Marzo

Familiasninchej chayri amigosninchej wañusqaspaj costumbresta ruwachiyta munawajtinchej, ¿imataj yanapawasunman Jehovata kasukunapaj? Diosta, Palabrantawan munakuy. Familiasninchejqa costumbresta mana ruwayta munajtinchej, ichá niwasun: “Almapaj ni ima respetoyki kanchu, ¿manachu payta munakunki?”, nispa. Chayrí niwasunman: “Juchaykirayku alma castigawasun”, nispa. ¿Imatá ruwasunman Jehovata kasukunallapajpuni? Caribemanta uj lugarpi, ashkha runas creenku, runa wañupojtin alman qhepakusqanta payta sufrichejkunata castigananpaj. Uj libro nisqanman jina, almaqa “uj llajta enterotapis castiganman”. Africaj wakin lugaresninpitaj, runa wañupojtin espejosta qhatanku, wañusqaj fotosnintataj perqa ladoman tijranku. Paykunaqa chayta ruwanku, alma uyanta mana rikukunanpaj. Chay jina costumbresqa Satanasmanta jamun. Noqanchejqa chayta yachasqanchejrayku, mana costumbresta ruwanchejchu, nitaj wañusqasmanta ima cuentotapis creenchejchu (1 Cor. 10:21, 22). w19.04 pág. 16 párrs. 11, 12

Jesusqa discipulosninman yachacherqa, tukuypa derechosninkuta valechinankuta. Jesusqa yachacherqa: “Imastachus munankichej runas qankunapaj ruwanankuta, chayllatataj qankunapis paykunapaj ruwapuychej”, nispa. ¿Imatá chaymanta yachakusunman? Wajkuna noqanchejpaj cheqan kajta ruwanankuta munanchej chayqa, noqanchejpis chayllatataj paykunapaj ruwananchej tiyan. Jinapis, ¿imatá ruwasunman wajkuna sajra kajta ruwawajtinchej? Jesusqa Jehová Diospi atienekunanchejta nerqa. Pay nerqa: “Diosqa ajllasqasninpaj justiciata ruwaponqa tuta pʼunchay paymanta mañakojtinku”, nispa (Luc. 18:6, 7). Jehová Diostaj chaytapuni ruwanqa. Payqa sumajta yachan, kay qhepa pʼunchaykunapi ima llakiykunasniyojchus kasqanchejta, maychus tiemponpitaj justiciata ruwapuwasun (2 Tes. 1:6). Jesuspa yachachiykunasninman jina kausasun chayqa, wajkunapaj cheqan kajtapuni ruwasun. Kay tiempopi pillapis sajra kajta ruwawanchej chaytaj, Jehová justiciata ruwapunawanchejta yachaspa sonqochakusun. w19.05 pág. 5 párrs. 18, 19

Colegiopi kashaj jovenpi tʼukurina. Casi tukuynin compañerosnin diachakusta ruwanku. Paytaj imaraykuchus cumpleañosman mana risqanta Bibliawan sutʼinchayta munan. Jinapis mana atinanta yuyan. ¿Imatá ruwanman? Payqa imatachus publicaciones cumpleañosmanta nisqanta maskʼarinman. Ñaupajtaqa estudianman, Diosninchej diachakusta mana allinpajchu qhawasqanpi sinchʼita creenanpaj. Chantá estudianman, imatachus yachakusqanta sumajta sutʼincharinanpaj (Mat. 14:6-11). Estudiashaspaqa, ñaupajta piensarinan kanman imaraykuchus compañerosnin cumpleañosta ruwasqankuta. Chantá imatachus publicacionesninchej diachakusmanta nisqanta maskʼanan kanman. Ajinamanta chay jovenqa, imatachus creesqanta sutʼinchayta atillanqa. Ashkha runasqa, wajkuna cumpleañosta ruwasqankuraykulla diachakunku. Sumajta wakichikuspañaqa, pillapis yachaytapuni munaspa tapurejtin, sumajta kutichiyta atenqa (Col. 4:6). w19.05 pág. 29 párr. 13

Uj pacha, profeta Eliasta enemigosnin wañuchiyta munarqanku. Paytaj mana wañuchinankupaj ayqekorqa. Chaypacha mayta llakikusqanrayku, wañupullaytaña munarqa. Jehová Diostaj Eliasta sonqochananpaj, angelninta kacharqa. Chay angelqa payman qʼoñi tʼantata jaywarqa, mikhukunantataj nerqa (1 Rey. 19:5-8). Jehová Diospa angelninmantaqa, mayta yachakusunman. Llakisqa kajkunapaj imitallatapis ruwapojtinchejqa, paykunata mayta kallpachasun. Paykunaman imatachus ninanchejta mana yachaspaqa, ichapis mikhunitata waykʼupusunman, uj regalitota qorisunman chayri uj tarjetitata jaywasunman. Chaykunata ruwajtinchejqa, llakisqa hermanosninchejqa munakusqanchejta, paykunamantataj llakikusqanchejta reparanqanku. Jehová Diosqa, Elías Horeb orqoman correnanpaj atiyninwan kallpacharqa. Eliasqa chay karu lugarman chayaspa, ichá niña yuyarqachu enemigosnin wañuchinankuta. ¿Imatá chaymanta yachakusunman? Abusasqa kajkunata yanapariyta munaspaqa, mana manchachikunankupajraj yanaparina. Ichapis uj hermanaqa, wasinpi teycituta tomarispa llakiyninmanta parlariyta munanman. Waj hermanatajrí ichapis salonllapi parlariyta munanman. w19.05 pág. 16 párr. 11; pág. 17 párrs. 13, 14

Zacarías libromanta 12 capitulota leerishasqanchejpi piensarina. Chaypeqa Mesías wañuchisqa kananmanta parlan (Zac. 12:10). Versículo doceqa, ‘Natanpa ayllunmantaʼ kajkuna Mesiasta wañuchisqankumanta waqanankuta nin. Chayta leeytawan pasapunallamantaqa, piensarisunman: “¿Imajtintaj Natanpa familian Mesías wañupusqanmanta waqananku karqari? ¿Imaynatá chayta yachayman?”, nispa. Sumaj kanman chaykunata ukhuncharinanchej. Traducción del Nuevo Mundo nisqa Bibliapi, Natanpa laditonpi uj juchʼuy letra rikhurin. Chay letrataj iskay textosman apawanchej. Ujqa 2 Samuel 5:14, chaytaj Natán Davidpa ujnin wawan kasqanta willawanchej. Ujnin textotaj Lucas 3:31, chaytaj niwanchej Jesusqa Marianejta Natanpa mirayninmanta kasqanta. Chaykunata yachaspaqa, mayta tʼukunchej. Ichapis Jesús Davidpa mirayninmanta jamunan kasqanta yacharqanchejña (Mat. 22:42). Jinapis Davidpa wawasnenqa veintemanta astawan karqanku. Tukuy chay imasta yachaspaqa, profeta Zacariaspa nisqanta astawan sutʼita entiendenchej. w19.05 pág. 30 párr. 17

Bibliata sapa kuti estudiaspaqa, imatachus chaypi yachakusqanchejmanta mana iskayrayasunchu. Nillataj iskayrayasunchu, Diospa kamachiykunasnin mana pantayniyoj kasqanmanta. Ajinamanta creeypi “uj sachʼa jina sumaj saphichasqas, sayachisqastaj” kasunchej (Col. 2:6, 7). Creeypi sinchʼi sayasqa kanapajqa, sapa ujninchej kallpachakunanchej tiyan. Chayrayku yuyayninchejta pusan chay kallpata, mosojyachinallapuni. Jehovamanta atiyninta mana saykʼuspa mañakuna. Sumajta tʼukurina. Chantapis sonqonchejta yuyayninchejtawan sapa kuti qhawarikuna. Sumaj amigosta ajllana, nisunman pikunachus yuyayninchejta mosojyachinapaj yanapawasunchej, chaykunawan masichakuna. Chayta ruwaspaqa, Satanaspa mundonpa veneno jina yachachiykunasninwan, mana chimpachikusunchu. Astawanpis “pantasqa yuyaykunata, Diosmanta yachakuyta jarkʼaj yuyaykunatapis” thuñisun (2 Cor. 10:5). w19.06 pág. 13 párrs. 17, 18

Imaynatachus Rutqa Noemita yanapallarqapuni, ajinallatataj noqanchejpis viudo hermanosninchejta yanapanallanchejpuni tiyan (Rut 1:16, 17). Paulina nin: “Qosay wañupusqantawanqa, ashkhas sonqochaj jamuwarqanku. Tiemponmantaj tukuypa kausayninku kikillanpuni karqa. Noqaj kausayniyrí niña kikinchu karqa. Llakisqa kajkunaqa, killasta chayri watasta yanapanata necesitayku”, nispa. Familianchejmanta pillapis wañupojtin, mana tukuychu kikinta llakikunchej. Wakin viudosqa chayri viudasqa, sapanku kausayman yachaykukullanku. Wakintajrí warminkuwan chayri qosankuwan imatachus ruwaj kanku, chayta yuyarikuspa mayta sufrinku. Jehová Diosninchejqa viudosta viudastawan yanaparinanchejta niwanchej. Chayta ruwaytaj may sumajpuni. w19.06 pág. 24 párr. 16

Gobiernos Diosta yupaychajta niña saqewajtinchej, kayta yuyarikuna: “Uj tiempoqa tiyan chʼinyanapaj, uj tiempotaj parlanapaj” (Ecl. 3:7). Ama ni piman willanachu hermanosninchejpa sutisninkuta, maypichus tantakusqanchejta, imaynatachus predicasqanchejta, imaynatachus publicacionesta japʼisqanchejta ima. Chay imastaqa ama autoridadesman willanachu. Nillataj chayta willananchejchu tiyan, suyunchejpi chayri waj suyuspi kaj familiasninchejman, nitaj amigosninchejmanpis. Chayta ruwasunman chayqa, ichapis autoridadeswan hermanosninchejta japʼichisunman. Ama imapis tʼaqanachinawanchejta saqenachu. Satanasqa uj familiata phiñanachispa, tʼaqanachiyta atisqanta yachan (Mar. 3:24, 25). Chayrayku payqa, tʼaqanachinawanchejpaj tukuy imata ruwanqa. Satanasqa noqanchejpurata maqanachiyta munawanchej, paywan maqanakunamantaqa. Creeypi sinchʼi sayasqa cristianospis, Satanaspa trampanpi mana urmanankupaj sumajta qhawakunanku tiyan. Chayta ruwasun chayqa, qhatiykachasqa kajtinchej mana tʼaqanakusunchu (Col. 3:13, 14). w19.07 págs. 11, 12 párrs. 14-16

Ashkha kutispi, runasqa imaynatachus willasqanchejrayku uyariwanchej, manataj imatachus willasqanchejraykuchu. Runasqa paykunawan kʼachas kasqanchejta, sonqonkuta mana nanachisqanchejta, paykunamanta llakikusqanchejta ima sumajpaj qhawanku. Noqanchejqa mana runasta uyarinawanchejpaj obliganchejchu. Astawanpis imaraykuchus Diospi mana creesqankuta entiendenapaj kallpachakunchej. Imayna kajtinpis, chay runasta respetananchej tiyan. Apóstol Pablo jina ruwasunman. Payqa judiosman “Diosmanta Qhelqasqapi allinta tʼukurichispa” yachacherqa. Jinapis Areópago nisqapi, mana kikintachu Greciamanta yachayniyoj runaswan parlarqa. Pabloqa mana “Diosmanta Qhelqasqapi jinata nin” nispachu nerqa (Hech. 17:2, 3, 22-31). ¿Imatá Pablomanta yachakusunman? Bibliapi mana creej runawan parlashaspaqa, ichá mana “Biblia nin” nispachu ninanchej kanqa. Uj runa Bibliata leeshajta wajkuna rikunankuta pʼenqakun chaytaj, textosta pakayllamanta rikuchisunman, ichá uj celularpi chayri tabletapi. w19.07 pág. 21 párrs. 5, 6

Satanasqa israelitasta llulla dioskunata yupaychachinanpaj, sumajta yuyaychakorqa. Payqa yacharqa, israelitas mikhunankupaj llankʼananku kasqanta. Israelitasqa Sumaj Jallpʼaman yaykuspa, waj jinamanta chajrata ruwananku karqa. Egiptopi kashajtinkoqa, chajrasninkuta Nilo mayumanta yakuwan qarpaj kanku. Jinapis Sumaj Jallpʼapeqa mana chay jina jatun mayu karqachu. Chayrayku israelitasqa chhullata chayri paray tiempota suyakunanku karqa (Deu. 11:10-15; Isa. 18:4, 5). Paykunaqa jallpʼata waj jinasmanta llankʼananku karqa. ¿Imaraykutaj Jehová Dios chajrata ruwanamanta parlashaspa, israelitasman waj dioskunata mana yupaychanankuta nerqa? Israelitasqa chajrata mana ruwayta yachasqankurayku, ichapis muyuyninkupi kaj nacionesta tapukamuyta munankuman karqa. Jehová Diostaj chayta allinta yacharqa. Imaraykuchus cananeosqa chajrata ruwayta, Baal nisqa diosta yupaychaywan chajroj kanku (Núm. 25:3, 5; Jue. 2:13; 1 Rey. 18:18). w19.06 pág. 3 párrs. 4-6

Apóstol Pablowan, Silaswan, Lucaswan, Timoteowan ima, Romaj atiyninpi kaj Filipos llajtaman chayarqanku. Chaypitaj paykunaqa, repararqanku ashkha runas Diosmanta yachakuyta munasqankuta. Paykunaqa chay llajtapi uj congregacionta rikhuricherqanku. Chay llajtamanta cristianostaj, ichapis Lidiaj wasinpi tantakuyta qallarerqanku. Payqa wajyarikuyta yachajpuni (Hech. 16:40). Filipos llajtapi mosoj congregacionmanta hermanosqa, niraj imapi problemaspi rikukorqanku. Satanasqa cheqa kajman churanakoj runasta tanqarqa, Pablota compañerosnintawan mana predicajta saqenankupaj. Chay llajtamanta kamachejkunataj, Pablotawan Silastawan presocharqanku, varawan seqʼorqanku, carcelmantaj wisqʼaykorqanku, qʼayantintaj kachariporqanku. Chaymanta llojsimuytawantaj, Pablowan Silaswanqa mosoj cristianosta kallpacharej rerqanku. Chaymantataj Pablo, Silas, Timoteo ima, chay llajtamanta riporqanku, Lucastajrí chaypisina qhepakorqa. Filiposmanta mosoj cristianostaj, Diospa yanapayninwan payta sirvillarqankupuni (Fili. 2:12). Pabloqa chayta yachaspa mayta kusikorqa. w19.08 pág. 8 párrs. 1, 2

Ichapis manaraj unaychu waj lugarman ripunki. Waj ladoman ripunaqa ashkha qolqepaj kanman, manuchakusunmantaj. Chayrayku ama qhasita imatapis rantirpanallachu. Llakiypi kashaspaqa, mana yachasunmanchu mashkha qolqetachus manuchakunanchejta (Pro. 22:3). Uj llakeyqa kanman, familianchejmanta pillapis onqoykojtin. Chay jinapi rikukuspaqa, Jehová Diosmanta mañakuna, rogakunataj. Payqa imatapis sumaj yuyaywan ruwanapaj yanapawasun, sonqo tiyaykuytataj qowasun. Chaytaj sonqonchejta, yuyayninchejtawan waqaychanqa, imatapis allinta ruwanapaj (Fili. 4:6, 7; 1 Ped. 5:7). Sumaj amigosta maskʼana. Amigosninchejman imaynachus kashasqanchejta, imachus llakichiwasqanchejta ima willarina. Astawanqa pikunachus noqanchej jina llakiypi rikukorqanku, chaykunawan parlarina. Chayta ruwayqa mana anchata llakikunapaj yanapawasun (Ecl. 4:9, 10). Maypichus sirverqanchej chaypi amigosninchejqa, amigosnillanchejpuni kanqanku. w19.08 pág. 22 párrs. 9, 10

¿Imaraykutaj Jehová Dios jatun pʼunchayninpi guerramanta parlananpaj, Meguidó palabrata oqharerqa? Ñaupa tiempopi Meguidó llajtapi, qayllanpi kaj Jezreel vallepipis, ashkha guerras karqa. Chay guerrasmanta wakinpitaj, Jehová Diosqa llajtanta yanaparqa enemigosninta atipananpaj. Uj pacha, “Meguido yakus” qayllapi juez Baracta yanaparqa cananeo soldadosta atipananpaj. Chay soldadostataj Sísara kamachisharqa. Baracwan profetiza Deborawanqa, chay guerrapi atipasqankumanta Jehovaman agradecekorqanku. Chayrayku takerqanku: ‘Cielomantapacha chʼaskasqa Sisaraj contranpi maqanakorqanku’. “Tata Dios, tukuy enemigosniyki phirisqa kachunku, qanta munakusojkunataj kʼancharichunku, imaynatachus inti llojsimushaspa may sinchʼita kʼancharin, jinata”, nispa (Jue. 5:19-21, 31). Armagedón guerrapis kikillantaj kanqa. Jehová Diospa enemigosnin chinkachisqa kanqanku, payta munakojkunallataj salvakonqanku. Jinapis Armagedón guerraqa, Barac maqanakorqa chay guerrawan mana kikinchu. Diospa kamachisnenqa Armagedón guerrapi, mana maqanakonqankuchu, ni armasninkupis kanqachu. Astawanpis Jehovapi, cielomanta soldadosninpiwan “tukuy sonqo” atienekonqanku (Isa. 30:15; Apo. 19:11-15). w19.09 pág. 9 párrs. 4, 5

Jesusman qayllaykunchej, nisqasninta, ruwasqasninta ima yachakuspa (Luc. 1:1-4). Paypa kausayninmantaqa Bibliapi yachakusunman. Chaytataj mana pipis estudiapuwasunmanchu, manaqa noqanchejpuni estudiananchej tiyan. Jesusman qayllaykullanchejtaj, bautizakuspa, paypa discipulonmantaj tukuspa. Qayllaykullanchejtaj, ancianospa yanapayninkuta maskʼaspa. Jesusqa ancianosta “regalosta jina” qon, ovejitasninta qhawanankupaj (Efe. 4:7, 8, 11; Juan 21:16; 1 Ped. 5:1-3). Ancianosqa mana Jesús jinachu atiyniyoj kanku, imatachus yuyasqanchejta chayri necesitasqanchejta yachanankupaj. Chayrayku ancianospa yanapanta necesitaspaqa, noqanchej mañakunanchej tiyan. Julian sutiyoj hermano nin: “Ancianosta visitarinawankuta nerqani. Mayta kusikuni chayta ruwasqaymanta, imaraykuchus paykunaqa maytapuni kallpachawarqanku”, nispa. Hermanonchej Juliantaqa iskay ancianos visitarerqanku. Diosta munakoj ancianosqa, noqanchejtapis yanapawasunman Jesuspa yuyasqanta entiendenapaj, pay jina ruwanapaj ima (1 Cor. 2:16; 1 Ped. 2:21). Ancianos yanapawasqanchejqa, ima regalomantapis aswan sumaj. w19.09 pág. 21 párrs. 4, 5

Bibliaqa willawanchej, Diosqa ñaupa tiempopi wakin qharisman, warmisman ima atiyninta qosqanta. Jinapis paykunaqa mana 144.000 ajllasqa cristianosmantachu kanku. Chaykunamanta iskay kanku, Juan Bautista, David ima (Mat. 11:11; Hech. 2:34). Paykuna, jinallataj waj ashkha runaspis, kay jallpʼa paraisoña kajtin kausarimonqanku. Tukuyninkutaj, may chhika runasmanta kajkunawan khuska, Diosta munakusqankuta, Kamachejninkuta jinataj qhawasqankuta rikuchenqanku. Diosqa, ni jaykʼaj jina tukuy nacionesmanta ashkha runasta payta yupaychanankupaj tantashan. Cielopi chayri kay jallpʼapi kausakuyta suyakuspapis, tukuy atisqanchejta runasta yanapananchej tiyan, ‘waj ovejasmanta’ kanankupaj. Pisimantawan Diosqa manchay ñakʼariyta qallarichenqa. Chaypitaj tukuy gobiernosta, tukuy religionestawan chinkachenqa. Imajtinchus paykunaqa runasta ñakʼarichishanku. May chhika runasmanta kajkunataj, Diosta wiñaypaj kay jallpʼapi sirvenqanku (Apo. 7:14). w19.09 pág. 31 párrs. 18, 19

Satanaspa mundonpa tukukuynin qayllapiña kasqanrayku, runasqa tukuy imata ruwanqanku Diosta niña yupaychananchejpaj, Gobiernonta qhesachananchejpaj ima. Paykunaqa ichapis asipayallawasunpuni. Chaytataj ruwanqanku, mana kay mundoman satʼikusqanchejrayku. Manchay ñakʼariy tiempopi sinchʼita sayanapajqa, kunanña Jehovamanta sumajta japʼikunanchej tiyan. Manchay ñakʼariy tiempopeqa, waj hermanosñataj Diospa llajtanta ñaupajman pusanqanku. Imaraykuchus chay tiempopi, kay jallpʼallapiraj kaj ajllasqa cristianosqa, Armagedonpi maqanakunankupaj cieloman oqharisqa kanqanku. Jinapis mana yachanchejchu ima ratopunichus oqharisqa kanankuta (Mat. 24:31; Apo. 2:26, 27). Oqharisqa kajtinkutaj, Diospa Llajtanta Kamachejkunaqa manaña noqanchejwanchu kanqanku. Jinapis “may chhika” runasmanta kajkunaqa, sumaj organizasqallapuni kasunchej. Imaraykuchus waj ovejas ukhumanta sumaj wakichisqa hermanos, Diospa llajtanta ñaupajman pusanqanku. Paykunaqa Diospa kamachisqanta willawasunchej. Chay hermanosta yanapaspa, kasukuspataj, Diosta mana wasanchasqanchejta rikuchisun. Jatun ñakʼariymanta salvakunanchejqa, chay hermanosta kasukunanchejmanta kanqa. w19.10 pág. 17 párrs. 13, 14

Noemiqa Jehová Diosta munakorqa, tukuy sonqotaj payta sirverqa. Jinapis qosan, iskay qhari wawasnin ima wañupojtinku, sutinta Mara sutiman cambiakuyta munarqa. Chay suteqa, niyta munan “sinchʼi llakisqa chayri phiñasqa” (Rut 1:3, 5, 20, 21). Rutqa Noemij ujnin ñojchʼan karqa. Payqa suegran llakiykunapi kashajtin, mana saqerparerqachu. Rutqa Noemita mana yanaparillarqachu, manaqa parlasqanwanpis sonqocharqa. Payqa Noemita mayta munakusqanta nerqa, miskʼi palabraswantaj kallpacharqa. Viuda chayri viudo hermanosninchejqa, kallpachanata necesitanku. Qhariwarmi kausaytaqa, ladonpura wiñaj sachʼaswan kikinchasunman. Chay sachʼaspa saphisninkoqa, tiempowan astawan ujchaykukunku. Chayrayku ujnin sachʼata urmachejtinchej, ujnenqa chʼakipullantaj. Qhariwarmi kausaypis kikillantaj. Ujninku wañupojtin, ujnenqa sinchʼi llakisqa qhepakun. w19.06 pág. 23 párrs. 12, 13

Mana imaswanchus kusirikusqallanchejtachu ajllananchej tiyan. Mashkha unaytachus kusirikusqanchejtapis, qhawarikunallanchejtaj tiyan. Mana allinta qhawarikuspaqa, kusirikuyllapi tiemponchejta usuchisunman. Jehová Diosta yupaychanapajtaj niña tiemponchej kanmanchu. Ñaupajtaqa mashkha unaytachus kusirikusqanchejta yachana. Chaypajqa uj calendariopi anotakuna: mashkha horastachus teleta qhawasqanchejta, Internetman yaykusqanchejta, celularpi pujllasqanchejta ima. Chay imaspi ashkha tiempota usuchishanchej chayqa, uj horariota ruwakuna. Chay horariopeqa, imastachus ruwananchejpuni kasqanta ñaupajta anotana. Chaymantaraj kusirikunapaj tiempota tʼaqana. Chantá Jehová Diosmanta yanapata mañakuna chay anotakusqanchejman jina ruwanapaj. Ajinamanta tiemponchejpis kallpanchejpis kanqa: Bibliata sapallanchejpi estudianapaj, familianchejwan Diosta yupaychanapaj, tantakuykunapaj, predicanapaj, yachachimunapaj ima. Chantapis sonqonchejqa, uj rato kusirikusqanchejmanta mana juchachawasunchu. w19.10 pág. 30 párrs. 14, 16; pág. 31 párr. 17

Kay 55 wata chaynejta, Corinto llajtamanta hermanosqa Jerusalenmanta Judeamantawan hermanos, manchay llakiypi kashasqankuta uyarerqanku. Chayrayku chay hermanosta yanapanankupaj qolqeta tantanankuta nerqanku (1 Cor. 16:1; 2 Cor. 8:6). Jinapis killasninman jina, apóstol Pabloqa uyarisqa Corintomanta hermanos ni imata tantasqankuta. Kutinanpajtaj ichá mana wakichisqachu kankuman karqa. Apóstol Pablotaj yanapankuta mana apanmanchu karqa. Imaraykuchus congregacionespa yanapankutaqa pay Jerusalenman apanan karqa (2 Cor. 9:4, 5). Corintomanta hermanosqa, uj sumaj imata ruwayta munarqanku. Apóstol Pablotaj kʼachas kasqankumanta nerqa: ‘Sumajta ruwashankichej, creeyniykichejpis sinchʼi’, nispa. Jinapis paykunaman nillarqataj: “Ruwayta qallarisqaykichejta tukuchaychej”, nispa (2 Cor. 8:7, 10, 11). ¿Imatá chaymanta yachakusunman? Diosta tukuy sonqo yupaychaj cristianospis, imatachus ruwayta munasqankuta mana juntʼayta atillasqankuta. Pantaj runas kasqanchejrayku, imatapis qhepapaj saqeyman yachasqa kanchej. Chayrí mana suyashajtillanchej imapis kajtin, ruwayta munasqanchejta manallataj juntʼayta atinchejchu (Ecl. 9:12). w19.11 págs. 26, 27 párrs. 3-5

Soldadosqa escudonkuwan espadasmanta, flechasmantawan, casi tukuy cuerponkuta jarkʼakoj kanku. Ajinallatataj creeyninchejpis, kay mundoj sajra imasninmanta jarkʼawanchej. Chaykuna kanku: Khuchichakuy jucha, maqanakuykuna, Diospa kamachiykunasninpa contranpi kaj imaspiwan. Creeyninchej sinchʼi kajtenqa, maqanakunapaj wakichisqa kasunchej. Imaraykuchus cristianosqa supaykunawan maqanakupi jina kashanchej (Efe. 6:10-12). ¿Imatá ruwasunman ima llakiy jamunanpajpis creeyninchej sinchʼi kananpaj? Ñaupajtaqa Diospa yanapanta mañakuna. Chantá creeyninchej sinchʼichus, manachus kashasqanta yachanapaj, Diospa Palabranwan yanapachikuna (Heb. 4:12). Biblia niwanchej: “Tukuy sonqoykiwan Tata Diospi atienekuy; ama qampa yachasqallaykipeqa atienekuychu”, nispa (Pro. 3:5, 6). Pasaj killaspi, ¿chay versículos nisqanman jinachu imatapis kausayninchejpi ruwarqanchej? Qolqemanta pisisqas karqanchej chay, ¿imatachus Hebreos 13:5 nisqanta yuyarikorqanchejchu? Jehová Dios chaypi niwanchej: “Mana jaykʼajpis saqerparisqaykichu. Nitaj jaykʼajpis wijchʼurparisqaykichu”, nispa. Chay nisqanpi, ¿atienekorqanchejchu? Chayta ruwarqanchej chayqa, creeyninchej uj sumaj jarkʼakuna escudo jina kashan. w19.11 pág. 14 párrs. 1, 4

Tatamamasqa wawasninkupaj tiempochakunanku tiyan. Uj qhariwarmi qhepanpi qhepanpi wawasniyoj kankuman chayqa, mana sapa ujta sumajta atiendeyta atillankumanchu. Ashkha wawasniyoj kajkunaqa mayta saykʼusqankuta ninku. Ichapis uj mamaqa tukuy tiempo saykʼusqa kasqanrayku, mana atinmanchu Bibliata estudiayta, orakuyta, predicacionmanpis riyta. Chantapis ichá nillataj tantakuykunapi imatachus nikusqanta sumajta atiendeyta atinmanchu. Jinapis munakuyniyoj qosaqa, warminta yanapan wasinpi, reunionespipis wawasta qhawaysispa. Chantapis wasinpi ruwanaswan yanapan, familiapi Diosta yupaychanapaj tantakuytapis sapa semana ruwan. Chantá familianwan khuska predicacionman llojsillantaj. w19.12 pág. 24 párr. 8

¿Imaynatá israelitasta Kacharipuna Wata yanapaj? Sichus uj israelita manunta pagananpaj jallpʼanta vendej chayqa, Kacharipuna Watapi chay jallpʼanta watejmanta japʼikapoj. Ajinamanta jallpʼaqa, “pejpatachus karqa, chayman kutichipusqallataj” kaj. Chay israelitataj japʼikapusqan jallpʼata wawasninman herenciata jina saqeyta atej. Waj israelitamantañataj parlarina. Sichus chay israelita manunta pagananpaj wawanta chayri pay kikinta esclavo kananpaj vendekoj chayqa, Kacharipuna Watapi ‘familianman kutipuyta’ atej (Lev. 25:10). Ajinamanta ni pipis wiñaypaj esclavo kajchu. Jehová Dios nerqa: “Qankunaj chawpiykichejpi mana wajchas kanqankuchu, Señorniykichej Tata Diostaj sumajta bendecisonqachej, ima jallpʼatachus herenciata jina japʼikapunaykichejpaj qosunkichej, chaypi”, nispa (Deu. 15:4). Chaytaj kay tiempopi kausaywan ni imapi kikinchu. Imajtinchus qhapaj runasqa, astawan qhapajyanku. Pobrestajrí astawan wajchayanku. w19.12 págs. 8, 9 párrs. 3, 4

Jesusqa llakiykunapi kashaspa, Tatanmanta ‘qhapariywan waqaywantajʼ mañakorqa (Heb. 5:7). Sonqomantapacha mañakuspa, Jehová Diosllata kasukuyta munasqanta, payllatataj yupaychayta munasqanta rikucherqa. Jesuspa mañakuykunasnenqa, Jehová Diospaj inciensoj qʼapaynin jina karqa. Jesusqa kausayninpi tukuy ima ruwasqanwan, Tatallan Sumaj Kamachej kasqanta rikucherqa, paytataj kusicherqa. Noqanchejpis Jesús jina ruwasunman, Jehová Diospa leyesninta tukuy atisqanchejta kasukuspa, payllatataj yupaychaspa. Llakiykunapi kashaspaqa, Jehová Diosta kusichiyta munasqanchejrayku paymanta yanapata mañakunchej. Jehová Diospa chejnisqan imasta ruwasun chayqa, payqa mañakuykunasninchejta mana uyariwasunchu. Paypa munayninman jina kausakusun chayrí, mañakuykunasninchejqa inciensoj sumaj qʼapaynin jina kanqa. Jehová Diosllata yupaychasun, kasukusuntaj chayqa, payqa mayta kusikonqa. w19.11 págs. 21, 22 párrs. 7, 8

Kay 1919 watapi, Jesusqa uj juchʼuy grupo ajllasqa cristianosta “allin kamachi yuyayniyoj” kanankupaj churarqa. Chay allin kamacheqa predicacionta ñaupajman apashan, Jesuspa yachachisqasninmantaj maychus “tiemponpi mikhunata” qoshan. Satanaswan sajra mundonwanqa, tukuy imata ruwanku allin kamachi yuyayniyojpa llankʼayninta sayachinankupaj. Manachus Jehová Dios chay allin kamachita yanapanman karqa chayqa, llankʼayninta manapuni juntʼayta atinmanchu karqa. ¿Imaraykutaj chayta ninchej? Mundontinpeqa iskay jatuchaj guerras karqa, tukuynejpitaj qolqe pisiyarqa. Chantapis runasqa, Diospa llajtanta qhasillamanta ñakʼaricherqanku, mana khuyarispataj qhatiykacharqanku. Tukuy chay imas kajtinpis, allin kamachi yuyayniyojqa Jesuspa yachachisqasninman maychus tiemponpi mikhunata qoshallanpuni. Chayrayku may chhika publicaciones kapuwanchej, 900 kuraj parlaykunapi, manataj vendenapajchu. Chayqa rikuchiwanchej, allin kamachi yuyayniyojta Jehová Dios allinpaj qhawasqanta. Predicacionpipis Jehová Diospa bendicionnin rikukullantaj. Imaraykuchus ‘sumaj willaykunaqa jallpʼantinpi willakushanʼ (Mat. 24:14). w19.11 pág. 24 párrs. 15, 16

Perdonta tarina pʼunchaypi kuraj kaj sacerdoteqa Diosman jaywanasta niraj qoshaspa inciensotaraj qʼoshñichej. Ajinamanta yachaj Jehová Dios payta allinpaj qhawasqanta. Jesusqa kay jallpʼapi kashaspa, niraj kausayninta noqanchejrayku qoshaspa uj imataraj ruwanan karqa. Chaytaj runasta salvananmanta nisqasqa aswan ñaupajpi kasharqa. Jehová Dios Jesuspa wañuyninta allinpaj qhawananpajqa, Jesusqa tukuy imapi kasukunan karqa. Ajinamanta Jesusqa rikucherqa Jehová Diospa munayninman jina kausakuy allinpuni kasqanta. Chantapis kausayninwan rikuchillarqataj, Jehová Dioslla Sumaj Kamachej kasqanta. Jesusqa kay jallpʼapi kashaspa, tukuy imapi Jehová Diosta kasukorqa. Payqa juchaman tanqasqa karqa, imaymana llakiypitaj rikukorqa. Jinapis Jesusqa Tatallan Sumaj Kamachej kasqanta rikuchiyta munarqa (Fili. 2:8). w19.11 pág. 21 párrs. 6, 7

Jesusqa kay jallpʼapi runasman yachachishaspa, ashkha llakiykunapi rikukorqa. Jinapis apostolesnenqa sumaj amigosnin jina ladonpi kasharqanku (Pro. 18:24). Jesusqa apostolesninta mayta munakorqa. Chay tiempopi Jesuspa hermanosnenqa, niraj paypi creerqankuchu (Juan 7:3-5). Uj kutipi, familiaresnenqa Jesús locoyapusqanta nerqanku (Mar. 3:21). Chayrayku Jesusqa wañuchinankupaj uj chʼisi faltashajtin kay pʼunchaypaj textoj nisqanta apostolesninman nerqa. Wakin kutisqa Jesusta apostolesnin phiñacherqanku. Jinapis Jesusqa mana pantasqankutachu qhawarqa, manaqa paypi sinchʼita creesqankuta (Mat. 26:40; Mar. 10:13, 14; Juan 6:66-69). Chayrayku wañupunanpaj uj chʼisi kashajtin, paykunaman nerqa: “Noqatajrí amigosníy niykichej, imaraykuchus Tataypa tukuy ima niwasqanta rejsichiykichej”, nispa (Juan 15:15). Jesustaqa amigosnin mayta kallpacharqanku. w19.04 pág. 11 párrs. 11, 12

¿Imaynatá uj cristiano yachan cieloman rinanpaj ajllasqa kasqanta? Imatachus apóstol Pablo Romapi cristianosman nisqanta qhawarina. Payqa chay cristianosman nerqa: ‘Diospaj tʼaqasqa kanaykichejpaj wajyasqas kankichej’, nispa. Kay diapaj textota nisqantapis nillarqataj. Chantá kayta nerqa: “Qankunaqa mana esclavo kanaykichejpajchu Diospa atiyninta japʼerqankichej, nitaj ujtawan manchachikunaykichejpajchu. Astawanqa chay atiynejta Diosqa wawasninpaj rejsikapusorqachej. Chayraykutaj tukuy sonqo ninchej: “¡Abba, Tatáy!”, nispa (Rom. 1:7; 8:15). Jehová Diosqa ajllasqa cristianosman atiyninnejta sutʼita rikuchin, cieloman rinankupaj wajyasqa kasqankuta (1 Tes. 2:12). ¿Ajllasqa cristianos cieloman rinankupaj wajyasqa kasqankumanta iskayrayankuchu? Mana. Imaraykuchus Jehová Dios chay yuyayta paykunaj sonqonkuman churan (1 Juan 2:20, 27). Ajllasqa cristianosqa, mana necesitankuchu, pillapis paykunaman “ajllasqa kanki” nispa ninanta. w20.01 pág. 22 párrs. 7, 8

Cristoj leynenqa sumaj cimientoyoj wasi jina. Chay cimientotaj munakuy kashan (Gál. 6:2). Jesusqa runasta munakusqanrayku tukuy imata ruwarqa. Payqa runasta munakusqanrayku, wajkunata khuyakorqa. Chayrayku yachacherqa, onqosqasta sanoyacherqa, yarqhasqasta mikhucherqa, wañusqastapis kausaricherqa (Mat. 14:14; 15:32-38; Mar. 6:34; Luc. 7:11-15). Jesusqa wajkunaj allinninkuta maskʼarqa. Mayta munakuwasqanchejraykutaj, kausayninta noqanchejrayku qorqa. Noqanchejqa Jesús jina ruwasunman wajkunaj allinninkuta ñaupajman churaspa. Chantapis predicanchej chay runasmanta, pay jinallataj khuyakusunman. Runasta khuyakusqanchejrayku predicaspa, yachachispa imaqa, Cristoj leyninta juntʼashanchej. w19.05 pág. 4 párrs. 8-10

Jesusqa runasta yanaparqa pantasqa yachachiykunamanta kacharichikunankupaj. Chay tiempopi judiospa religionninkuta kamachejkunaqa, ñaupa tataspa costumbresninkuta, pantasqa yachachiykunata ima, runasman yachachej kanku. Chay runastaj, chay yachachiykunaj esclavosnin jina karqanku (Mat. 5:31-37; 15:1-11). Judiospa religionninkuta kamachejkunaqa, runasta Diosta sirvinankupaj yanapashasqankuta nej kanku. Jinapis ni paykunapis Diosta munayninman jinachu sirvisharqanku. Ciegos jina kasharqanku. Chantapis paykunaqa, Mesiasta, yachachiyninta ima qhesacharqanku. Chayrayku ciegos jinallapuni kasharqanku, nitaj juchasninkumantapis perdonasqachu karqanku (Juan 9:1, 14-16, 35-41). Jesustajrí cheqa kajta yachacherqa, chayman jinataj kausarqa. Ajinamanta llampʼu sonqo runasta yanaparqa, pantasqa yachachiykunamanta kacharichikunankupaj (Mar. 1:22; 2:23–3:5). Chantapis juchamanta kacharichinawanchejpaj kausayninta qorqa. Chayrayku Diosqa, Jesucristoj wañuyninpi creejtinchej, chaytataj ruwasqanchejwan rikuchejtinchej, juchasninchejta perdonawanchej (Heb. 10:12-18). w19.12 pág. 10 párr. 8; pág. 11 párrs. 10, 11

Diosqa ajllasqa cristianosman atiyninnejta sutʼita rikuchin, paykunata ajllasqanta. Chay atiytaj paykunapaj uj “garantía jina” cielopi wiñay kausayta japʼinankumanta (2 Cor. 1:21, 22). Uj cristiano ajllasqa kajtin, ¿nisunmanchu cielopi wiñay kausayta japʼinantapuni? Mana. Chay cristianoqa cieloman rinanpaj wajyasqa kasqanta sutʼita yachan. Chaywanpis mana qonqananchu tiyan imatachus apóstol Pedro nisqanta. Pay nerqa: “Hermanos, astawanraj kallpachakuychej wajyasqas, ajllasqastaj kasqaykichejmanta sumajta japʼikunaykichejpaj. Chay imastachus ruwallankichejpuni chayqa, ni jaykʼaj urmankichejchu”, nispa (2 Ped. 1:10). Uj cristiano cieloman rinanpaj ajllasqa kajtinpis, wañupunankama cheqa sonqo kajtillan cielopi wiñay kausayta japʼenqa (Fili. 3:12-14; Heb. 3:1; Apo. 2:10). w20.01 pág. 21 párrs. 5, 6

¿Imaraykutaj kinsa amigosnin Jobmanta mana khuyakorqankuchu? Paykunaqa mana Jobpa llakiyninta entienderqankuchu. Chayraykutaj Jobmanta pantasqata parlarqanku, mana khuyakuspataj juchacharqanku. ¿Imatataj ruwasunman mana paykuna jina kanapaj? Ñaupajtaqa yuyarikuna Dioslla sapa runaj llakiyninta sumajta yachasqanta. Chantá hermanonchej llakiyninta willariwajtinchej, sumajta uyarina. Llakiyninta llakiyninchejta jina qhawana. Chayta ruwaspaqa, hermanonchejmanta tukuy sonqo llakikusqanchejta rikuchisun. Llakisqa hermanonchejmanta khuyakuspaqa, mana problemasninta wajkunaman cuentasunchu. Cuento qʼepi kajkunaqa hermanosta tʼaqanachinku, nitaj congregacionta kallpachankuchu (Pro. 20:19; Rom. 14:19). Chay jina runasqa, llakisqa kajpa sonqonta nanachinku (Efe. 4:31, 32). Chayrayku llakisqa hermanonchejpa allin ruwasqasninta astawan qhawana. Piensarinataj imaynatachus payta llakiyninpi yanaparinata. w19.06 págs. 21, 22 párrs. 8, 9