Septiembre

Israel nacionqa Jehová Diospa ajllasqan llajta karqa. Chayrayku israelitaspa wawasninkoqa, nacekusqankumantapacha Diospa llajtanmanta karqanku. Chaywanpis wawasninchejqa niraj Diospa llajtanmantachu kanku, noqanchej bautizasqaña kajtinchejpis. Imajtinchus wawasninchejqa Jehová Diosta munakuyta yachakunanku tiyan. Chayrayku wawasninchejta nacekusqankumantapacha, yanapananchej tiyan, Jesuspa yachachisqanman tukunankupaj. Chantapis Jehová Diosllapaj kausakunankupaj, bautizakunankupaj ima yanapanallanchejtaj tiyan. Imaraykuchus paykunaqa chaykunata ruwaspalla jatun ñakʼariy tiempopi salvakuyta atenqanku (Mat. 24:13). Arí, wawasninchejman Jehová Diosmanta yachacheyqa, uj sumaj llankʼay (Sal. 127:3). Noqanchejpis kusikunanchej tiyan, wawasninchej Jehová Diosman qayllaykuspa bautizakojtinku. w18.03 pág. 12 párrs. 16, 17

Congregacionpi ancianosqa, Jesús jinapuni hermanosta kʼamirinanku tiyan. Chaytataj ruwankuman Bibliaj nisqanman jina. Ajinata ruwaspaqa rikuchenqanku Jehová Dioswan, Jesuswan ima yanapachikushasqankuta. Jehová Diospa yuyaychaykunasninta tukuy sonqo kasukojtinchejqa, may chhika bendicionesta japʼisunchej. Chantapis Jehová Dios jina, Jesús jinataj wajkunata cheqanchajtinchej, yachachejtinchej imaqa, ashkha bendicionesta japʼillasuntaj. Imajtinchus familia ukhupi, congregación ukhupipis mana ima chʼajwapis kanqachu. Astawanqa allin kausay kanqa, imajtinchus tukuypis munanakusunchej, respetanakusunchejtaj. Chantapis aswan qhepaman uj sumaj kausayta japʼisunchej (Sal. 72:7). Jehová Diosqa yachachishawanchej, cheqanchashawanchejtaj paraisopi wiñaypaj uj familia jina ujchasqa kausakunanchejpaj (Isa. 11:9). Chayta mana qonqasunchu chayqa, reparasunchej Jehová Diosqa munakuwasqanchejrayku, allinninchejta munasqanraykutaj jasutʼiwasqanchejta, yachachishawasqanchejtataj. w18.03 págs. 26, 27 párrs. 15, 17, 19

Runasqa, Juanwan bautizachikoj kanku Moisespa Leyninta pʼakisqankumanta pesachikusqankuta rikuchinankupaj (Mat. 3:1-6). Chantapis Juanqa, Jesusta bautizarqa (Mat. 3:13-17). Chaywanpis Jesusqa mana juchamanta pesachikusqanraykuchu bautizakorqa, imajtinchus payqa mana pantaj runachu karqa (1 Ped. 2:22). Astawanpis bautizakorqa, Jehová Diospa munayninta tukuy sonqo ruwayta munasqanta rikuchinanpaj (Heb. 10:7). Jesús, Diosmanta willayta qallarisqantawan, yachachisqasnenqa runasta bautizayta qallarerqanku (Juan 3:22; 4:1, 2). Chay runaspis, bautizakorqanku Moisespa Leyninta pʼakisqankumanta pesachikusqankuta rikuchinallankupajtaj. Jinapis Jesús kausarimusqanmanta qhepaman, runasqa Diospa munayninta ruwanankupaj bautizakunanku karqa. w18.03 pág. 5 párrs. 6, 7

¿Imatá niyta munan Dios jina yuyaj runa? Jehová Dios jina yuyaj runaqa, Diosman qayllaykunanpaj mayta kallpachakullanpuni. Jehová Dios jina imatapis ruwananpajtaj kallpachakullanpuni (Efe. 5:1). Chantapis kallpachakullantaj Jehová Diosta astawan rejsinanpaj. Diosta Tatanta jina qhawasqanraykutaj, kausayninpi kamachiykunasninta kasukunpuni (Sal. 119:33; 143:10). Arí, Jehová Dios jina yuyaj runaqa ‘Diospa atiyninpa poqoyninman’ jina kausakun, nitaj sajra runas jinachu (Gál. 5:22, 23). w18.02 págs. 18, 19 párrs. 3, 6

Danielqa Babiloniaman apasqa karqa. Babiloniapi tiyakoj runasqa, llulla diosesta yupaychaj kanku, layqeriostataj ruwaj kanku. Babiloniosqa judiosta mayta chejnikoj kanku. Astawanpis, paykunamanta asikoj kanku, jinallataj Jehová Diosmantapis (Sal. 137:1, 3). Chayrayku Danielwan judioswanqa maytachá phutikoj kanku. Chantapis babiloniosqa munarqanku reypa mikhunasninta mikhunankuta. Chay jina mikhunastataj Jehová Diosqa, judiosman kamacherqa mana mikhunankuta. Chayrayku Danielqa “sonqompi nerqa reypa mikhunanwan, ujyananwantaj mana chʼichichakunanta” (Dan. 1:5-8, 14-17). Chantapis Babiloniamanta reyqa, Danielta tukuymanta aswan kurajta churarqa, may yachayniyoj kasqanrayku (Dan. 1:19, 20). Ajina llankʼayniyoj kajtinpis, Danielqa mana jatunchakorqachu. Nitaj yuyarqachu paypaj nisqanpuni ruwakunan kasqanta. Astawanqa kʼumuykukoj sonqollapuni karqa. Chantapis Danielqa, Jehová Diospa yanapaynillanwan tukuy imata ruwasqanta nerqa (Dan. 2:30). Chayrayku Jehová Diosqa judiosta Danielmanta yachakunankuta nerqa, Noemanta, Jobmanta jina. Chay tiempopaj Danielqa jovenllaraj kasharqa. Noewan, Jobwanrí wañuporqankuña. Paykunaqa wañupunankukama Jehová Diosta kasukullarqankupuni (Eze. 14:14). Jehová Dios kamachin Daniel, ¿cheqan kajta ruwananpi atienekorqachu? Arí, Daniel jovenllaraj kashajtinpis Jehová Diosqa cheqan kajta ruwananpi atienekorqa. Ajinapunitaj karqa, imaraykuchus Danielqa wañupunankama Diosta kasukorqa. w18.02 pág. 5 párrs. 11, 12

Jesusqa maychus kajllata kusirikuyta yachaj. Imajtinchus pay rerqa uj casamientoman, uj jatun mikhuymanwan (Juan 2:1-10). Casamientopi kashajtintaj vino tukukaporqa. Chayrayku Jesusqa, yakuta vinoman tukucherqa. Chaywanpis Jesusqa mana sonqota kusirichiyllatachu maskʼarqa. Astawanqa Jehová Diospa munayninta ruwarqa, runasta yanapananpajtaj mayta kallpachakorqa. Chantapis tukuy runasta salvananrayku kausayninta tukuy sonqo qorqa. Yachachisqasninmanpis nerqa: “Kusisqa kankichej, runas noqarayku rimasojtiykichej, qhatiykachasojtiykichej, llullakuspa imaymana sajrata nisojtiykichejpis. Kusikuychej jatun kusiywan, imaraykuchus cielopi tʼinkaykichejqa jatun”, nispa (Mat. 5:11, 12). Diosta munakusqanchejrayku, kusichiytataj munasqanchejrayku, Diosta phiñachej imasta ni imarayku ruwayta munanchejchu (Mat. 22:37, 38). w18.01 pág. 26 párrs. 16-18

Jehová Diosta munakusqanchejrayku, jatunpajtaj qhawasqanchejrayku, llajtanta kapuyninchejwan yanapakunchej. Imastachus Jehová Dios noqanchejrayku ruwasqanpi piensarispaqa, sonqonchej kuyurin. Rey Davidpis nerqa, tukuy ima Diosllamanta jamusqanta, imatachus qowasqanchejpis paypata kasqanta (1 Crón. 29:11-14). Wajkunaman qorispaqa, kusisqa kanchej, sonqo juntʼasqataj. Uj tata wawitanman sapa kuti qolqesituta regalasqanpi piensarina. Chay wawitataj chay qolqesituta tantaspa, tatasninpaj uj regalitota rantipun. Tatasnintaj chay regalomanta mayta kusikunku. Kunantaj uj joven precursorpi piensarina. Payqa tatasninwan tiyakun, qolqesitunwantaj yanapakun alquilerpaj chayri mikhunapaj, tatasnin mana mañajtinkupis. Tatasnenqa wawanta saqellanku yanapakunanta, imajtinchus yachanku pay yanapakojtin kusisqa kananta. Chay tatas jinallataj Jehová Diospis, yachan kapuyninchejwan yanapakojtinchej kusisqa kananchejta. w18.01 pág. 18 párrs. 4, 6

Wawasninchejmanqa mana ninallanchejchu tiyan, imachus allin imatajchus mana allin kasqanta. Astawanqa sumajta tʼukurichinanchej tiyan, kay jinasta tapuspa: “¿Imaraykutaj Biblia niwanchej wakin imasta mana ruwanata allillanman rijchʼakojtinpis? ¿Creenkichu Bibliaj nisqasnin allinninchejpajpuni kasqanta?”, nispa (Isa. 48:17, 18). Wawasninchej bautizakuyta munanku chayqa, reparachinanchej tiyan, bautizakuy mana pujllakuy jinallachu kasqanta. Chayta reparachinapaj, ichapis kay jinata tapurisunman: “¿Imajtintaj bautizakuyta munanki wawáy? ¿Bautizakuytawan ima llakiykunapitaj rikukuwaj? Chanta bautizakuspa, ¿ima bendicionestataj japʼinki?”, nispa (Mar. 10:29, 30). Chaykunata wawasninchejta tapurinapuni tiyan, niraj bautizakushajtinku. Chantapis wawasninchejta reparachinanchej tiyan, Diosta kasukuy allinninchejpajpuni kasqanta. Diosmanta karunchakuytaj llakiykunallata apamunawanchejta. Chayta wawasninchej reparajtinkoqa, yachanqanku Bibliaj nisqanman jina kausakoyqa allinninchejpajpuni kasqanta. w17.12 págs. 21, 22 párrs. 14, 15

Kay tiempopi kausayqa mana facilchu. Imaraykuchus noqanchejmanta wakenqa, sinchʼi onqoywan ñakʼarishanchej. Wakintaj kurajña kaspapis, tatanchejta chayri mamanchejta qhawananchej tiyan. Wakintaj familianchej imatachus necesitasqankuta, mana qoyta atillanchejchu. Wakinrí ashkha llakiykunapi rikukusqanchejrayku, ichá may phutisqa kashanchej. Chantá ichá jampichikunapaj qolqeta mayta gastashanchej, tiempochakushanchejtaj. Jehová Diostaj sapa estrellata rejsin, sutinmantataj wajyan. Chayta yachaytaj, reparachiwanchej Jehová Diosqa, sumajta rejsiwasqanchejta, munakuwasqanchejtataj. Chayrayku noqanchejqa Diosta mana tanqasqa jinallachu yupaychananchej tiyan, manaqa munakusqanchejrayku (Sal. 19:1, 3, 14). Tatanchej Jehovaqa sumajta rejsiwanchej. Chayrayku Biblia nin: “Umaykichejmanta chujchasniykichejpis, tukuyninku yupasqa kashanku”, nispa (Mat. 10:30). Waj versiculotaj nin: “Mana juchayoj kawsajkunata Tata Diosqa waqaychan”, nispa (Sal. 37:18). Arí, Jehová Diosqa ima llakiykunapichus rikukusqanchejta yachan. Chayrayku payqa yanapawasunchej chay llakiykunata aguantanapaj. w18.01 págs. 7, 8 párrs. 1, 4

Tabitata Pedro kausarichisqanqa “tukuy Jope llajtapi yachakorqa, ashkha runastaj Señorpi creerqanku”. Chay creejkunataj Jesusmanta sumaj willaykunata runasman willarqanku. Willamullarqankutaj Jehová Dios may atiyniyoj kasqanta, wañusqasta kausarichinanpaj (Hech. 9:36-42). Uj kutipi ashkha runas rikorqanku, uj joven kausarichisqa kasqanta. Chay kutipi apóstol Pabloqa, Troas llajtapi kasharqa. Troas llajtaqa, kay tiempopi Turquiapi kashan, inti yaykuynejpi. Pabloqa hermanosman alto pata wasipi, yachachisharqa, chaupi tutakamataj parlarqa. Uj joven Eutico sutiyoj ventanapi tiyasharqa, Pablo parlashajtintaj puñuywan atipachikuspa sinchʼita puñurparerqa. Kinsa kaj pisomantataj pampaman urmaykorqa. Ichapis Lucas ñaupajta Euticojpaman chayarqa. Lucas doctor kasqanraykutaj Eutico wañupusqanta nerqa. Pablotaj chay joventa marqʼariykukuspa, nerqa: “Ama llakikuychejchu, payqa kausakushan”, nispa. Hermanostaj chay joventa kausarimojta rikuspa ‘may sonqochasqa qhepakorqanku’ (Hech. 20:7-12). w17.12 pág. 5 párrs. 10, 11

¿Kay mundopi kaj problemas runasta llakichillanqapunichu? Runasqa mana guerrasta tukuchiyta atinkuchu. Wakin lugarespi suwas, abusajkuna ima astawan yapakushallankupuni. Wakin runastaj onqoykuspa wañushallankupuni. Reparanchej jina runasqa, guerrasta, sajra ruwaykunata, onqoykunata, wajchayaytapis manapuni chinkachenqankuchu. Imajtinchus kay tiempopi autoridades, empresasmanta patronespis paykunaj allinnillankuta maskʼanku. Tukuy llakiykunataqa Diospa Gobiernollan chinkachenqa. Jehová Diosqa chinkachenqa guerrasta, chejninakuyta, llukʼiykuyta, llulla religionta, Diablotawan (Sal 46:9). Chantapis chinkachillanqataj suwa runasta, abusajkunatapis. Kay tiempopitaj Jehová Diosqa, yachachishawanchej purajmanta munanakunata, yanapanakunatapis. Chaytataj ni mayqen gobiernopis ruwayta atinmanchu (Isa. 11:9). Biblia nisqanman jina, tumpamantawan Jehová Diosqa, tukuy imaymana onqoykunata chinkachenqa, sumajta kausakunanchejpaj (Isa. 35:5, 6). Wajchayaytapis chinkachillanqataj, jinamanta tukuyninchej kusisqas kausakusunchej, Diosmantaj astawan qayllaykusunchej (Sal. 72:12, 13). w17.11 págs. 23, 24 párrs. 14-16

Pakakuna llajtasqa, mana yuyasqallamanta runata wañuchejkuna pakakunankupaj karqa. Jehová Diosqa ni imarayku runata wañuchinanchejta munanchu (Pro. 6:16, 17). Payqa cheqan, santotaj. Chayrayku mana yuyasqallamanta runata wañuchejta, mana qhawallajchu. Leymanta yachachejkuna, fariseos imaqa, mana Jehová Dios jinachu runas salvakunankuta munaj kanku. Chayrayku Jesús paykunaman nerqa: ‘Yachaypa llaventa runasmanta qhechojkuna. Diospa Gobiernonman qankunaqa mana yaykorqankichejchu, yaykuyta munajkunatapis jarkʼankichej’, nispa (Luc. 11:52). Arí, leymanta yachachejkuna, fariseos imaqa, Diospa Palabranta runasman mana entiendechejchu kanku, nitaj wiñay kausayta tarinankupaj yanapajchu kanku. Astawanqa Jesuspa qhepanta riyta munajkunata, jarkʼaj kanku (Hech. 3:15). Ajinata jarkʼasqankuraykutaj, runasta chinkay ñanllaman pusasharqanku. Arí, paykunaqa mana runasta munakojchu kanku, astawanqa paykunallapi yuyaj kanku. w17.11 pág. 15 párrs. 9, 10

Jehovaj testigosninwan estudiashaspaqa, ichapis familiaresninchejman mana willarerqanchejchu Bibliamanta yachakushasqanchejta. Jinapis Bibliamanta astawan yachakuspa, ichapis repararqanchej paykunaman Bibliamanta willarina kasqanta. Wakin familiaresninchejtaj ichapis mayta phiñakuspa churanakuwasunman, Jehová Diosta sirvisqanchejrayku. Jinapis Diosta kasukuspallapuni, familiaresninchejwan allinta kausakuna. Bibliamanta yachakusqanchejrayku, may kusisqa kanchej. Jinapis wakin familiaresninchejqa yuyankuman Jehovaj testigosnin engañaykuwasqanchejta chayri llulla iglesiaman yaykupusqanchejta. Fiestasninkuman mana risqanchejraykutaj, ichapis yuyankuman paykunata manaña munakusqanchejta. Piensallankumantaj ashkha llakiykuna qhatirinawanchejta. Familiaresninchejta sumajta entiendenapajqa, yachananchej tiyan imaschus llakichisqanta, ajinallamanta yanapariyta atisunchej (Pro. 20:5). Apóstol Pablo jina ruwasunman. Pay nerqa: “Tukuy runaspaj imaynachus kasqankuman jina tukuni, runasta yanapanaypaj”, nispa. Noqanchejpis pay jina ruwasun chayqa, familiaresninchejman Diosmanta willariyta atisunchej (1 Cor. 9:19-23). w17.10 pág. 15 párrs. 11, 12

Ichapis jatunmanta takiyta manchachikusunman mana takiyta yachasqanchejrayku. Jinapis sumajta takinapajqa kaykunata ruwayta atinchej. Sumajta samasunchej chayqa, jatunmanta sumajta takisunchej. Imaynatachus corriente focota kʼanchananpaj yanapan, ajinallatataj aireta sumajta samayqa, jatunmanta takinapaj yanapawasun. Bibliaqa niwanchej: ‘Jehová Diosman kusiywan kʼachituta tocarispa takiychej’, nispa (Sal. 33:1-3). Chaypajqa imayna kallpawanchus parlanchej, ajina kallpallawantaj takina. Mana manchachikuspa takinaykipajqa, allin kanman familiaykiwan Diosta yupaychashajtiyki, mayta gustasusqan takiyta ajllanayki. Chantá chay takiypa letrasninta mana manchachikuspa, jatunmanta, kallpawantaj leeriwaj. Chaymantaqa chay takiypa ujnin partenta, kallpawan ujllapi leerispa wasaykuchiwaj. Chantá chay parteta imayna kallpawanchus leerqanki, ajina kallpallawantaj takiriwaj (Isa. 24:14). Arí, takishaspaqa mana manchachikunachu, nitaj pʼenqakunachu. w17.11 pág. 6 párrs. 11-13

Judiosqa Babiloniamanta Jerusalenman kutipushajtinku, maytachá parlarikorqanku imastachus Jerusalenpi ruwanankumanta. Ichapis kuraj runasqa jovenesman willarerqanku, imaynachus ñaupajta Jerusalén llajta, Diospa templonpis kasqanmanta (Esd. 3:12). Sichus noqanchej paykunawan Babiloniamanta Jerusalenman kutisunman karqa chayqa, maytachá llakikusunman karqa, Jerusalenta thuñisqata rikuspa, perqasninta lajrasqata rikuspa, jinallataj mana punkusniyojta rikuspapis. Jerusalén llajta ajina llakiy kashajtinpis, judiosqa mana anchata llakikorqankuchu. Imaraykuchus Jehová Diosqa Jerusalenman kutipushajtinku tukuy imaymanamanta paykunata yanapasqa, sajra runasmantapis jarkʼasqa. Jerusalenman chayaytawantaj, uj altarta sayachisqanku templo kasharqa chaypi. Chaypitaj Jehová Diospaj sapa día uywasta qʼolachisqanku (Esd. 3:1, 2). w17.10 págs. 26, 27 párrs. 2, 3

Salomonqa tatanpa nisqanta yuyarikullajpunichá. Davidqa mana manchachikorqachu Goliatwan maqanakuyta. Imaraykuchus Jehova Diospa yanapayninwan Goliatta atipayta aterqa (1 Sam. 17:45, 49, 50). Davidqa mana manchachikoj runa kasqanrayku, Salomonta kallpacharqa templota ruwananpaj. Jehová Diospa yanapayninwantaj, qanchis wata kurajpi chay jatun templota tukorqa. Imaynatachus Jehová Dios Salomonta yanaparqa, ajinallatataj noqanchejtapis yanapawasunchej familiapi, congregacionpi ruwanasninchejta juntʼanapaj (Isa. 41:10, 13). Mana manchachikuspa tukuy imaymanamanta Jehová Diosta sirvisun chayqa kunan tiempopi, jamoj tiempopipis mayta bendeciwasunpuni. w17.09 págs. 28, 29, 32 párrs. 3, 4, 20, 21

Jehovaj testigosnin jina, yachanchej Diospa Palabran “kausayniyoj, atiyniyojtaj” kasqanta. Chaymantataj mana iskayrayanchejchu. Diospa Palabran atiyniyoj kasqanrayku, may chhika runasta yanaparqa, allin runasman tukunankupaj. Wakin runasqa, niraj Jehovaj testigon kashaspa, suwas karqanku, drogakoj kanku, khuchichakojtaj kanku. Wakintaj may rejsisqa chayri qhapaj kaspapis, mana kusisqachu kausakoj kanku (Ecl. 2:3-11). Chayrayku llakisqalla karqanku, wañuyllatañataj suyaj kanku. Jinapis Bibliamanta yachakusqankurayku, uj sumaj kausayta suyakushanku. Chaytataj sutʼita reparanchej Torremanta Qhawaj revistapi “Bibliaqa cambianankupaj yanaparqa”, nisqa yachaqanasta leespa. Chay yachaqanastaj unaymantaña publicacionespi llojsishan. Kunan cristianosña kaspapis Diospa Palabranwan yanapachikunallapuni, Jehová Diosman astawan qayllaykunapaj. w17.09 pág. 23 párr. 1

Jehová Diosqa imayna llakiypichus Lot kashasqanta sumajta yacharqa. Kikillantataj sumajta yachan imayna llakiypichus sapa uj kashasqanchejta (Isa. 63:7-9; Sant. 5:11; 2 Ped. 2:9). Jehová Diosqa llajtanta yachachillarqataj wajkunamanta khuyakunankuta. Israelitasmanta parlarina. Jehovaqa paykunapaj leyesta churaporqa. Ujnin ley nisqanman jinataj, uj israelita qolqeta manukojtin, ima pʼachantapis prendata jina saqenan karqa. Jinapis manojqa niraj inti yaykupushajtin chay pʼachanta kutichipunan karqa, manukoj runa mana chʼisinpi chiriykuchikunanpaj (Éxo. 22:26, 27). Ichapis Israelpi kanman karqa mana khuyarikoj runa, manukoj runaman pʼachanta mana kutichipuyta munaj. Jinapis Jehovaqa israelitasta yachacherqa khuyakoj kanankuta. ¿Imatataj kaymanta yachakusunman? Hermanosninchejmanta khuyarikuna kasqanta. Chayrayku uj hermano chayri uj hermana llakiypi kashan chayqa, yanaparinapacha (Col. 3:12; Sant. 2:15, 16; 1 Juan 3:17). w17.09 pág. 9 párrs. 4, 5

Jesusqa mayta ñakʼarejtinpis wañupunankama llampʼu sonqo, pacienciayojtaj karqa. Paymantaqa mayta yachakusunman (1 Ped. 2:21-23). Noqanchejpis wajkunata perdonaspa llampʼu sonqo, pacienciayojtaj kasqanchejta rikuchisunman. Apóstol Pabloqa cristianosman nerqa: “Wajkuna contraykichejpi imata ruwajtinkupis, ujkuna ujkunawan aguantanakullaychejpuni, tukuy sonqotaj perdonanakuychej. Imaynatachus Jehová Dios qankunata tukuy sonqo perdonasorqachej, ajinallatataj qankunapis perdonanakuychej”, nispa (Col. 3:13). Pabloj nisqanta kasukunapaj llampʼu sonqo, pacienciayojtaj kananchej tiyan. Congregacionpi tukuypis chayta ruwasun chayqa ujchasqallapuni kasunchej. Jehovaqa munan llampʼu sonqo, pacienciayojtaj kananchejta. Paraisopi kausakuyta munanchej chayqa, chaykunata rikuchinanchejpuni tiyan (Mat. 5:5; Sant. 1:21). Astawanpis llampʼu sonqo, pacienciayojtaj kasunchej chayqa, Jehovata jatunchasunchej. Chantapis runa masinchejta yanapasunchej Bibliaj nisqanta kasukunankupaj (Gál. 6:1; 2 Tim. 2:24, 25). w17.08 págs. 25, 26 párrs. 15-17

Bibliapi leesqanchejman jina, Jehovaqa kamachisninta yanapananpaj ashkha kutispi tʼukuna imasta ruwarqa. Rey Ezequiasmanta parlarina. Pay kamachishajtin Asiriamanta rey Senaqueribqa, Judaj jallpʼasninta atipaspa japʼikaporqa. Jerusalenta japʼikapunanpajtaj kasharqa (2 Rey. 18:1-3, 13). Chantá rey Senaqueribqa, Ezequiasman nichimorqa Jerusalenpi kajkuna jaywaykukunankuta. Ezequiastajrí chayta uyarispa Jehovamanta yanapata mañakorqa, Diospa profetan Isaiaswantaj yuyaychachikorqa (2 Rey. 19:5, 15-20). Rey Ezequiastaj mana maqanakunankupaj uj tratota ruwayta munarqa. Chayrayku rey Senaqueribman mashkhatachus mañasqanman jina qolqeta apacherqa (2 Rey. 18:14, 15). Chantá Ezequiasqa, asiriosmanta jarkʼakunanpaj llajtata wakicherqa (2 Cró. 32:2-4). ¿Imataj chantá karqa? Jehová Diosqa ujnin angelta kachamorqa, chay angeltaj 185.000 asirio soldadosta uj tutallapi wañuracherqa. Ezequiastaj Jehová chayta ruwananta nichá yuyallarqapischu (2 Rey. 19:35). w17.08 págs. 10, 11 párrs. 7, 12

Joven, Jehová Diospaj astawan llankʼanaykipaj, ¿imaynatá wakichikushawaj? Jesús jina kʼacha kanaykipaj kallpachakuy. Chaytaj yanapasonqa Jehová Diosta astawan sumajta sirvinaykipaj. Chaypajqa sapa pʼunchay Diospa Palabranta leey, leesqaykipitaj tʼukuriy. Tantakuykunapi parlarinaykipajtaj sumajta wakichikuy. Escuelallapiraj kashaspa sumajta predicanaykipaj yachakushay. Runa masiykimanta interesakuy. Chaypajtaj kʼachallamanta tapuriy imaynachus kashasqankuta, sumajtataj uyariy. Jehová Diosqa munan llampʼu sonqo kananchejta, imallapipis yanapaysikunanchejtataj. Chayrayku Tantakuna Wasipi imatapis allinchana kajtin chayri llimphuchana kajtin, tukuy sonqo yanapakuy (Sal. 110:3; Hech. 6:1-3). “Hermanosqa Timoteomanta allinta parlaj kanku”. Chayrayku apóstol Pabloqa, Timoteota ajllarqa paywan khuska misionero jina llankʼananpaj (Hech. 16:1-5). w17.07 págs. 23, 24, 26 párrs. 7, 14

Jehová Diosllachus gobernananpaj derechoyoj kasqanta chayri manachus sutʼinchakunankamaqa, nacionespi, aylluspi, familiaspi ima chʼampaykuna kanqapuni. Jehová Dioslla sumaj kamachej kasqanta sutʼinchakojtintaj, tukuypis paypa kamachiyninpi kusisqa, ujchasqataj wiñaypaj kausakusunchej (Efe. 1:9, 10). Pisimantawan sutʼi rikukonqa Jehová Diospa kamachiynenqa cheqanpuni kasqanta, Satanaspa, runaspatapis kamachiyninkutaj mana allinchu kasqanta. Chayraykutaj Jehová Diosqa chaykunata Gobiernonnejta chinkachenqa. Cheqan runasqa rikuchenqanku Jehová Diosta mana wasanchaspa kasukuyta atikusqanta (Isa. 45:24). Paykuna jinallataj ruwayta munanchej, ¿icharí? Chaypajqa, ama qonqapunachu Jehová Dioslla sumaj kamachej kasqanta sutʼinchakunanqa, tukuy imamantapis aswan ñaupajpi kasqanta. w17.06 pág. 23 párrs. 4, 5

Wakin runasqa familiankumanta pillapis wañupojtin pisi tiempollata llakikunku, wakintajrí unayta llakikunku. Chayrayku wakinkunaqa, mana wañupoj pʼampakusqan chay diasllapichu sonqocharinata necesitanku, manaqa qhepan killaspipis. Pʼampakuy diaspeqa ashkha familiares, amigos ima kashanku wañupojpa familianta sonqocharinankupaj, chaymantataj wasinkuman kutispa saqerpanku. Wañupojpa familiantaqa sapa llakisqa kashajtinku sonqochanallapuni (1 Tes. 3:7). Qosanchej chayri señoranchej wañupojtin imallapis paymanta yuyarichiwasunman, ichapis kanman, uj takiysitu, uj foto chayri waj imas. Chantapis casarakusqanchej diapi chayri wakin killaspi astawan paymanta yuyarikusunman. Yuyarikuspataj mayta llakikusunman. Sapallanchejña kaspaqa ichá jatun tantakuyman, chayri Jesuspa wañuyninta yuyarinapaj tantakuyman mana riyta atillasunmanchu. Imaraykuchus wañoj familiarninchejmanta yuyarikunchejpuni. Arí, wañupojpa familianqa mana wakin diasllapichu sonqochanata necesitanqanku. w17.07 pág. 16 párrs. 17-19

Wajkunaman sonqomantapacha munakuyninchejta rikuchejtinchejqa llakiyninchej pisiyanqa. Ashkha casarasqa hermanas, solteraspis Jehová Diosmanta willaspa kusisqa kanku. Paykunaqa Diospa munaynintapuni ruwayta munanku. Wakin hermanastaqa Diosmanta willasqanku mana sinchʼita llakikunankupaj yanapan. Imaraykuchus chay willasqankoqa paykunapaj uj jampi jina kanman. Jehová Diosmanta willaspaqa, runasta munakusqanchejta rikuchinchej. Arí, hermanosninchejpa allinninkuta maskʼajtinchejqa, congregación ujchasqa kananpaj yanapanchej. Apóstol Pabloqa chayta ruwarqa. Payqa Tesalonicamanta hermanosta ‘uj mama jina munakuywan qhawarqa’, tata jinataj paykunata sonqocharqa (1 Tes. 2:7, 11, 12). Familiapi wawas Jehová Diosta munakojtinku, tatasninkuta respetajtinku, tukuy imaymanamantataj yanapajtinkoqa, familia Jehová Diospa qayllanpipuni kananpaj yanapakunku. w17.06 págs. 7, 8 párrs. 13, 14, 17

May chhika runas wajchaspuni kanku, wakin runastajrí may qhapaj kasqankurayku, allchhisninkojpa allchhisninkoj wawasninkuta uywanankupaj qolqenku alcanzanmanraj. Jesús yacharqa Jehová Diospa Gobiernollanpi ni pipis wajcha kananta. Diospa Palabranpi ‘ranqherosmanta’ parlaspa kay mundopi kaj negociosmanta parlashan (Apo. 18:3). Kay mundopi kaj jatuchaj negocios, políticos, llulla religionpis Kuraj Supaypa mundonmanta kanku. Diospa kamachisnenqa mana politicaman satʼikunkuchu, nitaj llulla religionmanpis satʼikunkuchu. Jinapis ashkhasqa jatuchaj negociosmanta mana tʼaqakuyta atillankuchu. Noqanchejqa qhawarikunanchej tiyan, ama negociosta ruwaspa musphaykachanapaj. Chayrayku allin kanman tapurikuna: “¿Imaynatá kapuyniyta apaykachayman Jehová Diosman astawan qayllaykunaypaj? ¿Imatataj ruwayman mana negocioswan musphaykachanaypaj? ¿Pikunamantá yachakuyman Jehová Diosllapipuni atienekunaypaj?”, nispa. w17.07 págs. 7, 8 párrs. 1-3

Jesusqa yacharqa runasqa imaymana llakiykunapi, chʼampaykunapi rikukusqanchejta. Jesusqa tarpoj runamanta parlashaspa, wakin runas “Diospa Gobiernonmanta willayta” tukuy sonqo japʼikunankuta nerqa. Chantá nillarqataj “kay tiempo kausaymanta llakiykuna, qhapajyayta munapayay ima”, chay runaspa sonqonkuman yaykuspa Diospa Palabranta pʼampaykunanta (Mat. 13:19-22; Mar. 4:19). Mana allinta qhawarikojtinchejqa, kay kausaypa llakiykunasnin Jehová Diosta sirvisqanchejta pantachiwasunman. Pisimanta pisitaj Jehová Diosta sirvisqanchejpi chiriyapusunman. Chayrayku predicacionta ñaupajman churaspaqa, Jesusta munakusqanchejta rikuchisunman. Ajinatachus manachus ruwashasqanchejta reparakunapaj tapurikuna: “¿Imatataj kausayniypi ñaupajman churani? ¿Imataj astawan kusichiwan? ¿Jehová Diosta sirviychu chayri waj imasta ruwaychu?”, nispa. w17.05 pág. 23 párrs. 3, 4 

Forastero tatasqa parlayniykichejpi kaj congregación karupi kajtenqa, chaynejllapi kaj congregacionman riwajchej, waj parlaypi kajtinpis (Sal. 146:9). Jinapis parlayniykichejpi kaj congregación chaynejllapi kajtenqa, tata sumajta qhawarinan tiyan, familian mayqen congregacionmanchus rinanta. Tataqa sumajta tʼukurispa, Jehová Diosmanta mañakuspa, wawasninta, warminta ima tapuriytawan sumajta ajllanan tiyan (1 Cor. 11:3). Tatasqa sumajta qhawarinanku tiyan imastachus wawasninku necesitasqankuta. Wawasqa Bibliaj yachachiykunasninta sumajta entiendenankupaj mana tantakuykunallamanchu rinanku tiyan. Astawanqa tantakuypi yachachikusqanta entiendenanku tiyan. Chayrayku ima parlaytachus astawan entiendenku chay parlaypi kaj congregacionman rejtinku aswan sumajta yachakonqanku. Wawasqa tantakuykunapi imatachus nikusqanta mana entiendejtinkoqa, mana yachakonqankuchu (1 Cor. 14:11). w17.05 pág. 10 párrs. 10, 11

Tukuyninchej allin kanman tapurikunanchej: “¿Jehovaj nisqanta juntʼanaypaj, creeyniyojchu kani, mana manchachikojchu kani? ¿Waj suyuman chayri waj llajtaman qolqeta gananaypaj ripuypichu yuyashani? Jina kajtin, ¿Jehovamanta yanapata mañakunichu imaynatachus chayta familiay, hermanos ima qhawanankupi tʼukurinaypaj?”, nispa. Jehovaqa Gobiernon ñaupajman rinanpaj yanapakunanchejta saqewanchej. Satanasqa Adanpa, Evaj tiempomantapacha Jehovaj contranpi kananchejta munan. Diospa Gobiernon ñaupajman rinanpaj yanapakuspaqa, Satanasman sutʼita rikuchinchej Jehovawan kashasqanchejta. Cheqa sonqo kayninchej, creeyninchej ima Jehovapaj llankʼayta munanapaj yanapawanchej, chaytaj Jehovata mayta kusichin (Pro. 23:15, 16). Jehovaqa kasukojtinchej, yanapakojtinchej ima Satanasta llulla kasqanta rikuchin (Pro. 27:11). Kasukuyta atisqanchejqa, Jehovapaj may valorniyoj, kusichintaj. w17.04 pág. 32 párrs. 15, 16

Moisesman qosqa Ley nerqa: “Sichus mayqempis imatapis qonanta [Jehovaman] nin, chayri juraspa nin imatapis qonanta chayqa, ruwanampuni tiyan imatachus ruwasaj nisqanta”, nispa (Núm. 30:1, 2). Aswan qhepamantaj rey Salomón nerqa imatachus kunan diapaj texto nisqanta. Jesustaj yachacherqa imatachus Diosman nisqanchejqa, mana pujllakuy jinallachu kasqanta. Pay nerqa: “Ama qhasitaqa juranaykichu tiyan, astawanqa Jehová Diospa ñaupaqenpi imatachus nisqaykita juntʼanayki tiyan”, nispa (Mat. 5:33). Sutʼita rikunchej imatachus Jehovaman nisqanchejqa mana uj pujllakuy jinallachu kasqanta. Chayrayku nisqanchejta juntʼaspaqa Jehovaman qayllaykusunman. Mana juntʼaspaqa Paymanta karunchakusunman. Chay cheqapuni kasqanta rey David sutʼita rikucherqa. Pay nerqa: “Pitaj Tata Diospa orqonman wichariyta atinmanri? Pitaj Tata Diospa Templompi kayta atinmanri? Kay jina runalla Tata Diospa Templompi kayta atin: Llimphu kawsayniyoj kaj, llimphu sonqoyoj kaj, [...] nitaj llullakuspa, juraj, chay”, nispa (Sal. 24:3, 4). w17.04 pág. 4 párrs. 3, 4

Congregacionpi pillapis sonqonchejta nanachiwasqanchejta yuyanchej chayqa, sumajta qhawarikunanchej tiyan mana cuento qʼepis kanapaj. Jinapis uj hermano jatun juchapi urman chayqa, allin kanman ancianoswan parlarinanchej, yanapayninkuta mañakunanchej ima (Lev. 5:1). Mana jatun jucha kajtenqa, chay hermanowan allinyakusunman, chʼampayninchejmanta niraj ni piman willashaspa, ni ancianosmanpis (Mat. 5:23, 24; 18:15). Ajinapi rikukuspa, Jehovaman cheqa sonqollapuni kana, Bibliaj yuyaychaykunasninman jinataj allinchana. Ichapis reparasunchej mana yuyasqanchejman jinachu kasqanta. Kusikusuntaj chay hermanoj contranpi mana ima sajratapis parlasqanchejmanta. Yuyarikunataj cheqanta parlajtinchej chayri manapis uj hermanoj sonqonta nanachinapaj jina parlajtinchejqa, chay hermanowan chʼampayninchej mana allinchakonqachu. Jehovaman, hermanosman ima cheqa sonqo kasun chayqa, mana chay jina chʼampaykunapi urmasunchu. w17.04 págs. 21, 22 párr. 14