Octubre

Jehová Diosninchejqa, kay tiempopi llajtanta sumajta jarkʼashan. Chaytaj sutʼi rikukun, mundontinpi runasman cheqa kajmanta predicashasqanchejpi, yachachishasqanchejpitaj (Mat. 28:19, 20). Chayta ruwaspaqa, Satanaspa ruwaykunasninta sutʼiman orqhonchej. Satanasqa mana Diosmanta willasqanchejta sayachiyta atinchu. Sayachiyta atinman chayqa, sayachinmanñachá karqa. Chayrayku supaykunata mana manchachikunachu tiyan. Jehová Diosmanta mana karunchakusunchu chayqa, supaykunaj ruwasqankoqa mana wiñaypajchu ñakʼarichiwasun. Jinapis tukuyninchej supaykunawan guerrapi jina kashanchej. Chayrayku Tatanchej Jehovamanta mana kacharikunachu tiyan. Chayta ruwaspaqa ashkha bendicionesta japʼisunchej. Satanasqa mana engañawasunchu, supaykunatataj mana manchachikusunchu. Astawanpis Jehová Diosta sirvillasunpuni, paymantaj astawan kʼaskaykusun. Santiago nerqa: “Kuraj Supaypa contranpitaj sayaykuychej, paytaj qankunamanta ayqenqa. Diosman qayllaykuychej, paytaj qankunaman qayllaykamusonqachej”, nispa (Sant. 4:7, 8). w19.04 pág. 24 párr. 15; pág. 25 párr. 18

Wawasqa “Diosmanta herencia kanku”, uj regalo jinataj. Tatasqa chay sumaj regalota cuidananku tiyan. ¿Imatataj tatas ruwawajchej wawasniykichej mana abusasqa kanankupaj? Ñaupaj kaj, imaynapichus wawas abusasqa kasqankuta yachaychej. Imayna runaschus wawasta abusasqankuta yachaychej. Yachallaychejtaj imaynatachus wawasta engañasqankutapis. Wawasniykichejta tukuy tiempo qhawariychej, ama piwanpis sapallankuta saqeychejchu (Pro. 22:3; 24:3). Ashkha kutispi wawasta abusajkunaqa, familiallankumantataj kanku, chayri rejsisqasninku kanku. Iskay kaj, wawasniykichejwan parlariychej, tukuy imata willasunaykichejpaj (Deu. 6:6, 7; Sant. 1:19). Wawasqa abusasqa kajtinku, willakuyta manchachikunku. Ichapis piensanku ni pi paykunata creenanta. Manachayrí abusaj runaqa, ichapis wawata manchaykuchin mana pimanpis willakunanpaj. Wawaykichej uj jinalla kashan chayqa, kʼachallamanta tapuriychej, pacienciawantaj uyariychej. Kinsa kaj, wawasniykichejta yachachiychej. Pillapis llujchiykuyta munajtin, imatachus ninankuta chayri ruwanankuta yachachiychej. w19.05 pág. 13 párrs. 19-22

¿Imaraykutaj Jehová Dios jatunchakojkunata chejnikun? Imaraykuchus jatunchakoj runasqa, runaykachayta yachachejkunapis, jatunchakoj Satanás jina kanku. Satanasqa munarqa, Jesuspis payman qonqoriykukuspa yupaychananta. Payqa chayta munaspa anchañataj karqa, imajtinchus Diosqa tukuy imata Jesusnejta ruwarqa (Mat. 4:8, 9; Col. 1:15, 16). Runasqa qhasi manakajllata jatunchakunku. Chantachá Diospajqa kay mundoj yachaynin qhasi manakajlla (1 Cor. 3:19). Bibliaqa noqanchejmanta maychus kasqallanta yuyananchejta niwanchej. Uj pacha, Jesús nerqa: “Runa masiykitapis munakunayki tiyan, qan kikiykita jina”, nispa (Mat. 19:19). Jesuspa nisqanqa, rikuchiwanchej mana ancha pisipajchu qhawakunanchej kasqanta. Jinapis Bibliaqa nillawanchejtaj, ama wajkunamanta aswan sumaj kasqanchejta yuyanata. Yuyaychawanchejtaj: “Ama churanakojkuna, nitaj qhasimanta jatunchakojkunaqa kaychejchu. Astawanqa kʼumuykukoj sonqo kaspa, wajkunata qankunamanta aswan kurajta jina qhawaychej”, nispa (Fili. 2:3; Rom. 12:3). w19.05 pág. 24 párrs. 13, 14

Diospa Palabranmanta yachakuytawan, Jehová Diosta sirvinapaj kausayninchejta cambiarqanchej. Noqanchejmanta ashkhas, sajra ruwaykunata saqerqanchej (1 Cor. 6:9-11). Jehová Diosman mayta agradecekunchej, kausayninchejta cambianapaj yanapawasqanchejmanta. Bautizasqaña kaspapis, mana yuyananchejchu tiyan niña cambiananchejchu kasqanta. Bautizakunapajqa manaña juchallikorqanchejchu. Jinapis kallpachakunallapuni tiyan mana watejmanta juchallikunapaj. Pablo nisqanman jina, iskay imasta ruwananchej tiyan. Uj kaj, ‘amaña kay tiempomanta runas jina kausanachu’. Iskay kaj, “yuyayninchejta mosojyachispa, mosoj runaman” tukunanchej tiyan. Apóstol Pabloqa “mosoj runaman tukuychej” nispa, mana rijchʼayninchejta cambianamantachu parlasharqa, manaqa imayna runachus kasqanchejta cambianamanta. w19.06 pág. 9 párrs. 4-6

Llakisqas kashajtinchejqa, tantakuykunapi mayta kallpachakunchej. Chaypeqa Jehová Dios yanapawanchej, sonqochawanchejtaj. Chaypeqa Jehová Diosninchej atiyninnejta, Palabrannejta, hermanosnejta ima kallpachawanchej. Chantapis hermanoswan ‘purajmanta kallpachanakunchejʼ (Rom. 1:11, 12). Hermananchej Sofía nin: “Noqataqa Jehová Dios, hermanoswan ima, llakiyniyta aguantanaypaj yanapawarqanku. Tantakuykunaman manapuni faltakojchu kani. Astawan predicaspa, congregacionpipis astawan yanapakuspaqa, niña llakiykunasniypi yuyanichu”, nispa. Llakisqa kashaspaqa, Jehová Dios tumpitamantawan tukuy llakiykunata chinkachinanta yuyarikuna. Payqa kunanpis yanapayta munawanchej. Tatanchej Jehovaqa kallpata qowanchej llakiykunawan mana llauchhiyananchejpaj. Payqa problemasninchejta atipayta munananchejpajpis yanapawanchej (Fili. 2:13). w19.06 pág. 19 párrs. 17, 18

Jesusqa, kausarimuytawan discipulosninta uj reunionman wajyacherqa. Chay reunionpitaj, sumaj kamachiykunata paykunaman qorqa. Jesusqa yachachisqasninwan tantasqa kashaspa, paykunaman uj sumaj kamachiyta qorqa. Chay kamachiytataj juntʼanankupuni karqa. Noqanchejpis chay kamachiyta juntʼashallanchejtaj. Jesusqa yachachisqasninman kamacherqa: “Rispa, tukuy laya runasta yachachisqasniyman tukuchimuychej [...]. Yachachimuychej paykunaman imastachus noqa kamacherqaykichej, chayta paykunapis kasukunankupaj”, nispa (Mat. 28:19, 20). Chay kamachiytaqa, mana 11 cheqa sonqo apostolesnillanmanchu qorqa. Jesusqa tukuy yachachisqasnin predicanankuta munan. ¿Imaynatá chayta yachanchej? Jesús chay kamachiyta Galilea orqopi qoshajtin, mana apostolesllachu chaypi tantasqa kasharqanku. Yachakunchej jina, angelqa sepulturaman rej warmisman nerqa: Galileapi “paywan tinkunkichej”, nispa (Mat. 28:7). Chayrayku chay warmispis, Galilea orqopichá kasharqanku. w20.01 págs. 2, 3 párrs. 1-4

Jesusqa imaraykuchus runas churanakunawanchejta sutʼincharqa. Pay nerqa: ‘Qankunaqa mana kay mundomanta runas jinachu kankichej, chayrayku kay mundomanta runasqa chejnisonqachej’, nispa. Runas qhatiykachawasqanchejqa, mana ninayanchu Dios mañana bendecishawasqanchejta. Astawanpis Diospa kamachisnin kasqanchejta rikuchin. Runasqa mana jarkʼawasunmanchu, tukuy atiyniyoj Diosta sirviyta. Jehovaj enemigosnenqa, qhasillata tukuy imata ruwarqanku. Iskay kaj Guerra Mundialpi imachus kasqanta qhawarina. Ashkha suyuspi gobiernosqa, Diospa kamachisninta mayta qhatiykacharqanku. Alemaniapi nazis nisqa gobiernopi kashajtinku, Jehovaj testigosninta niña predicajta, nitaj tantakojtapis saqerqankuchu. Canadapi, Australiapi, waj lugarespiwan, kikillantataj gobiernos ruwarqanku. Ajina kajtinpis willajkunaqa astawan yapakorqanku. Kay 1939 watapi guerra qallarishajtin, mundontinpi 72.475 willajkuna karqanku. Kay 1945 watapajrí, willajkunaqa iskay jinastawan yapakorqanku. Chay guerra tukukuyta 156.299 willajkuna karqanku. w19.07 págs. 8, 9 párrs. 4, 5

Niraj uj runata Bibliamanta yachachishanchejchu chayqa, ¿imaynatá runasta Jesuspa discipulosnin kanankupaj yanapakusunman? Pillapis tantakuyninchejman ñaupaj kutillataraj jamun chayqa, “walejta jamunki” nisunman, yanaparisunmantaj. Ajinamanta payqa reparanqa purajmanta munanakusqanchejta, cheqa cristianostaj kasqanchejta. Reunionpi pisi parlayllapi kutichisqanchejpis, paypis kikinta ruwananpaj yanapanqa. Chantapis mosoj willajwan predicaj llojsisunman, yanaparisunmantaj runasta Bibliawan yachachinanpaj. Chayta ruwaspaqa, Cristo jina ruwananpaj yanapasun (Luc. 10:25-28). Ashkha hermanosninchejqa, ashkha ruwanasniyoj kasqankurayku mana tiempoyojchu kanku. Jinapis runasman Bibliamanta yachachinankupaj tiempochakunku, chayta ruwaspataj mayta kusikunku. w19.07 pág. 17 párrs. 11, 13

Pablotaqa ni ñaupa juchasninpis, ni allin imasta ruwasqanpis pantacherqachu. Chayrayku pay nerqa, jamoj imasta japʼinanpaj, “ñaupaj imasta” qonqanan kasqanta. Arí, Pabloqa tʼinkata japʼinankama ñaupajllamanpuni rinan karqa. Jinapis ichá wakin imas payta pantachiyta atinman karqa. Ñaupaj kaj, Pabloqa Diosta tukuy sonqo yupaychaj judío karqa, judiospa yachachiyninkutataj mayta rejsicherqa. Jinapis payqa chaykunata “qʼopata jina” qhawarqa (Fili. 3:3-8). Iskay kaj, Pablotaqa cristianosta qhatiykachasqanmanta sonqon juchacharqa. Jinapis payqa mana chay llakiyninwan atipachikorqachu. Kinsa kaj, Pablotaqa Diosmanta willasqanrayku, carcelpi wisqʼarqanku, maqarqanku, rumiswan chʼanqarqanku, jatun qocha chaupipi tuytorqa, wakin kutistaj mana mikhunayoj, pisi ropayojtaj karqa. Ajinata sufrispapis Diospaj sumajta llankʼarqa. Jinapis payqa mana yuyarqachu, Diospaj tukuy imataña ruwasqanta (2 Cor. 11:23-27). Jehovapaj ashkhataña llankʼaspapis, payta sirvinallanpuni kasqanta yacharqa. Noqanchejpis kikillantataj ruwananchej tiyan. w19.08 pág. 3 párr. 5

Ashkha hermanosqa, maypichus autoridades mana wasimanta wasi predicajta, nitaj waj jinasmanta predicajta saqenkuchu, chay suyuspi tiyakunku. Chayrayku waj jinasmanta predicanankupaj yuyaychakunku (Mat. 10:17-20). Chay suyusmanta ujninpi, congregacionesta waturej hermanoqa, hermanosta yuyaycharerqa imaynatachus predicanankuta. Pay nerqa sapa ujninku parientesninkuman, vecinosninkuman, rejsisqasninkuman, escuelamanta chayri trabajomanta compañerosninkuman predicanankuta. Chay circuitopeqa, iskay watallapi ashkha congregaciones yapakorqa. Ichá noqanchejtaqa autoridades predicajta saqellawanchej. Jinapis chay hermanosmanta mayta yachakusunman. Noqanchejpis runasman willamunapaj, tukuy atisqanchejta kallpachakuna. Chayta ruwasun chayqa, Jehová Dios yanapawasun ima kajtinpis willamunallapajpuni (Fili. 2:13). Kay tiempopi astawan imaschus aswan allin imas kasqanta sumajta reparana, mana kʼamina runas kanapajtaj kallpachakuna. Chantapis ama wajkunata pantachinachu, cheqan ruwaykunatataj ruwanallapuni. Ajinamanta munakuyninchej astawan wiñanqa, munakuyniyoj Tatanchej Jehovatataj jatunchasunchej. w19.08 pág. 13 párrs. 17, 18

Pikunachus nisqallankuta valechiyta munanku, nitaj wajkunata uyarinkuchu chay runaswanqa, mana kayta munanchejchu. Jinapis hermanosninchejwanqa mayta kayta munanchej. Imaraykuchus paykunaqa ‘familiankuta jina munakuwanchej, may khuyakuyniyoj, kʼumuykukoj sonqotaj kanku’ (1 Ped. 3:8). Ajina runaspa qayllanpi kayta munanchej chayqa, noqanchejpis kʼumuykukoj sonqollataj kananchej tiyan. Ajinamanta wajkuna noqanchejwan kayta munanqanku. Kʼumuykukoj sonqo kaspaqa, kausayninchejpi problemastapis aguantayta atillasun. Ichá wakin kutisqa, imapis mana allinchu rijchʼawasun chayri mana cheqan kajtachu ruwakushasqanta yuyasun. Imatapis sumajta ruwayta yachajkunaqa, mana jatunpaj qhawasqapunichu kanku. Mana sumajta yachajkunarí, wakin kutis astawan jatunpaj qhawasqa kanku. Jinapis Salomonqa yuyaychawanchej kausayninchejwan kusisqa kanata, imapis mana yuyasqanchejman jinachu kajtintaj mana phiñakunata (Ecl. 6:9). Kʼumuykukoj sonqo kaspaqa, kausayninchej mana munasqanchejman jinachu kajtinpis kusisqallapuni kasunchej. w19.09 pág. 4 párrs. 9, 10

Tatasqa Jehovamanta atiyta japʼinku familiankuta kamachinankupaj. Jehová Diosqa tatasta churan familiankumanta uma kanankupaj. Munantaj wawasninkuta yachachinankuta, pantajtinkutaj cheqanchanankuta (1 Cor. 11:3). Tatasqa imaynatachus wawasninkuta uywasqankumanta, Jehová Diosman cuentata qonqanku. Imaraykuchus paymin tukuy familiasta rikhurichin (Efe. 3:14, 15). Tatasqa Jehová Diosta kasusqankuta rikuchinku, paypa munasqanman jina familiankuta kamachispa. Tatas, ama Jehová Dios qosunkichej chay atiymanta valekuspa familiaykichejta sufrichiychejchu. Pantaspaqa reparakuychej, pillapis Bibliawan yuyaychasojtiykichejtaj japʼikuychej. Ajina kʼumuykukoj sonqo kankichej chayqa, señoraykichej, wawasniykichejpis respetasonqachej. Chantapis familiaykichejwan orakushaspaqa, Jehová Dioswan tukuy sonqo parlariychej. Ajinamanta paykunaqa yachanqanku imallapajpis Jehovaj yanapaynintapuni maskʼasqaykichejta. Astawanqa Jehová Diosta sirviyta ñaupajman churaychej (Deu. 6:6-9). Tukuy chaykunata ruwaspaqa, familiaykichejta kikinta ruwanankupaj yanapankichej. Chaytaj ni imawan kikinchakunmanchu. w19.09 pág. 15 párr. 8; pág. 17 párr. 14; pág. 18 párr. 16

Marcosqa wajkunata yanaparispa kusikorqa. Marcosqa ashkha kutispi apóstol Pablota, Pedrotawan Diospaj ruwanasninkuta juntʼanankupaj yanaparqa. Ichapis Marcosqa paykunapaj mikhunata rantiporqa, alojamientosta maskʼaporqa chayri waj imasta ruwaporqa (Hech. 13:2-5; 1 Ped. 5:13). Pabloqa Marcosmanta nerqa: ‘Payqa Diospa Gobiernonpaj ujnin llankʼaj masiy, maytataj yanapawan’, nispa (Col. 4:11). Marcosqa Pabloj sumaj amigonman tukorqa. Kay 65 wata qayllata Pabloqa watejmanta Romapi preso kasharqa, chaymantataj niña kacharerqankuchu. Chaypachataj Timoteoman iskay kaj cartanta qhelqarqa. Nerqataj: ‘Romaman jamuy, Marcostawan pusamuy’, nispa (2 Tim. 4:11). Pabloqa Marcos aswan ñaupajpi payta yanapasqanta mana qonqakorqachu. Chayrayku Marcosta wajyacherqa yanapachikunanpaj. Marcosqa Pablota kapuyninwan yanaparerqa. Ichapis yanaparqa mikhunata chayri qhelqananpaj imastachus necesitasqanta qospa. Pablotaqa sonqochasqanku, kallpachasqanku ima, maytachá yanaparqa wañuchinanku qayllata. w20.01 pág. 11 párrs. 12, 13

Cristiano kausayqa mana facilchu, sinchʼitataj llankʼana tiyan. Chay kausaytataj noqanchej ajllakorqanchej. Jesusqa runas qhatiykachanawanchejta nerqa. Jinapis Diosninchej ima llakiytapis aguantanapaj kallpata qonawanchejmanta, ama iskayrayanachu. Aguantaspaqa, astawan kallpayoj kasunchej (Sant. 1:2-4). Diosqa necesitasqanchejta qowasunpuni, Michejninchej Jesustaj qhawawasun, hermanosninchejpis kallpachawasun. Chaymantaqa ama iskayrayanachu (Mat. 6:31-33; Juan 10:14; 1 Tes. 5:11). Jesús sanoyacherqa chay warmeqa, “yawar apaywan onqosqa” kasqanmanta chay diapacha samarerqa (Luc. 8:43-48). Jinapis Cristota mana qhaterqachu chayqa, pisi tiempollapajchá samarikorqa. Mana yachanchejchu imatachus pay ruwasqanta. Jesuspa yugonman churakuyta ajllarqa chayqa, Jesuswan khuskachá cielopi kausashan. Chay warmeqa ichapis Jesusta qhatinanpaj tukuy imata saqerqa. Jinapis chayqa, cielopi wiñay kausayta japʼiywan mana kikinchakunchu. Cielopi chayri jallpʼapi wiñay kausayta suyakuspapis, ¡maytapuni kusikunchej Jesús “noqaman jamuychej” nisqanta kasukusqanchejmanta! w19.09 pág. 25 párrs. 21, 22

Davidpa kamachisnenqa, yanapata necesitashaspa qhapaj israelita Nabalmanta mikhunata qorichikoj rerqanku. Paykunaqa chay runaj ovejasninta chʼin pampaspi jarkʼapusqankurayku, mana pʼenqakuspa mañakorqanku. Jinapis Nabalqa sajra karqa, nitaj paykunaman imatapis qorqachu. Davidqa mayta phiñakorqa, Nabalta, ayllunmanta tukuy qharistawantaj wañuchinanta nerqa (1 Sam. 25:3-13, 22). Chayta yachaytawan, Nabalpa warmin Abigailqa imatachus ruwananta chay rato yuyaychakorqa. Abigailqa manchay kʼachita karqa, mana manchachikoj warmitaj. Payqa Davidwan parlaj rerqa. Paywan tinkuspataj, pampaman kʼumuykukorqa. Chantá nerqa: ‘Mañarikuyki ama makiykiwan pagachikunaykita. Nabalta wañuchispaqa qanlla juchayoj rikhuriwaj. Saqey ari Jehová Dios justiciata ruwananta’, nispa. Abigaíl respetowan parlasqan, allintataj yuyaychakusqan, Davidpa sonqonta kuyuricherqa. Davidqa repararqa, Diospuni Abigailta payman kachasqanta (1 Sam. 25:23-28, 32-34). Abigailqa llampʼu sonqo, mana manchachikoj, allin yuyayniyojtaj karqa. Chayrayku Dios munayninta paynejta juntʼarqa. Kay tiempopipis, allin yuyayniyoj, sumajta reparaj hermanas tiyan. Jehová Diostaj paykunamanta valekunman, familiasninkuta, hermanostapis kallpachananpaj (Tito 2:3-5). w19.10 pág. 22 párr. 10

Cristianosqa Jatun Babiloniamanta tʼaqakunanchej tiyan. Estudiosninchejqa, Jehovata niraj rejsishaspa ichapis llulla religionpi kasharqanku. Paykunaqa ichá cultoman chayri misasman rej kanku. Manachayrí iglesiankoj waj ruwanasninman satʼisqa kasharqanku. Chayrí ofrendasta, diezmosta ima churaj kanku. Paykunaqa predicaj llojsinankupaj, llulla religionmanta tʼaqakunanku tiyan. Chantapis iglesiankuman uj cartata apachispa, chaymanta llojsipushasqankuta ninanku tiyan. Llulla religionpa apaykachasqan organizacionesmanta, chayman rijchʼakoj gruposmanta ima tʼaqakunanku tiyan. Cristianosqa sumajta qhawarikunanchej tiyan, ni trabajaspapis Jatun Babiloniawan chajrukunapaj (2 Cor. 6:14-17). Imaraykuchus mana Jatun Babiloniaj ruwasqasninman, nitaj juchasninmanpis chajrukuyta munanchejchu. Paykunaqa Diospa ñaupaqenpi chʼichipaj qhawasqa kanku (Isa. 52:11). w19.10 pág. 12 párrs. 16, 17

Jeremiasqa sutinta apaj librota qhelqarqa. Ichá qhelqallarqataj Ñaupaj kaj Reyesta, Iskay kaj Reyestawan. Chay librosta qhelqashaspa, payqa sumajtachá repararqa Dios pantaj runasmanta khuyakusqanta. Jeremiasqa yacharqa, rey Achab juchasninmanta pesachikojtin, Dios payta khuyakusqanta. Chayraykutaj Achab kausashajtin mana familianta chinkacherqachu (1 Rey. 21:27-29). Jeremiasqa yachallarqataj, Manasés Achabmanta nisqa astawan juchallejtinpis, pesachikojtin Dios perdonasqanta (2 Rey. 21:16, 17; 2 Cró. 33:10-13). Diosmanta chay imasta yachakusqanqa, maytachá Jeremiasta yanaparqa. Paypa amigon Barucqa, uj tiempota jatuchaj imasta maskʼarqa, Diostapis niña kusisqachu yupaycharqa. Jeremiasqa mana nerqachu: “Baructa yanapaspa tiempollayta usuchisaj”, nispa. Astawanpis payta yanaparerqa. Chaypajtaj imatachus Dios Barucman munakuywan, sutʼitataj nisqanta willarqa (Jer. 45:1-5). w19.11 pág. 6 párrs. 14, 15

Levítico libro nisqanman jina, israelitasqa Diosman agradecekusqankurayku chay jaywanata jaywaj kanku (Lev. 7:11-13, 16-18). Israelitasqa mana kamachisqa kasqankuraykuchu chayta jaywaj kanku, manaqa jaywaytapuni munasqankurayku. Israelitasqa Diosta munakusqankurayku, paykunallamanta allinyakuy jaywanata apaj kanku. Diosta sirvisqanchejqa chay jaywanas jinallataj. Imaraykuchus tukuy sonqo munakusqanchejrayku payta sirvinchej. Diosmanqa tukuy sonqo aswan sumajnin kajta qonchej. May chhika runastaj payta, kamachiykunasnintawan tukuy sonqo munakusqankurayku payta sirvishanku. Jehová Diosqa chayta rikuspa, maytachá kusikun. Payqa mana ruwasqallanchejtachu sumajpaj qhawan, manaqa imayna sonqowanchus chayta ruwasqanchejtapis. Chayta yachaytaj mayta sonqochawanchej. Ichapis viejitosña kasqanchejrayku, mana munasqanchejman jinachu Jehová Diospaj llankʼayta atinchej. Jina kajtin kayta yuyarikuna: Jehová Diosqa maykamallachus ruwayta atisqanchejta sumajta entienden. Ichapis yuyanchej Jehová Diospaj pisillata llankʼashasqanchejta. Jehová Diostajrí mana chaytachu qhawan. Astawanpis payqa qhawan, tukuy sonqo munakusqanchejrayku paypaj tukuy atisqanchejta llankʼasqanchejta. Chaytaj mayta kusichin, imaraykuchus aswan sumajnin kajta payman qoshanchej. w19.11 pág. 22 párr. 9; pág. 23 párrs. 11, 12

Trabajomanta maychus kajllata yuyana tiyan. Rey Salomonqa Diospa yuyaychasqanman jina qhelqarqa: ‘Tukuy imapaj uj tiempo tiyan’, nispa. Payqa nerqa ‘uj tiempo kasqanta plantanapaj, wasichanapaj, waqanapaj, asinapaj, tusunapaj ima’ (Ecl. 3:1-8). Kausayninchejpeqa ashkha imasta ruwananchejpuni tiyan. Chaymanta iskaytaj, trabajaywan samarikuywan kashan. Jesusqa chaykunamanta maychus kajllata yuyarqa. Uj pacha, Jesuspa discipulosnenqa predicaj risqankumanta saykʼusqas kutimorqanku. “Paykunaqa mana mikhunallankupajpis tiempoyojchu karqanku”. Chayrayku Jesusqa kay diapaj textoj nisqanta nerqa (Mar. 6:30-34). Jesuswan discipulosninwanqa, mana tiempoyoj kaspapis samarikojpuni kanku. Wakin kutisqa, tumpata samarinanchej chayri waj imasta ruwananchej allinpuni. Moisespa Leyninpi ujnin kamachiy chayta rikuchiwanchej. Jehová Diosqa, israelitasman kamacherqa semanapi uj diata samarinankuta. Moisespa Leyninta manaña juntʼananchej kajtinpis, Samarikuna Pʼunchaymanta kamacheyqa mayta yanapawasunman. w19.12 pág. 3 párrs. 6, 7

Diosqa tukuy sonqo sirvej kamachisninta cuidananta nin, nisqantataj juntʼaytapuni munan (Sal. 31:1-3). Chantapis familianmanta kajkunata mana cuidanman chayqa, mayta llakikusunman, sonqo pʼakisqataj kasunman. Diostaj chayta sumajta yachan. Payqa niwanchej, kausananchejpaj, payta sirvinapajpis necesitasqanchejta qonawanchejta. Chayta ruwanantataj ni ima jarkʼanqachu (Mat. 6:30-33; 24:45). Yachanchejña imaraykuchus Jehová nisqasninta juntʼasqanta. Chayta mana qonqasunchu chayqa, qolqe pisiwajtinchejpis pay yanapanawanchejpi atienekusun. Ñaupa tiempomanta cristianospi piensarina. Runas Jerusalenpi kaj congregacionta sinchʼita qhatiykachayta qallarejtinku, chay llajtapi apostoleslla qhepakorqanku, tukuy hermanostaj waj llajtasman ayqekorqanku (Hech. 8:1). Chay hermanosqa, ichapis wasisninkuta, trabajonkuta chayri negocionkuta saqerqanku. Chayrayku ichá wakin imasmanta pisichikorqanku. Jinapis Diosqa mana paykunata saqerparerqachu. Paykunataj kusisqallapuni karqanku (Hech. 8:4; Heb. 13:5, 6; Sant. 1:2, 3). Jehová Diosqa chay tiempomanta kamachisninta yanaparqa, noqanchejtapis yanapallawasuntaj (Sal. 37:18, 19). w20.01 pág. 17 párrs. 14, 15

Davidqa tatanpa ovejasninta uj leonmanta, jukumarimantawan jarkʼarqa. Chaypitaj repararqa, chay animalesta wañuchinanpaj Jehová yanapasqanta. Waj kutipitaj, Davidqa may jatun runa Goliatta wañucherqa. Chaypipis reparallarqataj Jehová yanapasqanta (1 Sam. 17:37). Aswan qhepaman, Davidqa rey Saulmanta ayqekunanpaj Jehová Dios yanapasqanta reparallarqataj (Sal. 18, qallariyninpi qhelqasqa ima). David jatunchakunman karqa chayqa, payllamanta tukuy chay imasta ruwasqanta yuyanman karqa. Jinapis Davidqa llampʼu sonqo kasqanrayku, tukuy kausayninpi Dios yanapasqanta repararqa. ¿Imatá Davidmanta yachakullanchejtaj? Jehová Diospa yanapayninta mañakuspapis, reparananchej tiyan maykʼajchus, imaynatatajchus Jehová Dios yanapawasqanchejta. Llampʼu sonqos kaspaqa, mana tukuy imatachu ruwayta atisqanchejta reparasun. Chayta reparaspataj, Jehová Dios yanapawasqanchejta sutʼita rikusun. Chayta rikuspataj, payman astawan qayllaykusun. w19.12 pág. 20 párrs. 18, 19

Jehová may valorniyojpaj qhawawasqanchejtaqa, waj imaspi reparallasunmantaj. Payqa payman pusawanchej. Chantapis imayna sonqowanchus sumaj willaykunata japʼikusqanchejta yachan (Juan 6:44). Jehová Diosman qayllaykojtinchej, paypis noqanchejman qayllaykamuwarqanchej (Sant. 4:8). Chantapis payqa yachachinawanchejpaj tiemponta, kallpanta ima churan. Diosqa yachan imaynachus kasqanchejta, sumaj runasman tukuyta atisqanchejtapis. Pantajtinchejtaj, munakuwasqanchejrayku kʼamiwanchej. Chay tukuy imasqa, Jehová Diospaj may munasqa kasqanchejta rikuchiwanchej. Rey Davidqa yacharqa Jehová Dios payta munakusqanta, yanapasqantataj. Chayta yachaytaj, runas ni imapaj valesqanta nejtinku yanaparqa (2 Sam. 16:5-7). Sinchʼi llakisqa kashajtinchej chayri problemasniyoj kashajtinchejqa, llakiyninchej mana tukukoj jina kasqanta yuyanchej. Jehová Diostajrí yanapawasunman mana jinata yuyanapaj, llakiykunata atipanapajpis (Sal. 18:27-29). Dios noqanchejwan kajtenqa, ni imapis payta kusiywan sirvinapaj jarkʼawasunmanchu (Rom. 8:31). w20.01 pág. 15 párrs. 7, 8

Estudionchejta yachachinapaj oracionwan qallarina. May allinpuni pillatapis Bibliamanta estudiachinapaj, tukuchanapajpis oracionta ruwananchej. ¿Maykʼajmantapachataj chayta ruwasunman? Atispaqa estudiachiyta qallarisqanchejmantapacha. Bibliamanta yachakojqa, Diospa atiyninpa yanapaynillanwan Palabranta entiendeyta atisqanta yachanan tiyan. Wakin hermanosqa, oracionmanta parlanankupaj Santiago 1:5 versiculota estudionkuwan leerinku. Chaypi nin: “Sichus qankunamanta pillapis pisi yachayniyoj chayqa, Diosmanta mañakullachunpuni”, nispa. Chantá estudiachishanku chay runata tapurinku: “¿Imatá ruwana kasqa yachayniyoj kanapaj?”, nispa. Runastaj nej kasqanku: “Jehová Diosmanta mañakuna”, nispa. Estudionchejman yachachina Diosmanta mañakuyta. Yachachishanchej chay runaman nina, Jehová Dios mañakuyninta uyariyta munasqanta. Ichapis jinata nisunman: “Tatanchej Jehovamanqa, tukuy imata willakuwaj, imastachus wajkunaman mana niyta atillankichu chaytapis. Payqa imachus sonqonchejpi kasqanta sumajta yachan”, nispa (Sal. 139:2-4). w20.01 pág. 2 párr. 3; pág. 5 párrs. 11, 12

Jehová Diosmanta kashan maykʼajchus uj cristianota cieloman rinanpaj ajllananqa (Rom. 8:28-30). Payqa cieloman rejkunata Jesús kausarimusqanmanta qhepaman ajllayta qallarerqa. Chay tiempopeqa, tukuy cheqa cristianos kajkunasina ajllasqas karqanku. Aswan qhepamantaj, “cristianos kayku” nejkunamanta ashkhas, mana cheqa cristianoschu karqanku. Jinapis Diosqa, chay tiempopi kaj cheqa cristianosta cieloman rinankupaj ajllarqa. Chay ajllasqa cristianostaj, Jesuspa kikinchayninmanta trigowan ninakorqanku. Jesustaj nerqa, chay trigoqa cizaña qhorawan khuska wiñananta (Mat. 13:24-30). Diosninchejqa kay tukukuy pʼunchaykunapipis, wakin cristianosta ajllashallanpuni 144 mil runasmanta kanankupaj. Payllamanta kashan kay mundoj tukukuynin qayllatapis runasta ajllananqa. Noqanchejqa mana pipis kanchejchu chayta qhawaranapaj (Rom. 9:11). Manataj munasunmanchu, Jesuspa rijchʼanachinanmanta uvas huertapi trabajaj peones jina kayta. Chay peonesqa patronninkupaj thutorqanku, uj horallata trabajajkunaman, paykunaman jinallataj pagasqanmanta (Mat. 20:8-15). w20.01 pág. 30 párr. 14

Tatanchej Jehová Diosqa kusisqa kausakunanchejta munan. Llakiykunasniyoj kaspapis, ashkha imasrayku kusikusunman. Ñaupajtaqa Tatanchej Jehová mayta munakuwasqanchejta yachanchej. Bibliamantapis cheqa kajta yachanchej (Jer. 15:16). Chantapis Jehová Diospa familianmanta kanchej. Familianmanta kasqanchejraykutaj, payta munakunchej, kamachiykunasninta kasukunchej, hermanosninchejtapis munakunchej (Sal. 106:4, 5). Chantapis kusikullanchejtaj, aswan qhepaman sumaj kausay kananta yachasqanchejrayku. Jehová Diosninchejqa sajra runasta tumpamantawan chinkachenqa, Gobiernonnejtataj kay jallpʼata uj paraisoman tukuchenqa. Chantá wañusqas kausarimunankuta yachasqanchejrayku, wañupoj familiaresninchejwan tinkukapuyta suyashanchej (Juan 5:28, 29). Chayqa may sumajpuni kanqa. Chantapis tumpamantawanqa, cielopi kajkuna, jinallataj kay jallpʼapi kajkunapis munakuyniyoj Tatanchej Jehovata jatunchanqanku, yupaychanqanku, payllatataj sirvenqanku. Chaytaj manchay sumajpuni kanqa. w20.02 pág. 13 párrs. 15, 16

Ima juchatapis ruwanchej chayqa, ama pakaykunachu. Astawanpis Jehová Diosman juchanchejta willakuna. Ajinamanta sonqonchej niña juchachawasunchu, sonqo tiyasqataj kasun. Jinapis Jehová Dios perdonanawanchejpajqa, mana chayllatachu ruwananchej tiyan. Astawanpis Jehová Dios kʼamiwasqanchejta japʼikuna. Jehová Diosqa profeta Natanta kacharqa, rey Davidman Betsabewan juchallikusqanta reparachinanpaj. Davidtaj mana wajkunatachu tumparqa, nitaj nerqachu juchan mana jatunchu kasqanta. Astawanpis chay rato juchanta rimarerqa. Payqa Betsabejpa qosanpa contranpi, Jehová Diospa contranpiwan juchallikusqanta nerqa. Chantá Jehová Diospa kʼamisqanta japʼikorqa. Jehová Diostaj payta perdonarqa (2 Sam. 12:10-14). Noqanchejpis juchapi urmanchej chayqa, ancianoswan parlarinanchej tiyan. Jehová Diosqa paykunata michejkunata jina churan (Sant. 5:14, 15). Amataj ninachu juchanchej mana chaykamapunichu kasqanta. Astawanpis ancianos kʼamiwasqanchejta usqhayllata japʼikuna, yuyaychawasqanchejman jinataj ruwana. Ajinamanta watejmanta sonqo tiyasqas, kusisqastaj kasunchej. w20.02 pág. 24 párrs. 17, 18

‘Waj llajtasmanta chunka runasqa’, kay jallpʼapi wiñaypaj kausakuyta suyakojkunawan ninakunku. Paykunaqa ‘judío runawan’ ninakoj ajllasqa cristianosta Jehová Dios bendecisqanta yachanku. Chayrayku paykunawan khuska Jehová Diosta yupaychayta, may jatunpaj qhawanku. Kay jallpʼapi wiñay kausayta suyakojkunaqa, mana yachankuchu kay jallpʼallapiraj kaj ajllasqa cristianospa sutisninkuta. Jina kajtin, ¿imaynatá paykunawan khuska “riyta” atinkuman? Chay tapuyman kay diapaj texto kutichiwanchej. Bibliapeqa uj judío runallamanta parlan. Jinapis chay chunka runasqa payman “qankunawan riyta munayku” nispa ninku. Chaytaj rikuchiwanchej, chay judío runaqa mana uj runallachu kasqanta. Chayrayku ninchej, tukuynin ajllasqa cristianoswan ninakusqanta. Mana ajllasqa cristianosqa, ajllasqa cristianoswan khuska Jehová Diosta yupaychashanku. Jinapis paykunaqa Jesusllata kamachejninkuta jina qhawanku, manataj ajllasqa cristianostachu (Mat. 23:10). w20.01 pág. 26 párrs. 1, 2

Jesusqa discipulosnin munanakusqankurayku rejsisqa kanankuta nerqa. Discipulosnenqa imaynatachus Jesús paykunata munakorqa, ajinallatataj munanakunanku karqa. Ñaupa tiempopeqa ajinatapuni munanakorqanku. Kay tiempopipis discipulosnenqa kikillantataj ruwashanku. Chayrayku wakin kutis mana atikullajtinpis, purajmanta munanakunanchej tiyan. Chaypajtaj wakin hermanosmanta parlarisun. Paykunaqa wakin kutis mana atikullajtinpis, hermanosta munakullarqankupuni. Paykunamantataj mayta yachakusunman. Pantaj runas kasqanchejrayku, mana atillanchejchu sonqomantapacha munanakuyta. Jinapis Cristo jina ruwanapaj kallpachakunanchej tiyan. Jesús yachachiwarqanchej, hermanonchej noqanchejpaj phiñasqa kajtin, paywan allinyakamuna kasqanta (Mat. 5:23, 24). Chantá nillarqataj, Jehová Dios allinpaj qhawanawanchejpajqa, tukuywan allinta kausakunanchej kasqanta. Jehovaqa mayta kusikun, hermanosninchejwan allinta kausakunapaj kallpachakojtinchej. Sichus mayqen hermanopajpis phiñasqallapuni kasun, nitaj paywan allinyakuyta munasunchu chayqa, Jehová Diosta yupaychasqanchej qhasilla kanqa (1 Juan 4:20). w20.03 pág. 24 párrs. 1-4

Satanasqa ‘llullakojkunaj tatan’. Payqa kay mundoj qallariyninmantapacha runasta engañashan (Juan 8:44). ¿Imaynamantá? Runasta creechin, uj runa wañupojtin alman waj lugarpi kausashallasqantapuni. Chayta creespa, runasqa imaymana costumbresta, cuentostawan rikhurichinku. ¿Imaraykutaj ashkha runas Satanasta creenku? Imajtinchus ni pipis wañuyta munanchu. Satanastaj chaymanta aprovechakuspa runasta engañan. Diosninchej sonqonchejman wiñay kausayta churasqanrayku, mana wañuyta munanchejchu (Ecl. 3:11). Chayrayku wañoyqa enemigonchej (1 Cor. 15:26). Satanás, ¿tukuy runastachu llulla yachachiykunasninwan engañan? Mana. Ashkha runasqa, imatachus Biblia wañusqasmanta nisqanta sutʼita yachanku, yachallankutaj wañusqas kausarimunankutapis. Chaytataj tukuyman yachachinku (Ecl. 9:5, 10; Hech. 24:15). Noqanchejqa wañusqas maypichus kashasqankuta sutʼita yachanchej. Chaytaj sonqochawanchej, niñataj ima cuentotapis creenchejchu. w19.04 pág. 14 párr. 1; pág. 15 párrs. 5, 6

Jehová Diosqa payta sirvejkunata munakun, munakullanqapunitaj. Payqa cheqan kajta, justiciatapis munakun (Sal. 33:5). Jehová Diosqa kamachisninta ñakʼarichejtinku sonqonta nanachikun, paykunapajtaj maychus tiemponpi justiciata ruwaponqa. Chaymantataj ama iskayrayanachu. Jehová Diosqa israelitasta munakusqanrayku paykunapaj leyesta churaporqa. Chay leyestaqa Moisesnejta qorqa. Ajinamanta tukuy israelitaspaj, mana piniyojkunapajpis justicia kananpaj (Deu. 10:18). Moisespa Leynenqa, Jehová Dios payta sirvejkunata mayta munakusqanta rikuchiwanchej. Moisespa Leynintaqa 33 watakamalla juntʼana karqa, maypachachus cristiana congregación rikhurerqa, chaykamalla. Jinapis Jehová Diosqa munakuwasqanchejrayku, justicia kananpajtaj, uj mosoj leyta churapuwarqanchej. Cristianosqa “Cristoj leyninta” juntʼananchej tiyan. Jesusqa yachachisqasninman mana leyestachu qorqa. Astawanpis kausayninkupi yanapananpaj, paykunata yachacherqa, kamacherqa, yuyaycharqataj. ‘Cristoj leynenqaʼ Jesuspa tukuy yachachisqan kashan. w19.05 pág. 2 párrs. 1-3

Runasqa nacekusqanchejmantapacha sonqochasqa kayta necesitanchej, wajkunatataj sonqochayta atinchej. ¿Imaraykutaj chayta ninchej? Uj wawita pujllashaspa moqetunta rasmillakusqanpi tʼukurina. Wawitaqa chay rato tatanman chayri mamanman waqaspa willakamun. Paykunaqa nanasqetanta mana sanoyachiyta atinkuchu, jinapis wawitankuta sonqochariyta atinku. Chayrayku wawitankuta imaynapichus urmakusqanta tapurinku, waqaysitunta picharqonku, munakuywantaj sonqocharinku. Chantá nanasqetanta jampiykunku. Wawitankutaj sonqochakuytawan niña waqanchu, watejmantataj pujllaj kutirin. Tiemponmantaj moqetunpis sanoyapun. Jinapis wakin wawasqa astawan sufrinku. Imaraykuchus wakin sajra runasqa paykunata violanku. Wakin wawasqa uj kutita abusasqa karqanku, wakintaj watasta. Wakin kutispi, chay sajra runasqa chay rato japʼichikunku, castigasqataj kanku. Wakin kutistajrí, ni ima castigota japʼinkuchu. Abusaj runata chay rato castiganku chaypis, wawasqa abusasqa kasqankuta mana qonqayta atinkuchu. Chayraykutaj jatun kanankukama mayta sufrillankupuni. w19.05 pág. 14 párrs. 1, 2