Mayo

Tatamamas, ¿imaynatá wawasniykichejta yanapawajchej Jehová Diosta munakunankupaj? Jehová Diosmanta yanapata mañakuychej. Imaynatachus Manoa mañakorqa ajinata. Chantapis ruwasqaykichejwan yachachiychej. Wawasniykichejta yachachisqaykichejqa may sumaj. Jinapis wawasqa tatasninkoj ruwasqankuta astawan qhawayta yachanku. Josewan Mariawanqa wawasninkuta ruwasqankuwan yachacherqanku. Joseqa familianta uywananpaj sinchʼita llankʼarqa. Chantapis paykunata Jehová Diosta yupaychanankupaj yanaparqa (Deu. 4:9, 10). Joseqa familianta Pascua fiestapaj sapa wata Jerusalenman pusaj (Luc. 2:41, 42). Ichapis chay tiempomanta wakin tatasqa nej kanku: “Ashkha familiata Jerusalenman pusayqa mana facilchu, ashkha tiempopaj, ashkha qolqepajtaj”, nispa. Jinapis Joseqa Jehová Diosta yupaychayta ñaupajman churarqa. Wawasnintapis pay jina ruwanankupaj yanaparqa. Warmin Mariaqa Diospa Palabranta sumajta rejserqa. Chayrayku payqa wawasninta yachacherqachá Diospa Palabranta munakunankupaj. Chaytataj nichá parlasqallanwanchu ruwarqa, manaqa ruwasqanwanpis. w19.12 pág. 24 párrs. 9-12

Jehová Dios munakuwasqanchejta reparallanchejtaj, Adán juchallikojtin imatachus ruwasqanpi. Adanqa Tatan Jehovata mana kasukorqachu. Chayrayku paypis, wawasninpis manaña Diospa familianmantachu karqanku (Rom. 5:12). Jinapis Jehová Diosqa, imaynatachus Adanpa wawasninta yanapananta yuyaychakorqa. Jehová Diosqa Adanta juchallisqanrayku castigajtinpis, wawasninta yanapananta nerqa. Payqa chay rato yuyaychakorqa, imaynatachus kasukoj runasta yanapananta familianman watejmanta yaykunankupaj (Gén. 3:15; Rom. 8:20, 21). Jehová Diosqa chayta ruwananpaj, munasqa Wawan Jesusta juchasninchejrayku wañunanpaj kachamorqa. Ajinamanta Tatanchej Jehovaqa, anchatapuni munakuwasqanchejta rikucherqa (Juan 3:16). Payqa manchay sumaj Tata. Chayrayku mañakusqanchejta uyariwanchej, yachachiwanchej, yanapawanchejtaj. Chantapis kausananchejpaj, payta sirvinapajpis, imatachus necesitasqanchejta qowanchej. Jehová Diosqa jamoj tiempopipis may chhika bendicionesta qowasunchej. Tatanchej Jehová chay jinatapuni munakuwasqanchejta yachaspaqa, ¡mayta kusikunchej! w20.02 pág. 6 párrs. 16, 17; pág. 7 párr. 20

Ichá maykʼajllapis mayta phutikorqanchej. Ichá pillapis parlasqanwan chayri imata ruwasqanwan sonqonchejta nanachiwarqanchej. Manachayrí noqanchej kikin imatapis parlanchej chayri ruwanchej. Chaytaj mayta llakichiwanchej. Manachayqa ichá juchapi urmasqanchejrayku, Jehová Dios ni jaykʼaj perdonanawanchejta yuyanchej. Ajina llakisqa kasqanchejrayku, ichá yuyanchej pisi creeyniyoj kasqanchejta chayri mana allin runaschu kasqanchejta. Diospa wakin kamachisninmanta parlarina. Paykunamanta ujqa Ana karqa, profeta Samuelpa maman. Payqa sinchʼi creeyniyoj kaspapis, qosanpa ujnin warmin kʼumuykachachisqanrayku, mayta llakikorqa (1 Sam. 1:7). Apóstol Pablopis creeypi sinchʼi sayasqa karqa. Jinapis “tukuy hermanosmanta sapa pʼunchay” llakikorqa (2 Cor. 11:28). Rey Davidpis sinchʼi creeyniyojllataj karqa. Chayrayku Jehová Diosqa payta mayta munakorqa (Hech. 13:22). Jinapis Davidqa jatun juchapi urmarqa. Chaytaj uj llasa qʼepi jina paypaj karqa (Sal. 38:4). Jehová Diosqa chay kinsantin kamachisninta sonqocharqa, sonqonku tiyaykunanpajtaj yanaparqa. w20.02 pág. 20 párrs. 1, 2

Niraj bautizakushaspa, Jehová Diosman uj mañakuypi ninchej, payllapajña kausananchejta, wiñaypajtaj sirvinanchejta. Diosman kausayninchejta qopuspaqa, ‘noqanchej kikinchejta chejnikunchej’. Chayqa niyta munan, Jehová Diospata kananchejpaj, noqanchejmanta qonqakapunanchej kasqanta. Jehová Diospata kaytaj may sumajpuni (Rom. 14:8). Diosman kausayniykita qospaqa, payman ninki: “Kunanmantapacha manaña noqapajchu kausasaj, manaqa qanpa munayniykita ruwanaypaj”, nispa. Jehová Diosqa mana obligawanchejchu chayta ninapaj. Jinapis payqa chayta nejtinchej juntʼananchejta munan (Sal. 116:12, 14). Mana tukuypa rikunankutachu Jehová Diosman kausayninchejta qonchej, manaqa sapallanchejpi chayta ruwanchej. Jinapis bautizakusqanchejtaqa tukuy rikunku. Imaraykuchus uj jatun tantakuypi bautizakunchej. Bautizakuspaqa tukuyman rikuchinki Jehová Diosman kausayniykita qopusqaykitaña. Chantá rikuchillankitaj, Jehová Diosta tukuy sonqoykiwan munakusqaykita, jinallataj tukuy kausayniykiwan, tukuy yuyayniykiwan, tukuy kallpaykiwantaj. Bautizakuspaqa Jehová Diosta wiñaypaj sirviyta munasqaykita rikuchillankitaj (Mar. 12:30). w20.03 pág. 9 párrs. 4, 5

Satanasqa runasta Jehovamanta pantasqata yuyachin. Apóstoles wañupusqankutawan, wakin cristianosqa llulla yachachiykunata yachachiyta qallarerqanku (Hech. 20:29, 30). Chay llulla cristianosqa, runasta kʼata Diosninchejmanta qonqachiyta qallarerqanku. Paykunaqa Diospa sutinta Bibliamanta orqhorparqanku, cuentanmantataj “Señor” palabrata chayri waj palabrasta churarqanku. Chayrayku runasqa, Bibliata leeshaspa manaña yacharqankuchu Jehová Diosmantachus chayri mayqen ‘señormantachusʼ parlashasqanta (1 Cor. 8:5). Chantapis chay llulla cristianosqa, Jehová Diospajpis, Jesuspajpis “Señor” palabrata Bibliapi churarqanku. Chayrayku runasqa niña entienderqankuchu, Jehovawan Wawan Jesuswan mana kikinchu kasqankuta (Juan 17:3). Ajinamanta ashkha runas creeyta qallarerqanku, Dioswan, Jesuswan, espíritu santowan ima ujlla kasqankuta. Bibliatajrí mana chaytachu yachachin. Chay llulla yachachiyrayku, ashkha runas yuyanku, Diosqa mana rejsiy atina kasqanta. Jinapis Diostaqa tukuy rejsiyta atinchej (Hech. 17:27). w19.06 pág. 5 párr. 11

Diospaj llankʼayninchejta allinta juntʼanapajqa, aswan sumaj yachachejkuna kanapaj kallpachakuna (Pro. 1:5, 6; 1 Tim. 4:13, 15). Jehová “Dioswan khuska” llankʼayqa, may sumajpuni (1 Cor. 3:9). “Imaschus aswan allin” kasqanta reparaspa, Diospaj llankʼaytataj ñaupajman churaspaqa, ‘Jehová Diosta kusiywan sirvisunchej’ (Fili. 1:10; Sal. 100:2). Paymin kallpata qowasun, ima problema chayri ima jarkʼay kajtinpis, paypaj llankʼayninchejta allinta juntʼanapaj (2 Cor. 4:1, 7; 6:4). Jehová Diospaj tukuy sonqo llankʼaspaqa kusisqa kasun, ashkhata chayri pisillata predicajtinchejpis (Gál. 6:4). Diospaj llankʼayninchejta allinta juntʼaspaqa, Jehová Diosninchejta, runa masinchejta ima, munakusqanchejta rikuchinchej. Chantapis ‘chayta ruwaspaqa, noqanchej kikinchejta salvakusun, jinallataj uyariwanchej chay runastapis’ (1 Tim. 4:16). w19.04 pág. 6 párr. 15; pág. 7 párr. 17

Satanaswan supaykunasninwanqa, ashkha runasta layqerioswan engañashanku. Layqeriosta ruwajkuna ukhupi kashanku: adivinos, estrellaspi suerteta qhawajkuna, animota wajyaj aysiris, yatiris, layqas, jampiris, chamanes, magiata ruwajkuna ima. Chay runasqa imatapis yachanankupaj chayri ruwanankupaj, atiyniyoj kasqankuta ninku. Jinapis chay ateyqa mana Diosmantachu jamun. Latinoamérica, Caribe nisqapi, 18 suyusmanta runasta tapusqanku. Chay tapusqankuman jina, sapa kinsa runasmanta uj runa magiapi, yatirispi, layqaspi ima creesqanta nisqa. Chay chhika runasllataj, wañusqaswan parlayta atisqankuta nisqanku. Africapipis 18 suyusmanta runasta tapurillasqankutaj. Chay tapurisqanku runasmanta khuskan kurajpuni, yatirispi creesqankuta nisqanku. Maypi tiyakojtinchejpis, layqerío ruwaykunamanta sumajta qhawarikunanchej tiyan. w19.04 págs. 20, 21 párrs. 3, 4

Jehová Diosqa tukuy sajra ruwaykunata millachikun (Sal. 5:4-6). Jehovaqa wawasta abusasqankuta may millaypaj qhawan, manchaytataj chay ruwayta chejnikun. Noqanchejpis Jehová Diosninchej jinallataj chay ruwayta mayta chejnikunchej, nitaj congregacionpi chay kananta saqesunmanchu (Rom. 12:9). Wawasta abusayqa, ‘Cristoj leyninpaʼ contranpi kashan. Cristoj leynenqa munakuypi sayachisqa kashan, tukuypaj justicia kananpajtaj yanapan. Cristoj leynenqa Jesuspa yachachiykunasnin, ruwasqasnin ima kanku (Gál. 6:2). Cristianosqa chay leyta juntʼanchej. Chayraykutaj wawasta mayta munakunchej, sajra runasmantataj jarkʼanchej. Jinapis wawasta abusaj runasqa paykunallapi yuyanku. Abusasqa wawitastaj manchi manchilla wiñakunku, niña imapaj valesqankutataj yuyanku. Congregación ukhupipis wawas abusasqa kasqanku uyarikushan. Kay qhepa pʼunchaykunapeqa, “chʼaukiyaj sajra” runas astawan yapakushanku. Chaykunamanta wakintaj, ichapis congregacionman yaykumunkuman (2 Tim. 3:13). Wakinkunataj Jehovata yupaychaspapis, millay munayninkuwan atipachikuspa wawasta abusarqanku. w19.05 pág. 8 párrs. 1-3

Sinchʼi llakisqa kajkunaqa, Diosmanta wakin kutis mana mañakuyta atillankuchu. Ichapis pisipaj qhawakusqankurayku, Jehová mana uyarinanta yuyanku. Paykunata yanapariyta munaspaqa, sutinkuta oqharispa paywan khuska Diosmanta mañakuna. Orapushaspataj Jehová Diosman nina, chay hermanota chayri hermanata, tukuy hermanos mayta munakusqanchejta. Chantá Jehová Diosman rogakuna munasqa ovejitanta sonqochananta. Ajinata Diosmanta mañakojtinchejqa, paykunata mayta sonqochanqa. Niraj imatapis nishaspa sumajta yuyaychakuna. Imatapis parlarparillasun chayqa, wajkunaj sonqonta espadawan jina tʼojsisunman. Jinapis miskʼi simiwan parlajtinchejqa, paykunaj sonqonkuta jampiwan jina thañichisunman (Pro. 12:18). Chayrayku Jehová Diosmanta mañakuna, llakisqa kajta sonqochanapaj palabrasta tarinapaj yanapanawanchejta. Jehová Diosqa Palabranpi sonqochaj palabrasta ashkhata churacherqa (Heb. 4:12). Llakisqa kajkunata sonqochashaspaqa, Jehová Dios may munakuyniyoj kasqanta yuyarichinchej. Ama qonqanachu Diosninchejqa justiciata ruwasqantapuni. Payqa sumajta yachan, pikunachus abusasqa kasqankuta. Chayrayku chay millay juchata ruwajkunataqa, mana pesachikojtinku castiganqapuni (Núm. 14:18). w19.05 pág. 18 párr. 18; pág. 19 párrs. 19, 21

Satanasqa Jehová Diosta wasanchananchejta munan. Chaypajtaj umanchejta muyuchiyta munawanchej. Supayqa pay jina yuyananchejpaj, imastachus sonqonchejpi munasqanchejwan engañayta munawanchej (Col. 2:4). Satanás, ¿noqanchejtapis urmachiwasunmanchu? Arí. Kaypi piensarina. Apóstol Pabloqa Colosenses 2:8 nisqanta, ajllasqa cristianosman qhelqarqa, nitaj Diospi mana creej runasmanchu (Col. 1:2, 5). Paykunaqa Diospa atiyninwan ajllasqa kaspapis, Satanaspa tojllasninmanta qhawarikunanku karqa. Noqanchejpis astawanraj qhawarikunanchej tiyan (1 Cor. 10:12). ¿Imaraykutaj? Imaraykuchus Satanasqa kay jallpʼaman wijchʼuchikamorqa, maytataj pantachiyta munashawanchej (Apo. 12:9, 12, 17). Chantapis qhepa pʼunchaykunapi kausakushanchej, “chʼaukiyaj sajra runasrí, astawan astawan” sajrayashanku (2 Tim. 3:1, 13). w19.06 pág. 2 párrs. 1, 2

Reina Jezabel Eliasta wañuchinanta nejtin, Eliasqa mayta mancharikorqa. Chayrayku payqa Beerseba llajtaman ayqekorqa. Manchay phutisqa kasqanraykutaj wañuyllataña munarqa. ¿Imaraykú ajinata yuyarqa? Imaraykuchus “Eliasqa noqanchej jina” pantaj runalla karqa (Sant. 5:17). Ichapis payqa problemasninrayku, saykʼusqa kasqanrayku ima, sinchʼi llakisqa kasharqa. Eliasqa tukuy imata ruwarqa israelitas Jehová Diosta yupaychanankupaj. Israelitastaj mana kasukorqankuchu. Chayrayku Eliasqa imastachus ruwasqan qhasillapaj kasqanta yuyarqa, piensarqataj payllaña Jehová Diosta yupaychashasqanta (1 Rey. 18:3, 4, 13; 19:10, 14). Jehová Diosqa paypa llakiyninta sumajta entienderqa. Payqa mana kʼamiykorqachu, astawanpis kallpacharqa (1 Rey. 19:5-7). Chaymantaraj Jehová Diosqa, Eliasta munakuywan cheqancharqa. Chaypajtaj jatun atiyninta rikucherqa. Chantapis Eliasman nerqa, 7 mil israelitasraj Baalta mana yupaychasqankuta (1 Rey. 19:11-18). Jehovaqa Eliasta munakusqanta, ruwasqasninwan rikucherqa. w19.06 págs. 15, 16 párrs. 5, 6

Kamachiykunata kasukuna. Ñaupajman pusawanchej chay hermanosta kasukusun chayqa, mana problemaspi rikukusunchu. Uj suyupi, gobiernoqa hermanosninchejta niña Jehovata sirvejta saqenchu. Chay suyupi ñaupajman pusaj hermanosqa, hermanosta kamacherqanku ni revistasta, ni tratadostapis runasman saqenankuta. Jinapis uj precursorqa mana kasukorqachu. Mana kasukusqanrayku, ¿imataj karqa? Paywan waj hermanoswan predicaj llojsejtinku, gobiernoj kachasqan runa paykunata qhatiykusqa, saqerqanku chay publicacionestapis runasmanta qhechusqa. Chantá hermanosqa predicayta tukusqankutawan, policiawan japʼichikorqanku. ¿Imatá chay yachachiwanchej? Ñaupajman pusajkunata kasukunanchej kasqanta, imatachus kamachiwasqanchej mana allinchu rijchʼawajtinchejpis. Jehová Diosqa paykunata kasukojtillanchej bendeciwasun (Heb. 13:7, 17). w19.07 pág. 12 párr. 17

Señorninchej Jesusqa wañuchinankupaj uj chʼisillaña faltashajtin, kay mundomanta runas discipulosninta chejnikunankuta nerqa (Juan 17:14). Jehová Diosta yupaychayman churanakojkunaqa, chay tiempomantapacha cristianosta qhatiykachanku. Kay mundoj tukukuynin astawan astawan qayllamusqanman jinataj, runasqa astawan churanakuwasunchej (Mat. 24:9). Kay mundomanta runas qhatiykachawajtinchej sinchʼita sayanapaj, ¿imatataj kunanmantaña ruwananchej kanman? ¿Allinchu kanman piensananchej imaynatachus runas sufrichinawanchejpi? Mana. Chayllapi piensasunman chayqa, niraj qhatiykachasqa kashaspa manchachikusunmanña, llakikusunmantaj. Chay pasawajtinchejtaj Jehová Diosmanta karunchakusunman (Pro. 12:25; 17:22). Chantapis runata manchachikoyqa uj tojlla jina nisunman uj trampa jina. ‘Enemigonchej Kuraj Supaytaj’, chaywan urmachiyta munawanchej (1 Ped. 5:8, 9). Chayrayku Tatanchej Jehová Diosmanta sumajta japʼikuna chaytataj kunanmantaña ruwana. w19.07 pág. 2 párrs. 1-3

Jesusqa kausarimuytawan apostolesninman nerqa, Galilea orqopi tantakunankuta. Chay orqopi kashaspa, apostolesqa maytachá yachayta munarqanku imatachus Jesús paykunaman ninanta (Mat. 28:16). Ichapis chay kutipi Jesusqa “500 kuraj tantasqa hermanosman” rikhurerqa (1 Cor. 15:6). ¿Imapajtaj Jesús apostolesninta tantacherqa? Kay kamachiyta qonanpaj: “Rispa, tukuy laya runasta yachachisqasniyman tukuchimuychej” (Mat. 28:18-20). Jesuspa kamachisqanta uyarejkunaqa, ñaupa tiempomanta cristiana congregacionman yaykorqanku. Paykunaqa runasta Cristoj discipulosnin kanankupaj yanapananku karqa. Kay tiempopeqa mundontinpi may chhika congregaciones tiyan. Chay congregacionespi kajkunataj, imatachus Jesús discipulosninman kamacherqa chayta kasukushallankutaj. w19.07 pág. 14 párrs. 1, 2

Noruegapi congregacionesta visitaj uj hermano nerqa: “Wakenqa Jehová Diosmanta mana parlayta munaspapis, kay tiempopi llakiykunamanta parlajtiy uyariwanku”, nispa. Payqa wasiyojta saludariytawan, tapurin: “¿Kausay allinyanmanchu? ¿Pimantataj kashan allinyanan? ¿Gobiernosmantachu, cientificosmantachu chayri wajkunamantachu?”, nispa. Wasiyojta sumajta uyariytawan, hermanoqa sumaj kausaymanta parlaj textosta leeripun. Wakin runasqa mayta kusikunku, cheqan runas kay jallpʼapi wiñaypaj kausakunankuta yachaspa (Sal. 37:29). Chayrayku runaswan waj jinasmanta parlarinanchejpaj kallpachakunanchej tiyan. Mana tukuychu kikin imasmanta yachayta munanku. Wakin runasqa Jehová Diosmanta chayri Bibliamanta parlayta munallanku. Wakin runasmantajrí waj imasmantaraj parlarinanchej tiyan. Imayna kajtinkupis, tukuy laya runaswan parlarinapaj kallpachakuna (Rom. 1:14-16). Jehová Dioslla allin sonqoyoj runaspi cheqa kajta wiñachin (1 Cor. 3:6, 7). w19.07 págs. 22, 23 párrs. 10, 11

Jehová Dios munakuwasqanchejta yachayqa, hermanosninchejta munakunapaj yanapawanchej (1 Juan 4:20, 21). Tukuyninchej Jehová Diosta sirvishanchej, pay jina kanapaj kallpachakushanchej, Jesús jinataj ruwayta munanchej. Chayrayku ichá yuyanchej, hermanosninchejta munakuyta atinallanchejta. Jesusqa mayta munakuwasqanchejrayku kausayninta qorqa. Jinapis Jesús munanakunata kamachiwasqanchejtaqa, wakin kutis mana kasukuyta atillanchejchu. Evodiawan Sintiquewanqa, apóstol Pablowan khuska Jehová Diosta sirvispa llankʼarqanku. Jinapis ichá phiñanakusqankurayku niña amigaschu karqanku. Pabloqa filipensesman apachisqan cartapi, paykunata sutisninkuta oqharispa yuyaycharqa, nerqataj “uj yuyaylla” kanankuta (Fili. 4:2, 3). Chantapis apóstol Pabloqa tukuynin congregacionman nerqa: “Tukuy imata ruwallaychejpuni mana thutuspa, nitaj churanakuspa”, nispa (Fili. 2:14). w19.08 pág. 9 párrs. 6, 7

Ashkha congregaciones, jinallataj ashkha hermanospis, Jehovapaj astawan llankʼaj hermanosta tukuy atisqankuta yanapanku. Wakenqa chay hermanosta Jehovapaj llankʼanallankupajpuni kallpacharinku. Wakintaj paykunaman qolqeta qorinku, imatachus necesitasqankuta jaywarinku, chayri familiasninkuta qhawaspa yanapanku. Chay ruwasqankutaj may sumajpuni. Jehovapaj astawan llankʼaj hermanota congregacionninchejman kachamojtinkoqa, ama yuyanachu llankʼayninta mana allinta ruwasqanrayku, chayri pantasqanrayku kachamusqankuta. Astawanpis Jehovapaj llankʼanallanpajpuni yanaparina, allinta jamusqantataj nina. Niña ñaupajta jina ruwayta atejtinpis, Jehovapaj llankʼasqanta sumajpaj qhawasqanchejta nina. Chay hermanota astawan rejsinapaj kallpachakuna. Paypa yachayninmanta, imastachus ruwayta yachasqanmanta ima yachakuna. Congregacionninchejman jampoj hermanoqa, ichapis uj wasita chayri trabajota maskʼaysinanchejta necesitanqa. Ichapis necesitallanqataj imaynatachus maymanpis rinanta yachachinata, chayri waj imaswan yanaparinata. w19.08 págs. 23, 24 párrs. 12, 13

Gogqa ‘runaspa kallpankupi’ atienekonqa, nisunman soldadosninpi (2 Cró. 32:8). Noqanchejtajrí Jehová Diospi atienekusunchej. Nacionestaj locos kasqanchejta yuyanqanku. ¿Imaraykutaj? Imaraykuchus Jatun Babiloniataqa may atiyniyoj kajtinpis, diosesninkoqa ‘phiña animalpa chunka wajrasninmanta’ mana salvarqankuchu (Apo. 17:16). Gogqa Diospa llajtanta rato atipananta yuyanqa. Chayrayku imaynatachus ‘yana phuyus jallpʼata pʼampaykun’, ajinallatataj Diospa llajtanpa contranpi sayaykonqa. Jinapis Gogqa uj trampapi urmasqanta reparakonqa. Imaynatachus faraón Puka qochapi kashaspa Jehovawan maqanakushasqanta yacharqa, ajinallataj Gogwanpis kanqa (Éxo. 14:1-4; Eze. 38:3, 4, 18, 21-23). Armagedón guerrapi Jesucristoqa cielopi soldadosninwan khuska, Diospa kamachisninta jarkʼanqa. Chantapis Gogpa soldadosninta wañurachenqa, nisunman nacionesta, soldadosninkutawan chinkachenqa (Apo. 19:11, 14, 15). ¿Imataj kanqa Jehová Diospa enemigon Satanaswan, pichus nacionesta Armagedón guerraman pusanqa chaywan? Jesusqa payta, supaykunasnintawan ‘chinkay ukhuman wijchʼuykonqa’. Chaypitaj “1.000 watas tukukunankama” wisqʼasqa kanqanku (Apo. 20:1-3). w19.09 págs. 11, 12 párrs. 14, 15

Mayta munanchej Jehová Dios imastachus qonawanchejta nisqan juntʼakunanta. Imatachus suyasqanchej mana chay rato juntʼakojtenqa, Diosta niña ñaupajta jinachu sirvisunman, llakisqataj qhepakusunman (Pro. 13:12). Kay 1914 wata chaynejpi, ajinapi wakin hermanosninchej rikukorqanku. Chay wataqa ashkha cristianos cieloman ripunankuta yuyarqanku. Jinapis mana yuyasqankuman jinachu karqa. Imatachus wakin hermanos ruwasqankuta qhawarina. Paykunaqa mana tʼinkankuta japʼiyllapichu yuyasharqanku, manaqa Diosta tukuy sonqo sirviypi. Paykunaqa wañupunankukama Jehovata yupaychayta munarqanku. Chaytapunitaj ruwarqanku. Noqanchejpis mayta suyashanchej, Jehová Dios paylla sumaj Kamachej kasqanta rikuchinanta, sutinta jatunchananta, nisqasninta juntʼananta ima. Chaytaj paypa ajllasqan tiempopi juntʼakonqa. Chay tiempo chayamunankama, Jehová Diospaj tukuy atisqanchejta llankʼanallapuni. Imastachus suyasqanchej mana chay rato juntʼakojtintaj, ama llakikunachu. Astawanpis Jehová Diosta tukuy sonqo sirvinallapuni. w19.08 págs. 4, 5 párrs. 9, 10

Imaynachus kasqanchejpi piensarina. ¿Wajkuna ninkumanchu kʼumuykukoj sonqos, llampʼu sonqotaj kasqanchejta? Wajkunata sirvinapaj, ¿pisipaj qhawasqa ruwaykunata tukuy sonqochu ruwanchej? ¿Wajkunawan kʼachaschu kanchej? Jesusqa yachachisqasninman kusiywan yachacherqa. Chayrayku paykunaqa Jesuswan kaspa kusisqa kaj kanku (Luc. 10:1, 19-21). Jesusqa yachayta munaj imatachus yachachisqasnin yuyasqankuta. Chayrayku paykunaman nej, mana manchachikuspa tapurinankuta (Mat. 16:13-16). Carpa solarpi churasqa plantitasqa sumajta poqonku. Jesuspis yachachisqasninpaj carpa solar jina karqa. Chayrayku paykunaqa, Jesusmanta yachakuspa allin ruwaykunata ruwarqanku. Wajkunata kamachinapaj atiyta japʼinchej chayqa, piensarina: “Trabajonchejpi chayri wasinchejpi, ¿allin kausay kananpaj yanapakunchejchu? ¿Paykunata ninchejchu mana manchachikuspa tapurinawanchejta? Pillapis imatachus yuyasqanta willariwajtinchej, ¿sumajtachu uyarinchej?”. Noqanchejqa ni jaykʼaj fariseosman rijchʼakuyta munanchejchu. Paykunaqa pillapis yachachisqankuta mana japʼikojtin, phiñarikoj kanku. Wajkuna mana paykuna jina yuyajtinkutaj, wañuchiyta munaj kanku (Mar. 3:1-6; Juan 9:29-34). w19.09 pág. 20 párr. 1; pág. 23 párrs. 9-11

Kay tiempopi gobiernosqa, nacionespura allinta kausakunankumanta parlajtinku, casi kikin palabrasllatataj oqharinku. Jinapis 1 Tesalonicenses 5:3 versiculoqa, mana kay tiempopi gobiernospa nisqankumantachu parlashan. Imajtinchus chay versículo juntʼakojtenqa, ashkha runas creenqanku gobiernos mundontinpi allin kausayta sayarichisqankuta. Jinapis chayllapi “manchay ñakʼariy” qallarenqa, paykunaj tukukuyninkutaj “ujllata chayamonqa” (Mat. 24:21). Mana yachanchejchu, imaraykuchus gobiernos “tukuy imapis allillan, ni imamanta llakikuna kanchu” ninankuta, imaynatachus chayta ninankutapis. Nillataj yachachejchu, uj kutillatachus chayri kutin kutitachus chayta ninankuta. Jinapis sutʼita yachanchej, chay nisqankuta mana creenanchejchu kasqanta. Imajtinchus gobiernosqa manapuni allin kausayta apamonqankuchu. Astawanpis chayta nejtinku, sutʼita yachasun “Diospa pʼunchaynenqa” qallarinanpajña kashasqanta (1 Tes. 5:2). w19.10 págs. 8, 9 párrs. 3, 4

Armagedón guerraqa, kay sajra mundota chinkachenqa. Jinapis noqanchejqa, chay guerrata mana manchachikunanchejchu tiyan. Imaraykuchus chay guerrapeqa Jehová Dios maqanakonqa, nitaj noqanchejchu (Pro. 1:33; Eze. 38:18-20; Zac. 14:3). Jehová Dios nejtinkama, Jesucristoqa soldadosninta guerraman pusanqa, nisunman tukuy ajllasqa cristianosta, waranqa waranqa angelestawan. Tukuyninkutaj Satanaswan, supaykunasninwan, kay jallpʼapi soldadosninwan ima maqanakonqanku (Apo. 6:2; 17:14). Jehová Diosninchejqa kayta niwanchej: “Mana mayqen arma ruwasqankupis qanta chinkachisunampaj jina kanqachu”, nispa (Isa. 54:17). Diosta kasukoj “may chhika” runas, “manchay ñakʼariymanta” kausashaj llojsenqanku, Diostataj sirvillanqankupuni (Apo. 7:9, 13-17). Bibliaqa salvakunanchejpi creenapaj mayta kallpachawanchej. Imaraykuchus “cheqan sonqoyojkunata Tata Diosqa waqaychan” (Sal. 31:23). Jehová Diosqa tumpamantawan santo sutinta llimphuchanqa. Chayta ruwajtintaj, pikunachus payta munakunchej, jatunpajtaj qhawanchej chaykuna, mayta kusikusunchej (Eze. 38:23). w19.10 págs. 18, 19 párrs. 17, 18

‘Qhepa pʼunchaykunaj’ tukukuyninman qayllaykusqanchejman jina, ichapis astawan llakiykunapi rikukusun (2 Tim. 3:1). Africaj ujnin suyunpi votaciones pasasqantawan, chay suyupi manchay chʼajwas, maqanakuykuna ima karqa. Chay lugarmanta hermanosninchejtaj, sojta killasmanta astawan manchay llakiypi karqanku. ¿Imaynatá chay llakiy tiempota aguantarqanku? Wakin hermanosqa, chay chʼajwasmanta karitupi tiyakoj hermanospa wasinkuman riporqanku. Uj hermano nin: “Chaypachaqa mayta kusikorqani sumaj amigosniyoj kasqaymanta. Paykunawan purajmanta kallpachanakorqayku”, nispa. ‘Manchay ñakʼariy’ qallarejtin, sumaj amigosniyoj kasqanchejmanta kusikusunchej (Apo. 7:14). Chayrayku kunanmantapacha sumaj amigosniyoj kanapaj kallpachakuna (1 Ped. 4:7, 8). ¿Imajtintaj chayta ruwananchej tiyan? Imajtinchus enemigosninchejqa, llullasta parlaspa tʼaqanachiyta munawasun. Paykunaqa tukuy imata ruwanqanku, hermanosninchejwan manaña yanapanakunanchejpaj, nitaj paykunapi atienekunanchejpaj. Jinapis chay ruwasqankoqa qhasilla kanqa. Enemigosninchejqa mana amigosninchejmanta tʼaqayta atiwasunchu. w19.11 pág. 2 párrs. 1, 2; pág. 7 párr. 19

Satanasqa ‘llullakojkunaj tatan’. Payqa atiyninpi kajkunamanta valekuspa, Jehová Diosmanta, hermanosninchejmantawan llullasta parlan (Juan 8:44). Chaykuna ukhupi kashanku, Diospa llajtanta wasanchajkuna. Paykunaqa cheqa kajta qʼewispa, Jehovaj llajtanmanta llullasta parlanku. Chaytataj ruwanku Internetnejta, telenejta, radionejta, periodicosnejta ima. Chay llulla parlasqankoqa, ‘Supaypa laurashaj flechasnin’ jina. ¿Imatá ruwasunman pillapis chay llulleriosta willawajtinchej? Mana uyarinachu tiyan. Imaraykuchus noqanchejqa, Jehová Diospi creenchej, hermanosninchejpitaj atienekunchej. Chayrayku Diosta wasanchajkunataqa, manapuni uyarinchejchu. Imastachus nisqankuta yachayta munaspapis, paykunawanqa ni imarayku parlanchejchu nitaj discutinchejchu, imaraykuchus creeyninchej pisiyanman. ¿Tukuy imatachu ruwarqanchej Diosta wasanchajkunata mana uyarinapaj, nitaj paykunawan discutinapaj? Chayta ruwarqanchej chayqa, may sumaj. Jinapis sumajta qhawarikunallapuni tiyan. Imaraykuchus Satanaspataqa waj armasnin kapullantaj. w19.11 pág. 15 párr. 8; pág. 16 párr. 11

Imatapis ajllashaspaqa ima yuyaywanchus ruwayta munasqanchejta qhawarikuna. Jehová Diosqa imatapis chʼuwa sonqowan ruwananchejta munan. Chayrayku ima yuyaywanchus imatapis ruwayta munasqanchejta qhawarikuna, amataj wajkunatapis engañanachu. Mana chʼuwa sonqowanchu imatapis ruwasun chayqa, ichapis mana juntʼayta atisunchu. Uj joven, precursor regularta orqhosqanpi piensarina. Payqa uj mashkha killasta predicaytawan mana horasninta juntʼanchu, niñataj kusisqachu predican. Ichá payqa yuyarqa, Jehová Diosta kusichiyta munasqanrayku precursor kasqanta. Jinapis ichá tatasninta chayri wajkunata kusichiyta munasqanraykulla precursor karqa. Kaypiñataj tʼukurina. Bibliamanta yachakoj runa niña cigarrota pitananta nin. Uj iskay semanasta jina mana pitaytawan watejmanta pitaj churakullantaj. Jinapis Jehová Diosta munakusqanrayku, payta kusichiyta munasqanrayku ima, cigarro pitayta qonqapun (Col. 1:10; 3:23). w19.11 pág. 27 párr. 9; pág. 29 párr. 10

Apóstol Pabloqa yacharqa, wañupunankama Diosta sirvinanta, tʼinkantataj japʼinanta. Ajllasqa cristiano kasqanrayku, paypa tʼinkanqa “cielopi kausay” karqa. Jinapis chayta japʼinanpajqa kallpachakunallanpuni karqa (Fili. 3:14). Pabloqa munarqa Filiposmanta cristianos yuyayninkuta tʼinkankupi churanankuta. Chayrayku uj kikinchaywan paykunata yanaparqa. Payqa Filiposmanta cristianosman “cielopi llajtayoj” kasqankuta yuyaricherqa (Fili. 3:20). ¿Imaraykutaj chayta mana qonqanankuchu karqa? Chay tiempopi Roma llajtayoj runasqa, allinpaj qhawasqa karqanku, ashkha derechosniyojtaj karqanku. Ajllasqa cristianostajrí “cielopi llajtayoj” karqanku. Chaytaj Roma llajtayoj kaymanta nisqaqa, aswan sumaj karqa. Imajtinchus paykunaqa, aswan sumaj imasta japʼinanku karqa. Kay tiempomanta ajllasqa cristianospis, cielopi tʼinkankuta japʼinankupaj, mayta kallpachakushallankupuni. Paykunamantataj mayta yachakusunman. w19.08 pág. 6 párrs. 14, 15

Jesús kacharichiwasqanchejqa, israelitaspa Kacharipuna Watankupi imaschus kasqanmanta nisqaqa, aswan sumaj (Lev. 25:8-12). ¿Imaraykutaj chayta ninchej? Kacharipuna Watapi kacharichisqa esclavoqa, watejmanta esclavoman tukuyta atej. Chantá esclavo kaspapis chayri manapis wañupojpuni. Jehová Diosninchejqa Pentecostés 33 watapi apostolesman, waj runasmanwan atiyninta qorqa, wawasninpajtaj rejsikaporqa. Ajinamanta aswan qhepaman Jesuswan khuska cielopi kamachinankupaj (Rom. 8:2, 15-17). Jesús Nazaret sinagogapi leesqan profeciaqa, paykunata ñaupajta yanaparqa (Luc. 4:16-19, 21). Chay runasqa judiospa pantasqa yachachiyninkumanta, costumbresninkumanta ima kacharichisqa karqanku. Chantapis paykunaqa, Diospa ñaupaqenpi wañuyman apaj juchamanta kacharichisqa karqanku. Cristianospa Kacharipuna Watankoqa, 33 watapi qallarerqa. Chaypachaqa Jesuspa yachachisqasnin Diospa atiyninwan ajllasqa karqanku. Tukukonqataj Jesuspa Waranqa Watas kamachiynin tukukojtin. w19.12 pág. 11 párrs. 11, 12

Tatas, wawasniykichejta yanapaychej sumaj amigosniyoj kanankupaj. Tataspis jinallataj mamaspis, yachananku tiyan wawasninku pikunawanchus masichakushasqankuta, imatachus ruwashasqankutapis. Yachanallankutaj tiyan, wawasninku pikunawanchus Internetpi chayri celularpi parlashasqankuta. Imajtinchus “mana allinta purejkunawan” amigosta ruwakojtinkoqa, paykuna jina ruwayta, yuyayta ima qallarenqanku. Ashkha tatasqa, tukuy imata ruwanku wawasninku hermanoswan masichakunankupaj. Costa de Marfil suyupi tiyakoj NʼDéni sutiyoj hermanomanta, señoranmantawan parlarina. Paykunaqa congregacionesta waturej hermanota, wasinkupi alojaytapuni yachanku. NʼDéni nin: “Chayta ruwasqaykoqa, kuraj wawaykuta mayta yanaparqa. Payqa precursor, wakin kutistaj congregacionesta waturispa llankʼan”, nispa. Wawasniykichejman juchʼuymantapacha yachachinkichej chayqa, chay yachakusqankuta mana qonqanqankuchu (Pro. 22:6). Timoteomanta parlarina. Paymanqa “wawitamantapacha” awelitan Loida, maman Eunice ima, Jehová Diosmanta yachacherqanku (2 Tim. 1:5; 3:15). w19.12 pág. 25 párrs. 14, 16; pág. 26 párr. 17

Noqanchejpis atienekunapaj jina kasunman. Hermanosninchej yanapata necesitajtinku, mana “yanapasqayki” ninallachu, manaqa yanaparinapuni (Mat. 5:37; Luc. 16:10). Paykunaqa yanapananchejta yachaspa, sonqochasqas kanqanku. Uj hermana nin: “Amigosninchej yanaparinawanchejtapuni yachanchej chayqa, niña anchata llakikunchejchu”, nispa. Llakiypi tarikojkunaqa, atienekunku chay amigonkuman llakiyninkuta willarikuspa sonqochakuyta yachanku. Atienekunapaj jina amigo kanapajqa, pacienciayoj kananchej tiyan. Hermananchej Zulemataqa qosan saqerparerqa. Payqa llakiyninta sumaj amigosninman willakuspa sonqochakorqa. Pay nin: “Amigosneyqa pacienciawan uyariwarqanku, llakiyniymanta kutin kutita parlajtiypis”, nispa. Pillapis llakiyninta willariwajtinchej, sumajta uyarina. Ajinamanta sumaj amigos kasqanchejta rikuchisun. w20.01 págs. 10, 11 párrs. 9-11

Bibliaqa Jehová Diospa atiyninta japʼej kamachisninmanta parlan. Chaywanpis paykunamanta ashkhas, mana cieloman rinankupaj ajllasqachu karqanku. Chaykunamanta ujqa David karqa. Payqa Jehová Diospa atiyninta japʼerqa (1 Sam. 16:13). Chayraykutaj Diospa taripay mana atina yachayninta entienderqa, Bibliaj wakin capitulosnintapis qhelqarqa (Mar. 12:36). Jinapis apóstol Pedro nerqa: “Davidqa mana cielomanchu riporqa”, nispa (Hech. 2:34). Juan Bautistapis “Diospa atiyninwan juntʼa” karqa (Luc. 1:13-16). Jesusqa paymanta may sumajta parlarqa, jinapis nerqa cielopi kaj Gobiernoman mana risqanta (Mat. 11:10, 11). Jehová Diosqa atiyninta chay kamachisninman tʼukuna imasta ruwanankupaj qorqa, jinapis mana atiyninta paykunaman qorqachu cieloman rinankupaj. Chayqa mana ninayanchu paykuna mana cheqa sonqoschu kasqankuta. Jehová Diosqa paykunata kay jallpʼapi kausarichimonqa uj paraisopi kausakunankupaj (Juan 5:28, 29; Hech. 24:15). w20.01 pág. 25 párr. 15

Jehová Diosqa familianmanta kananchejpaj wajyariwarqanchej. Diospa familianmanta kajkunaqa, kausayninkuta payman qopunku, Jesús tukuy runasrayku wañusqanpitaj creenku. Diospa familianmanta kaspaqa, may kusisqa kanchej. Imaraykuchus mana qhasipajchu kausashasqanchejta yachanchej. Familianchejmanta wakenqa, cielopi wiñay kausayta suyakushanku. Wakintajrí kay jallpʼapi uj paraisopi wiñaypaj kausakuyta suyakushanchej. Jehová Diosqa, mayta munakuwasqanchejrayku familianmanta kananchejpaj yanapawanchej. Chaypajtaj Wawan Jesusta juchasninchejrayku wañunanpaj kachamorqa (Juan 3:16). Chayrayku Biblia nin: “Payqa preciowan rantisorqachej”, nispa (1 Cor. 6:20). Jehová Dios Wawanta kachamusqanrayku, payman qayllaykuyta atinchej. Aswan patapi kaj Dios kajtinpis, paytaqa “Tatáy” ninchej. Payqa manchay sumaj Tata. Uj salmista nerqa: “Imawantaj Tata Diosman juntʼasaj tukuy allin imasta ruwapuwasqanmantari?”, nispa. Ichá noqanchejpis ajinallatataj ninchej (Sal. 116:12). Noqanchejqa ni imawan Tatanchej Jehovaman juntʼayta atisunmanchu. Jinapis munakuwasqanchejrayku, noqanchejpis payta munakullanchejtaj. w20.02 pág. 8 párrs. 1-3