Junio

Jehová Diosqa munakuwasqanchejrayku yachachiwanchej, cheqanchawanchejtaj munakuyninpi kanallanchejpajpuni. Chantapis payqa qayllallanpipuni kananchejta munan, ajinamanta wiñaypaj kausakunanchejpaj. Jehová Diosqa jatun juchapi urmajtinchej munakuwasqanchejrayku mana yuyaychallawasunmanchu, manaqa ancianosnejta congregacionpi wakin ruwanasta qhechuwasunman. Chaytaj reparachiwasunman, Diospa Palabranta astawan ukhunchananchej kasqanta, yachakusqanchejpitaj tʼukurina kasqanta, Diosmantataj mañakunapuni kasqanta. Chaykunata ruwaspataj, astawan Jehová Diosman qayllaykusunchej (Sal. 19:7). Tiemponmantaj ima ruwanastachus congregacionpi pierderqanchej, chaykunata watejmanta japʼiyta atisunman. Chantapis Jehová Diosqa uj hermanota jatun juchapi urmajtin ancianosnejta congregacionmanta qharqonman. Imajtinchus Diosqa mana munanchu juchallikoj hermano pantachinawanchejta (1 Cor. 5:6, 7, 11). Chantapis congregacionmanta chay hermano qharqochikojqa, reparanqa mana qhasimantachu qharqochikusqanta. Chayta reparakuspataj, congregacionman kutinpuyta munanqa (Hech. 3:19). w18.03 pág. 24 párrs. 5, 6

Carceleroqa Diospa Palabranmanta mana yacharqachu. Chayrayku cristiano kananpajqa, sumajta Diospa Palabranmanta yachakunan karqa. Astawanpis entiendenan karqa, imatachus Jehová Dios kamachisninmanta munasqanta. Chantapis Jesuspa nisqasninta kasukunanpuni karqa. Chaykunata yachakuspataj bautizakorqapacha (Hech. 16:25-33). Chay carceleroqa bautizakuytawanpis astawan Diospa Palabranmanta yachakullarqapuni. Chayrayku wawanchej Jehová Diosta munakuspa, kasukuyta munaspataj bautizakuyta munasqanta niwajtinchejqa, paykuna ancianoswan parlarinankuta nisunman. Ajinamanta ancianosqa reparanqanku, wawanchej bautizakunanpaj wakichisqañachus manachus kasqanta. Chantapis wawanchejqa bautizakuytawanpis, Jehová Diospa munayninmanta astawan yachakullanqapuni. Imaynatachus noqanchejpis Jehová Diosmanta wiñaypaj yachakushallanchejpuni, ajinata (Rom. 11:33, 34). w18.03 pág. 10 párrs. 8, 9

Wiñay tukusqa cristianos kanapaj kallpachakojtinchejqa, Diospa atiynin yanapawasunchej Cristo jina yuyanapaj. Diospa atiynenqa, yanapawasunchej sajra munayninchejwan mana atipachikunapaj. Yanapallawasunchejtaj Diospa munayninman jina kausakunanchejpaj. Cristo jina yuyasunchej chayqa, trabajopi kashaspa, escuelapi kashaspa ima, Diospa munayninman jinapuni imatapis ruwasunchej. Chantapis Cristo jina yuyasqanchej, parlasqanchejpi, ruwasqanchejpi ima yachakonqa. Tukuy runastaj reparanqanku Jesuspa yachachisqasnin kasqanchejta. Jesús jina yuyasqanchejraykutaj, ni imarayku Jehová Diospa contranpi imatapis ruwasunchu. Juchaman urmanapaj tanqasqa kashajtinchejpis, mana chay juchapi urmasunchu Jesús jina yuyasqanchejrayku. Chantá imata ruwanapajpis, ñaupajtaqa piensarisunchej Bibliaj yuyaychaykunasninpi, imatachus Jesús ruwananpi, imachus Jehová Diosta kusichisqanpipis. w18.02 págs. 25, 26 párrs. 12, 14

Noejpa tatanpa awelitonqa, Enoc karqa. Enocpa tiemponpitaj, runasqa manchay sajras karqanku, Jehová Diospa “contranpitaj sajrata” parlaj kanku (Jud. 14, 15). Enocpa tiemponmantapacha Noejpa tiemponkama, runasqa astawan sajrayarqanku. Imajtinchus Noejpa tiemponpi “kay pachaqa imaymana juchawan juntʼa karqa”. Sajra angelespis, kay jallpʼaman uraykamuspa runasman tukorqanku, warmiswantaj casarakorqanku. Wawasninkutaj manchay kallpasapas, sajrastaj karqanku (Gén. 6:2-4, 11-13). Chaywanpis Noeqa mana chay sajra runas jinachu karqa. Noeqa cheqan kajtapuni ruwarqa, ‘Diosta kasuspapunitaj’ kausakorqa (Gén. 6:9). Noeqa niraj Jatun Para chayamushajtin, sajra runaspa chaupinpi tiyakuspapis, Diosta kasukorqapuni. Chantapis Noeqa mana 70 chayri 80 watasllatachu sajra runaspa chaupinpi tiyakorqa, manaqa casi 600 watastapuni (Gén. 7:11). Chantapis Noejpa tiemponpi mana karqachu, uj congregación, nitaj hermanospis payta yanaparinankupaj, kallpacharinankupajpis. Chantá nisina hermanosninpis Noeta yanaparqankuchu. w18.02 pág. 4 párrs. 4, 5

Qolqeta munakoj runasqa, kapojtinkupis astawanraj munanku. Qolqellata maskʼasqankuraykutaj ‘imaymana llakiykunawan ñakʼarinku’ (1 Tim. 6:9, 10; Ecl. 5:10). Tukuypis qolqeta necesitanchejpuni. Bibliaqa nin, ‘qolqe jarkʼakuna escudo jina’ kasqanta (Ecl. 7:12). Jinapis pisi kapuynillayoj kajtinchejpis, kusisqa kayta atisunman (Ecl. 5:12). Wakin runasqa kapuynillankupi astawan atienekunku, Diospi atienekunankumantaqa. Jinapis Biblia nisqanman jina, Jaquej wawan Agurqa jinata Diosmanta mañakorqa: “Ama anchata qhapajyachiwaychu, nitaj anchata wajchayachiwaychu. Imachus mikhunaypaj kajllata ama pisichipuwaychu. Sichus ancha ashkha imayoj kayman chayqa, qanta qonqapuykiman, niymantaj qanta mana rejsisusqayta. Sichus pisiwanman chayri, suwamanñataj qokuyman. Ajinamanta Diosniypa santo sutinta chʼichichayman”, nispa (Pro. 30:8, 9). Jesús nerqa: “Mana pipis iskay patronesta ujllapi sirviyta atinmanchu, imaraykuchus ujninta chejnenqa ujnintataj munakonqa, ujninman kʼaskakonqa ujnintataj pisipaj qhawanqa. Qankunaqa mana atinkichejchu ujllapi Diostawan qolqetawan sirviyta”, nispa (Mat. 6:24). w18.01 págs. 24, 25 párrs. 9-11

Diospa llajtan ujchasqallapuni kananpajqa, tukuy sonqo perdonayta yachananchej tiyan. Perdonaspaqa Diosman agradecekunchej. Imajtinchus payqa Wawanta qorqa juchasninchejta perdonanawanchejpaj. Jesuspis perdonay may allinpuni kasqanta rikuchinanpaj, uj reymanta kamachisninmantawan parlarerqa. Chaytataj Mateo 18:23 al 34 versiculospi leerisunman. Tapurikusunmantaj: “Jesús yachachisqanman jina, ¿perdonanaypaj wakichisqachu kashani sonqoyta nanachiwajtinkupis? ¿Hermanosniyta entiendenichu, pacienciakunitajchu?”, nispa. Noqanchejqa juchasapas kasqanchejrayku, mana perdonayta atillanchejchu. Astawanraj pillapis contranchejpi mayta juchallikojtin. Jinapis Jesús uj reymanta, kamachisninmantawan parlasqanqa, yachachiwanchej imatachus Dios ruwananchejta munasqanta. Jesús nerqa mana hermanonchejta perdonajtinchejqa, nillataj Tatanpis perdonanawanchejta. Chaypitaj sumajta tʼukurinanchej tiyan. Chantapis Diospa llajtan ujchasqallapuni kananpajqa, tukuy sonqo perdonanakunanchej tiyan. w18.01 págs. 15, 16 párr. 12

Danielqa kausayninta wañuy pataman churaspapis, Diosmanta mañakullarqapuni. Payqa Diosta kasukullarqapuni, nitaj runasta manchachikorqachu. Chayrayku Diosqa Danielta librarqa leonespa siminkumanta. Dios Danielta librasqanqa, tukuynin nacionpi yachakorqa (Dan. 6:25-27). Daniel jina sinchʼi creeyniyoj kana. Chaypajqa Bibliata sumajta leena, entiendenataj (Mat. 13:23). Chantapis yachanallanchejtaj tiyan, imachus Diospa munaynin kasqanta. Chaypajqa Bibliaj yuyaychaykunasninta sumajta entiendey yanapawasunchej. Chayrayku leesqanchejpi tʼukurinapuni tiyan. Chantapis Diosmanta mañakunallapuni, astawan llakiykunapi rikukuspa. Diostaj kʼachamanta yachayninta qowasunchej, kallpachawasunchejtaj (Sant. 1:5). w18.02 págs. 10, 11 párrs. 13-15

Bautizasqa jóvenes, Jehová predicacionpi yanapashasusqaykichejta reparankichej chayqa, sonqoykichejpi sutʼi kanqa pay qankunawan kʼacha kasqan. Chayta reparallawajchejtaj colegiopi compañerosniykichejman Diosmanta willarejtiykichej. Jinapis ichá compañerosniykichejman, mana Diosmanta willariyta atillawajchejchu. Ichapis manchachikuwajchej paykunaman predicashajtiykichej, imastachus nisunaykichejmanta. Ichapis ashkha runaspa ñaupaqenpi Diosmanta parlariyta, manchachikullawajchejtaj. ¿Imataj yanapasunkichejman mana manchachikunaykichejpaj? Ichá tʼukuriwajchej imaraykupunichus Bibliaj nisqasninpi creesqaykichejpi. Chaypajqa “Guías de estudio” nisqa yanapas tiyan. Chaytataj Internetpi jw.org nisqapi tariwajchej. Chay yanapas parlayniykichejpi tiyan chayqa, chaywan yanapachikuychej. Bibliaj nisqasninpi creenaykichejpaj yanapasonqachej, sumajta predicanaykichejpajpis. Bibliaj nisqasninpi creenkichej chayqa, predicanaykichejpajtaj sumajta wakichikunkichej chayqa, sonqoykichej aysasonqachej Diosmanta willamunaykichejpaj (Jer. 20:8, 9). w17.12 págs. 26, 27 párrs. 12, 14, 15

Wawasmanqa mana Bibliaj nisqasninta rejsichinallachu tiyan. Manaqa imatachus yachakusqankupi creenankupaj yanapananchej tiyan. Imaynatachus Timoteota yachakusqanpi creenanpaj yanaparqanku, ajinata. Timoteoqa wawitamantapacha Diospa qhelqasqa palabranta rejserqa. Wajkunataj yanaparqanku, Jesús, Mesías kasqanpi creenanpaj. Wawasta ‘yachakusqankupi creenankupaj’ yanapanapajqa, pacienciayoj kananchej tiyan. Imajtinchus wawasqa, mana uj ñawi chʼirmiypichu imapipis creenku. Nitaj yuyananchejchu tiyan, imapichus creesqallanchejpitaj, wawasninchejpis creenankuta. Wawasqa, Bibliaj nisqasninta ‘tukuy yuyayninkuwan’ sumajta entiendenanku tiyan. Ajinamanta chay yachakusqankupi creenankupaj (Rom. 12:1). Wawas imatapis tapukojtinkoqa, tatas sumajta yuyaychakusparaj kutichinanku tiyan. Ajinamanta wawasninkuta yanapanqanku, yachakusqankupi sinchʼita creenankupaj. w17.12 pág. 19 párrs. 3, 5, 6

Martaqa Jesuspa yachachisqan karqa, amigantaj. Martaj hermanonqa Lázaro karqa. Lázaro wañupojtintaj Martaqa sonqo nanayta waqarqa. Jesustaj Martata sonqochananpaj, jinata nerqa: “Hermanoykeqa kausarinponqa”, nispa (Juan 11:20-23). Martaqa mana iskayrayarqachu hermanon qhepa pʼunchaypi kausarimunanta. Jesustaj chay diapacha Lazarota kausaricherqa. Ichapis qosanchej, warminchej, mamanchej, tatanchej, awelonchej chayri wawanchej wañuporqa. Paykunawantaj tinkuyta, parlariyta, asiriytapis mayta suyakushanchej. Jinapis mana suyananchejchu tiyan, Jesús chayri Tatan kay tiempopi, pinillanchejtapis kausarichimunankuta. Astawanpis Marta jina creenanchej tiyan, wañusqas aswan qhepaman kausarimunankutapuni. Jinapis allin kanman piensarinanchej, imajtinpunichus wañusqas kausarimunankupi creesqanchejta. w17.12 pág. 3 párrs. 1, 2

Jesusqa Moisespa Leyninta Diospa kamachisqasninta jina, jatunpaj qhawaj. Imaraykuchus Jehová Diosta mayta munakoj. Bibliataj unaymantaña nerqa, Jesús Diospa leyninta kasukunanta, imaynatachus kunan diapaj texto nisqanman jina. Jesusqa ruwasqasninpi, parlasqanpipis, rikucherqa Diospa Leynin cheqan kasqanta, allinninchejpaj kasqantapis, jinallataj Diospa nisqasninpis juntʼakusqantapuni (Mat. 5:17-19). Jesusqa maytachá llakikorqa Diospa Leyninta fariseos, leymanta yachachejkuna ima qʼewisqankumanta. Paykunaqa wakin kamachiykunallata juntʼaj kanku, wakintataj mana. Chayrayku Jesusqa paykunata, jinata nerqa: “Qankunaqa yerbabuenamanta, eneldomanta, cominomantawan sapa chunkamanta ujta qonkichej. Leymanta aswan allin kajtarí qonqapunkichej: cheqan kajta, khuyakuyta, Diosta mana wasanchayta ima”, nispa (Mat. 23:23). Fariseosqa, mayta runaykachaj kanku. Manataj entiendejchu kanku imapajchus chay kamachiykuna kasqantapis. Jesustajrí sumajta entienderqa imapajchus chay kamachiykuna kasqanta. Entiendellarqataj Jehová Dios allinninchejpaj chay kamachiykunata churapuwasqanchejtapis. w17.11 págs. 13, 14 párrs. 1, 2

Ichá runasqa niwasunman, “paywan puñuykojtiyki, ¿imapunitaj kanmanri?”, nispa. Jinapis Bibliaqa nin, khuchichakuy juchamanta tʼaqakunanchejta (1 Tes. 4:4-8). Jehová Diosqa leyesta churapuwarqanchej, ruwawasqanchejrayku. Diosqa nin, casarasqa kajkunalla qhariwarmi jina puñuykuyta atisqankuta. Chay kamachiytataj munakuwasqanchejrayku churapuwarqanchej. Kamachiykunasninta kasukojtinchejtaj, allinta kausakusun. Familia ukhupi Diospa munasqanman jina kausakojtinchejqa, purajmanta munanakusunchej, respetanakusunchejtaj, nitaj imamantapis manchachikusunchu. Mana kasukojkunatatajrí, Dios juzganqa (Heb. 13:4). Bibliaqa niwanchej imatachus ruwanata, mana khuchichakuy juchapi urmanapaj. Khuchichakuy juchapi mana urmanapajqa, ama imatapis qhawanallachu (Mat. 5:28, 29). Chayrayku amapuni qhawanachu mana ropayoj warmista chayri qharista. Nillataj uyarinachu khuchichakuymanta parlaj takiykunata (Efe. 5:3-5). w17.11 pág. 22 párrs. 9, 10

Unay tiempomantapacha Diospa kamachisnenqa takispa Diosta alabarqanku. Israelitasqa Jehová Diosta yupaychanankupaj takejpuni kanku. Rey Davidmanta parlarina. Payqa Diospa templon ruwakunanpaj tukuy imata wakichishajtin, 4.000 levitasta churarqa, Jehová “Diosta yupaychanankupaj tocanasninkuwan”. ‘Takinasmanta sumajta yachajkunataj’, 288 karqanku (1 Cró. 23:5; 25:7). Salomón templota Jehová Diosman jaywapushajtinpis, mayta takillarqankutaj. Bibliaqa nin: ‘Chaypacha cornetasta waqachej tukuyninku churakorqanku, tukuyninkutaj uj kunkalla takerqanku Jehová Diosta yupaychaspa, graciasta qospataj. Cornetasta, platillosta, waj tocanastapis chʼajwarichispa, takisharqanku. Chay jinata takishajtinkutaj, Tata Diospa jatun kaynenqa temploman juntʼaykorqa’, nispa. Israelitas chayta rikuspa, maytachá kallpachakorqanku (2 Cró. 5:13, 14; 7:6). w17.11 pág. 4 párrs. 4, 5

Jesusqa qhepanta rejkunaman runas mayta churanakunankuta yacharqa, tʼaqanakuypis kananta. Jesusqa “cheqa kajmanta” willananpaj kay jallpʼaman jamorqa, nitaj familiasta tʼaqanachejchu (Juan 18:37). Jinapis familia ukhupi tʼaqanakuy kanman. Chayrayku Jesusqa yachachisqasninta reparacherqa, wakin kuti qhepanta riy mana atinapaj jinallachu kasqanta. Astawanraj amigosninchej chayri familianchejmanta pillapis churanakuwajtinchej. Ajinapunitaj karqa, Jesuspa yachachisqasninta runasqa asipayarqanku, familiankumanta kajkunapis churanakorqanku. Jinapis paykunaqa Diospa llajtanpi ashkha tatasta, mamasta, wawasta, hermanosta ima tarerqanku (Mar. 10:29, 30). Familiaresninchejta munakunallapuni Jehová Diosta sirvisqanchejrayku churanakuwajtinchejpis. Jinapis Jehová Diosta, Jesusta ima astawan munakunanchej tiyan (Mat. 10:37). Diablotajrí familianchejta astawan munakunapaj tanqawasun, ajinamanta Jehová Diosta wasanchananchejpaj. w17.10 pág. 13 párrs. 3-6

Uj ángel chay rato canasta ukhuman chay warmita tanqaykuspa, titi tapawan tapaykusqanqa, ninakun Jehová chay rato llajtanmanta qharqonanta pillapis sajrata ruwajtin. Imaraykuchus Diosqa munan llajtan llimphu kananta (1 Cor. 5:13). Zacarías mosqoypi jina chay canastata Jerusalenmanta Babiloniaman apakapusqankuta rikusqanwanqa, Jehová Dios nisharqa llajtanta llimphullatapuni japʼinanta. Chantapis Jehová Diosqa israelitasman yuyarichisharqa, runaspa costumbresninwan mana chhapukunankuta. Arí, Diosqa manapuni munanchu sajra imasta ruwananchejta. Diosqa llajtanman yaykupunanchejpaj yanapawarqanchej, mayta munakuwasqanchejrayku. Llajtanpitaj sajra imasmanta jarkʼawanchej. Sapa ujninchejtaj allinta qhawarikunanchej tiyan, Diospa llajtanpi ni ima sajrata ruwananchejpaj. Ajinamanta Diospa llajtanqa llimphullapuni kanqa. w17.10 págs. 24, 25 párrs. 14, 15, 17, 18

Israelitasmanta parlarina. Paykunaqa hebreo parlaypi chantá arameo parlaypi Ñaupa Testamentota qhelqarqanku. Arí, “ñaupajtaqa, paykunaman Diospa palabran qosqa karqa” (Rom. 3:1, 2). Jinapis Jesús niraj jamushajtin, 300 watamanta 201 watakama, israelitasqa manaña hebreo parlayta entienderqankuchu. Imaraykuchus chay lugaresmanta runasqa griegollataña parlarqanku. Alejandro Magno Greciata gobernashajtin, may chhika jallpʼasta japʼikapusqanrayku (Dan. 8:5-7, 20, 21). Chayrayku israelitaspis griego parlayllataña parlarqanku. Ñaupa Testamentotataj manaña entienderqankuchu, hebreo parlaypi kasqanrayku. Jesús kay jallpʼaman jamunanpaj 250 watas jina faltashajtin, Bibliata Genesismanta Deuteronomiokama griego parlayman tijrachikorqa. Tiemponmantaj Ñaupa Testamentota tukuyninta griego parlayman tijrachikullarqataj. Chay Bibliatataj Septuaginta nisqa sutiwan rejsikorqa. Chaytaqa ñaupajta tijracherqanku. w17.09 pág. 20 párrs. 7-9

Uj tatata, patronnin ninman astawan llankʼananta Familiapi Diosta yupaychanapaj chʼisipipuni, chayri predicamunan diapipuni, manachayri tantakuy diapuni. Ajinapi uj tata tarikuspa, patronninman mana atisajchu ninanpaj mana manchachikunanchu tiyan. Wawaspis chayta rikuspa tatanku jina ruwanqanku. Tatasqa wawasninkuta yanapananku tiyan, Diospaj astawan llankʼanankupaj. Ichapis chayta ruwayqa, wakin tataspaj mana facilchu kanman. Ichá wakin tatasqa, mana munankumanchu wawasninku precursores kanankuta, chayri pisi hermanoslla kanku chayman yanapakoj rinankuta. Chantá nillataj munankumanchu Betelpi yanapakamunankuta, jinallataj Tantakuna Wasista, Jatun Tantakuna Wasista ruwaysikunankutapis. Imaraykuchus tatasqa manchikunkuman machuyapojtinku wawasninku saqerparinankuta. Sumaj yuyayniyoj tatasrí, mana manchikuspa wawasninkuta kallpachanku, Diospaj astawan llankʼanankupaj. Chantapis Jehová ni jaykʼaj saqerparinanpi creenku (Sal. 37:25). Tatas, Jehová Diospi atienekonqanku chayqa, wawasninkupis paykuna jinallataj ruwanqanku (1 Sam. 1:27, 28; 2 Tim. 3:14, 15). w17.09 págs. 30, 31 párrs. 14, 15

Tatas, wawasniykichejta yanapaychej, sajra munayninkuwan mana atipachikunankupaj. Chaypajqa qankunaraj sajra munayniykichejwan mana atipachikunaykichejchu tiyan, wawasniykichej qankunamanta yachakunankupaj (Efe. 6:4). Wawasniykichej sajra munayninkuwan atipachikushasqankuta reparankichej chayqa, imaynatachus kausakushasqaykichejta qhawarikuychej, allinchus manachus kasqanta yachanaykichejpaj. Wawasniykichejta ruwasqaykichejwan yachachiwajchej, predicacionman rispa, tantakuykunamanta mana faltakuspa, familiapi Diosta yupaychaspa ima. Chantá wawasniykichej, imatachus mana ruwanankuta sutʼita kamachiychej. Jehová Diospis Adanman Evamanwan imatachus mana ruwanankuta sutʼita kamacherqa. Chayta kasukunkuman karqa chayqa, Jehovata jatunpaj qhawankuman karqa. Tatas, Jehová jina ruwajtiykichej, Bibliaj nisqanman jinataj kausakojtiykichejqa, wawasniykichejta yanapankichej sajra munayninkuwan mana atipachikunankupaj. Chantá yanapallankichejtaj, Jehová Diosta jatunpaj qhawanankupaj, kamachiykunasnintataj kasukunankupaj (Pro. 1:5-8). w17.09 pág. 7 párr. 17

Kay sajra mundopeqa imaymana llakiykunapi rikukunchej, trabajorayku, onqoyrayku, suwas kasqanrayku, qhatiykachasqa kasqanchejrayku, waj imasrayku ima. Chayrayku purajmanta khuyakuspa yanapanakunanchej tiyan. Khuyakuyniyoj kasunchej chayqa, tukuywan kʼachas kasunchej. Chantapis Jehová jina wajkunata sonqochayta atisunchej (2 Cor. 1:3, 4; Efe. 4:32). Ichapis congregacionninchejpi wakin hermanos wajchas kanku, wakintaj waj suyumanta kanku. ¿Imaynatá paykunawan kʼachas kasunman? Paykunawan amigos kaspa. Congregacionpitaj sumajta yanapakushasqankuta nispa (1 Cor. 12:22). Ashkha Jehovaj testigosnenqa, forasterosmanta khuyakusqankurayku, paykunaman Bibliamanta yachachinankupaj parlayninkuta yachakorqanku (1 Cor. 9:23). Chayta ruwaspataj ashkha bendicionesta japʼerqanku. w17.08 págs. 23, 24 párrs. 7-9

Tukuyninchej pacienciayoj kananchej tiyan. Chaypajqa Jehová Diosmanta atiyninta mañakusunman. Pacienciayoj kasunman Jehová Dios atiyninwan yanapallawajtinchej (Efe. 3:16; 6:18; 1 Tes. 5:17-19). Chayrayku ima llakiytapis aguantanapaj, Jehová Diosmanta pacienciata qonawanchejta mañakuna. Abrahanwan Josewan Davidwanqa Jehová Dios nisqasninta juntʼananta pacienciawan suyakorqanku. Paykunaqa Jehová Diospi creerqanku, tukuy ima llakiykunata tiemponpi allinchananpitaj atienekorqanku. Mana paykunallapichu yuyarqanku, nitaj munasqallankupichu. Pacienciayoj kasqankurayku Jehová paykunata bendicerqa. Chaypi tʼukureyqa pacienciayoj kanapaj yanapawasunchej. Jatun ñakʼariykunapi tarikojtinchejpis Jehová Diospi suyakunallapuni. Jinapis ichá wakin kuti Jehovaman nisunchej: “¿Maykʼajkamataj kay kanqari?”, nispa (Isa. 6:11). Diospa atiyninwantaj Jeremías jina kunan diapaj texto nisqanta nisunman. w17.08 pág. 7 párrs. 18-20

Jesusqa wawa kashaspa pujllakoj, kusirikojtaj. Imaraykuchus Diospa Palabran nin jina ‘uj tiempo kan asinapaj, uj tiempotaj tusunapaj’ (Ecl. 3:4). Chantapis Jesusqa Tatanpa qayllallanpipuni kananpaj, sumajta Diospa Palabranta estudiarqa. Chayrayku 12 watasniyoj kashajtin, templopi yachachejkuna mayta tʼukorqanku Jesuspa “yachayninmanta, kutichisqasninmanta ima” (Luc. 2:42, 46, 47). Jesusqa kurajña kaspa Tatanpa munayninta ruwaspa kusisqa karqa. Tatanqa Jesusta ajllarqa “wajchasman sumaj willaykunata” willananpaj, kachamullarqataj ‘ciegosman’ willananpaj watejmanta qhawarinankuta (Luc. 4:18). Jesusqa “tukuy sonqo” Tatanpa munayninta ruwarqa. Arí, Jesusqa Tatanmanta runasman yachachispa mayta kusikoj (Luc. 10:21). Uj kuti Jesusqa, uj warmiman imaynatachus Diosta yupaychanata yachacherqa. Chantá yachachisqasninman nerqa: “Mikhunayqa kachamuwajniypa munayninta ruwanay, kamachiwasqantataj tukuchanay”, nispa (Juan 4:31-34). Jesusqa Tatanta, runastapis munakuspa may kusisqa karqa, qanpis pay jinallataj ruwajtiyki kusisqa kanki. w17.07 pág. 23 párrs. 4, 5

Jesús kay Jallpʼapi kashaspa Tatan jina runasta munakorqa, paykunamanta llakikorqa, khuyakorqataj (Juan 5:19). Tatanqa payta kachamorqa, tukuy ‘llakisqasta sonqochananpaj’ (Isa. 61:1, 2; Luc. 4:17-21). Runasqa sutʼita repararqanku Jesusqa khuyakoj runa kasqanta, llakiypi kajkunata entiendesqanta, paykunatataj yanapaytapuni munasqanta (Heb. 2:17). Bibliaqa nin: “Jesucristoqa kikillanpuni, qaynapis, kunanpis, wiñaypajpis”, nispa (Heb. 13:8). Jehovaqa payta “Kausayta Qonanpaj” churarqa. Jesusqa noqanchej jina ñakʼarerqa. Chayrayku “pikunachus pruebaman churasqa kashanku, chaykunata” yanapayta atinman (Hech. 3:15; Heb. 2:10, 18). May llakisqa kashajtinchej Jesusqa khuyakuwasunpuni, sonqochawasuntaj (Heb. 4:15, 16). w17.07 págs. 13, 14 párrs. 6, 7, 10

Kuraj Supay, sajra mundon ima, tukuy imata ruwashanku Diospa Gobiernonta, Gobiernonmanta willayta, Palabranmanta cheqa yachachiykunatawan manaña valorniyojpaj qhawananchejpaj. Mana allinta qhawarikojtinchejqa qolqeta munapayaypi, ñawispa rikusqanta munapayaypi, kapuyninchejmanta runaykachaypi ima urmasunman. Apóstol Juan nerqa kay mundo tukukapushasqanta, jinallataj sajra munayninpis (1 Juan 2:15-17). Chayrayku mayta kallpachakunanchej tiyan, imastachus Jehová qowasqanchejta may valorniyojpaj qhawanallapajpuni. Imaschus Diospa Gobiernonta pisipaj qhawanapaj tanqawasunman chaykunata qhesachana. Sonqo kʼajaywan willamunallapuni, willayninchejtataj may valorniyojpaj qhawana. Chantapis Bibliamanta astawan yachakunallapuni. Ajinamanta cielopi “valorniyoj imasta” tantashasunman jina kanqa, maymanchus mana ‘suwa chayanchu, nitaj thutapis kʼutunchu’ (Luc. 12:33). w17.06 pág. 13 párrs. 19, 20

Jehová Diosqa, mana uj sajra capataz jinachu kamachin. Paypa kamachisnenqa mana watasqa jinachu kanku, astawanqa kusisqas kanku (2 Cor. 3:17). Davidqa Jehovamanta nerqa: “Ñawpaqempeqa jatun kaynin kʼancharishan. Atiywan, kusiywan ima tiyakunampeqa kashan”, nispa (1 Cró. 16:7, 27). Uj salmista Etán sutiyoj nerqa: “Sutiykita yupaychaj aylloqa kusikuyniyojmin, Tata Dios, pikunachus uyaykej kʼanchasqampi purinku, chaykuna. Sutiykipi tukuy pʼunchay kusikonqanku; cheqan kasqaykiwan pataman oqharisqa kanku”, nispa (Sal. 89:15, 16). Jehová Dios may kʼacha kasqanpi astawan tʼukurisun chayqa, astawan reparasun paypa kamachisqan may sumajpuni kasqanta. Jehovaqa ruwawarqanchej, chayrayku payqa allinta yachan kusisqa kanapaj imatachus necesitasqanchejta. Chaykunatataj mana michʼakuspa qowanchej. Jehová tukuy ima kamachiwasqanchejqa allinninchejpajpuni. Chayrayku payta tukuy imapi kasukunapaj kallpachakuspaqa, kusisqapuni kasunchej (Isa. 48:17). w17.06 pág. 29 párrs. 10, 11

Inglaterramanta uj hermana wawata mayta rejsiyta munarqa, nitaj aterqachu. Aswan kurajña kajtintaj reparakorqa, manaña wawasniyoj kayta atinanta. Chayrayku sonqo pʼakisqa kasharqa. Jinapis qosanwan parlarerqa, uj wawitata uywakunankupaj. Chaywanpis hermanaqa nerqa: “Piniypis wañupunman jina llakisqa kasharqani. Yacharqani wawata uywakoyqa, mana kikinchu kasqanta wawata rejsiywan”, nispa. Bibliaqa nin: “Warmeqa, wawasniyoj kasqannejta jarkʼasqa kanqa”, nispa (1 Tim. 2:15). Chaytaj mana ninayanchu wawasniyoj kasqanrayku, wiñay kausayta tarinanta. Astawanqa niyta munan wawasniyoj kasqanrayku manaña waj imaspaj tiempoyojchu kananta. Ajinamanta “jarkʼasqa kanqa” cuento qʼepi kaymanta, runaj kausayninman satʼikuymantapis (1 Tim. 5:13). w17.06 págs. 5, 6 párrs. 6-8

¿Elihú nisharqachu Jehová Diosta sirvinapaj kallpachakusqanchej qhasilla kasqanta? Mana. Jehová Diosqa mana chay kinsa runasta jinachu Elihuta kʼamerqa. Elihuqa nisharqa Jehová tukuy imayoj kasqanrayku yupaychananchejta mana necesitasqanta. Ni imata ruwayta atisunmanchu Jehová qhapaj kananpaj, aswan atiyniyoj kananpaj ima. Ima kʼacha kaypis, imata ruwayta atisqanchejpis Paymanta jamun. Paytaj imaynatachus chaykunata apaykachasqanchejta qhawamushan. Jehovata yupaychajkunata munakojtinchej, Jehovaqa chayta qhawan paytapis munakushasunman jina. Proverbios 19:17 nin: “Wajcha runaman jaywarejqa Tata Diosman manurin, Tata Dios kikintaj chay manuta juntʼanqa”, nispa. Wajkunamanta khuyakusqanchejta Jehová sumajta qhawamushan. Jehová tukuy imata ruwajtinpis, payqa wajkunarayku imatachus ruwasqanchejta, paypajpis ruwapushasunman jina qhawan, chaymantataj mayta bendeciwasun. Wawan Jesuspis wajkunarayku ruwasqanchejmanta Dios tʼinkanawanchejta nillarqataj (Luc. 14:13, 14). w17.04 pág. 29, párrs. 3, 4

¿Imatataj ruwasunman Diospa Palabranta astawan munakunapaj? Tantakuykunaman mana faltakuspa rinanchej tiyan. Jehová Diosqa sapa semana Torremanta Qhawaj revistawan yanapawanchej Palabranmanta yachakunanchejpaj. Chayrayku tantakuypaj chay revistata sumajta entiendenanchejpaj sumajtapuni estudiananchej tiyan. Wakichikushaspaqa chay yachaqanamanta tukuy textosta maskʼasunman. Kay Torremanta Qhawaj revistataqa jw.org nisqapi chantá JW Library nisqapi ashkha parlaykunapi tarisunman. Chaypitaj Bibliamanta textosta ñitʼiykuspalla leeyta atisunman. Tantakuypaj Torremanta Qhawaj revistata imaynamanta wakichikushaspapis Bibliaj textosnintaqa sumajtapuni leerina, chaypitaj tʼukurina. Ajinata ruwasun chayqa Diospa Palabranta astawan munakusunchej. w17.05 págs. 20, 21 párr. 14

Bautizakushaspaqa Jehová Diosman nerqanchej payllata sirvinapaj kausananchejta, payta kasukunapajtaj mayta kallpachakunanchejta. Jehová Diosta “sirvisqayki” nisqanchejtaqa juntʼananchejpuni tiyan. Jehová Diosta sirvispa, cristiano jina kausaspa saykʼojtinchejqa, mana niyta atisunmanchu ni jaykʼaj Jehová Diosman kausayninchejta qosqanchejta, nillataj niyta atisunmanchu bautizakusqanchej mana valorniyojchu kasqanta. Chantapis jatun juchapi urmajtinchejqa, Jehová Diosman cuentata qonanchejpuni kanqa, congregacionmanpis. Uj kutipi Jesusqa parlarqa wakin cristianos mana ñaupajta jinachu Jehová Diosta munakusqankumanta. Noqanchejqa manapuni chay cristianos jinachu kayta munanchej. Astawanpis munanchej Jesús ajinata ninawanchejta: “Yachani imastachus ruwasqaykita, munakusqaykita, creesqaykita, Diosta sirvisqaykita, aguantasqaykitapis. Yachallanitaj kunallanraj ruwasqasniykipis, ñaupaj ruwasqasniykimanta nisqaqa aswan sumaj kasqanta”, nispa (Apo. 2:4, 19). Astawanpis Jehová Diosta tukuy sonqo kusichiyta munanchejpuni, kausayninchejta Payman qosqanchejta juntʼaspa. w17.04 págs. 6, 7 párrs. 12, 13

Uj kutipi Jehová Diospa kamachin Abrahamqa payta taporqa: “Qan kanki kay pachantinta juzgaj. Chayrayku, manachu cheqan kajtapuni ruwanayki tiyan?”, nispa (Gén. 18:25). Ajinata Abraham Jehová Diosta tapuspaqa, Sodoma, Gomorra llajtasta Jehová Dios cheqan kajman jina juzgananpi atienekusqanta rikucherqa. Abrahamqa sumajta yacharqa “cheqan runasta juchasapastawan khuska” Jehová Diosqa manapuni chinkachinanta. Chaypi mana tʼukurillaytapis munarqachu. Abrahamqa imatachus yuyasqanta Jehová Diosman willarqa. Imaraykuchus Jehová Diosqa cheqan kajtapuni ruwaj Dios. Kamachiykunasnin cheqan kajman jinapuni kasqanrayku, Payqa cheqan kajman jinapuni juzgan. Diospa Palabran nin Jehová “cheqan kajta, justiciatawan munakun”, nispa (Sal. 33:5). w17.04 págs. 18, 19 párrs. 1, 2

Tatas wawasniykichejta yanapaychej qankuna jina Jehovawan sumaj amigos kanankupaj, wiñay kausayta japʼinankupaj ima. Qankunata wawasniykichej Diospa Gobiernonta ñaupajman churajta rikusojtiykichejqa, Jehová sapa día ni imata faltachinanpi atienekonqanku (Mat. 6:33, 34). Kapuyniyoj kayllata astawan maskʼanamantaqa Diosta sirviyta ñaupajman churanaykichejpaj kallpachakuychej. Pisi imasllawan kausakuychej nitaj manuchakuychejchu. Nillataj qhapaj kayta, chayri “runaswan astawan jatunpaj” qhawachikuyta maskʼaychejchu. Astawanqa “cielopi may kapuyniyoj” kayta maskʼaychej, nisunman Jehovawan allinpaj qhawachikuyta (Mar. 10:21, 22; Juan 12:43). Tatas, wawasniykichejpaj tiempochakuychej. Chantá Jehovaj Gobiernonta ñaupajman churasqankumanta allinta ruwasqankuta niychej. Imajtinchus runasqa yuyanku wawas, tatasninkuman qolqeta jaywananku kasqanta, chantá may rejsisqa, qhapaj kayta ima maskʼananku kasqanta. Chayrayku tatas ama yuyaychejchu wawas trabajananku kasqanta, tukuy ima patapi sumajta tiyakunaykichejpaj. Yuyarikuychej “mana wawaschu tatasninkupaj imatapis tantananku tiyan, manaqa tatas wawasninkupaj tantananku tiyan” (2 Cor. 12:14). w17.05 págs. 8, 9 párrs. 3, 4