, 15). w17.04 pág. 27 párr. 18