Junio

Profeta Samuelpa maman Anaqa ashkha llakiykunasniyoj karqa. Payqa watasta mana wawayoj kayta aterqachu (1 Sam. 1:2). Israel llajtapitaj, mana wawayoj warmeqa maldecisqapis kanman jina qhawasqa karqa. Chayrayku Anaqa pisipaj qhawakoj (Gén. 30:1, 2). Chantapis qosanpa ujnin warminwan khuska tiyakorqa. Chay warmitaj Peniná sutikorqa, ashkha wawasniyojtaj karqa. Payqa Anata kʼumuykachacherqa. Tukuy chay imasqa, Anata mayta llakicherqa. Chayrayku “waqallajpuni, manataj mikhojchu”. Payqa “sonqon ukhupi may llakisqa” karqa (1 Sam. 1:7, 10). Anaqa tukuy llakiyninta Jehová Diosman willakorqa. Kuraj kaj sacerdote Elimanpis llakiyninta willallarqataj. Paytaj nerqa: “Sonqochakuspa ripuy; Israelpa Diosnintaj uyarisuchun chay tukuy mañakusqaykita”, nispa. Chaymanta “Anaqa kutiporqa maynintachus jamusqanta. Chantá mikhorqa, manañataj llakisqachu karqa” (1 Sam. 1:17, 18). Payqa Diosmanta mañakuspa sonqonta tiyaykucherqa. w20.02 pág. 21 párrs. 4, 5

Tumpamantawan, Jehová Diosqa Satanaspa sajra mundonta chinkachenqa. “Wiñay kausayta japʼinankupaj allin sonqoyoj” kajkunallataj salvakonqanku (Hech. 13:48). Chayrayku familianchejmanqa astawanraj predicayta munanchej. Munakuyniyoj Jehová Diosninchejqa, “mana munanchu ni pi chinkachisqa kananta. Astawanqa munan tukuy pesachikunankuta” (2 Ped. 3:9). Salvakunapaj willaymantaqa iskaynejmanta parlasunman: miskʼi simiwan chayri runaj sonqonta nanachinapaj jina. Ichá mana rejsisqanchej runamanqa, kʼachallamanta predicanchej. Familianchejmantajrí ichapis sonqonkuta nanachinapaj jina predicanchej. Familianchejman Jehová Diosmanta imaynatachus qallariypi parlarisqanchejta yuyarikuspaqa, ichapis ninchej: “Amallapis jinata niymanchu karqa. Kʼacha simillawan willarinay karqa”, nispa. Familianchejwan Diosmanta parlarishaspaqa, kay diapaj texto nisqanman jina ruwana, chayta apóstol Pablo yuyaychawanchej. Mana ajinata ruwasunman chayqa, phiñachisunman, niñataj uyariwasunmanchu. w19.08 págs. 14, 15 párrs. 3-5

Imastachus Diospa Wawanmanta yachakusqaykipi piensariy. Jehová Diospa qhepantaqa, Jesuslla tukuymanta aswan atiyniyoj. Jesusqa Kacharichiwajninchej. Payqa tukuy sonqo kausayninta noqanchejrayku qorqa. Jesús yawarninta jichʼasqanrayku, juchasninchejmanta perdonta tariyta atinchej, Diosman qayllaykuyta atinchej, wiñay kausaytataj suyakuyta atinchej. Chaypajtaj wañuyninpi creesqanchejta ruwasqanchejwan rikuchinanchej tiyan (Juan 3:16). Jesusqa Kuraj kaj Sacerdotenchej. Payqa yanapayta munawanchej, wañuyninnejta salvacionta tarinanchejpaj, Diosman qayllaykunanchejpaj ima (Heb. 4:15; 7:24, 25). Jehová Diosqa Jesusta Gobiernonpi Rey kananpaj churan. Paynejtataj sutinta llimphuchanqa, tukuy llakiykunata chinkachenqa, paraisopitaj ashkha bendicionesta qowasunchej (Mat. 6:9, 10; Apo. 11:15). Jesusqa noqanchej yachakunanchejpaj jina kausarqa. Payqa wañupunankama Diospa munayninta ruwarqa, noqanchejpis pay jina ruwananchejpaj (Juan 4:34). Imatachus Biblia Jesusmanta yachachisqanta japʼikunki chayqa, Diospa munasqa Wawanta munakunki. Chay munakuytaj Diospa munayninta ruwanaykipaj tanqasonqa, imaynatachus Jesús ruwarqa, ajinata. w20.03 pág. 10 párrs. 12, 13

Wañuchisqa kanan karqa chay pʼunchaypi, Jesusqa ashkha kutista orakorqa. Discipulosninman wañuyninta yuyarikunankuta kamachishajtin, Jesusqa iskay kutita Diosman graciasta qorqa. Ujtaqa tʼantata partinanpaj, ujtataj vinota jaywananpaj (1 Cor. 11:23-25). Jesusqa Diosmanta mañakullarqataj, yachachisqasninwan Pascuata ruwasqankutawan (Juan 17:1-26). Getsemaní huertaman chayasqankutawantaj, Jesusqa ashkha kutista Diosmanta mañakullarqataj (Mat. 26:36-39, 42, 44). Wañupunan horatapis Tatanman qhaparikorqa (Luc. 23:46). Rikunchej jina, Jesusqa tukuy imata Tatanman willakorqa. Jesusqa Tatanmanta mana saykʼuspa mañakusqanrayku, llakiykunata aguantarqa. Apostolesninrí mana pay jinachu Diosmanta mañakorqanku, pruebas chayamojtintaj mana sinchʼitachu sayarqanku (Mat. 26:40, 41, 43, 45, 56). Noqanchejpis Diosmanta Jesús jina mana saykʼuspa mañakusun chayqa, sinchʼita sayasun. w19.04 pág. 9 párrs. 4, 5

Jehová Diosqa layqerío ruwaykunata chejnikun. Chayrayku israelitasman kamacherqa: “Amapuni ni mayqenniykichej wawasniykichejta jaywanata jina qonkichejchu ninapi qʼolachispa. Amapuni ni mayqenniykichej adivino kaychejchu, nitaj qhepaman imachus kananmantapis yachaj tukunkichejchu. Ama layqapis kankichejchu, ama mayqentapis layqachinkichejchu, ama adivinosta tapukunkichejchu, amallataj aysirista tapukunkichejchu. Tata Diosqa millachikun chaykunata ruwajkunamantaqa” (Deu. 18:10-12). Chay kamachiykuna israelitaspaj karqa chaypis, Jehová Diosqa kikillantapuni yuyan. Payqa layqerío ruwaykunata millachikullanpuni. ¿Imaraykutaj Jehová Diosninchej layqerío ruwaykunamanta qhawakunanchejta niwanchej? Imaraykuchus Satanasqa runasta chaywan pantachishan. Diabloqa layqeriosnejta runata creechin, wañusqaj alman kausashallasqantapuni (Ecl. 9:5). Chantapis runasta layqeriospi creechispa manchachin, Jehová Diosmantataj karunchachin. Satanasqa runas paypi atienekunankuta munan, manataj Jehová Diospichu. w19.04 pág. 21 párrs. 5, 6

Wawasta abusajqa, wawata mayta sufrichin. Chay abusasqa wawaqa, manaña wajkunaman kʼaskakuyta munanchu, manchi manchillataj wiñakun. Chayrayku wawasninchejta abusajkunamanta jarkʼananchej tiyan. Abusasqa kajkunatataj sonqochananchej, yanaparinanchejtaj tiyan (1 Tes. 5:14). Wawata abusaj cristianoqa, congregacionta chʼichichan (Mat. 5:16; 1 Ped. 2:12). Chayrayku wawasta abusaj runas mana pesachikunkuchu chayqa, congregacionmanta qharqosqa kanku. Wawasta abusaj cristianoqa leyta pʼakin. Jinapitaj autoridadespa contranpi juchallikun (Hechos 25:8, kikinchay). Jehovaqa mana ancianostachu leyesta juntʼachinankupaj churan, manaqa autoridadesta. Jinapis ancianosqa, wawasta abusajkunata mana autoridadespa castigonmanta jarkʼankuchu. w19.05 pág. 9 párrs. 4-7

Jehová Diosqa Sumaj Yachachejninchej. Paypa yanapayninwanqa, ima llakiytapis atipasunman (Isa. 30:20, 21). Diospa Palabranqa, “allin yachachisqa” kanapaj yanapawanchej, sumajtataj wakichiwanchej “tukuy ima allin kajta” ruwanapaj (2 Tim. 3:17). Bibliaj nisqanman jina kausakuspaqa, aswan yachayniyoj kasun, “kay mundoj” yachayninta qhatejkunamanta nisqaqa (Sal. 119:97-100). Kay mundoj yachaynenqa, sajra munayninchejta ruwanapaj tanqawanchej. Chayrayku ichapis kay mundomanta runas jina, yuyayta, ruwayta ima munanchej. Biblia niwanchej: “Allinta qhawakuychej, pajtataj pipis presota jina apakapusunkichejman runaj yachayninwan, qhasi manakaj yachachiykunawan ima. Chaykunaqa ñaupa runaspa yachachiyninkumanta jamun”, nispa (Col. 2:8). Biblia qhepa pʼunchaykunamanta nerqa jinapuni, runasqa “munaynillankuta maskʼajkuna” kanqanku (2 Tim. 3:4). May chhika runastaj khuchichakusqankurayku onqoykunata chimpachikunku, chaykunamanta ujtaj sida onqoy. Chaytaj sutʼita rikuchiwanchej, kay mundoj yachaynenqa manapuni allinchu kasqanta (2 Ped. 2:19). w19.05 pág. 21 párrs. 1, 2; pág. 22 párrs. 4, 5

Satanasqa israelitasta yuyacherqa, kausay kananpaj, chajrasninku sumajta poqonanpajpis, muyuyninkupi kaj llajtas jina costumbresta ruwananku kasqanta. Israelitaspa muyuyninkupi kaj llajtasqa, imaymana costumbresta ruwaspa diosesninkumanta parata mañakoj kanku. Jehovapi mana atienekoj israelitasqa, chʼaki wata mana kananpaj chay costumbresta ruwananku kasqanta creerqanku. Chayrayku Baal diospaj millay costumbresta ruwarqanku. Satanasqa israelitasta sajra munayninkuwan urmacherqa. Israelitaspa muyuyninkupi kaj nacionesqa, diosesninkuta yupaychanankupaj millay khuchiriosta ruwaj kanku. Templosninkupeqa phisu warmis, khuchi qharis ima kaj. Chay llajtaspeqa, qharipura chayri warmipura khuchichakuyta, waj millay khuchiriostapis mana juchapajchu qhawaj kanku (Deu. 23:17, 18; 1 Rey. 14:24). Paykunaqa chay tukuy imasta ruwaj kanku, chajrasninku sumajta poqonanpaj. Ashkha israelitas chay millay imasta ruwarqanku, llulla dioskunatataj sirverqanku. w19.06 pág. 2 párr. 3; pág. 4 párrs. 7, 8

Ashkha betelitas, misioneros, precursores especialespis, waj llankʼayta japʼerqanku. Chay hermanosqa Jehovapaj astawan llankʼaspa, mayta kusikoj kanku. Chayrayku chayta saqeyqa mana facilchu karqa. Noqanchej, paykunamanta ujnin kanchej chay, ¿imataj yanapawasunman Diosta kusisqallapuni sirvinapaj? Jehová Diospa qayllallanpipuni kanapajqa, Bibliata sapa día leena, leesqanchejpitaj tʼukurina. Chantapis mosoj congregacionninchejmanta hermanoswan tukuy atisqanchejta predicaj rina. Jehová Diosqa, payta sirvisqanchejta mana qonqanchu, niña ñaupajta jinachu paypaj llankʼajtinchejpis. Kapuwasqallanchejwan kusisqa kausakuna. Ama saqenachu Satanaspa mundonmanta llakiykuna, Jehová Diospaj ruwanasninchejpi pantachinawanchejta (Mat. 13:22). Ichá amigosninchej, familiasninchej, chayri wajkuna, allinninchejta munaspa qolqeta maskʼanata niwasunman. Ama chay niwasqanchejta kasunachu (1 Juan 2:15-17). Jehová Diospi atienekuna, payqa “necesitajtinchej” yanapanawanchejta nin. Jehovaqa yanapawasun sinchʼi creeyniyojllapuni, sonqo tiyasqataj kanapaj. Chantapis imatachus necesitasqanchejta qowasun (Heb. 4:16; 13:5, 6). w19.08 pág. 20 párr. 4; pág. 21 párrs. 7, 8

Ichá sinchʼi llakisqa kashanchej. Jehová Dios llakiyninchejta entiendesqanta yachayqa, mayta sonqochawanchej. Tatanchej Jehovaqa imaynachus kasqanchejta sumajta yachan, rejsintaj yuyasqanchejta, sonqonchejtapis (Sal. 103:14; 139:3, 4). Payman llakiyninchejta saqesun chayqa, payqa llakiyninchejta aguantanapaj yanapawasun. Sinchʼi llakisqa kashaspaqa, mana allinta yuyayta qallarisunman, nitaj imapajpis valorniyojchu kasunman. Ajinapi rikukojtinchej, Jehová Dios yanapayta atiwasqanchejmanta yuyarikuna. ¿Imaynatá pay yanapawanchej? Tatanchej Jehovaqa tukuy llakiyninchejta payman willakunanchejta niwanchej. Paytaj mañakusqanchejta uyariwasunpuni (Sal. 5:3; 1 Ped. 5:7). Chayrayku tukuy problemasninchejta payman willakuna. Jehová Diosninchejqa Palabrannejta, llajtannejta ima parlawanchej. Bibliapi wakin runaspa kausayninkumanta leespaqa, sonqochakunchej, suyakuyniyojtaj kanchej. Hermanosninchejpis kallpachallawasunmantaj (Rom. 15:4; Heb. 10:24, 25). w19.06 pág. 16 párrs. 7, 8

Qhatiykachawajtinchej Jehová Diospa ñaupaqenpi paran paranta waqarikuna. Munakuyniyoj Tatanchej Jehovaman llakiyninchejta, imastachus manchachikusqanchejtapis willarina (Lam. 2:19). Chayta ruwasun chayqa, payqa ‘sonqo tiyaykuyta qowasunchej, mayqentachus runas mana entiendeyta atinkuchu, chayta’. Diosmanta astawan mañakuspaqa, astawan payman qayllaykusun (Rom. 8:38, 39). Diospa Gobiernon bendicionesta apamunanmanta, ama iskayrayanachu (Núm. 23:19). Chay bendiciones juntʼakunanmanta iskayrayasun chayqa, Satanaswan paypa atiyninpi kajkunawan facilta manchachiwasun (Pro. 24:10; Heb. 2:15). Diospa Gobiernon ima bendicionestachus apamunanta estudiana, jinallataj chay bendiciones juntʼakunantapuni imaschus rikuchisqantapis. Chayta astawan entiendenapaj, Stanley Jones sutiyoj hermanomanta parlarina. Payqa Diosta yupaychasqanrayku, 7 watasta carcelpi wisqʼasqa karqa. ¿Imataj aguantananpaj yanaparqa? Pay nerqa: “Diospa Gobiernon ima bendicionestachus apamunanmanta mana tumpallatapis iskayrayarqanichu. Chaytaj aguantanaypaj kallpachawarqa”, nispa. Diospa nisqasninpi sinchʼita creesun chayqa, payman astawan qayllaykusun, nitaj imatapis manchachikusunchu (Pro. 3:25, 26). w19.07 pág. 2 párr. 1; pág. 3 párrs. 6, 7

¿Imaraykutaj runasta Jesuspa discipulosninman tukunankupaj yanapananchej tiyan? Imaraykuchus Cristoj yachachisqanta ruwajkunalla, Diosman qayllaykuyta atinku. Chantapis kay tiempopiña sumajta kausakuyta atinku, aswan qhepamantaj wiñay kausayta japʼenqanku (Juan 14:6; 17:3). Jesusqa uj jatun llankʼayta qowanchej. Jinapis mana sapanchejtachu saqerpariwanchej. Apóstol Pabloqa, paypis waj cristianospis “Dioswan khuska” llankʼasqankuta nerqa (1 Cor. 3:9). Juchasapas kajtinchejpis, Jehová Dioswan Cristowanqa uj sumaj llankʼayta qowanchej. Chantapis runasta Cristoj discipulosnin kanankupaj yanapaspaqa, mayta kusikunchej. Runasta Jesuspa yachachisqasninman tukuchinapajqa, allin sonqoyoj runasta maskʼananchej tiyan. Jesús kamachiwasqanchejman jina tukuy runasman predicasun chayqa, Jehovaj testigosnin, cheqa cristianos ima kasqanchejta rikuchisunchej. w19.07 pág. 15 párrs. 3-5

Ashkha runasqa, Bibliaj nisqan kausayninchejpi yanapawasqanchejta reparaspa, yachakuyta munanku. Nueva Yorkmanta uj hermana imatachus ruwasqanmanta parlarina. Payqa chinota parlaj runasman predican. Pay nin: “Paykunawan kʼacha kani, sumajtataj uyarini. Kayman recienllaraj chayamusqankuta niwajtinkutaj, tapurini: ‘¿Imaynalla kashanki? ¿Trabajota tarinkiñachu? ¿Kaymanta runas qanwan kʼachasllachu kanku?ʼ, nispa”. Hermananchejqa chayta ruwaspa, ashkha runaswan parlariyta qallarerqa. Uyarillajtinkupunitaj hermanaqa kaytawan nin: “¿Imataj yanapawasunman tukuywan allinta kausakunapaj? Bibliamanta uj yuyaychayta leeripusqayki. Nin: ‘Pichus phiñanakuyta qallarejqa qochapis phataykushanman jina; chayrayku chay phiñakuytaqa saqey manaraj jatunyaykushajtinʼ. Kaypi nisqan, ¿wajkunawan allinta kausakunapaj yanapawasunmanchu?”, nispa (Pro. 17:14). Noqanchejpis ajinata ruwasun chayqa, pikunachus yachakuyta munasqankuta reparasun. w19.07 pág. 23 párr. 13

Congregacionninchejman jampoj hermanoqa imaynachus kashasqanta entiendenanchejta necesitanqa. Ichapis pay chayri mayqen familianpis onqosqa kashan. Chayrí familianmanta pillapis wañupusqanrayku llakisqa kashan. Chantapis ichá ni piman willarejtinpis, ñaupa amigosninta faltachashan. Ajinapi rikukoj hermanoqa, llakisqataj kusisqataj kanman. Sonqon tiyaykunanpajqa tiempo pasanan tiyan. ¿Imaynatá congregacionninchejman jampoj hermanota yachaykukunanpaj yanaparisunman? Paywan predicaj llojsispa, ruwasqanchejwan yanaparispa ima. Uj hermana ashkha watasta waj suyupi Jehovapaj llankʼarqa. Pay nin: “Ñaupaj congregacionniypeqa, sapa día runasman Bibliamanta yachachej kani. Mosoj congregacionniypitaj, mana atillarqanichu uj textollatapis runaspaj leepuyta, ni videostapis rikuchiyta atejchu kani. Chaywanpis hermanosqa mayta yanapawarqanku. Paykunaqa revisitasninkuman, estudiosninkuman pusariwaj kanku. Paykunamanta yachakorqani imaynatachus kay lugarmanta runasman predicayta. Chayta ruwaspa watejmanta kusisqa karqani”, nispa. w19.08 pág. 22 párr. 10; pág. 24 párrs. 13, 14

Noqanchejpis Evodia jina, Síntique jinataj hermanospa pantasqasninkuta qhawasun chayqa, mana paykunata munakuyta atillasunchu. Imajtinchus tukuypis pantanchejpuni. Hermanosninchejpa pantasqasnillankuta qhawasun chayqa, niña paykunata munakusunchu. Kaypi piensarina: Ichá uj hermanoqa salonta pichaysinawanchejta qonqapunman. Chayraykutaj paypaj phiñakusunman. Paypa tukuy pantasqasninta yuyarikusunman chayqa, paypaj astawan phiñakusunman, niñataj munakusunmanchu. Ajinapi rikukuspaqa, Jehová Diospi piensarina. Payqa noqanchejpa pantasqasninchejta, chay hermanonchejpa pantasqasnintapis qhawashan, jinapis paytapis noqanchejtapis munakuwanchej. Chayrayku hermanosninchejta Jehová Dios jina munakuna, paykunaj allin ruwasqasninkutataj qhawana. Hermanosninchejta munakunapaj kallpachakusun chayqa, astawan ujchasqa kasun (Fili. 2:1, 2). w19.08 págs. 9, 10 párrs. 7, 8

Jehová Diosqa kʼumuykukoj sonqo kajkunata munakun, paykunallatataj sumaj amigosninpaj qhawan. “Diosqa jatunchakojkunaj contranpi sayaykun. Kʼumuykukoj sonqoyojkunamanrí, jatun khuyakuyninta qon”. Tukuyninchej munanchej Jehová Diosta kusichiyta, paypa qayllanpitaj kayta. Chayrayku kʼumuykukoj sonqo kanapaj kallpachakuna. Kʼumuykukoj sonqo runaqa mana jatunchakunchu, nitaj runaykachanchu. Biblia nisqanman jina, kʼumuykukoj sonqo runaqa Jehová Diosta, wajkunatapis paymanta aswan kurajta jina qhawan (Fili. 2:3, 4). Wakin runasqa manchalis kasqankurayku, kʼumuykukoj sonqo runasman rijchʼakunku. Wakintaj tatasninku wajkunata respetayta, kʼachastaj kayta yachachisqankurayku, kʼumuykukoj sonqo runasman rijchʼakunku. Jinapis ichá sonqonkupeqa jatunchakoj runas kanku. Chaytaj ima ratollapis sutʼi yachakonqa (Luc. 6:45). w19.09 pág. 2 párrs. 1, 3, 4

“Señorninchej Jesusmanta sumaj” willaykunaqa, paypa yachachiykunasnin kashan, chaytataj Bibliapi tarinchej. ¿Imaynatá chay sumaj willaykunata kasukusunman? Jesús yachachisqanman jina kausakuspa, Jehová Diosta yupaychayta ñaupajman churaspa, kamachiykunasninta kasukuspa, Gobiernonmanta willamuspa ima (Mat. 6:33; 24:14). Chantá kasukullanchejtaj, Cristoj hermanosninta yanapaspa, nisunman ajllasqa cristianosta llankʼayninkupi yanapaspa (Mat. 25:31-40). Tumpamantawantaj paykunañataj waj ovejasmanta kajkunata yanapanqanku (Juan 10:16). ¿Imaynatá chayta ruwanqanku? Armagedón guerra niraj qallarishajtin, tukuynin ajllasqa cristianosqa mana jaykʼaj wañoj cuerpota japʼenqanku, cielomantaj oqharisqa kanqanku. Chantá 144.000 ajllasqa cristianosqa, cielopi soldadosman ujchakonqanku. Uj tropallaña kaspataj, Gogta chinkachenqanku, ‘may chhika runasmanta’ kajkunatataj jarkʼanqanku (Apo. 2:26, 27; 7:9, 10). May chhika runasmanta kajkunaqa, mayta kusikonqanku ajllasqa cristianosta jallpʼapi yanapasqankumanta. w19.09 págs. 12, 13 párrs. 16-18

Jesús qowanchej chay llankʼayta ruwaspaqa samarikunchej. Noqanchejpataqa, sumaj pusajkuna kapuwanchej. Jehovaqa Aswan Patapi kaj Dios kaspapis, kamachisninwan mana sajrachu. Astawanpis paypaj llankʼasqankuta sumajpaj qhawan, agradecekuntaj (Heb. 6:10). Chantapis qʼepinchejta apanapaj, nisunman ruwanasninchejta juntʼanapaj kallpata qowanchej (2 Cor. 4:7; Gál. 6:5, sutʼinchaynin). Reyninchej Jesucristotaj, ruwasqanwan yachachiwanchej wajkunawan kʼachas kayta (Juan 13:15). Ancianostajrí kallpachakunku ‘jatun michejninchej’ Jesús jina kanankupaj (Heb. 13:20; 1 Ped. 5:2). Paykunaqa mayta kallpachakunku kʼachas kanankupaj, kallpachanawanchejpaj ima. Kallpachakullankutaj mana manchachikuspa jarkʼanawanchejpaj, yanapanawanchejpajtaj. Chantapis sumaj compañerosniyoj kanchej. Ruwashanchej chay llankʼayqa, may sumajpuni, hermanosninchejwan khuskataj llankʼashanchej. Paykunataqa mayta munakunchej, paykunapis munakullawanchejtaj. Imaynachus kasqankupi piensarina. Hermanosninchejqa llimphu kausayniyoj kanku. Jinapis mana yuyankuchu wajkunamanta aswan sumaj kasqankuta. Mana runaykachankuchu, nitaj wajkunata pisipaj qhawankuchu. Hermanosninchejqa mana llankʼaj masisninkuta jinallachu qhawawanchej, manachayqa sumaj amigosninkuta jina. Paykunaqa mayta munakuwasqanchejrayku, kausayninkutapis noqanchejrayku qoyta munanku. w19.09 pág. 20 párr. 1; pág. 23 párrs. 12-14

Apóstol Pabloqa ‘Jehová Diospa pʼunchaynin’ nispa, uj tiempomanta parlasharqa (1 Tes. 5:1-6). Chay tiempoqa qallarenqa, gobiernos ‘Jatun Babiloniata’, nisunman tukuy llulla religionesta chinkachinankupaj oqharikojtinku, tukukonqataj Armagedonpi (Apo. 16:14, 16; 17:5). Apóstol Pabloqa ‘Jehová Diospa pʼunchayninpaj’ wakichisqa kanapaj, imatachus ruwananchejta niwanchej. Pay nerqa: “Ama chay ujkuna jinaqa puñunachu. Astawanqa rijchʼarisqa, yuyayninchejpitaj kana”, nispa. ¿Imaynatá chayta ruwasunman? Ujqa kanman, politicaman mana chhapukunapaj allinta qhawarikuspa. Politicaman chhapukuspaqa, “kay mundomanta” runas jina kashasunman (Juan 15:19). Noqanchejtaj yachanchej, Diospa Gobiernollan allin kausayta apamunanta. Chayrayku runasta yanaparinanchej tiyan ‘rijchʼarisqas’ kanankupaj. Chaytataj ruwasunman, imatachus Biblia kay mundoj tukukuyninmanta nisqanta yachachimuspa. Manchay ñakʼariy qallarejtin, runasqa niña Jehová Diosmanta yachakuyta atenqankuchu. Chayrayku usqhayllata predicamunanchej tiyan. w19.10 pág. 8 párr. 3; pág. 9 párrs. 5, 6

Kʼuyuna librota qhelqayta tukusqankutawan, Jeremiasqa amigon Baructa kacharqa chay qhelqasqanta israelitaspaj leepunanpaj (Jer. 36:5, 6). Baructaj kausayninta wañuy pataman churaspapis, temploj pationman rerqa. Chaypitaj chay qhelqasqanta mana manchachikuspa “tukuy runaspa uyarinanta leeykorqa”. Jeremiasqa Barucpa ruwasqanmanta maytachá kusikorqa (Jer. 36:8-10). Reypa wasinpi kurajkunaqa, imatachus Baruc ruwasqanta yachaytawan paykunapajpis leeripunanta kamacherqanku (Jer. 36:14, 15). Chantá paykunaqa ninakorqanku: “Chay tukuy imastaqa reyman willananchej tiyan”, nispa. Rey Joacimqa imatachus Jeremías qhelqachisqanta uyariytawan, mayta phiñakorqa, chay kʼuyuna librotataj ruphaykucherqa. Chantá runasninta kamacherqa Jeremiasta, qhelqerin Baructawan presochanankuta. Jinapis Jeremiasqa mana mancharikorqachu. Astawanpis waj kʼuyuna librota japʼispa, qhelqerin Barucman jaywarqa. Chantá Jehová Diospa nisqasninta, watejmanta qhelqacherqa. Barucqa chaypi qhelqarqa, “rey Joacimpa ruphachisqan libropi qhelqasqa karqa, chay tukuyta” (Jer. 36:26-28, 32). w19.11 pág. 3 párrs. 4-6

Jehová Diosqa munayninta juntʼananpaj imallamanpis tukuyta atinman. Payqa wakin kutis tukorqa: Yachachejman, Sonqochajman, sumaj willaykunata Willajman ima (Isa. 48:17; 2 Cor. 7:6; Gál. 3:8). Jinapis Jehová Diosqa, munayninta juntʼananpaj ashkha kutispi runasmanta valekun (Mat. 24:14; 28:19, 20; 2 Cor. 1:3, 4). Payqa yachayta, kallpatawan qowasunman. Jinamanta munayninta noqanchejnejta juntʼananpaj. Wakin yachayniyoj runasqa ninku, chay tukuy imas Diospa sutin imachus niyta munasqanman jina kasqanta. Tukuypis Jehová Diospaj llankʼayta munanchej. Jinapis machitusña kasqanchejrayku, imaynachus kausayninchej kasqanrayku chayri wakin imasta mana ruwayta atisqanchejrayku, ichá yuyanchej Jehová Diospaj niña valesqanchejta. Wakenqa imaynatachus Diosta sirvishasqankuwan kusisqa kanku, nitaj paypaj astawan llankʼayta munankuñachu. w19.10 pág. 20 párrs. 1, 2

Tukuy imayoj kayta maskʼajtinchejqa, creeyninchej pisiyanman, Jehová Diospajtaj pisillataña llankʼasunman. Apóstol Pablo nerqa: “Ni mayqen runapis, soldado kashaspa waj ruwanasman satʼikunchu. Imaraykuchus payqa, pichus soldado kananpaj churarqa, chayta kusichiyta munan”, nispa (2 Tim. 2:4). Romano soldadosqa, soldado kashaspa mana waj imaspi trabajayta atejchu kanku. Uj sumaj soldado jinallataj, noqanchejpis mana waj imaswan musphaykachanchejchu. Noqanchejqa comandantesninchej Jehová Diosta, Jesustawan kusichiyta munanchej. Chaytataj aswan sumajpaj qhawanchej, Satanaspa mundon imatapis qonawanchejmanta nisqaqa. Chayrayku mayta kallpachakunchej, tiempochakunchejtaj Jehová Diosta sirvinapaj. Kikillantataj ruwanchej escudowan ninakoj creeyninchej sinchʼi kananpaj, Dios qowanchej chay maqanakuna pʼachatapis allinta japʼinapaj. Tukuy tiempo wakichisqas kananchej tiyan. Imaraykuchus apóstol Pablo nerqa: “Qhapajyaytapuni munajkunarí”, “creeymanta karunchakapunku”, nispa (1 Tim. 6:9, 10). w19.11 pág. 17 párrs. 12, 14, 15

‘Jehová Diospa pʼunchaynin’ qallarinanpajña kashajtin, runasqa “tukuy imapis allillan, ni imamanta llakikuna kanchu” nispa nenqanku (1 Tes. 5:1-6). Ñaupaj kaj Tesalonicenses 5:2 versiculopi ‘Jehová Diospa pʼunchaynin’ nispaqa, “manchay ñakʼariymanta” parlashan (Apo. 7:14). ¿Maykʼajtaj chay manchay ñakʼariy qallarenqa? Biblia niwanchej, qallarinanpajña kashajtin gobiernos “tukuy imapis allillan, ni imamanta llakikuna kanchu” nispa ninankuta. Religionesta kamachejkunarí, ¿chayta nillanqankutajchu? Ichapis. Jinapis chayta ninankupajqa supaykuna yuyaychanqanku. Chay willaytaj ashkha runasta pantachenqa. Imaraykuchus chayta creej runasqa, allin kausay kasqanta yuyanqanku. Jinapis chayllapi ni jaykʼaj jina manchay ñakʼariy qallarenqa. Paykunaj tukukuyninkutaj “ujllata chayamonqa, imaynatachus nacechikoj warmiman nanaynin chayarparimun, ajinata”. ¿Imataj kanqa Jehová Diosta kasukojkunawan? Chay manchay ñakʼariy ujllata qallarejtinpis, sumaj wakichisqa kashanqanku. w19.09 pág. 9 párrs. 7, 8

Imatachus ruwayta munasqanchejta sutʼita yachana. Chayta yachayqa imatachus nisqanchejta juntʼanapaj yanapawasun. Ichapis Bibliata sapa día leenanchejta ninchej. Jinapis mashkhatachus, ima ratotajchus leenanchejta mana yachanchejchu chayqa, ichá mana leesunchu. Kaypiñataj tʼukurina: Uj congregacionmanta ancianos ninku, hermanosta kallpachanankupaj visitarinankuta. Jinapis killas pasan, manataj ni mayqen hermanotapis visitankurajchu. ¿Imatá ruwankuman nisqankuta juntʼanankupaj? Uj listapi anotankuman mayqen hermanostachus visitarinankuta. Chantá maykʼajchus paykunata visitarej rinankupaj fechata churakunkuman. Chantapis atisqallanchejta ruwana. Ni mayqenninchejpis tukuy ima munasqanchejta ruwayta atisunmanchu. Imaraykuchus tiemponchej, kallpanchej, kapuyninchejpis mana tukuypatachu kikin. Chayrayku imastachus ruwayta atisqanchejta reparakuna, atisqallanchejtataj ruwana. Ichapis imatachus ruwayta munasqanchejta cambiananchej kanqa. w19.11 pág. 29 párrs. 11, 12

Isaías 65:21-23 versiculospi willawanchej, imaynachus kausay kay jallpʼapi aswan qhepaman kananta. Chaypachaqa mana jinallachu kakusunchej ni imata ruwaspa. Astawanpis Biblia nisqanman jina, ashkha ruwanayoj kasunchej, kusisqataj trabajasunchej. Jesús 1.000 watasta kamachiyta tukusqantawan, “Diospa tukuy ima ruwasqan juchaj atiyninmanta, wañuymantawan kacharichisqa” kanqa. ‘Chay jinamanta Diospa wawasnin jina kacharichisqa kasunchej’ (Rom. 8:21). Jehová Diosqa israelitas trabajanankupaj, jinallataj samarikunankupaj, uj tiempota churarqa. Chayllatataj llajtanpaj ruwanqa Jesuspa Waranqa Watas kamachiyninpi. Jehová Diosta yupaychayqa, kusisqa kanapaj yanapawanchej, paraisopipis yanapallawasunpuni. Chayrayku Jehová Diosta yupaychanapaj uj tiempo kanqapuni. Diosta yupaychaj runasqa, chay tiempopi sumaj trabajoyoj kasunchej, Jehová Diostataj sirvisunchej. Jesuspa Waranqa Watas kamachiyninpeqa, kusisqa kasunchej. w19.12 pág. 12 párr. 15; pág. 13 párrs. 17, 18

“Yachachiy” palabraqa, hebreo parlaypi niyta munan: “Imatapis kutin kutita yachachiy yuyayninpi japʼinankama”. Tatasqa ajinata wawasninkuman yachachinankupaj tiempochakunanku tiyan. Tatasqa wawasninkuman kutin kutita yachachispa, ichá wakin kutis saykʼunkuman. Jinapis chayta ruwanaykichejpaj kallpachakullaychejpuni. Ajinamanta wawasniykichejta yanapankichej Bibliaj nisqanta entiendenankupaj, chayman jinataj kausakunankupaj. Chayrayku wawasniykichejta allinta rejsiychej. Kay 127 Salmopi niwanchej, wawasqa tataspa ‘makinkupi flechas jina kasqankuta’ (Sal. 127:4). Soldadospa flechasninkoqa mana kikin materialmantachu ruwasqa kaj kanku, nitaj kikin tamañochu kaj kanku. Wawaspis manallataj kikinchu kanku. Chayrayku tatasqa, sapa uj wawankuman mana kikintachu yachachinanku tiyan. Kay tiempopi Israel suyumanta uj qhariwarmi, iskaynin wawasninkuta Jehová Diosta sirvinankupaj yanaparqanku. ¿Imaynatá chayta ruwarqanku? Paykuna ninku: “Wawasniykutaqa mana ujllapichu yachachej kayku. Astawanpis sapa ujninkuwan Bibliata estudiaj kayku”, nispa. Sapa tata qhawarinan tiyan, wawasnin ajinata yachachinata necesitasqankutachus manachus, jinallataj atinantachus manachus chayta. w19.12 pág. 26 párrs. 18-20

Sinchʼi llakiypi kashaspaqa, wajkunaj yanapayninkuta mayta agradecekunchej. Ryan sutiyoj hermanonchejpa tatanqa uj accidentepi wañuporqa. Pay nin: “Llakisqa kashaspaqa, mana imatapis ruwayta atillanchejchu. Ajinapi kashajtinchej wajkuna yanapariwasqanchejqa, mayta sonqochawanchej”, nispa. Wajkunata imallapipis yanaparispaqa, paykunata mayta sonqochasunman. Jesuspa yachachisqan Marcosqa, ashkha ruwanasniyoj karqa. Mana tiempoyoj kaspapis, Marcosqa apóstol Pablota sonqochananpaj tiempochakorqa. Pablotaj Marcospa yanapayninta mana manchachikuspa mañakoj. Hermananchej Angelaqa, awelitanta wañuchisqankumanta may llakisqa kasharqa. Chay kutispi hermanos sonqochasqankumanta mayta agradecekun. Pay nin: “Amigosninchej tukuy sonqo yanapariyta munawajtinchejqa, paykunawan parlariyta mana manchachikunchejchu. Paykunaqa yanapariytapuni munawanchej”, nispa. Waj hermanos, ¿ajinallatatajchu noqanchejmanta ninkuman? w20.01 págs. 11, 12 párrs. 14-16

Sichus ajllasqa cristianos Señorpa Cenanpi tʼantata mikhunkuman, vinotapis ujyankuman, manataj Jehová Diospa kamachisqanman jinachu kausankuman chayqa, Señorpa Cenanta ‘pisipaj qhawashankuman’ (Heb. 6:4-6; 10:26-29). Ajllasqa cristianosqa, yachanku wañupunankukama Jehová Diosta kasukunanku kasqanta. Chayta ruwajtillanku, tʼinkankuta japʼenqanku. ‘Chay tʼinkataj cielopi kausay, mayqentachus Dios paykunaman Cristo Jesusnejta qonqa, chay’ (Fili. 3:13-16). Jehová Diospa atiyninta japʼejkunaqa, astawan “kʼumuykukoj sonqo” kanku, manataj jatunchakunkuchu (Efe. 4:1-3; Col. 3:10, 12). Chayrayku ajllasqa cristianosqa, mana yuyankuchu wajkunamanta aswan sumaj kasqankuta. Paykunaqa yachanku, Jehová Dios tukuy kamachisninman atiyninta qosqanta, nitaj paykunallamanchu. Chantapis ajllasqa cristianosqa, mana yuyankuchu Bibliaj yachachiykunasninta wajkunamanta astawan entiendesqankuta. Ni jaykʼajtaj waj cristianota ninkumanchu: “Qanpis cieloman rinapaj ajllasqa kanki. Señorpa Cenanpi tʼantata mikhuwaj, vinotapis ujyawaj”, nispa. Ajllasqa cristianosqa kʼumuykukoj sonqo kanku, yachankutaj Jehová Dioslla cieloman rejkunata ajllayta atisqanta. w20.01 pág. 27 párrs. 4, 5

Jehová Diosqa munan payman qayllaykunanchejta, paywan sumajta parlarikunanchejta ima. Payqa niwanchej, mana saykʼuspa paymanta mañakunanchejta, uyarinawanchejtataj (Rom. 12:12). Diosqa may chhika ruwanasniyoj kaspapis, mañakusqanchejta uyarinpuni, manataj saykʼupunchu. Noqanchejrí, ¿imaynatá payta uyarisunman? Bibliata, publicacionestawan leerispa. Publicacionesqa Bibliaj nisqanta entiendenapaj yanapawanchej. Chantá payta uyarillanchejtaj, tantakuykunapi imatachus nikusqanta sumajta uyarispa. Jehová Dioswan sapa kuti parlarispa, payman astawan qayllaykusun. Jehová Diosqa munan sonqonchejpi kaj chhikata payman willakunanchejta (Sal. 62:8). Chayrayku allin kanman, kay tapuykunapi piensarinanchej: ¿Jehová Dioswan uj sumaj amigowan jinachu tukuy imamanta parlarinchej? Chayrí, ¿uj grabadora jinachu kikin imasllata ninchej? Jehová Diosninchejta mayta munakusqanchejrayku, paypa qayllallanpipuni kayta munanchej. Chaypajtaj paywan sapa kuti parlarinanchej tiyan. Jehovaman sonqonchejpi kaj chhikata willakuna, imaschus kusichiwasqanchejta, imastajchus llakichiwasqanchejtapis. Payqa yanapata mañakojtinchej yanapawasunpuni. w20.02 pág. 9 párrs. 4, 5

Jehová Diosqa ovejitasninta ancianospa makinkuman churan, paykunata qhawanankupaj. Ancianosqa Nehemiasmanta ashkhata yachakunkuman. Nehemiasqa Judá suyupi kamachej kasqanrayku, ashkha runasta kamachinanpaj autoridadniyoj karqa (Neh. 1:11; 2:7, 8; 5:14). Payqa Jerusalenman chayaspa ashkha problemasta rikorqa. Judiosqa templota pisipaj qhawachisharqanku. Chantapis levitasman qonanku karqa, chayta mana qosharqankuchu. Samarikuna Pʼunchaytapis mana waqaychasharqankuchu. Wakin judiostajrí waj suyusmanta warmiswan casarakusqanku. Nehemiasqa chay problemasta allinchanan karqa (Neh. 13:4-30). Nehemiasqa autoridadniyoj kaspapis, mana judioswan munajta mana munajta kasuchikorqachu. Astawanpis Jehová Diosmanta yanapata mañakorqa, Diospa leyesnintataj llajtanman yachacherqa (Neh. 1:4-10; 13:1-3). Chantapis Nehemiasqa kʼumuykukoj sonqo karqa. Jerusalén llajtaj perqasnintapis ruwaysikorqa (Neh. 4:15). w19.09 pág. 16 párrs. 9, 10