Febrero

Jesusqa runasmanta llakikorqa, khuyakorqataj. Ashkha runastaj Jesús paykunata munakusqanta reparaspa, sumaj willaykunata japʼikorqanku. Jesús jina kanapaj astawan kallpachakusun chayqa, predicacionpi aswan sumaj riwasun. Predicanchej chay runasmanta khuyakunapajqa, imatachus piensasqankuta, imaynachus kashasqankutawan reparana. Chantá paykunaj lugarninkupi churakuna, chayman jinataj ruwana (Mat. 7:12). Imatachus sapa runa necesitasqanpi piensarina. Tukuy runasman kikinta predicanamantaqa, sapa runa ima llakiyniyojchus kasqanta, imastachus piensasqantawan reparana. Chantá chayman jina predicana. Chantapis sumaj yuyaywan tapurina (Pro. 20:5). Maypichus predicanchej chaypi runas mana phiñakunkuchu chayqa, kay imasmanta tapurisunman: trabajonkumanta, familiankumanta, imatachus piensasqankuta, waj imastawan ima. Ajinamanta paykunallataj willawasun imamantachus yachayta munasqankuta. Chayta yachaspañataj, Jesús jina imamantachus parlarinanchejta yachasun (1 Corintios 9:19-23, kikinchay). w19.03 pág. 20 párr. 2; pág. 22 párrs. 8, 9

Adanwan Evawanqa Jehová Dios tukuy imata paykunarayku ruwasqanta pisipaj qhawarqanku. Chaywanpis tukuyninchej rikuchiyta atinchej, paykuna mana allintachu ruwasqankuta. Bautizakuspaqa rikuchinchej, Jehová Dioslla derechoyoj kasqanta imachus allin, imatajchus mana allin kasqanta ninanpaj. Chantapis rikuchillanchejtaj, payta mayta munakusqanchejta, paypi atienekusqanchejta ima. Bautizakuytawanqa Diosllapajña kausananchej tiyan, manaña noqanchejpajchu. Wakinkunaqa chayta mana atinankuta piensanku. Jinapis may chhika runas, Diospa munayninta sapa día ruwashanku. Qanpis paykuna jina Diospa munayninta ruwawaj. Chaypajqa Bibliata entiendenaykipaj kallpachakullaypuni, hermanoswanpis masichakuy, Diosmanta yachakusqaykitapis tukuy sonqo wajkunaman willariy (Heb. 10:24, 25). Imata ruwanaykipajpis Jehová Diospa yuyaychayninta maskʼay. Payqa Palabrannejta, llajtannejta ima yuyaychasonqa (Isa. 30:21). Ajinamanta kausayniykipi allinpuni risonqa (Pro. 16:20). w19.03 pág. 7 párrs. 17, 18

Jehová Diosqa yachachiwanchej tantakuykunanejta, revistasnejta, Internetnejta ima. Wakin discursosta uyarispa chayri uj yachaqanata estudiaspa chayri JW Broadcastingpi kaj videosta qhawaspaqa, ichapis nerqanchej: “Kayqa noqapaj jinapuni karqa”, nispa. Chay jinata Jehová Dios wakichipuwasqanchejmantaqa mayta payman agradecekusunman (Col. 3:15). Diosmanqa yachachiwasqanchejmanta agradecekusunman sapa kuti orakushaspa. Jehová Diosman agradecekullasunmantaj Tantakuna Wasita llimphituta, kʼuchunchasqatataj japʼispa. Chayrayku sapa kuti kallpachakuna Tantakuna Wasita llimphuchanapaj, allinchanapajtaj. Chantapis sonidomanta encargadosqa sonidopi kaj aparatosta sumajllawan apaykachankuman mana fregarpanankupaj. Tantakuna Wasita allinchasqata japʼejtinchejqa, Tantakuna Wasinchej mosojllapuni kanqa, nitaj arreglanapaj anchata gastanachu kanqa. Ajinamanta qolqe astawan kanqa mundontinpi Tantakuna Wasista sayachinapaj, maukʼa Tantakuna Wasistapis watejmanta sayachinapaj. w19.02 pág. 18 párrs. 17, 18

Jobqa tiempochakorqa Jehová Diospa ruwasqasninta qhawarinanpaj, chaypi tʼukurinanpajtaj (Job 26:7, 8). Payqa jallpʼapi, cielopi, phuyuspi, qhon qhonkunapi tʼukurispa tʼukulla qhepakorqa. Chayrayku nerqa uj chhikallanta Diospa ruwasqasninmanta yachasqanta. Chantapis Jobqa Jehová Diospa nisqasninta tukuy sonqo japʼikorqa. Chantachá nerqa: “Noqaqa leyesninta, kamachisqasnintawan juntʼanipuni”, nispa (Job 23:12). Jobqa manchachikorqa Diospa contranpi imatapis ruwayta, paytataj jatunpaj qhawarqa. Chayrayku Diosninchejta tukuy sonqo munakorqa, kusichinanpajtaj kallpachakorqa. Jinamantataj Jehová Diosta tukuy sonqo kasukullarqapuni. Noqanchejpis Job jina Diospa ruwasqasninpi tʼukurinapaj tiempochakunanchej tiyan. Noqanchejqa Jobpa tiemponmanta nisqaqa astawanraj Diospa ruwasqasninmanta yachanchej. Bibliapis tiyapuwanchej. Bibliaqa yanapawanchej Diosta sumajta rejsinapaj. Diosta sumajta rejsispaqa paypa contranpi imatapis ruwayta manchachikusunchej, paytataj jatunpaj qhawasunchej. Ajinamantataj payta tukuy sonqo munakullasunpuni, tukuy sonqotaj kasukullasunpuni (Job 28:28). w19.02 pág. 5 párr. 12

Jehová Diospa llajtanqa unaymantapachaña qhatiykachasqa karqa. Wakin autoridadesqa “mana allintachu ruwashankichej” nispalla qhatiykachawanchej. Chaywanpis qhatiykachasqa kanchej paykunata kasukunanchejmantaqa Diosta kasukusqanchejrayku (Hech. 5:29). Autoridadesqa ichapis asikuwasunman, carcelman wisqʼachiwasunman chayri maqawasunman. Ajinapi rikukojtinchejqa Dios yanapawanchej mana vengakunapaj, nitaj phiñakunapaj. Kinsa hebreosmanta parlarina. Paykunaqa Babiloniaman presos apasqa karqanku. Paykunaqa kanku: Ananías, Misael, Azarías ima. Paykunaqa mana phiñakuspalla, respetowantaj nerqanku reypa qori lantinman mana kʼumuykukunankuta, sutʼinchallarqankutaj imaraykuchus mana kʼumuykukuyta munasqankuta. Chay kinsa hebreosqa Diospa makinman churakorqanku. Diostaj paykunata salvarqapacha (Dan. 3:1, 8-28). Noqanchejpis chay kinsa hebreos jina imapi rikukuspapis Jehovallata kasukusunman. Chaypajqa kʼumuykukoj sonqo kananchej tiyan, Jehová yanapanawanchejpitaj atienekunanchej tiyan (Sal. 118:7). Wajkuna qhasimanta juchachawajtinchejqa mana phiñakuspalla, respetowantaj paykunata parlapayana (1 Ped. 3:15). Wajkuna Diospa leyesninta pʼakinapaj tanqawajtinchejqa, tukuy atisqanchejta ruwana Diosmanta ni imarayku karunchakunapaj. w19.02 págs. 10, 11 párrs. 11-13

Mana manchachikunapajqa Jesucristo wañusqanrayku wiñay kausayta japʼinanchejpi tʼukurisunman (Juan 3:16; Efe. 1:7). Chaytataj ruwasunman Jesuspa Wañuyninta Yuyarinapaj tantakuypaj semanas faltashajtin. Chantapis chay diaspaj ajllasqa versiculosta leesunman, tʼukurisunmantaj imaschus pasasqanpi niraj Jesusta wañuchishajtinku. Ajinamanta Jesuspa Wañuyninta Yuyarinapaj tantakuypi, tʼantata vinotawan qhawaspa Jehová Dios preciowan juchamanta kacharichiwasqanchejta entiendesunchej. Entiendellasuntaj Jesucristo mayta munakuwasqanchejrayku kausayninta qosqanta. Jesuswan Jehová Dioswan imastachus noqanchejrayku ruwasqankuta yachaspaqa, astawan Jehová Diospi suyakusunchej, tukukuykamataj imatapis aguantasunchej (Heb. 12:3). Jesús kʼumuykukoj sonqo kasqanmanta, manataj manchachikoj kasqanmanta mayta kusikunchej. Imajtinchus kunanqa cielopi Kuraj kaj Sacerdote jina Diosmanta yanapata mañapushawanchej (Heb. 7:24, 25). Chayrayku tukuy sonqo Jesusta kasukuna. Pay kamachiwarqanchej wañuyninta yuyarinanchejta (Luc. 22:19, 20). w19.01 pág. 22 párr. 8; pág. 23 párrs. 10, 11

Comentaspa Jehová Diosta jatunchanchej. Tantakuypi comentaspaqa Jehová Diosman “uj jaywanatapis jaywashasunman jina” (Heb. 13:15). Chaytataj sapa uj ruwananchej kashan. Imaraykuchus ni pipis cuentanchejmanta comentaspa Jehová Diosta jatunchapuwasunmanchu. Tantakuykunaqa uj jatun mikhuypi ashkha amigoswan mikhurikuy jina. Wakin hermanos uj mikhuyman invitawasqanchejpi piensarina. Paykunaqa ichapis niwasunman imitallatapis aparinanchejta. Noqanchejtaj ichapis tumpata manchachikusunman imatachus apananchejmanta. Chaywanpis gustasqanku imasta apanapaj kallpachakusunman, ¿icharí? Ajinallataj tantakuykunawanpis. Jehová Diosqa tantakuykunaman tukuyta wajyarikuwanchej, chaytaj uj jatun mikhuy jina (Sal. 23:5; Mat. 24:45). Diostaj kusikun sonqomantapacha imitallatapis aparejtinchej, nisunman comentajtinchej. Chayrayku tantakuykunapaj sumajta wakichikuna, tantakuykunapi comentanapajtaj kallpachakuna. Ajinamanta mana mikhullasunchu, nisunman mana uyarillasunchu, manaqa wajkunatapis kallpachasunchej. w19.01 pág. 8 párr. 3; pág. 13 párr. 20

Unay tiempomanta runasqa santosta yupaychashaspa khuchichakoj kanku (Ose. 4:13, 14). May chhika runastaj khuchichaykuyta munasqankuraykulla santosta yupaychaj kanku. Jinapis chayta ruwaspaqa llakiyllapi rikukoj kanku. Chayraykuchá David nerqa: “Pikunachus waj diospa qhepanta purinku, chaykunapaj ñakʼariykuna astawan yapakun”, nispa (Sal. 16:4). Chantapis chay tiempomanta runasqa wawasninkuta santosman qaraj kanku (Isa. 57:5). Jehová Diosqa chayta ruwasqankumanta maytapuni phiñakorqa (Jer. 7:31). Kay tiempopipis llulla religionespeqa, khuchichakuyta mana juchata jinachu qhawanku. Astawanpis qharipura chayri warmipura casarakunankuta saqellanku. Yuyankutaj imatapis munasqankuman jina ruwayta atisqankuta. Chaywanpis chayta ruwaspaqa unay tiempopi jina llakiyllata yapakunku (1 Cor. 6:18, 19). Jovenesqa ichapis repararqanku millayta kausakojkuna llakiyllapi rikukusqankuta. Chayrayku jovenesqa Jehovata kasukunanku tiyan. Convencekunankutaj tiyan Diosta kasukuy allinninkupaj kasqanta. Manataj qonqanankuchu tiyan sajra imasta ruwaspa uj ratolla kusirikunankuta, unaytataj sufrinankuta (Gál. 6:8). w18.12 págs. 27, 28 párrs. 16-18

Uj hermano khuchichakuy juchapi urmajtenqa, warmin tʼukurinan tiyan divorciakunanpichus manachus. Jesús nerqa uj qosa chayri uj warmi khuchichakuy juchapi urmajtin, mana juchapi urmajqa divorciakuyta atisqanta, watejmantataj wajwan casarakuyta atisqanta (Mat. 19:9). Ajina kajtinpis, mana juchapi urmajqa khuchichakuy juchapi urmajta perdonayta atinman. Oseaspis Gomerta watejmanta japʼikaporqa. Gomertataj nerqa: “Ama khuchichakuyñachu, nitaj pi qharimampis entregakuychu”, nispa. Chay tiempopitaj Oseasqa Gomerwan mana puñuykorqachu (Ose. 3:1-3). Oseasqa chaymantaraj Gomerwan watejmanta puñuykorqa. Jehová Diosqa chaywan rikuchisharqa watejmanta israelitasta tukuy sonqo japʼikapunanta, payman qayllaykunankutataj saqenanta (Ose. 1:11; 3:4, 5). Qhariwarmisqa Oseasmanta yachakunkuman qosankuta chayri warminkuta perdonayta. Uj qosa warmin wasanchajtinpis paywan watejmanta puñuykojtenqa, warminta perdonasqanta rikuchin (1 Cor. 7:3, 5). Puñuykusqankutawantaj manaña divorciakuyta atinkumanchu. Astawanpis kallpachakunanku tiyan iskayninku aswan ujchasqa kanankupaj, Jehová Dios chayta munasqanrayku. w18.12 pág. 13 párr. 13

Bibliatawan publicacionestawan estudiashaspaqa, tʼukurinanchej tiyan imaspichus chay yachakusqanchej yanapanawanchejpi. Ajinamanta tukuy imata Diospa munasqanman jinapuni ruwanapaj wakichisqa kasunchej. Manataj desesperacionwan japʼichikuspa imatapis ruwarpallasunchu. Josemanta parlarina. Uj kutipi Potifarpa warmenqa Joseta nerqa: “Jamuy, noqawan puñuykunki”, nispa. Josetaj mana munarqachu, qhesacharqapachataj. Ajinamanta Joseqa rikucherqa Jehová Dios jina yuyasqanta. Imaraykuchus pay yacharqa Jehová Dios munasqanta casarasqaslla puñuykunankuta (Gén. 39:8, 9). Chantapis Joseqa Potifarpa warminman nerqa: “Imaynatataj noqa ruwasaj kasqa chay millaytari, juchallikusajtaj Diospa contrampiri?”, nispa. Chayqa reparachiwanchej José, Jehová Diospa kamachiykunasninta ni imarayku pʼakiyta munasqanta. Ichá noqanchejpis José jina rikukusunman. Ichá trabajomanta compañeronchej chayri compañeranchej coqueteawasunman, chayri celularninchejman puñuykunamanta parlaj mensajesta apachimuwasunman, manachayri mana ropasniyoj fotosninta apachimuwasunman. Chayrayku allin kanman ñaupajmantaña tʼukurinanchej imaynatachus chay imasta Jehová Dios qhawasqanpi. Chantapis ñaupajmantaña yuyaychakusunman chay jina tentacionpi rikukuspa imastachus ruwananchejpi. w18.11 pág. 25 párr. 13, 14

Kay versiculosmanta parlaspa wakin runas ninku, Habacuc kusiymanta phinkiykachananta nisqanta. Habacucpa nisqanqa reparachiwanchej Jehová Dios tumpamantawan nisqasninta juntʼanantapuni. Habacuc libropi yachakunchej Jehová Diospi creejkuna salvakunankuta (Hab. 2:4). Jehová Diospi creenallapajpuneqa payman astawan qayllaykunanchej tiyan. Chaypajqa orakuspa tukuy llakiyninchejta Diosman willakunanchej tiyan. Chantapis Bibliaj nisqasninta, Diospa llajtanta ñaupajman apajkunata ima kasukunanchej tiyan. Mana saykʼuspataj Jehová Diospi suyakunanchej tiyan nisqasninta juntʼanankama. Habacucpis Jehová Diospi suyakorqa. Habacucqa Jehová Dioswan parlayta qallarishaspa manchay llakisqa kasharqa. Chaywanpis parlayta tukunanpajqa, Jehová Dios kallpachasqanrayku sonqon tiyaykorqa, kusisqataj kasharqa. Noqanchejpis Habacuc jinallataj llakiyninchejta Jehová Diosman willakusunman, ajinamanta reparasunchej Jehová Dios sonqochawasqanchejta. Imaraykuchus Jehová Diosqa sonqochanawanchejpaj wakichisqa kashan. w18.11 pág. 17 párrs. 18, 19

Jehová Dios mayta munakuwasqanchejmanta Biblia jinata niwanchej: “Diosqa chay jinatapuni kay mundomanta runasta munakusqanrayku, uj kʼata Wawanta qorqa, ajinamanta pillapis paypi creejqa mana wañunanpaj, manachayqa wiñay kausayniyoj kananpaj”, nispa (Juan 3:16). Jesuspis mayta munakullawanchejtaj, chayrayku kausayninta noqanchejrayku qorqa. Bibliapis niwanchej ni ñakʼariypis, ni llakiypis Cristoj munakuyninmanta tʼaqanawanchejta (Rom. 8:35, 38, 39). Problemasniyoj kaspaqa llakisqalla, sonqo pʼakisqallataj purinchej, Jehová Diostapis manaña kusisqachu sirvinchej. Chaywanpis ñaupajllamanpuni rinanchejpajqa Cristoj munakuynin yanapawasunchej (2 Cor. 5:14). Cristoj munakuynenqa Jehová Diosta yupaychanallapajpuni yanapawanchej. Yanapallawanchejtaj jatuchaj llakiykunapi rikukojtinchej, qhatiykachasqa kajtinchej, sonqo pʼakisqa kajtinchej mana saykʼupunanchejpaj. w18.09 pág. 14 párrs. 8, 9

Diospa ñannillantapuni purinapajqa, Diospa Palabranta entiendenanchej tiyan, tukuy imapitaj kasukunanchej tiyan. Jehová Diostarajpuni ñaupajman churananchej tiyan, tukuy imatataj Bibliaj yuyaychaykunasninman jinapuni ruwananchej tiyan. Noqanchejpis David jina Jehová Diosman ninanchej tiyan ñannillantapuni purinanchejta, payta kasukuspa. Diostachus mana kasukusunchej chayqa, ñaupa kausayninchejman kutiripuyta munasunchej. Chantapis Bibliaj nisqantaqa tukuyninta kasukunanchej tiyan, nitaj wakillantachu. Kasukunapajtaj “cheqa kajta allinta” entiendenanchej tiyan (Juan 16:13). Diosmanta mana karunchakunapajqa mana tiemponchejta usuchinanchejchu tiyan. Tiemponchejtaqa ichapis usuchishasunman anchata pujllaspa, fiestasllaman rispa, Internetllaman yaykuspa chayri telellata qhawaspa. Chaykunata ruwayqa mana juchachu. Chaywanpis ichá Bibliata estudianamantaqa chayri predicacionman rinamantaqa chay imasllata ruwashasunman. w18.11 pág. 10 párrs. 7, 8

Kausayninchejpi ima cambio kajtinpis chayri imatapis waj jinamanta ruwananchejta yachaspaqa, phutikusunman chayri umphuyapusunman (Pro. 12:25). Chay jinata phutikuspapis sonqonchejta tiyaykuchiyta atisunman (Sal. 131:1-3). Mayta sufrejtinchejpis ‘Jehová Diosqa sonqo tiyaykuyta qowasunchej’, yuyayninchejtataj waqaychanqa (Fili. 4:6, 7). Chayrayku ima llakiypi rikukuspapis, Jehová Diosman llakiyninchejta willakuna. Paytaj yanapawasunchej ñaupajllamanpuni rinapaj, llakiyninchejwantaj mana atipachikunapaj. Jehová Diosqa atiyninnejta sonqonchejta tiyaykuchinman, yanapawasunmantaj Bibliapi sonqochaj versiculosta tarinapaj. Ajinamanta Diospa munayninta ñaupajman churanapaj (Juan 14:26, 27). w18.10 pág. 27 párr. 2; pág. 28 párrs. 5, 8

¿Imataj runasta manchayta ñakʼarichin? Llulla runas. Llulla runasqa unaymantapachaña runasta astawan ñakʼarichinku. Imajtinchus runasqa llullakunku wajkunata ñakʼarichinankupaj chayri engañanankupaj. Tukuymanta nisqataj ñaupajtaqa Diablo llullakorqa. Chayrayku Jesusqa, Diablo ‘llullakojkunaj tatan’ kasqanta nerqa (Juan 8:44). Diabloqa Edén huertapi llullakorqa. Jehová Diosqa chay huertata ruwarqa, Adanwan Evawan chay huertapi tiyakunankupaj. Paykunamantaj nerqa, allin kajta mana allin kajta yachanamanta sachʼaj poqoynillanta amapuni mikhunankuta. Chay sachʼaj poqoyninta mikhojtinkutaj wañunankuta. Diablotaj katarita parlachispa Evaman nerqa: “Chayqa mana jinachu; mana wañunkichejchu”, nispa. Chantá nillarqataj: “Dios allinta yachan, chay sachʼaj poqoyninta mikhuspa, sumaj yachayniyojman tukunaykichejta. Ajinamanta chaywan qankunaqa Jehová Dios jina kankichej, yachankichejtaj imachus allin kajta, mana allin kajtapis”, nispa (Gén. 2:15-17; 3:1-5). Chayta nispa Diabloqa maytapuni llullaykukorqa. w18.10 pág. 6 párrs. 1, 2

Llimphu sonqoyoj kanapajqa mana millay imaspi yuyananchejchu tiyan. Imajtinchus llimphu sonqoyoj kaspalla Jehová Diospa ñaupaqenpi allinpaj qhawasqa kayta atinchej (2 Cor. 4:2; 1 Tim. 1:5). Jehová Diosqa Moisesman nerqa: “Manapuni qanqa uyayta rikuwankichu, imaraykuchus pipis rikuwajqa manapuni kawsanqachu”, nispa (Éxo. 33:20). Kunantaj qhawarinachej imaraykuchus Jesús llimphu sonqoyojkuna Diosta rikunankuta nisqanta. Griego parlaypi “rikuy” palabraqa niyta munan imaynachus uj runa kasqanta entiendey, yachay ima. Chayrayku Diosta rikoyqa niyta munan imayna kʼachapunichus kasqanta yachay, payta munakuy ima (Efe. 1:18). Imaynatachus Jehová Dios kausayninchejpi yanapawasqanchejta reparayqa payta rikuy jina (Job 42:5). Chantapis Diosta rikullasunmantaj imastachus tumpamantawan ruwananpi piensarispa. Jehová Diosqa llimphu sonqoyojkunapaj, payta kasukojkunapajwan sumaj kausayta apamonqa. w18.09 pág. 20 párrs. 13, 15, 16

Allin kajta ruwaspaqa, yachayniyoj kasunchej, Jehová Diospis bendeciwasunchej. Yachayniyoj kasqanchejqa mana ashkha imasta yachasqanchejpichu yachakun. Manachayqa sumaj yachaywan allin kajtapuni ruwasqanchejpi. Bibliaqa nin chhakaspis “sumaj yachayniyoj” kasqankuta. Chhakasqa sumaj yachaywan qʼoñi tiempopi ashkha mikhunasta tantakunku (Pro. 30:24, 25). Chantapis Biblia nillantaj: “Diospa atiynenqa, yachayninpis Cristonejta rikuchikun”, nispa. Imajtinchus Cristoqa Diospa munaynintapuni ruwarqa (1 Cor. 1:24; Juan 8:29). Jehová Diosqa bendeciwasunchej llampʼu sonqosllapuni kajtinchej, yachaywan allin kajtapuni ajllajtinchej ima (Mat. 7:21-23). Chayrayku kallpachakunallapuni llampʼu sonqos kanapaj, ajinamanta congregacionpi tukuypis ujchasqas Jehová Diosta yupaychasunchej. Chaywanpis allin kajta ruwanapaj tiempochakunanchej tiyan, pacienciakunanchejtaj tiyan. Allin kajta ruwajtinchejqa llampʼu sonqo kasqanchejta rikuchisunchej. Llampʼu sonqo kaspataj wiñaypaj kusisqas kasunchej. w18.09 pág. 7 párr. 18

Jehová Diosqa Adanta Evatawan ruwarqa paywan khuska llankʼanankupaj. Chaywanpis paykunaqa juchallikorqanku. Jinamantataj juchasapas kanchej. Juchasapas kaspapis Jehová Dioswan llankʼayta atinchej. Noqanchejqa ‘Dioswan khuska llankʼanchejʼ sumaj willaykunata predicaspa, runasta Jesuspa yachachisqasninman tukuchispa ima (1 Cor. 3:5-9). Jehová Dioswan khuska llankʼaytaj ni imawan kikinchakunchu. Chaywanpis mana predicaspallachu Dioswan llankʼayta atinchej. Chantapis Dioswan khuska llankʼayta atillanchejtaj familianchejta yanapaspa, hermanosta yanapaspa, wajkunata wasinchejman wajyarikuspa, Diospa llajtanpi tukuy imaynasmanta yanapakuspa, Diosta astawan sirvinapaj kallpachakuspa ima (Col. 3:23). Jinapis ama wajkunawan kikinchakunachu. Imajtinchus mana tukuychu kikin edadniyoj kanchej, nitaj tukuychu sanitos kanchej, nitaj tukuychu kikin problemaspi rikukunchej, nillataj tukuychu kikin imasta ruwayta atinchej. Chayrayku imastachus wakin hermanos Jehová Diosninchejrayku ruwayta atisqankuta ama kikinchanachu noqanchej imatachus ruwayta atisqanchejwan. w18.08 pág. 23 párrs. 1, 2

Jehová Diosqa Habacucta sonqocharqa, nerqataj tumpamantawan sajra kajta chinkachinanta. Kaytapis nishanman jina karqa: “Pacienciakullay, noqapitaj atienekuy. Qheparejmanña rijchʼasunki chaypis suyarillay, librasunay tiempoqa chayamonqapuni”, nispa. Jehová Diosqa chaywan Habacucta nisharqa nisqasninta juntʼanantapuni. Ajinamantataj Habacucta kallpacharqa nisqasninta juntʼananpi suyakunallanpajpuni. Habacuctaj manaña llakikorqachu. Noqanchejpis Habacuc jina Jehová Diospi suyakunanchej tiyan, imatachus niwasqanchejtapis kasukunanchej tiyan. Ajinamanta ima llakiypi rikukuspapis Jehová Diospi atienekusunchej, sonqo tiyasqastaj kasunchej. Jesusqa niwarqanchej “maykʼajchus chayri ima horachus imapis” kananmanta ama llakikunata. Imajtinchus chaytaqa Jehová Dioslla yachan (Hech. 1:7). Maychus tiemponpi Jehová Dios yanapanawanchejpi atienekunanchej tiyan. Chantapis paypi mana saykʼuspa suyakunallanchejpuni tiyan, kʼumuykukoj sonqotaj kananchej tiyan. Chayrayku kunanqa tukuy atisqanchejta Jehová Diosta sirvinapaj kallpachakunallapuni (Mar. 13:35-37; Gál. 6:9). w18.11 pág. 16 párrs. 13, 14

Pedroqa wawitamantapacha waj llajtayoj runasta chʼichipaj qhawaj. Chaywanpis uj kutipi, mosqoypi jina rikorqa cielomanta jatun lino sábana jina jallpʼaman uraykamushajta (Hech. 10:9-16). Apóstol Pedro jina noqanchejpis sumajta qhawarikunanchej tiyan mana wakin runasta pisipaj qhawanapaj. Chantapis tukuy sonqo japʼikunanchej tiyan pillapis wakin runasta pisipaj qhawashasqanchejta reparachiwajtinchej. ‘Sonqonchejta jatunta kicharejtinchejqa’ ni pitapis chejnikusunchu, astawanpis tukuyta munakusunchej (2 Cor. 6:11-13). Chayrayku ama llajta masisnillanchejwanchu purina. Manaqa waj parlayta parlajkunawan, waj llajtayoj kajkunawanpis purina. Ichapis paykunawan predicarisunman, manachayri wasinchejman wajyarikusunman (Hech. 16:14, 15). Chay imasta ruwajtinchejqa tukuy runasta munakusunchej, uj rejllatataj qhawasunchej. w18.08 pág. 9 párrs. 3, 6; pág. 10 párr. 7

Wakin hermanostaj ‘kay mundomanta runas jina’ purisqankurayku, fiestaspi mundomanta runas jinallataj tusunku, parlankupis. Wakin hermanostajrí, Internetpi redes sociales nisqaman mana allin fotosninkuta, comentariostawan churanku. Chaywanpis paykunaqa, llimphu kausayniyoj kanankupaj kallpachakoj hermanosta pantachinkuman (1 Ped. 2:11, 12). “Kay mundopeqa tiyan: aychaj sajra munaynin, ñawispa rikusqanta munapayay, kapuyninmanta runaykachay ima” (1 Juan 2:16). Chaywanpis noqanchejqa, Diospata kasqanchejrayku mana kay mundomanta runas jinachu kanchej. Chayrayku “Diospa munayninpa contranpi kaj imasta, kay mundoj sajra imasninta munapayayta ima” qhesachanchej. Chantá “kay tiempopi allin yuyaywan” kausakunchej, “cheqan kajta ruwaspa, Diosta yupaychaspataj” (Tito 2:12). Chayrayku mikhushaspapis, ujyashaspapis, trabajashaspapis, vistikuspapis chayri imata ruwashaspapis, tukuy imata ruwananchej tiyan Diosninchej jatunchasqa kananpaj. w18.07 pág. 25 párrs. 13, 14

Jehová Diospa munayninta ruwallasunpuni chayqa, mana saqesunchu wajkunaj pantasqanku Diosmanta karunchanawanchejta, nitaj rabiawan atipachikusunchu. Diospa llajtanta ñaupajman apajkunaqa, Moisés jina jatun cargota japʼisqankurayku mayta kallpachakunanku tiyan mana wajkunaj pantasqallankupi yuyanankupaj. Imajtinchus Diospa llajtanta ñaupajman apajkunaqa, aswan ashkhata Diosman cuentata qonqanku (Luc. 12:48). Tukuyninchejpis Diosman cuentata qosunchej. Chayrayku kallpachakunanchej tiyan Diosta kasukunallapajpuni. Ajinamanta salvacionta tarinanchejpaj (Fili. 2:12). Jehová Diosta tukuy sonqo munakusunchej chayqa, ni imapis paypa ‘munakuyninmanta’ karunchawasunchu (Sal. 119:165; Rom. 8:37-39). Qhepa pʼunchaykunapi kausakusqanchejrayku, kausayqa may llakiy, maytataj sajrayashan. Chayrayku cielopi tiyakoj Jehová Diosta qhawarispa yanapanta mañakuna, munayninta ruwanallapajpuni (Sal. 123:1). Ni jaykʼaj saqenachu wajkunaj pantasqanku Diosmanta karunchanawanchejta. w18.07 pág. 16 párrs. 19, 20

Mayta kusikunchej Jehová Diospa llajtan ashkhayashasqanmanta. Imajtinchus 2017 watapeqa 10.000.000 runasmanta astawan Bibliamanta yachakorqanku. May chhika runastaj Jesuspa Wañuyninta Yuyarinapaj tantakuyman jamorqanku. Chaypitaj yachakorqanku Jehová Dios Wawanta qospa juchamanta kacharichiwasqanchejta (1 Juan 4:9). Ajinamanta Diospa kamachisnenqa runaspa ñaupaqenpi ruwasqasninchejwan kʼancharishanchej. Jallpʼantinmanta hermanosqa mana kikin parlayllatachu parlanchej. Chaywanpis Jehová Diostaqa, uj familia jina jatunchayta atinchej (Apo. 7:9). Chayrayku mana kikin parlayta parlaspapis chayri maypi tiyakuspapis kay mundopi lliphipirishanchej (Fili. 2:15). Predicajtinchej, ujchasqa kajtinchej, rijchʼarisqataj kajtinchejqa, runas ruwasqasninchejta rikuspa Jehová Diosta jatunchanqanku. w18.06 pág. 21 párrs. 1-3

Jesús apostolesninman nerqa: “Mikhunayqa kachamuwajniypa munayninta ruwanay, kamachiwasqantataj tukuchanay”, nispa (Juan 4:32-34). Chayrayku Jesusqa chay samaritana warmiman predicarqa. Santiagowan Juanwanqa, manapuni entienderqankuchu tukuy runasta uj rejllata qhawananku kasqanta. Uj kutipi Jesuswan yachachisqasninwanqa samaritanospa ujnin ranchonpi alojakuyta munarqanku. Samaritanosrí mana paykunata alojayta munarqankuchu. Santiagowan Juanwantaj chayta rikuspa, Jesusta nerqanku: “Señor, ¿munawajchu cielomanta ninata mañakunaykuta uraykamuspa paykunata qʼolarparinanpaj?”, nispa. Jesustaj paykunata kʼamerqa (Luc. 9:51-56). Ichapis Santiagowan Juanwanqa phiñasqa kasharqanku samaritanosta pisipaj qhawasqankurayku. Chaywanpis tiemponman Juanqa, samaritanosman predicarqa. Ashkha samaritanostaj Diospa Palabranta japʼikorqanku. Juanqa chayta rikuspa ichá mayta pʼenqakorqa ñaupaj kutipi samaritanospaj phiñakusqanmanta (Hech. 8:14, 25). w18.06 págs. 10, 11 párrs. 12, 13

Diosmanta cheqa kajta yachakusqanchejrayku Bibliaj nisqanta kasukunchej, nitaj llullakunchejchu. Satanastaj llullakunanchejta munan. Ashkha runastataj llullakuypi urmachishan. Llullata parlayqa noqanchejpaj mana allinchu, nillataj wajkunapajpis (Juan 8:44). Chayrayku noqanchejqa tukuy tiempo mana llullakuspa parlananchej tiyan, nitaj Bibliamanta yachachishaspallachu. Mana llullakunapajtaj, mayta kallpachakunanchej tiyan juchasapas kasqanchejrayku (Efe. 4:25). Chaywanpis wakin kuteqa, ichá llullakuyta munasunman. Chaymanta parlaspa hermanitanchej Abigailmanta parlarina. Payqa 18 watasniyoj, nintaj: “A vecesqa, llullakuyta munani mana pʼenqaypi rikhuriyta munaspa chayri mana kʼamichikuyta munaspa”, nispa. ¿Imaraykutaj cheqa kajta parlana tiyan? Hermananchej Victoriamantañataj parlarina. Payqa 23 watasniyoj, nintaj: “Imatapunichus Biblia yachachisqanta sutʼinchajtinchej, nitaj llullakojtinchejqa, runasqa asikuwasunman. Chaywanpis cheqa kajta parlaspaqa, manaña manchachikusunchu. Astawanqa Jehová Diosman qayllaykusunchej, hermanospis, tatasninchejpis respetawasunchej”, nispa. Reparanchej jina cheqa kajta parlayqa allinninchejpajpuni. w18.05 pág. 28 párrs. 3, 5

Kay sajra tiempopi ni jaykʼaj jina, sumaj ruwaykunata ruwaspa rijchʼarisqa kananchej tiyan. Imajtinchus Jehová Diosqa sajra runasta chinkachenqapuni (Mat. 24:42-44). Chay día chayamunankamataj pacienciawan suyakuna, wakichisqataj kana. Chaypajqa sapa día Bibliata leena, Diosmantataj mañakunallapuni (1 Ped. 4:7). Chantapis unaytaña Jehová Diosta sirvej hermanosmanta yachakuna. Ichá wakin hermanospa experienciasninkuta leerisunman. Tiemponchejta mana usuchinapajqa, Jehová Diosta tukuy imaymanasmanta sirvina. Chantapis tukuypaj allin kajta ruwana, hermanosninchejtapis waturikuna. Ajinamanta kusisqa kasunchej, tiempopis ima jina pasaponqa (Efe. 5:16). Jehová Diosqa, pantaj runas kajtinchejpis sirvinallanchejtapuni munan. Yanapanawanchejpajtaj ancianosta “regalosta jina” qowarqanchej (Efe. 4:8, 11, 12). Chayrayku ancianos waturikuwajtinchejqa, tukuy sonqo yuyaychariwasqanchejta japʼikuna. w18.06 pág. 24 párrs. 15-18

Jesusqa yachachisqasninman nerqa: ‘Munakullawaychejpuni’, nispa. Jesusqa chayta yachachisqasninman nerqa, kamachisqasninman jina kausakoyqa mana facilchu kasqanrayku. Chantachá Jesusqa Juan 15:4-10 versiculospi yachachisqasninman nerqa: “Noqawan ujchasqallapuni kaychej”, nispa. Jesuspa kamachiykunasninta juntʼaspaqa, payta munakusqanchejta rikuchinchej, paytaj allin ñawiwan qhawawanchej. Chayrayku Jesús jinata nerqa: “Kamachisqasniytachus juntʼankichej chayqa, munakuyniypi kallankichejpuni, imaynatachus noqapis Tataypa kamachisqasninta juntʼani, munakuyninpitaj kallanipuni, ajinata”, nispa. Noqanchejpis Jesús jina ruwasunman (Juan 13:15). Jesusqa yachachisqasninman kamacherqa predicamunankuta. Chay kamachiyta kasukuspaqa Jesusta, Jehová Diostawan munakusqanchejta rikuchinchej. Imajtinchus Jesusqa Tatanpa yachachisqallanta parlaj (Mat. 17:5; Juan 8:28). Jehová Diosta, Jesustawan munakullasunpuni chayqa, paykunapis munakullawasunpuni. w18.05 pág. 18 párrs. 5-7

Joven, kausayniykiwan imatachus ruwanaykita ajllanayki kashan. Ajllanallaykitaj kashan imatachus estudianaykita, imapichus trabajanaykita, waj imastawan. Kausayniykiwan imatachus ruwanaykita sutʼita yachajtiykeqa, imatachus ruwanaykita sumajta ajllayta atinki. Joven, Jehová Diospaj astawan llankʼanaykipaj kallpachakojtiykeqa, allinpuni risonqa. Jallpʼantinpi ashkha jovenesqa, allintapuni ruwashanku Jehová Diosta tukuy sonqo sirvispa, paypaj astawan llankʼanankupajtaj kallpachakuspa. Chayta ruwaj jovenesqa, kusisqa kausakunku. Chantapis Jehová Diospa yuyaychaykunasnintapuni maskʼanku casarakunankutachus manachus ajllashajtinku. Chaymanta parlaspa Salomón nerqa: ‘Tukuy sonqoykiwan Tata Diospi atienekuy. Tukuy ima ruwasqaykipi Tata Diosmantaqa yuyarikuy. Paymin cheqan ñanta pusasonqa’, nispa (Pro. 3:5, 6). Joven, Jehová Diosqa mayta munakusunki. Chayrayku payqa jarkʼasonqa, yanapasonqa, bendecisonqataj. w18.04 pág. 26 párr. 7; pág. 27 párr. 9

Apóstol Juanqa ñaupa tiempomanta cristianosta uma jina ñaupajman apajkunamanta ujnin karqa. Payqa imastachus Jesús kay jallpʼapi kashaspa ruwasqanmanta qhelqarqa. Juanpa qhelqasqanqa ñaupa tiempomanta cristianosta maytachá kallpacharqa, imaynatachus noqanchejta kallpachashawanchej, ajinata. Chantapis Juan librollapi tarinchej Jesús kayta nisqanta: “Qankunachus purajmanta munanakunkichej chayqa, tukuy yachanqanku yachachisqasniy kasqaykichejta”, nispa (Juan 13:35). Apóstol Juanpa kinsa cartasninmanta mayta yachakullasunmantaj. Juan nerqa: ‘Jesuspa yawarnin tukuy juchamanta llimphuchawanchej’, nispa. Chayta yachayqa, llakiyninchejwan mana atipachikunapaj yanapawasunman (1 Juan 1:7). Juan nillarqataj: “Sonqonchej imallamantapis juchachawajtinchejqa, yuyarikuna Diosqa sonqonchejmanta aswan kuraj kasqanta”, nispa (1 Juan 3:20). Chantapis Juanlla nerqa: “Diosqa munakuymin”, nispa (1 Juan 4:8, 16). Juanqa iskay kaj cartanpi, jinallataj kinsa kaj cartanpi, cheqa kajllapipuni purej hermanosmanta mayta kusikusqanta nerqa (2 Juan 4; 3 Juan 3, 4). w18.04 pág. 18 párrs. 14, 15