Abril

Jesusqa munakuwasqanchejrayku kausayninta qorqa (Juan 15:13). Jehovaman Jesusman ima, munakuwasqanchejrayku imastachus ruwasqankumanta ni imawan pagayta atisunmanchu. Jinapis paykunaman agradecekusunman, munayninkuman jina sapa día kausakuspa (Col. 3:15). Ajllasqa cristianosqa, Jesús paykunarayku kausayninta qosqanta may jatunpaj qhawanku. Imajtinchus paykunaqa, Jesús kausayninta qosqanrayku cielopi kausakuyta suyakunku (Mat. 20:28). Paykunataqa Jesuspa wañuyninpi creesqankurayku, Jehová ‘cheqan runaspaj’ qhawan, ‘wawasninpajtaj reconocekapun’ (Rom. 5:1; 8:15-17, 23). Waj ovejasmanta kajkunapis, Jesús juchamanta wañuymantawan kacharichiwasqanchejmanta mayta agradecekunchej. Chantapis Jesús noqanchejrayku yawarninta jichʼasqanpi creesqanchejrayku, Diosqa llimphupaj qhawawanchej. Chayraykullataj suyakushanchej ‘manchay ñakʼariymanta’ llojsiyta (Apo. 7:13-15). Ajllasqa cristianos jinallataj waj ovejasmanta kajkunapis, Jesuspa Wañuyninta Yuyarinapaj tantakuyman sapa wata rinchej. Chaytataj ruwanchej, Jesús noqanchejrayku kausayninta qosqanmanta agradecekusqanchejrayku. w22.01 pág. 23 párrs. 14, 15

Jesusqa qhasimanta juchachasqankumanta astawan llakikorqa. Paytaqa Diospa contranta parlashan nispa juchacharqanku (Mat. 26:64-66). Jesuspa sonqonqa chayta nisqankumanta, maytapuni nanarqa. Chayrayku tatanman nerqa: “Tatáy, atikojtenqa, kay copata noqamanta karunchay”, nispa (Mat. 26:38, 39, 42). Jesusqa kʼaspiman warkhusqa karqa, judiosta uj maldicionmanta kacharichinanpaj (Gál. 3:10). Judiosqa Diospa leyninta kasukunankuta nerqanku. Jinapis mana kasukorqankuchu. Chayraykutaj maldecisqa karqanku. Chantapis paykunaqa Adanmanta juchata japʼisqankurayku, wañunanku karqa (Rom. 5:12). Diospa leynin nerqa, wañuchisqa kananpaj jina juchata ruwaj runaqa, wañuchisqapuni kananta. Wakin kutisqa, wañusqaj cuerponta kʼaspiman clavaykoj kanku, chayri warkhuykoj kanku (Deu. 21:22, 23; 27:26). Judiosqa Jesusta qhesachaspa kʼaspiman clavaykorqanku. Jinapis Jesuspa wañuynenqa, paykunallatataj maldecisqa kasqankumanta, wañuymanta ima kacharicherqa. w21.04 pág. 16 párrs. 5, 6

Piensarina Jesusta wañucherqanku chay día imaschus kasqanpi. Paytaqa romano soldados presochaytawan mana khuyarispa maqarqanku (Mat. 26:52-54; Juan 18:3; 19:1). Soldadosqa, Jesusta seqʼospa aychasninta phatacherqanku. Chaymantataj llasa kʼaspita qʼepiriykuchispa, wañuchinanku karqa chayman pusasharqanku. Manaña qʼepiyta atejtintaj, waj runawan chay kʼaspita munajta mana munajta apacherqanku (Mat. 27:32). Wañuchinanku karqa chay lugarman chayachispataj, soldadosqa Jesusta chakisninmanta, makisninmantawan kʼaspiman clavaykorqanku. Clavasqa kashajtenqa, cuerponpa pesollantaj astawanrajchá heridasninta kicharerqa. Mamanwan amigosninwanqa, payta rikuspa mayta waqarqanku. Jinapis judiosta kamachejkunaqa, paymanta burlakorqanku (Luc. 23:32-38; Juan 19:25). Jesusqa kʼaspipi clavasqa unayta sufrerqa. Chayrayku niña kallpan karqachu, nitaj samaytapis aterqachu. Jesusqa yacharqa Tatanta tukuy imapi kasusqanta. Chayrayku niraj wañupushaspa orakorqa, umanta liwiykuspataj wañuporqa (Mar. 15:37; Luc. 23:46; Juan 10:18; 19:30). Jesustaqa maytapuni ñakʼaricherqanku, kʼumuykachacherqanku, sufrichispataj wañucherqanku. w21.04 pág. 16 párr. 4

Jesusqa 11 apostolesninwan uj ‘mosoj tratomanta’, ‘uj Gobiernopaj tratomantawan’ parlarqa (Luc. 22:20, 28-30). Jesús chay iskay tratosta ruwasqanrayku, apostolesnin, ajllasqa cristianospis cielopi “reyestaj sacerdotestaj” kanqanku (Apo. 5:10; 14:1). Kay jallpʼallapiraj kausashaj ajllasqa cristianosqa chay iskay tratosllapitaj kanku, chayrayku Jesuspa Wañuyninta Yuyarinapaj tantakuypi tʼantata mikhuyta atinku, vinotapis ujyayta atinku. Jehovaqa paykunaman qonqa mana ismoj cuerpota, ni jaykʼaj wañoj cuerpota. Paykunaqa Jesuswan khuska, cielopiña kaj ajllasqa cristianoswan khuska, Jehovaj ñaupaqenpi sirvenqanku (1 Cor. 15:51-53; 1 Juan 3:2). Ajllasqa cristianosqa yachanku Jehovata wañupunankukama mana wasanchaspa sirvinanku kasqanta (2 Tim. 4:7, 8). w22.01 pág. 21 párrs. 4, 5

Jesús kʼaspipi clavasqa kashajtin paywan khuska iskay suwa runas clavasqa kasharqanku (Luc. 23:40, 41). Ujnintaj Jesusta nerqa: “Jesús Gobiernoykiman yaykuspa, noqamanta yuyarikunki ari”, nispa (Luc. 23:42). Jesusqa yacharqa Tatan may khuyakuyniyoj kasqanta, chay runatataj kausarichimunanta (Sal. 103:8; Heb. 1:3). Juchasninchejmanta arrepientekojtinchej, Jesuspa wañusqanpitaj creejtinchej Jehová Diosqa perdonawanchej, khuyakuwanchejtaj (1 Juan 1:7). Jinapis wakenqa ichá yuyasunman, Jehová ni jaykʼaj perdonanawanchejta. Wakin kutis ajinata yuyanchej chay, piensarisunman imatachus Jesús niraj wañupushaspa, paypi creej suwa runaman nisqanpi. Jehová Diosqa noqanchejta astawanraj khuyakuwanchej. Imaraykuchus payta tukuy sonqo sirvinchej (Sal. 51:1; 1 Juan 2:1, 2). w21.04 pág. 9 párrs. 5, 6

Jesusqa wañupunan horakama, Jehová Diospa munayninta kay jallpʼapi ruwarqa. ¿Imastá rikucherqa chay ruwasqanwan? Ñaupaj kaj, Jesusqa Satanás llulla kasqanta rikucherqa. Jesusqa Satanás payman mayta churanakojtinpis, manapuni Jehová Diosta wasancharqachu. Ajinamantataj sutʼita rikucherqa, uj mana pantaj runa Jehová Diosta tukuy imapi kasukuyta atisqanta. Iskay kaj, Jesusqa noqanchejrayku kausayninta qosqanta rikucherqa. Chayraykutaj juchasapa runas kaspapis, Jehová Diospa ñaupaqenpi allinpaj qhawasqa kayta atinchej, wiñay kausaytapis japʼiyta atinchej. Kinsa kaj, Jesusqa Jehová Dioslla cheqan Kamachej kasqanta rikucherqa, sutintapis jatuncharqa. Jehová Diosta tukuy atisqanchejta sirvisun chayqa, creeyninchejrayku wañuy patapi kaspapis, kayta niyta atisun: “Jehová Diosníy, mayta kallpachakorqani qanta tukuy sonqo sirvisunaypaj, Satanás llulla kasqanta rikuchinaypaj, sutiykita jatunchanaypaj, qanlla sumaj Kamachej kasqaykitataj rikuchinaypaj”, nispa. w21.04 pág. 12 párrs. 13, 14

Jesustaqa qhasimanta tumparqanku, mana juchayojllata juzgarqanku, burlakorqanku ima. Chantapis ñakʼaricherqanku, chakisninta, makisnintapis kʼaspiman chayri posteman clavaykorqanku. Chayrayku sapa samajtin, parlajtin maytachá heridasnin nanarqa. Jinapis payqa wakin imasta parlananpaj mayta kallpachakorqa. Jesús niraj wañupushaspa imastachus nisqanmanta, ¿imastataj yachakunchej? Wajkunata perdonana kasqanta, Jehová Dios perdonanawanchejpitaj atienekuna kasqanta. Yachakullanchejtaj Jehovaj llajtanpeqa ashkha familiayoj kasqanchejta, paykunataj mayta yanapayta munawasqanchejta. Jinapis chaypajqa noqanchej yanapata mañakuna tiyan. Chantá yachakullanchejtaj, ima llakiypi kajtinchejpis Jehová yanapanawanchejtapuni. Sapa día Jehová Diosta tukuy sonqo sirvinapaj kallpachakuna. Chayta ruwajtinchej, wañupojtinchejpis Jehová Diosqa kausarichimuwasunpuni. w21.04 pág. 8 párr. 1; pág. 13 párr. 17

Jesuspa purisqanta qhatisun chayqa, wiñay kausayta japʼisun. Uj pacha uj qhapaj joven, Jesusman nerqa: ‘¿Imatataj ruwanay tiyan wiñay kausayta japʼinaypajri?’, nispa. Jesustaj payman nerqa: “Qhepayta jamuy”, nispa (Mat. 19:16-21). Jesús Cristopuni kasqanta mana creerqankuchu chay judiosmanpis nerqa: ‘Noqaj ovejasneyqa qhepayta jamunku. Noqataj paykunaman wiñay kausayta qoni’, nispa (Juan 10:24-29). Noqanchejpis Jesuspi creesqanchejta rikuchisunman, paymanta yachakusqanchejman jina kausakuspa. Ajinamantataj wiñay kausayman pusaj ñanpi purillasunpuni (Mat. 7:14). ¿Imatataj ruwananchej tiyan Jesuspa purisqanta qhatinapaj? Payta sumajta rejsinanchej tiyan. Payta rejsiytaqa mana tukusunmanchu. Yachakunallanchejpuni tiyan imaynachus kasqanmanta, imatachus yuyasqanmanta, kamachiykunasninmanta ima. May unayña testigo kaspapis Jehovamanta, Wawan Jesusmantawan yachakunallanchejpuni tiyan. w21.04 pág. 4 párrs. 9, 10

Pabloqa niraj cristiano kashaspa imastachus ruwasqanmanta, wakin kutis maytachá llakikoj. Pay nerqa: ‘Juchasapasmantaqa noqa aswan juchasaparaj kani’, nispa (1 Tim. 1:15). Pabloqa niraj cristianoman tukushaspa, cristianosta ashkha llajtaspi qhatiykacharqa. Payqa wakin cristianosta carcelman wisqʼaracherqa, wakinta wañuchisqankutapis allinpaj qhawarqa (Hech. 26:10, 11). Pabloqa cristianoña kaspa, ichapis rejserqa wañuchicherqa chay cristianospa wawasninkuta. Chayrayku imastachus ñaupajpi ruwasqasninmanta maytachá llakikorqa. Jinapis niña imatapis ruwayta aterqachu. Astawanpis Jesús payrayku wañusqanmanta mana iskayrayananpaj kallpachakorqa. Chayrayku nerqa: “Diospa jatun khuyakuyninrayku apóstol kani”, nispa (1 Cor. 15:3, 10). ¿Imatá yachakunchej? Cristo sapa ujninchejrayku wañusqanmanta mana iskayrayanata, paypa wañuyninnejtataj Jehovaman qayllaykuyta atisqanchejta (Hech. 3:19). Jehovaqa mana ñaupa juchasninchejtachu qhawan. Payqa qhawan imatachus kunan ruwashasqanchejta, chayri imatachus aswan qhepaman ruwasun chayta (Isa. 1:18). w21.04 pág. 23 párr. 11

Jesuspa tiemponmanta ashkha judiosqa, mana yuyallarqankupischu Mesías wañuchisqapuni kanan kasqanta. Jinapis profeciaqa nerqaña: ‘Pay kikin wañuyman jaywaykukorqa. Payqa juchasapaswan khuska yupasqa karqa. Payqa tukuypa juchasninkuta aparqa, Diosmantataj chay juchasapaspaj mañaporqa’, nispa (Isa. 53:12). Chayrayku judiosqa mana Jesusmanta karunchakunankuchu karqa, Jesusta qhasimanta juchachajtinkupis, kʼaspipi wañuchejtinkupis. Imaraykuchus profeciasqa, chayta nerqaña. Chay profeciasta estudiaspaqa mana imapis pantachiwasunchu. Qhawarina imatachus Jesús nisqanta. Payqa orqopi yachachishaspa discipulosninman nerqa, runas llullakuspa imaymana sajrata contrankupi parlanankuta (Mat. 5:11). Chay llulleriosqa Satanasmanta jamun. Payqa noqanchejman churanakoj runasta tanqan, contranchejpi imaymana sajrata parlanankupaj (Apo. 12:9, 10). Enemigosninchej llulla imasta contranchejpi parlasqankutaqa, mana uyarinanchejchu tiyan. Manallataj saqenachu tiyan, chay llulla imasta parlasqanku manchachinawanchejta chayri creeyninchejta pisiyachinanta. w21.05 pág. 12 párrs. 14, 16

Estudionchejta yanapana Jehovapi confiananpaj. Jesusqa yachachisqasninman nerqa, Jehová paykunata munakusqanta, yanapanantataj (Mat. 10:19, 20, 29, 30). Estudionchejman nina paytapis Jehová yanapanallantataj. Chantapis payta yanaparina Jehová Diospi confiananpaj. Chaypajtaj paywan khuska orakushaspa, Jehovamanta mañapusunman imapichá kallpachakushan chaypi yanaparinanta. Hermanonchej Franciszekmanta parlarina. Payqa Polonia suyupi tiyakun, nintaj: “Bibliamanta yachachiwaj hermanoqa noqawan khuska orakushaspa, imapichá kallpachakusharqani, chaypi Dios yanaparinawanpaj mañapuwaj. Jehovaqa payta uyarerqa, chayrayku noqapis mañakuyta qallarerqani. Jehovaqa noqatapis uyarillawarqataj. Imajtinchus reunionesman, asambleaman ima rinaypaj mosoj trabajoypi permisota mañakojtiy, qollawarqanku”, nispa. Jehovaqa mayta munakun Bibliamanta yachakojkunata. Chantapis payqa, allinpaj qhawan paymanta runasman yachachinapaj kallpachakusqanchejta. Chayraykutaj mayta munakuwanchej (Isa. 52:7). Jinapis ni piman Bibliamanta yachachishanchejchu chayqa, waj hermanosta estudiosninkuman acompañasunman. Ajinamanta estudiosta yanapasunman bautismoman chayanankupaj. w21.06 pág. 7 párrs. 17, 18

Diospa Palabran kapuwasqanchejmanta may agradecesqas kasqanchejta rikuchisunman sapa día leerispa. Mana allinchu kanman tiemponchej kajtillan sapallanchejpi Bibliata estudiananchej. Bibliata estudianapaj uj horario kapuwajtinchejqa, creeyninchej sinchʼillapuni kanqa. Noqanchejpa creeyninchejqa Diospa Palabranpi sinchʼi sayachisqa kashan, manataj kay mundomanta ‘yachayniyojkunajta, yuyaysapaspata’ jinachu (Mat. 11:25, 26). Bibliata estudiasqanchejrayku yachanchej imaraykuchus kay mundo aswan mana allinman tukushasqanta, imatachus Jehová ruwanantapis. Chayrayku creeyninchejta kallpachanallapuni, tukuy laya runastataj yanapana Diospi creenankupaj (1 Tim. 2:3, 4). Kusiywantaj suyakunallapuni jallpʼapi tukuy kausakojkuna Jehovata jatunchananku pʼunchay chayamunanta. Chaypachamá tukuyninchej nisun: ‘Atiyniyoj Jehová Diosniyku, qanllamin jatunchanapaj jina kanki, imaraykuchus qanmin tukuy imata ruwarqanki’, nispa (Apo. 4:11). w21.08 pág. 19 párrs. 18-20

Ancianosqa congregacionpi michejkuna kanku. Chayrayku hermanosta yuyaycharinankupaj kallpachakunanku tiyan. Jinapis yanaparinapaj jina, kallpacharinapaj jinataj yuyaycharinanku tiyan. Imaraykuchus ajinata yuyaychareyqa, wajkunaj ‘sonqonkuta kusirichin’ (Pro. 27:9). Ancianosqa hermanosta munakunku. Chayrayku paykunaqa mayqen hermanollapis wistʼuykushajtin, payta munakusqankurayku yuyaycharinku (Gál. 6:1). Uj anciano pillatapis yuyaycharinan kajtenqa, allin kanman imatachus apóstol Pabloj nisqanpi piensarinan. Pay nerqa: ‘Munakuyniyoj runaqa pacienciayoj, kʼachataj. Tukuy imata aguantan, tukuy imata creen, tukuy imata suyan, tukuy imapi sinchʼita sayan’, nispa (1 Cor 13:4, 7). Uj anciano niraj pitapis yuyaycharishaspa chay versiculospi tʼukurenqa chayqa, munakuywan, kʼachallamantataj yuyaycharenqa. Uj hermano chayrí uj hermana, anciano payta munakusqanrayku yuyaycharisqanta reparanqa chayqa, yuyaycharisqanta japʼikuyta atillanqa. w22.02 pág. 14 párr. 3; pág. 15 párr. 5

Jehovaqa angelesta, runasta ima mana pantayniyojta ruwarqa. Jinapis uj sajra ángel, Jehovaj contranpi oqharikorqa. Paytaqa Satanás sutiwan rejsikun. (Satanasqa niyta munan “Churanakoj”). Paytaj Adantawan Evatawan cheqan runas kajtinkupis, Diospa contranpi oqharikunankupaj tanqarqa. Aswan qhepamantaj waj ángeles, waj runaspis Diospa contranpi oqharikullarqankutaj (Jud. 6). Ajinamanta Jehovata wasancharqanku. Jinapis payqa aguantarqa, aguantallanqapunitaj payman churanakojkunata tukuchinankama. Chayta Jehová ruwasqanmanta, paywan khuska kay sajra mundopi aguantaj kamachisnenqa, mayta kusikusun. Satanasqa Jobmanta, Diospa waj kamachisninmantapis nerqa, Dios tukuy imata paykunaman qosqanraykulla sirvisqankuta (Job 1:8-11; 2:3-5). Kuraj Supayqa kunankamapis ajinallatapuni Diospa kamachisninmanta nin (Apo. 12:10). Satanás llulla kasqantaqa rikuchisunman llakiykunata aguantaspa, Jehovata munakusqanchejrayku kasukuspa ima. w21.07 pág. 9 párrs. 7, 8

Apóstol Pabloqa cambiananchejpuni kasqanta entiendechinawanchejpaj nerqa, ñaupa kausayninchejta rakhu kʼaspiman clavaykunanchejta (Rom. 6:6). Jesusqa Jehová Diosta kusichiyta munasqanrayku saqerqa rakhu kʼaspiman clavanankuta. Noqanchejpis Jehovata kusichiyta munasqanchejrayku sajra ruwaykunata, costumbresta ima saqepuna tiyan. Imajtinchus Jehovaqa chay imasta chejnikun. Chayta ruwaspalla llimphu sonqoyoj kasun, wiñay kausaytapis japʼiyta atisun (Juan 17:3; 1 Ped. 3:21). Jehovaqa mana noqanchejrayku kamachiykunasninta cambianqachu. Astawanpis noqanchej cambiananchej tiyan paypa kamachiykunasninman jina kausakunapaj (Isa. 1:17, 18; 55:9). Bautizasqaña kaspapis, sajra munayninchejwan mana atipachikunapaj kallpachakunallanchejpuni tiyan. Jehovamanta yanapata mañakuna, espíritu santonwan yanapanawanchejpi atienekuna, amataj kallpallanchejpeqa (Gál. 5:22; Fili. 4:6). Ñaupa kausayninchejta saqepunapaj, niñataj chayman jina ujtawan ruwanapajqa, mayta kallpachakunanchej tiyan. w22.03 pág. 6 párrs. 15-17

Jehová Diosqa Gobiernonta ñaupajta maskʼajtinchej, cheqan kamachiykunasnintataj tukuy sonqo kasukojtinchej, mikhunata, ropata, wasita ima mana faltachiwasunchu (Mat. 6:33). ¿Imaraykutaj mana suyanchejchu kay mundopi kaj imas jarkʼanawanchejta, kusichinawanchejtataj? Imaraykuchus yachanchej Jehová Diospa munayninta ruwaspalla sonqo juntʼasqa kananchejta (Fili. 4:6, 7). Ichapis ashkha imasta rantinapaj qolqenchej kapuwanchej. Jinapis chay rantisqanchejta apaykachanapaj, allinchanapajtaj, ¿tiemponchej, kallpanchejpis kanqachu? ¿Kapuwasqanchej imasllapichu anchata yuyashanchej? Jehovaqa munan llajtanpi tukuy atisqanchejta yanapakunanchejta. Chayrayku ama waj imaswan musphaykachanachu. Ni imarayku munasunmanchu Jesuspa wajyarisqanta qhesachaj joven jina kayta. Chay jovenqa Jehová Diosta yupaychayta, aswan qhepaman ujnin wawan kayta ima qhesacharqa, kapuynillanta astawan munakusqanrayku (Mar. 10:17-22). w21.08 pág. 6 párr. 17

Bibliata estudiaspaqa reparanchej Jehová may kʼachapuni kasqanta, ruwasqasninta qhawarispapis chayllatataj reparanchej. Chayta yachaytaj yanapawanchej Jehová Dios kasqantapuni creenapaj (Éxo. 34:6, 7; Sal. 145:8, 9). Astawan Jehová Diosta rejsispaqa astawan paypi creesun, astawan munakusun, sumaj amigosnintaj kasun. Diospi creesqanchejmanta wajkunawan parlarina. Predicashajtinchej pillapis Diospi mana creesqanta niwajtinchejrí, ¿imatá ruwasunman? Mana kutichiyta atispaqa publicacionesninchejpi maskʼasunman imatachus chaymanta nisqanta. Maskʼaytawantaj chayman jina chay runawan parlarisunman. Chantá uj experienciayoj hermanowan yanapachikullasunmantaj. Chay runa Bibliaj nisqanta creejtinpis manapis estudiasqanchejqa, creeyninchejta astawan kallpachanapaj yanapawasun. w21.08 pág. 18 párrs. 14, 15  

Jehovata kusichinapajqa mana tukuy imasninchejtapunichu saqepunanchej tiyan (Ecl. 5:19, 20). Jinapis wakin imasninchejta mana saqeyta munasqanchejraykulla Jehová Diosta astawan sirvinapaj mana kallpachakusunmanchu chayqa, Jesuspa kikinchayninmanta qhapaj runa jina pantasunman. Payqa allinta kausakunanrayku Jehová Diosmanta ni yuyarikullarqapischu (Luc. 12:16-21). Llakiypi kashaspaqa Jehová Diosman orakunchej, imaynatachus chay llakiyninchejta atipanapajpis sumajta yuyaychakunchej (Pro. 3:21). Jehová Diosqa imaymanamanta bendeciwanchej. Chaymanta agradecekusqanchejtataj rikuchisunman payta jatunchanapaj tukuy atisqanchejta ruwaspa (Heb. 13:15). Ichapis Jehovata sirvinapaj waj imastawan ruwasunman. Ajinamanta Jehová astawan bendeciwasun. Chayrayku sapa día kallpachakuna imaynallamantapis Jehová kʼacha kasqanta reparanapaj (Sal. 34:8). Ajinamantataj Jesús jina kayta nisun: “Mikhunayqa kachamuwajniypa munayninta ruwanay, kamachiwasqantataj tukuchanay”, nispa (Juan 4:34). w21.08 págs. 30, 31 párrs. 16-19

Satanasqa mayta munan jatunchakunanchejta. Payqa yachan jatunchakuspa pay jina kananchejta, wañunanchejtataj. Chayrayku apóstol Pablo nerqa, jatunchakojqa Satanás jina juchachasqa kananta (1 Tim. 3:6, 7). Chaypitaj tukuy cristianos rikukusunman Jehovata unaytaña chayri kunallanraj sirvishaspapis. Jatunchakoj runaqa payllapi astawan yuyan chayri allinnillanta maskʼan. Satanasqa noqallanchejpi astawan yuyananchejta munan, astawanraj llakiykunapi chayri problemaspi kajtinchej. Ichá pillapis qhasimanta juchachawarqanchej chayri sufrichiwarqanchej. Satanasqa mayta kusikunman ajinapi rikukuspa Jehovata chayri hermanosninchejta juchachajtinchej. Chantapis mayta munan, problemasninchejta munayninchejman jinalla allinchananchejta, nitaj munanchu Jehová Palabranpi yuyaychasqanman jina allinchananchejta (Ecl. 7:16, 20). w21.06 pág. 15 párrs. 4, 5

Judiosqa 537 watapi Jesús niraj jamushajtin Babiloniapi presos kasqankumanta Jerusalenman kutiporqanku. Hageoqa ichapis paykunamanta ujnin karqa. Jerusalenman chayaytawantaj paykunaqa Diospa templonta watejmanta ruwayta qallarerqanku (Esd. 3:8, 10). Pisi tiemponmantaj chay jallpʼapi tiyakoj runasqa, judiosman churanakorqanku, judiostaj iskayrayarqanku, templotataj khuskan ruwasqata saqerparqanku (Esd. 4:4; Hag. 1:1, 2). Chayrayku Jehovaqa 520 watapi Hageoman nerqa judiosta yanapananta kusisqallapuni kanankupaj, templota tukuchanankupajtaj kallpachananta (Esd. 6:14, 15). Hageoqa judiosta kallpachanan karqa Jehovapi astawan atienekunankupaj. Paykunaqa sumaj kallpachasqaschá kasharqanku Jehová cielopi ashkha angelesniyoj kasqanta, paykunatataj kamachisqanta yachaspa. Chayrayku judiosqa templota tukuchanankupaj, Jehovapi atienekunanku karqa. w21.09 págs. 14, 15 párrs. 4, 5

Kay tiempopipis mundontinmanta Jehovaj testigosnenqa mayta munanakunchej, ujchasqastaj kausakunchej. Waj religionesmanta nisqaqa uj familia jinapuni kanchej waj suyusmanta, waj culturasmanta kaspapis. Purajmanta munanakusqanchejqa sutʼi rikukun reunionesninchejpi, asambleasninchejpi ima. Chaytaj sutʼita reparachiwanchej noqallanchej Jehová munasqanman jina payta yupaychasqanchejta (Juan 13:34). Biblia nin: ‘Purajmanta mayta munanakuychej’, nispa (1 Ped. 4:8). Chaytaqa ruwanchej imapi pantaspapis purajmanta perdonanakuspa, aguantanakuspa ima. Chantapis kallpachakunchej tukuy hermanosninchejwan, pikunachus sonqonchejta nanachiwanchej chaykunawanpis, kʼachas kanapaj, wajyarikunapaj ima (Col. 3:12-14). Ajinamanta sutʼita rikuchinchej cheqa cristianospuni kasqanchejta. w21.10 págs. 22, 23 párrs. 13, 14

Juchallikojqa qharqosqa kaspa cambiayta atinman, pesachikunmantaj. Chantapis jatun juchapi urmajkunaqa congregacionmanta qharqochikuspa repararqanku, mana qhasimantachu qharqochikusqankuta. Chayta reparakuspataj juchankumanta pesachikorqanku, cambiarqanku, Jehovamantaj kutinporqanku (Heb. 12:5, 6). Ovejasta michej runapi piensarina. Payqa reparanman ujnin ovejitanta onqoy japʼisqanta. Chayrayku chay ovejitantaqa tropamanta tʼaqanman. Chay onqosqa ovejanta tropawan khuska kananta saqenman chayqa, tukuy ovejasnin chay onqoywan chimpaykuchikunkuman. Chayrayku chay ovejata tʼaqaspaqa, michejqa tukuynin tropata jarkʼan mana onqoywan chimpaykuchikunankupaj. Yachanchej jina, ovejasqa tropamanta tʼaqasqa kaspa sinchʼita waqanku, nitaj sapallanku kakuyta atinkuchu. Chaywanpis michejqa, mana sajra kasqanraykuchu onqosqa ovejitanta tropanmanta tʼaqan. w21.10 pág. 10 párrs. 9, 10

Mayta kusikunchej mundontinmanta tukuy hermanos mayta munanakusqanchejmanta. Maytataj munanchej noqanchejwan khuska may chhika runas Diosta yupaychanankuta. Chayrayku tukuy atisqanchejta kallpachakunchej Jehová Diospa sutinta mana chʼichichanapaj chayri llajtanta mana pisipaj qhawachinapaj. Maytataj kallpachakunchej allinta kausakunanchejpaj. Ajinamanta waj runaspis Diosmanta yachakuyta munanankupaj. Wakin runasqa chejnikuwasun chayri qhatiykachawasun Tatanchej Jehovata kasukusqanchejrayku. Runaswan Diosmanta parlariyta manchachikojtinchejqa, Jehovawan Jesuswan yanapawasun. Chayta amapuni qonqanachu. Jesusqa discipulosninman nerqa ama llakikunankuta imaynatachus parlanankumanta chayri imatachus ninankumanta. Payqa paykunaman ajinata sutʼincharqa: “Chay ratopacha Dios yuyaychasonqachej imatachus parlanaykichejta. Mana qankunallachu parlankichej, manachayqa Tataykichej atiyninwan yanapasonqachej parlanaykichejpaj”, nispa (Mat. 10:19, 20). w21.09 pág. 24 párrs. 17, 18

Moisesqa chayman rijchʼakojllatataj nerqa (Sal. 90:1). Wañupunan qayllatataj kʼachituta kikinchaspa, ajinata nerqa: “Diosqa unay watasmantapacha pakakunayki. Payqa wiñay makisninwan japʼishasunki”, nispa (Deu. 33:27). “Wiñay makisninwan” japʼiwasqanchej, ¿imatá Jehová Diosmanta yachachiwanchej? Jehovapi pakakojtinchejqa may jarkʼasqa sientekunchej. Jinapis wakin diasqa may llakisqas, sonqo pʼakisqastaj kasunman. Chay kutispi, ¿imaynatá Jehová yanapawanchej? (Sal. 136:23). Jehovaqa mayta sonqochawanchej, makinwanpis kʼachamanta sayarichiwasunman jina (Sal. 28:9; 94:18). Jehová Dios yanapawasqanchejtapuni yachayqa, kay iskay bendicionesta yuyarikunapaj yanapawasunchej. Ñaupa kaj, maypi tiyakojtinchejpis yachanchej Jehovaqa jarkʼanawanchejtapuni. Iskay kaj, Tatanchej Jehová Diospajqa may munasqas kanchej. w21.11 pág. 6 párrs. 15, 16

Jesusqa yacharqa discipulosnin qhasimanta ñakʼarichisqa kajtinku, creeyninku pisiyananta. Paykunata yanapananpajtaj uj kikinchaymanta parlarqa. Chaytaj Lucas libropi kashan. Jesusqa nerqa, uj viuda kutin kutita mana uyariyta munaj juezpaman rispa justiciata mañakusqanta. Chay viudaqa yacharqa mañakullajtinpuni chay juez uyarinanta. Ajinapunitaj karqa. Chay kikinchaymanta yachakunchej Jehová Diosqa cheqan kajtapuni ruwasqanta. Chayrayku Jesús nerqa: “¿Manachu Diosqa ajllasqasninpaj justiciata ruwaponqa tuta pʼunchay paymanta mañakojtinku?”, nispa (Luc. 18:1-8). Pay nillarqapuni: “Chaywanpis noqa jamojtiy, ¿tarisajchu kay jallpʼapi chay jina creeyniyoj runasta?”, nispa. Runas qhasimanta sufrichiwajtinchejqa chay viuda jina pacienciakuna, amataj saykʼunachu. Ajinamanta sinchʼi creeyniyoj kasqanchejta rikuchisun. Chaytaj yanapawasun Jehová yanapanawanchejpipuni atienekunapaj. Nitaj iskayrayasunchu mañakusqanchejta uyarinawanchejmanta. w21.11 pág. 23 párr. 12; pág. 24 párr. 14

Joven, wakin kutisqa ichá yuyanki Jehová Diospa kamachiykunasnenqa, mana munasqayki imasta ruwajta saqesusqanta. Satanasqa chaytapuni yuyanaykita munashan. Payqa munan jatun ñanta rejkunaj ruwasqasninkuta qhawanaykita, chaypi kaspa kusisqa kasqankuta yuyanaykitataj. Satanasqa mayta yuyanaykita munan mana colegioykimanta compañerosniyki jinachu, nitaj Internetpi rikusqayki runas jinachu kusikushasqaykita. Satanasqa munallantaj yuyanaykita Jehová Diospa kamachiykunasnenqa mana kusikojta saqesusqanta. Satanasqa mana munanchu reparanaykita jatun ñanta rispaqa wañuyman chayanaykita (Mat. 7:13, 14). Jehovatajrí sutʼita willawanchej kausayman pusaj kʼullku ñanllatapuni rejtinchejqa, wiñay kausayta japʼinanchejta (Sal. 37:29; Isa. 35:5, 6; 65:21-23). w21.12 pág. 23 párrs. 6, 7

Yachanchej perdonananchejpuni kasqanta. Jinapis wakin kuteqa perdonayta mana atillanchejchu. Apóstol Pedropis wakin kutis nisina perdonayta atillarqachu (Mat. 18:21, 22). Kinsa imas yanapawasunman perdonayta yachanapaj. Ñaupaj kaj, tʼukurina mashkha kutistachus Jehová perdonawasqanchejpi (Mat. 18:32, 33). Jehovaqa sapa kuti perdonawanchej mana perdonanapaj jina kajtinchejpis (Sal. 103:8-10). Chantapis purajmanta munanakunallanchejtaj tiyan. Chayrayku ama yuyanachu, munaspalla hermanosninchejta perdonananchej kasqanta, manaqa perdonananchejpuni tiyan (1 Juan 4:11). Iskay kaj, perdonaspaqa, sonqonchejta nanachiwarqanchej chay hermanota yanapanchej, congregacionpi ujchasqa kanchej, Jehovawan allinpi kanchej, kusisqataj kanchej (2 Cor. 2:7; Col. 3:14). Kinsa kaj, Jehová Diosqa kamachiwanchej wajkunata perdonanata, chayrayku paymanta yanapata mañakuna. Ama saqenachu Satanás hermanospurata phiñanachinawanchejta (Efe. 4:26, 27). Mana Satanaspa trampanpi urmanapajqa, Jehovaj yanapantapuni necesitanchej. w21.06 pág. 22 párr. 11; pág. 23 párr. 14

Israelmanta atiyniyoj rey Saulqa Davidta wañuchiytapuni munarqa. Chayrayku Davidqa ayqekorqa. Payqa ni ima mikhunanpaj kapusqanrayku Nob llajtaman rerqa. Chaypitaj phishqa tʼantasta Ahimelecmanta mañakorqa (1 Sam. 21:1, 3). Chaymanta ripuytawantaj, Davidwan paywan kasharqanku chay runaswanqa uj cuevapi pakakamorqanku (1 Sam. 22:1). ¿Imajtintaj Davidta Saúl wañuchiyta munarqa? Davidqa may rejsisqa runaman tukorqa, ashkha guerraspitaj atiparqa. Chayraykutaj rey Saulqa Davidmanta mayta envidiakorqa. Chantapis Saulqa yacharqa, mana kasukusqanrayku Jehová Diosqa paypa cuentanmanta Davidta Israelpi rey kananpaj ajllasqanta (1 Sam. 23:16, 17). Jinapis Saulqa Israelpi reyllapuni kasqanrayku, ashkha soldadosniyoj karqa, ashkha runastaj payman kutisqa karqanku. Chayrayku Davidqa Saulmanta ayqeykachakorqa. Jehovaqa nerqaña David rey kananta. Jinapis Saúl, ¿yuyanmanchu karqa Jehovaj nisqanman churanakuyta atisqanta? (Isa. 55:11). Bibliaqa mana imatapis willanchu. Jinapis payqa Jehovaj contrallanpi oqharikusharqa. Jehová Diospa contranpi oqharikojkunatajrí mana allinpipuni tukunku. w22.01 pág. 2 párrs. 1, 2

Jesusqa mayta kallpachakorqa Diosmanta runasman willananpaj. Payqa runasta munakusqanrayku, ima ratollapis Diosmanta yachachejpuni (Luc. 19:47, 48). Jesusqa chayta ruwaj runasta khuyakusqanrayku. Wakin kutisqa yachachisqanta ashkhas uyariyta munasqankurayku, “Jesuswan discipulosninwanqa mana mikhuyllatapis aterqankuchu” (Mar. 3:20). Chantapis uj runa chʼisinpi Jesuswan parlaj rejtin, Jesusqa paywan parlarillarqa. Jesuspa willayninta uyarejkunamanta ashkhasqa, mana discipulosninman tukorqankuchu. Jinapis imastachus Jesús willasqanta yacharqankuña. Noqanchejpis munanchej tukuy runas sumaj willaykunata uyarinankuta (Hech. 10:42). Chaypajtaj mana yachasqa kasqanchejman jinallachu predicananchej tiyan. Atisqanchej horasllapi predicanamantaqa, ima horaschá runasta tariyta atinchej chay horaspi predicana. Chayta ruwajtinchejqa Jehová maytapuni kusikonqa. w22.01 pág. 17 párrs. 13, 14

Kay tiempopi runasqa, mana autoridadespi confiayta atillankuchu. Ashkha runasqa reparanku gobiernos, leyespis qhapaj runasllata, atiyniyojkunallata astawan yanapasqanta, manataj pobrestaqa. Chantapis iglesiasta kamachejkunamanta wakenqa, millay imasta ruwanku. Jinapi wakin runasqa manaña Diospi atienekunkuchu. Chayrayku estudiosninchejtaqa yanapananchej tiyan Jehová Diospi, llajtanta ñaupajman apajkunapipis atienekunankupaj. Mana estudiosnillanchejchu Jehovapi, llajtanta ñaupajman apajkunapipis atienekunanku tiyan. Ashkha watasña testigos kaspapis, Jehová cheqan kajtapuni ruwasqanpi atienekunallanchejpuni tiyan. Wakin kutisqa imapis kajtin mana Jehovapi atienekuyta atillasunmanchu. w22.02 pág. 2 párrs. 1, 2