Julio

Sebnaqa uj israelita karqa, rey Ezequiaspa tiemponmanta. Rey Ezequiaspa wasinpitaj mayordomo karqa (Isa. 22:15). Chaywanpis Sebnaqa umata oqhariyta qallarerqa, jatunchachikuytataj munarqa (Isa. 22:16-18). Sebná umata oqhariyta qallarisqanrayku, Diosqa ‘mayordomo kayninta’ qhechuspa Eliaquinman qoporqa (Isa. 22:19-21). Chay tiempopitaj Asiriamanta rey Senaqueribqa, Jerusalenta japʼikapunanpaj wakichikusharqa. Chayrayku Senaqueribqa israelitasta mancharichiyta munaspa, mana maqanakuspallataj jaywaykukunankuta munaspa, ashkha soldadosta capitanesnintawan Jerusalenman kacharqa (2 Rey. 18:17-25). Rey Ezequiastaj chay soldadoswan parlanankupaj, Eliaquimta, iskay runastawan kacharqa. Chay iskay runasmanta ujnenqa, Sebná karqa. Payqa chay kutipaj Ezequiaspa qhelqerin kasharqa. Chayta yachayqa reparachiwanchej Sebnaqa, kʼumuykukoj kayta yachakusqanta, nitaj llakiywan atipachikuspa qʼellikusqanta, qhelqeri cargotapis tukuy sonqo japʼikusqanta. w18.03 págs. 24-26 párrs. 7, 8, 10

Kay mundoj imasnillanta maskʼashasqanchejta reparakunchej chayqa, Jehová Diospa atiyninta mañakunapacha allin imaspi yuyanapaj (Luc. 11:13). Apóstol Pedromanta parlarinachej. Payqa mana Cristo jinapunichu yuyaj (Mat. 16:22, 23; Luc. 22:34, 54-62; Gál. 2:11-14). Jinapis mayta kallpachakorqa Cristo jina yuyananpaj. Jehová Diospa yanapayninwantaj, pisimanta pisi Cristo jina yuyayta qallarerqa. Noqanchejpis Cristo jina yuyayta atisunman. Apóstol Pedropis nerqa, imastachus ruwanata Diosman astawan qayllaykunapaj (2 Ped. 1:5-8). Pay nerqa tukuy atisqanchejta kallpachakunanchejta, munayninchejwan mana atipachikunapaj, sinchʼita sayanapaj, familia jina munanakunapaj, waj imastawan ruwanapaj. Chayrayku sapa día piensarinanchej tiyan, imastachus ruwananchejpi Diosman astawan qayllaykunapaj. w18.02 págs. 25, 26 párrs. 12, 13

Jobqa sumajta Diospa yuyaychaykunasninta yacharqa. Payqa Diosta sumajta rejserqa, chayraykutaj cheqan kajta ruwayta munarqa. Diosta munakusqanraykutaj, runa masintapis munakorqa (Job 6:14). Chantá qhapaj kaspapis, mana yuyakorqachu may kasqanta. Astawanqa tukuyta, familianta jina qhawarqa, nerqataj: “Uj kʼata Dioslla sapa ujniykoj mamampa wijsampi ruwawarqayku”, nispa (Job 31:13-22). Reparanchej jina, Jobqa qhapaj kaspapis mana jatunchakorqachu, nitaj wajkunata pisipaj qhawarqachu. Kay tiempomanta qhapajkunarí, may kasqankuta yuyakunku, wajkunatapis pisipaj qhawanku. Jobpajqa, Jehová Diosta sirviy imamanta nisqapis ñaupajpipuni kasharqa, nitaj kapuyninchu. Jobqa yacharqa kapuyninta ñaupajman churajtin, ‘cielopi kaj Diosta qhesachashanmanpis’ jina kananta (Job 31:24-28). Jobqa qhariwarmi kausaytapis jatunpaj qhawarqa. Chayrayku sonqonpi nikorqa, ni mayqen warmita munapayananta (Job 31:1). w18.02 págs. 11, 12 párrs. 16, 18, 19

Noeqa mana kʼacha runallachu karqa. Astawanpis payqa, mana manchachikuspa Jehová Diosmanta runasman willarqa. Chayrayku Biblia nin, Noé “cheqan kajta willaj” kasqanta (2 Ped. 2:5). Apóstol Pablopis, jinata Noemanta nerqa: “Creesqannejllatataj Noeqa kay mundota juchacharqa”, nispa (Heb. 11:7). Noé, Diosmanta willashajtin, runasqa maytachá asikoj kanku, nichá uyariytapis munajchu kanku. Astawanpis runasqa ichá Noeta maqayta munarqanku. Jinapis Noeqa runasta mana manchachikorqachu (Pro. 29:25). Astawanqa Diospi atienekullarqapuni, Diostaj kallpata qorqa mana manchikunanpaj. Ajinallatataj Jehová Diosqa sapa ujninchejta kallpachawasunchej, payta kasukojtillanchejpuni. Jehová Diosqa, Noeta nerqa uj arcata ruwananta, 500 watas kurajniyojña kashajtin. Chay arcapitaj runas, animales ima salvakunanku karqa (Gén. 5:32; 6:14). Noeqa ichapis yuyanman karqa, chay jatun arcata ruway, mana atinapaj jina kasqanta. Chantá yuyallanmantajchá karqa, arcata ruwashajtin runas paymanta asikunankuta, maytataj ñakʼarichinankuta. Jinapis Noeqa creesqanrayku Jehová Diosta kasukorqa. Arí, payqa “Dios imaynatachus payman nisqanman jina” ruwarqa (Gén. 6:22). w18.02 pág. 4 párrs. 4, 6, 7

Ujchasqallapuni kanapajqa, Jehová Dios jina runasta munakunanchej tiyan (1 Juan 4:8). Ni jaykʼajtaj ninanchejchu tiyan: “Yachani hermanosta munakunay kasqanta, pero mana amigosniypunichu kananku tiyan”, nispa. Ajinata yuyaspaqa, mana Bibliaj nisqanman jinachu ruwashasunman. Bibliapi Pablo nerqa: ‘Purajmanta munakuywan aguantanakuychej’, nispa (Efe. 4:2). Reparanchej jina, Pabloqa mana aguantanakuychej nillarqachu, manaqa ‘munakuywan aguantanakuychej’ nerqa. Jehová Diostaj llajtanman tukuy rijchʼaj runasta pusamorqa (Juan 6:44). Paykunatataj munakusqanrayku pusamorqa. Noqanchej hermanosninchejta mana munakusunchejchu chayqa, Jehová Diostapis mana munakuyta atisunmanchu. Chayrayku Jehová Dios jina, hermanosta munakunapaj kallpachakunallapuni (1 Juan 4:20, 21). w18.01 pág. 16 párr. 14

Wakin tatasqa, wawasninku niraj bautizakushajtinku, munanku sumaj profesionniyoj kanankutaraj. Ajinata yuyaj tatasqa, allillanta ruwashasqankuta yuyankuman. Jinapis allin kanman piensarinanku, wawanku universidadpi estudiaspa sonqo juntʼasqachus manachus kananpi. Piensarillankumantaj, wawankuta profesional kananpaj tanqasqanku, Bibliaj nisqanman jinachus manachus kasqanpi. Piensarinkumantaj, imatachus Dios kausayninchejpi ñaupajman churananchejta munasqanpi. Tatasqa, mana qonqananchejchu tiyan, kay mundomanta runas jina yuyayqa, Diospa contranpi kasqanta. Chayrayku wawasninchejta Diosman astawan qayllaykunankupaj yanapana. Ajinamanta Kuraj Supaypa trampasninpi mana urmanqankuchu, nitaj kay mundomanta runas jinachu ruwanqanku (Sant. 4:7, 8; 1 Juan 2:15-17; 5:19). Chaywanpis wawasninchejta profesional kanankupaj, sumaj trabajoyoj kanankupajtaj tanqajtinchejqa, Diosmanta karunchachisunman. Imajtinchus paykunaqa yuyanqanku chay imasta ñaupajman churana kasqanta, Diosta sirvinamanta nisqaqa. Chayrayku manapuni munasunmanchu wawasninchej universidadpi kay sajra mundoj imasninta yachakunankuta. Astawanqa munanchej Diosta tukuy sonqo sirvispa kusikunankuta (Sal. 1:2, 3). w18.03 págs. 10, 11 párrs. 10, 11

Ashkha hermanosqa, kallpachakushanku pisi imasllawan kausakunankupaj, Diostataj kusisqa sirvinankupaj. Hermano Jackqa Estados Unidospi tiyakun. Señoranwan precursor jina Diosta sirvinanpajtaj, wasinta, negociontawan venderparqa. Pay nin: “Llankʼaymanta problemasrayku phiñasqalla wasiyman chayaj kani. Señoraytaj precursora regular jina llankʼasqanrayku, kusisqallapuni kaj. Paytaj niwaj: ‘Jehovaqa sumaj patronpuni’, nispa. Chayrayku precursor kanaypaj campopi wasiykuta, jallpʼaykutawan vendeporqayku, sonqoyku nanawajtiykupis. Kunanqa iskayniyku precursores jina Diospaj trabajashayku”, nispa. Qolqetachus chayri Diostachus astawan munakusqanchejta reparakunapajqa, tapurikuna: “¿Bibliaj nisqanman jinachu kausakushani chayri qolqellatachu maskʼashani? ¿Kausayniypi qolqetachu chayri Diostachu aswan ñaupajman churashani? ¿Runaswan allinpi kaytachu astawan maskʼani chayri qolqellatachu? ¿Atienekunichu Dios ni imata faltachinawanpi?”, nispa. Amataj qonqanachu, Diosqa paypi atienekojkunaman ni imata pisichinanta. w18.01 pág. 25 párrs. 12, 13

Jóvenes, salvacionta tarinapajqa, Diosta kasukunapuni tiyan. Chaypajqa Bibliata leena tiyan, leesqanchejpitaj tʼukurina tiyan, Diospa yanapaynintataj mañakunallapuni tiyan. Yuyarikunataj tiyan, imaynasmantachus Dios yanapawasqanchejta. Ajinamanta Diosman astawan qayllaykusunchej. Sonqonchejtaj aysawasunchej wajkunaman Bibliamanta willamunapaj (Sal. 73:28). Jesús nerqa: “Sichus pipis qhepayta jamuyta munan chayqa, pay kikinta chejnikuchun, kʼaspin lijrarisqataj qhepayta jamullachunpuni”, nispa (Mat. 16:24). Arí, Jesuspa qhepanta rinapajqa, niraj bautizakushaspa Jehová Diosman payllata sirvinanchejta ninanchej tiyan. Bautizakuspañataj Diosta sirviyta qallarinchej. Jehová Diostaj tukuy imaymanamanta bendeciwanchej, tumpitamantawantaj paraisopi sumaj kausayta qowasunchej. Chayrayku tukuy atisqanchejta kallpachakunallapuni salvacionta tarinapaj. w17.12 pág. 27 párrs. 18, 19

Wawasninchejman pacienciawan yachachejtinchejqa, creeypi sumaj sayasqa kanqanku. Ajinamanta creeypa “anchonta, largonta, sayayninta, ukhunta ima”, sumajta entiendenqanku (Efe. 3:18). Edadninkuman jinataj, entiendeyta atisqankuman jinallataj yachachina. Wawas yachakusqankupi creenqanku chayqa, pillapis imapichus creesqankumanta tapurejtinku, kutichiyta atillanqanku (1 Ped. 3:15). Ichapis wawasqa wañusqas maymanchus risqankumanta sutʼinchananku kanqa. Chayta Bibliawan sutʼinchanankupajqa, creenanku tiyan imatapunichus Biblia wañusqasmanta nisqanta. Wawasninchejpa sonqonman Bibliaj nisqanta churanapajqa, pacienciawan yachachinallanchejpuni tiyan. Chaytaj mana qhasipajchu kanqa (Deu. 6:6, 7). Tatasqa, ruwasqasninkuwan wawasninkuta yachachinallankutaj tiyan. Ajinamanta wawasninku creeypi sumaj sayasqa kanqanku. Hermana Stephanieqa kinsa warmi wawasniyoj. Pay nin: “Wawasniy juchʼuysitusllaraj kashajtinku, sonqoypi jinata nikoj kani: ‘¿Wawasniyman ninichu imaraykupunichus Diospi creesqayta? ¿Nillanitajchu imaraykuchus Diosta kasukuy allinninchejpaj kasqanta creesqaytapis?ʼ, nispa. Chaypajqa noqaraj imatachus yachakusqaypi creenay karqa. Ajinamanta wawasniypa sonqonman chayanaypaj”, nispa. w17.12 pág. 20 párrs. 8-10

Martaqa hermanon kausarimunanpi creerqa imaraykuchus yacharqa, unay tiempopi wakin runas kausarimusqankuta. Chayta ichapis judiospa tantakuykunasninkupi chayri wasinpi yachakunman karqa, wawallaraj kashajtin. Qhawarina imatachus Biblia nisqanta ñaupaj kaj kausarimuymanta. Israelmanta patanejpi, Sarepta llajtapi uj wajcha viuda tiyakorqa. Uj kutipitaj payqa, profeta Eliasman mikhunata qorerqa, wasinmantaj wajyarerqa. Chayraykutaj Jehová nerqa: “Wichʼipi jakʼoqa, yurupi aceitepis mana tukukonqachu”, nispa. Arí, mikhunaqa chay viudapaj, wawanpajpis kallarqapuni (1 Rey. 17:8-16). Chaymanta unayninmantaj viudaj wawanqa anchatapuni onqoykorqa, wañuporqataj. Eliastaj chay viudaj wawanta japʼispa, Diosmanta mañakorqa: “Diosníy, mañakuyki kay wawata kawsarichinaykita”, nispa. Jehovaqa Eliaspa mañakusqanta uyarispa, chay wawata kausaricherqa. Chay kutipi Diosqa primera vez uj wañusqata kausarichimorqa. Bibliapitaj qhelqasqa kashan (1 Rey. 17:17-24). Martataj Elías uj runata kausarichisqanta yachanmanchá karqa. w17.12 págs. 3, 4 párrs. 1, 3, 5, 6

Runasqa niwasunman: “Qhapaj kanaykipaj, profesional kanayki tiyan”, nispa. Ajinata ashkha runas yuyasqankurayku, noqanchejpis ichá paykuna jina yuyayta qallarisunman. Profesional kaspaqa, ichá qhapajyasunman chayri may rejsisqa kasunman. Jinapis mana kusisqachu kasunchej. Chayta sumajta reparanapaj Diablomanta parlarina. Payqa kapuyniyoj, may rejsisqataj kayta munarqa. Kay tiempopitaj Diabloqa kapuyniyojpuni, may rejsisqataj. Jinapis mana kusisqachu kashan, manaqa manchay phiñasqa kashan (Mat. 4:8, 9; Apo. 12:12). Noqanchejpa sonqonchejrí mayta qhallallarin, runasman Diosmanta yachachispa, uj sumaj kausaymanta willarispa ima. Chaytaj ni mayqen profesionwan kikinchakunchu. Wakin profesionniyoj runasqa envidiosos kanku, imallamantapis phiñakunku, nitaj ni imawanpis contentakunkuchu. Bibliataj nin profesionniyoj kayta maskʼay ‘wayrata japʼiyta munay jinalla’ kasqanta (Ecl. 4:4). w17.11 págs. 22, 23 párrs. 11-13

Wañupunanpaj uj chʼisillaña faltashajtin Jesusqa yachachisqasninwan cenarqa. Chantá Jesusqa, yachachisqasninwan Jehová Diosman alabanzasta takerqanku. Reparanchej jina, Jesuspa tiemponpipis Jehová Diosta takispa alabajpuni kanku. Ñaupa tiempomanta cristianosqa Jehová Diosta takispa yupaychajpuni kanku. Paykuna mana israelitas jinachu templopi tantakojtinkupis, wasisninkupi tukuy sonqo takej kanku. Chayraykuchá apóstol Pablo cristianosman nerqa: “Purajmanta yachachinakuychej, kallpachanakuychejtaj: salmoswan, Diosta alabanapaj takiykunawan, yupaychanapaj kʼacha takiykunawan ima. Tukuy sonqotaj Jehová Diosman takiychej”, nispa (Col. 3:16). Chayrayku noqanchejpis, Jehová Diosman tukuy sonqo takinanchej tiyan. Ajinata takinapajtaj, Jehová Diosqa “allin kamachi” yuyayniyojnejta, uj takina librota qowarqanchej, tiemponpi mikhunata jina (Mat. 24:45). w17.11 pág. 4 párrs. 7, 8

Jehová Diosqa, israelitasman nerqa sojta pakakuna llajtasta ajllanankuta. Kinsa llajtas Jordanpa inti llojsimuyninnejpi karqa, kinsataj Canaanpi. Chayqa allinpuni karqa, imajtinchus mana yuyasqallamanta runata wañuchejqa, usqhayllata pakakuna llajtaman chayayta atej (Núm. 35:12-14). Israelitasqa pakakuna llajtasman rej ñankunata, pichasqata japʼej kanku (Deu. 19:3). Chantapis letrerosta churaj kanku. Ajinamanta mana yuyasqallamanta runata wañuchejqa, cheqanta, usqhaytataj chayananpaj. Chantapis mana yuyasqallamanta runata wañuchejqa, Israelpi pakakuna llajtas kasqanrayku, mana necesariochu karqa waj suyuman ayqekunan. Imajtinchus waj suyupeqa, llulla diosesta yupaychananpaj tanqasqa kanman karqa. Jehová Dios nerqa, runata wañuchejkuna, wañuchisqallataj kanankuta. Mana yuyasqallamanta runata wañuchejrí, khuyasqa kananta, jarkʼasqa kanantataj. Chaymanta parlaspa, Bibliata ukhunchaj uj runa, jinata nerqa: “Mana yuyasqallamanta runata wañuchejqa ayqekuyta atillaj. Imaraykuchus pakakuna llajtasqa qayllallapi kaj”, nispa. Reparanchej jina, Jehová Diosqa mana rumi sonqochu, imallamantapis castiganawanchejpaj. Astawanqa “khuyakuyninpi may qhapaj” (Efe. 2:4). w17.11 pág. 14 párrs. 4, 5

Diosqa Zacariasman mosqoypi jina rikucherqa uj kʼuyuna librota, medina canasta ukhupi uj warmita, iskay warmistataj cigüeña lijrasniyojta (Zac. 5:1, 7-9). Chaykunawan yachachiwanchej, Jehová Dios sajra imasta ruwaj runasta, mana allinpajchu qhawasqanta. Arí, Jehová Diosqa sajra runasta chinkachenqa. Noqanchejqa Jehová Dios jina, sajra imasta chejnikunanchej tiyan. Diosta kusichejtinchejqa, payqa sajra imasmanta jarkʼawasunchej, maytataj bendeciwasunchej. Sajra runaspa chaupinpi tiyakojtinchejpis, Diosta kusichiyta atinchej. Chaytaqa Diospa yanapaynillanwan ruwayta atinchej. w17.10 pág. 21, 25 párrs. 1, 19

Soltera hermanasqa mana manchachikuspa tukuy imaymanamanta Diosta astawan sirvinkuman. Paykunaqa precursoras kankuman, maypichus pisi hermanos kanku chaypi yanapakunkuman. Yanapakamullankumantaj Tantakuna Wasista ruwaysikuspa, allinchaspa, planosta dibujaspa ima. Chantapis solicitudta juntʼachinkuman Reinomanta Willajkunapaj Escuelaman rinankupaj. Chantá wakin hermanasqa, ichá wajyarisqa kankuman Galaad Escuelaman. Kuraj hermanitasninchejta mayta munakunchej, maytataj kusikunchej congregacionpi kasqankumanta. Wakin kuraj hermanitasninchejqa Diospaj manaña ñaupajta jinachu llankʼayta atinku. Jinapis atisqankuman jina may kusiywan congregacionpi yanapakunku. Ichapis ancianosqa, uj kuraj hermanata ninkuman uj sipasta yuyaycharinanta allinta vistikunanpaj. Kuraj hermanitataj, kʼachallamanta chay sipas hermanawan parlarinman. Mana manchikuspataj reparachinman, maychus kajta pʼachallikuna kasqanta, wajkunata mana pantachinanpaj (1 Tim. 2:9, 10). Kuraj hermanitasninchej ajinamanta yanapakojtinku, congregación may ujchasqa kanqa. w17.09 págs. 31, 32 párrs. 17, 18

Ashkha gobiernos, curas ima mana munajchu kanku runas parlayninkupi Bibliata leenankuta. Jinapis Diosta munakoj runasqa, Bibliata tijrachillarqankupuni. John Wyclefmanta parlarina. Payqa Inglaterra suyumanta karqa. Kay 1330 watamanta 1384 watakamataj kausakorqa. Payqa munarqa tukuy runas Bibliata parlayninkupi leenankuta. Jinapis Bibliaqa mana karqachu inglés parlaypi. Manaqa waj parlaykunallapi. Kay 1382 watapi John Wyclef, waj runas ima Bibliata inglés parlayman tijracherqanku. John Wyclef tijrachisqan Bibliata, uj grupo runas mayta apaykachaj kanku. Chay runastaj Lolardos nisqa sutiwan rejsisqa karqanku. Paykunaqa Bibliata jatunpaj qhawaj kanku. Chayrayku Inglaterra suyupi ranchomanta rancho rej kanku, runasman Bibliata leepunankupaj. Chantá runasman Bibliamanta wakin partesitusta makiwan copiaspa jaywaj kanku. Kunankamaqa mundontinpi Bibliata waj parlaykunaman tijrachikun, imprimikuntaj runas parlayninkupi entiendenankupaj. w17.09 págs. 20, 21 párrs. 10-12

Wakin warmisqa mana wawasniyoj kayta atispa astawanraj llakikunkuman (Pro. 13:12). Jacobpa warmin Raquelqa, hermanan jina wawasniyoj kayta munarqa, nitaj aterqachu. Chayrayku may llakisqa kasharqa (Gén. 30:1, 2). Waj llakiymanta parlaspataj uj qhariwarmeqa mana yuyallanmanpischu mayqennillankupis wañupunanta. Kay jatun llakiypitaj ni pi rikukuyta munanchu. Cristianostaj Jesús wañusqasta kausarichimunanta suyakunchej, chay suyakuytaj viudo hermanosta, viuda hermanastapis mayta sonqochan (Juan 5:28, 29). Ajinamanta Jehová Diosqa chay jina llakiypi kashajkunata Palabrannejta yanapan, sonqochantaj. w17.06 págs. 4-6 párrs. 1, 6, 9

Uj kuti Jehovaqa, Moisesman sutinta willarerqa, imayna Dioschus kasqantapis sutʼincharqa. Chay kutipi Jehovaqa mana atiyninmantachu nitaj yachayninmantachu parlarqa. Manaqa khuyakuyniyoj, kʼacha sonqoyojtaj kasqanmanta parlarqa (Éxo. 34:5-7). Moisesqa yachayta munarqa, Jehová yanapanantachus manachus. Jehová Diostajrí khuyakuyniyoj kasqanta nispa, kamachisninta yanapanantapuni nisharqa (Éxo. 33:13). Jehovaqa pay jina khuyakuyniyoj kananchejta munan. Chayrayku wajkunamanta khuyakuyta yachananchej tiyan. Jehovaqa wajkunamanta khuyakunapaj jina ruwawarqanchej. Jinapis juchasapa kasqanchejrayku, wakin kutis mana khuyakuyta atillanchejchu. Noqallanchejpi yuyanamantaqa wajkunamanta khuyakuna. Chaypajqa yanapawasunchej Jehovamanta, Jesusmanta, waj hermanosmantawan yachakusqanchej. Chantá yachakullasuntaj imaynasmantachus wajkunamanta khuyakuyta, imaraykuchus allinninchejpaj kasqantapis. w17.09 págs. 8, 9 párrs. 1, 3

Mosoj kausaywan pʼachallikunchej, Jehovata jatunchayta munasqanchejrayku, manataj runaswan jatunchachikuyta munasqanchejraykuchu. Uj angelqa jatunchachikuyta munasqanrayku Diospa contranta oqharikorqa (Ezequiel 28:17 kikinchay). Uj angelchus jatunchakuypi urmarqa chayqa, noqanchejqa astawanraj jatunchakuypi urmasunman, pantaj runas kasqanchejrayku. Jinapis kʼumuykukoj sonqo kayta atisunman. Chaypajtaj sapa día Bibliata leena, leesqanchejpitaj tʼukurina (Deu. 17:18-20). Chantapis Jesusmanta yachakuna. Yachachisqantapis sonqonchejman churana (Mat. 20:28). Jesús may jina kʼumuykukoj sonqoyoj kasqanrayku, yachachisqasninpa chakisninkutapis mayllarqa (Juan 13:12-17). Chantapis kʼumuykukoj sonqoyoj kanapaj, Jehová atiyninwan yanapanawanchejta mañakuna. Ajinamanta wajkunata noqanchejmanta aswan kurajta jina qhawasunchej (Gál. 6:3, 4). w17.08 pág. 25 párrs. 11, 12

Ichá wakin kuti noqanchejpis apóstol Pablo jina, imata ruwanapajpis Jehovamanta yanapata mañakorqanchej. Jehovaj munayninman jina ruwashasqanchejtataj yuyarqanchej. Jinapis mana allinchu riwarqanchej. Astawanqa sinchʼi llakiykunapi rikukorqanchej, chaymantapachataj kausayninchejqa manaña kikinchu karqa (Ecl. 9:11). ¿Imatataj ruwasunman mana anchata llakikunapaj, sonqo tiyasqataj kanapaj? Jehová Diosmanta mañakusunman. Apóstol Pabloqa chayta yuyaycharqa. Chayrayku ima llakiyninchejpis kajtin Jehovamanta yanapata mañakuna (1 Ped. 5:6, 7). Mañakushaspaqa, Jehová cuidayta atiwasqanchejmanta mana iskaychakuspa mañakuna. Chantapis Jehová tukuy ima allin kajta qowasqanchejmanta agradecekuna. “Diosqa mañakusqanchejmantapis chayri yuyasqanchejmantapis, aswan ashkhataraj ruwayta atin”. Chayta yachaspa Jehová Diospi astawan atienekunchej (Efe. 3: 20). w17.08 págs. 9-11 párrs. 4, 6, 10

Ashkha hermanosqa jovencitomantapacha precursores kanku, kusisqataj kashanku. Joven, may sumajpuni kanman kausayniykipi imatachus ruwayta munasqaykimanta paykunawan parlarinayki. Chay hermanosqa nisonqanku precursor jina llankʼayqa, kausayniykipi ashkha imaspi yanapasunanta. Jesusqa cielopi Tatanwan kashaspa maytapuni yachakorqa. Kay jallpʼapi kashaspapis yachakullarqapuni. Payqa runasman Diosmanta sumaj willaykunata willamuspa kusiyta tarerqapuni. Mayta ñakʼarishaspapis Jehová Diosta kasukuspa kusikullarqataj (Isa. 50:4; Heb. 5:8; 12:2). Chantapis Jesús nerqa tukuy laya runasta yachachisqasninman tukuchimunanchejta, Diospa Palabranmantataj yachachimunanchejta (Mat. 28:19, 20). Joven, kausayniykipi chayta ruwanki chayqa, may kusisqa kanki, Jehová Diostataj jatunchanki. Pisimanta pisitaj Diosmanta sumajta willayta yachakunki. w17.07 págs. 23, 24 párrs. 6, 7

Jehová Tatanchejqa may khuyakuyniyoj. Payqa mayta sonqochawasunman (2 Cor. 1:3, 4). Wañupojpa familianqa congregacionpi sonqochayta tarinkuman (1 Tes. 5:11). ¿Imaynatá llakisqa kajkunata, sonqochasunman kallpachasunmantaj? (Pro. 17:22). Diospa Palabranqa nin: “Uj tiempoqa tiyan chʼinyanapaj, uj tiempotaj parlanapaj”, nispa (Ecl. 3:7). Uj viuda hermanamanta parlarina. Payqa Dalene sutiyoj, nintaj: “Wañupojpa familianqa llakiyninkumanta parlariyta munanku. Chayrayku paykunataqa allinta uyarina”, nispa. Waj hermanamantañataj parlarina. Payqa Junia sutiyoj. Paypa hermanonqa wañuchikorqa. Junia nin: “Wañupojpa familian imayna llakisqapunichus kashasqankuta mana allinta entiendeyta atisunmanchu. Jinapis entiendeyta munasqanchejqa, may sumaj”, nispa. Yuyarikuna mana tukuy runaschu kikinta llakikunchej, nillataj llakikusqanchejta kikintapunichu rikuchinchej. w17.07 págs. 13-15 párrs. 3, 11-13

Kunan tiempopeqa, ashkha runas qolqellamanta astawan llakikunku. Chayraykutaj astawan qhapajyayta maskʼankupuni, chayri tukuy kapuyninkuta mana chinkachinankupaj tukuy imata ruwankupuni. Wakin runastaj familiankumanta chayri mana onqonankumanta astawan llakikunku. Wakinkunataj profesionniyoj kanankumanta llakikullankutaj. Chaywanpis chaykunamanta nisqaqa, noqanchejqa astawan llakikunchej Jehová Dioslla allin kamachej kasqanta rikuchisqa kananmanta. Chaykunamanta mana allinta qhawarikusunchej chayqa, Jehová Dioslla allin kamachej kasqanta rikuchisqa kananmanta qonqapusunman, ruwanasnillanchejmanta, chayri problemasnillanchejmanta astawan llakikusqanchejrayku. Jehová Diosllata sumaj kamachejninchejta jina qhawajtinchejqa, ima llakiypi rikukuspapis aguantayta atillasunchej, Jehová Diosmantaj astawan qayllaykusunchej. w17.06 pág. 22 párrs. 1, 2

Diospa Palabranpi nin Jehovaqa munakuywan kamachisqanta. Chayrayku tatasqa, ancianospis munakuywan kamachinanku tiyan, nitaj paykunallapis kankuman jinachu imatapis ruwananku tiyan. Astawanqa Jehová Dios jina ruwananku tiyan. Apóstol Pablopis Jehová Dios jina, Jesús jinataj ruwarqa. Pabloqa, hermanosta mana kʼumuykachachejchu allin kajta ruwanankupaj, manaqa munakuywan kallpacharej (Rom. 12:1; Efe. 4:1; File. 8-10). Jehová Diosqa munakuywan imatapis ruwan. Chayrayku pikunachus Jehová Diosta munakunku, kamachisqantataj sumajpaj qhawanku chaykunaqa, pay jinallataj ruwananku tiyan. Pikunamanchus Jehová kamachinawanchejpaj atiyta qorqa, chaykunata respetaspaqa, Jehová Diosta kamachejninchejta jina qhawanchej. Chayrayku paykunata kasukunchej, imastachus kamachisqanku mana allin rijchʼawajtinchejpis. Kay sajra mundomanta runasqa, mana ajinatachu ruwanku, Jehová Diospa kamachisninrí tukuy sonqo kasukunchej (Efe. 5:22, 23; 6:1-3; Heb. 13:17). Jehová Diosta kasukusun chayqa allinninchejpaj kanqa, imaraykuchus payqa allinninchejtapuni munan. w17.06 pág. 30 párrs. 14, 15

Llakisqas, sonqo pʼakisqas chayri chʼampaykunapi rikukoj hermanosqa, kallpachananchejta, sonqochananchejta, yanapananchejta ima necesitanku (Pro. 12:25; Col. 4:11). ‘Creeypi hermanosninchejta’ munakusqanchejta rikuchina, parlasqanchejwan, ruwasqanchejwan ima (Gál. 6:10). Diospa Palabranqa kay qhepa pʼunchaykunapi, ashkha runas paykunallapi yuyanankuta, qolqeta munakunankuta ima nerqa (2 Tim. 3:1, 2). Chayrayku cristianosqa Jehová Diosta, Palabranta, hermanostapis astawan munakunapaj kallpachakunanchej tiyan. Jinapis juchasapa kasqanchejrayku ichapis wakin kuti hermanosninchejwan phiñanakusunman. Jinapis hermanosninchejta munakusqanchejrayku, usqhayllata chay chʼampayta allinchasunchej, congregacionpitaj Diospa bendicionnin kanqapuni (Efe. 4:32; Col. 3:14). Chayrayku Jehová Diosta, hermanosta, Palabrantapis tukuy sonqo munakunallapuni. w17.05 pág. 21 párrs. 17, 18

Yachanchej kay mundomanta runas qhasimanta ñakʼarichinawanchejta. Chaywanpis creeyninchej pruebaman churakunman, pi hermanollapis contranchejpi imatapis ruwasqanta yuyajtinchej chayri congregacionpi uj hermanoj contranpi imatapis ruwasqanta rikojtinchej. Ajinapi rikukuspa, ¿imatá ruwasun? ¿Niñachu Jehovata sirvisun? Tukuypis pantaj runas kasqanchejrayku pantanchej. Chayrayku pi hermanollapis qhasimanta sonqonchejta nanachiwasunman chayri noqanchej nanachisunman. Chaytaj hermanos ukhupi wakin kutilla rikukun. Jinapis chay kajtenqa cheqa cristianosqa mana tʼukunchejchu, nitaj miskʼanchejchu. Jehovaqa Biblianejta sumajta yuyaychawanchej, pi hermanollapis qhasimanta sonqonchejta nanachiwajtinchej cheqa sonqollapuni kanapaj (Sal. 55:12-14). w17.04 pág. 19 párrs. 4, 5

Casarakojkunaqa aswan jatun llakiypi rikukusunman, qosanchej chayri warminchej mana Jehová Diosta yupaychajtin. Ajinapi rikukojtinchejqa, qosanchejmanta chayri warminchejmanta ama separakunachu nitaj divorciakunachu (1 Cor. 7:12-16). Jehová Diosta yupaychaj casarasqa warmisqa, qosankuta respetananku tiyan, qosanku Diosta mana yupaychajtinpis, imaraykuchus “qosaqa warminpa uman”. Ajinallatataj qosaspis warminkuta munakunanku tiyan cuerponkuta jina, warmin Jehová Diosta mana yupaychajtinpis (Efe. 5:22, 23, 28, 29). Jehová Diosta yupaychaypi warminchej chayri qosanchej ichá mana saqewasunmanchu, wakin imasta ruwajta. Uj hermanamanta parlarina. Qosanqa, Jehová Diosta mana yupaychanchu. Ichá qosanqa hermanata ninman wakin diaslla predicamunanta. Ajinapi noqanchej rikukojtinchejqa, allin kanman kayta tapurikunanchej: “¿Jehová Diosta manaña yupaychanaytachu munashan? ¿Allillanchu kanman niwasqanta ruwanay?”, nispa. Imatapis ruwanapaj allintaraj yuyaycharikusun chayqa, ashkha problemasmanta librakusun (Fili. 4:5). w17.10 pág. 13 párrs. 7, 8

Biblia nerqa “imaymana parlayniyoj” runas, tukuy nacionesmanta Diospa llajtanman ujchaykukunankuta (Zac. 8:23, NM). Jinapis wawasniykichej, mana parlayniykichejta entiendejtinkoqa, Jehovamanta yachachiyta mana atillankichejchu. Tatasqa runasman Bibliamanta yachachinanku kajtinpis, wawasninkumanraj yachachinanku tiyan, imaraykuchus wiñay kausayta japʼenqanku Jehovata sumajta rejsejtillanku (Juan 17:3). Chayrayku tatasqa sapa kuti wawasninkuman Jehovamanta yachachinanku tiyan (Deu. 6:6, 7). Ichapis wawasniykichejqa escuelapi chayri runaswan parlaspa, tiyakushankichej chay lugarmanta parlayta yachakonqanku. Jinapis parlayniykichejta yachakonqanku sapa kuti wawasniykichejwan parlajtiykichej. Wawasniykichej parlayniykichejta yachakojtinkoqa, mana pʼenqakuspa parlarillanqanku, imaynachus kashasqankutapis willarisonqachej. Chantá iskay parlaykunata yachajtinkoqa sumajta tʼukuriyta, wajkunatapis entiendeyta atillanqanku. w17.05 pág. 9 párrs. 5, 6

Jabinpata jisqʼon pachaj fierromanta maqanakupaj carretasnin karqa, israelitastaj maqanakunankupaj mana sumaj armasniyojchu karqanku (Jue. 4:1-3, 12, 13; 5:6-8). Jehovaqa profeta Deboranejta, Baracta yanaparqa. Chantá Barac, 10.000 runas ima Taanac llajtapi enemigosninkuwan maqanakuyta qallarerqanku (Jue. 4:14-16). Jehovataj israelitasta chay maqanakupi yanaparqa. Imaraykuchus jinallapi parayta qallarerqa, maqanakusharqanku chay lugartaj qʼetaman tukorqa. Chayraykutaj israelitasqa enemigosninkuta atipaykorqanku. Baracqa Sisarata, soldadosnintawan Haroset-goimkama 24 kilometrosta qhatiykorqa. Chantá Sisaraj carretan tʼuruman satʼiykukorqa, Sisarataj carretanmanta uraykuspa, chakipi ayqerikaporqa Zaanaimman, ichapis Cedes llajtaj qayllanman. Chaypitaj Sisaraqa Jaelpa wasinpi pakakorqa, may saykʼusqa kashasqanraykutaj sinchʼita puñurparerqa. Puñushajtintaj Jaelqa wañurparicherqa (Jue. 4:17-21). Jehovaqa israelitasta yanaparqa enemigosninkuta atipanankupaj. w17.04 págs. 29, 30 párrs. 6-8

Armagedón pasayta, ¿uj organizacionllapis kay Jallpʼapi kanqachu? Biblia nin: “Mosoj cielota, mosoj jallpʼatawan suyakushanchej, pay qonanta nisqanman jina. Chaypitaj cheqan kausaylla kanqa”, nispa (2 Ped. 3:13). Gobiernos, paykunaj atiyninpi kajkuna ima chinkachisqas kanqanku. Paykunaj cuentankumantataj ‘mosoj cielo, mosoj jallpʼa’ kanqa. Mosoj cieloqa, uj mosoj gobierno, mayqenpichus Jesús, 144.000 ajllasqa cristianos ima kamachenqanku. Mosoj jallpʼataj kasukoj runas kanku. Jesús, 144.000 ajllasqa cristianos ima Diospa Gobiernonpi kamachishajtinku, Jehová Dios jina ruwanqanku, pichus mana munanchu chʼajwas kananta (1 Cor. 14:33). Chayrayku mosoj jallpʼaqa sumaj wakichisqa kanqa. Chaypitaj kʼacha runas cargoyoj kanqanku yanapanawanchejpaj (Sal. 45:16). Paykunataqa Jesuswan, 144.000 ajllasqa cristianoswan yanapanqanku. Engañaj organizacionespa cuentanmantataj uj organizacionlla kanqa. Chay organizaciontaj may ujchasqa kanqa, nitaj jaykʼaypis chinkachisqachu kanqa. w17.04 págs. 11, 12 párrs. 8, 9

Casado kausaytaqa Jehová rikhurichin. Chayrayku Paypajqa novios imatachus casarakushaspa ninakusqankoqa mana pujllakuy jinallachu. Noviosqa casarakushaspa Jehovaj ñaupaqenpi, wajkunaj ñaupaqenkupiwan imatachus ruwanankuta ninakunku. Chantapis purajmanta munakunankuta, cuidanakunankuta, respetanakunankuta ima ninakunku, kay Jallpʼapi khuska tiyakunankukama, matrimonio ukhupi. Wakin casarakojkunaqa ichá mana kay kikin palabrastapunichu ninku. Jinapis Diospa ñaupaqenpi imatachus ruwanankuta ninku. Chaymantapachataj, qhariwarmi kanku. Qhariwarmi kausaytaqa wañuylla tʼaqanan tiyan (1 Cor. 7:39). Jesús nerqa: “Diospa ujchasqantaqa, ama pipis tʼaqachunchu”, nispa. Casarakuyta munajkunaqa, mana yuyanankuchu tiyan, qhariwarmi kausayninkupi mana allin rejtin divorciakuyta atillasqankuta (Mar. 10:9). Tukuypis pantaj runas kanchej, chayrayku casarasqa kausaypi problemas kanqapuni. Biblia nin, casarasqasqa wakin kutis “llakiyniyoj” kanankuta, nisunman problemasniyoj (1 Cor. 7:28). w17.04 pág. 7 párrs. 14, 15