Septiembre

Jehová Dioswan Jesuswan trabajadores kasqankoqa, mana ninayanchu mana samarikunanchej kasqanta. Jehová Diosninchejqa ni jaykʼaj saykʼunchu. Chayrayku mana noqanchej jinachu samarikuyta necesitan. Jinapis Biblia niwanchej: ‘Cielotawan jallpʼatawan ruwarqa, chantá samarikorqa’, nispa (Éxo. 31:17). “Samarikorqa” nispaqa, Jehová Diosninchej ruwasqasninwan kusikunanpaj tiempochakusqanmantasina parlashan. Chay qhepata payqa, cielopiwan jallpʼapiwan manañasina mosoj imasta ruwarqachu. Jesuspis kay jallpʼapi kashaspa mayta trabajarqa. Jinapis samarikunanpaj, amigosninwan khuska mikhurinanpajpis tiempochakorqa (Mat. 14:13; Luc. 7:34). Diospa Palabranqa niwanchej mana qhellaschu kananchejta, manaqa trabajadores kananchejta (Pro. 15:19). Ichapis familianchejman necesitasqanta qonapaj trabajanchej. Tukuy cristianostaj Diospa Gobiernonmanta sumaj willaykunata predicananchej tiyan. Jinapis samarikunallanchejtaj tiyan. w19.12 págs. 2, 3 párrs. 2, 4, 5

Ama supaykunamanta parlaspa purinachu. Chaypajqa Jesusmanta mayta yachakusunman. Payqa cielopi kashaspa, Satanaswan supaykunawan imastachus ruwasqankuta rikorqa. Jinapis jallpʼapi kashaspa, mana supaykunamanta cuentakuspachu purerqa. Jesusqa Tatan Jehovamanta astawan parlarqa, nitaj Satanaspajchu propagandata ruwarqa. Noqanchejpis Jesús jina ruwasunman, supaykunamanta cuentosta mana wajkunaman cuentaspa. Astawanqa parlasqanchejpi rikuchiyta munanchej, sonqonchej “kʼacha palabraswan”, nisunman cheqa kajwan juntʼa kasqanta (Sal. 45:1). Supaykunata ama manchachikunachu. Kay tiempopeqa tukuyninchej ima llakiypipis rikukusunman. Ichapis mana suyashajtillanchej accidentakusunman, onqoykusunman, chayri wañuy chayamuwasunman. Jinapi rikukuspa, mana yuyananchejchu tiyan demonios juchayoj kasqankuta. Biblia niwanchej, llakiykuna “kaymanta jinalla” chayamuyta atiwasqanchejta (Ecl. 9:12). Jehová Diosninchejqa, supaykunamanta nisqa aswan atiyniyoj. w19.04 págs. 23, 24 párrs. 13, 14

Wakin suyuspi leyesqa, uj wawa abusasqa kajtin denunciata churamunata kamachin. Chay leyesta, ¿ancianos juntʼankuchu? Arí. Gobiernoj leyesnin autoridadesman willamunata kamachin chayqa, ancianosqa kasukunku. Chay leyesqa, Jehová Diospa leyninwan mana churanakunchu (Hech. 5:28, 29). Chayrayku uj wawa abusasqa kasqanta uyarejtinku, ancianosqa sucursalmanta hermanosman chay rato wajyarinku. Ajinamanta gobiernoj leyesninman jina imatachus ruwanankuta yachanankupaj. Ancianosqa abusasqa kajkunaman, tatasninkuman, pikunachus chay abusomanta yachajkunamanwan ninku, munaspaqa denunciata churamunankuta. Jinapis wakin kutisqa, chay abusomanta tumpasqa kajqa uj hermano kanman, chaytaj llajtantinpiña yachakunman. Jina kajtin, ¿manchachikunachu kanman denunciata churamuyta, “Jehová Diospa sutinta chʼichichayman” nispa? Mana. Astawanpis chay millay juchata ruwajmin, Diospa sutinta chʼichichan. w19.05 pág. 10 párrs. 13, 14

Bibliaqa qosaman warmimanwan kamachin purajmanta respetanakunankuta. Kamachillantaj casarakushaspa imatachus ninakusqankuta juntʼanankuta. Bibliaqa nillantaj, qhariwarmis wañunanku horakama khuska kanankuta. Chayrayku nin: “Qhareqa tatanta mamantawan saqenqa, warminwantaj ujchakonqa, iskayninkutaj uj runa jinalla kanqanku”, nispa (Gén. 2:24). Jinapis kay mundoj yachachiyninta qhatejkunaqa, qharipis warmipis allinnillanta maskʼananta ninku. Divorciomanta parlaj libro nin: “Casarakojkunaqa ninakoj kanku, ‘wañupunanchejkama khuska kasun’ nispa. Jinapis kunanqa, wakin casarakojkuna ninku: ‘Munakuyninchej tukukunankama khuska kasun’, nispa”. Casado kausayta niña jatunpajchu qhawasqankurayku, ashkha familias tʼaqanakunku, may chhika runastaj sonqo pʼakisqa kanku. Rikunchej jina, kay mundomanta runas casarakuymanta imatachus yachachisqanqa, qʼala pantasqa kashan. w19.05 pág. 24 párr. 12

Ñaupa tiempomanta wakin cristianosqa, kay mundoj yachachiyninwan, yuyayninwan ima, chimpaykuchikorqanku. Apóstol Pablotaj chaymanta llakisqa kasharqa (Efe. 4:17-19). Noqanchejpis ajinapi rikukusunman. Satanasqa “kay mundoj” diosnin kasqanrayku, imaymana tojllaswan Diosmanta karunchayta munawanchej. Payqa imatachus munasqanchejwan, chayri may rejsisqa kayta munasqanchejwan urmachiyta munawanchej. Supayqa pay jina yuyananchejpaj, imatachus wasinchejpi, lugarninchejpi chayri escuelapi yachakusqanchejmanta valekunman. “Sumaj jarkʼachasqa perqasman rijchʼakoj” yuyaykunata, ¿umanchejmanta orqhoyta atisunmanchu? (2 Cor. 10:4). Apóstol Pablo nerqa: “Noqayku thuñishayku, pantasqa yuyaykunata, Diosmanta yachakuyta jarkʼaj yuyaykunatapis. Chantapis tukuy yuyaykunata atipashayku, Cristota kasuyta yachanankupaj”, nispa (2 Cor. 10:5). Jehová Diosqa pantasqa yuyaykunata atipanapaj yanapawasunman. w19.06 pág. 8 párrs. 1-3

Ana, rey David, salmistapis llakiypi kashaspa, Jehová Dioswan yanapachikorqanku. Kinsantinkutaj tukuy llakiyninkuta Jehová Diosman sutʼita willakorqanku. Chantapis Jehová Diosta yupaychaj kanku chay lugarman, mana faltakuspa rillarqankupuni (1 Sam. 1:9, 10; Sal. 55:22; 73:17; 122:1). Khuyakuyniyoj Jehová Diosninchejqa, paykunaj mañakuyninkuta uyarerqa. Chayrayku Anaqa manaña llakikorqachu (1 Sam. 1:18). Rey Davidtaj kayta qhelqarqa: “Cheqan sonqoyoj runapaj imaymana llakiykuna rikhurin; chaywampis Tata Diosqa tukuy chay llakiykunamanta payta orqhon”, nispa (Sal. 34:19). Salmistataj repararqa Jehová Dios payta “paña makinwan” japʼisqanta, sumaj yuyaychaykunawantaj yanapasqanta (Sal. 73:23, 24). ¿Imatataj noqanchej paykunamanta yachakunchej? Ichapis wakin kutis ashkha problemasniyoj kasqanchejrayku, sinchʼi llakisqas kasunman. Ajinapi kashaspa, Jehová Diosninchej imaynatachus kamachisninta yanapasqanpi piensarina, paymanta mañakuna, imatachus niwasqanchejtataj kasukuna (Sal. 143:1, 4-8). w19.06 págs. 17, 18 párrs. 14, 15

Runas imata nejtinkupis chayri imata ruwajtinkupis, Jehovaj testigosnin kasqanchejmanta, ama pʼenqakunachu (Miq. 4:5). Apostolesqa Jesús wañupusqantawan Jerusalenpi qhepakorqanku. Paykunaqa judiosta kamachejkuna paykunata chejnikusqankuta yacharqanku (Hech. 5:17, 18, 27, 28). Jinapis sapa día temploman rillajpuni kanku, Jesusmantataj yachachej kanku (Hech. 5:42). Paykunaqa runata manchachikuywan mana atipachikorqankuchu. Noqanchejpis escuelapi, trabajopi, chayri mayllapipis Jehovaj testigosnin jina rejsichikusun chayqa, niña runasta manchachikusunchu (Hech. 4:29; Rom. 1:16). ¿Imaraykutaj apóstoles kusisqa karqanku? Paykunaqa yacharqanku, Diospa munayninta ruwasqankurayku chejnisqas kasqankuta. Chaytataj jatunpaj qhawarqanku (Luc. 6:23; Hech. 5:41; 1 Ped. 2:19-21). Runasqa allin kajta ruwasqanchejrayku chejniwanchej. Chayta sutʼita yachaspaqa, chejnisqas kaspapis Jehová Diosta sirvillasunpuni. w19.07 pág. 7 párrs. 19, 20

Jesuswan yachachisqasninwanqa, Moisespa Leyninta kasukunankuraj karqa. Chayrayku Samarikuna Pʼunchaypi samarikoj kanku. Jinapis Jesusqa, Samarikuna Pʼunchaypi allin kajta ruwayqa mana juchachu kasqanta yachacherqa. Chaytataj parlasqanwan, ruwasqanwan ima yachacherqa. Pay nerqa: “Samarikuna Pʼunchaypi allin kajta ruwayqa atikullan”, nispa (Mat. 12:9-11). Jesusqa mana yuyajchu Samarikuna Pʼunchaypi wajkunata yanapariy jucha kasqanta. Payqa ruwasqasninwan rikucherqa, imapajchus Samarikuna Pʼunchay kasqanta. Israelitasqa chay diapi sapa pʼunchay ruwanasninkumanta samarikunanku karqa, Diostataj yupaychananku karqa. Jesuspa familianpis Samarikuna Pʼunchaypi Diosta yupaychaj kanku. Imaraykuchus Biblia nin: “Jesusqa Nazaret llajtaman rerqa maypichus uywasqa karqa, chayman. Yachasqa kasqanman jinataj Samarikuna Pʼunchaypi sinagogaman yaykorqa, chantá leej sayarerqa”, nispa (Luc. 4:15-19). Chantapis Jesuspa yachachisqasnenqa, Samarikuna Pʼunchayta jatunpaj qhawaj kanku. Chayrayku Jesús wañupojtin, Samarikuna Pʼunchay pasaytaraj Jesuspa ayanta pʼampanankupaj wakichiyta tukorqanku (Luc. 23:55, 56). w19.12 pág. 4 párr. 10

Sumaj sonqoyoj runasta tarinapajqa, tukuy cristianos yanapakunchej. Llankʼayninchejqa chinkasqa wawata maskʼay jina. Uj pacha, kinsa watitayoj wawita chinkasqa. Chay wawitata maskʼanankupajqa, 500 runas jina yanapakusqanku. 20 horasninman jinataj, uj runa chay wawitata sara chajrapi tarisqa. Chay runaqa wawitata paylla tarisqanta ninanmantaqa, jinata nerqa: “Ashkhas yanapakusqaykurayku, chay wawitata tariyku”, nispa. Ashkha runasqa chay chinkasqa wawita jina kashanku. Paykunaqa mana suyakuyniyoj kanku, yanapachikuytataj munanku. Chay runastataj 8 millonesmanta astawan hermanos maskʼashanchej. Ichá noqanchejqa, ni uj runallatapis Bibliamanta yachachinapaj tarinchejchu. Chaywanpis noqanchejwan khuska predicajkunaqa, yachakuyta munajkunata tarinku. Uj hermanonchej chay jina runata tarejtin, chay runataj Jesuspa discipulonman tukojtin, tukuyninchej kusikunchej. w19.07 págs. 16, 17 párrs. 9, 10

Apóstol Pabloqa Filiposmanta cristianosman mana saykʼuspa correnallankutapuni nerqa. Runasqa Filipos llajtapi kaj congregacionman qallariymantapacha churanakorqanku. 50 wata chaynejta, apóstol Pablowan Silaswanqa Macedoniaman yanaparikoj rinankupaj wajyarisqa karqanku (Hech. 16:9). Chay lugarmanta ujnin llajtaman chayaytawan, Lidia sutiyoj warmiman predicarqanku. “Jehová Diostaj paypa sonqonta kicharerqa” sumaj willaykunata japʼikunanpaj (Hech. 16:14). Chantá Lidiaqa “wasinmanta kajkunawan khuska” bautizakorqa. Jinapis Diabloqa chay rato ashkha problemasta rikhuricherqa. Filipos llajtamanta runasqa, apóstol Pablotawan Silastawan kamachejkunaman qhatatarqanku, llajtankuta chʼajwachisqankuta nispataj paykunata tumparqanku. Chayrayku kamachejkunaqa, Pablotawan Silastawan manchayta seqʼoykucherqanku, carcelmantaj wisqʼaykucherqanku. Chantá chay llajtamanta ripunankuta nerqanku (Hech. 16:16-40). Jinapis paykunaqa, Jehová Diosta yupaychallarqankupuni. Chay mosoj congregacionmanta hermanosqa, aguantasqankuta rikuspa mayta kallpachakorqanku. Chayrayku paykunapis aguantallarqankutaj. w19.08 pág. 2 párrs. 1, 2

¿Imataj chay ‘cheqan ruwaykuna’ karqa? Jehová Diosta, hermanostawan munakusqanku, jinallataj Jesuspi creesqankuta, imatachus suyakusqankutawan runasman willarisqanku karqa. Chantapis runasta Jesuspa yachachisqasninman tukuchimuspa, “cheqan ruwaykunata” ruwashanchej (Mat. 28:18-20). Imapi rikukuspapis, kʼanchay jina lliphipirisunman. Ichá wakin kutisqa, niña predicananchejpaj uj chʼampay rikhurinman. Ajinapi rikukuspapis astawanraj runasman predicasunman. Apóstol Pablo ajinapi rikukorqa. Filipensesman cartanta qhelqashajtin, payqa Romapi wasinpi presochasqa kasharqa. Ajina presochasqa kaspapis, payqa soldadosman, payta waturikoj rejkunamanwan, Jehová Diosmanta tukuy sonqo willallarqapuni. Chay ruwasqanqa hermanosta yanaparqa, ‘mana manchachikuspa Jehová Diospa Palabranmanta willanankupaj’ (Fili. 1:12-14; Fili. 4:22). w19.08 pág. 12 párrs. 15, 16

Apóstol Pedro nisqanman jina, kʼumuykukoj sonqo kaspaqa Jehová Diosninchejta kusichinchej. Chayrayku apóstol Pedroqa kay diapaj ajllasqa textota qhelqarqa. ‘Qhipayta jamuy’ libropi 3 yachaqanaj 23 parrafonpi jinata nin: ‘Jatunchakoyqa wañuchej veneno jina. Chayrayku Jehová Diospa ñaupaqenpeqa may atiyniyoj runapis kachunku, jatunchakojtinkoqa qhasi mana kajlla kanku. Kʼumuykukojkuna manapis sumaj runaschu kachunku, Jehovaqa llankʼayninpaj paykunata apaykachan. Jehová Diosqa, noqanchejtapis kusiywan tʼinkawasunchej kʼumuykukuyniyoj kajtinchejqa’, nispa. Tukuypuni Jehová Diospa sonqonta kusichiyta munanchej (Pro. 23:15). Kʼumuykukoj sonqo kaspaqa, mana Jehová Diosllatachu kusichinchej, manaqa allinninchejpaj. Kʼumuykukoj sonqo kajtinchejqa, wajkunapis noqanchejman qayllaykamuwanchej. Chayta astawan entiendenapaj, imayna runaswanchus kayta munasqanchejpi piensarina (Mat. 7:12). w19.09 pág. 4 párrs. 8, 9

Ancianosqa congregacionta yanapanankupaj sinchʼita llankʼanku. Paykunaqa ancianos jina autoridadniyoj kaspapis, mana hermanosta kʼumuykachachinkuchu. Astawanpis paykunata munakuywan yanapanku (1 Tes. 2:7, 8). Ancianosqa hermanosta tukuy sonqo munakunku, kʼumuykukoj sonqostaj kanku. Chaytaj wajkunawan parlasqankupi sutʼi rikukun. Andresqa unayña anciano, nintaj: “Munakuywan parlarejtinchej, kʼachastaj kajtinchejqa, hermanospis hermanaspis kasukullanku. Ajina kʼachas kajtinchejqa, hermanosqa ancianosta tukuy sonqo yanapanku”, nispa. Tomaspis unayña anciano. Pay nin: “Tukuy atisqayta ruwani Filipenses 2:3 nisqanta kasukunaypaj. Kallpachakunitaj wajkunata noqamanta aswan kurajta jina qhawanaypaj. Chayqa mana capataz jina kanaypaj yanapawan”, nispa. Ancianosqa Jehová Dios jina kʼumuykukoj sonqo kananku tiyan. Jehová Diosqa tukuyta kamachinanpaj atiyniyoj kaspapis, kʼumuykamun ‘wajcha runata pampamanta aysarinanpaj’ (Sal. 18:35; 113:6, 7). Runaykachaj runastatajrí millachikun. w19.09 págs. 16, 17 párrs. 11, 12

Jesuspa yugonpi samarikuyta tarinapajqa, kamachislla kasqanchejta entiendena. Jehová Diospa llankʼayninta ruwashanchej. Chayrayku munayninman jina ruwananchej tiyan. Noqanchejqa kamachislla kanchej, Jehová Diosninchejtaj Dueño (Luc. 17:10). Jehová Diospa llankʼayninta munayninchejman jina ruwasun chayqa, noqallanchej saykʼupusun, ñakʼarisuntaj. Jinapis paypa munayninman jina llankʼasun chayqa, ima chʼampaytapis atipasun, tʼukuna imastataj ruwasun. Jehová Diospa munaynin juntʼakunantaqa, ni pi jarkʼayta atinmanchu (Rom. 8:31; 1 Juan 4:4). Ñaupa tiempopi wakin runasqa, Jesuswan purerqanku astawan kapuyniyoj kayta chayri imatapis japʼiyta munasqankuraykulla. Chay runasqa mana Jesuspa yugonpi kusisqachu karqanku, paymantataj karunchakaporqanku (Juan 6:25-27, 51, 60, 66; Fili. 3:18, 19). Jinapis Diostawan runa masinkutawan tukuy sonqo munakojkunaqa, wañupunankukama Jesuspa yugonpi karqanku. Paykunaqa Cristowan khuska cielopi kausayta suyakorqanku. Noqanchejpis paykuna jina ruwasun chayqa, Jesuspa yugonpi kaspa kusisqallapuni kasun. w19.09 pág. 20 párr. 1; págs. 24, 25 párrs. 19, 20

Llulla yachachiykunamanta kacharichisqa kasqanchejrayku, ashkha bendiciones kapuwanchej. Chaytaj mayta kusichiwanchej. Aswan qhepaman waj imasmantawan kacharichisqas kasunchej. Jesusqa pisi tiempomantawan tukuynin llulla religionesta, gobiernosta ima chinkachenqa. Jehová Diostaj payta yupaychaj “may chhika runasta” jarkʼanqa. Chantá paykunaman paraisopi ashkha bendicionesta qonqa (Apo. 7:9, 14). Chantapis chay tiempopeqa, may chhika runas kausarimonqanku. Jehová Diosta sirviyta ajllajkunataj, niña onqonqankuchu, niña viejoyanqankuchu, niñataj wañonqankuchu (Hech. 24:15). Jesuspa Waranqa Watas Kamachiyninpi, paywan ajllasqa cristianoswanqa runasta yanapanqanku niña ujtawan onqonankupaj, watejmantataj Diospa wawasnin kanankupaj. Chay tiempoqa israelitaspa Kacharipuna Watanku jina kanqa. Jesuspa Waranqa Watas Kamachiynin tukukuyta, Jehová Diosta tukuy sonqo sirvejkunaqa manaña pantaj runaschu kanqanku, juchamantataj kacharichisqa kanqanku. w19.12 págs. 12, 13 párrs. 14-16

Ñaupa cristianospa tiemponkupi, José sutiyoj cristiano karqa (Bernabé nejtaj kanku). Payqa manchay kʼachapuni karqa, Jehová Diospajtaj llankʼayta munarqa (Hech. 4:36, 37). Saulo cristianoman tukojtin, ashkha cristianos payman chimpaykuyta manchachikorqanku. Imajtinchus Sauloqa, aswan ñaupajta cristianosta qhatiykacharqa. Jinapis Bernabeqa payta yanaparerqa (Hech. 9:21, 26-28). Aswan qhepamantaj, Jerusalenmanta ancianosqa Antioquiamanta cristianos kallpachanata necesitasqankuta yacharqanku. Chayrayku Bernabeta chay karu lugarman kacharqanku. Payta kachasqankoqa may sumajpuni karqa. Bibliaqa nin, Bernabeqa tukuyta “kallpachayta qallarerqa, Señorta tukuy sonqo kasukunallankupajpuni” (Hech. 11:22-24). Kay tiempopipis, Jehová Diosqa hermanosninchejta sonqochanapaj yanapawasunman. Payqa yanapawasunman, familiarninku wañupusqanrayku llakisqa kajkunata sonqocharinanchejpaj. Manachayrí onqosqa chayri llakisqa hermanosta visitarinapaj, manaqa telefononejta wajyarinapaj yanapawasunman. Ajinamanta paykunata kallpacharisunman. Allin kanman Jehová Diosta Bernabé jina yanapakuyta munananchej (1 Tes. 5:14). w19.10 pág. 22 párr. 8

Hermanosninchejwan khuska imatapis ruwaspaqa, wakin kutis mana allin ruwasqallankutachu qhawanchej, manaqa pantasqasninkutapis. Ajinapi rikukojtinchej, Jeremiaspa kausaynin yanapawasunman. Tukuypis pantaj runas kasqanchejrayku, hermanosninchejpis pantanqankupuni. Chayrayku congregacionpi amigosta ruwakuytawan, paykunawan mana phiñanakunapaj kallpachakuna tiyan. Uj amigonchej imallapipis pantan chayqa, ichapis kʼachallamanta, sutʼitataj Bibliawan yuyaycharinanchej kanqa (Sal. 141:5). Chay amigonchej sonqonchejta nanachiwanchej chaytaj, perdonananchej tiyan. Perdonaytawantaj chay pantasqanta niña yuyarichinachu tiyan, nitaj wajkunaman willaranachu tiyan. Hermanosninchejpa pantasqasninkuta qhawanamantaqa, allin ruwasqasninkuta qhawana. Ajinamanta kay llakiy pʼunchaykunapi, paykunawan aswan ujchasqas kasunchej. Chaytataj ruwananchejpuni tiyan. Imajtinchus manchay ñakʼariy tiempopeqa, sumaj amigosta necesitasun. w19.11 pág. 6 párrs. 13, 16

Jesús nerqa: “Runasta yachachisqasniyman tukuchimuychej, [...] imastachus noqa kamacherqaykichej, chayta paykunapis kasukunankupaj”, nispa. Runasman Bibliamanta yachachishaspaqa, chayta ruwanapaj kallpachakunanchej tiyan. Paykunaqa entiendenanku tiyan, Jehová Diosta yupaychananku kasqanta. Chantapis runasta yanapananchej tiyan: yachakusqankuman jina kausakunankupaj, Jehová Diosman kausayninkuta qopunankupaj, bautizakunankupaj ima. Chayta ruwajtillanku, Jehová Diospa pʼunchayninmanta salvakuyta atenqanku (1 Ped. 3:21). Kay mundoj tukukuynin chayamunanpaj pisi tiempollaña faltan. Chayrayku niña tiempo kanchu, mana ñauparej estudiosta yachachimunallapajpuni (1 Cor. 9:26). Kay mundoj tukukuynenqa qayllitapiña kashan, ashkha runastaj Diospa Gobiernonmanta uyariyta necesitanku. Chayrayku usqhayllata willamunanchej tiyan. w19.10 pág. 12 párrs. 14, 15

Perdonta tarina pʼunchaypeqa, tukuynin israelitas tantakoj kanku, kuraj kaj sacerdotetaj uywasta wañuchispa Jehová Diospaj qʼolachej. Chaytaj israelitasta yuyarichej juchasninkumanta llimphuchasqa kananku kasqanta. Chantapis kuraj kaj sacerdoteqa, inciensota nina brasas pataman jichʼaykoj, chay ukhutaj ima munayta qʼaparej. ¿Imatataj chaymanta yachakusunman? Bibliapi willawanchej, Jehová Diosqa kamachisninpa mañakuyninkuta inciensowan kikinchasqanta (Sal. 141:2; Apo. 5:8). Kuraj kaj sacerdoteqa Jehová Diospa ñaupaqenman manchay respetowan inciensota apaykoj. Ajinallatataj noqanchejpis, Jehová Diosmanta respetowan mañakunchej. Tukuy imata ruwaj Jehová Diosqa, payman qayllaykojta saqewanchej. Jehová Diosman Tatanchejman jina chimpayta atisqanchejtataj, may jatunpaj qhawanchej (Sant. 4:8). Payqa amigosninpaj qhawawanchej (Pro. 3:32). Chayrayku Jehová Diosta kusichinapaj jinapuni imatapis ruwayta munanchej. w19.11 págs. 20, 21 párrs. 3-5

Maypichus tiyakunchej chaypi, ¿imatataj runas trabajomanta yuyanku? Ashkha suyuspi runasqa, trabajollaman astawan qokunku. Chayraykutaj mana tiemponku kanchu samarinankupaj, familiankuwan kanankupaj, ni Jehová Diosmanta yachakunankupajpis (Ecl. 2:23). Wakin runastajrí mana trabajayta munankuchu, chayraykutaj achakista churanku (Pro. 26:13, 14). Ashkha runasqa anchata trabajanku, wakintajrí mana trabajayta munankuchu. Jinapis imatachus Jehová Dioswan Jesuswan trabajomanta yuyasqankupi piensarina. Jehová Diosninchejqa sumaj trabajador. Señorninchej Jesustaj chayta sutʼita rikucherqa, jinata nispa: “Tatayqa trabajashallanpuni, noqapis trabajashallanitaj”, nispa (Juan 5:17). Jehová Diosninchejqa may chhika angelesta cielopi ruwarqa, jinallataj estrellasta, planetastapis. Payqa ruwallarqataj kay jallpʼata, chaypi tukuy ima kajtawan. w19.12 pág. 2 párrs. 1, 2

David Jehová Diospa sumaj amigonman tukusqanmanta yachakuna. Davidqa Jehová Diosta rejserqa ruwasqasninpi tʼukurispa. Davidqa jovencito kashaspa, tatanpa ovejasninta qhawaspa campopi sayaj. Chaypitaj Jehová Diospa ruwasqasninta qhawarej. Ichapis payqa, chaypi imastachus rikusqanpi tʼukurej. Payqa tuta cielota qhawarispa, may chhika estrellasta rikoj. Chaypitaj reparaj imaynachus Jehová Dios kasqanta (Sal. 19:1, 2). Davidqa imayna ruwasqachus kasqanpi tʼukurispa, Jehová Dios may yachayniyoj kasqanta repararqa (Sal. 139:14). Rey Davidqa Jehová Diospa ruwasqasninpi tʼukurispa, Jehová Diospa ñaupaqenpi mana imapischu kasqanta repararqa (Sal. 139:6). ¿Imatataj rey Davidmanta sapa ujninchej yachakunchej? Jehová Diospa ruwasqasninta sapa día qhawarina, plantasta, animalesta, runastapis. Tʼukurinataj imatachus chaykuna Jehová Diosmanta yachachiwasqanchejpi. Ajinata ruwaspaqa, munakuyniyoj Tatanchej Jehová Diosta astawan rejsisunchej (Rom. 1:20). Diamanta diataj Jehová Diosta astawan munakusunchej. w19.12 págs. 19, 20 párrs. 15-17

Moisesqa Jehová Diosta sirviyta ajllarqa. Payqa 40 watasniyoj jina kashaspa, mana munarqachu “Faraonpa ususinpa wawan nisqa kayta”. Astawanpis israelitaswan kayta ajllarqa. Chantapis Moisesqa, Egiptoj qhapaj kayninta qhesacharqa. Yacharqataj israelitaswan kasqanrayku, faraón paypaj mayta phiñakunanta. Faraonqa may atiyniyoj rey karqa, dios jinataj qhawasqa karqa. Jinapis Moisesqa sinchʼi creeyniyoj kasqanta rikucherqa, Jehová Diospitaj atienekorqa. Chayrayku tukuy kausayninpi Jehová Diospa sumaj amigon karqa (Pro. 3:5). ¿Imatataj Moisesmanta yachakunchej? Moisés jina, Jehová Diosta sirviytachus manachus ajllananchej kasqanta. Jehová Diosta sirvinapajqa, ichá wakin imasta saqenanchej kanqa, chayri Diosta mana rejsejkuna churanakuwasun. Jinapis Jehová Diospi atienekusun chayqa, payqa yanapawasunpuni. w19.12 pág. 17 párrs. 5, 6

Jehová Dios ñutʼu jallpʼamanta ruwawajtinchejpis, paypajqa mayta valenchej. ¿Imaraykutaj creesunman Jehová Diospaj mayta valesqanchejta? Ñaupajtaqa payman rijchʼakojta ruwawasqanchejrayku (Gén. 1:27). Jehová Diosqa jallpʼapi tukuy ima ruwasqanmanta aswan patapi churawarqanchej. Chantapis jallpʼata, animalesta ima makisninchejman churarqa (Sal. 8:4-8). Adán juchallejtinpis, Jehová Diospajqa valellanchejpuni. Payqa anchatapuni munakuwasqanchejrayku, Wawanta juchasninchejrayku wañunanpaj kachamorqa (1 Juan 4:9, 10). Señorninchej Jesús kausayninta qosqanrayku, Diosqa Adanpa juchannejta wañojkunata kausarichimonqa, “cheqan runasta, mana cheqan runastapis” (Hech. 24:15). Jehová Diosqa Palabranpi niwanchej, onqosqa kajtinchejpis, mana qolqeyoj kajtinchejpis, viejitoña kajtinchejpis, paypaj mayta valesqanchejta (Hech. 10:34, 35). w20.01 pág. 15 párrs. 5, 6

Mana yuyananchejchu tiyan, uj ajllasqa cristianoj warmin, tatasnin chayri waj familiaresnin ajllasqallataj kasqankuta. Cieloman rinapaj ajllasqa kaytaqa mana uj herenciata jinachu japʼinku, manaqa Jehová Dios sapa ujninkuta ajllan (1 Tes. 2:12). Chayrayku mana allinchu kanman, sonqota nanachinapaj jina tapuykunata ruwananchej. Uj ajllasqa cristianoj warminta mana tapusunchu: “¿Imayna kashanki paraisopi sapallaykiña kausakunaykita yachaspa?”, nispa. Imajtinchus Jehová Diosqa, paraisopi tukuy runasman sonqonkoj munasqanta qonqa (Sal. 145:16). Ajllasqa cristianosta tukuy hermanosta jina qhawayqa, allinninchejpaj. ¿Imaraykutaj chayta ninchej? Imaraykuchus Diospa Palabran nisqanman jina, wakin ajllasqa cristianosqa Jehová Diosmanta karunchakunkuman (Mat. 25:10-12; 2 Ped. 2:20, 21). Runasta jatunchaymanta jarkʼakusun chayqa, mana runaspa qhepankuta risunchu, ni ajllasqa cristianos kajtinkupis, ni may rejsisqa hermanos kajtinkupis, ni unaytaña Jehová Diosta yupaychajtinkupis. Chayta ruwasun chayqa, paykuna Jehová Diosmanta chayri congregacionmanta karunchakojtinkupis, creeyninchejqa sinchʼillapuni kanqa, Jehová Diosmantapis mana karunchakusunchu. w20.01 pág. 29 párrs. 9, 10

Jehová Diospa “munasqa wawasnin” kasqanchejrayku, pay jina kanapaj kallpachakunanchej tiyan. Chayrayku pay jina kʼachas, munakuyniyojtaj kananchej tiyan. Wajkunatapis perdonayta yachananchej tiyan. Ajina kʼachas kajtinchejqa, Jehová Diosta mana rejsej runaspis, ichá paymanta yachakuyta munanqanku (1 Ped. 2:12). Cristiano tatasqa, imaynatachus Jehová Dios cuidawanchej, ajinallatataj wawasninkuta cuidananku tiyan. Chayta ruwanqanku chayqa, wawasninkupis ichá Tatanchej Jehovaman qayllaykuyta munanqanku. Noqanchejqa Tatanchej Jehovamanta kusiywan parlarinchej, munanchejtaj wajkunapis payta rejsinankuta. Chantapis tukuy sonqowan rey David jina ninchej: “Tukuy Atiyniyoj Señor Tata Diosníy, willarasaj qan jatuchaj imasta ruwasqaykimanta”, nispa (Sal. 71:16). Jinapis ichá manchachikusqanchejrayku, Jehová Diosmanta mana wajkunawan parlariyta atillanchejchu. Jina kajtin, kayta yuyarikuna: Jehová Diosmanta runasman willarispaqa payta kusichinchej, chay runastataj yanapanchej ashkha bendicionesta japʼinankupaj. Jehová Diosqa ñaupa tiempomanta cristianosta yanaparqa, mana manchachikuspa willanankupaj. Noqanchejtapis ajinallatataj yanapawasun (1 Tes. 2:2). w20.02 pág. 11 párr. 12; pág. 13 párr. 13

Ashkha runasqa, Bibliata estudiaytawan ñauparinku, bautizakunkutaj. Jinapis wakenqa, unaysitutaña estudiaspapis bautizakuyta manchachikunku. Paykunamanqa Bibliata estudiay mayta gustan. Jinapis bautismoman chayanankupaj mana ñauparinkuchu. Noqanchejqa estudiosninchejta yanapayta munanchej, yachakusqankuman jina kausakunankupaj, bautizakunankupajtaj. Jehová Diosqa munan, payta munakusqanchejrayku sirvinanchejta. Chayrayku estudiosninchejman yachachinanchej tiyan, Jehová Dios paykunamanta llakikusqanta, maytataj munakusqanta. Jehová Diosninchejqa, “wajcha wawaspa Tatanku, viudasmantaj kutikun”. Noqanchejtaj munanchej estudiosninchej Jehovata ajinata qhawanankuta (Sal. 68:5). Estudiosninchej Jehová Dios paykunata munakusqanta yachanqanku chayqa, ichá paykunapis Jehová Diosta munakullanqankutaj. Chayrayku estudionchejman yachachishaspaqa Jehová Dios wiñay kausayta japʼinanpaj yanapayta munasqanta entiendechina. w20.01 pág. 3 párrs. 7, 8

Apóstol Pabloqa llampʼu sonqo kasqanrayku, amigosninwan sonqochachikorqa. Payqa mana pʼenqakuspa nerqa, hermanoswan kallpachachikusqanta. Waj kutipipis, Pabloqa imaynatachus wakin amigosnin llakiypi kashajtin kallpachasqankumanta parlarqa (Col. 4:7-11). Llampʼu sonqos kaspaqa, mana pʼenqakusunchu llakiyninchejta hermanosninchejman willariyta. Paykunataj tukuy sonqo kallpachawasun. Pabloqa yacharqa, Diosmanta Qhelqasqa mayta sonqochananta (Rom. 15:4). Yachallarqataj Diospa Palabran, llakiykunata aguantananpaj yachayta qonanta (2 Tim. 3:15, 16). Romapi iskay kaj kutipi presochasqa kashaspa, Pabloqa pisimantawan wañupunanta yacharqa. Chayrayku Timoteota nerqa: ‘Noqaman usqhayllata jamuy, kʼuyuna librostawan aparinpuway’, nispa. Chay kʼuyuna librospeqa, ichá Ñaupa Testamentomanta wakin partes karqa (2 Tim. 4:6, 7, 9, 13). ¿Imajtintaj Pablo chay kʼuyuna librosta Timoteomanta mañakorqa? Ichapis Pabloqa chay librosta estudiayta munarqa. Noqanchejpis Pablo jina Bibliata sapa kuti estudiana. Jehová Diostaj ima llakiypi kajtinchejpis, chaynejta sonqo tiyasqa kanapaj yanapawasun. w20.02 pág. 23 párrs. 14, 15

Elifaz, Bildad, Zofar ima, ashkha diasta chʼinlla kaytawan Jobta parlapayarqanku. Wakin imasta maychus kajllata nispapis, Jehovamanta, Jobmantapis mana cheqantachu parlarqanku. Nitaj Jobta munakusqankuta rikucherqankuchu. Astawanpis mana khuyarikuspa juchacharqanku. Paykunaqa chʼinlla kashaspa Jobta yanapaypi piensanankumantaqa, juchachayllapi piensasqanku (Job 32:1-3). ¿Imaynatá Jehová Dios chay ruwasqankuta qhawarqa? Payqa chay runaspaj mayta phiñakorqa, sonso runas kasqankutataj nerqa. Chantá paykunaman nerqa: “Kamachiy Jobqa qankunarayku noqamanta mañapusonqachej”, nispa (Job 42:7-9). Elifaz, Bildad, Zofarwan imatachus ruwasqankumanta, kinsa imasta yachakunchej. Ñaupaj kaj, ama hermanosninchejta juzganachu (Mat. 7:2-5). Astawanpis niraj parlashaspa, hermanonchejta allinta uyarina. Chayta ruwaspaqa imaynachus kashasqanta yachasun (1 Ped. 3:8). Iskay kaj, hermanonchejwan parlashaspaqa, kʼacha simiwan, cheqa kajtataj parlana (Efe. 4:25). Kinsa kaj, Jehová Diosqa imaynatachus wajkunawan parlasqanchejta qhawamushan. w20.03 pág. 22 párrs. 15, 16

Runasman Jehová Diosmanta yachachispaqa, noqanchejpis payta astawan rejsillanchejtaj. Kay imaspi piensarina: Jehová Diosqa “allin sonqoyoj” kajkunata tarinapaj yanapawanchej. Chaypitaj paypa khuyakuyninta rikunchej (Juan 6:44; Hech. 13:48). Chantapis noqanchejwan Bibliata estudiajkuna sajra ruwayninkuta saqejtinku, ‘mosoj kausaywantaj pʼachallikojtinku’, Diospa Palabran may atiyniyoj kasqanta rikunchej (Col. 3:9, 10). Jehová Diosqa runas payta rejsinankuta, salvakunankuta ima munan. Chayrayku kutin kutita willaj kachawanchej. Chaypitaj pacienciayoj kasqanta rikunchej (Rom. 10:13-15). Jehová Diosta unaytaña sirvispapis, paywan amigos kayta, may sumajpaj qhawanallapuni tiyan. Chaytataj ruwasunman paywan mañakuynejta parlarispa. Pillawanpis sumaj amigos kanapajqa, paywan sapa kuti parlarinchej. Jehová Dioswan sumaj amigos kanapajpis, paywan sapa kuti parlarinanchej tiyan. Paymanqa mana manchikuspa willarikuyta atinchej, imaynachus kashasqanchejta, imatachus yuyashasqanchejtapis. w19.12 pág. 19 párrs. 11, 13, 14

Jesusqa Jehová Diospa Gobiernonpi Reyña kashan. Tumpamantawantaj Kuraj Supaypa ruwasqasninta, mundontawan tukuchenqa. Chayta yachayqa sumaj kausayta suyakunapaj yanapawanchej (Isa. 65:17; 1 Juan 3:8; Apo. 21:3, 4). Mana chayllachu, Jesusqa kay tiempopaj qowasqanchej llankʼayta juntʼanapaj yanapashawanchej. Chayta yachaytaj mayta kallpachawanchej (Mat. 28:19, 20). Sonqochasqa kay, uj suyakuyniyoj kay, kallpachasqa kay ima, sonqo tiyasqa kananchejpaj yanapawanchej. Yachakusqanchejman jina, ¿imaynatá llakiykunapi kashaspa sonqo tiyasqa kayta atisunman? Jesús jina ruwaspa. Ñaupaj kaj, mana saykʼuspa Diosmanta mañakuna. Iskay kaj, ima llakiypi kaspapis Jehová Diosta kasukuna, tukuy sonqotaj predicana. Kinsa kaj, amigosninchej yanaparinawanchejta saqena. Ajinamanta Diospa sonqo tiyaykuynin, sonqonchejta, yuyayninchejtawan waqaychanqa (Fili. 4:6, 7). Jesús jinataj ima pruebatapis atipasun (Juan 16:33). w19.04 pág. 13 párrs. 16, 17