Marzo

Mateo 25:31-36 versiculospi kikinchaymanta ‘ovejasqa’ ninakun kay tiempopi kausakoj llampʼu sonqo runaswan. Paykunaqa kay jallpʼapi kausakuyta suyakushanku, tukuy sonqotaj yanapanku kay jallpʼapiraj kaj Cristoj hermanosninta. Chaytataj ruwanku jallpʼantinpi Diospa Gobiernonmanta willaspa, runastataj Jesuspa discipulosninman tukuchispa (Mat. 24:14; 28:19, 20). Waj ovejasmanta kajkunaqa Jesuspa Wañuyninta Yuyarinapaj tantakuyman, mundontinpi tukuy runasta wajyarinku. Chaytataj sapa wata ruwanku, chay tantakuypaj semanas faltashajtin. Ajinamantataj Cristoj hermanosninta yanapasqankuta rikuchinku. Chantapis yanapakullankutaj, mundontinpi tukuy congregacionespi chay tantakuy ruwakunanpaj wakichispa. Waj ovejasmanta kajkunaqa, mayta kusikunku Cristoj hermanosninta yanapanankupaj tukuy atisqankuta ruwaspa. Paykunaqa sumajta yachanku chayta ruwaspa Jesuspaj ruwashasqankuta, Jesustaj chayta qhawamushasqanta (Mat. 25:37-40). w22.01 pág. 22 párrs. 11, 12

Jesús jina wajkunawan kʼachas kananchej tiyan. Payqa lepra onqoyniyoj runata khuyakorqa, yawar apaywan onqosqa warmitapis entienderqa. Chantapis familiankumanta pillapis wañupusqanrayku llakisqa kajkunamanta llakikorqa. Noqanchejpis Jesús jina kʼachas kaspaqa, Jehová jina ruwashanchej (Mar. 1:40, 41; 5:25-34; Juan 11:33-35). Jehová jina kanapaj astawan kallpachakusun chayqa, payman astawan qayllaykusun. Jesuspa purisqanta qhatispaqa, mana kay sajra mundoman chhapukusunchu. Jesusqa wañuchinankupaj uj chʼisi faltashajtin nerqa: “Noqaqa kay mundota atipani”, nispa (Juan 16:33). Chayta nerqa mana kay sajra mundomanta runas jinachu piensasqanrayku, ruwasqanrayku ima. Chantapis payqa mana kay mundopi tukuy imayoj kaytachu maskʼarqa. Astawanpis Jehovata jatunchaypipuni yuyarqa. Noqanchejpis pay jinallataj Jehová Diosta sirviypi yuyananchej tiyan. Manataj saqenanchejchu tiyan, kay sajra mundo paymanta karunchanawanchejta. Chayta ruwasun chayqa, noqanchejpis Jesús jina kay mundota ‘atipasun’ (1 Juan 5:5). w21.04 págs. 3, 4 párrs. 7, 8

Apóstol Pabloqa sumajta yacharqa ‘pillapis Jesuspi creejqa, wiñay kausayniyoj kananta’ (Juan 3:16; Rom. 6:23). Pabloqa manapuni iskayrayarqachu, Jesús runasrayku kausayninta qosqanmanta. Payqa yacharqa juchasninchejmanta arrepientekojtinchej, Jehová perdonayta munawasqanchejta (Sal. 86:5). Pabloqa Jehová Dios payta munakusqanmanta mana iskayrayarqachu. Imaraykuchus yacharqa Jehová Dios Wawanta payrayku wañunanpaj kachamusqanta. Chayrayku Pabloqa Gálatas 2:20 versiculoj tukukuyninpi nerqa: ‘Diospa Wawan munakuwarqa, noqaraykutaj kausayninta qorqa’, nispa. Pabloqa niraj cristiano kashaspa mana allin imasta ruwasqanrayku niyta atinman karqa: “Yachani Jehová hermanosniyta munakusqanta, jinapis noqataqa nipuni munakuwanmanchu”, nispa. Chayta ninanmantaqa, Romamanta hermanosman nerqa: “Cristorí juchasapasllaraj kashajtinchej noqanchejrayku wañorqa”, nispa (Rom. 5:8). Jehová Diosqa maytapuni munakuwanchej. Pabloqa nipuni iskayrayarqachu Jehová munakuwasqanchejmanta. Pabloqa yacharqa, Jehová Dios israelitaswan mayta pacienciakusqanta. w21.04 pág. 22 párrs. 8-10

Estudionchejta yanapana Jehovata munakunanpaj. Chaypajtaj Jehová kʼacha kasqanmanta paywan parlarinapuni. Estudionchejqa yachanan tiyan Jehovaqa kusikuyniyoj Dios kasqanta, payta munakojkunatataj yanapasqanta (1 Tim. 1:11; Heb. 11:6). Chantapis estudionchejmanqa nina yachakusqanman jina kausakojtin allin rinanta, chaytapunitaj Jehová paypaj munasqanta (Isa. 48:17, 18). Estudionchejqa Jehová Diosta astawan munakusqanman jina, kausayninta cambiananpaj kallpachakonqa. Payqa bautismoman chayananpaj, ashkha imasta saqenan kanqa. Wakin estudiosninchejqa, ichá wakin imasninkuta saqenanku kanqa. Wakintaj ichá amigosninkuta saqepunanku kanqa. Wakintajrí ichá sapallanku rikhurenqanku familiaresninku Jehovaj testigosninta mana allinpajchu qhawasqankurayku. Jesusqa nerqa payta qhatejkunata Jehová Dios llajtanpi kʼacha familiawan bendecinanta (Mar. 10:29, 30). w21.06 pág. 4 párrs. 8, 9

Apóstol Pabloqa predicayta, yachachiyta ima tarpuywan kikincharqa. Ajinamanta sutʼincharqa mana mujitusllatachu tarpuna kasqanta. Payqa Corintomanta hermanosta yuyaricherqa: “Noqa plantarqani, Apolostaj qarparqa [...]. Qankunataj Diospa chajran kankichej, mayqentachus pay llankʼashan chay”, nispa (1 Cor. 3:6-9). ‘Diospa chajranpi’ trabajajkunaqa, mana mujitusllatachu tarpunchej, manaqa qarpanchej, pʼutumojtintaj cuidanchej. Jinapis yachanchej Dioslla chay mujitusta wiñachisqanta. Bibliamanta wajkunaman willariy, yachachiy imaqa, may sumajpuni. Chayta ruwaspataj mayta kusikunchej. Apóstol Pabloqa, Tesalonicamanta ashkha runasta Jesuspa discipulosninman tukunankupaj yanaparqa. Chayta ruwasqanrayku may kusisqapuni kashasqanmanta kayta nerqa: “Señor Jesuspa kutimunan tiempopi, ¿imataj kanqa suyakuyniyku, kusikuyniyku chayri kusikuna pilluyku paypa ñaupaqenpiri? ¿Manachu qankuna kankichej? Arí, qankuna kankichej sonqo juntʼasqa kayniyku, kusikuyniykutaj”, nispa (1 Tes. 2:19, 20; Hech. 17:1-4). w21.07 pág. 3 párr. 5; pág. 7 párr. 17

Jehová Diosqa sapa ujninchejta llajtanman pusaykamuwarqanchej (Juan 6:44). ¿Imaraykú chayta ninchej? Jehová Diosqa, kay mundomanta tukuy runaspa sonqonkuta qhawashaspa, sonqonchejpi repararqa payta tukuy sonqo munakuyta atisqanchejta (1 Cró. 28:9). Jehová Diosqa sapa ujta sumajta rejsiwanchej, entiendewanchej, munakuwanchejtaj. Chayta yachayqa mayta sonqochawanchej. Jehová Diosqa sapa ujninchejta munakuwanchej, jinallataj tukuynin hermanosninchejtapis. Chayta sutʼita entiendenapaj, Jesuspa ujnin kikinchayninmanta parlarina. Payqa uj pacha Jehová Diosta uj michejwan kikincharqa. Pay nerqa: “Uj runa 100 ovejasniyoj kashajtin, sichus uj ovejan chinkanman chayqa, ¿manachu 99 ovejasninta orqopi saqespa, chinkasqa ovejanta maskʼamunman? Cheqatapuni niykichej, chinkasqa ovejanta tarikapuspaqa, chay ovejanmanta astawan kusikun”, nispa. Sutʼita reparanchej, chay michejqa ovejanta tarikapuspa kusikusqanta manataj phiñakusqantachu. ¿Imatá chaymanta yachakunchej? Jehovaqa sapa uj ovejitanta mayta munakusqanta. Jesús nerqa: “Cielopi kashaj Tatayqa, mana munanchu ni ujpis kay juchʼuykunamanta chinkananta”, nispa (Mat. 18:12-14). w21.06 pág. 20 párrs. 1, 2

Jehovaqa ni jaykʼaj saqerpawasunchu. Chaypi piensareyqa yanapawanchej payta astawan munakunapaj, payman astawan qayllaykunapajtaj (Rom. 8:38, 39). Jesuspa Wañuyninta Yuyarinapaj tantakuyman reyqa, Jesús jina ruwanapaj yanapawanchej (1 Ped. 2:21). Chay tantakuypa ñaupaj diasnenqa, imatachus Jesús niraj wañuchishajtinku ruwasqanmanta parlaj versiculosta leerinchej. Chantapis leerillanchejtaj wañuyninmanta, kausarimuyninmantawan parlaj versiculosta. Chay tantakuypi discursotaj Jesús mayta munakuwasqanchejta yuyarichiwanchej (Efe. 5:2; 1 Juan 3:16). Jesús imatachus noqanchejrayku ruwasqanta leerispa, chaypitaj tʼukurispaqa, “imaynatachus Jesús kausarqa ajinata” kausayta munanchej (1 Juan 2:6). Jesuspa Wañuyninta Yuyarinapaj tantakuyman reyqa, Diospa munakuyninpi kanallapajpuni yanapawanchej (Jud. 20, 21). Jehová Diosta kasukunapaj, sutinta jatunchanapaj, payta kusichinapaj ima tukuy atisqanchejta kallpachakuspaqa, munakuynillanpipuni kanchej (Pro. 27:11; Mat. 6:9; 1 Juan 5:3). Chay tantakuyman reyqa, yanapawanchej sapa día Jehovaj munayninman jina kausakunapaj. Chaywantaj nishanchej: “Munakuyniykipi wiñaypaj kayta munani”, nispa. w22.01 pág. 23 párr. 17; pág. 25 párrs. 18, 19

Jehovaqa imatachus ruwayta munasqanchejta ajllakojta saqewanchej. Chayrayku imatachus kausayninchejwan ruwananchejta ajllayta atinchej. Tatanchej Jehovaqa mayta kusikun payta sirviyta ajllajtinchej (Sal. 84:11; Pro. 27:11). Kausayninchejpeqa tukuy imaymanamanta rikuchisunman mana imatapis munasqanchejman jinapunichu ajllasqanchejta. Jesusqa wajkunaj allinninkutapuni maskʼaj. Noqanchejpis pay jina ruwasunman. Uj kuti Jesuswan apostolesninwanqa, ancha saykʼusqas kasharqanku. Chayrayku chʼinnejman samarikoj rerqanku. Jinapis mana samarikuyta aterqankuchu, imajtinchus maypichus kasharqanku chayman, ashkha runas chayarqanku Jesuspa yachachisqanta uyarinankupaj. Jesustaj chay runasta khuyakusqanrayku chay runasman “tukuy imata yachacherqa” (Mar. 6:30-34). Jesús jina runasta yanapanapaj tiempochakuspa, kallpachakuspa ima Tatanchej Jehovata jatunchanchej (Mat. 5:14-16). w21.08 pág. 3 párrs. 7, 8

Jehovaqa mana munanchu tukuy ima uj rejlla kananta. Chaytataj sutʼita reparanchej plantasta, animalesta, runastapis imaymanata ruwasqanpi. Ni pi noqanchej jinaqa waj runa kanmanchu. Chayrayku Jehovaqa ni piwan kikinchawanchejchu. Payqa sonqonchejta qhawan, nisunman imayna runachus kasqanchejta (1 Sam. 16:7). Jehovaqa yachan imastachus ruwayta atisqanchejta, imastachus mana ruwayta atisqanchejta, imayna uywasqatajchus kasqanchejta. Payqa ruwayta atisqanllanchejta mañawanchej. Chayrayku imaynatachus Jehová qhawawanchej, ajinata noqanchejpis qhawakunanchej tiyan. Ajinamanta “maychus kajllata” noqanchejmanta yuyasun (Rom. 12:3). Wakin hermanosqa sumajta predicayta yachanku. Paykuna jina ruwayta munaytaj mana juchachu (Heb. 13:7). Astawanpis chayqa yanapawasunman sumaj yachachej kananchejpaj (Fili. 3:17). Chantapis mana paykunamanta aswan sumaj kasqanchejta yuyakunapajchu nitaj pisipaj qhawakunapajchu paykuna jina ruwayta munanchej. w21.07 pág. 20 párrs. 1, 2

Animalesta, plantasta, chʼaskasta ima allinta qhawarisun chayqa, Diospi creeyninchejta astawan kallpachasun (Sal. 19:1). Chaykuna imayna ruwasqapunichus kasqankuta sutʼita yachaspaqa, mana iskayrayasunchu Diospuni ruwasqanmanta. Diospa ruwasqasninmanta yachakushaspaqa, allinta reparana imastachus Diosmanta yachachiwasqanchejta (Rom. 1:20). Yachanchej jina inteqa kʼanchayta, calorta ima qowanchej. Ajinamanta jallpʼapi kausay kananpaj. Jinapis inteqa rayos ultravioletas nisqata wijchʼullantaj. Chaytaj kausayninchejpaj ni imarayku allinchu. ¿Imaynatá chaymanta runas jarkʼasqas kanchej? Jallpʼaqa sumaj jarkʼachasqa kashan, mana chay rayos ultravioletas nisqa pasamunanpaj. Chay jarkʼachataj capa de ozono nisqa sutikun. Rayos ultravioletas nisqa sinchʼiyajtenqa, capa de ozono nisqapis sinchʼiyallantaj. Chaytaj sutʼita reparachiwanchej tukuy ima kajtaqa Diospuni ruwasqanta. w21.08 pág. 17 párrs. 9, 10

Runa masinchejtaqa bautizakojtinñapis siga munakunallapuni, respetanallapunitaj (1 Juan 4:20). Imallapipis pantarpanman chayqa, ama yuyanachu phiñachinawanchejraykupuni chayta ruwasqanta. Astawanpis jatunpaj qhawana, noqanchejmanta aswan kurajta jinataj (Rom. 12:10; Fili. 2:3). Tukuy runasta khuyakuna, paykunawantaj kʼacha kana. Wiñaypaj Jehovaj familianmanta kayta munanchej chayqa, Bibliapi yachakusqanchejman jina kausakunanchej tiyan. Jesusqa yachacherqa tukuy runasta, enemigosninchejta ima khuyakunanchejta, paykunawantaj kʼachas kananchejta (Luc. 6:32-36). Chaytataj ichá mana atillasunmanchu. Jina kajtenqa Jesusmanta yachakuna pay jina yuyanapaj, ruwanapaj ima. Jehovata kasukunapaj, Jesús jinataj ruwanapaj mayta kallpachakunchej. Ajinamanta Tatanchej Jehovaman rikuchinchej wiñay wiñaynintinpaj familianmanta kayta munasqanchejta. w21.08 pág. 6 párrs. 14, 15

Jehovapi confiajtinchej, payta sirvinapaj tukuy atisqanchejta ruwajtinchej ima, mayta bendeciwasun. Bibliata leerispaqa reparanchej ashkha runas Diosta tukuy atisqankuta sirvinankupaj mayta kallpachakusqankuta. Jinapis wakenqa Jehovaj bendicionninta japʼinankupaj paykunaraj Diospi confiasqankuta rikuchinanku karqa. Por ejemplo, Abrahanqa “maymanchus rishasqanta mana yachaspapis” wasinmanta riporqa. Jehovataj chayta ruwajtinraj bendicerqa (Heb. 11:8). Jacobtataj bendicerqa uj angelwan maqanakusqantawanraj (Gén. 32:24-30). Israelitas Sumaj Jallpʼaman yaykunankupajña kashajtinkutaj Jehovaqa paykunata yanaparqa, Jordán mayuta chimpanankupaj, sacerdotes yakuman saruykuspa chakisninkuta joqʼochakojtinkuraj (Jos. 3:14-16). Kay tiempomanta hermanospis Jehovapi confianku, tukuy imaymanamantataj paypaj llankʼanankupaj kallpachakunku. Paykunamantapis mayta yachakullasunmantaj. w21.08 págs. 29, 30 párrs. 12-14

Machitu hermanos, qankunaqa yachankichej imaynatachus aswan ñaupajta wakin imas Diospa llajtanpi ruwakusqanta. Jinapis yachallankichejtaj cambios kajtin chayman jina ruwanaykichej kasqanta. Qankunamanta wakin kunallanraj bautizakorqankichej chaypis jovenesta mayta yanapallawajchejtaj. Joven hermanosqa experienciasniykichejta, chantá imastachus yachakusqaykichejta ima uyarispa mayta kusikonqanku. Imastachus kausayniykichejpi yachakusqaykichejmanta wajkunaman yachachinkichej chayqa, Jehová Diosqa maytapuni bendecisonqachej (Luc. 6:38). Machitu hermanos joveneswan kanaykichejpaj tiempochakunkichej chayqa, purajmanta kallpachanakunkichej (Rom. 1:12). Joveneswan machitu hermanoswanqa mana kikinchu kanku. Machitu hermanosqa unaytaña kausasqankurayku sumaj yachayniyoj, sumaj experienciayojtaj kanku. Jovenestajrí wapus, kallpasapastaj kanku. Joveneswan machitu hermanoswan purajmanta yanapanakuspaqa, munakuyniyoj Tatanchej Jehovata jatunchanku, congregacionpitaj sumajta yanapakunku. w21.09 pág. 8 párr. 3; pág. 13 párrs. 17, 18

Ashkha judiosqa Jesusta kʼaspipi clavasqata rikuspa, paymanta karunchakaporqanku. Paykunaqa Jesusta ajinata rikuspa, nipuni creerqankuchu Mesías kasqanta. Imajtinchus millay juchasapa runasllata ajinata wañuchej kanku (Deu. 21:22, 23). Jesusqa mana juchayoj karqa. Paytaqa qhasillamanta juchacharqanku, sufricherqanku ima. Jesusta qhesachaj judiostaj mana chayta entienderqankuchu. Payta juzgasharqanku chay runasqa, mana maychus kasqanman jinachu juzgarqanku. Judiospa Jatun Juntankumanta kajkunapis, Jesusta juzganankupaj usqhayllata tantakorqanku, nitaj leyesninkuman jinachu ruwarqanku (Luc. 22:54; Juan 18:24). Chantapis juzgajkunaqa, runas Jesuspa contranpi imastachus nisqankuta, ni piman kutikuspa uyarinanku karqa. Chayta ruwanankumantaqa, ‘llulla testigosta maskʼarqanku Jesuspa contranta parlanankupaj. Ajinamantataj payta wañuchinankupaj’ (Mat. 26:59; Mar. 14:55-64). Jesús kausarimusqantawantaj, payta juzgarqanku chay runasqa, Jesuspa sepulturanta qhawaj soldadosman ashkha qolqeta qorqanku llullakunankupaj. Paykunaman yachaykucherqanku: “Qankunaqa ninaykichej tiyan: ‘Yachachisqasnin tuta jamuspa ayanta suwasqanku, puñunaykukama’”, nispa (Mat. 28:11-15). w21.05 pág. 11 párrs. 12, 13

Jehovaqa ima ratollapis kay sajra mundota chinkachiyta atinman. Jinapis pacienciakusqanqa mayta yanapawanchej. Adanwan Evawan ñaupa tatasninchej kasqankurayku, juchasapas nacekunchej. Jinapis Jehovaqa munakuwanchej, cuidawanchejtaj. Payqa niwanchej kay sajra mundota pisimantawan chinkachinanta (1 Juan 4:19). Jehovaqa sufrichiwasqanchej imasta chinkachenqa. Payqa yachanña maykʼajchus runaspa llakiyninkuta tukuchinanta. Jehová munakuwasqanchejqa, yanapawanchej paywan khuska mashkha unaytapis aguantanapaj. Jehovaqa ni pi jina aguantashan, paymantataj mayta yachakusunman. Jesuspis Jehová jinallataj aguantarqa. Payqa kay jallpʼapi kashaspa paypaj sajrata rimasqankuta, kʼumuykachachisqankuta, kʼaspipi wañuchisqa kayta ima noqanchejrayku aguantarqa (Heb. 12:2, 3). Arí, payqa Tatanta aguantajta rikuspa aguantallarqataj. Chayrayku Jehová aguantasqanqa noqanchejtapis yanapallawanchejtaj. w21.07 págs. 12, 13 párrs. 15-17

Tatanchej Jehovaqa sapa día khuyakuwanchej (Sal. 103:10-14). Jesuspis discipulosninta pantaj runas kajtinkupis khuyakorqa, perdonarqataj. Payqa kausayninta qorqa juchasninchejmanta perdonasqa kananchejpaj (1 Juan 2:1, 2). Tukuy sonqo perdonaspaqa hermanosninchejta astawan munakunchej (Efe. 4:32). Wakin kutisqa ichá mana perdonayta atillasunmanchu. Jinapis kallpachakunanchej tiyan perdonanapaj. Uj hermanataqa Torremanta Qhawaj revistapi “Purajmanta perdonanakuychej” nisqa yachaqana mayta yanaparqa. Pay nin: “Chay yachaqanapi sutʼincharqa wajkunata perdonayqa mana niyta munanchu juchanta allillanpaj qhaway chayri wajkunata ñakʼarichisqanta pisiyachiy. Chantá, ¿imataj perdonay niyta munan? Tukuy phiñakuyninchejta sonqonchejmanta wijchʼuy niyta munan, sonqo tiyasqa kanallapajpuni”, nispa. Hermanosninchejta tukuy sonqo perdonaspaqa, paykunata munakusqanchejta rikuchinchej, Tatanchej Jehová jinataj ruwasqanchejta rikuchinchej. w21.09 págs. 23, 24 párrs. 15, 16

Jesusqa, Diosmanta, imachus munaynin kasqanmantapis cheqa kaj yachachiykunata jatunpaj qhawarqa. Chayrayku chayman jina kausakorqa, wajkunamanpis willarqa (Juan 18:37). Jesuspa discipulosninpis pay jinallataj Diosmanta cheqa kajta yachakusqankuta sonqonkupi japʼikorqanku (Juan 4:23). Chayrayku apóstol Pedropis ‘cheqa kaj ñanmanta’ parlaspa, cheqa cristianosmanta parlasharqa (2 Ped. 2:2). Ñaupa tiempomanta cristianosqa Diosmanta, imachus munaynin kasqanmanta ima cheqa kaj yachachiykunata sonqonkupi japʼikorqanku. Chayrayku qhesacharqanku religionespa llulla yachachiykunasninkuta, costumbresninkuta, cheqa kajmanta qʼewisqata parlasqankuta ima (Col. 2:8). Ajinallatataj kay tiempomanta cheqa cristianospis mayta kallpachakushanchej ‘cheqa kajpi’ purinallanchejpajpuni (3 Juan 3, 4). Imajtinchus Diospa Palabranman jina kausakunchej, chaypitaj creenchej. Jehovaj testigosnenqa mana ninchejchu Bibliaj nisqanta tukuysituntapuni entiendesqanchejta. Wakin kuteqa, Bibliaj wakin yachachiykunasninta sutʼinchaspa chayri Diospa llajtanpi wakin imasta ruwaspa pantaykorqanchej. Chayta reparaspataj, chay rato allinchanku. w21.10 pág. 22 párrs. 11, 12

Ñaupa tiempopi llajtasqa perqawan muyurisqa karqanku chaypi tiyakojkunata enemigosninkumanta jarkʼananpaj. Ajinallatataj Jehová Diospa munakuyninpis uj perqa jina jarkʼawanchej, paymanta ni ima karunchanawanchejpaj. Chantapis Jehová Diosqa munakuyninwan payman kʼaskaykuchiwanchej (Jer. 31:3). Rey Davidqa Jehová Dios jarkʼawasqanchejta waj imaswan kikinchallarqataj. Ajinata qhelqarqa: “Diosmin pakakunayqa, Diosqa mayta munakuwan”, nispa. Chantá nillarqataj: “Dios munakuwan, paymin jarkʼachasqa lugarniy, paymin pakakunay, salvawajniytaj. Paymin jarkʼakuna escudoy, paypi pakakuni”, nispa (Sal. 59:17; 144:2). ¿Imajtintaj David nerqa Diospa munakuynin pakakuna jina kasqanta, jarkʼachasqa lugar jinataj kasqanta? Jehová Diosqa maypi tiyakojtinchejpis payta sirvikojtinchejqa jarkʼawasunpuni, paymanta mana karunchakunanchejpaj. w21.11 pág. 6 párrs. 14, 15

Uj pacha Jesuswan discipulosninwan canoapi viajasharqanku. Jinallapitaj sinchʼi wayra oqharikorqa. Chay kutipi Jesusqa discipulosninman yachacherqa, aswan creeyniyoj kananku kasqanta (Mat. 8:23-26). Yakoqa mayta qhollchoqeyaspa canoaman juntʼaykusharqa. Jesustaj puñusharqa, discipulosnintaj manchariywan rijchʼaricherqanku: “Señor, ¡salvawayku!”, nispa. Jesustaj paykunata nerqa: “Pisi creeyniyoj runas, ¿imaraykutaj kay jinatapuni manchachikunkichejri?”, nispa. Ichá qanpis uj sinchʼi llakiypi kashanki, tiyakunki chaynejpi uj desastre natural kasqanrayku chayri sinchʼi onqosqa kasqaykirayku. Nitaj yachankichu imatachus ruwanaykita. Jinapis Jehová Diospi atienekullaypuni. Jehovaman imaynachus kashasqaykita willakuy. Chantapis imaynatachus ñaupajkunapi Jehová yanapasusqanpi piensariy. Chaytaj creeyniykita astawan kallpachanqa (Sal. 77:11). Jehová Diosqa ni jaykʼaj saqerpasonqachu. w21.11 pág. 22 párrs. 7, 10

Uj runaqa ichá yuyanman chay kamachiyta kasukunanpaj, mana wajkunaj imasninta oqharikunan kasqanta. Jinapis waj imasta ruwaspa suwakushanman. Uj comerciante chayri uj ranqhero runasta engañananpaj mana cabal balanzapi chayri mana cabal midinapi vendespaqa suwakushanña. Levítico 19:13 versículo nin: “Ama runa masiykita chʼaukiyankichu”, nispa. Chayrayku uj ranqheroqa mana maychus kajta ruwaspa suwakushanña. Pusaj kaj kamachiypeqa nerqa mana suwakunata. Jinapis Levítico libro waj imastawan sutʼinchasqanqa, yanapawasunman chay yuyaychayman jina tukuy imata ruwana kasqanta entiendenapaj. Jehová Diosqa suwakuyta, mana maychus kajta ruwaytapis mana allinpajchu qhawan. Chaypi piensareyqa mayta yanapawasunman. Levítico 19:11-13 nisqanman jina, negocionchejpi chayri trabajonchejpi, ¿imaspitaj cambiananchej kanman? w21.12 págs. 9, 10 párrs. 6-8

Orakushaspaqa Jehovaman willarina imaspichus chay día pantasqanchejta, perdontataj mañakuna. Jatun juchapi urmanchej chaytaj, ancianoswan yanapachikuna. Paykunaqa sumajta uyariwasun, Bibliawantaj yuyaychariwasun. Chantapis Jehovamanta mañapuwasun perdonanawanchejta. Jehová Diostaj, Jesuspa wañuyninnejta perdonawasun. Ajinamantataj watejmanta payman qayllaykusun (Sant. 5:14-16). Ichá noqanchejpis, imaynatapunichus Jesús ñakʼarisqanpi piensaspa mayta llakikunchej. Jinapis Jesús noqanchejrayku kausayninta qosqanpi astawan tʼukurispaqa, astawan payta munakusun, jinallataj Jehová Diostapis. Sapa wata Jesuspa Wañuyninta Yuyarinapaj tantakuyman rinchej, wajkunatapis kusiywan wajyarinchej. Chayta ruwaspataj, Jesús noqanchejrayku kausayninta qosqanmanta, astawan agradecekunchej. Jehová Diosqa, Jesusmanta wajkunaman yachachinanchejta saqewanchej. Chaytaj may sumajpuni. w21.04 págs. 18, 19 párrs. 13-16

Uj pacha Jesusqa uj orqopi tukuy tutantin orakorqa. Chayrayku payqa may saykʼusqachá kasharqa. Jinapis Jesús kasharqa chayman ashkha runas rerqanku. ¿Imatataj Jesús ruwarqa saykʼusqa kaspapis paykunata rikuspa? Payqa pobre runasmanta, onqosqasmantapis khuyakorqa. Jinapis payqa mana onqosqasllatachu sanoyacherqa, manaqa chaypi kajkunaman Diospa Palabranmanta sumajta yachacherqa. Chay kutipi yachachisqantataj rejsikun, Jesús Orqopi Yachachisqan sutiwan (Luc. 6:12-20). Jesusqa sapallan kayta necesitaspapis wajkunapaj tiempochakorqapuni. Jesusqa amigon Juan Bautistaj umanta qholurpasqankuta yachaytawan maytachá llakikorqa. Bibliaqa nin: “Jesusqa chayta uyarispa, canoapi chʼinnejman riporqa sapallan kananpaj”, nispa (Mat. 14:10-13). Jinapis ashkha runasqa maymanchus risharqa chayman paymanta ñaupajta chayarqanku (Mar. 6:31-33). Jesusqa sutʼita repararqa, chay runasqa Jehová yanapananta, sonqochananta ima necesitasqankuta. Chayrayku Jesusqa usqhayllata paykunata yanaparqa, sonqocharqataj (Luc. 9:10, 11). w22.02 pág. 21 párrs. 4, 6

¿Imatá ruwasunman ujnin hermanonchejta phiñarpachisqanchejta reparakuspa? Jehová Diosman tukuy sonqo orakuna. Mañakunataj hermanonchejwan allinyakapunapaj yanapanawanchejta. Chantapis tiempochakuna imaynachus kasqanchejpi piensarinapaj. Noqanchej juchayoj kasqanchejta ninapaj, kʼumuykukoj sonqowan perdonta mañakunapaj, allinyakunapaj ima, ¿wakichisqachu kashanchej? Hermanonchejwan chayri hermananchejwan allinyakapunapaj kallpachakojtinchej, ¿imaynataj Jehovawan Jesuswan sientekonqanku? Chaykunapi piensareyqa yanapawasun Jesusta uyarinapaj, kʼumuykukoj sonqowantaj hermanonchejwan allinyakapunapaj. Ujnin hermanonchejwan allinyakunapaj parlaj rispaqa, kʼumuykukoj kananchej tiyan (Efe. 4:2, 3). Chay hermanowan parlarishaspaqa, yanaparina noqanchejwan allinyakuyta munananpaj. Aswan allin hermanonchejwan allinyakapunanchej, pichus juchayoj kasqanta ninamantaqa (1 Cor. 6:7). w21.12 pág. 26 párrs. 13-16  

Jesusqa llakisqa kasharqa. Imaraykuchus yacharqa ashkha judiosqa Diospa Gobiernonmanta willayta mana japʼikunankuta. Chayrayku Jerusalenqa thuñisqa kanan karqa. Mana wañuchisqa kaj judiospis, presos apasqa kananku karqa (Luc. 21:20-24). Jesuspa nisqanman jinapunitaj ashkha judiosqa, Diospa Gobiernonmanta willayta mana japʼikorqankuchu. Tiyakunchej chaynejpi, ¿Diospa Gobiernonmanta willasqanchejta runas uyariyta munallankuchu? Willanapaj tukuy atisqanchejta kallpachakojtinchejpis, ichá pisi runaslla uyariwanchej. Jina kajtin, ¿imatá Jesuspa waqarikusqanmanta yachakusunman? Jehová Diosqa runasta mayta munakusqanta, paykunamantataj llakikusqanta. Payqa “mana munanchu ni pi chinkachisqa kananta. Astawanqa munan tukuy arrepientekunankuta” (2 Ped. 3:9). Noqanchejpis runa masinchejta mayta munakunchej. Chayrayku kallpachakullanchejpuni paykunaman sumaj willaykunata willamunapaj (Mat. 22:39). w22.01 págs. 16, 17 párrs. 10-12

Aswan sinchʼi creeyniyoj kasunchej, Jehová imastachus ñaupa tiempopi llajtanrayku ruwasqanpi, imastatajchus noqanchejrayku ruwasqanpi tʼukurispa. Chantapis astawan Jehovata munakusun. Chaytaj aswan sumaj bendición. Imajtinchus Jehovata munakuspaqa payta kasukusunchej. Munayninman jina tukuy imata ruwasun, llakiykunatapis aguantasun (Mat. 22:37-39; 1 Cor. 13:4, 7; 1 Juan 5:3). Jehová Diosninchejpa amigosnin kayqa may sumajpuni (Sal. 63:1-7). Ama qonqanachu, orakuspa, Bibliata estudiaspa, chaypitaj tʼukurispaqa Jehová Diosta yupaychasqanchejta. Jesús jina Jehovawan sumajta parlarikunapaj uj lugarta maskʼana. Ama tiemponchejta qhasi imaspi usuchinachu. Orakushaspa, sapallanchejpi Bibliata estudiashaspa, reunionespi kashaspa, Jehovamanta yanapata mañakuna ama waj imaspi yuyanapaj. Mana tiemponchejta usuchisunchu chayqa, Jehovaqa paraisopi wiñay kausayta qowasun (Mar. 4:24). w22.01 págs. 30, 31 párrs. 18-20

Imatapis piensasqanchejman jina ruwanchej. Chayrayku Jesusqa yachacherqa jatun juchapi urmachinawanchejpaj jina kaj yuyaykunata qhesachananchej kasqanta (Mat. 5:21, 22, 28, 29). Tatanchej Jehová Diostaqa kusichiyta munanchej. Chayrayku mana allin yuyaykunataqa qhesachananchejpuni tiyan. Jesús nerqa: ‘Simimanta llojsej imasqa sonqomanta llojsimun’, nispa (Mat. 15:18). Arí, parlasqanchejqa sutʼita rikuchin imayna runaschus kasqanchejta. Kay tapuykunapi piensarina: “¿Cheqa kajtapunichu parlani mana allinniypaj kajtinpis? Casado chayrí casada kani chay, ¿allintachu qhawarikuni mana wajkunawan coqueteanaypaj? ¿Khuchichakuy imasmanta ni tumpitallatapis parlanaypaj kallpachakunichu? Pillapis phiñachiwajtin, ¿kʼachallamantachu kutichini?”. Allinpuni kanman chaykunapi piensarinanchej. Mana millay imasta ninapaj, mana llullakunapaj, nitaj khuchichakuy imasmanta parlanapaj kallpachakusun chayqa, ñaupa kausayninchejta cambiayta atillasun. w22.03 pág. 5 párrs. 12-14

Yuyaychayta maskʼajkunaqa, Jehová Diosta yupaychaypi aswan rato ñauparenqanku. Chayrayku pillapis yuyaycharinawanchejta suyakunamantaqa, noqanchej wajkunata nina yuyaycharinawanchejta. ¿Ima kutispitaj hermanosta yuyaycharinawanchejta nisunman? 1) Uj hermana, experienciayoj hermanata nin estudionman acompañananta, tapurintaj allintachus manachus yachachisqanta. 2) Uj soltera hermana pantalonesta rantikuyta munan. Ima pantalonestachus ajllasqantataj, creeypi sinchʼi sayasqa hermanaman rikuchin, tapurintaj allillanchus manachus kasqanta. 3) Uj hermano congregacionninpi discursota qonqa. Payqa unayña discursosta qoj hermanota nin sumajta uyarinanta, chaymantataj yuyaycharinanta. Hermanos ashkha watastaña discursosta qojtinkupis, may allinpuni wajkunawan yuyaycharichikunanku, chayman jinataj ruwananku (Pro. 19:20). w22.02 pág. 13 párrs. 15-17

Jehová Diosqa imaynatachus Jesusta jallpʼapi kashajtin munakorqa, ajinallatataj munakuwanchej (Juan 5:20). Jehová Diosqa Jesusta yanaparqa sinchʼita sayananpaj, llakiykunata aguantananpaj, tukuy ima necesitasqantataj qorqa. Chantapis nerqa munakusqanta, allinpaj qhawasqanta ima (Mat. 3:16, 17). Jesusqa ni jaykʼaj yuyarqachu sapallan kashasqanta. Imajtinchus yacharqa munakuyniyoj Tatan Jehová payta yanapanantapuni. Noqanchejtapis Jehová Diosqa Jesusta jina mayta munakullawanchejtaj. Jehová Diosqa llajtanman pusamuwarqanchej, chaypitaj ashkha hermanosta, hermanasta ima qowanchej. Paykunaqa mayta munakuwanchej, kusisqa kanapaj yanapawanchej, llakisqa kashajtinchejpis sonqochawanchej (Juan 6:44). Sinchʼi sayasqallapuni kanapajtaj ashkha yachachiykunata mikhunata jina qowanchej. Sapa diataj imatachus necesitasqanchejta qowanchej (Mat. 6:31, 32). Jehová Dios maytapuni munakuwasqanchejpi piensarispaqa, astawan payta munakunchej. w21.09 pág. 22 párrs. 8, 9

Niraj Jehovaj testigosninwan Bibliata estudiashajtinchej, ¿imaynataj kausayninchej karqa? Wakenqa ni yuyarikuyllatapis munanchejchu. Ichapis kay mundomanta runas jina karqanchej, kay mundoj yuyayninman jinataj imatapis allinpaj chayrí mana allinpaj qhawarqanchej. Jina kajtenqa ‘mana suyakuyniyoj mana Diosniyojtaj kausarqanchej’ (Efe. 2:12). Bibliata estudiasqanchejman jina yachakorqanchej cielopi uj Tatanchej kasqanta, maytataj munakuwasqanchejta. Yachakullarqanchejtaj Jehovata kusichinapaj, llajtanmantaj yaykunapajqa, kausayninchejta, imatachus yuyasqanchejtapis cambiananchej kasqanta. Chantá yachakullarqanchejtaj Jehovaj kamachiykunasninman jina kausakuna kasqanta (Efe. 5:3-5). Jehová Diosqa Ruwawajninchej Tatanchejtaj. Chayrayku niyta atin, familianmanta kajkuna imaynatachus kausananchejta. Bautizakuyta munajkunamantaj nin: “Ñaupa kausayniykichejta, ñaupa ruwasqasniykichejtapis saqeychej”, nispa. w22.03 pág. 2 párrs. 1-3

Waj ovejasmanta kajkunaqa Jesuspa Wañuyninta Yuyarinapaj tantakuyman rispa kusikunku. Chantapis chay tantakuyman rispa, imatachus suyakushasqankupi piensarinku. Paykunaqa chay tantakuypi discursota uyariyta mayta suyakunku. Chay discursopeqa astawan parlakun Cristowan, 144.000 ajllasqa cristianoswan imastachus Diosta kasukoj runaspaj ruwanankumanta. Chay ajllasqa cristianosqa, Jesús 1.000 watasta kamachimushajtin kay jallpʼata uj paraisoman tukuchiypi yanapakonqanku, runastapis mana pantaj runasman tukunankupaj yanapallanqankutaj. Waj ovejasmanta kajkunaqa, chay tantakuyman rispa Bibliaj profeciasnin juntʼakunanpi tʼukurispa mayta kusikunku. Chay profeciasmanta wakenqa kashanku Isaías 35:5, 6; 65:21-23 chantá Apocalipsis 21:3, 4. Paykunaqa chay tantakuypi piensarinku familiankuwan khuska mosoj jallpʼapiñapis kashankuman jina. Chaytaj paykunata yanapan imatachus suyakushasqankupi sinchʼita creenallankupajpuni, Jehovatataj sirvinallankupajpuni (Mat. 24:13; Gál. 6:9). w22.01 pág. 21 párrs. 5-7

Adanqa juchallikuspa wañuyman vendeykuwarqanchej. Jesustaj kausayninta qospa wañuymanta kacharichiwanchej (1 Cor. 15:22). ¿Imajtintaj Jesús kausayninta runasrayku qonanpuni karqa? Imaraykuchus Diospa cheqan kamachiykunasninman jinaqa, ‘kausaymantaqa kausayllawantaj’ pagakunan karqa (Éxo. 21:23-25). Adanqa juchallikusqanrayku juchasapaman tukorqa. Jesustaj chay juchamanta orqhonawanchejpaj, cheqan kausayninta qorqa. Ajinamantataj Jehovaj cheqan kamachiykunasninman jina ruwarqa (Rom. 5:17). Chayrayku ninchej, Jesusqa paypa wañuyninpi creejkunaj ‘Wiñaypaj Tatanku’ kasqanta (Isa. 9:6; Rom. 3:23, 24). Jesusqa Jehová Diosta, runastapis mayta munakusqanrayku kausayninta qorqa (Juan 14:31; 15:13). Chayraykullataj wañupunankama Tatanta kasukorqa, Tatanpa munaynintapunitaj ruwarqa. Jesús chayta ruwasqanraykutaj, Jehovaqa imatachus runaspaj qallariypi munasqanta juntʼanqa. w21.04 pág. 14 párrs. 2, 3