Julio

Ichá amigonchej chayri familiarninchej, imatapis ruwaspa chayri parlaspa sonqonchejta nanachiwanchej. Chaytaj phutichiwanchej. Ajinapi rikukuspa imatachus Ana ruwasqanmanta yuyarikuna. Paytaqa qosanpa ujnin warmin kʼumuykachacherqa (1 Sam. 1:12). Noqanchejpis Ana jina Jehová Diosmanta unayta mañakusunman. Payman willakuna imachus llakichiwasqanchejta, imatachus manchachikusqanchejtapis. Mañakuyninchejqa mana manchay kʼachitupunichu kanan tiyan, nitaj sumaj yuyayniyoj runaspa parlasqanku jinachu. Llakisqa kaspaqa, Jehová Diosman ichá waqaspa willakusun chayri imatapis parlarparillasun. Jinapis Jehová Diosqa uyariwasunpuni. Chantapis payman llakiyninchejta willakushaspaqa, imatachus Filipenses 4:6, 7 nisqanta ruwanallataj tiyan. Apóstol Pabloqa chay versiculospi nin, mañakushaspa Jehová Diosman agradecekunata. Jehová Diosmanqa agradecekusunman: kausayta qowasqanchejmanta, tukuy imata ruwasqanmanta, munakuwasqanchejmanta, qhepaman sumaj kausayta qonawanchejmanta ima. w20.02 pág. 21 párrs. 3, 6

Parlayta atisqanchejqa Jehová Diospa regalon (Éxo. 4:10, 11; Apo. 4:11). Chayrayku allinta parlananchejpaj Palabrannejta yachachiwanchej. Jehová Diosmanta, Gobiernonmantawan, ima ratollapis parlarina tiyan (Mat. 24:14; Rom. 10:14). Chayta ruwaspaqa, Jesús jina ruwasunchej. Payqa nerqa Tatanmanta cheqa kajta parlaj jamusqanta (Juan 18:37). Jinapis imaynatachus wajkunawan parlasqanchejta qhawarikunanchej tiyan. Pillamanpis Jehová Diosmanta willarishaspaqa, “llampʼu sonqowan”, ‘chay runata sonqomantapacha jatunpaj qhawaspataj’ parlana. Chantapis imatachus yuyasqanta, creesqantapis respetana (1 Ped. 3:15). Ajinata predicaspaqa, mana qhasitachu parlasun. Astawanpis runasta yachachisun, ichá sonqonkumanpis chayasun. Uj hermana chayri uj hermano yuyaycharinata necesitan chayqa, ancianosqa yuyaycharinanku tiyan. Jinapis sumajta qhawarikunanku tiyan, ima ratochus yuyaychanankuta. Ajinamanta chay hermanota chayri hermanata mana pʼenqaypi rikhurichinankupaj. w20.03 pág. 18 párrs. 2-4

¿Imaraykutaj Jehová Diosmanta mañakuna tiyan? Creeyninchej yapakunanpaj (Luc. 17:5; Juan 14:1). Satanás imaymana pruebasta churawasqanchejrayku, sinchʼi creeyniyoj kananchej tiyan (Luc. 22:31). Creeyninchejqa problemas qhatiriwajtinchej sonqo tiyasqas kanapaj yanapawasun. Imaraykuchus creeyniyoj kaspaqa, llakiyninchejta chinkachinapaj tukuy atisqanchejta ruwaytawan, Jehová Diospa makinpi saqesun. Jehová Dios yanapanawanchejpi atienekusun chaytaj, sonqo tiyasqas kasunchej (1 Ped. 5:6, 7). Diosmanta mañakoyqa, ima llakiypi kashajtinchejpis sonqo tiyasqa kanapaj yanapawanchej. Hermanonchej Robertmanta parlarina. Payqa 80 watasniyoj, anciano jinataj yanapakushan. Pay nin: “Noqataqa llakiykunata aguantanaypaj Filipenses 4:6, 7 mayta yanapawan. Wakin kuti qolqemanta pisisqa karqani, uj tiempotaj niña ancianochu karqani”, nispa. ¿Imataj hermanonchejta sonqo tiyasqa kananpaj yanapan? Pay nin: “Ima llakiy chayamuwajtinpis, chay rato Diosmanta mañakuni. Diosman kutin kutita, sonqomantapachataj llakiyniyta willakuni chayqa, sonqo tiyasqa kani”, nispa. w19.04 págs. 9, 10 párrs. 5-7

Wawata abusajqa, Diospa contranpi jatun juchata ruwan. Runa masinpa contranpi juchallejqa, Diospa contranpi juchallikullantaj. Jehová Diosninchej israelitasman qosqan Leypi piensarina. Chay Leypi nisqanman jina, suwakojpis runamasinta engañajpis, “Diospa contranta” juchallikoj (Lev. 6:2-4). Wawasta abusaj cristianoqa, abusasqa wawa manchi manchilla wiñakunanpaj juchayoj. Chayta ruwaspaqa Jehová Diospa contranpi juchallikun, sutintapis chʼichichan. Rikunchej jina, wawasta abusayqa Diospa contranpi manchay millay juchapuni. Torremanta Qhawaj, ¡Rijchʼariy! revistaspi ashkha yachachiykuna llojserqa: abusasqa kajkuna ñaupajman rinankupaj, wajkuna paykunata yanapanankupaj, sonqochanankupajtaj, tatas wawasninkuta jarkʼanankupaj ima. Chantapis ancianosqa, congregacionpi chay millay jucha kajtin, imatachus ruwanankuta yachanankupaj kamachiykunata japʼillankutaj. Diospa llajtanqa chay kamachiykunata sapa kuti qhawaykurinku, chʼuwachana kajtintaj chʼuwacharqonku. w19.05 pág. 9 párrs. 8, 9

Diospa Palabranqa sumaj filochasqa espada jina, Supaypa llulla yachachiykunasninta tukuchinapaj (Efe. 6:17). Bibliaqa sutʼita nin, wañusqasqa jallpʼallaña kasqankuta, nitaj paykunawan parlayta atisqanchejtapis (Sal. 146:4). Diospa Palabranqa nillawanchejtaj, Jehová Dioslla imachus qhepaman kananta sumajta yachasqanta (Isa. 45:21; 46:10). Bibliata sapa día leespa, leesqanchejtataj sonqonchejman churaspaqa, demoniospa yachachiykunasninkuta mana creesunchu, chejnikusuntaj. Chayrayku layqerío ruwaykunaman ni imaynamanta chhapukunachu. Cristianosqa layqerío ruwaykunaman ni imaynamanta satʼikunchejchu. Mana tapukamunchejchu aysirista, yatirista, ni jampiristapis. Nillataj wañusqaswan parlayta maskʼanchejchu. Mana ima costumbretapis almapaj nispa ruwanchejchu. Manallataj adivinosta chayri estrellaspi suerteta qhawajkunata tapukamunchejchu. Chay imasta ruwaspaqa, imaymana llakiykunapi rikukusunman. Chantapis Supaypa, sajra angelesninpa makisninkuman ima churakushasunman. w19.04 págs. 21, 22 párrs. 8, 9

Kay mundoj yuyayninman jina kausaj runasqa, Bibliaj nisqanta manakajpaj qhawanku, nitaj valechinkuchu. Paykunaqa ninku: “Atajakunawanchej kajtin, imapajtaj Dios qhariwarmi jina puñuykuyta munanapaj ruwawarqanchejri”, nispa. Runasqa chayta ninku, ima munayninchejtapis kasunalla kasqanta yuyasqankurayku. Bibliatajrí mana chaytachu nin. Astawanpis niwanchej, mana tukuynin munayninchejtachu kasuna kasqanta, sajra munayninchejtapis atipayta atisqanchejta (Col. 3:5). Jehová Diosqa casado kausayta rikhuricherqa, qosawan warmiwan khuska puñuykuspa kusisqa kanankupaj (1 Cor. 7:8, 9). Kay mundoj yuyayninmanta nisqaqa, Bibliaqa yachachiwanchej qhariwarmi jina puñuykuy casarasqas kusikunankupaj kasqanta (Pro. 5:18, 19). Chantapis nillantaj: “Sapa ujniykichej yachanaykichej tiyan, imaynatachus cuerpoykichejta kamachiyta. Ajinamanta cuerpoykichej llimphuchasqa, allinpaj qhawasqataj kananpaj. Qankunaqa ama Diosta mana rejsej runas jinaqa kaychejchu. Paykunaqa sinchʼi munapayaywan qʼoñirisqa kanku” (1 Tes. 4:4, 5). w19.05 págs. 22, 23 párrs. 7-9

Jehová Diosqa mana saqenqachu gobiernos kamachisninta chinkachinankuta. Imaraykuchus paykunaqa ‘sutinta apanku’, Jatun Babiloniamantataj llojsipunku (Hech. 15:16, 17; Apo. 18:4). Wajkunatapis kikinta ruwanankupaj yanapashanku. Chayrayku Diospa kamachisnenqa, Jatun Babiloniaj ‘castigosninta’ mana japʼenqankuchu. Jinapis imaschus kanqa chayta aguantanankupaj, sinchʼi creeyniyoj kananku kanqa. (Eze. 38:1, 2, 8). Tukuy llulla religiones chinkachisqa kasqankutawan, uj religionllaña kanqa. Chaytaj Jehová Diospa llajtan kanqa. Satanastajrí paykunapaj mayta phiñakonqa. Chayrayku ‘millay willaykunamanta’ valekuspa, uj qotu nacionesta tanqanqa Diospa llajtanta chinkachiyta munanankupaj (Apo. 16:13, 14). Chay qotu nacionestaqa, ‘Magog jallpʼamanta Gog’ sutiwan rejsikun. Chay naciones Diospa llajtanta chinkachinankupaj oqharikojtinku, Armagedón guerra qallarenqa (Apo. 16:16). w19.09 pág. 11 párrs. 12, 13

Israelitaspa tiemponpi, Satanasqa llulla dioskunata yupaychaywan paykunata millay kausayniyoj kanankupaj tanqarqa. Kunanpis chayllatataj ruwashan. Ashkha iglesiaspi millay kausayniyoj runasta qhawallanku, chayri chay ruwaykuna allillan kasqanta yachachinku. Chayrayku ashkhas, Diosta sirvisqankuta nispapis, mana llimphu kausayniyojchu kanku. Apóstol Pabloqa romanosman qhelqasqanpi, imaynachus chay runas kasqankuta willawanchej (Rom. 1:28-31). “Mana allin imasta” ruwasqankupeqa, imaymana khuchichakuykuna kashan, qharipura chayri warmipura khuchichakuypis (Rom. 1:24-27, 32; Apo. 2:20). Noqanchejqa Bibliaj kamachiykunasninta kasukunanchejpuni tiyan. Runaspa yachachiykunasninkoqa, Diospa kamachiykunasninman churanakun. Chay yachachiykunaqa, mana yanapawanchejchu Diospa atiyninpa poqoyninta wiñachinapaj. Astawanpis ‘sajra munayninchejta ruwanapajʼ tanqawanchej (Gál. 5:19-23). Chantapis umata oqharinapaj, may kasqanchejta yuyakunapaj ima tanqawanchej. Chayrayku ashkha runas, “paykunallata munakojkuna” kanku (2 Tim. 3:2-4). Jehová Diostajrí munan llampʼu sonqos, kʼumuykukoj sonqotaj kananchejta (2 Sam. 22:28). w19.06 págs. 5, 6 párrs. 12-14

Profeta Eliasqa Jehová Diosta sajra tiempopi yupaycharqa, ashkha llakiykunapitaj rikukorqa. Jehová Diosqa, profeta Eliasta llakiyninpi yanapananpaj uj sumaj amigota qorqa. Payqa Eliseowan yanapachikunanta nerqa. Noqanchejpis uj sumaj amigoyoj kasunchej chayqa, chay amigonchej llakiypi kashajtinchej yanapawasun (2 Rey. 2:2). Jinapis ichá llakiyninchejmanta parlarinapaj, mana uj sumaj amigo kapuwanchejchu. Jina kajtin, Jehová Diosmanta mañakuna sumaj amigota tarinapaj. Ajinamanta llakisqa kashajtinchej, chay amigonchej sonqochawasun. Jehovaqa Eliasta llakiyninta aguantananpaj kallpacharqa, yanaparqataj payta sirvinallanpajpuni. Eliaspa llakiykunasnenqa, noqanchejtapis kallpachawanchej. Ichapis sinchʼi llakiykunapi kashaspa, saykʼusqalla, sonqo pʼakisqataj kasunchej. Jinapis Jehová Diosmanta mana kacharikusunchu chayqa, payqa kallpata qowasun yupaychanallanchejpajpuni (Isa. 40:28, 29). w19.06 pág. 15 párr. 4; pág. 16 párrs. 9, 10

Diospa Gobiernonmanta runasman willayqa, mana manchachikoj kanapaj yanapawasun. Predicayqa Jehovapi atienekunapaj, runasta mana manchachikunapaj ima yanapawanchej. Imaynatachus mikhusqanchej kallpayoj kanapaj yanapawanchej, ajinallatataj predicaypis mana manchachikoj kanapaj yanapawanchej. Chayrayku predicana wasimanta wasi, ashkha runas kanku chaypi, negociospi, chayri mayllapipis. Kunanmantaña mana manchachikuspa predicasun chayqa, autoridades jarkʼawajtinchejpis predicallasunpuni (1 Tes. 2:1, 2). Uj hermanamanta parlarina. Payqa may valiente karqa, nitaj Jehová Diosta wasancharqachu. Chay hermanaqa Nancy Yuen sutikun. Payqa uj metro khuskanniyojllata miderqa, nitaj pitapis manchachikullajchu. Hermana Nancyqa Diospa Gobiernonmanta willasqanrayku, China suyupi 20 watas kurajta carcelpi wisqʼasqa karqa. Chay suyumanta autoridadesqa, payta tapusqankutawan “may tercapuni” kasqanta nerqanku. w19.07 págs. 5, 6 párrs. 13, 14

Wakin runasqa Bibliamanta mayta yachayta munanku. Wakintajrí mana yachayta munallankuchu, noqanchejtaj yachayta munanankupaj yanapananchej tiyan. Runas Bibliamanta yachakuyta munanankupajqa, imamantachus parlananchejta sumajta yuyaychakunanchej tiyan. Imastachus runas yachayta munasqankupi piensarina. Chantá imaynatachus chaymanta parlarinanchejpi tʼukurina. Predicacionpeqa wasiyojta saludariytawan nisunman: “Kay tiempopi tukuypis ashkha problemasniyoj kanchej. Wakin runasqa uj sumaj gobiernolla chay problemasta allinchananta ninku. Qan, ¿imatá niwaj?”, nispa. Chantá Daniel 2:44 versiculota leeripusunman, sutʼincharisunmantaj. Manachayrí runasman nisunman: “Tukuypis wawasninchej allin runas kanankuta munanchej. ¿Imataj wawasninchejta sumajta uywanapaj yanapawasunman?”, nispa. Chantá Deuteronomio 6:6, 7 versiculosta leeripusunman, sutʼincharisunmantaj. Runasta Cristoj discipulosnin kanankupaj yanapaspaqa, mayta kusikunchej. w19.07 pág. 15 párrs. 4, 6, 7

Asiaj ujnin lugarninmanta hermanoqa, Diospi mana creej runasman unaytaña predican. Pay nin: “Kay suyupi ashkha runasqa, Diospi mana creesqankuta nispa, kay lugarmanta diosespi mana creesqankuta ninku. Chayrayku paykunaman nini: ‘Noqapis mana creenichu runaj ruwasqan dioskunapeqa’, nispa. Chantá Jeremías 16:20 versiculota leeripuyta yachani. Chantá tapurini: ‘¿Imaynatá yachasunman mayqen dioschus cheqa Dios kasqanta?’, nispa. Kutichiwasqanta uyariytawan, Isaías 41:23 versiculotañataj leeripuni. Chaypi nin. ‘Allinta willawayku qhepaman imaschus kananta, ajinamanta yachanaykupaj cheqamanta dioskuna kasqaykichejta’, nispa. Chantataj imatachus Jehová Dios qhepaman kananta nisqanta willani”, nispa. Waj hermanotaj nin: “Noqaqa imaynatachus Biblia yanapawasqanchejmanta parlarini. Chayrí parlarini profecías juntʼakusqanmanta, manachayqa estrellasmanta, planetasmantawan. Chaywan reparachini tukuy imata ruwaj Dios kasqantapuni, may yachayniyojtaj kasqanta. Diospi creeyta qallarejtinkutaj, imatachus Biblia Jehová Diosmanta nisqanta yachachini”, nispa. w19.07 págs. 23, 24 párrs. 14, 15

Chay allin imasqa kashan, Jehová Diospa sutinta jatunchay, munaynin juntʼakunan, congregacionpi ujchasqa, allintataj kausakunanchej (Mat. 6:9, 10; Juan 13:35). Kausayninchejpi chay imasta ñaupajman churasunchej chayqa, Jehová Diosta munakusqanchejta rikuchisunchej. Apóstol Pablo nillarqataj “mana kʼaminas” chayri mana juchayoj kananchejta. Chaywanqa mana nisharqachu ni imapi pantananchejta. Jinapis astawan munakuyniyoj kanapaj kallpachakojtinchej, allin imastataj reparayta yachajtinchej, Jehová Diospa ñaupaqenpi mana kʼaminas kasunchej. Jehová Diosta, hermanosninchejta ima munakusqanchejta rikuchisunman, hermanosninchejta mana pantachinapaj kallpachakuspa. Pablo ‘wajkunata mana pantachinanchejta’ nisqanta kasukunanchej tiyan. Ichapis imawanchus kusirikusqanchej, imaynatachus vistikusqanchej, chayri imapichus llankʼasqanchej, wajkunata pantachinman. Imatachus ruwasqanchej mana juchachu kajtinpis, wajkunaj sonqonkuta nanachinman, pantachinmantaj chayqa, niña allinchu kanman (Mat. 18:6). w19.08 pág. 10 párrs. 9-11

Kay 1935 watamantapacha, Jehovaj testigosnenqa sutʼita entiendenchej pikunachus ‘may chhika runas’ kasqankuta. May chhika runasqa, Jehová Diosta tukuy sonqo sirvej cristianos kanku, kay jallpʼapi wiñay kausaytataj suyakushanku (Apo. 7:9, 10). Chantapis manchay ñakʼariymanta salvakunankupaj, “tukuy jamoj imasmanta” lluspʼinankupaj ima, sinchʼi creeyniyoj kananku tiyan. Chayrayku Cristo niraj 1.000 watasta kamachiyta qallarishajtin, Jehovaj kamachiykunasninta rejsinanku tiyan (Luc. 21:34-36). May chhika runasmanta kajkunaqa, kay jallpʼapi wiñay kausayta kusiywan suyakushanku. Paykunaqa yachanku Jehovalla ajllasqanta pikunachus cielopi kausanankuta, pikunatajchus kaj jallpʼapi kausanankuta. Ajllasqa cristianos, jinallataj may chhika runasmanta kajkunapis, yachanku tʼinkata japʼinankuta Jesús paykunata preciowan kacharichisqanrayku. “Chaytaj Diospa regalon, mayqentachus jatun khuyakuyninrayku qorqa” (Rom. 3:24). w19.09 pág. 28 párr. 10; pág. 29 párrs. 12, 13

Jehová Dios mosoj llankʼayta qowajtinchej, kusisqa juntʼayta atisunman. Ama yuyanachu ñaupaj llankʼayninchejta mana allinta ruwasqanchejrayku cambiawasqanchejta, nillataj yuyanachu niña valesqanchejta. Astawanpis imaynatachus Jehová yanapashawasqanchejta reparana, predicanallapunitaj. Ñaupa tiempomanta cristianos jina ruwana. Paykunaqa chʼeqerasqa kaspa, “maymanchus risqankupi Diospa palabranmanta sumaj willaykunata” willallarqankupuni (Hech. 8:1, 4). Tukuy atisqanchejta predicajtinchejqa, ashkha runasta yanapasunman. Imachus uj suyupi kasqanmanta parlarina. Chay suyumanta ashkha precursoresta wijchʼumorqanku. Paykunataj waj suyuman riporqanku, chaypitaj parlayninkupi ashkha yanapa necesitakorqa. Chayrayku parlayninkupi predicallarqankupuni. Pisi killasninman mosoj grupos rikhurerqa, chay grupostaj rato wiñarqa. Jehovapaj ruwashanchej chay llankʼay mayta gustawajtinchejpis, kusisqa kananchejqa mana chaymantachu kashan. Manachayqa Jehová Dioswan allinpi kasqanchejmanta kashan. Chayrayku paypa qayllallanpipuni kana, paypitaj atienekuna. Payqa yachayta, yuyaytawan qowasun, yanapawasuntaj. Runasta yanapayta munasqanchejrayku, ñaupaj llankʼayninchejta munakorqanchej. Mosoj llankʼayninchejtapis tukuy sonqo ruwasun chayqa, Jehová Dios yanapawasunchej chay llankʼayta munakunapaj (Ecl. 7:10). w19.08 págs. 24, 25 párrs. 15, 16

Jehová Diosqa tukuy imata ruwasqanrayku, kamachiykunata qonawanchejpaj derechoyoj. Chayrayku payta kasukunanchej tiyan (Apo. 4:11). Jehová Diosta kasukunallanchejtaj tiyan, paylla sumaj Kamachej kasqanrayku. Unaymantapacha ashkha runas, runa masinkuta kamachinku. Jinapis Jehová Dioslla aswan sumaj Kamachej. Imaraykuchus payqa may yachayniyoj, munakuyniyoj, khuyakuyniyoj, kʼachataj (Éxo. 34:6; Rom. 16:27; 1 Juan 4:8). Jehová Diostaqa kasukunchej, tukuy nisqasninta ruwanapaj kallpachakuspa, mana yachasqallanchejpi atienekuspa ima (Pro. 3:5). Jehová Diospa tukuy ruwasqasninpi may kʼacha kasqan rikukun. Chayta yachaspataj payta kasukuyta atillanchej (Sal. 145:9). Jehová Diosta astawan rejsispaqa, astawan payta munakunchej. Astawan payta munakuspataj, imatachus ruwanamanta chayri mana ruwanamanta, mana uj listata qonawanchejtachu suyasun. w19.09 pág. 14 párrs. 1, 3

Satanasqa mana apay atina qʼepista runasman churan. Payqa creechiyta munawanchej, Jehová Dios juchasninchejmanta mana perdonawasqanchejta, nitaj munakunapaj jinachu kasqanchejta. Chayqa uj llasa qʼepi jina, manataj cheqachu (Juan 8:44). Imaraykuchus Jehová Diosqa, Cristoman qayllaykojtinchej juchasninchejta perdonawanchej (Mat. 11:28). Chantapis Tatanchej Jehovaqa maytapuni munakuwanchej (Rom. 8:32, 38, 39). Jesús qowanchej chay qʼepeqa, may chhallitalla. Kaypi piensarina: Diantinta trabajaytawanqa, wasinchejman qʼala saykʼusqa chayanchej, nitaj kusisqachu kanchej. Jinapis Jehová Diosta, Cristotawan sirvispaqa, kusisqa kanchej. Wakin kutisqa may saykʼusqa kasqanchejrayku, ichapis niña reunionman riyta munasunmanchu. Jinapis tantakuyman rispaqa may kusisqa, kallpachasqastaj wasinchejman kutipunchej. Ajina kallpachasqallataj kanchej, saykʼusqa kaspapis predicaj rejtinchej, sapallanchejpi Bibliata estudiajtinchejpis. w19.09 pág. 20 párr. 1; págs. 23, 24 párrs. 15, 16

‘Jehová Diospa pʼunchaynin’ chayamunanpajqa, pisi tiempollaña faltan. Jehová Diostaj tukuy atisqanchejta predicamunanchejta munan. Chayrayku “Señorpa ruwayninpi ashkhata” llankʼanallapuni tiyan (1 Cor. 15:58). Jesusqa qhepa pʼunchaykunapi imaschus kananta willashaspa, Diospa kamachisnin imatachus ruwanankutawan nerqa. Pay nerqa: “Ñaupajtaqa sumaj willaykunaraj tukuy laya runasman willakunan tiyan”, nispa (Mar. 13:4, 8, 10; Mat. 24:14). Sapa predicaj llojsejtinchej, chay profeciata juntʼashanchej. Sapa wata, astawan ashkha runas Diospa Gobiernonmanta sumaj willaykunata uyarinku. Kay qhepa pʼunchaykunapi Diosmanta willajkunaqa, mayta yapakunku. Kay 1914 watapeqa 5.155 publicadores karqanku, 43 suyuspitaj predicasharqanku. Kunantaj 8 millones 500 mil jinaña kanchej, 240 suyuspitaj. Jinapis llankʼayninchejqa niraj tukukunchu. Runasman Diospa Gobiernollan allin kausayta apamunanta willamunallapuni tiyan (Sal. 145:11-13). w19.10 pág. 8 párr. 3; pág. 10 párrs. 7, 8

Jehová Diosqa Davidta Barzilaiwan yanapacherqa. Rey Davidwan kamachisninwanqa wawan Absalonmanta ayqekusharqanku. Paykunaqa “saykʼusqa, yarqhasqa, chʼakisqataj” kasharqanku. Barzilaitaj viejitoña kaspapis, wajkunawan khuska, rey Davidman mikhunata aparqa. Chaytataj ruwarqanku kausayninkuta wañuy pataman churaspa. Barzilaiqa mana yuyarqachu, viejitoña kasqanrayku Jehová Diospaj niña valesqanta. Astawanpis payqa, qorikuyta yachasqanrayku, Diospa kamachisninta kapuyninwan yanaparqa (2 Sam. 17:27-29). ¿Imatataj yachakunchej? Jehová Diosqa noqanchejnejta mundontinmanta hermanosta yanapariyta atisqanta. Arí, ima edadniyoj kajtinchejpis hermanosninchejta necesitasqankupi yanaparisunman (Pro. 3:27, 28; 19:17). Ichapis paykunaman, mana imallatapis makinchejwanpuni jaywariyta atinchejchu. Jinapis qolqesitunchejmanta Jallpʼantinpi Willakunanpaj nisqa cajitasman churasunman. Imaraykuchus chaymanta llojsin, necesitaj hermanosta ima ratollapis chayri mayllapipis yanapanapaj (2 Cor. 8:14, 15). w19.10 pág. 21 párr. 6

Pillapis sonqonchejta nanachiwarqanchej chayqa, ichá niña pimanpis imachus sonqonchejpi kasqanta willariyta munanchejchu (Pro. 18:19). Chayrí ichá ninchej: “Amigosta ruwakunaypajqa ni tiempoypis, ni ganasniypis kanchu”, nispa. Jinapis sumaj amigosta ruwakunanchejpuni tiyan. Llakiypi kashajtinchej hermanosninchej yanaparinawanchejta munanchej chayqa, paykunawan sumaj amigos kanapaj kallpachakunanchej tiyan. Chaypajtaj paykunaman imatachus yuyasqanchejta, imachus sonqonchejpi kasqantawan willarina (1 Ped. 1:22). Jesusqa amigosninpi atienekusqanrayku, tukuy imata paykunaman willarej (Juan 15:15). Noqanchejpis Jesús jinallataj, hermanosninchejman willarisunman imachus kusichiwasqanchejta, llakichiwasqanchejta, phiñachiwasqanchejta ima. Paykuna imatapis willariwajtinchejtaj, sumajta uyarinanchej tiyan. Ichá paykunapis, noqanchej jinallataj kashanku chayri yuyashanku. Manachayrí Jehová Diospaj kikin imasllatataj ruwayta munanku. Amigosninchejwan sumajta parlarikojtinchejqa, aswan ujchasqa kanchej (Pro. 27:9). w19.11 pág. 4 párrs. 8, 9

Manchay ñakʼariy tiempopeqa, ichapis manaña Diospa Gobiernonmanta sumaj willaykunatachu willasun, niñataj runastapis Jesuspa yachachisqasninman tukuchimusunchu. Chay tiempopi willayninchejqa, ichapis runasta phiñachinanpaj jina kanqa. Bibliaqa chay willayta jatuchaj granizoswan kikinchan (Apo. 16:21). Ichapis willamusun, “Satanaspa mundon chinkachisqaña kanqa” nispa. Jinapis imatapunichus willananchejta, imaynatatajchus willananchejtaqa aswan qhepamanraj yachasun. Pasaj wataspi imaynasmantachus willarqanchej, ¿ajinallatatajchu willasun? Chayta yachanapajqa suyakunanchejraj kanqa. Imayna kajtinpis, Jehová Diospa juchachana willaynintaqa mana manchachikuspa willamusun (Eze. 2:3-5). Gobiernosqa ichapis juchachana willayta willasqanchejrayku chinkachiyta munawasun. Imaynatachus kay tiempopi predicanapaj Jehová Dios yanapanawanchejpi atienekunchej, ajinallatataj chaypacha atienekunanchej kanqa. Jehová Diosqa munayninta juntʼanapaj kallpata qowasunpuni (Miq. 3:8). w19.10 pág. 16 párrs. 8, 9

“Karunchakapunku” palabraqa, reparachiwanchej mana necesitasqanchej imasta maskʼaypi urmayta atisqanchejta. Sonqonchejpeqa “imaymana pierdechej wampu” munapayay saphichakuyta qallarinman (1 Tim. 6:9). Chayrayku ama saqenachu chay munapayay sonqonchejman yaykunanta. Imaraykuchus Satanasqa, chaywan creeyninchejta pisiyachiyta munan. Ichapis ashkha imasta rantinapaj qolqenchej kapuwanchej. ¿Juchachu kanman mana necesitaspa imatapis rantinallanchej? Mana. Jinapis kay imaspi piensarina: Imatachus rantisqanchejta apaykachanapaj, allinchasqata japʼinapajtaj, ¿tiemponchej, kallpanchejpis kanqachu? ¿Nisunmanchu chay rantisqanchejta mana munakunanchejta? Chayrí chay rantisqanchejta munakuspa, ¿Jesuspa wajyarisqanta qhesachaj joven jinachu kasunman? Ajina kasunman chayqa, niña Diospaj astawan llankʼayta munasunmanchu (Mar. 10:17-22). Aswan allin kapuwasqallanchejwan kausakunanchej, Jehová Diospa munaynintataj tukuy tiemponchejwan, kallpanchejwantaj ruwananchej. w19.11 págs. 17, 18 párrs. 15, 16

Jehová Diosqa imatachus nisqanchejta ‘ruwayta atinanchejpaj’ kallpata qowasunman (Fili. 2:13). Chayrayku Diosmanta kallpata mañakuna. Ruwaj churakunapajtaj Jehová Diosmanta atiyninta mañakuna. Mana chay rato uyariwajtinchejpis mañakunallapuni. Jesús nerqa: Diospa atiyninta “mañakullaychejpuni qosonqachejtaj”, nispa (Luc. 11:9, 13). Chantapis allinta yuyaycharikuna. Imata ruwanallapajpis, imaynatachus chayta ruwananchejta yuyaycharikunchej. Chantataj chayman jina ruwanchej. Ajinallataj imatachus ruwayta munasqanchejwanpis. Imatachus ruwananchejta niytawanqa, imaynatachus chayta juntʼananchejta yuyaycharikuna. Mana atinapaj jina ruwanasninchejta pisimanta pisi ruwasun chayqa, juntʼayta atillasun. Apóstol Pablopis Corintomanta hermanosman nerqa: “Sapa semanaj ñaupaj kaj pʼunchayninpi, sapa ujniykichej tʼaqaychej mashkhallatapis kapuyniykichejman jina. Ajinamanta chayamojtiy, amaña tantanaykichejpaj”, nispa (1 Cor. 16:2). Ruwanasninchejta pisimanta pisi ruwasun chayqa, mana yuyasunchu mana juntʼay atina kasqanta. w19.11 pág. 29 párrs. 13, 14

Ichá yuyasunman Jehová Diosta rejsisqanchejta, sutinta chayri paymanta wakin imasta yachasqanchejrayku. Jinapis chayqa mana ninayanchu Jehovata allinta rejsisqanchejta. Jehová Diosta sumajta rejsinapajqa, imaynapunichus kasqanta yachanapaj tiempochakunanchej tiyan. Ajinallamanta yachasunchej, imajtinchus imatapis nisqanta chayri ruwasqanta. Chaytaj yanapawasun, yuyasqanchej, ruwasqanchej ima, payta kusichisqantachus manachus reparanapaj. Imatachus Jehová Dios ruwananchejta munasqanta yachaspaqa, chayta ruwananchej tiyan. Wakin runasqa Jehová Diosta sirviyta munasqanchejmanta burlakuwasunman. Reunionesman riyta qallarishajtinchejtaj, ichá astawan churanakuwasunman. Jinapis Jehová Diospi atienekuna. Imajtinchus payqa ni jaykʼaj saqerpariwasunchu. Ajinamanta paywan wiñaypaj sumaj amigosta ruwakusun. Jinapis, ¿Jehová Diosta allinta rejsiyta atisunmanchu? Arí. w19.12 págs. 16, 17 párrs. 3, 4

Tatas chayri mamasqa ichapis ninku: “Wawasta uywayqa ancha trabajo”, nispa. Jinapis wawasqa Jehová Diosmanta herencia kanku. Paytaj tatasta wawasninkuta sumajta uywanankupaj yanapayta munan, mañakusqankutapis uyarin. Chay mañakuyninkuman kutichin: Biblianejta, publicacionesnejta, experienciayoj tataspa yanapankunejta ima. Wakin runas ninku: “Uj wawataqa 20 wataspi uywayta tukunchej”, nispa. Jinapis tatasqa wawasninkumanta llakikullankupuni. Tatamamas, wawasniykichejta munakuychej, paykunapaj tiempochakuychej, Bibliaj nisqantapis yachachiychej. Chayqa imata qonaykichejmantapis aswan sumaj. Jinapis ama qonqaychejchu, mana tukuy wawaschu tatasninkoj yachachisqankuta japʼikunku. Jina kajtinpis, ashkha wawasqa tatasninku sumajta uywasqankumanta agradecekunku. Ashkhas Asiamanta hermananchej Joanna Mae jina ninku. Pay nin: “Tataywan mamaywan Jehová Diosta munakuyta yachachiwarqanku, pantajtiypis yanapawarqanku. Chaymanta paykunata mayta agradecekuni. Tatasneyqa mana uywallawarqankuchu, manaqa kausayniypi kusisqa kanaypaj yanapawarqanku”, nispa (Pro. 23:24, 25). Ashkha hermanos ajinallatataj ninkuman. w19.12 pág. 27 párrs. 21, 22

Congregacionpeqa pikunachus sonqochanata necesitasqankuta sutʼita reparayta atisunman. Wajkunata sonqochariyta manchachikuspapis, paykunata sonqocharinapaj kallpachakusunman. Ichapis mana yachanchejchu, llakiypi kajkunaman imatachus niyta chayri imaynatachus paykunata yanapayta. Hermanosninchejmanta llakikuspaqa, paykunata mayta sonqochasunman. Kay sajra mundoj tukukuynin astawan qayllamusqanman jina, kay mundoqa astawan sajrayanqa, kausaypis aswan llakiy kanqa (2 Tim. 3:13). Chantapis juchasapas kasqanchejrayku pantallasunpuni, chayraykutaj sonqochanata necesitallasunpuni. Apóstol Pablotaqa hermanospa sonqochasqanku mayta yanaparqa, wañupunankama sinchʼita sayananpaj. Noqanchejpis wajkunata tukuy sonqo yanaparina. Chayta ruwaspaqa, hermanosninchejta Jehová Diosta sirvinallankupajpuni yanapasun (1 Tes. 3:2, 3). w20.01 págs. 12, 13 párrs. 17-19

Ajllasqa cristianosqa, mana wajkunawan jatunchachikuyta maskʼankuchu (Fili. 2:2, 3). Jehová Diosqa mana paykunata tukuypa rikunantachu ajllan. Ajllasqa cristianostaj, chayta sutʼita yachanku. Chayrayku paykunaqa, ajllasqa kasqankuta wajkuna mana creejtinku mana tʼukunkuchu. Bibliapuni yuyaychawanchej, pipis “Dios ajllawan” niwajtinchej mana creenallata. Ajllasqa cristianosqa mana jatunchachikuyta munankuchu. Chayrayku pillatapis rejsispa, mana willankuchu ajllasqa kasqankuta. Nillataj cieloman rinankupaj ajllasqa kasqankumanta alabakunkuchu (1 Cor. 4:7, 8). Ajllasqa cristianosqa, mana waj ajllasqa cristianosta maskʼankuchu ajllasqa kasqankumanta parlanankupaj, chayri paykunapuralla Bibliata estudianankupaj (Gál. 1:15-17). Chayta ruwankuman chayqa, hermanosta tʼaqanachinkuman. Chantapis Jehová Diospa atiyninpa contranpi oqharikushankuman. Imaraykuchus chay ateyqa, Diospa llajtanmanta kajkunata ujchan, allinpi kausakunankupajtaj yanapan (Rom. 16:17, 18). w20.01 pág. 28 párrs. 6, 7

Tukuy llulla religiones chinkachisqa kasqankutawan, noqallanchejña qhepakusun. Chayrayku chay religionesmanta runasqa, noqanchejpaj manchayta phiñakonqanku. Ichapis paykunaqa tukuynejpi noqanchejpaj chʼajwanqanku, Internetpipis. Naciones, kamachejninku Satanaspis, religionnillanchejña sayashasqanmanta manchayta chejnikuwasunchej. Paykunaqa tukuy religionesta chinkachisqankuta yuyaspapis, Jehovaj testigosninta mana chinkachisqankuta reparanqanku. Chayrayku noqanchejtañataj chinkachiyta munawasun. Chaypachataj nacionesqa Magogmanta Gogman tukonqanku. Paykunaqa noqanchejta chinkachinawanchejpaj ujchaykukonqanku, tukuy atiyninkuwantaj contranchejpi oqharikonqanku (Eze. 38:2, 14-16). Chaypacha imaspunichus kananta mana yachasqanchejrayku, ichapis tumpata llakikunchej. Jinapis manchay ñakʼariytaqa mana manchachikunanchejchu tiyan. Imaraykuchus Jehová Diosninchej niwasun, salvakunanchejpaj imatachus ruwananchejta (Sal. 34:19). w19.10 pág. 16 párrs. 10, 11

Jehová Diosmanqa mana sonqollanchejpichu agradecekunchej. Astawanpis parlasqanchejwan, ruwasqanchejwantaj chayta rikuchinchej. Chaytaj sutʼita rikuchin, mana kay mundomanta runas jinachu kasqanchejta. Paykunaqa Jehová Diosman mana agradecekuyta yachankuchu. Chaytaj sutʼita rikuchin, ‘qhepa pʼunchaykunapi’ kausashasqanchejta (2 Tim. 3:1, 2). Noqanchejqa amapuni paykuna jina kanachu. Jehová Diosqa mana munanchu wawasnin maqanakunankuta, astawanpis purajmanta munanakunankuta munan. Hermanosninchejwan munanakuspaqa, cheqa cristianos kasqanchejta rikuchinchej (Juan 13:35). Uj salmista nerqa: “May jina sumajpuni wawqepura uj sonqolla kʼachata kawsanankoqa”, nispa (Sal. 133:1). Noqanchejpis pay jinallataj ninchej. Hermanosninchejta munakuspaqa, Jehová Diosninchejtapis munakushallanchejtaj (1 Juan 4:20). Diospa familianpeqa “ujkuna ujkunawan kʼachas, may khuyakuyniyojtaj” kanchej. Chay jina familiamanta kayqa, may sumajpuni (Efe. 4:32). w20.02 pág. 9 párrs. 6, 7

Anaj llakiykunasnenqa, mana chay ratochu chinkarqa. Anaqa kikin wasipi Peninawan khuskallapuni kausakorqa. Bibliaqa mana ninchu, Anata Peniná niña sufrichisqanta. Peninaqa ichapis Anaj sonqonta parlasqanwan nanachillarqapuni. Jinapis Anaqa llakiyninta Jehová Diospa makinman saqerqa. Chayrayku manaña llakikorqachu, sonqo tiyasqataj karqa. Chantapis Anaqa Jehová Diospi atienekorqa. Jehová Diostaj wawasniyoj kananpaj bendicerqa (1 Sam. 1:2, 6, 7, 17-20). Llakiyninchej mana tukukojtinpis, sonqo tiyasqa kasunman. Ichapis Jehová Diosmanta mana saykʼuspa mañakunchej, reunionesmanpis rinchejpuni. Jinapis wakin problemasninchejqa, manapuni chinkanchu. Jina kajtin, Anaj kausaynin yanapallawasunmantaj. Imajtinchus kausaynenqa yachachiwanchej, llakisqa kashajtinchej Jehová Dios sonqochanawanchejta. Jehová Diosqa ni jaykʼaj noqanchejmanta qonqakonqachu. Chantapis payta tukuy sonqo sirvisqanchejmanta, maychus tiemponpi tʼinkawasun (Heb. 11:6). w20.02 pág. 22 párrs. 9, 10

Ancianosqa pillamanpis yuyaychashaspa, allin kajta ruwananpaj Bibliaj nisqanta rikuchinanku tiyan. Wakin kutisqa, noqanchejpis mana manchachikuspa parlananchej tiyan. ¿Maykʼajtaj ajinata parlananchej tiyan? Chayta yachanapaj, Elimanta parlarina. Kuraj kaj sacerdote Eliqa, iskay qhari wawasninta mayta munakorqa. Chay wawasnintaj, Jehová Diosta mana jatunpajchu qhawarqanku. Paykunaqa Diosta yupaychana toldopi sacerdotes karqanku. Cargonkuman atienekuspataj, Jehová “Diosman qosqa qʼolachinasta mana jatumpajchu qhawaj kanku”. Chantapis mana pʼenqakuspa warmiswan khuchichakorqanku (1 Sam. 2:12-17, 22). Moisespa Leynin nisqanman jina, Elij wawasnenqa wañuchisqa kananku karqa. Jinapis Eliqa wawasninta tumpallata kʼamerqa, sacerdotes kanankutataj saqellarqa (Deu. 21:18-21). Jehová Dios, ¿Elij ruwasqanta allinpajchu qhawarqa? Mana. Payqa Eliman nerqa: “Imaraykutaj churisniykita noqamanta nisqaqa aswan jatumpaj qhawanki”, nispa. Chantapis Jehová Diosqa, chay wawasnin wañunankuta nerqa (1 Sam. 2:29, 34). w20.03 págs. 18, 19 párrs. 4, 5