Septiembre

Apóstol Pedroqa, Joelpa profecianta oqharishaspa uj imata cambiarqa (Hech. 2:16, 17). Profeta Joelqa profecianta “chantá” nispa qallarerqa. Pedrotajrí Joelpa profecianta ajinata oqharerqa: “Diosqa nin: Qhepa pʼunchaykunapeqa, atiyniyta qosaj tukuy laya runasman”, nispa. Pedroqa ‘qhepa pʼunchaykuna’ nispa, Jerusalenwan templonwan thuñikunan qayllamanta parlasharqa. Chaytaj rikuchiwanchej, Joelpa profecianqa tukuysitun ashkha watasninmanraj juntʼakusqanta. Ñaupa cristianosqa Diospa atiyninta Pentecostespi japʼisqankutawan, sumaj willaykunata ni jaykʼaj jina willayta qallarerqanku. 61 wata chaynejta, apóstol Pabloqa colosensesman cartanpi nerqa: “Evangelioqa tukuy kay pachapi kajkunaman willakun”, nispa (Col. 1:23, DQ). Kay tiempopipis, Jehová Diosqa willamunanchejpaj atiyninwan yanapashawanchej. Chayraykutaj astawan ashkha runasman willashanchej, nisunman kay “jallpʼaj kʼuchusninkama” (Hech. 13:47). w20.04 págs. 6, 7 párrs. 15, 16

Jehová Diosninchejqa sapa ujninchejta mayta munakuwanchej, tropamanta karunchakoj ovejitasnintapis (Mat. 18:12-14). Chayrayku nerqa, chinkasqa ovejitasninta maskʼananta, kutichikanpunantataj. Jehová Diosqa imaynatachus chayta ruwananta sutʼinchananpaj, imatachus uj sumaj michej ruwasqanmanta parlarqa (Eze. 34:12-16). Sumaj michejqa kinsa imasta ruwaj. Ñaupajtaqa, chinkasqa ovejitanta maskʼaj rej. Chaypajtaj tiempochakoj, saykʼusqa kaspapis maskʼallajpuni. Ovejitanta tarikapuspataj tropaman watejmanta kutichej. Chantá ovejitan imanasqa kajtenqa, nanasqetanta jampiykoj, marqʼarikojtaj. Yarqhasqeta kajtintaj, mikhunata qoj. Ancianospis ajinallatataj ‘Diospa ovejitasninta’ qhawananku tiyan. Paykunaqa chinkasqa ovejitasta, chay michej jinallataj yanapananku tiyan (1 Ped. 5:2, 3). Mayqen hermanollapis congregacionmanta karunchakun chayqa, ancianosqa payta waturikoj rinku, congregacionman kutinpunanpajtaj yanapanku. Chantapis chay hermanota munakuywan yanapanku, Jehová Diosman watejmanta qayllaykunanpaj. w20.06 pág. 20 párr. 10

Jesusqa nerqa chajras cosechanapaj jinaña kasqanta. Chaywan, ¿nisharqachu tukuy runas paypa discipulosninman tukunankuta? Mana. Diospa Palabranqa nerqaña, pisi runaslla paypi creenankuta (Juan 12:37, 38). Chantapis Jesusqa imachus runaspa sonqonkupi kasqanta sumajta yacharqa (Mat. 9:4). Pisi runaslla paypi creenankuta yachaspapis, Jesusqa tukuy sonqo tukuyman predicarqa. Noqanchejrí mana runaspa sonqonkuta rejsinchejchu. Chayrayku mana uj runamanta nisunmanchu mana cambianantaqa. Nillataj uj lugarmanta nisunmanchu, ni pí uyarinawanchejta. Chayrayku astawanraj predicananchej tiyan. Runastataj Jesuspa discipulosninta jinaña qhawana. Imatachus Jesús discipulosninman nisqanta yuyarikuna. Pay nerqa: “Qhawariychej chajrasta, poqosqaña kashanku cosechanapaj”, nispa. Runasqa cambiayta atinkuman, Cristoj discipulosninmantaj tukunkuman. Jehová Diosqa chay runasta kamachisninta jinaña qhawan, maytataj munakun (Hag. 2:7, 8). Runasta Jehová Dios jina, Jesús jinataj qhawasun chayqa, mana yuyasunchu paykuna mana cambianankuta, imastachus yachayta munasqankupitaj piensarisun. Astawanpis paykunata hermanosninchejñapis kankuman jinata qhawasun. w20.04 pág. 13 párrs. 18, 19

Diospa Palabranqa yachachiwanchej, Jesusta munakuspalla Jehová Diosta kusichiyta atisqanchejta. Jesuspa amigosnin kanapajtaj payta rejsina. Jesustaqa rejsisunman Mateo, Marcos, Lucas, Juan librosta leespa. Chay librosqa Jesuspa kausayninmanta parlan. Chay librosta leesqanchejpi tʼukurispaqa, Jesús runaswan kʼacha kasqanta reparasunchej. Chaytaj payta munakunapaj, respetanapaj ima yanapawasun. Jesusqa Yachachej kaspapis, discipulosninta amigosninta jina qhawarqa, manataj esclavosninta jinachu. Chayrayku imatachus yuyasqanta, imachus sonqonpi kasqantapis paykunaman willarerqa. Chantapis yachachisqasnin llakisqa kajtinku, paypis llakikullarqataj (Juan 11:32-36). Enemigosninpis yacharqanku, willasqanta uyarejkuna amigosninman tukusqankuta (Mat. 11:19). Noqanchejpis wajkunata Jesús jina qhawasun chayqa, paykunawan aswan allinta kausakusun, astawan kusisqa kasun, Jesustapis astawan munakusun. w20.04 pág. 22 párrs. 9, 10

Kay 1870 watapaj, Gran Bretaña suyoqa mundo enteropi may atiyniyoj karqa. Ni mayqen suyupis Gran Bretaña jina astawan armasniyoj, soldadosniyoj ima karqachu. Chay suyoqa Danielpa ujnin profecianta juntʼarqa. Danielqa chay profeciapi uj “juchʼuy” wajrita, kinsa wajrasta tʼirasqanta nerqa. Chay wajritataj Gran Bretañawan ninakorqa. Chay kinsa wajrastaj karqanku: Francia, España, Países Bajos ima. Gran Bretañataj kinsantinkuta atiparqa (Dan. 7:7, 8). Ajinamanta Gran Bretañaqa, Primera Guerra Mundial chaynejkama uray ladomanta reywan ninakorqa. Chay tiempollapitaj, Estados Unidospis manchayta qhapajyaykorqa, atiyniyojmantaj tukorqa. Chantá iskaynin suyus khuska llankʼayta qallarerqanku. Primera Guerra Mundial kashajtin, Estados Unidosqa Gran Bretañawan ujchaykukorqa. Iskayninkutaj waj nacioneswan guerrapi maqanakorqanku. Ajinamanta Gran Bretañawan Estados Unidoswan, mundontinpi aswan atiyniyoj nacionesman tukorqanku. Chantapis uj gobiernollapis kankuman jina llankʼayta qallarerqanku. Chaypitaj Danielpa kay profecian juntʼakorqa: ‘Uray ladopi kaj reytajrí, may atiyniyoj ashkha soldadosniyoj kanqa’. Gran Bretañawan Estados Unidoswanqa, Primera Guerra Mundialpi khuska llankʼasqankumantapacha uray ladomanta reywan ninakunku. w20.05 pág. 4 párrs. 7, 8

Yakoqa kapuwanchej jallpʼanchej intimanta mana ancha karupichu, nitaj ancha qayllapichu kasqanrayku. Jallpʼanchej intimanta tumpitawan qayllapi kanman chayqa, yakoqa tʼimpuspa wawsirpapunman. Jallpʼataj chʼakipacha kanman, nitaj kausay kanmanchu. Jallpʼanchej intimanta tumpitawan karupi kanman chaytaj, tukuynin yaku chhullunkapunman. Jallpʼapitaj ritʼiwan chhullunkallawan juntʼa kanman. Jehová Dios jallpʼata maychus kananman churasqanrayku, yakoqa jallpʼamanta mana tukukapunchu, kausaytaj kallanpuni. Inteqa qochasmanta, mayusmanta yakusta wawsichin, chaytaj phuyusman tukun. Inteqa sapa wata millones millones litros yakusta wawsichin. Chay wawsitaj chunka diata jina cielopi qhepakun, chaymantataj watejmanta urmamun. Chaynejta parapis ritʼipis kan. Chantá chay yakusqa, qochasman, mayusman kutirinku watejmanta jamunankupaj. Jehová Diosqa yakusta ajinata ruwarqa, jallpʼanchejpi yaku kanallanpajpuni. Chaytaj rikuchiwanchej, Jehová Diosninchej may atiyniyoj, yachayniyojtaj kasqanta (Job 36:27, 28). w20.05 pág. 22 párr. 6

Jesusqa Diospa atiyninta “mañakullaychejpuni” nerqa (Luc. 11:9, 13). Jehová Diosqa ‘may sumaj atiyninwan’ kallpachawanchej (2 Cor. 4:7). Chay atiytaj kay tiempopi ima llakiytapis aguantanapaj yanapawanchej. Cristianosqa Jehová Diosta yupaychaypi ashkha ruwanasniyoj kanchej. Diospa atiynintaj chay ruwanasta juntʼanapaj yanapawanchej. Jehová Diosqa imastachus ruwayta yachasqanchejta, astawan sumajta ruwanapaj atiyninwan yanapasunman. Chantapis payta sirviypi allin riwanchej, atiyninwan yanapawasqanchejrayku, manataj noqanchej imata ruwasqanchejraykuchu. ¿Imaynatá Diospa atiyninta jatunpaj qhawasunman? Jehová Diosmanta mañakuna sonqonchejta qhawaykurinanta. Ajinamanta sonqonchejpi sajra yuyaykuna chayri sajra munaykuna, kanchus manachus chayta reparakusun (Sal. 139:23, 24). Jehová Diosqa atiyninwan rikuchiwasunman, imastachus sonqonchejmanta orqhonanchej kasqanta. Diospa atiyninta mañakuspaqa, chayta sonqonchejmanta tʼiranapaj kallpata qowasun. Diosmanta atiyninta mañakuspaqa, sajra kajta manapuni ruwayta munasqanchejta rikuchisun. Paytaj atiyninwan yanapallawasunpuni (Efe. 4:30). w20.05 pág. 29 párrs. 10-12

Jehová Diosmanta allinta parlaspaqa, Jesús jina ruwashanchej. Jesusqa Tatanpa sutinta runasman rejsicherqa. Chaypajtaj mana Diospa sutillantachu oqharerqa, manaqa imayna Dioschus kasqanta wajkunaman yachacherqa. Fariseosqa Jehová Diosta sajra Diosta jina qhawacherqanku. Paykunaqa runasta yuyachej kanku, Jehovaqa rumi sonqo, mana khuyakuyniyoj, castigayllata yachaj Diostaj kasqanta. Jesustajrí runasman yachacherqa, Jehová Diosqa maychus kajllata noqanchejmanta suyasqanta, pacienciakuwasqanchejta, munakuwasqanchejta, khuyakuwasqanchejtataj. Chantapis Jesusqa Tatan jina may kʼacha karqa. Chayrayku imaynachus Jehová Dios kasqanta kausayninwan rikucherqa (Juan 14:9). Noqanchejpis Jesús jinallataj, wajkunaman willarisunman imatachus Jehová Diosmanta yachasqanchejta. Paykunaman nisunman, Diosqa manchay munakuyniyoj, kʼachataj kasqanta. Ajinamanta Diospa enemigosninpa nisqanku llulla kasqanta rikuchisun. Runasta Diospa santo sutinta jatunpaj qhawanankupaj yanapaspaqa, paypa sutinta llimphuchanchej. Parlasqanchejwan kausayninchejwan, imaynachus Jehová Dios kasqanta rikuchina. Runasman Diosmanta cheqa kajta yachachispaqa, Jehová suti paypaj jinapuni kasqanta rikuchinchej. w20.06 pág. 6 párrs. 17, 18

Internetqa familianchejwan amigosninchejwan parlarinapaj yanapawasunman. Jinapis wakenqa, jatunchachikuyta chayri alabachikuyta munaspa, Internetman imatapis churanku. Wakenqa alaraco kasqankurayku fotosta, videosta chayri comentariosta Internetman churanku. Wakin runastaj fotosninkupi chayri wajpa fotosninku patapi, millay palabrasta qhelqanku. Noqanchejqa mana chay runas jinachu kayta munanchej. Astawanpis kʼumuykukoj sonqo kanapaj kallpachakunchej, wajkunaj allinninkutataj maskʼanchej (1 Ped. 3:8). Uj fotota, uj videota Internetman churayta munaspa, chayri imatapis chaypi escribiyta munaspaqa piensarina: “¿Imatataj wajkuna noqamanta yuyankuman? ¿Alaraco niwankumanchu? Chayta rikuspa, ¿envidiakuwanqankuchu?”, nispa. Cristianosqa mana wajkunawan alabachikuyta munanchejchu. Astawanpis Biblia kay pʼunchaypaj textopi nisqanta kasukunchej. Kʼumuykukoj sonqo kaspaqa, mana kay mundomanta runas jinachu alaracos kasun (1 Juan 2:16). w20.07 pág. 6 párrs. 14, 15

Apóstol Pabloqa niraj cristianoman tukushaspa, machu machu joven karqa, Jesuspa discipulosnintataj qhatiykachaj (Hech. 7:58). Payqa chaypacha Saulo sutiwan rejsisqa karqa, cristianostataj mayta ñakʼarichej. Jinapis Jesuspuni niña chayta ruwajta saqerqachu. ¿Imaynamantá? Saulo cristianosta qhatiykachaj rishajtin, Jesusqa cielomantapacha parlapayamorqa, ciegoyacherqataj. Pablotaj watejmanta rikunanpaj, qhatiykachasharqa chay runaswan yanapachikunan karqa. Chayrayku Ananías ñawisninta kicharej rejtin, Pabloqa kʼumuykukoj sonqowan yanapachikorqa (Hech. 9:3-9, 17, 18). Aswan qhepamantaj, Pabloqa cristianos ukhupi may rejsisqa karqa. Jinapis Damascoman rishajtin, imatachus Jesús payman yachachisqanta ni jaykʼaj qonqarqachu. Pabloqa kʼumuykukoj sonqollapuni karqa. Chayrayku hermanoswan hermanaswanpis tukuy sonqo yanapachikorqa. Chantapis hermanos yanaparisqankutapuni nerqa (Col. 4:10, 11). w20.07 págs. 18, 19 párrs. 16, 17

Jehovaqa tukuy atiyniyoj kaspapis, wawasninwan yanapachikun. Jehová Diosqa Wawan Jesusta Gobiernonpi Rey kananpaj churarqa. Chantapis 144.000 runasman gobernanankupaj atiyta qonqa. Paykunataj Jesuswan khuska kamachimonqanku. Jehová Diosqa Jesusta wakicherqa Reytaj, Kuraj kaj Sacerdotetaj kananpaj (Heb. 5:8, 9). Payqa Jesuswan khuska gobernamonqanku chaykunatapis wakichishallantaj. Paykuna kamachishajtinkuñataj, Jehová Diosqa mana paykunata ñawillanpichu imatapis ruwachenqa. Astawanpis kamachisqanta maychus kajta juntʼanankupi atienekonqa (Apo. 5:10). Cielopi kashaj Tatanchejqa, mana pejpa yanapanta necesitaspapis wajkunawan yanapachikun. Noqanchejtaj astawanraj chayta ruwananchej tiyan. ¿Imaynatá ancianoswan tataswan Jehová Dios jina ruwankuman? Paykunaqa wakin ruwanasninkuta wajkunawan yanapachikunkuman. Chantataj mana paykunata ñawillankupi ruwachinankupaj kallpachakunkuman. Ajinamanta mana ruwanasnillankuchu ruwasqa kanqa, manaqa wajkunatapis yachachenqanku. Yachachisqa kajkunataj, chay imasta ruwayta manaña manchikonqankuchu (Isa. 41:10). w20.08 pág. 9 párrs. 5, 6

Jehová Diosninchej, ¿chinkasqa ovejitasninmanta llakikunanchejta munanchu? Arí. Jesusqa chayta yachachiwanchej. Payqa yacharqa, Jehová Diospajqa tukuy ovejitasnin may valorniyoj kasqankuta. Chayrayku tukuy atisqanta ruwarqa, ‘Israelmanta chinkasqa ovejasta’ Jehová Diosman kutirichinanpaj (Mat. 15:24). Jesusqa Sumaj Michej kasqanrayku, mayta kallpachakorqa Tatanpa ovejitasninmanta ni ujta chinkachinanpaj (Juan 6:39). Apóstol Pabloqa Éfeso llajtamanta ancianosman, Jesús jina ruwanankuta nerqa. Pay nerqa: ‘Pisi kallpayojkunata yanapariychej. Señor Jesuspa nisqantapis yuyarikuychej. Pay nerqa: “Aswan kusiy wajman qoriy, qorichikunamanta nisqaqa”, nispa’ (Hech. 20:17, 35). Pabloj nisqanqa sutʼita rikuchiwanchej, ancianosqa Diospa chinkasqa ovejitasninta yanapananku kasqanta. Españamanta hermanonchej Salvadorqa anciano. Paytaj nin: “Jehová Diosqa chinkasqa ovejitasninta may valorniyojpaj qhawan. Chaypi piensarispaqa paykunata tukuy atisqayta yanapani. Jehová Diosqa ovejitasninta yanaparinaytapuni munan”, nispa. w20.06 pág. 23 párrs. 15, 16

Waranqa watas tukukuytaraj, mana juchayoj runasman tukusunchej. Chaykamataj Jehová Diosqa pacienciawan perdonallawasunpuni. Chayrayku noqanchejpis, Jehová Dios jina wajkunawan pacienciakuna, allin ruwasqasninkutataj qhawana. Jesuswan angeleswanqa, Jehová Dios jallpʼata ruwashajtin mayta kusikorqanku. Jinapis kay jallpʼapi mana pantaj runasllataña rikuspa, astawanrajchá kusikonqanku. Chay runasqa Jehová Diosta munakonqanku, sirvenqankutaj. Jesuswan khuska cielopi gobernajkunapis, runasta yanapasqankumanta mayta kusikonqanku (Apo. 4:4, 9-11; 5:9, 10). Chay tiempopi imaynachus kausay kananpi piensarina. Llakiymanta waqanamantaqa, kusiymanta waqarisun. Onqoykunaqa manaña kanqachu, manaña llakikusunchu, wañuypis chinkanqa. Chay pʼunchay chayamunankama, Jehová Dios jina munakuyniyoj, yachayniyoj, pacienciayojtaj kana. Chayta ruwasun chayqa, ima llakiypi kaspapis kusisqallapuni kasun (Sant. 1:2-4). Maytapuni agradecekunchej, Jehová Dios wañusqasta kausarichimunanta niwasqanchejmanta (Hech. 24:15). w20.08 pág. 19 párrs. 18, 19

Bibliaqa Tatanchej Jehovamanta uj sumaj regalo. Payqa mayta munakuwasqanchejrayku, Bibliata qhelqacherqa. Jehová Diosqa imastachus yachayta munasqanchejta Biblianejta willawanchej. Bibliapeqa kay tapuykunaj kutichiyninta tarisunman: ¿Maymantá jamunchej? ¿Imapajtaj kausanchej? ¿Imaynataj kausay qhepaman kanqa? Jehová Diosqa munan, wawasnin chay imasta yachanankuta. Chayrayku ashkha runasta yanaparqa, Bibliata waj parlaykunaman tijrachinankupaj. Kunankamaqa tukuynin Biblia chayri wakin librosnillanpis, 3 mil kuraj parlaykunapiña tiyan. Ni mayqen libropis Biblia jina chay chhika parlaykunapi kanchu. Chantapis casi tukuy runaspata uj Biblia tiyapun. ¿Imaynatá Jehová Diosman agradecekusunman Bibliata qowasqanchejmanta? Bibliata sapa día leespa, imatachus yachakusqanchejpi tʼukurispa, chayman jinataj kausakuspa. Chantapis Jehová Diosman agradecekullasunmantaj, Bibliaj nisqanta tukuy atisqanchejta wajkunaman willamuspa (Sal. 1:1-3; Mat. 28:19, 20). w20.05 págs. 24, 25 párrs. 15, 16

Profeta Jeremiasmanta mayta yachakusunman. Paytaqa maymanchus Jehová Dios willajta kacharqa chaypi, ni pi uyarerqachu. Jeremiasqa uj pacha mayta llakikusqanrayku, niña Diosmanta willayta munarqachu. Jinapis Jehová Diospa nisqasnenqa, nina jina paypa sonqonta ruphaykorqa. Chayrayku Diosmanta willallarqapuni (Jer. 20:9). Noqanchejpis Diospa Palabranta yuyayninchejman, sonqonchejman ima juntʼachisun chayqa, predicallasunpuni. Chayrayku Bibliata sapa día estudiana, chaypitaj tʼukurina. Chayta ruwasun chayqa, kusisqallapuni predicasun, runaspis ichá astawan uyariwasun (Jer. 15:16). Chayrayku imallamantapis llakikunchej chayqa, Jehovamanta yanapata mañakuna. Payqa yanapawasunchej pantajtinchej chayri wakin imasta mana ruwayta atejtinchejpis. Chantapis onqosqa kashajtinchej yanapawasun. Jehovaqa yanapallawasuntaj, llajtanpi ruwanasninchejmanta maychus kajllata yuyanapaj. Payqa kusisqallapuni predicanapajpis yanapawasun. Chayrayku tukuy llakiyninchejta Tatanchej Jehovaman saqena. Paypa yanapayninwanqa llakiyninchejta atipasun. w20.12 pág. 27 párrs. 20, 21

Wakin hermanasqa reunionesllapi congregacionmanta kajkunawan parlarikuyta atinku. Chayrayku reunionpi kashaspa hermanasninchejta napaykurina, parlarichina, imaynachus kashasqankutapis tapurina. Hermanasninchejpaj Jesús jina tiempocharikuna (Luc. 10:38-42). ¿Imaynatá chayta ruwasunman? Paykunata wajyarikusunman khuska imitallatapis mikhurinapaj, chayri imata ruwaspallapis kusirikunapaj. Chay kutispeqa kallpachanapaj jinapuni parlarina (Rom. 1:11, 12). Jesusqa yacharqa, wakenqa mana casarakusqankurayku llakikusqankuta. Chayrayku nerqa, kusisqa kanapajqa mana casarakunapunichu, nitaj wawasniyojpunichu kana kasqanta (Luc. 11:27, 28). Imajtinchus cheqamanta kusisqa kanapajqa, Jehová Diosta yupaychayta ñaupajman churana (Mat. 19:12). Cristiana hermanastaqa mamasninchejta jina, hermanasninchejta jinataj qhawana tiyan. Ancianostaj astawanraj chayta ruwananku tiyan. Paykunaqa hermanaswan parlarinankupaj kallpachakunanku tiyan. Chaytataj niraj reunión qallarishajtin chayri reunión pasayta ruwankuman. w20.09 págs. 21, 22 párrs. 7-9

Israelmanta runasqa, ñaupaj paras qallarisqantawan tarpuyta qallarej kanku, qhepa paras pasasqantawantaj cosechaj kanku (Mar. 4:28). Yachayniyoj kasunchej chayqa, tarpoj runa jina pacienciayoj kasun. Jinapis chayta ruwayqa mana atikullanchu. Pantaj runas kasqanchejrayku, imapis ratolla ruwasqa kananta munanchej. Uj huertayoj kasqanchejpi piensarina. Chaypi imatapis poqochiyta munanchej chayqa, pacienciayoj kananchej tiyan. Imaraykuchus ñaupajtaqa jallpʼataraj wakichina tiyan. Chantá plantana, qhorana, qarpanataj. Runasman yachachinapajpis pacienciayojllataj kananchej tiyan. Paykunaqa mana uj ratollapichu tukuyta munakuyta yachakonqanku. Pacienciayoj kaspaqa, runas mana uyariwajtinchej mana llakikusunchu. Runas uyariwajtinchejpis, pacienciayojllataj kananchej tiyan. Imaraykuchus mana pitapis obligasunmanchu, Bibliaj nisqanta chay rato creenanpaj. Jesuspa discipulosninpis, paypa yachachisqanta wakin kutis mana entiendeyta atillarqankuchu (Juan 14:9). Chantapis kayta yuyarikuna: Noqanchejqa plantasunman, qarpasunmantaj, jinapis Jehová Dioslla wiñachin (1 Cor. 3:6). w20.09 pág. 11 párrs. 10, 11

Tukuypis munanchej estudiosninchej bautizakunankuta. ¿Imaynatá paykunata chaypaj yanapasunman? Reunionesman jamunankupaj kallpacharina. Reunionesman ratolla jamojkunaqa, ratollataj ñaupariyta yachanku. Wakin hermanosqa estudionkuman ninku: “Bibliata sapa semana estudiaspa sumajta yachakunki chaypis, reunionpipuni astawanqa yachakunki”, nispa. Estudionchejta reunionman jamunanta ninapajqa, Hebreos 10:24, 25 versiculosta paywan khuska leerina. Chantá imaynatachus tantakuykuna yanaparinanta willarina. Imatachus reunionpi yachakusqanchejtapis willarina. Chayta uyarispa, ichá paypis reunionman jamuyta munanqa. Estudionchej tantakuypi imatachus uyarisqan, rikusqan imaqa, may sumajpuni kanqa. Chayqa ni mayqen iglesiapi rikusqanwanpis kikinchakonqachu (1 Cor. 14:24, 25). Chantapis reunionman jamuspaqa, ashkha hermanosta rejsenqa. Chay hermanostaj, estudionchejta bautizakunanpaj mayta yanapanqanku. w20.10 págs. 10, 11 párrs. 14, 15

Diospa atiynenqa, Palabranpi yachakusqanchejman jina ruwanapaj yanapawasun. Chayrayku Jehová Diosmanta kay salmista jina mañakuna: “Tata Dios, ñanniykita rejsichiway, noqa chaynillantapuni purinaypaj. Uj yuyayllata ruwaway sutiykita jatumpaj qhawanaypaj”, nispa (Sal. 86:11). Jehovaqa Palabrannejta, llajtannejta ima yachachiwanchej. Chay yachachiyninwan sumajta yanapachikunallapuni. Jinapis ama astawan yachayniyoj kanallapajchu yachakuna. Astawanpis chay yachachiykunata sonqonchejpi japʼikuna, chayman jinataj kausana. Diospa atiynenqa chayta ruwanapaj yanapawasun. Hermanosninchejtapis Bibliapi yachakusqanchejwan kallpacharina. Imaraykuchus paykunaqa familianchej kanku (Heb. 10:24, 25). Diospa atiynenqa reunionespi tukuy sonqo comentanapaj, asignacionninchejtapis sumajta ruwanapaj yanapawasunman. Chayrayku Jehovamanta atiyninta mañakuna. Chay imasta ruwaspaqa, payman Wawanmanpis rikuchisunchej, ovejitasninta munakusqanchejta (Juan 21:15-17). Sumaj Yachachejninchej Jehová Diosninchejta uyarina. Paytaqa uyarisunman qowasqanchej yachachiykunata japʼikuspa. w20.10 págs. 24, 25 párrs. 15-17

Jesusqa yacharqa apostolesnin sonqo pʼakisqas kashasqankuta. Chayrayku kausarimuytawan, wakin yachachisqasninman nerqa: ‘Ama manchachikuychejchu. Rispa hermanosniyman willamuychej kausarimusqayta’, nispa (Mat. 28:10 qallariynin). Jesusqa ‘hermanosniy’ nispa, apostolesninmanta parlasharqa. Payqa apostolesnin saqerparejtinkupis, mana paykunata qhesacharqachu. Astawanpis hermanosninta jinallapuni qhawarqa. Chantapis Jehová Dios jina paykunata khuyakorqa, perdonarqataj (2 Rey. 13:23). Noqanchejpis Jesús jinallataj chiriyapoj hermanosninchejmanta llakikunchej. Paykunataqa hermanosninchejta, hermanasninchejta jinallapuni qhawanchej, maytataj munakunchej. Chantapis Jehová Diospaj llankʼasqankuta mana qonqapunchejchu. Paykunamanta wakenqa, Jehovapaj unayta llankʼarqanku (Heb. 6:10). Chayrayku chiriyapoj hermanosninchejta mayta faltachanchej (Luc. 15:4-7). Noqanchejpis Jesús jinallataj paykunata tantakuykunaman wajyarisunman. Jamojtinkutaj paykunaman chimpaykuspa, allin jamusqa kasqankuta nina. w20.11 pág. 6 párrs. 14-17

Uj pacha, Santiagojta Juanpatawan mamanku Jesusman nerqa: “Niy ari kay iskay wawasniy Gobiernoykipi tiyaykukunankuta, ujnin pañaykipi, ujnintaj lloqʼeykipi”, nispa. Jesustajrí payman kuticherqa: “Pikunachus pañaypi, lloqʼeypiwan tiyaykukunankoqa, mana noqamantachu kashan, manachayqa Tataymanta. Pay ajllanqa pikunachus chaypi tiyaykukunankuta”, nispa (Mat. 20:20-23). Jesusqa chaywan nisharqa, wakin imasta ruwananpaj mana derechoyojchu kasqanta. Llampʼu sonqo kasqanrayku, imatachus Jehová Dios kamacherqa, chayllata ruwarqa (Juan 12:49). ¿Imaynatá Jesús jina llampʼu sonqo kasunman? Imatachus kay pʼunchaypaj texto nisqanta kasukuna. ¿Imaynatá chayta ruwasunman? Pillapis imata tapurikuwanchej chayqa, amapuni mana piensarispalla imatapis ninachu, amallataj “kayta ruway” chayri “jaqayta ruway” ninachu. Astawanpis imatachus Biblia chayri publicacionesninchej nisqanta rikuchina. Chayta ruwaspaqa, llampʼu sonqos kasqanchejta rikuchisun. Imaraykuchus llampʼu sonqosqa, mana tukuy imatachu yachasqankuta reparakunku. Chantapis Jehová Diospa ‘cheqan kamachiykunasnillan’, pitapis sumajta yanapasqanta yachanku (Apo. 15:3, 4). w20.08 págs. 11, 12 párrs. 14, 15

Uj amigonchejta yuyaycharinanchej kajtenqa, niraj paywan parlashaspa kaypi piensarina: “¿‘Ancha cheqan runa’ kasqayraykuchu yuyaychariyta munashani?”. ¿Imaraykutaj jinata piensarinanchej tiyan? Ancha cheqan runapaj qhawakuspaqa, yuyasqanchejman jinalla wajkunata juzgasunman, nitaj Jehovaj kamachiykunasninman jinachu. Ichá wajkunatapis mana khuyakusunmanchu. Chaypi piensarispaqa, amigonchej yuyaycharinata necesitasqantapunichus manachus reparasun. Amigonchejta yuyaycharinapuni kajtintaj, imapichus pantasqanta sutʼita nina. Chay pantasqanta reparachinapajtaj, sumaj tapuykunata ruwana. Yuyaychasqanchejqa Bibliaj nisqanman jinapuni kanan tiyan. Amataj qonqanachu, amigonchejqa Jehová Diosman cuentata qonanta, nitaj noqanchejmanchu (Rom. 14:10). Pitapis yuyaychana kajtenqa, Bibliawanpuni yuyaychana tiyan, Jesús jinataj payta khuyakuna (Pro. 3:5; Mat. 12:20). ¿Imaraykutaj chayta ruwana tiyan? Imaraykuchus wajkunata mana khuyakojtinchejqa, manallataj Jehovapis noqanchejta khuyakuwasunchu (Sant. 2:13). w20.11 pág. 21 párr. 13

Ni pipis munasunmanchu, runas uyanchejta qhawarispalla imaynachus kasqanchejta ninankuta. Nillataj munasunmanchu chayta ninankuta, yurajchus yanachus chayri jatunchus juchʼuychus kasqanchejta qhawarispa. Chayrayku mayta sonqochakunchej, Jehová Dios mana runas jinachu kasqanmanta. Payqa mana rijchʼayninchejtachu qhawan. Uj pacha, Jehová Diosqa profeta Samuelman nerqa: ‘Riy Isaípa wasinman, imaraykuchus ujnin wawanta rey kananpaj ajllaniña’, nispa. Samueltaj Isaípa wasinman chayaytawan, kuraj wawan Eliabta rikorqa. Payqa rey kananpaj jinapuni karqa, may allin rijchʼayniyojtaj. Chayrayku Samuelqa nerqa: “Kaychá kanqa Tata Diospa ajllasqan reyqa”, nispa. Jinapis Diosqa Samuelta nerqa: “Ama allin rijchʼayninta qhawaychu, nitaj sayaynintapis; paytaqa noqa qhesachani”, nispa. Samuelqa ñawisninpa rikusqallanta qhawarqa, manataj Jehová Dios qhawasqanman jinachu. ¿Imatá chaymanta yachakusunman? Jehová Diosllataj nerqa: ‘Runaqa ñawisninpa rikusqallanta qhawan, noqatajrí sonqota qhawani’, nispa (1 Sam. 16:1, 6, 7). Chayrayku hermanosninchejta Jehová Dios jina qhawanapaj kallpachakuna. w20.04 pág. 14 párr. 1; pág. 15 párr. 3

Jesusqa Galileaman rishaspa, Samaria jallpʼanta pasarqa. Chay purisqanpitaj ashkha chajrasta rikorqa. Chay chajrasqa ichá recién llullushaj cebada chayri grano karqa (Juan 4:3-6). Cosecha tiempopajqa tawa killaraj faltarqa. Jinapis Jesús discipulosninman nerqa: “Qhawariychej chajrasta, poqosqaña kashanku cosechanapaj”, nispa. Chayta uyarispa, discipulosnenqa ichapis tʼukorqanku (Juan 4:35, 36). Jinapis, ¿chajrasmantapunichu Jesús parlasharqa? Mana. Payqa runasta yachachisqasninman tukuchinamanta parlasharqa. Jesús niraj cosechamanta parlashajtin, imaschus kasqanpi piensarina. Judíos samaritanosta chejnikojtinkupis, Jesusqa samaritana warmiman predicarqa. Chay warmeqa Jesuspa willasqanta japʼikorqa, llajta masisninmantaj willamorqa. Paykunatajrí usqhayllata Jesús chayman rerqanku. Chaypachataj Jesús discipulosninman nerqa: ‘Chajrasqa poqosqaña kashanku cosechanapaj’, nispa (Juan 4:9, 39-42). Uj yachayniyoj runa nin: “Chay runas Jesusta chay rato maskʼaj risqankoqa, [...] rikuchiwanchej paykuna poqosqa chajras jina kasqankuta”, nispa. w20.04 pág. 8 párrs. 1, 2

Reunionesqa aswan sumajta predicanapaj, yachachinapaj ima yanapawanchej. Chaypeqa Bibliata estudiachinapaj publicacionesta sumajta apaykachayta yachakunchej. Chayrayku reunionespaj sumajta wakichikuna. Reunionpi kashaspataj sumajta atiendena. Chantá imatachus chaypi yachakusqanchejman jina ruwana. Chay imasta ruwaspaqa, “Cristo Jesuspa sumaj soldadon” kasunchej (2 Tim. 2:3). Jehovaqa may chhika atiyniyoj angeleswan yanapashawanchej. Unay tiempopi, uj angellla may chhika soldadosta wañuracherqa (Isa. 37:36). Kunanqa piensarina imatachus may chhika ángeles ruwayta atisqankupi. Chay chhika angelestaqa, ni mayqen runapis, ni pi supaypis atipayta atinmanchu. Jehová Dios noqanchejwan kajtenqa, ni pi atipayta atiwasunmanchu (Jue. 6:16). Chayrayku trabajomanta, colegiomanta compañerosninchej, chayri mana testigo familiaresninchej, imata niwajtinchej chayri imata ruwawajtinchej, chaypi piensarinanchej tiyan. Noqanchejqa mana sapanchejchu maqanakushanchej, manaqa Comandantenchej Jehovata kasukushanchej. w21.03 pág. 29 párrs. 13, 14

Apóstol Pabloqa ichapis Isaías 22:13 nisqanta oqharisharqa. Chay versiculoqa israelitasmanta parlashan. Paykunaqa Jehová Diosta munakunankumanta nisqa, paykunaj munaynillankuta maskʼaj kanku. Kay yuyaywantaj kausaj kanku: “Mikhushana, ujyashana, qʼaya wañuspa imatá apasunri”. Jehová Diosqa wañusqasta kausarichimonqapuni. Chaymanta mana iskayrayanapajtaj, pikunawanchus masichakusqanchejta sumajta ajllananchej tiyan. Corintomanta cristianosqa, kausarimuy mana kasqanta nej runasmanta karunchakunanku karqa. Noqanchejpis amigosninchejta sumajta ajllananchej tiyan. Kusikuyllapi yuyaj runaswan masichakuspaqa, paykuna jina yuyayta qallarisunman, niñataj sumaj cristianoschu kasunman. Chantapis ichá Diospa chejnisqan imasta ruwasunman. Chayrayku Pabloj kay nisqanta kasukuna: “Yuyayniykichejman kutiriychej cheqan kajman jina, amataj juchalliychejchu” (1 Cor. 15:33, 34). w20.12 pág. 9 párrs. 3, 5, 6

Kay versículo nisqanman jina, Jehová Diosqa cielopi, jinallataj jallpʼapi familianmanta ‘uma’. Familian allinta kausakunanpajqa, paykunamanta wakinman kamachinapaj atiyta qon. Chay atiyta japʼejkunataj, imatachus chay atiywan ruwasqankumanta payman cuentata qonanku tiyan (Rom. 14:10; Efe. 3:14, 15). Jehová Diosqa Jesusta congregacionmanta uma kananpaj churan. Jesustaj imaynatachus congregacionta qhawasqanmanta, payman cuentata qonan tiyan (1 Cor. 15:27). Jehovaqa qosastapis familiankumanta uma kanankupaj churan. ¿Imaynatataj qosas sumaj umas kankuman? Paykunaqa yachananku tiyan, imajtinchus Jehová wakinman kamachinapaj atiyta qosqanta. Chantapis sumaj umas kanankupajqa, Jehová Diosmanta, Jesusmantawan yachakunanku tiyan. Imaraykuchus Jehová Diosqa, qosasta familiankumanta uma kanankupaj churan, munantaj sumaj umas kanankuta (Luc. 12:48). w21.02 pág. 2 párrs. 1-3

Jehová Diospa yuyaynenqa may sumajpuni. Jinapis juchanchejmanta arrepientekojtinchej payqa perdonawanchej, juchanchejtataj qonqapun. Pay jina ruwanapaj kallpachakusunman (Sal. 25:7; 130:3, 4). Jehová Diosqa niwanchej, wajkuna imatapis contranchejpi ruwajtinku, pay jina perdonananchejta (Mat. 6:14; Luc. 17:3, 4). Chanta, ¿imaynatá Jehová Diosman agradecekusunman ñojtuyojta ruwawasqanchejmanta? Imatapis payta jatunchanapaj jina ruwaspa. Ñojtuyoj kasqanchejrayku ashkha imasta ruwayta atinchej. Jinapis wakenqa mana allin imasta ruwayta ajllanku. Ashkhas paykunallamanta ajllanku imachus allin, imatajchus mana allin kasqanta. Jinapis Jehová Diosninchej ruwawasqanchejrayku, paylla niyta atiwanchej imachus allin, imatajchus mana allin kasqanta (Rom. 12:1, 2). Jehová Diospa kamachisqanman jina kausakusqanchejrayku, sonqo tiyasqa kanchej (Isa. 48:18). Chantapis imapajchus kausasqanchejta yachanchej. Chayrayku payta jatunchayta, kusichiyta ima munanchej (Pro. 27:11). w20.05 págs. 23, 24 párrs. 13, 14

¿Imatá ruwasunman hermanosninchejta familianchejta jina munakunapaj? Paykunata astawan rejsina. Chayta ruwaspaqa paykunata entiendesun, astawantaj munakusun. Hermanosninchej kurajkunasninchej, sullkʼasninchej, chayri waj llajtasmanta kajtinkupis, paykunawan amigos kayta atisunman. Jonatanqa Davidmanta 30 wataswan jina kuraj kajtinpis, Davidwan sumaj amigos karqanku. Chayrayku noqanchejpis, kurajkunasninchejwan sullkʼasninchejwanpis, sumaj amigos kanapaj kallpachakuna. Chayta ruwaspaqa, “tukuy hermanosta” munakusqanchejta rikuchisun (1 Ped. 2:17). Hermanosninchejta familianchejta jina munakuspapis, ¿tukuywanpunichu sumaj amigos kananchej tiyan? Mana. Mana tukuywanpunichu allin amigos kayta atisun. Wakinwanqa ichá kikin gustosniyoj kasqanchejrayku, aswan sumaj amigos kasun. Chaytaj mana juchachu. Jesusqa tukuynin apostolesnin ‘amigosnin’ kasqankuta nerqa. Jinapis apóstol Juanta astawan munakorqa (Juan 13:23; 15:15; 20:2). Ajinata munakuspapis, mana payllawanchu imatapis ruwaj, nitaj payllamanchu imatapis qoj (Mar. 10:35-40). w21.01 pág. 23 párrs. 12, 13

Pabloqa Atenasmanta mana judío kajkunaman, mana sinagogapi judiosman jinallatajchu predicarqa. Payqa imaschus chay llajtapi kasqanta, ima dioskunatachus yupaychasqankutawan sumajta qhawarerqa (Hech. 17:23). Chantá chay rikusqanwan yanapachikuspa, Diospa Palabranmanta yachacherqa. Pabloqa Atenasmanta runasman ajinata yachachiyta qallarerqa: ‘Chay mana rejsisqaykichej Diosmanta willashaykichej, pitachus mana rejsispalla yupaychankichej, chaymanta’, nispa. Pabloqa yacharqa, mana judío kajkuna Diospa Palabranta mana rejsisqankuta. Jinapis mana yuyarqachu ni jaykʼaj cristianosman tukunankuta. Astawanpis Pabloqa, paykunata cosechanapaj chajrasta jina qhawarqa. Chayman jinataj sumaj willaykunata willarqa. Noqanchejpis Pablo jina tukuy imata qhawarina. Imapichus runas creesqankuta yachanapaj, qhawarina imaynachus wasinku kasqanta, imastachus autonkuman churasqankuta ima. Chantapis uj runa ima iglesiamantachus kasqanta yachasunman: sutinta yachaspa, parlasqanta uyarispa, ropanta chayri imaynatachus kʼachanchakusqanta qhawaspa ima. w20.04 págs. 9, 10 párrs. 7, 8