Octubre

Jehová Diosqa may yachayniyoj. Tukuymantaj mana michʼakuspa yachayta qon. Yachayniyoj runasman tukunapajqa, Jehová Diosta kasukunanchej tiyan. Payta kasukuspaqa, astawan payman qayllaykusunchej, sajra ñanmantataj karunchakusunchej (Pro. 2:10-12). Ajinamanta Diospa munakuyninpi kallasunpuni, wiñay kausaytataj japʼisunchej (Jud. 21). Juchasapa runas kasqanchejrayku chayri imayna familiapichus uywasqa kasqanchejrayku, wakin kutisqa pillapis kʼamiwajtinchej mana kusikunchejchu. Jehová Diostaj munakuwasqanchejrayku, allinninchejta munasqanraykutaj jasutʼiwanchej, yachachiwanchejtaj. Chaytaqa payta kasukuspa reparasunman. Chayrayku Biblia niwanchej: ‘Jehová Diospa wanachisunanpaj castigasusqantaqa amapuni pisipaj qhawaychu, wawáy. Imaraykuchus Jehová Diosqa, pitachus munakun, chayta castigan’, nispa (Pro. 3:11, 12; Heb. 12:5-11). Jehová Diosqa sumajta rejsiwasqanchejrayku, pantajtinchej cheqan ñanman kutirichinawanchejpaj kʼamiwanchej. w18.03 págs. 28, 29 párrs. 1, 2

Apóstol Pedroqa qhelqarqa kunan diapaj texto nisqanta Asiapi kaj hermanospaj. Paykunaqa kallpacharinata, yuyaycharinatataj necesitarqanku (1 Ped. 1:1; 4:4, 7, 12). Chayraykuchá Pedroqa tiemponmanta hermanosta, kay jinata yuyaycharqa: “Qankunapura wasiykichejman wajyarinakuychej”, nispa. Arí, Pedroqa hermanosta kallpachasharqa, rejsinakojtinkuñapis paykunapura wasinkuman wajyarinakunankupaj. Chaytaj allinninkupaj karqa imajtinchus wasinkuman wajyarinakuspaqa, aswan ujchasqas kankuman karqa. Ajinamantataj ima llakiytapis atipayta atillankuman karqa. Kay tiempopipis ‘qhepa pʼunchaykunapi’ tiyakusqanchejrayku, aswan ujchasqa kananchej tiyan (2 Tim. 3:1). Chaypajqa, hermanosninchejta wasinchejman wajyarikunanchejpuni tiyan. Ajinallamanta astawan rejsinakusun. Ichá yuyarikunchej, uj hermanota astawan rejsisqanchejta, wasinman wajyarikuwasqanchejrayku chayri wasinchejman wajyarikusqanchejrayku. w18.03 págs. 14, 15 párrs. 1-3

Bibliaqa Dios jina yuyajkunamanta allinta parlan. Romanos 8:6 nin: “Aychaj munayninpi yuyayqa wañuyman pusan. Diospa atiyninpi yuyaytajrí kausayman pusan, sonqo tiyaykuymantaj”, nispa. Arí, Dios jina yuyasun chayqa, Dioswan allinpi kasun, sonqo tiyasqa kasun, aswan qhepamantaj wiñaypaj kausakusunchej. Sajra runaspa chaupinpi tiyakusqanchejrayku, runasqa sajra yuyayninkuta chimpachiwasunman. Chayrayku Dios jina yuyanapajqa, kallpachakunallapuni tiyan. Diospa nisqasninta sonqonchejman mana churaspaqa, sajra runas jina yuyayta qallarisunman. Judasqa, chay jina runasmanta jinata nerqa: “Paykunapeqa Diospa atiynin mana kanchu”, nispa (Jud. 18, 19). w18.02 págs. 19, 20 párrs. 5, 7, 8

May chhika doctoresqa, ashkha onqosqasta jampinku. Runaspa onqoykunasninkuwan mana chimpaykuchikunankupajtaj, tukuy imata ruwanku jarkʼakunankupaj. Noqanchejpis sajra runaspa chaupinpi tiyakunchej, paykunawan trabajanchej ima. Diostaj sajra runaspa ruwasqasninkuta chejnikun. Chayrayku sajra runaspa ruwaykunasninkuwan mana chimpaykuchikunapaj, allinta qhawarikunanchej tiyan. Kay qhepa pʼunchaykunapi mundomanta runasqa, mana Diospa kamachiykunasninman jinachu kausakunku. Pabloqa, Timoteoman iskay kaj cartata qhelqashajtin nerqa, kay qhepa pʼunchaykunapi runasqa, sajra imasllata ruwanankuta (2 Tim. 3:1-5). Mana sajra runas jina kayta munajtinchejpis, paykunaj chaupinpi tiyakusqanchejrayku, ichá paykuna jina yuyayta, parlayta, ruwayta ima qallarisunman (Pro. 13:20). Chayrayku allinta qhawarikunanchej tiyan mana paykuna jina ruwanapaj. w18.01 pág. 27 párrs. 1, 2

Jesusqa 33 watapi wañuymanta kausarimuytawan, 500 kuraj tantasqa runasman rikhurerqa. Paykunamanta wakenqa qharis, warmis, ichá wawitas ima karqanku. Ichá chay kutipi, Jesús paykunata bautizakunankuta nerqa (1 Cor. 15:6). Arí, Jesusqa yachachisqasninman tukuchimunankuta kamacherqa. Chantapis nillarqataj, ‘yugonman churakojkuna’, nisunman paypa qhepanta riyta munajkunaqa, bautizakunanku kasqanta (Mat. 11:29, 30). Bautizakuyta munajtaj, Jesusta kasukunanpuni tiyan. Jehová Diosqa, Jesusta kasukuspa bautizakoj runasllata allinpaj qhawan. Imajtinchus payqa, Jesusnejta munayninta juntʼanqa. Chantapis Biblia nisqanman jina, apostolespa tiemponmanta wakin runasqa, yacharqanku Jesuspa yachachisqanman tukunankupaj bautizakunankupuni kasqanta. Chayrayku paykunaqa bautizakunapaj wakichisqaña kaspa bautizakojpacha kanku (Hech. 2:41; 9:18; 16:14, 15, 32, 33). w18.03 pág. 5 párr. 8

Kay tiempopi runasqa millay imasta ruwanku, llulla diosestataj yupaychanku, llulla religiones engañasqankurayku. Bibliaqa chay llulla religionesta Jatun Babilonia nispa sutichan. Nillantaj chaypi “tukuy supaykuna” pakakusqankuta (Apo. 18:2). Jinapis noqanchejqa mana kay sajra mundomanta runas jinachu kanchej. Chayrayku paykunaqa chejnikuwanchej, asikuwanchejtaj (Mar. 13:13). Chaywanpis Daniel jina astawan Jehová Diosman qayllaykuna. Jehová Diostaj llampʼu sonqos kajtinchej, paypi atienekojtinchej, kasukojtinchej ima, munasqa kamachinta jina qhawawasunchej (Hag. 2:7, Traducción del Nuevo Mundo de las Santas Escrituras). Tataspis Danielpa tatasninmanta, mayta yachakunkuman. Daniel juchʼuysitullaraj kashajtin, casi tukuy judiosqa Diosmanta karunchasqa kasharqanku. Jinapis Danielqa Jehová Diosman qayllaykorqa, tatasnin yanapasqankurayku (Pro. 22:6). Chantapis Danielpa tatasnin Jehová Diosta munakusqankoqa, sutʼi rikukun Danielpa sutinpi. Imaraykuchus Daniel suteqa “Diosqa juezniy” niyta munan. Chayrayku tatas, wawasniykichejman Jehová Diosmanta yachachillaychejpuni, amataj saykʼupuychejchu (Efe. 6:4). Wawasniykichejpaj Diosmanta mañapuychejpuni. Kallpachakuychejtaj Jehová Diospa kamachiykunasninta wawasniykichejman yachachinaykichejpaj. Ajinata ruwajtiykichejqa Jehová Dios bendecisonqachej (Sal. 37:5). w18.02 págs. 5, 6 párrs. 12, 14, 15

Diospa llajtanta kapuyninchejwan yanapakuspaqa, Jehová Diosta yupaychanchej. Uj kuti apóstol Juanqa, mosqoypi jina Diospa kamachisninta rikusqa. Paykunataj jinata nishasqanku: “Atiyniyoj Jehová Diosniyku, qanllamin jatunchanapaj jina, yupaychanapaj jinataj kanki, imaraykuchus qanmin tukuy imata ruwarqanki, munayniykiraykutaj tukuy imapis rikhurerqa, ruwasqataj karqa”, nispa (Apo. 4:11). Reparanchej jina, Jehová Dioslla jatunchanapaj jina, yupaychanapaj jinataj. Chayrayku tukuy kapuwasqanchejwan, payta jatunchana. Unay tiempopi Jehová Diosqa, Moisesnejta israelitasman nerqa, watapi kinsa fiestasta ruwanankuta. Chantá Moisespa Leyninpi ajinata nerqa: “Mana mayqellampis chʼusaj makeqa mana imayojqa Tata Diosman qayllaykonqachu”, nispa (Deu. 16:16). Kay tiempopipis Diosta yupaychallanchejtaj, tukuy sonqo kapuyninchejwan llajtanta yanapakuspa. Kapuyninchejwan yanapakuspaqa, predicacionta jatunpaj qhawasqanchejta rikuchinchej. w18.01 pág. 18 párrs. 4, 5

Jesús nerqa: ‘Yugoyman churakuychej, kausayniykichejpajtaj samarikuyta tarinkichej, imaraykuchus yugoyqa llampʼulla, qʼepiypis chhallalla’, nispa (Mat. 11:29, 30). ¿Imaynatá Jesuspa yugonman churakunchej? Jesuspa yugonman churakunchej tantakuykunaman rispa, predicacionman rispa ima. Chaykunaman wakin kuti saykʼusqa rejtinchejpis, kusisqas, kallpachasqastaj wasinchejman kutipunchej. Jinamanta ima llakiyllatapis aguantanapaj kallpayoj kanchej. Uj hermanamanta parlarina. Payqa may onqosqa kasharqa. Imajtinchus tukuy cuerpon nanaj, maytataj phutikoj. Payqa tantakuykunaman mana riyta atillajchu. Chaywanpis uj kuti, mayta kallpachakuspa tantakuyman risqa. Chay tantakuypi imatachus yachakusqanmantataj, jinata nerqa: “Discursoqa mana anchata llakikunamanta parlarqa. Chay discursoqa noqapaj jinapuni karqa. Sonqoyman chayawasqanraykutaj waqarikorqani. Reparakorqanitaj tantakuykunamanta mana faltakunay kasqanta”, nispa. Chay hermananchejqa tantakuyman risqanmanta, may kusisqa kasharqa. w18.01 págs. 8, 9 párrs. 6, 7

Ichapis wawasninchejqa, bautizakusqankumanta tiemponman, mana tukuy sonqochu Bibliaj nisqasninpi creenkuman. Chayrayku ichapis kay mundoj imasninta munapayayta qallarinkuman. Chayri yuyankuman, Bibliaj nisqanman jina kausakuy qhasilla kasqanta (Sal. 73:1, 3, 12, 13). Ajinata wawanchej yuyayta qallarejtinkoqa, ama kʼamispa sienterpachinachu, wawallaraj chayri jovenesña kajtinkupis. Astawanqa reparachunku munakusqanchejta, yanapayta munasqanchejtapis. Imajtinchus phiñakojtinchejqa Jehová Diosmanta karunchakunkuman. Kʼachamanta parlapayajtinchejtajrí, Jehová Diosta sirvillaytapuni munanqanku. Cristiano jovenesqa niraj bautizakushajtinku, uj mañakuypi Jehová Diosman nerqanku, payta munakunankuta, payllatataj sirvinankuta (Mar. 12:30). Jehová Diostaj munan tukuy nisqanchejta juntʼananchejtapuni (Ecl. 5:4, 5). w17.12 pág. 22 párrs. 16, 17 

Marta nisqanman jina yachanchej aswan qhepaman Jehovaj kamachisnenqa kausarichisqa kanankuta. Abrahanqa unayta suyakorqa wawayoj kayta. Jinapi wawan Isaac nacekorqa. Uj kutipitaj Diosqa Abrahanman nerqa: “Munasqa kʼata churiyki Isaacta pusarikuspa, riy Moríah sutiyoj jallpʼaman. Chayman chayaspataj, payta qʼolachipuwanki”, nispa (Gén. 22:2). Abrahanqa, chayta uyarispa maytachá llakikorqa. Imaraykuchus Diosqa Abrahanman nerqa, mirayninnejta tukuy naciones bendecisqa kananta (Gén. 13:14-16; 18:17, 18; Rom. 4:17, 18). Diosqa Abrahanman nillarqataj: “Qampa mirayniykeqa jatunyanqa Isaac wawaykinejta”, nispa (Gén. 21:12). Jinapis Isaac qʼolachisqa kanman karqa chayqa, Abrahanpa miraynin mana kanmanchu karqa. Chaymanta parlaspa Pablo nerqa: “Abrahanqa creerqa wawanta Dios kausarichiyta atisqanta”, nispa (Heb. 11:17-19). Abrahanqa mana yacharqachu maykʼajchus wawan kausarimunanta. Jinapis creerqapuni Jehová Dios wawan Isaacta kausarichimunanta. w17.12 pág. 6 párrs. 12-14

Pabloqa runas salvakunankuta munarqa. Noqanchejpis Jehová Dios jinallataj tukuy runas salvakunankuta munanchej. Diosqa “munan tukuy pesachikunankuta”, ni pi chinkachisqa kananpaj (2 Ped. 3:9). Jehová Dios jina kanapajqa, runasta munakunanchej tiyan. Runasta khuyakusun, munakusuntaj chayqa, tukuy sonqo Diosmanta willamusunchej. Chaytaj sonqonchejta qhallallarichenqa. Jehová Diosqa mana munanchu kausayninchejta wañuy pataman churananchejta. Chayrayku autota ama loco jina manejanachu, autoj tukuy imasnintapis sumaj arreglasqata japʼina. Jinallataj wasita ruwashaspa chayri allinchashaspa andamiosta, escalerastapis sumajta sayachina. Imata ruwashaspapis, amapuni kausayninchejta wañuy pataman churanachu, nitaj wajkunajtapis. Jinamanta pillapis wañupojtin “mana juchachasqachu” kasunchej. Chantapis aswan allin sanito kananchej, astawan ganakunapaj kausayninchejta wañuy pataman churananchejmantaqa. Jehová Diosninchejqa, maychus kajtapuni ruwan. Chayrayku pay jina ruwanapaj kallpachakuna. Ancianosqa sumajta qhawarikunanku tiyan, kausayninkuta mana wañuy pataman churanankupaj. Jinallataj hermanostapis yuyaycharinanku tiyan, kausayninkuta ama wañuy pataman churanankupaj (Pro. 22:3). Uj anciano kausayninchejta wañuy pataman churashasqanchejta niwajtinchejqa, kasukunapacha (Gál. 6:1; Deu. 19:10). w17.11 pág. 16 párrs. 11, 12

Uj kuti apóstol Pablo jinata nerqa: ‘Mayta kallpachakushani tʼinkata japʼinaypaj. Chay tʼinkataj cielopi kausay’, nispa. Kay tiempopipis ajllasqa cristianosqa, Pablo jinallataj cielopi kausakuyta suyakushanku (Fili. 3:14). Ajllasqa cristianosqa, mayta suyashanku Cristowan kamachimuyta. Runastataj yanapayta cheqan runasman tukunankupaj (Apo. 20:6). Waj ovejasmanta kajkunatajrí, mosoj jallpʼata suyakushanku. Chaypi wiñaypaj kausakunankupaj (2 Ped. 3:13). Chantapis apóstol Pabloqa, ajllasqa cristianosman jinata yuyaycharerqa: “Yuyayniykichejqa cielopi kaj imasllapipuni kachun”, nispa. Chayta yuyaycharqa, premionkuta japʼinankupaj, Diosta sirvinallankupajpunitaj (Col. 3:2). Chayrayku ajllasqa cristianosqa, mana waj imaspi musphashanankuchu karqa (Col. 1:4, 5). Arí, ama waj imaspi musphaykachanachu. Astawanqa ima tʼinkatachus Jehová Dios qonawanchejpi tʼukurina (1 Cor. 9:24). w17.11 págs. 25, 26 párrs. 1, 2

Jehová Diosman tukuy sonqo takinachej libromanta wakin takiykunaqa, Dioswan sonqomantapacha parlarikunapaj yanapawanchej. Wakin takiykunatajrí, yanapawanchej hermanospura ‘astawan munanakunapaj, allin ruwaykunatataj ruwananchejpaj’ (Heb. 10:24). Chayrayku kay mosoj takiykunaj musicanta sumajta umanchejpi japʼina, letrasnintapis yachakuna. Chaypajqa grabasqa takiykunata uyarisunman. Chay grabacionestaqa Internetpi jw.org nisqapi tarisunman. Takiykunata wasinchejpi sumajta amañasunchej chayqa, tantakuykunapi tukuy sonqo, mana manchikuspataj takirisunchej. Jehová Diosta jatunchanapajqa tukuy sonqo takina. Jehová Diosta munakusqanchejqa, payman tukuy sonqo takisqanchejpi yachakun (Isa. 12:5). Tukuy sonqo, kallpawantaj takirejtinchejqa, hermanospis tukuy sonqollataj takiriyta munanqanku. Arí, tukuyninchej Jehová Diosta jatunchayta atinchej takispa. Chayrayku amapuni manchachikunachu, Jehová Diosman tukuy sonqo takiyta. w17.11 pág. 7 párrs. 18, 19

Ashkha ayqekamojkunaqa maypichus predicajta mana saqewanchejchu chay suyusmanta jamunku. Sonqo kʼajaywan hermanos predicasqankurayku, ashkha ayqekamojkuna ñaupaj kutirayku “Diospa Gobiernonmanta” uyarinku (Mat. 13:19, 23). Ashkha ayqekamojkuna llasa qʼepiyoj jina kashanku, tantakuykunapitaj samarikuyta tarinku. Chay ratotaj reparanku ‘Dios noqanchejwan kashasqanta’ (Mat. 11:28-30; 1 Cor. 14:25). Ayqekamojkunaman predicaspaqa “sumaj yuyayniyoj” kananchej tiyan (Pro. 22:3). Paykunawan parlashaspaqa pacienciawan uyarina. Jinapis mana politicamanta parlanachu. Imatachus sucursal, autoridadespis kamachisqankuta kasukuna. Ajinamanta kausayninchejta mana wañuy pataman churasunchu, nitaj wajkunaj kausayninkutapis. Ayqekamojkuna waj religionniyoj kasqankurayku, waj costumbresniyoj kasqankurayku ima, imatachus yuyasqankuta, imatachus munasqankuta ima yachananchej tiyan respetanataj. Sutʼincharinapaj, wakin suyuspeqa mana kikintachu yuyanku imaynatachus warmis pʼachallikunankumanta. Chayrayku chay runasman predicashaspa, maychus kajta pʼachallikuna. w17.05 pág. 7 párrs. 17, 18

Jehová Diospa yanapayninta mañakusunman Diospi mana creej familiaresninchejwan kʼachamanta, allillanwantaj parlarinapaj. Chantapis familiaresninchejwan ama discutinachu, tukuy imapi creesqan llulla kasqanta nispa. Familiaresninchej ichá imata nispapis sonqonchejta nanachiwasunman chayri contranchejpi imatapis ruwanman. Ajinapi rikukuspaqa apóstoles jina ruwasunman. Apostolesmanta parlaspa, Pablo nerqa: “Runas noqaykupaj sajrata parlajtinkupis, kʼachamanta kutichiyku. Qhatiykachawajtiykutaj pacienciawan aguantakuyku. Runas qhasimanta tumpawajtiyku, allillanwan kutichiyku”, nispa (1 Cor. 4:12, 13). Kʼachamanta familiaresninchejwan parlarispaqa, familia ukhupi mana chʼajwas kanqachu. Jinapis Bibliaj nisqanman jina kausakusun chayqa, familiaresninchejta yanapasunman Jehovaj testigosninman tukunankupaj (1 Ped. 3:1, 2, 16). Bibliaj nisqanman jina kausakojtinchejqa, familiaresninchej reparanqanku matrimonio ukhupi allinta kausakusqanchejta, wawastapis sumajta uywasqanchejta. Familiaresninchej mana Jehovaj testigosninman tukojtinkupis, Jehová Diosta kusichisunchej. w17.10 pág. 15 párrs. 13, 14

Diospa Palabranqa unaymantapachaña ashkha runasta yanaparqa. Ajllasqa cristianostapis, kausayninkuta cambianankupaj yanaparqa (1 Cor. 6:9-11). Apóstol Pablo imayna runaschus Diospa Gobiernonta herenciata jina mana japʼinankumanta parlaytawan, jinata nerqa: “Qankunamanta wakenqa ajina karqankichej”, nispa. Chay cristianostaqa Diospa Palabran, Diospa atiynin ima kausayninkuta cambianankupaj yanaparqa. Jinapis wakin cristianosqa juchapi urmarqanku, chaytaj Jehová Diosmanta karuncharqa. Bibliaqa nin, uj ajllasqa cristiano, juchallikusqanrayku congregacionmanta qharqosqa kasqanta. Jinapis tiemponman payqa kausayninta cambiarqa, congregacionmantaj kutinporqa (1 Cor. 5:1-5; 2 Cor. 2:5-8). Arí, ashkha cristianosqa kausayninkuta cambiarqanku Diospa Palabranpa yanapayninwan. Chaytaqa Jehová Dios qowanchej, chaywantaj sumajta yanapachikuna. w17.09 págs. 23, 24 párrs. 2, 3

Bibliaqa nin: “Munakoyqa Diosmantamin”, nispa (1 Juan 4:7). Jehová Dios jina runasta munakunapajtaj, mana simillamantachu munakunanchej tiyan, manaqa ruwasqanchejpi yachakunan tiyan. Ajinata ruwaspaqa Jehová Diospa yuyaychasqanman jina ruwasunchej. Chay jina munakuymanta parlaspataj, griego parlaypi Bibliaqa, agápe palabrata oqharin. Chantapis runasta munakuspaqa allinninkuta maskʼanchej. Wajkunaj allinninkuta maskʼaspataj, may kusisqas kanchej. Jehová Diosqa munakuwasqanchejrayku, kay jallpʼata ruwarqa. Kay jallpʼapitaj tukuy ima necesitasqanchejta churarqa, kusisqa kausakunanchejpaj. Chantá Jehová Diosqa Adanta Evatawan ruwarqa, kay jallpʼapi wiñaypaj tiyakunankupaj. w17.10 pág. 7 párrs. 1, 2

Santiago nerqa: “Sichus wakillantapuni allinpaj qhawankichej chayqa, juchallikushankichej”, nispa (Sant. 2:9). Runa masinchejta munakusun chayqa, tukuyta allinpaj qhawasunchej mana leeyta yachajtinkupis, wajcha kajtinkupis chayri waj laya runas kajtinkupis. Arí, sonqomantapacha tukuyta uj rejllata qhawananchej tiyan, nitaj simillamantachu. “Munakuyniyoj runaqa pacienciayoj, kʼachataj”, “nillataj jatunchakunchu” (1 Cor. 13:4). Pacienciayoj, kʼacha, llampʼu sonqotaj kasunchej chayqa, Diospa Gobiernonmanta tukuy runasman willamullasunpuni (Mat. 28:19). Chantapis congregación ukhupi tukuy hermanosninchejwan allinta apanakusunchej. Tukuyninchej munanakusunchej chayqa, congregacionpi ujchasqallapuni kasunchej, Jehová Diostataj jatunchasunchej. Runas chayta reparajtinkutaj, Jehová Diospa llajtanman yaykunpuyta munanqanku. Bibliapeqa apóstol Pablo mosoj kausaywan pʼachallikunamanta parlashajtin, kaytapis nillarqataj: “Munakuywan pʼachawan jina pʼachallikuychej. Imaraykuchus munakoyqa, runasta sumajta ujchan”, nispa (Col. 3:14). w17.08 pág. 26 párrs. 18, 19

Israelitasqa Jehovaj contranta oqharikorqanku. Jinapis Jehovaqa paykunamanta khuyakullarqapuni. Ajinallatataj noqanchejpis, Jehovata manaraj rejsejkunamanta khuyakunanchej tiyan. Imaraykuchus paykunaqa atinkumanraj pesachikuyta, Jehovamanpis qayllaykuyta. Jehovaqa mana munanchu ni pi chinkachisqa kananta (2 Ped. 3:9). Chayrayku tiempo kashajtillanraj tukuyman willarina, Jehová sajra runasta chinkachinanta. Yanaparinataj Diospa khuyakuyninta tarinankupaj. Jesuspis Tatan jina runasmanta khuyakullarqataj. Jesusqa rikorqa, runas mana michejniyoj ovejas jina mitharasqas, tʼaqa tʼaqallataj kashasqankuta. Chayta rikuspataj, “paykunaman tukuy imata yachacherqa” (Mat. 9:36; Mar. 6:34). Fariseostajrí mana Jesús jinachu runasmanta khuyakoj kanku, nitaj yanapaytapis munajchu kanku (Mat. 12:9-14; 23:4; Juan 7:49). Noqanchejqa Jesús jina runasmanta khuyakuspa, Jehovamanta yachachina. w17.09 págs. 9, 10 párrs. 6, 9

Joseqa jovenllaraj kashajtin Egiptopi presochasqa kasharqa. Payqa nichá yuyallarqapischu Egiptopi may atiyniyoj kananta. Chantá, nichá yuyallanmantajchu karqa, Jehová Dios paynejta familianta yanapananta, yarqhaymanta mana wañunankupaj (Gén. 40:15; 41:39-43; 50:20). Jehová Diosqa, Joseta yanapananpaj tʼukuna imasta ruwarqa. Sara abuelitaña kashaspa, nichá yuyallarqapischu Jehová uj wawata qonanta. Chay wawataj Isaac karqa (Gén. 21:1-3, 6, 7). Kay tiempopi mana suyasunmanchu Jehová Dios uj milagrota ruwaspa tukuy problemasninchejta chinkachinanta. Imaraykuchus chayqa paraisollapi kanqa. Chantapis Diosmantaqa mana mañakusunmanchu kausayninchejpi tʼukuna imasta ruwananta. Jinapis unay tiempopi Jehovaqa kamachisninta tʼukunapaj jina yanaparqa. Jehová Diostaj kasqan jinallapuni (Isa. 43:10-12). Chaykunata yachayqa, Paypi atienekunallapajpuni yanapawanchej. Jehová Diosqa munayninta ruwananchejpaj tukuy imaymanamanta yanapawasunman (2 Cor. 4:7-9). Jehovata kasukullasunpuni chayqa, noqanchejta yanapawasunchej ima llakiypi tarikojtinchejpis. w17.08 págs. 11, 12 párrs. 13, 14

Precursor regular kaspaqa, waj precursoreswan astawan predicanki. Chaytaj creeypi sinchʼita sayanaykipaj yanapasonqa. Ashkha hermanos ninku, jovenmantapacha precursores regulares kasqankoqa, qhariwarmi kausayninkupi yanapasqanta. Wakin hermanosqa niraj casarakushaspa precursores regulares karqanku, casarakuspataj precursores regularesllapuni kanku (Rom. 16:3, 4). Kausayniykipi Jehovapaj astawan llankʼayta munasqaykeqa sonqomantapacha kanan tiyan. Salmo 20:4 versiculopi nin: “[Jehová Dios] sonqoykej tukuy munasqanta juntʼachun, tukuy yuyasqasniykitapis ruwachun”, nispa. Chayrayku allinta piensariy imatachus kausayniykiwan ruwanaykipi. Piensarillaytaj imastachus Jehová kay tiempopi ruwashasqanpi, imaynatachus chaypi yanapakuyta atisqaykipipis. Chantá Jehová Diosta kusichinaykipaj jina imatachus kausayniykiwan ruwanaykita ajllay. Jehová Diosta astawan sirvispaqa, may kusisqapuni kanki. Imaraykuchus kausayniykiwan Payta jatunchanki. Arí, Jehová Diosta “munakuspa mayta kusikuy, paytaj sonqoykej munasqanta qosonqa” (Sal. 37:4). w17.07 pág. 26 párrs. 15-18

Casi tukuyninchej kʼacha runastaqa, may sumajpaj qhawanchej. Jinapis Jehová Dioslla jatunchanapaj jina, may atiyniyoj kasqanrayku, mayta munakuwasqanchejraykutaj. Jehová Diospa atiynenqa tukuy ima ruwasqanpi sutʼi rikukun. Chantapis munakuwasqanchejrayku, munasqa Wawanta kachamorqa noqanchejrayku wañunanpaj. Kay 147 Salmota qhelqajqa, tukuy sonqowan Jehová Diosta jatunchayta munarqa. Chantá wajkunamanpis kallpacharqa paywan khuska Diosta jatunchanankuta (Sal. 147:7, 12, 13). Bibliaqa mana ninchu 147 Salmota pichus qhelqasqanta. Chaywanpis ichá chay salmota qhelqajqa, israelitas Babiloniamanta Jerusalenman kutipushajtinku kausarqa (Sal. 147:2). Chay salmota qhelqajqa Jehová Diosta jatuncharqa llajtanta kacharichisqanmanta, watejmanta Jerusalenpi payta yupaychanankupaj. Noqanchejpis Jehová Diosta jatunchanallanchejtaj tiyan (Sal. 147:1). w17.07 pág. 17 párrs. 1-3

Jesusqa yacharqa paypa yachachisqasnin llakiypi rikukunankuta, kay mundopi mana qolqeta ganakuyta atikusqanrayku. Biblia sutʼinchasqanman jina, runas astawan ganayta munaspalla negociosta ruwanankoqa, mana Diospa munayninman jinachu. Chayrayku Jehová Diosqa Edén huertapi Adanman Evamanwan mana michʼakuspa tukuy imata necesitasqankuta qorqa kausakunankupaj (Gén. 2:15, 16). Chantapis Jehová Dios ñaupa cristianosman atiyninta qoshajtin, mana “mayqenninkupis nejchu kapuynenqa paypallata kasqanta, mana chayqa tukuy imasninku tukuyninkupaj karqa” (Hech. 4:32). Chantapis profeta Isaías nerqa, aswan qhepaman tukuypis jallpʼaj poqoyninta mikhunanchejta (Isa. 25:6-9; 65:21, 22). Chay tiempo chayamunankamaqa, Jesuspa yachachisqasnenqa Jehová Diosta kusichinanpaj jina, “sumaj yuyaywan” kay mundopi ima trabajotapis maskʼakunanku kanqa (Luc. 16:8). w17.07 pág. 8 párrs. 4-6

Job libroqa may unayña qhelqakorqa. Chay librotaj yanapawanchej runa ñakʼarisqanmanta maychus kajllata yuyanapaj. Job libropi nin jina, Satanasqa nerqa Job mayta ñakʼarejtin Jehovata qhesachananta. Chayrayku Jehovata nerqa Jobta ñakʼarichinanta. Jehovataj mana munarqachu. Chaywanpis saqerqa Satanás Jobta ñakʼarichinanta. Pisi tiemponmanqa Jobpa kamachisnin wañurachisqa karqanku, wawasninpis sinchʼi muyoj wayrapi wañuporqanku. Chantá sajra runas tukuy kapuyninta apakaporqanku. Satanasqa Jobta yuyacherqa Jehová ñakʼarichishasqanta (Job 1:13-19). Chantapis Jobtañataj millay sarna onqoywan onqoykucherqa (Job 2:7). Astawanpis warmin, kinsa llulla amigosninpis Jobpa sonqonta nanacherqanku (Job 2:9; 3:11; 16:2). Satanasqa mana cheqantachu parlasharqa. Jobqa Jehová Diosta mana wasancharqachu (Job 27:5). w17.06 pág. 24 párrs. 9, 10

Kay tiempopi Diosqa tatasta kamachin familiankuman imatachus necesitasqankuta qonankuta. Chaypajtaj tatasqa trabajananku tiyan. Jinapis kay qhepa pʼunchaykunapi trabajorayku may llakisqa kasunman. Kay tiempopi trabajota mana tariyta atikusqanrayku, ashkhas mana trabajoyoj kashanku. Chayrayku trabajota tarinankupaj tukuy imata ruwanku. Ashkhasqa astawan trabajanku pisillata pagajtinkupis. Empresariostaj pisi trabajadoresllawan ashkha imasta ruwayta munanku. Chayrayku ashkha trabajadores onqosqas, saykʼusqas, llakisqastaj kashanku. Wakintaj manchachikunku trabajonkumanta wijchʼuchikuyta, patronninku astawan ruwanankuta kamachisqanta mana kasukojtinku. Cristianosqa Jehovata astawan kasukunchej, patronninchejta chayri waj runata kasunamantaqa (Luc. 10:27). Noqanchejqa, Jehovata sirvinapaj, kausakunanchejpaj imalla trabajanchej. Jinapis mana allinta qhawarikojtinchej trabajonchejrayku Diosta niña allintachu sirvisunman. w17.05 págs. 23, 24 párrs. 5-7

Wakin hermanosqa Diospa llajtanpi niraj unaychu kashanku. Chayrayku wakin kuti Diospa llajtanpi unayña kaj hermanospa yanapayninkuta mañakunku, wawasninkuman Bibliamanta yachachinankupaj. Uj tata wawanta yachachinanchejta niwajtinchejqa, yuyarikunanchej tiyan mana tataj cuentanmantachu kashasqanchejta (Efe. 6:1-4). Wakin kuteqa uj wawitaman Bibliamanta yachachisunman, tatasnin mana Jehovaj testigosnin kajtinkupis. Jina kajtin yuyarikunanchej tiyan, mana tatanpunichu chayri mamanpunichu kasqanchejta. Chantapis may allinpuni Bibliamanta yachachishaspa tatasnin wasipi kashajtinku yachachinanchej, chayri iskay ukhu rinanchej. Manachayri ashkha runas purinku chaypi yachachinanchej. Ajinamanta runas mana ima sajratapis parlanankupaj. Ichapis tiemponman tatasninpuni Bibliamanta yachachiyta qallarenqanku, Jehová kamachisqanman jina. w17.06 pág. 8 párrs. 15, 16

Uj wawa tatasninpa costumbresninkuta mana allinpajchu qhawan chayqa, nillataj tataspa parlayninkuta, religionninkutapis, yachayta munanqachu. Cristiano tatasqa allinnillankuta maskʼanankumantaqa wawasninkoj allinninkuta maskʼananku tiyan (1 Cor. 10:24). Samuel sutiyoj hermano nin: “Warmiywanqa sumajta qhawarerqayku, ima parlaypichus cheqa kaj astawan wawasniykoj sonqonman chayasqanta. Jehovamantataj yachayta mañakorqayku. Wawasniykoj parlayniykupi kaj congregacionpi mana sumajta entiendesqankuta reparaytawan, waj congregacionman riporqayku. Paykunawan predicaj kayku, khuskataj tantakuykunaman rej kayku. Chantá hermanosta mikhurinapaj wajyarej kayku, pasearimunapajpis. Chay imasta ruwasqaykoqa wawasniykuta yanaparqa hermanosta rejsinankupaj. Jehovatataj mana Diosninkuta jinallachu qhawanankupaj, manaqa Tatankuta, Amigonkuta jina. Chayqa may sumajpuni karqa, parlayniykuta yachakunankumanta nisqaqa”, nispa. w17.05 págs. 10, 11 párrs. 11-13

Tumpamantawan kay Jallpʼapi Diospa Gobiernonta munajkunalla kausakonqanku. Chay pʼunchay chayamunantataj mayta suyashanchej. Débora, Barac jina kashanchej, paykunaqa Jehovaman takiypi nerqanku: “Tata Dios, tukuy enemigosniyki phirisqa kachunku, qanta munakusojkunataj kʼancharichunku, imaynatachus inti llojsimushaspa may sinchʼita kʼancharin, jinata”, nispa (Jue. 5:31). Chaytaj kanqa Satanaspa mundonta chinkachejtin. Armagedón maqanakuy qallarejtin Jehovaqa mana runaswan yanapachikonqachu enemigosninta chinkachinanpaj. Astawanpis ‘kakullasun mana kuyukuspa Jehová librawasqanchejtataj’ rikusun (2 Cró. 20:17). Chaykamataj Diospa Gobiernon ñaupajman rinanpaj tukuy imaymanamanta sonqo kʼajaywan, mana manchachikuspa ima yanapakunallapuni. Deborawan Baracwan enemigosninkuta atipasqankumanta takiyninkuta qallarerqanku Jehovata jatunchaspa. Paykuna takiyninkupi nerqanku: “Tukuyniykichej Tata Diosta jatunchaychej, [...] maqanakuman wajyachisqata uyariytawankama [risqaykichejrayku]”, nispa (Jue. 5:1, 2). Kunanpis Diosta sirviyta munasqanchejqa, wajkunata Diosta jatunchanankupaj yanapananta munanchej. w17.04 pág. 32 párrs. 17, 18

Joseqa 13 watasta mayta ñakʼarispapis, mana ñakʼariykunasnillanpichu yuyarqa (Gén. 45:5-8). Nitaj saqerqachu wajkunaj pantasqanku, sajra imasta ruwasqanku Jehovamanta karunchananta. Cheqa sonqo kasqanrayku, Joseqa contranpi sajra imasta ruwasqankuta imaynatachus Jehová allinchasqanta rikorqa, familianman, payman ima bendecisqantapis. Noqanchejpis José jina Jehovawan amigos kasqanchejta jatunpaj qhawana, jarkʼanataj. Ni jaykʼaj saqenachu hermanospa pantasqanku Jehovamanta karunchanawanchejta, pitachus munakunchej, yupaychanchejtaj (Rom. 8:38, 39). Hermanos sonqonchejta nanachiwajtinchejqa José jina ruwana, astawantaj Jehovaman qayllaykuna. Kallpachakunataj Jehová jina chay chʼampayta qhawanapaj. Uj chʼampay kajtenqa, Bibliaj yuyaychaykunasninman jina allinchanapaj kallpachakuna. Chantá Jehovaj makisninpi saqepuna. Atienekunataj chay chʼampayta Jehová imaynatachus, maychus tiemponpi ima allinchananpi. w17.04 págs. 20, 22 párrs. 12, 15, 16

Anaqa imatachus Jehovaman nisqanta juntʼarqa. Diosta yupaychana toldoman Samuelta aparqa, chaytaj Silopi kasharqa. Chaypitaj kuraj kaj sacerdote Eliman entregarqa, nerqataj: “Diosmanta mañarqani kay wawata qonawanta, paytaj qowan chay mañakusqayta. Chayrayku noqapis kunanqa kay wawata Tata Diosman pusampuni; kawsanankamaqa, Tata Diospata kachun”, nispa (1 Sam. 1:24-28). Chaymantapacha Samuelqa Diosta yupaychana toldopi tiyakorqa. Bibliaqa nin: “Samueltajrí Tata Diospa ñawpaqempi wiñashallarqapuni”, nispa (1 Sam. 2:21). Anaqa nichá Jehovaman nisqanta juntʼayta atillarqachu. Imaraykuchus mana sapa diachu wawitanwan kayta atinman karqa, nitaj wiñajtapis rikunmanchu karqa. Jinapis Jehovaman nisqanta jatunpaj qhawarqa. Nisqanta juntʼananpajtaj tukuy imata ruwarqa (1 Sam. 2:1, 2; Sal. 61:1, 5, 8). w17.04 págs. 4, 5 párrs. 7, 8

Apóstol Pablo nerqa ‘qhepa pʼunchaykunapi’ kausay may llakiy kananta. Chantá nillarqataj: “Sajra runasrí, astawan astawan sajrayanqanku”, nispa (2 Tim. 3:2-5, 13). Chay profecía juntʼakojta rikushanchej, ¿icharí? Noqanchejmanta ashkhasta suwa runas mayta ñakʼarichiwanchej chayri sajra runas wajkunata ñakʼarichinku chayri runa masinkuta waj suyumanta kasqankurayku mayta chejnikunku. Wakin sajra runasqa tukuypa rikunanta sajra imasta ruwanku. Wakin sajra runastaj wajkunata yanapajman rijchʼakunku, jinapis may sajras kanku. Ichapis mana noqanchejtapunichu sajra runas ñakʼarichiwanchej, jinapis sajra imasta ruwasqankoqa ñakʼarichiwanchej. Wawitasta, viejitusta, mana piniyojta ima mayta ñakʼarichisqankuta uyarispa mayta llakikunchej. Chay sajra runasqa phiña animales chayri supaykuna jina ruwanku (Sant. 3:15). Jinapis Diosqa Palabrannejta uj suyakuyta qowanchej, chaytaj kusichiwanchej. w17.04 pág. 10 párr. 4