Abril

Aristarcoqa Macedoniapi kaj Tesalónica llajtamanta cristiano karqa. Payqa Pabloj sumaj amigon kasqanta rikucherqa. Bibliaqa Aristarcomanta parlayta qallarin, Pablo Éfeso llajtaman visitaj chayasqanmantapacha. Chaypacha Pabloqa kinsa kaj kutipi misionero jina viajasharqa. Aristarcotaj chay kutipi acompañasharqa. Chay llajtamanta runastaj payta presocharqanku (Hech. 19:29). Chanta kachariporqanku. Waj ladoman ripunanmantaqa, Pablowan khuska qhepakorqa. Killasninmantaj, Aristarcoqa Pablowan khuska Greciaman rerqa. Chaypitaj Pablotaqa enemigosnin wañuchiyta munarqanku. Chay kutipipis, Aristarcoqa nipuni Pablota saqerparqachu (Hech. 20:2-4). Chantá 58 watapi Pablota Romaman presochasqata apashajtinku, Aristarcoqa paywan khuska rerqa. Chayman rishajtinkutaj barconkoqa yakuman chinkaykorqa (Hech. 27:1, 2, 41). Romaman chayasqankutawan, Aristarcoqa Pablowan khuskasina uj tiempota carcelpi karqa (Col. 4:10). Pabloqa Aristarco mana saqerparisqanrayku, maytachá kallpachakorqa. Noqanchejpis hermanosninchejpaj, Aristarco jina sumaj amigos kasunman. Chaypajtaj mana tukuy ima allin kajtillanchu paykunawan khuska kananchej tiyan, manaqa llakiykuna kajtinpis. w20.01 pág. 9 párrs. 4, 5

Uj ajllasqa cristianoqa ichá ninman: “Pitaj kasqani cielopi Jesuswan khuska gobernamunaypajri”, nispa. Jinapis ni tumpitallatapis iskayrayanchu Dios payta ajllasqanmanta. Astawanpis mayta kusikun cielopi kausakuyta suyakushasqanpi piensarispa (1 Ped. 1:3, 4). Ajllasqa cristianos cielopi kausakuyta mayta suyakusqankurayku, ¿wañupullaytañachu munanku? Pabloqa ajllasqa cristianospa aycha cuerponkuta uj wasiwan kikincharqa, nerqataj: “Kay wasipi kashaspaqa, sinchʼi llakiykunasniyoj kanchej, phutiytataj waqanchej. Chaytataj ruwanchej, mana kay wasita saqeyta munaspachu, manachayqa cielopi kaj wasita japʼiyta munaspa. Ajinamanta wiñay kausay, wañoj cuerpota chinkachinanpaj”, nispa (2 Cor. 5:4). Ajllasqa cristianosqa mana wañurishankuchu wañunankumanta. Astawanpis kay jallpʼapi kausakuspa mayta kusikunku. Chantapis familiankuwan amigosninkuwan khuska, Diosta tukuy atisqankuta sirviyta munanku. Jinapis cielopi premionkumanta mana qonqakunkuchu (1 Cor. 15:53; 2 Ped. 1:4; 1 Juan 3:2, 3). w20.01 pág. 23 párrs. 12, 13

Munakuyniyoj Jehovaqa, pantajtinchej cheqanchawanchej. Wakin kutisqa Palabranta leespa chayri reunionpi yachachikusqanta uyarispa, imallapipis pantashasqanchejta reparakunchej. Wakin kutistaj uj anciano chayta reparachiwanchej. Diosninchejqa, munakuwasqanchejrayku ajinata yachachiwanchej (Jer. 30:11). Jehovaqa llakiykunata aguantanapaj yanapawanchej. Papasunchejqa munakuwasqanchejrayku, llakiypi kajtinchej yanapawanchej. Ajinallatataj Tatanchej Jehovapis, llakiykunata aguantanapaj yanapawanchej. Atiyninwan yanapawanchej, paymanta mana karunchakunanchejpaj (Luc. 11:13). Yanapallawanchejtaj, llakisqa kashajtinchej. Payqa aswan qhepaman sumaj kausayta qonawanchejta niwanchej. Chayta yachaytaj ima llakiyta aguantanapajpis yanapawanchej. Chantapis kaypi piensarina: Munakuyniyoj Tatanchejqa, mosoj mundopi tukuy llakiykunasninchejta chinkachinanta niwanchej. Kay tiempopi ima llakiyninchejpis uj tiempollapaj kanqa. Diospa bendicionesnintajrí wiñaypaj kanqa (2 Cor. 4:16-18). w20.02 págs. 5, 6 párrs. 14, 15

Tukuypis envidiata sonqonchejmanta orqhoyta atinchej. Josej hermanosninmanta parlarina. Paykunaqa Joseta vendesqankumanta allin unayninman, paywan Egiptopi tinkorqanku. Josetaj mana chay ratochu paykunawan rejsichikorqa. Hermanosnin cambiasqankutachus manachus yachayta munaspa, paykunata wasinman wajyacherqa. Chaypitaj Joseqa, sullkʼa hermanon Benjaminman aswan yapasqata mikhunata jaywacherqa (Gén. 43:33, 34). Hermanosnintaj Benjaminmanta mana envidiakorqankuchu. Astawanpis payta, tatankutawan munakusqankuta rikucherqanku. Ajinapi Joseqa hermanosnin cambiasqankuta yacharqa (Gén. 44:30-34). Paykunaqa envidiata sonqonkumanta orqhorqanku. Ajinamantataj familiankuta yanaparqanku watejmanta kusisqa kausakunankupaj (Gén. 45:4, 15). Envidiakuyta sonqonchejmanta orqhosun chayqa, familianchejwan, congregacionmanta hermanoswanpis, allinta kausakusun. Jehová Diosqa mana munanchu wajkunamanta envidiakunanchejta. Astawanpis tukuywan allinta kausakunanchejta munan. Kʼumuykukoj sonqo kasun, agradecekuyta yachasun, kapuwasqanchejwantaj kusisqa kausakusun chayqa, mana wajkunamanta envidiakusunchu. w20.02 pág. 19 párrs. 17, 18

Jehová Dios munakususqanmanta agradecekunaykipajqa, paywan tukuy sonqo parlariy. Jehová Diosman llakiyniykita willakuy, qanrayku imastachus ruwasqanmantapis agradecekuy. Chayta ruwaspaqa, payta astawan munakunki. Mañakusqaykita uyarisqanta reparaspataj, Jehová Diosman astawan kʼaskaykunki. Chantapis reparanki, payqa imaynachus kashasqaykita sumajta yachasqanta. Jinapis Jehová Diosman astawan qayllaykunaykipajqa, paypa yuyayninta, imatachus ruwanaykita munasqantawan entiendenayki tiyan. Chaytataj Bibliata estudiaspalla yachawaj. Jehová Diospa Palabranta jatunpaj qhaway. Bibliallapi Jehová Diosmanta cheqa kajta yachakunchej, jinallataj imatachus noqanchejpaj munasqantapis. Chayrayku Bibliata sapa día leey, yachachej jamusunku chay diapaj wakichikuy, yachakusqaykiman jinataj kausakuy. Chay imasta ruwaspaqa, Bibliata jatunpaj qhawasqaykita rikuchinki (Sal. 119:97, 99; Juan 17:17). Bibliata leenaykipaj, ¿uj horario kapusunkiñachu? Jina kajtin, chayman jina leenaykipaj kallpachakuy. w20.03 pág. 5 párrs. 8, 9

Manaña purikuyta atinchejchu chayqa, maypichus ashkha runas purinku chaypi tiyarikusunman. Ajinamanta chaynejta pasajkunaman Diosmanta willanapaj. Manachayrí telefononejta, cartasnejta chayri mayllapipis kashaspa predicasunman. Ashkha hermanos ajinata predicaspa mayta kusikunku. Rikunchej jina, onqosqa kaspapis Diospaj llankʼayninchejta allinta juntʼayta atisunman. Apóstol Pablo nerqa: “Tukuy imapaj kallpayoj kani, Dios atiyta qowasqanrayku”, nispa (Fili. 4:13). Apóstol Pabloqa ujnin viajenpi onqoykorqa. Chay kutipitaj Diospa atiyninta necesitarqa. Payqa Galacia llajtamanta hermanosman nerqa: “Onqoykusqayrayku sumaj willaykunata ñaupaj kutipi willarqaykichej”, nispa (Gál. 4:13). Noqanchejpis onqosqa kaspaqa, doctoresman, enfermerasman, chaypi trabajkunaman ima predicasunman. Paykunamanta ashkhasta, predicashaspa mana wasinkupi taripanchejchu. w19.04 págs. 4, 5 párrs. 10, 11

Ashkha lugarespi, gobiernosqa Jehovata yupaychajta mana saqewanchejchu, chayri wakin imasllata ruwajta saqewanchej. Kay 2018 watapi, 223 mil hermanosmanta astawan chay lugarespi karqanku. Chaytaj mana tʼukunapajchu. Noqanchejqa runas qhatiykachanawanchejta yachanchej. Maypi tiyakojtinchejpis, autoridadesqa ima ratollapis niña predicajta, nitaj tantakojtapis saqewasunmanchu. Autoridades Jehová Diosta yupaychajta jarkʼawajtinchej, ichá yuyasunman pay manaña bendecishawasqanchejta. Jinapis ama ajinata yuyanachu. Apóstol Pablopi piensarina. Paytaqa Jehová Dios allinpaj qhawarqa. Chantapis Pabloqa mana judío kajkunaman kachasqa apóstol karqa, 14 cartastataj Mosoj Testamentomanta qhelqarqa. Jina kajtinpis, ashkhas payta qhatiykacharqanku (2 Cor. 11:23-27). ¿Imatá Pabloj kausayninmanta yachakunchej? Jehová Diosqa wakin kutis runasta saqen, paypa kamachisninta qhatiykachanankuta. w19.07 pág. 8 párrs. 1, 3

Cristianosqa Satanaswan supaykunasninwan ima, maqanakupi jina kashanchej. Jehová Diostaj munakuwasqanchejrayku, mana sapanchejtachu saqerpariwanchej. Payqa willawanchej supaykuna atiyniyoj kasqankuta. Paykunaman sinchʼita sayaykunapajtaj, imatachus necesitasqanchejta qowanchej (Efe. 6:10-13). Jehovawan yanapachikuspa, tukuy sonqotaj paypi atienekuspaqa, Diabloj contranpi sinchʼita sayasun. Noqanchejqa apóstol Pablo jina ninchej: “Dios noqanchejman kutisqa kashan chayqa, ¿pitaj contranchejpi sayayta atinmanri?”, nispa (Rom. 8:31). Cristianosqa mana wañurishanchejchu Satanasmanta demoniosninmantawan yachaymanta. Imajtinchus Jehová Diosta sirviyta munasqanchejrayku, paymanta astawan yachakuyta munanchej (Sal. 25:5). Jinapis Satanaswan mana engañachikunapajqa, imastachus ruwasqanta yachananchej tiyan (2 Cor. 2:11). w19.04 pág. 20 párrs. 1, 2

Uj hermano chayri uj hermana llakiyninta willariwajtinchej, sumajtapuni uyarinanchej tiyan. Chantapis sumajta yuyaycharikuspa imallatapis nirisunman. Ichapis nisunman: “Llakichiwanki hermanáy, imaynatá chayta ruwasonqankuri”, nispa. Chantá imatachus willarishawasqanchejta sumajta entiendenapaj, kʼachallamanta tapurisunman. Miskʼi simiwan uj mashkha palabrasta nejtinchej, llakisqa kajqa sumajta uyarisqanchejta yachanqa. Reparanqataj munakusqanchejta, llakiynintapis entiendeyta munasqanchejta (1 Cor. 13:4, 7). Pipis llakiyninta willarishawajtinchejqa, mana ‘usqhayllata parlanachu tiyan’. Parlashajtenqa ama pantachinachu, nitaj yuyaychanapachachu. Amataj chay rato ninachu imatachus ruwananta, manaqa paymanta khuyakuna (1 Ped. 3:8). w19.05 págs. 17, 18 párrs. 15-17

Familia ukhupi, qosasqa warminkuta munakunanku tiyan, “imaynatachus Cristopis congregacionta munakorqa, ajinata” (Efe. 5: 28, 29). Chay jina munakuyniyoj qosaqa, warminpa allinninta ñaupajta maskʼan. Jinapis wakin qosasqa, mana chayta ruwayta atillankuchu. Imaraykuchus maypichus wiñakorqanku chaypi, ichapis runasqa wajkunata kʼumuykachachiyman yachasqa kanku, nitaj piwanpis kʼachachu kanku. Ajinapi uywasqa qosaspis, Cristoj leyninta juntʼanankupaj cambiananku tiyan. Wajkunata Jesús jina munakoj qosaqa, warminpa respetonta ganakun. Tataspis wawasninkuta mayta munakunku chayqa, ni parlasqankuwanpis, ni ruwasqankuwanpis wawasninkoj sonqonkuta nanachinkuchu (Efe. 4:31). Astawanpis wawasninku kusisqa wiñakunankupaj, paykunaman ninku munakusqankuta, allinpaj qhawasqankuta ima. Ajinata ruwajtinku, wawasninkoqa paykunata munakonqanku, paykunaj yanapayninkutataj maskʼanqanku. w19.05 pág. 6 párr. 21

¿Imatá María yuyanman karqa ángel Gabriel imatachus nisqanta uyarispa? ¿Yuyanmanchu karqa Jesús Herodespa cuentanmanta chayri ujnin wawanpa cuentanmanta rey kananta? Chayrí, ¿ninmanchu karqa: “Kunanqa uj reypa maman kasaj, familiaypis reypa wasinpi tiyakonqanku”, nispa? Bibliapi ni maypi ninchu, María chayta ángel Gabrielman nisqanta. Nillataj ninchu María Diospa Gobiernonpi uj sumaj lugarta mañakusqanta. Mariaqa manchay llampʼu sonqo warmipuni karqa. Diospa Palabranta, publicacionesta ima estudianchej, Jehová Diosman astawan kʼaskaykunapaj. Jinapis estudiashaspaqa, imayna runaschus kasqanchejtapis reparakunallataj tiyan. Ajinamanta Dios allinpaj qhawanawanchejpaj, imatachus cambiananchej kasqanta yachasun (Sant. 1:22-25; 4:8). Chayrayku niraj estudiashaspa, Jehová Diosninchejmanta atiyninta mañakuna. Chantapis paymanta rogakunallataj, estudiasqanchej yanapanawanchejpaj, imapichus cambiananchejta reparachinawanchejpaj ima. w19.05 págs. 30, 31 párrs. 18, 19

Wakin kutisqa ashkha problemas ujllapi qhatiriwasunman. Wakin hermanosninchejpa llakiykunasninkumanta parlarina. Juan sutiyoj hermanonchejqa, esclerosis múltiple nisqa onqoyniyoj. Señoran saqerparejtin, payqa sonqo pʼakisqa qhepakorqa. Paykunaqa 19 watasta casarasqas karqanku. Chantá iskay warmi wawasnin Jehová Diosta wasancharqanku. Hermanonchej Robertowan señoran Lindawantaj, waj jina llakiykunapi rikukorqanku. Iskayninku mana trabajoyoj qhepakorqanku, wasinkutapis pierderqanku. Chantá doctoresqa, hermananchej Lindaman nisqanku corazonninmanta onqosqa kasqanta, chay onqoytaj wañuchiyta atisqanta. Chantá nillasqankutaj, cuerponqa onqoykunamanta manaña jarkʼayta atisqanta. Munakuyniyoj Tatanchej Jehovaqa, ruwawasqanchejrayku llakiykunasninchejta sumajta yachan, yanapaytataj munawanchej (Fili. 4:6, 7). Bibliaqa parlan, Diospa kamachisnin llakiykunapi kasqankumanta, imaynatachus Jehová Dios paykunata yanapasqanmanta ima. w19.06 pág. 14 párrs. 2, 3

Manaña qosayojchu chayri niña warmiyojchu kajkunaqa, sumaj amigosniyoj kayta necesitanku. ¿Imaynatá paykunata munakusqanchejta rikuchisunman? Imitallatapis paykunapaj ruwapuspa. Ichapis mikhurinapaj wasinchejman wajyarisunman, khuska imallatapis ruwanapaj invitarisunman chayri paykunawan predicaj llojsisunman. Familiapi Diosta yupaychanapaj tantakuyninchejmanpis wajyarisunman. Chay imasta ruwaspaqa, Jehová Diosninchejta kusichisunchej. Imajtinchus payqa sonqo pʼakisqa kajkunaj qayllanpi kashan, “viudasmantaj kutikun” (Sal 68:5; 147:3). Tumpamantawanqa Diospa Gobiernon kay jallpʼata kamachenqa, tukuy llakiykunasninchejtataj qonqapusun. Chay pʼunchay chayamunanta mayta suyakushanchej, maypachachus kay llakiy kausay “qonqasqa kanqa, manapunitaj yuyarisqachu kanqa”, chayta (Isa. 65:16, 17). Chay tiempo chayamunankama purajmanta yanapanakuna. Hermanosninchejwan uj familia jina kasqanchejrayku, munanakusqanchejta parlasqanchejwantaj, ruwasqanchejwantaj rikuchina (1 Ped. 3:8). w19.06 pág. 25 párrs. 18, 19

Pasaj wataspi La Atalaya revista nerqa: “Diosta sumajta rejsej runaqa, ima pruebapi kaspapis Jehovapi atienekonqa”, nispa. Chayqa ajinapuni. Sinchʼita sayanapajqa, Jehová Diosta munakuna, paypitaj tukuy sonqo atienekuna (Mat. 22:36-38; Sant. 5:11). Jehová Diosman kʼaskakunapaj Bibliata sapa día leena (Sant. 4:8). Bibliata leeshaspaqa, imastachus Diosninchej nisqanta, ruwasqanta ima reparana. Ajinamanta yachasun munakuyniyoj, khuyakuyniyoj, kʼachataj kasqanta (Éxo. 34:6). Wakin runasqa mana creeyta atillankuchu Diosninchej paykunata munakusqanta, paykunata ni pi munakusqanrayku. Ajinata yuyanchej chayqa, sapa día uj listata ruwana Diosninchej khuyakuwasqanchejmanta, noqanchejwan kʼacha kasqanmanta ima (Sal. 78:38, 39; Rom. 8:32). Kausayninchejpi, Bibliata leesqanchejpiwan tʼukurisun chayqa, chay listapi ashkha imasta anotayta atisun. Jehová Diosninchej imastachus noqanchejpaj ruwasqanta jatunpaj qhawasun chayqa, payman astawan kʼaskaykusun (Sal. 116:1, 2). w19.07 págs. 2, 3 párrs. 4, 5

Jehová Diosqa mana ni piman atiyta qonchu, wajkunapaj kamachiykunata churananpaj. Kamachiykunata qhasita churajkunaqa, mana hermanosta yanapankuchu. Astawanqa creeyninkumanta patrones jina kanku. Kuraj Supayqa, Jehovata sirvisqanchejrayku qhatiykachawasunpuni (1 Ped. 5:8; Apo. 2:10). Satanaswan paypa atiyninpi kajkunawanqa, Jehovata niña yupaychananchejpaj tukuy imata ruwanqanku. Jinapis ama manchariywan atipachikunachu (Deu. 7:21). Jehová Diosqa noqanchejwan kashan. Autoridades niña predicajta, nitaj tantakojta saqewajtinchejpis, pay yanapawasun (2 Cró. 32:7, 8). Ñaupa tiempomanta hermanosninchej jina ruwana. Paykunaqa chay tiempomanta kamachejkunaman nerqanku: “Qankunaña qhawariychej, Diospa ñaupaqenpi qankunata kasukunaykuchus chayri Diosta kasukunaykuchus aswan allin kasqanta. Noqaykoqa mana chʼinlla kayta atiykumanchu, willanaykupuni tiyan imastachus rikusqaykuta, uyarisqaykutapis”, nispa (Hech. 4:19, 20). w19.07 pág. 13 párrs. 18-20

Predicashaspaqa, runas imaraykuchus uj jinata yuyasqankuta entiendenapaj kallpachakuna. Apóstol Pabloqa, judío kaspapis, mana judío kajkunaman predicanan karqa. Paykunaqa Jehová Diosmanta, Palabranmantawan pisita chayri ni imata yacharqankuchu. Pablotaj chayman jina predicananpaj kallpachakunan karqa. Noqanchejpis runasta entiendenapaj kallpachakunanchej tiyan. Chaypajtaj chay runasmanta publicacionespi astawan maskʼasunman (1 Cor. 9:20-23). Noqanchejqa allin sonqoyoj runasta tariyta munanchej (Mat. 10:11). Chaypajtaj wasiyojta parlarejta saqena, sumajtataj uyarina. Inglaterra suyumanta uj hermanonchej, runaswan kay imasmanta parlariyta qallarin: imachus qhariwarmista kusisqa kausakunankupaj yanapasqanmanta, imaynatachus wawasta uywanamanta, imaynatachus sajra ruwaykunata aguantanamanta ima. Chantá wasiyojta parlarejta saqeytawan, payqa niyta yachan: “Kay yuyaychay casi 2 mil watas ñaupajtaña qhelqakorqa. ¿Chaysituta leeripuykimanchu?”, nispa. Chantá mana reparayllata celularninpi wakin textosta leeripun. w19.07 págs. 21, 22 párrs. 7, 8

¿Jehová Diosta tumpallatachu munakunanchej tiyan? Jesús uj fariseoman nerqa: “Jehová Diosniykitaqa munakunayki tiyan tukuy sonqoykiwan, tukuy kausayniykiwan, tukuy yuyayniykiwantaj”, nispa (Mat. 22:36, 37). Jehová Diosninchejtaqa tukuy sonqo munakunanchej tiyan. Chay munakuyninchejtataj sapa día wiñachinanchej tiyan. Jehová Diosta munakunanchejpajqa, payta rejsinanchej tiyan. Biblia nin: “Wajkunata mana munakojqa mana Diosta rejsinchu, imaraykuchus Diosqa munakuymin”, nispa (1 Juan 4:8). Apóstol Pablo nerqa, Jehová Diosmanta astawan yachakojtinchej, pay jinataj imatapis ‘sumajta reparayta’ yachajtinchej, payta astawan munakunanchejta (Fili. 1:9). Bibliata estudiayta qallarishaspaqa, Jehová Diosmanta wakin imasta yachakorqanchej. Chaytaj payta munakunapaj yanapawarqanchej. Jehová Diosta astawan rejsispataj, payta astawan munakorqanchej. Chayrayku Bibliata sumajta estudiayqa, chaypitaj tʼukureyqa may sumajpuni (Fili. 2:16). w19.08 pág. 9 párrs. 4, 5

Maypichus sirvishanchej chaypi mosoj amigosta ruwakunanchej tiyan. Chaypajqa noqanchej paykunaman qayllaykunanchej tiyan. Paykunaman willarisunman ima bendicionestachus Jehová Dios qowasqanchejta. Ajinamanta Jehovata sirvispa kusisqa kasqanchejta reparanankupaj. Wakin casarasqa kajkunaqa, ujninku onqoykusqankurayku Jehovapaj astawan llankʼayta saqenku. Ajinapi rikukuspaqa, ama qosaykita chayri warmiykita juchachaychu, nillataj qanpis juchachakuychu. Ama yuyaychu juchaykirayku Jehovapaj llankʼayta saqesqaykichejta. Astawanpis yuyarikuychej ‘iskayniykichej ujlla kasqaykichejta’, jinallataj Jehovaman “ima kajtinpis khuska kasqayku” nisqaykichejta (Mat. 19:5, 6). Wakenqa mana suyaspalla wawayoj kasqankurayku Jehovapaj astawan llankʼayta saqerqanku. Ajinapi rikukuspaqa, wawaykiman niy chay llankʼaymanta nisqa, payta astawan munakusqaykita. Wawaykiman sapa kuti niy, Jehová Diosmanta uj herencia kasqanta (Sal. 127:3-5). Chantapis willariy, Diospaj llankʼaspa ima bendicionestachus japʼisqaykita. Ajinamanta paypis ichá qan jinallataj ruwayta munanqa. w19.08 pág. 22 párrs. 10, 11

Jatun Babilonia nisunman tukuy llulla religionesqa, Diospa sutinta pisipaj qhawacherqa. Diosmanta llullasta yachachispa, gobiernosta yanapaspa ima. Chantapis Jatun Babiloniaqa, atiyninmanta valekuspa runasta ñakʼarichin, munasqanman jinataj ruwachin. Payqa may chhika runasta wañuchin. Chay runasmanta ashkhastaj Diospa kamachisnin karqanku (Apo. 18:24; 19:2). Diosqa “uj puka millay phiña animalpa” “chunka” wajrasninwan, khuchi warmiwan ninakoj Jatun Babiloniata chinkachenqa. Chay “millay phiña” animalqa, Naciones Unidas (ONU). Chunka wajrasnintaj kay tiempomanta gobiernos kanku, pikunachus Naciones Unidas nisqapi satʼisqa kanku, chaykuna. Chay gobiernostaj Jatun Babiloniata Jehová Diospa ajllasqan tiempopi chinkachenqanku. Paykunaqa “chay khuchi warmita chejnispa, tukuy imanta qhechonqanku, qʼalallatataj saqerpayanqanku”. Chantapis tukuy sajra ruwasqasninta sutʼiman orqhonqanku (Apo. 17:3, 16). Jatun Babiloniaqa “uj pʼunchayllapi” chinkachisqa kanqa. Payta tukuy yanapajkunataj, chayta rikuspa mayta tʼukonqanku. Imaraykuchus Jatun Babiloniaqa jatunchakuspa nishallanpuni: ‘Noqaqa ni jaykʼajpis waqasajchu’, nispa (Apo. 18:7, 8). w19.09 pág. 10 párrs. 10, 11

Jesusqa tukuyta wajyarin paypa yugonman churakunankupaj. Payqa Diosta tukuy sonqo sirviyta munajkunata, ni jaykʼaj qhesachanchu (Juan 6:37, 38). Chantapis Jesusqa Diosmanta uj llankʼayta japʼerqa. Chay llankʼaytaj Jehovaj munayninta runasman yachachiy. Noqanchejrí chay llankʼaypi yanapakushanchej. Chayrayku ama iskayrayanachu, chay llankʼayta juntʼanapaj Jesús yanapanawanchejmanta (Mat. 28:18-20). Kʼumuykukoj sonqoyoj runasqa, Jesusman qayllaykuyta munaj kanku (Mat. 19:13, 14; Luc. 7:37, 38). Imaraykuchus Jesusqa mana fariseos jinachu karqa. Fariseosqa mana khuyarikoj runas karqanku, may kasqankutataj yuyakoj kanku (Mat. 12:9-14). Jesustajrí manchay kʼacha, kʼumuykukoj sonqotaj karqa. Fariseosqa sumajpaj qhawachikuyta munaj kanku, may rejsisqastaj kayta munarqanku. Jesustajrí yachachisqasninman yachacherqa, ama ñaupajpi kayta maskʼanankuta, manaqa kʼumuykukoj sonqos kanankuta, wajkunatataj sirvinankuta (Mat. 23:2, 6-11). Fariseosqa runasta manchachej kanku paykunawan kasuchikunankupaj (Juan 9:13, 22). Jesustajrí runasta yanaparej, kʼacha simiwan parlapayaj, sonqocharejtaj. ¿Imastataj Jesusmanta yachakusunman? w19.09 pág. 20 párr. 1; pág. 21 párrs. 7, 8; pág. 23 párr. 9

Tantakuykunaqa Jehová Diosman astawan qayllaykunapaj yanapawanchej. Reunionesta jatunpajchus manachus qhawasqanchejqa, qhatiykachasqa kajtinchej aguantananchejtachus manachus rikuchin (Heb. 10:24, 25). Kunan imitaraykullapis reunionesman mana rinchejchu chayqa, ¿imatá ruwasun autoridades niña tantakojta saqewajtinchej? Jinapis reunionesman riyta ni ima jarkʼanawanchejta saqesunchu chayqa, churanakuy kajtinpis rillasunpuni. Chayrayku reunionesta kunanmantapacha jatunpaj qhawana. Chayta ruwasun chayqa, runas churanakuwajtinchejpis, gobiernos jarkʼawajtinchejpis, runasta kasunamantaqa Diosta kasukusun (Hech. 5:29). Gustawasqanchej textosta umanchejpi japʼina (Mat. 13:52). Imatapis qonqallanchej chaypis, Diosqa atiyninwan yanapawasun chay textosta yuyarikunanchejpaj (Juan 14:26). Chay textosqa yanapawasunchej aguantanapaj, Jehová Diosmanta mana karunchakunapaj ima. w19.07 pág. 3 párr. 5; pág. 4 párrs. 8, 9

Kay 1914 watamanta qhepaman nacekorqanchej chayqa, nacekusqanchejmantapacha ‘qhepa pʼunchaykunapi’ kausashanchej. Jesusqa nerqa qhepa pʼunchaykunapi guerras, yarqhaykuna, terremotos, wañuchej onqoykuna ima kananta. Nillarqataj runas astawan sajrayanankuta, Diospa kamachisnin qhatiykachasqas kanankuta, waj imas kananta ima. Tukuy chay imastataj noticiaspi uyarinchej (Mat. 24:3, 7-9, 12; Luc. 21:10-12). Apóstol Pablopis qhepa pʼunchaykunapi imaynachus runas kanankuta nerqa. Kay tiempomanta runastaj ajinapuni kanku. Jehová Diosta sirvejkunaqa, sutʼita yachanchej ‘qhepa pʼunchaykunaj’ tukukuyninpi kausashasqanchejta (Miq. 4:1). Kay 1914 watamantapacha ashkha watasña pasan. Chayrayku nisunman ‘qhepa pʼunchaykunaj’ tukukuyninpiña kashasqanchejta. Kay sajra mundoj tukukuynenqa, may qayllitapiña kashan. Chayrayku kay tapuykunaj kutichiyninta yachananchej tiyan: ¿Imastaj kanqa kay ‘qhepa pʼunchaykunaj’ tukukuyninpi? Chay tiempo chayamunankama, ¿imata ruwananchejtataj Jehová Dios munan? w19.10 pág. 8 párrs. 1, 2

Yachakorqanchej sinchʼita sayanapajqa, llakiykunasniyoj kaspapis chayri manapis Jehová Diospipuni atienekuna kasqanta (Rom. 12:12). Kay diapaj textopi Jesús nisqanman jina, ima problema kajtinpis, sinchʼita sayananchej tiyan. Kay tiempopiña sinchʼita sayasunchej chayqa, creeyninchejqa manchay ñakʼariy tiempopaj sinchʼi kanqa. Mana manchachikoj kayqa, mana noqanchejmantachu kashan, manaqa Jehová Diospi atienekuymanta. Sinchʼita sayanapajpis chayllatataj ruwananchej karqa. ¿Imatá ruwasunman Jehová Diospi astawan atienekunapaj? Bibliata sapa día leena, tʼukurinataj Jehová Dios imaynatachus ñaupa tiempo kamachisninta yanapasqanpi (Sal. 68:20; 2 Ped. 2:9). Manchay ñakʼariy tiempopi, naciones chinkachinawanchejpaj wakiykuwajtinchej, mana manchachikunanchejchu kanqa. Chantapis Jehová Diospi ni jaykʼaj jina atienekunanchej kanqa (Sal. 112:7, 8; Heb. 13:6). Kunanña Jehová Diospi tukuy sonqo atienekusun chayqa, Gog chinkachiyta munawajtinchej mana manchachikusunchu. Jehová Dios munakuywan jarkʼawasqanchejrayku ni imata manchachikusunchu (1 Cor. 13:8). w19.10 pág. 18 párrs. 15, 16

Kay mundoqa Kuraj Supaypa makinpi kashan. Chayrayku payqa imaschus mundonpi kasqanmanta valekuspa, munaynillanchejta maskʼachiwanchej, tanqawanchejtaj aychanchejpa sajra munayninta ruwanapaj (Efe. 2:1-3). Supayqa mana munanchu Jehová Diosllata yupaychananchejta, astawanpis waj imasta munakunanchejta munan. Apóstol Pedroqa, Satanaspa mundonpa tukukuyninmanta, mosoj kausay kananmanta ima qhelqaytawan, nerqa: “Munasqa hermanosníy, chay imasta suyakushasqaykichejrayku, tukuy atisqaykichejta ruwaychej Diosqa llimphusta, mana imanasqasta, paywan allinpi kashajkunatataj taripasunaykichejpaj”, nispa (2 Ped. 3:14). Apóstol Pedroj yuyaychasqanta kasukuna. Tukuy atisqanchejtataj kallpachakuna llimphu kausayniyoj kanapaj, Jehovata munayninman jina yupaychanapaj ima. Ajinamanta Jehová Diosllata yupaychasqanchejta rikuchisun. Satanaswan mundonwanqa, waj imasta ñaupajman churanapaj tanqallawasunpuni (Luc. 4:13). Jinapis imapi rikukuspapis, ni pita, nitaj imatapis Jehová Diosmanta astawan munakunachu. Astawanpis Jehová Diosllata yupaychana. Imaraykuchus payllamin yupaychanapaj jinaqa. w19.10 pág. 26 párr. 4; pág. 31 párrs. 18, 19

Runasqa wakin imasmanta llakikunchejpuni. Chaykunamanta ujqa kashan, Jehová Diosta, Jesustawan kusichinanchej (1 Cor. 7:32). Jatun juchapi urmarqanchej chayqa, Jehová Dioswan watejmanta allinpi kanamanta llakikunchej. Casarasqa kajkunaqa, warminkuta chayri qosankuta kusichinankumanta llakikunku. Tukuyninchejtaj familianchej, hermanosninchej ima allin kanankumanta llakikunchej (1 Cor. 7:33; 2 Cor. 11:28). Ichapis ropayoj, mikhunayoj kanamanta anchata llakikullanchejtaj (Mat. 6:31, 32). Chaykunamanta anchata llakikuspaqa, kapuyniyoj kayta maskʼasunman. Jina kajtintaj, niña Jehová Diospi atienekusunmanchu, paymantataj karunchakapusunman (Mar. 4:19; 1 Tim. 6:10). Chantapis ichá anchata llakikusunman runaswan allinpaj qhawachikunamanta. Jinapitaj Diosta manchachikunamantaqa, runas asipayanawanchejta chayri qhatiykachanawanchejta astawan manchachikusunman. ¿Imatá ruwasunman mana chaypi urmanapaj? Jehová Diosmanta creeyta, kallpatawan mañakuna. Ajinamanta mana imatapis manchachikusunchu (Pro. 29:25; Luc. 17:5). w19.11 pág. 15 párrs. 6, 7

Kausayninchejpeqa wakin imasta mana cambiayta atisunmanchu. Casarakushaspa chayri Jehová Diosman qokushaspa imatachus nisqanchejtaqa, juntʼanapuni tiyan (Mat. 16:24; 19:6). Jinapis ichá wakin kuteqa, kausayninchej niña kikinchu kanqa. Chayraykutaj imatachus ruwayta munasqanchejta cambiananchej kanqa. ¿Imataj chaypaj yanapawasunman? Diosmanta yachayta mañakuy. Tukuyninchej imallapipis “pisi yachayniyoj” kanchej. Chayrayku kausayninchejpi imata ajllanapajpis, chayri chay ajllasqanchejta cambianapajpis Jehová Diospa yanapayninta mañakuna. Paytajrí sumajta ajllanapaj yanapawasun. Allintaraj yachana. Imatapis ruwanapajqa Diospa Palabranta, publicacionesta ima leerina. Chantapis pipichus atienekunchej chayta yuyaycharinawanchejta nina (Pro. 20:18). Waj trabajota maskʼaypi chayri waj lugarman ripuypi piensashanchej chayqa, tukuy chay imasta ruwanapuni tiyan. Ajinallatataj ruwananchej tiyan, Diosta sirvinallapajpuni ima oficioyojchus kaypi tʼukurishanchej chayqa. w19.11 pág. 27 párrs. 6-8

Jehová Diosninchejqa Jesusta kachamorqa juchamanta kacharichinawanchejpaj. Jesús kay jallpʼaman jamunanpaj 700 watasmanta astawan faltashajtin, profeta Isaiasqa runas kacharichisqa kanankuta qhelqarqa. Chaytaj Kacharipuna Watapi imaschus ruwakusqanmanta aswan sumaj. Isaías qhelqarqa: “Tukuyta Kamachej Tata Diospa Espiritun noqawan kashan, imaraykuchus Tata Diospuni noqataqa ajllakuwarqa. Sumaj willaykunata wajchasman willanaypaj kachamuwan, llakisqastataj sonqochanaypaj. Presochasqa runasman kacharichisqa kasqankuta willaranaypaj kachamuwan”, nispa (Isa. 61:1). ¿Pipitaj chay profecía juntʼakorqa? Isaiaspa profecianqa, Jesús kay jallpʼapi willayta qallarisqanmanta qhepaman juntʼakuyta qallarerqa. Jesusqa Nazaretpi kaj sinagogaman yaykuspa, Isaiaspa qhelqasqanta chaypi kaj judiospaj leerqa. Ajinamanta Jesusqa, Isaiaspa qhelqasqan pay kikinpi juntʼakusqanta rikucherqa (Luc. 4:16-19). w19.12 págs. 9, 10 párrs. 6-8

Qhatiykachawajtinchej aguantanapajqa, mana manchachikojkuna kananchej tiyan. Ichapis yuyanchej manchachikoj runas kasqanchejta. Jinapis valientes kananchejqa mana jatun runa kanamantachu, nitaj kallpayoj kanamantachu, nillataj imatapis ruwayta yachanamantachu kashan. Davidmanta yachakuna. Davidqa jovencitollaraj kashaspa, Goliatwan maqanakuyta mana manchachikorqachu. Payqa Goliatmanta nisqa aswan juchʼuylla, pisi kallpayojtaj karqa. Chantapis mana armasniyojchu karqa, ni espadanpis kaporqachu. Chaywanpis Davidqa mana manchachikuspa, chay jatunchakoj runawan maqanakoj correrqa. ¿Imaraykutaj David mana manchachikorqachu? Payqa yacharqa Jehová Dios yanapanantapuni (1 Sam. 17:37, 45-47). Davidqa mana nerqachu: “Goliatqa jaqay chhikan, noqataj kay chhikitan kani”, nispa. Astawanpis pay yuyarqa: “Goliatqa Jehová Diospa ñaupaqenpi ni imapischu”, nispa. ¿Imatá Davidmanta yachakunchej? Valientes kanapajqa, iskay imasta ruwananchej kasqanta. Ñaupajtaqa Jehová Dios yanapanawanchejpi atienekuna. Chantá ama qonqanachu tukuy atiyniyoj Jehová Diosninchej, enemigosninchejmanta nisqa aswan atiyniyoj kasqanta (2 Cró. 20:15; Sal. 16:8). w19.07 pág. 5 párrs. 11-13

Tiquicoqa apóstol Pabloj sumaj amigon karqa (Hech. 20:4). Kay 55 wata qayllata, Pabloqa Judeapi kaj hermanosta yanapanankupaj qolqeta tantacherqa. Chaypajtaj ichapis Tiquicowan yanapachikorqa (2 Cor. 8:18-20). Chantá Romapi ñaupaj kutipi presochasqa kashajtin, congregacionesman imatapis willachinanpaj Tiquicota kachaj. Tiquicotaj Pabloj apachisqan cartasta, willaykunata ima, Asiapi kaj congregacionesta kallpachananpaj aparqa (Col. 4:7-9). Tiquicoqa Pabloj sumaj amigollanpuni karqa, atienekunapaj jinataj karqa (Tito 3:12). Chay tiempopeqa, mana tukuy cristianoschu Tíquico jina karqanku. Pabloqa 65 wata chaynejta iskay kaj kutipi presochasqa karqa. Chay kutipitaj qhelqarqa, Asia provinciamanta wakin cristianos paymanta karunchakusqankuta. Ichapis chay cristianosqa, qhatiykachajkunata manchachikusqankurayku Pablomanta karunchakorqanku (2 Tim. 1:15). Tiquicotajrí Pablollawanpuni karqa. Chayrayku Pabloqa waj llankʼaytawan payman qorqa (2 Tim. 4:12). Pabloqa chay jina sumaj amigoyoj kasqanmanta, maytachá kusikorqa. w20.01 pág. 10 párrs. 7, 8

Ichapis yachayta munanki, Jehová Dios cieloman rinaykipaj ajllasusqantachus manachus. Jina kajtin, kay tapuykunapi piensariy: ¿Tukuy kallpaykiwanchu Diospa munayninta ruwayta munanki? ¿Sonqo kʼajaywanchu predicanki? ¿Gustasunkichu Bibliata estudiay, “Diospa pakasqa yachaynintapis” yachakuy? ¿Reparankichu Jehová Dios tʼukunapaj jina predicacionpi yanapasusqanta? ¿Maytachu hermanosta yanapayta munanki, Jehová Diosta sirvinallankupajpuni? ¿Reparankichu Jehová Dios kausayniykipi mayta yanapasusqanta? Chay tapuykunaman “arí” nispa kutichisqaykeqa, mana ninayanchu cieloman rinaykipaj ajllasqa kasqaykita. Imajtinchus ajllasqa kaspapis chayri manapis, tukuy ajina sientekusunman. Chantapis cieloman rinaykipaj ajllasqa kasqaykipichus manachus piensarishanki chayqa, mana ajllasqachu kanki. Imaraykuchus ajllasqa cristianosqa, mana iskayrayankuchu Jehová Dios paykunata ajllasqanmanta. Paykunaqa sutʼita yachanku ajllasqa kasqankuta. w20.01 pág. 23 párr. 14