Agosto

Jesuspa sumaj amigosnin kajkunalla, paypa wañuyninnejta bendicionesta japʼenqanku. Imaraykuchus Jesusqa ‘amigosninrayku wañusqanta’ nerqa (Juan 15:13). Ñaupa tiempomanta Jehová Diospa kamachisninpis, kausarimuytawan Jesusmanta yachakunanku kanqa, munakunankutaj kanqa. Imaraykuchus paykunaqa, niraj Jesús kay jallpʼaman jamushajtin wañuporqanku. Paykunapis kausarimuytawan Jesuspa amigosnin kananku kanqa. Ajinallamanta wiñay kausayta japʼenqanku (Juan 17:3; Hech. 24:15; Heb. 11:8-12, 24-26, 31). Diospa Gobiernonmanta sumaj willaykunata willaspa, yachachispa ima, Jesuswan khuska trabajashanchej. Chayta ruwaspataj mayta kusikunchej. Jesusqa kay jallpʼapi kashaspa runasta yachacherqa. Kunantaj payqa cielopi kashan. Congregacionpa uman kasqanraykutaj, Diospa Gobiernonmanta willayta ñaupajman apashallanpuni. Jesusqa paymanta, Tatanmantawan runasman yachachisqanchejta jatunpaj qhawan. Manachus Jehovawan Jesuswan yanapawasunman chayqa, mana Diospa Gobiernonmanta willamuyta atisunmanchu (Juan 15:4). w20.04 pág. 22 párrs. 7, 8

Qallariypi, ¿pikunataj ‘wichay ladomanta reywan’, ‘uray ladomanta reywan’ karqanku? Israel llajtaj pata ladonpi, uranejninpiwan kaj reyes karqanku (Dan. 10:14). Pentecostés 33 watakamaqa, Israel llajta Diospa ajllakusqan llajta karqa. Jinapis chay watamantapacha, Jehová Diosqa Jesuspa discipulosnintañataj llajtan kananpaj ajllarqa. Chayrayku Daniel 11 capitulopi profeciamanta khuskan kurajpuni, Jesuspa discipulosninpi juntʼakorqa, manataj Israel llajtapichu (Hech. 2:1-4; Rom. 9:6-8; Gál. 6:15, 16). Wichay ladomanta rey, jinallataj uray ladomanta reypis, tiempo pasasqanman jina imaymana gobiernoswan ninakorqanku. Jinapis chay gobiernosqa kinsa imaspi rijchʼakunku. 1) Chay gobiernosqa maypichus Diospa kamachisninmanta ashkhas tiyakunku, chaypi kamachinku. Chayrí Diospa kamachisninta qhatiykachanku. 2) Chay gobiernosqa Diospa llajtanpa contranpi kaspa, Jehová Diosta chejnikusqankuta rikuchinku. 3) Chay gobiernosqa atiyniyoj kayta munaspa purajmanta maqanakunku. w20.05 págs. 2, 3 párrs. 3, 4

Jehová Diosqa munayninta juntʼananpaj, imachus necesitakusqanman tukuyta atin. Munayninta juntʼananpajqa, kamachisninta imallamanpis tukuchiyta atin (Isa. 64:8). Jehovaqa chay iskay imasta ruwaspa munayninta juntʼan, manataj imapis payta jarkʼayta atinmanchu (Isa. 46:10, 11). ¿Imatá ruwasunman Jehovata astawan jatunpaj qhawanapaj? Imastachus ruwasqanpi, imastachus noqanchejnejta ruwasqanpi ima tʼukurina. Payqa cielopiwan jallpʼapiwan tukuy imata ruwarqa. Chay ruwasqasninta qhawarispaqa mayta tʼukunchej (Sal. 8:3, 4). Chantapis Jehovaqa munayninta juntʼananpaj, tʼukuna imasta ruwanapaj yanapawarqanchej. Chaypi piensarispaqa, payta aswan jatunpaj qhawanchej. Jehová imastachus ruwayta atisqanpi piensarispaqa, sutin paypaj jinapuni kasqanta reparanchej. Imajtinchus sutenqa mana imaynachus kasqallantachu yachachiwanchej, manaqa imastachus ruwasqanta, imastachus ruwanantapis (Sal. 89:7, 8). w20.06 pág. 9 párrs. 6, 7

Runaspis animalespis kausanapaj llimphu aireta necesitanchej. Chay llimphu airetaj oxígeno sutikun. Sapa wata runaswan animaleswanqa, may chhika llimphu aireta samanchej, chʼichi airetataj wijchʼunchej. Chay chʼichi aireqa, dióxido de carbono sutikun. Jinapis jallpʼanchejmanta mana llimphu aire tukukapunchu, nitaj chʼichi aire cielopi tantaykukunchu. Imaraykuchus Jehová Diosqa, jallpʼanchejpi tukuy clase plantasta churarqa, juchʼuymanta jatunkama. Chay plantastaj chʼichi aireta chʼonqaspa, llimphu aireman tukuchinku. Runaswan animaleswantaj, chay llimphuchasqa aireta watejmanta samanchej. Chayrayku kay pʼunchaypaj texto nisqanqa cheqapuni. ¿Imatá ruwasunman Jehová Dios jallpʼata, chaypi tukuy ima kajtawan qowasqanchejmanta agradecekunapaj? (Sal. 115:16). Ruwasqasninpi tʼukurina. Chayta ruwaspaqa, imastachus qowasqanchejmanta sapa día payman agradecekusun. Jallpʼata qowasqanchejmantapis agradecekusunman, maypichus tiyakunchej chayta llimphuchaspa. w20.05 pág. 22 párrs. 5, 7

Jehová Diosqa sutinta jatunchananpaj, yachayninta, paciencianta, cheqan kaynintawan rikucherqa. Chantapis may chhika kutispi jatun atiyninta rikucherqa. Tukuy ima ruwasqanpitaj munakuyninta rikunchej (1 Juan 4:8). Jehová Diosqa sutinta jatunchananpaj tukuy imata ruwashallanpuni. Kay tiempopipis, Satanasqa Jehová Diospa sutinta chʼichichashallanpuni. Payqa runasta creechiyta munan, Jehová Dios mana atiyniyojchu, nitaj cheqan Dioschu kasqanta. Chantapis tukuy imata ruwan, runas Jehová Dios yachayniyoj kasqanmanta, munakuyniyoj kasqanmantawan iskayrayanankupaj. Satanasqa runasta creechiyta munallantaj, Jehová Dios mana kasqanta. Diospi creenku chay runastataj, creechiyta munan Diospa kamachiykunasnenqa mana juntʼay atina, nitaj allinchu kasqanta. Chantapis Satanasqa, runasta creechin Diosqa runasta infiernopi qʼolachisqanta. Chaywantaj Jehová Diosta manchay sajrapaj qhawachin. Chaykunata creej runastaj, mana Jehová Diospa kamachiykunasninta kasukuyta atillankuchu. Satanasqa chinkachisqa kanankama Jehová Diosninchejmanta karunchayta munawasun. ¿Saqesunchu karunchanawanchejta? w20.06 pág. 5 párrs. 13-15

Ashkha hermanos waj parlayta yachakunankupaj mayta kallpachakushanku. Ichá congregacionninchejpipis ajina hermanos tiyan. Paykunataj parlayninchejta ichá niraj chʼuwitatachu parlanku. Jinapis chayta qhawanamantaqa, Jehová Diosta munakusqankuta, tukuy sonqotaj sirvisqankuta qhawana. Chayta ruwasun chayqa, paykunata astawan munakusun, respetasuntaj. Chantapis parlayninchejta mana allinta parlajtinkupis, paykunata valechisunpuni (1 Cor. 12:21). Jehová Diosman mayta agradecekunchej, llajtanpi yanapakojta saqewasqanchejmanta. Payqa mana qhawanchu: qharichus warmichus kasqanchejta, casadochus solterochus kasqanchejta, joveneschus viejitoschus kasqanchejta, chayri uj parlayta sumajtachus manachus yachasqanchejta. Jehová Diosninchejpaj, hermanosninchejpajpis, tukuyninchej mayta valenchej (Rom. 12:4, 5; Col. 3:10). Chayrayku Diospa llajtanpi kasqanchejta jatunpaj qhawana, kallpachakunataj hermanosninchejta munakunapaj, respetanapaj ima. w20.08 pág. 31 párrs. 20-22

Atenas llajtaqa tukuy laya lantiswan juntʼa karqa. Chantapis runasqa khuchichakoj kanku, yachayniyoj runaspa yachachiyninkupitaj creej kanku. Pablotapis predicayta munajtin tukuy imata nerqanku. Jinapis payqa, mana nerqachu: “Kay runasqa ni jaykʼaj Jesuspa discipulosninman tukunkumanchu”, nispa. Astawanpis predicallarqapuni. Imaraykuchus paypis niraj cristianoman tukushaspa, ‘Diospa contranpi sajrata rimaj, cristianosta qhatiykachaj, machu machu runataj karqa’ (1 Tim. 1:13). Jinapis Jesusqa yacharqa, Pablo sumaj cristianoman tukuyta atisqanta. Chayrayku Pabloqa Atenas llajtayoj runasmanta ajinallatataj yuyarqa. Chayta ruwaspataj mana pantarqachu. Imaraykuchus ashkhas cristianosman tukorqanku (Hech. 9:13-15). Ñaupa cristianospa tiemponkupeqa, tukuy imaymana kausayniyoj runas Jesuspa discipulosninman tukorqanku. Apóstol Pabloqa corintiosman cartanpi chay llajtayoj cristianospa ñaupa kausayninkumanta parlarqa. Wakenqa niraj cristianos kashaspa suwas kasqanku, chayri imaymana sajra imasta ruwasqanku. Wakintaj millay kausayniyoj kasqanku. Pabloqa chaymanta parlaytawan, paykunaman nerqa: “Qankunamanta wakenqa ajina karqankichej. Kunantaj qankunaqa llimphuchasqaña kankichej”, nispa (1 Cor. 6:9-11). Noqanchejrí, ¿piensasunmanchu karqa chay runas cambianankuta, Jesuspa discipulosninmantaj tukunankuta? w20.04 pág. 12 párrs. 15, 16

Wakin hermanosqa, Jehová Diosta sirviy allinninchejpaj kasqanmanta iskayrayanku. Ancianosqa mana chay hermanospaj phiñakunankuchu tiyan. Astawanpis imaraykuchus iskayrayasqankuta entiendenankupaj kallpachakunanku tiyan. Chay hermanosta entiendespaqa, Bibliawan sumajta yanapariyta atenqanku. Profeta Eliasqa reina Jezabel wañuchinanta manchachikusqanrayku ayqekorqa (1 Rey. 19:1-3). Payqa Jehová Diospaj llankʼasqan qhasilla kasqanta piensarqa, wañupullaytañataj munarqa (1 Rey. 19:10). Jinapis Jehová Diosqa, mana Eliaspaj phiñakorqachu. Astawanpis payman nerqa, mana sapanchu kashasqanta, atiyninwan yanapananta, waj llankʼaykunatawan qonanta. Jehová Diosqa Elías llakiyninta willarejtin, pacienciawan uyarerqa. Chantapis waj llankʼaykunata qorqa (1 Rey. 19:11-16, 18). ¿Imatá chaymanta yachakusunman? Tukuyninchej Jehová Diospa ovejitasninwan kʼachas kananchej tiyan. Ancianostaj astawanraj chayta ruwananku tiyan. Ichapis uj hermanoqa llakisqa kasqanrayku, rabianpi imatapis parlarparillanman. Waj hermanotaj Jehová Dios ni jaykʼaj perdonananta ninman. Ajinata parlajtinkupis, ancianosqa chay hermanosta pacienciawan uyarinanku tiyan. Chantá Jehová Diospaj may munasqa kasqankuta reparachinanku tiyan. w20.06 pág. 22 párrs. 13, 14

Jehová Diosqa, familianchejwan amigosninchejwan kʼachata kausakunanchejta munan (Sal. 133:1). Jesusqa sumaj amigosniyoj karqa (Juan 15:15). Bibliaqa niwanchej, sumaj amigosniyoj kayqa mayta yanapawasqanchejta (Pro. 18:24). Nillawanchejtaj sapallanchej kayta munayqa, mana allinchu kasqanta (Pro. 18:1). Ashkha runasqa Internetpi redes sociales nisqaman yaykunku, mana sapallanku kanankupaj, ashkha amigosniyojtaj kanankupaj. Jinapis noqanchejqa, imaynatachus Internetta apaykachasqanchejta qhawarikuna tiyan. Yachayniyoj runas ninku: “Imastachus wajkuna Internetman churasqankuta anchata qhawajkunaqa, sapallanku kashasqankuta yuyanku, llakikunkutaj”, nispa. Runasqa imapichus sumaj risqanmanta fotosta Internetman churayta yachanku. Chayrí paykunamanta, amigosninkumanta, maykunamanchus risqankumanta ima, aswan sumaj fotosta churanku. Chay fotosta rikojkunataj, ichapis chayrayku llakisqalla kanku, mana amigosniyoj kasqankutataj yuyanku. Paykunaqa piensanku, wajkunaj kausayninkumanta nisqa, kausayninkoqa llakiylla kasqanta. w20.07 págs. 5, 6 párrs. 12, 13

1 de octubre de 1988 watamanta La Atalaya revista nin: “Ancianosqa entiendenanku tiyan, Cristoqa tukuy ancianosta Diospa atiyninwan yanapasqanta. Chayrayku uj problemata allinchananku kajtin chayri congregacionpaj imatapis ruwananku kajtin, Cristoqa mayqennillankutapis Bibliaj nisqanta yuyarichinman (Hech. 15:7-15). Jehová Diospa atiynenqa tukuy ancianosta yanapan, nitaj ujllatachu”. Waj ancianosta respetaj ancianoqa, ancianospura reunionpi kashajtinku mana payrajpunichu parlayta munanqa. Manallataj payllachu parlaykonqa, nitaj paypa nisqantapunichu valechiyta munanqa. Astawanpis imatachus piensasqanta kʼumuykukoj sonqowan nenqa, waj ancianostapis sumajta uyarenqa. Chantapis imallapajpis Bibliaj nisqantapuni qhawaykuriyta munanqa, “allin kamachi yuyayniyoj” nisqantataj kasukonqa (Mat. 24:45-47). Sichus ancianos munanakonqanku, purajmantataj respetanakonqanku chayqa, Jehová Dios paykunata atiyninwan yanapanqa. Ajinamantataj imatapis sumajta ruwanqanku (Sant. 3:17, 18). w20.08 pág. 27 párrs. 5, 6

Apóstol Pabloj enemigosnenqa, paymanta nisqa aswan atiyniyoj karqanku. Paykunaqa Pablota seqʼoykucherqanku, carcelmantaj wisqʼaykucherqanku. Chantapis imaynatachus Davidta wakin amigosnin sufricherqanku, ajinallatataj Pablotapis wakin cristianos sufricherqanku. Paykunamanta wakintaj contranpipuni sayaykorqanku (2 Cor. 12:11; Fili. 3:18). Jinapis Pabloqa mana chay llakiykunawan atipachikorqachu. Payqa runas churanakojtinkupis predicallarqapuni. Wakin hermanos llakichejtinkupis, paykunata munakullarqapuni. Chantapis Jehová Diosta wañupunankama sirverqa (2 Tim. 4:8). Chay tukuy imasta ruwarqa Jehová Dios atiyta qosqanrayku, manataj paypa kallpanraykuchu. Ichá noqanchejtapis runas asipayawanchej, manaqa churanakuwanchej. Sajra kajta atipanapajqa, runasman Bibliamanta yachachiyta munanchej. Chaypajtaj runaspa tapuykunasninkuman Bibliawan kutichina. Contranchejpi sajrata ruwajkunawan kʼachas kana, respetanataj. Tukuy runaspaj allin kajta ruwana, enemigosninchejpajpis (Mat. 5:44; 1 Ped. 3:15-17). w20.07 págs. 17, 18 párrs. 14, 15

¿Jehová Diosninchej kʼumuykukoj sonqochu? Arí. Chayrayku Davidqa kay pʼunchaypaj textopi nisqanta nerqa (Sal. 18:35, Diospa Simin Qelqa). Davidqa chayta qhelqashaspa, ichapis yuyarikusharqa rey kananpaj ajllasqa karqa, chay pʼunchaymanta. Chaypacha profeta Samuelqa, Davidpa wasinman rerqa. Chaypitaj Jehová Dios kamachisqanman jina, Davidta Israelmanta rey kananpaj ajllarqa. Davidqa pusaj hermanosmanta aswan sullkʼita karqa. Jinapis Saulpa cuentanmanta rey kananpaj ajllasqa karqa (1 Sam. 16:1, 10-13). Uj salmistaqa Jehová Diosmanta ajinata nerqa: “Kʼumuykamun, cielota, kay pachatapis qhawarimunampaj. Tata Diosqa wajcha runata pampamanta aysarin [...]. Kuraj runaswan khuska payta tiyaykuchin”, nispa. Davidpis ajinallatatajchá Jehová Diosmanta yuyarqa (Sal. 113:6-8). ¿Imaynatá Jehová Dios kʼumuykukoj sonqo kasqanta rikuchiwanchej? Pantaj runas kajtinchejpis, Jehová Diosqa payta yupaychajta saqewanchej, amigosninta jinataj qhawawanchej (Pro. 3:32). Payqa amigosnin kananchejta munarqa. Chayrayku Wawanta kachamorqa juchasninchejrayku wañunanpaj. Jehová Diosqa maytapuni khuyakuwanchej. w20.08 pág. 8 párrs. 1-3

Jehová Diosqa yachanña maykʼajchus kay sajra mundota chinkachinanta (Mat. 24:36). Payqa yachallantaj maykʼajchus wañusqasta kausarichimunantapis (Juan 5:28). Jehová Diosqa wañusqasta mayta kausarichimuyta munaspapis, chay tiempo chayamunanta pacienciawan suyakonqa (Isa. 25:8). Ajina pacienciayoj kasqanmanta, mayta agradecekunanchej tiyan. Jehová Dios pacienciayoj kasqanrayku, ashkha runas juchasninkumanta arrepientekuyta atinku. Noqanchejpis paykuna ukhupi kashanchej. ¿Imatá ruwasunman Jehová Diospa paciencianmanta agradecekunapaj? “Allin sonqoyoj” runasta tukuy atisqanchejta maskʼamuna (Hech. 13:48). Chantá paykunata Jehová Diosta munakunankupaj, sirvinankupaj ima yanapana. Ajinamanta paykunapis Jehová Diospa paciencianwan yanapachikuyta atenqanku. Imaraykuchus payqa, tukuy runas wiñay kausayta japʼinankuta munan. w20.08 pág. 18 párr. 17

Estudionchejqa mana Bibliata rejsinallanpajchu estudianan tiyan, manaqa yachakusqanta sonqonpi japʼikunan tiyan. Bibliaj yachachiykunasnin sonqonman chayanqa chayqa, chayman jina kausakonqa. Jesusqa mana sumaj yachachejllachu karqa, manaqa yachachisqanwan runaj sonqonmanpuni chayaj. Chayrayku runasqa payta qhatej kanku (Luc. 24:15, 27, 32). Estudionchejqa Jehová Dios kasqantapuni creenan tiyan. Chantapis payta Tatanta jina, Diosninta jina, Amigonta jinataj qhawanan tiyan (Sal. 25:5). Chayrayku Bibliamanta yachachishaspa, imayna kʼachachus Jehová Dios kasqanmanta parlarinapuni (Éxo. 34:5, 6; 1 Ped. 5:6, 7). Estudionchejman imamanta yachachishaspapis, imaynachus Jehová kasqanta willarina. Payman yachachina may munakuyniyoj, kʼacha, khuyakoj Diostaj kasqanta. Jesús nerqa: “Jehová Diosniykitaqa munakunayki tiyan tukuy sonqoykiwan [...]. Chaymin aswan kuraj, ñaupaj kaj kamachisqataj”, nispa (Mat. 22:37, 38). Chayrayku tukuy atisqanchejta ruwana, estudionchej Jehová Diosta sonqomantapacha munakunanpaj. w20.10 pág. 10 párr. 12

Jesusqa mana warmista pisipaj qhawarqachu (Juan 4:27). Payqa Diospa munayninta ruwaj warmista, sumajpaj qhawaj. Uj pacha, Jesusqa wakin runasta familianta jina qhawasqanta nerqa. Paytaj mana qharisllamantachu parlasharqa, manaqa warmismantapis (Mat. 12:50). Jesusqa Diosta sirvej warmiswan, hermanasninwan jina kausakoj. Payqa Mariawan Martawan ajinata kausakoj. Chay iskay warmisqa solterassina karqanku (Luc. 10:38-42). Jesustaj paykunata hermanasninta jina qhawaj. Paykunapis Jesusta hermanonkuta jinallataj qhawaj kanku. Chayrayku Mariaqa Jesuspa yachachisqanta uyarinanpaj, mana manchachikuspa ñaupaqenman tiyaykukorqa. Martapis mana manchachikuspa Jesusman nerqa: “Señor, ¿manachu rikunki hermanay mana ruwaysiwasqanta? Niy ari yanapanawanta”, nispa. Jesusqa chay kutipi, Mariamanwan Martamanwan ashkha imasta Diosmanta yachacherqa. Chantapis paykunata, hermanonku Lazarotapis mayta munakoj. Chayrayku Jesusqa paykunata waturikoj rejpuni (Juan 12:1-3). Chantachá Martawan Mariawanqa, Lázaro sinchʼita onqoykojtin chay rato Jesusman willacherqanku (Juan 11:3). w20.09 pág. 20 párr. 3; pág. 21 párr. 6

Jesuspa yachachisqasnenqa, romanospa makinkumanta kacharichikuyta munarqanku. Chayrayku “Diospa Gobiernon chay ratopacha rikhurimunanta” munarqanku. Noqanchejtajrí mayta munashanchej, Diospa Gobiernon kay sajra mundota chinkachinanta, allin kausaytataj apamunanta (2 Ped. 3:13). Jinapis pacienciawan suyakunanchej tiyan, Jehová Diospa churasqan pʼunchay chayamunanta. Payqa Noej tiemponpi mana “Jatun Parata apachimusaj” nisqantawanchu parachimorqa. Astawanpis Noé runasman willamunanta, arcata ruwayta tukunanta ima suyarqa (1 Ped. 3:20; 2 Ped. 2:5). Jehová Diosqa Abrahanwanpis pacienciakullarqataj. Uj pacha, Abrahanqa Jehová Diosta Sodoma, Gomorra llajtasta chinkachinanmanta tapuykacharqa. Jehová Diostaj payta pacienciawan uyarerqa (Gén. 18:20-33). Mana kasukoj israelitastapis, may chhika watasta pacienciawan aguantarqa (Neh. 9:30, 31). Kunanpis Jehová Diosqa pacienciakushallantaj. Imaraykuchus payqa munan, allin sonqoyoj runas pesachikuytawan payman chimpanankuta (Juan 6:44; 1 Tim. 2:3, 4; 2 Ped. 3:9). Jehová Dios jina pacienciayoj kaspaqa, pikunamanchus willanchej, yachachinchejtaj chaykunawan pacienciakusun. w20.09 pág. 10 párrs. 8, 9

Jehová Diosqa wañusqasta kikin yuyayniyojta kausarichimonqa. Runasqa niraj wañupushaspa imaynachus karqanku, kikisitun kausarimonqanku. Imaynachus chay kasqanpi piensarina. Jehová Diosqa mayta munakuwasqanchejrayku, sapa ujninchejta sumajta rejsiwanchej. Payqa yachan imatachus yuyasqanchejta, imachus sonqonchejpi kasqanta, imatachus nisqanchejta, ruwasqasninchejtapis. Chayrayku wañupusun chaypis, payqa imaynachus kanchej kikisitunta kausarichimuwasun. Yuyayninchejpis kikillanpuni kanqa. Rey Davidqa Jehová Dios tukuyta sumajta rejsisqanta yacharqa (Sal. 139:1-4). Jehová Dios sumajta rejsiwasqanchejmanta, ¡mayta kusikunchej! Ajinata rejsiwasqanchejmanta, ¿manchachikunachu kanman? Mana. Imajtinchus payqa, munakuwasqanchejrayku sumajta rejsiwanchej. Paypajqa sapa ujninchej mayta valenchej. Chantapis Jehová Diosqa, sumajta yachan imayna kausayniyojchus kasqanchejta. Chayrayku sumajta entiendewanchej. Chayta yachayqa mayta sonqochawanchej. Jehová Diosqa noqanchejwanpuni kashan, yanapaytataj munawanchej. Chayrayku amapuni sapallanchej kashasqanchejta yuyanachu (2 Cró. 16:9). w20.08 pág. 17 párrs. 13, 14

Jehová Diosqa kamachisninman maytapuni yachachiyta munan. Payqa tukuynin wawasninta mayta munakun. Chayrayku payta rejsinankuta, munakunankuta ima munan. Payqa munallantaj wawasnin wiñaypaj kausakunankuta (Juan 17:3). Jehovaqa ñaupa cristianosta congregacionnejta yachacherqa (Col. 1:9, 10). Jinapis astawanqa, atiyninwan paykunata yanaparqa. Jesusqa chay “yanapata” japʼinankuta nerqa (Juan 14:16). Ñaupa cristianosqa, Diospa atiyninwan Palabranta entienderqanku. Diospa atiynenqa, paykunata yanapallarqataj Jesuspa yachachiykunasninta, ruwasqasninta ima yuyarikunankupaj. Chaykunataj Mateo, Marcos, Lucas, Juan librospi kashan. Ñaupa cristianosqa Diospa Palabranta entiendesqankurayku, Diosta, Wawanta, hermanosninkutapis astawan munakorqanku. Creeyninkupis astawan sinchʼiyarqa. Jehová nerqa: ‘Qhepa pʼunchaykunapi tukuy nacionesmanta runas orqoyman jamonqanku, ñankunasniytataj yachakonqanku’, nispa (Isa. 2:2, 3). Chay nisqantaj juntʼakushanpuni. w20.10 pág. 24 párrs. 14, 15

¿Imaraykutaj wakinkuna amigonkoj yuyaychasqanta mana japʼikunkuchu? Jatunchakusqankurayku. Jatunchakoj runasqa, “imatachus uyariyta munasqallankuta” uyarinku. Paykunaqa “cheqa kajta” manaña uyarinkuchu (2 Tim. 4:3, 4). Chantapis paykunaqa ni imapi pantasqankuta piensanku, wajkunamanta aswan sumaj kasqankutataj yuyanku. Jinapis apóstol Pablo nerqa: “Pillapis mana ima kaspa may kasqanta yuyakun chayqa, pay kikinta chʼaukiyakushan”, nispa (Gál. 6:3). Rey Salomonpis nillarqataj: “Uj wajcha yachayniyoj waynaqa aswan walej, uj wampu machu rey, pichus manaña yuyaychasqatapis japʼikunchu, chaymanta nisqaqa”, nispa (Ecl. 4:13). Apóstol Pablo Pedrota tukuypa ñaupaqenpi kʼamirpajtin, imatachus Pedro ruwasqanta qhawarina (Gál. 2:11-14). Pabloqa Pedrota uyanpi niporqa mana allintachu ruwashasqanta, chaytataj tukuypa ñaupaqenpi nerqa. Pedroqa Pablopaj phiñakuyta atinman karqa. Jinapis mana phiñakorqachu. Astawanpis Pabloj kʼamisqanta japʼikorqa, niñataj imatachus nisqanpi yuyarqachu. Aswan qhepamantaj, Pedroqa Pablomanta parlaspa “munasqa hermanonchej” nerqa (2 Ped. 3:15). w20.11 pág. 21 párrs. 9, 11, 12

Bibliamanta yachakojqa, ñauparinanpaj reunionesman jamunanpuni tiyan. Imajtinchus reunionpeqa Bibliamanta astawan yachakonqa, creeynin sinchʼiyanqa, Jehová Diostapis astawan munakonqa (Hech. 15:30-32). Ichapis uj hermano payman willarinman, imaynatachus Jehová Diosta munakusqan kamachiykunasninta kasukunanpaj yanapasqanta (2 Cor. 7:1; Fili. 4:13). Hermanosninchejqa Cristoj kamachisqanman jina Diosta, runa masinkutawan munakunankupaj kallpachakunku. Chayrayku estudionchejqa, paykunata rejsispa kikinta ruwayta yachakunman (Juan 13:35; 1 Tim. 4:12). Chantapis pay jina llakiyniyoj hermanosmanta mayta yachakunman. Chay hermanosta rejsispaqa, paypis Jesuspa discipulon kananpaj cambiayta atisqanta yachanqa (Deu. 30:11). Congregacionmanta tukuypuni, Bibliamanta yachakojkunata ñauparinankupaj yanaparisunman (Mat. 5:16). w20.11 pág. 5 párrs. 10-12

Apóstol Pabloqa chayta nispa, ichapis uj estadionpi jina phiña animaleswanpuni maqanakusqanmanta parlasharqa (2 Cor. 1:8; 4:10; 11:23). Manachayrí ichapis parlasharqa, payman churanakoj judiosmanta chayri waj runasmanta, pikunachus ‘phiña animales’ jina karqanku (Hech. 19:26-34; 1 Cor. 16:9). Imayna kajtinpis, apóstol Pabloqa ashkha kutispi wañuy patapi karqa. Jinapis payqa sutʼita yacharqa aswan sumaj kausayta japʼinanta (1 Cor. 15:30, 31; 2 Cor. 4:16-18). Kunanqa manchay sajra tiempopi kausakushanchej. Wakin hermanosninchejqa, maleantesrayku mancharisqalla kausanku. Wakintaj guerras tiyan chay lugarespi tiyakusqankurayku, sapa día wañuy patapi kanku. Wakintajrí maypichus gobiernos mana predicajta saqenkuchu, chaypi tiyakunku. Paykunataj kausayninkuta wañuy pataman churananku kajtinpis, chayri carcelpi wisqʼasqa kananku kajtinpis, Jehová Diosta sirvishallankupuni. Chay hermanosmantaqa mayta yachakusunman. Paykunaqa sutʼita yachanku, wañupojtinkupis Jehová Dios paykunata kausarichimunanta, aswan sumaj kausaytataj qonanta. w20.12 pág. 9 párrs. 3, 4

Wakin kutisqa ichá llakikunchej, predicanchej chaypi runas mana uyariwajtinchej chayri pisi runasllata wasinkupi taripajtinchej. Jina kajtin, ¿imatataj ruwasunman kusisqallapuni kanapaj? Predicacionmanta maychus kajllata yuyana. ¿Imaynatá chayta ruwasunman? Runasman Diospa sutinta rejsichinallapuni, Gobiernonmantataj willanallapuni. Jesús nerqa, kausayman pusaj ñanta pisi runaslla rinankuta (Mat. 7:13, 14). Predicashaspaqa Jehová Dioswan, Jesuswan, angeleswan khuska llankʼashanchej (Mat. 28:19, 20; Apo. 14:6, 7). Jehová Diosqa allin sonqoyoj runasta payman pusamun (Juan 6:44). Chayrayku uj runa mana uyariwajtinchejqa, ama llakikunachu. Ichá qhepanpi rejtinchej uyariwasun. Hermana Deboraqa nin: “Satanasqa llakiywan tukuchiyta munawanchej”, nispa. Jinapis Jehová Diosqa, Satanasmanta nisqa aswan atiyniyoj. w20.12 pág. 26 párr. 18; pág. 27 párrs. 19, 21

Ashkha cristianosqa, paykunapaj chayri familiankupaj diantinta trabajanku. Jinapis paykunaqa Diospa llajtanpi tukuy atisqankuta yanapakunku. Wakin hermanosqa jatun llakiypi tarikoj hermanosta yanapanku. Wakintaj Diosta yupaychana wasista ruwaysikunku. Tukuytaj mundontinpi predicakunanpaj qolqesitunkuwan yanapakuyta atinku. Chay hermanosqa, Diosta, runa masinkutawan munakusqankurayku ajinata yanapakunku. Tukuyninchejtaj hermanosninchejta munakusqanchejrayku, sapa semana reunionesman rinchej, comentanchej, waj imastawan ruwanchej. Tantakuykunamanqa saykʼusqa kaspapis rinchejpuni, parlayta manchachikuspapis comentanchejpuni. Chantá tukuyninchej problemasniyoj kaspapis, hermanosninchejta kallpacharinchej. Chaytataj ruwanchej, niraj reunión qallarishajtin, manachayrí reunión tukukusqantawan (Heb. 10:24, 25). Maytapuni tukuy hermanosninchejman agradecekunchej, tukuy imaymanamanta yanapakusqankumanta. w21.01 pág. 10 párr. 11

Jatunchakoj runasqa, mana wajkunata “allinta ruwanki” niyta atillankuchu. Astawanpis paykunalla alabachikuyta munanku. Chantapis wajkunawan kikinchakunku, nitaj piwanpis atipachikuyta munankuchu. Ruwanasninkuta wajkunaman yachachinankumantaqa, ajinata ninku: “Ni noqa jinaqa ruwankumanchu, noqallapuni imatapis allinta ruwani”, nispa. Chaywanqa nishanku, imapis paykunaj nisqankuman jinapuni ruwakunan kasqanta. Chantapis paykunallapaj imatapis munanku, envidiakunkutaj. Chayrayku orgullosos kanchej chayqa, Jehová Diosmanta yanapata mañakuna. Payqa yuyayninchejta mosojyachinapaj, mana jatunchakunapajtaj yanapawasun (Rom. 12:2). Jehová Diosninchej kʼumuykukoj sonqo kasqanmanta, mayta agradecekunchej (Sal. 18:35). Payqa kamachisninwan mayta pacienciakun, yanapachikuntaj. Noqanchejpis pay jina ruwanapaj kallpachakuna. Chantapis Diospa llampʼu sonqo kamachisninmanta yachakuna, paykuna jinataj kausayninchejpi ruwana. Jehová Diosninchejta tukuy tiempo jatunchana. Imaraykuchus payllamin jatunchanapaj jina, yupaychanapaj jinataj (Apo. 4:11). w20.08 pág. 13 párrs. 19, 20

Qhariwarmi kausayqa, Jehová Diosmanta uj sumaj regalo. Jinapis casarakojkunaqa pantaj runas kanku (1 Juan 1:8). Chayrayku Bibliaqa niwanchej, casarakojkunaqa “kausayninkupi astawan llakiyniyoj” kanankuta. Qosasqa familiankuman necesitasqankuta qonanku tiyan. Chantapis paykunata kusisqa kanankupaj, Jehovaj qayllallanpipuni kanankupaj ima yanapananku tiyan (1 Tim. 5:8). Jinapis sapa cristiano kallpachakunan tiyan Diospa qayllallanpipuni kananpaj (Hech. 17:27). Casada cristianasqa, ichapis mana chayta ruwayta atillankuchu. Jinapis tiempochakunankupuni tiyan Bibliata leerinankupaj, tʼukurinankupaj, Jehovawan parlarikunankupaj ima. Casada warmisqa pantaj runata kasukunanku tiyan. Chayta ruwaytaj mana atikullanchu. Jinapis Jehová qosata umata jina churasqanta entiendespaqa, kasukuyta atillanqanku. w21.02 pág. 8 párr. 3; pág. 9 párrs. 6, 7

Llakiykunataqa fierrota parichej ninawan kikinchasunman. Imaynatachus parisqa fierrota yakuman churaykojtinchej duruyan, ajinallatataj llakiykunaqa creeyninchejta sinchʼiyachin. Chayrayku Santiago nerqa: “Mana saykʼuspa sinchʼita sayasqaykichejtaj, sumajta wakichisonqachej. Ajinamanta tukuy imapi juntʼasqas, mana imanasqastaj kanaykichejpaj”, nispa (Sant. 1:4). Llakiykuna creeyninchejta kallpachasqanta reparaspaqa, kusiywan aguantasun. Santiagoqa nillarqataj, imaschus kusisqa kajta mana saqenawanchejta. ¿Imataj kanman? Imatachus ruwanata mana yachasqanchej. Llakiykunapi kashaspaqa, imatachus ruwananchejta mana yachayta atillanchejchu. Chayrí runas churanakuwajtinchej imatachus ninanchejmanta llakikunchej. Chayrayku Jehová yuyayta qonawanchejta necesitanchej (Jer. 10:23). Ajinamanta imatapis payta kusichinapaj jina ruwasun, hermanosta yanapasun, cheqa sonqostaj kasun. w21.02 pág. 28 párrs. 7-9

Jehová Diosqa chayta ruwayta sumajta yachachiwanchej. Payqa mayta munakuwanchej. Chayrayku payta mana wasanchajtinchej, mana imapis munakuyninmanta tʼaqawasunchu (Rom. 8:38, 39). Bibliapi ‘mayta munakuychej’ nispaqa, pitapis munakunapaj mayta kallpachakunamanta parlashan. Wakin kutistaj chaytapuni ruwananchej tiyan. Imajtinchus hermanosninchej phiñachiwajtinchej, mana paykunata munakuyta atillanchejchu. Chay kutispeqa, Bibliaj kay nisqanta kasukunanchej tiyan: “Munakuywan aguantanakuychej. Chantapis qankunapura allinta kausakuychej. Ujchasqallapuni kanaykichejpajtaj mayta kallpachakuychej. Imaraykuchus Diospa atiyninnejta ajina ujchasqa kashankichej” (Efe. 4:1-3). Chayrayku mana hermanosninchejpa pantasqasninkuta qhawasunchu. Astawanpis paykunata Jehová Dios jina qhawanapaj kallpachakusun (1 Sam. 16:7; Sal. 130:3). Hermanosninchejtaqa mana familianchejta jina munakuyta atillanchejchu, astawanraj imaynachus kasqankuta yachaspa. Ñaupa tiempomanta wakin cristianospis, ajinallapitaj rikukorqanku Evodiawan Sintiquewan jina. Chayrayku apóstol Pabloqa, paykunaman nerqa “Señorpi uj yuyaylla kanankuta” (Fili. 4:2, 3). w21.01 pág. 22, 23 párrs. 10, 11

Tukuy hermanos, Jehovata sumajta sirvej jovenesta may allinpaj qhawanku (Sof. 3:9). Jóvenes, ima ruwanatapis tukuy sonqo, kʼuchisitullataj ruwajtiykichej, hermanosqa mayta munakusonqachej, allinpajtaj qhawasonqachej. Jehová Diosqa qankunapi atienekun, maytataj munakusunkichej. Payqa nerqaña, tukukuy tiempopi ashkha jóvenes paypaj tukuy sonqo llankʼanankuta (Sal. 110:1-3). Jehovaqa yachan payta munakusqaykichejta, tukuy atisqaykichejtataj sirvishasqaykichejta. Chayrayku wajkuna wawata jinallapuni qhawasojtiykichejpis, ama paykunapaj phiñakuychejchu. Ama apurayllata ima ruwanatapis congregacionpi japʼiyta munaychejchu. Imapi pantaspataj, Jehovaj kʼamiyninta tukuy sonqo japʼikuychej (Heb. 12:6). Congregacionpi ima ruwanatapis japʼispaqa, kʼuchi kʼuchilla ruwaychej. Jinapis astawanqa, tukuy ima ruwasqaykichejwan Tatanchej Jehovata kusichiychej (Pro. 27:11). w21.03 pág. 7 párrs. 17, 18

Noqanchejqa ashkha imasmanta llakikunchej. Wakenqa llakikunchej pantasqanchejmanta, mana tukuy imatapunichu ruwayta atisqanchejmanta, chayri onqosqa kasqanchejmanta. Wakintaj llakikunchej, Diospa llajtanpi munasqanchej llankʼayta mana japʼisqanchejmanta. Llakikullanchejtaj predicanchej chaypi runas, mana uyariwajtinchej. Pantasqanchejrayku, chayri imatapis mana allintachu ruwasqanchejrayku, ni imapaj valesqanchejta yuyasunman. Ajinata yuyaspaqa, Jehová Dios ni jaykʼaj mosoj mundoman yaykuchinawanchejta piensasunman. Chay jinata yuyayqa mana allinchu. Bibliaqa ‘tukuyninchej juchallikusqanchejta’ nin. Jesuslla mana juchallikorqachu (Rom. 3:23). Jinapis Jehová Diosqa, mana pantasqasninchejtachu qhawan, nitaj suyanchu ni imapi pantananchejta. Astawanpis payqa, manchay munakuyniyoj Tata jina yanapayta munawanchej. Chantapis payqa pacienciakuwanchej. Jehová Diosqa yachan, allin kajta ruwanapaj mayta kallpachakusqanchejta. Yachallantaj wakin kutis ni imapaj valesqanchejta yuyasqanchejta. Chayrayku payqa yanapayta munawanchej (Rom. 7:18, 19). w20.12 pág. 22 párrs. 1-3

Tukuypis mosoj mundoman chayanapaj, uj ñanta jina rishanchej. Chaypeqa Jehová Diosninchej kamachenqa. Chayrayku sapa día kallpachakunchej kausayman pusaj ñanta purinapaj. Jinapis Jesús nerqa jina, chay ñanqa kʼullkulla, chayninta puriytaj wakin kutis mana atikullanchu (Mat. 7:13, 14). Chantapis juchasapas kasqanchejrayku, ima ratopis chay ñanmanta llojsirpapusunman (Gál. 6:1). Kausayman pusaj ñanta rinallapajpuneqa, yuyayninchejta, imaynachus kasqanchejta, ruwasqasninchejtapis cambiananchej tiyan. Apóstol Pabloqa ‘yuyayninchejta cheqanyachinanchejta’ nerqa. Imachus sonqonchejpi, yuyayninchejpiwan kasqantaqa mana yachayta atillanchejchu. Imaraykuchus sonqonchejqa chʼauka. Chayrayku mana yachayta atillanchejchu imatachus sonqonchej ruwachinawanchejta (Jer. 17:9). Chantapis noqanchej kikin “pantasqa yuyaykunawan” engañakusunman (Sant. 1:22). Chayrayku Diospa Palabrallan sumajta qhawarikunapaj yanapawasunman. Imaraykuchus Bibliaqa “sonqoj yuyasqanta, munasqantapis sutʼiman orqhoyta atin” (Heb. 4:12, 13). w20.11 pág. 18 párrs. 1-3

Kʼumuykukoj sonqo, llampʼu sonqotaj kaspaqa, aswan kusisqa kasun. ¿Imaraykutaj chayta ninchej? Mana tukuy imatachu ruwayta atisqanchejta reparakuspaqa, pillapis yanapariwajtinchej tukuy sonqo agradecekusun. Uj pacha, Jesusqa chunka lepra onqoyniyoj runasta sanoyacherqa. Paykunamantataj ujnillanku Jesusta agradecekoj kutimorqa. Chay runaqa llampʼu sonqo kasqanrayku, yacharqa sapallanmanta ni jaykʼaj sanoyapunanta. Chayrayku Jesús payta sanoyachejtin, mayta agradecekorqa, Diostataj jatuncharqa (Luc. 17:11-19). Kʼumuykukoj sonqo, llampʼu sonqotaj kajkunaqa, runa masinkuwan allinta kausakuyta yachanku, sumaj amigosniyojtaj kanku. ¿Imaraykutaj ajina? Imaraykuchus llampʼu sonqo runasqa, wajkuna imallapipis aswan sumaj kasqankuta reparanku, manataj paykunata sajra ñawiwanchu qhawanku. Chantá wajkunata Jehová Diospaj llankʼasqankupi allin rejtin, kusikunku, allinta ruwasqankutataj ninku. Chantapis paykunata jatunpaj qhawanku. w20.08 págs. 12, 13 párrs. 17, 18