Mayo

Jehová Diosqa, Wawanta rejsinapaj Palabranpi tawa librosta qhelqacherqa. Chay librosqa kashan Mateo, Marcos, Lucas, Juan ima. Chaykunapitaj willawanchej Jesuspa kausayninmanta, predicasqanmanta, imatachus nisqanmanta, imatachus ruwasqanmanta, kʼacha kasqanmanta ima. Chaykunataj Jesuspa saqesqan lastrosnin jina. Chayrayku chay librosqa, Jesuspa kausayninpi tʼukurinapaj yanapawanchej. Chaypajtaj chay tawa librosta estudiananchej tiyan. Chayta ruwaspaqa Jesusta astawan rejsisunchej, ajinamantataj purisqanta qhatisunchej. Jesuspa kausayninmanta parlaj libroswan yanapachikunapajqa, mana leerpanallachu tiyan. Astawanpis sumajta estudianapaj, tʼukurinapaj ima tiempochakuna tiyan (Josué 1:8, kikinchay). Jesuspa kausayninmanta parlaj librosta leeshaspaqa, rikushasunmanpis jina, uyarishasunmanpis jina, chayri chaypipis kashasunman jina leena. Chaypajqa Diospa llajtan qowasqanchej publicaciones yanapawasunman. w21.04 págs. 4, 5 párrs. 11-13

Jehovaqa Jesús jallpʼaman jamunanpaj ashkha watas faltashajtin nerqa, Mesiasqa kinsa chunka qolqerayku wasanchasqa kananta (Zac. 11:12, 13). Chantá nillarqataj Jesustaqa ujnin amigollantaj wasanchananta (Sal. 41:9). Jehová Diosqa profeta Zacariasnejta nillarqataj: “Wañuchiy chay michejta ovejasniytaj chʼeqeranqanku”, nispa (Zac. 13:7). Llampʼu sonqo runasqa, Jesusta amigosnin imatachus ruwasqankuta yachaspapis, mana paymanta karunchakunankuchu karqa. Astawanpis chay profecías paypi juntʼakusqanta rikuspa, astawan sinchʼi creeyniyoj kananku karqa. Kay tiempopipis runasqa Jesuspa tiemponpi jinallataj yuyanku. Wakin rejsisqa testigosqa, Diospa llajtanmanta llojsipuspa Diospa contranpi llullasta chayri tukuy imata parlanku. Jinamantataj wakin hermanosta pantachiyta munanku. Paykunaqa Jehovaj testigosninmanta llullasta parlanku noticiasnejta, Internetnejta ima. Jinapis Jehovata tukuy sonqo sirvejkunaqa, mana chaykunata creenchejchu. Imaraykuchus yachanchej, Bibliaqa chay imas kananta ñaupajmantaña nisqanta (Mat. 24:24; 2 Ped. 2:18-22). w21.05 pág. 11 párr. 12; págs. 12, 13 párrs. 18, 19

Bibliaqa nin Diospa llajtan pisimanta pisi cheqa kajta entiendenanchejta (Col. 1:9, 10). Jehovaqa cheqa kajta pisimanta pisi sutʼinchan. Chayrayku pacienciakuna cheqa kajta aswan allinta entiendenapaj. Diospa Llajtanta Kamachejkunaqa Bibliaj wakin yachachiykunasninta pantasqata entiendeshasqanchejta chayri mana allintachu ruwashasqanchejta reparaspa, chay rato allinchanku. Kay tiempomanta ashkha iglesiaspitaj, yachachiykunasninkuta cambianku runasta kusichiyta munaspa chayri allinpaj qhawasqa kayta munaspa. Jinapis Jehovaj testigosnenqa wakin imasta waj jinamanta ruwanchej, astawan Jehovaman qayllaykunapaj, Jesuspa yachachisqanman jinataj Diosta yupaychanapaj (Sant. 4:4). Wakin imastaqa mana kay mundomanta runas cambiashasqankuraykuchu cambianchej, manaqa Bibliata aswan sumajta entiendesqanchejrayku. Arí, Diosmanta, imachus munaynin kasqanmanta ima cheqa kaj yachachiykunata sonqonchejpi japʼikunchej (1 Tes. 2:3, 4). w21.10 pág. 22 párr. 12

¿Imatá ruwasunman sapayakunchej chay? Imaynatachus Jehová Dios yanapashawasqanchejpi piensarina (Sal. 55:22). Ajinamanta mana yuyasunchu sapallanchej kashasqanchejta. Imaynatachus Jehová Dios sapayakoj hermanosta yanapasqanpi piensarina (1 Ped. 5:9, 10). Hermano Hiroshimanta parlarina. Payqa ashkha watastaña familianmanta sapallan testigo kashan. Pay nin: “Congregacionpeqa tukuy, Jehovata sirvinankupaj mayta kallpachakushanku. Chaytaj mayta kallpachawayku familiaykupi sapallayku testigos kajkunata”, nispa. Diosta yupaychayta amapuni saqenachu. Jehovaman tukuy sonqo willarikuna imaynachus kashasqanchejta. Sapa día Bibliata leenapuni. Piensarinataj imaynatachus Jehová ñaupa tiempopi kamachisninta munakusqanpi. Wakin hermanosqa de memoria yachanku mayta kallpachaj textosta. Chay textosmanta wakenqa kanku Salmo 27:10 chantá Isaías 41:10. Wakin hermanostaj reunionespaj wakichikushaspa, chayri Bibliata leeshaspa grabacionesta uyarinku. Reparankutaj chayta ruwasqankoqa, mana sapayakunankupaj yanapasqanta. w21.06 págs. 9, 10 párrs. 5-8

Ichapis llakisqa kashanki munasqa familiarniyki wañupusqanrayku. Bibliaqa parlan ashkha runas kausarichisqa kasqankumanta. Chaykunata leenaykipaj tiempochakuspaqa creeyniykita astawan sinchʼiyachinki. Chayri ichá congregacionmanta mayqen familiarniyki qharqosqa kasqanrayku llakisqa kashanki. Jina kajtenqa, allin kanman Bibliata estudianayki imaraykuchus Jehová juchallikojta jasutʼisqanta qanpuni yachanaykipaj. Ima llakiypi kaspapis astawan creeyniykita sinchʼiyachinaykipaj kallpachakuy. Chantapis Jehová Diosman tukuy llakiyniykita willakuy, amataj hermanosmanta karunchakuychu (Pro. 18:1). Kallpachakuytaj aguantanaykipaj yanapasonqa chay imasta ruwanaykipaj, waqan waqan ruwanayki kajtinpis (Sal. 126:5, 6). Reunionesman, predicacionmanpis amapuni faltakuychu, Bibliatapis leellaypuni. Jehová may sumaj bendicionesta tumpamantawan qonawanchejpitaj piensarillaypuni. Imaynatachus Jehová yanapasusqanta reparaspaqa, aswan sinchʼi creeyniyoj kanki. w21.11 pág. 23 párr. 11; pág. 24 párr. 17

¿Imajtintaj nisunman Jesuspa discipulosnin ‘juchʼuykuna’ jina kasqankuta? Kay mundomanta runasqa qhapajkunata, may rejsisqa kajkunata, atiyniyojkunata ima aswan sumajpaj qhawanku. Jinapis Jesuspa discipulosnintaqa ‘juchʼuykunata’ jina, pisipajtaj qhawanku (1 Cor. 1:26-29). Chaywanpis Jehovaqa paykunata may valorniyojpaj qhawan. Jesuspa discipulosnenqa payta taporqanku: “¿Pitaj cielopi kaj Gobiernopi aswan kurajri?”, nispa (Mat. 18:1). Chayrayku Jesusqa “juchʼuykunamanta” parlarqa. Imajtinchus chay tiempomanta judiosqa, mayta munarqanku allinpaj qhawasqa kayta, qhapaj jinataj qhawasqa kayta. Uj yachayniyoj runa nin: “Runasqa mayta munaj kanku jatunpaj qhawasqa kayta, may rejsisqa kayta, sumaj respetasqa kayta ima”, nispa. Judiosqa maytapuni jatunchakoj kanku. Chayrayku Jesusqa yacharqa discipulosnin mayta kallpachakunanku kasqanta mana judíos jina yuyanankupaj. w21.06 pág. 20 párr. 2; pág. 21 párrs. 6, 8; pág. 22 párr. 9

Ancianosqa apóstol Pablomanta mayta yachakunkuman. Payqa Tesalonicamanta hermanos yuyaycharinata necesitajtinku yuyaycharerqapuni. Jinapis paykunaman qhelqarqa chay cartasninpeqa, ñaupajta paykunaman nerqa munakuywan llankʼaspa, sinchʼita sayaspataj allinta ruwashasqankuta. Chantapis payqa imaynachus kashasqankupi piensarerqa. Paykunamantaj nerqa: “Qhatiykachasqa kaspapis, llakiykunapi rikukuspapis sinchʼita sayankichej”, nispa (1 Tes. 1:3; 2 Tes. 1:4). Paykunaman nillarqataj waj cristianos paykunata rikuspa kikillantataj ruwashasqankuta (1 Tes. 1:8, 9). Tesalonicamanta cristianosqa, Pablo ajinata kallpacharejtin maytachá kusikorqanku. Paykunaqa sutʼita repararqanku Pablo mayta munakusqanta. Chayrayku imatachus Pablo iskaynin cartasninpi paykunaman yuyaychasqanta, tukuy sonqo japʼikorqanku (1 Tes. 4:1, 3-5, 11; 2 Tes. 3:11, 12). w22.02 pág. 15 párr. 6

Llulla religionesta kamachejkunaqa ninku, Jehová Dios sajra kasqanta, kay mundopi ñakʼariy kananpaj pay juchayoj kasqanta ima. Chayta ninankupajtaj Satanás tanqan. Runasqa uj wawita wañupojtin ninku, Dios pusakapusqanta cielopi uj angelitotawan necesitasqanrayku. Chayta nispaqa Jehovata pisipaj qhawanku. Jinapis noqanchejqa yachanchej Jehová kʼacha Tata kasqanta. Chayrayku sinchʼita onqoykojtinchej chayri pininchejpis wañupojtin, mana Jehovata juchachanchejchu. Astawanpis yachanchej Jehová Dios tukuy llakiyninchejta chinkachinanta. Predicaspaqa tukuyman willarisunman Jehová munakuyniyoj Dios kasqanta. Ajinamanta Jehovaqa allinta kutichenqa payman churanakojkunaman (Pro. 27:11). Jehová Diosqa khuyakuyniyoj. Payqa mayta llakikun qhatiykachasqa kasqanchejrayku, onqosqa kasqanchejrayku chayri waj imasrayku sufrishasqanchejmanta (Sal. 22:23, 24). Payqa yachan imayna llakisqapunichus kashasqanchejta. Chaytataj chinkachiyta munan, chinkachenqapunitaj (Éxodo 3:7, 8; Isaías 63:9, kikinchay). w21.07 págs. 9, 10 párrs. 9, 10

Jehovata kasukojkunaqa, payta wiñaypaj munakusun, yupaychasuntaj. Chaytaj may sumajpuni kanqa. Jesusqa Adanwan Evawan rikhurichisqanku llakiykunata chinkachenqa. Paykunaqa Jehovaj familianmanta karunchakuspa chay llakiykunata rikhuricherqanku. Chantapis Jehová Diosqa may chhika wañusqasta kausarichimonqa. Paykunapis ni imamanta onqospa kay jallpʼapi wiñaypaj kausakuyta atenqanku (Luc. 23:42, 43). Jehovaj kamachisnin cheqan runasña kajtinkoqa, tukuyninku David nisqanman jina ‘jatunpaj, allinpajtaj’ qhawasqa kanqanku. May chhika runasmanta kanchej chayqa, kay jallpʼapi uj sumaj kausakuyta suyakushanchej (Apo. 7:9). Diosqa munakuwanchej, munantaj familianmanta kananchejta. Chayrayku mayta kallpachakuna paypa ñaupaqenpi allinpaj qhawasqa kananchejpaj. Sapa día Diospa nisqasninpi piensarina. Tatanchej Jehovata yupaychayta atisqanchejqa ni imawan kikinchakunchu. Chaytataj amapuni qonqakunachu. w21.08 pág. 7 párrs. 18, 19

Profeta Jeremiasqa 40 watas kurajta jina predicarqa runas mana uyarejtinkupis, churanakojtinkupis. Runasqa Jeremiasta insultaj kanku, burlakojtaj kanku. Chayrayku payqa manaña Diospa sutinpi parlayta munasharqachu (Jer. 20:8, 9). Jinapis payqa mana saykʼuporqachu. ¿Imataj yanaparqa mana saykʼupunanpaj, kusisqallapunitaj predicananpaj? Jeremiasqa iskay imaspi piensarerqa. Ñaupajtaqa, Diosmanta willasqan, runasta ‘aswan qhepaman allinta kausakunankupaj’ yanapananpi (Jer. 29:11). Chantapis Jehová payta ajllasqanpi sutinta apananpaj (Jer. 15:16). Noqanchejpis kay laqha mundopi kausakoj runasman allin kausayta tarinankupaj Diosmanta willanchej. Jehovaj sutinwantaj rejsisqa kanchej, testigosnin kasqanchejrayku. Chaykunapi piensarisun chayqa, runas mana uyariwajtinchejpis kusisqallapuni predicasun. Chayrayku ama anchata llakikunachu, nitaj saykʼupunachu estudiosninchej mana suyasqanchejman jinapunichu ñauparejtinku. Uj estudio Jesuspa discipulonman tukunanpajqa, pacienciakunanchej tiyan (Sant. 5:7, 8). w21.10 pág. 27 párrs. 12, 13

Mashkha unaytaña Diosta sirvispapis, creeyninchejta kallpachanallapuni. Mana chayta ruwajtinchejqa creeyninchej chiriyapunman. Yachakorqanchej jina creeyniyoj runaqa, imapichus creesqan cheqapuni kasqanta yachan, mana chayta rikuspapis. Imastachus mana rikusqantataj chay rato qonqapun. Chayrayku apóstol Pablo nerqa mana creeyniyoj runataqa ‘jucha chʼipaykunanta’. Jinapis, ¿imastá ruwasunman creeyninchej sinchʼillapuni kananpaj? (2 Tes. 1:3). Jehová Diosmanta atiyninta mana saykʼuspa mañakuna. Imaraykuchus creeyniyoj kanapajqa Diospa atiynin yanapawanchej (Gál. 5:22, 23). Yanapallawanchejtaj Diospi creeyninchej sinchʼillapuni kananpaj. Chayrayku Jehová Diosmanta atiyninta mañakunallapuni, paytaj qowasunpuni (Luc. 11:13). Diosmanta mañakushaspaqa ajinata nisunman: “Yanapawayku astawan creenaykupaj”, nispa (Luc. 17:5). Sapa día Diospa Palabranta estudiana (Sal. 1:2, 3). w21.08 págs. 18, 19 párrs. 16-18

Machitu hermanosqa Diospa llajtanpi sumajta yanapakuyta atinku. Paykunaqa manaña jóvenes jina kallpayoj kaspapis, ashkha watasta Jehovata sirvisqankurayku sumaj experienciayoj kanku. Paykunaqa Jehovaj llajtanpi tukuy imaymanamanta yanapakuyta atillankupuni. Bibliaqa nin, Diospa ashkha cheqa sonqo kamachisnin, viejitusña kaspapis payta sirvillasqankutapuni. Paykunamanta ujqa Moisés karqa. Payqa 80 watasniyoj kashaspa profetaman, israelitaspa kamachejninkumantaj tukorqa. Wajtaj Daniel karqa. Payqa 90 watas kurajniyoj jinaña kashaspapis, Jehová Diosta profeta jina sirvishallarqapuni. Apóstol Juanpis 90 watas kurajniyojñasina karqa, Dios yuyaychasqanman jina Apocalipsis librota qhelqashaspa. Simeonmanta parlarina. Bibliaqa paymanta pisillata parlan. “Payqa cheqan runa karqa, Diostataj manchachikoj”. Jinapis Jehová Diosqa payta allinta rejserqa, saqerqataj Jesusta wawita kashajtin rejsinanta. Chantapis Simeonqa Jesusmanta, maman Mariamanta ima uj profeciata willarqa (Luc. 2:22, 25-35). w21.09 págs. 3, 4 párrs. 5-7

Tatasqa uj wawankuta mana ujnin wawankuwan kikinchanankuchu tiyan, nitaj ruwachinankuchu tiyan mana ruwayta atisqan imastaqa. Chayta ruwaspaqa wawankuta anchata llakichinkuman (Efe. 6:4). Hermana Saramanta parlarina. Pay nin: “Mamayqa examenesniypi ni imapi pantanayta munarqa. Pay munasqanman jina ruwaytaqa nipuni aterqanichu. Escuelataqa unayña tukuchani, jinapis wakin kuteqa yuyallanipuni, Jehovaqa paypaj imastachus ruwasqayta pisipaj qhawasqanta”, nispa. Rey David nerqa: “Mana jatuchaj imaspa qhepantachu purini, nitaj mana ruway atina imaspa qhepantapis”, nispa (Sal. 131:2). Davidqa kʼumuykukoj sonqo, llampʼu sonqotaj kasqanrayku, chʼinlla karqa, nitaj imamantapis llakikorqachu. Tatasqa paymanta mayta yachakunkuman. Ajinamantaqa atisqankuman jina ruwanqanku, wawasninkutapis ajinallatataj ruwachenqanku. Chantapis paykunaqa sumajta reparananku tiyan wawasninku imastachus ruwayta atisqankuta, imastatajchus mana, chayman jinataj imatapis ruwachinankupaj. Ajinamanta wawasninkoqa kusisqa kanqanku. w21.07 págs. 21, 22 párrs. 5, 6

Jehovaqa imatachus ruwayta munasqanchejta ajllakojta saqewanchej. Chayrayku sapa uj ajllakuyta atinchej Jehovata kasuytachus manachus. Wakin jovenespa tatasninkoqa mana testigoschu kanku. Jinapis chay jovenesqa ajllarqanku Jehovata sirviyta, tukuy sonqollapunitaj sirvishanku. Wakin jovenestaj Bibliaj yuyaychaykunasninman jina uywasqa karqanku. Jinapis wiñarqoytawanqa Jehovamanta karunchakorqanku. Sapa ujpuni ajllakunanchej tiyan Jehovata sirviytachus manachus (Jos. 24:15). Tatas, wawaykichej Jehovamanta karunchakojtenqa, amapuni qankuna juchayoj kasqaykichejta yuyaychejchu. Wakin kuteqa tata chayri mama Jehovamanta karunchakun. Ichá familianta ima saqerpan (Sal. 27:10). Chaytaj may llakiy kanman tatasninkuta jatunpaj qhawaj wawaspaj. Jóvenes, tataykichej chayri mamaykichej qharqochikusqanmanta llakisqa kashankichej chayqa, Jehovaqa yachan sinchʼi llakisqa kashasqaykichejta. Payqa mayta munakusunkichej. Kusisqataj kashan tukuy sonqo sirvishallasqaykichejmantapuni. Mana qankunachu juchayoj kankichej tatasniykichej Diosta wasanchayta ajllasqankumanta. w21.09 pág. 27 párrs. 5-7

Congregacionmanta qharqochikojqa, onqoyniyoj oveja jina, wajkunamantaj chay onqoyninta chimpachinman. Imajtinchus payqa Jehová Diospa ñaupaqenpi onqosqa jina kashan (Sant. 5:14). Imaynatachus uj onqosqa runa onqoyninta wajkunaman chimpachinman, ajinallatataj Diospa ñaupaqenpi onqosqa jina kajpis, wajkunata tanqanman sajra imasta ruwanankupaj. Chayrayku chay juchallikoj hermanoqa mana pesachikojtin, congregacionmanta qharqosqapuni kanan tiyan. Ajinamanta Jehovaqa rikuchin tukuy sonqo kasukoj kamachisninta munakusqanta. Juchallikojtaj reparakunman maytapuni juchallikusqanta, pesachikunmantaj. Chantapis payqa reunionesman riyta atin, Jehovamanta yachakuspa creeyninta watejmanta kallpachananpaj. Estudiananpajpis publicacionesta conseguikunman, JW Broadcasting^® nisqatapis qhawayta atinman. Ancianostaj juchallikoj cambiashasqanta reparaspa, wakin kutis yuyaycharinkuman, yanaparinkumantaj Jehovawan allinyakapunanpaj, congregacionmantaj Jehovaj testigon jina kutinpunanpaj. w21.10 pág. 10 párrs. 9, 11

Ñaupa tiempomanta cristianos jina Diosta yupaychashanchej. Imajtinchus Diospa llajtanpeqa, jaqay tiempopi jinallataj congregacionesta waturej hermanos, ancianos, siervos ministeriales ima tiyan (Fili. 1:1; Tito 1:5). Chantapis ñaupa tiempomanta cristianos jinallataj casado kausayta, qhari warmi jina puñuykuyta, yawarta ima jatunpaj qhawanchej. Nillataj saqenchejchu jatun juchapi urmaj hermano mana pesachikuyta munajtin, congregacionllapipuni kananta (Hech. 15:28, 29; 1 Cor. 5:11-13; 6:9, 10; Heb. 13:4). Bibliaqa sutʼita nin ‘uj creeyllata’ Dios allinpaj qhawasqanta (Efe. 4:4-6). Maytapuni kusikunchej Diospa llajtanpi kasqanchejmanta, paymanta, imachus munaynin kasqanmanta ima cheqa kajta yachasqanchejmanta. Chayrayku cheqa kajpi sinchʼita sayanallapuni. w21.10 pág. 23 párrs. 15-17

Rey Jehosafatqa uj jatun llakiypi rikukorqa. Imajtinchus ammonitaswan, moabitaswan, Seír orqosmanta runaswan, paypa, familianpa, nacionninpa contranpi ima maqanakoj rerqanku (2 Cró. 20:1, 2). Jehosafattaj Jehovamanta yanapata, kallpata ima mañakorqa. Payqa Jehovamanta llampʼu sonqowan mañakuspa rikucherqa maytapuni paypi atienekusqanta (2 Cró. 20:5-12). Jehovaqa levita Jahazielnejta Jehosafatman kay pʼunchaypaj versiculopi nisqanta nerqa. Jehosafatqa Jehovapi tukuy sonqo atienekusqanrayku, nisqanman jinapuni ruwarqa. Paytaj enemigosninkuwan maqanakoj rishaspa, takejkunata ajllarqa soldadosninpa ñaupaqenkuta rinankupaj. Jehová Diosqa Jehosafatman nisqanta juntʼarqa, enemigosnintataj atiparqa (2 Cró. 20:18-23). w21.11 págs. 15, 16 párrs. 6, 7

Ima pruebapi rikukojtinchejpis, Jehovaqa yanapawasunpuni paymanta mana karunchakunanchejpaj (2 Cor. 4:7-9). Uj salmista nerqa: “Jehová Diostajrí payta manchikojkunata cuidan, munakuyninta suyakojkunata”, nispa (Sal. 33:18-22). Chayrayku mana iskayrayanchejchu Jehová Dios munakunallawanchejmantapuni. Jehová Diosqa payta niraj rejsishajtinchej, tukuy runasta jina munakuwarqanchejña. Jinapis payta yupaychayta qallarisqanchejmantapacha, mana tukukuyniyoj munakuynintapis rikuchillawanchejtaj. Ajinata munakuwasqanchejrayku makinwan japʼiwanchej jarkʼakunawanchejpaj. Payqa ladonchejpipuni kanqa. Imatachus noqanchejpaj ruwananta nisqantapis juntʼanqapuni. Chantapis payqa munan kausayninchejpi allin rinawanchejta (Sal. 46:1, 2, 7). Chayrayku ima llakiypi rikukojtinchejpis, Jehová Diosqa kallpata qowasun paymanta mana karunchakunanchejpaj. w21.11 pág. 7 párrs. 17, 18

Ichá pillatapis rejsinchej trabajonmanta chayri escuelanmanta compañeronpaj, manachayrí mayqen familiarninpajpis phiñasqallapuni kashasqanta. Wakenqa watasta ajina phiñasqallapuni purinku. Josemanta parlarina. Paytaqa chunka hermanosnin chejnikusqankurayku mayta sufricherqanku (Gén. 37:2-8, 25-28). Jinapis payqa mana hermanosninmanta vengakorqachu. Payqa atiyniyojña kaspa atinman karqa hermanosninmanta vengakuyta. Jinapis mana chayta ruwarqachu, astawanpis paykunamanta khuyakorqa. Paykunapaj phiñasqa kananmanta chayri chejnikunanmantaqa, imatachus Levítico 19:18 ruwananchejta niwanchej chayta ruwarqa (Gén. 50:19-21). Diosta kusichiyta munaj cristianosqa, José jina ruwananchej tiyan. Vengakunamanta chayri wajkunapaj phiñakunamantaqa perdonananchej tiyan. Jesusqa nerqa contranchejpi juchallikojkunata perdonananchejta (Mat. 6:9, 12). Apóstol Pablopis cristianosman yuyaychallarqataj: “Munasqa hermanosníy, ama ima sajramantapis pagachikuychejchu”, nispa (Rom. 12:19). w21.12 pág. 11 párrs. 13, 14

Jesusqa 33 watapi 14 de nisán chʼisipi, Getsemaní huertaman rerqa. Chaypitaj tukuy sonqo Jehovamanta mañakorqa (Luc. 22:39-44). Payqa chay jina llakiypi kashaspa mañakorqa “sinchʼita qhaparikuspa, waqaspataj” (Heb. 5:7). ¿Imatataj Jesús chay chʼisi mañakorqa? Payqa Jehovamanta kallpata mañakorqa sinchʼillatapuni sayananpaj, munaynintataj ruwananpaj. Jehová Diosqa Wawanpa sinchʼi mañakusqanta uyarerqa, uj angeltataj kachamorqa kallpachananpaj. Jesusqa yacharqa Tatanpa sutinta llimphuchanan kasqanta, chayri allinpaj qhawachinan kasqanta. Payqa Wawanpa sinchʼita mañakusqanta uyarerqa. Imajtinchus Jesusqa Tatanta tukuy imapi kasukuyta munarqa, sutintapis allinpaj qhawachiyta munarqa. Noqanchejtapis Jehovaqa uyariwasunpuni (Sal. 145:18). w22.01 págs. 17, 18 párrs. 15-17

Kay tiempomanta ashkha runasqa, mana politicaman chhapukusqanchejrayku Jehová Diosmanta willasqanchejta mana uyariyta munawanchejchu. Paykunaqa eleccionespi pillapajpis votananchejtapuni munanku. Jinapis noqanchejqa sutʼita yachanchej uj runata kamachinawanchejpaj ajllakuspaqa, Jehová Diosta qhesachashasqanchejta (1 Sam. 8:4-7). Runasqa mayta munanku escuelasta, hospitalesta ruwachinanchejta, chayri imaynallamantapis runasta yanapananchejta. Jinapis noqanchejqa kausayninchejpi predicacionta ñaupajman churanchej, manataj kay mundomanta problemasta allinchaytachu. Chayrayku ashkha runasqa, mana Diosmanta willasqanchejta uyariyta munankuchu. ¿Imatá ruwasunman mana paykuna jina yuyanapaj? (Mat. 7:21-23). Noqanchejqa Jesús imatachus kamachiwasqanchejtapuni kausayninchejpi ñaupajta juntʼayta munanchej. Ama saqenachu kay mundomanta políticos umanchejta muyuchinawanchejta. Nillataj kay mundomanta chʼajwasta allinchayta munaspa umanchejta muyuchikunachu. Noqanchejqa mayta runa masisninchejta munakunchej, problemasniyoj kasqankumantataj llakikunchej. Jinapis paykunataqa mayta yanapasunman Diospa Gobiernonmanta yachachispa, Jehová Diosman qayllaykunankupaj yanapaspa ima. w21.05 pág. 7 párrs. 19, 20

Ashkha gobiernosqa Diosta sirvisqankuta ninku, jinapis paykunallapuni kamachiyta munanku. Jesuspa tiemponpeqa autoridades payman churanakorqanku. Kay tiempomanta autoridadespis Diospa kamachisninta qhatiykachaspa Cristoj contranpi oqharikushanku (Hech. 4:25-28). ¿Imatá ruwan Jehová? Salmo 2:10-12 nin: “Kay pachapi reykuna, yachayniyoj kaychej; qankunataj kamachejkuna, kay yachachisqayta sumajta yachaqakuychej. Kusiywan Tata Diosta yupaychaychej, manchachikuspataj payman kʼumuykukuychej. Kʼumuykukuspa Churita jatunchaychej ama phiñakunampaj; pajtataj ñampi chinkachisqa kawajchej. Payqa kaymanta jinalla phiñakun. Kusikuyniyojmin kanku paypi pakakuyta maskʼajkuna”, nispa. Jehovaqa khuyakuyniyoj kasqanrayku, suyashan payman churanakojkuna cambianankuta, niñataj Gobiernonman churanakunankuta. Jinapis manaña tiempo kanchu (Isa. 61:2). Runasqa usqhayllata cheqa kajta yachananku tiyan, Diosta sirviytataj ajllananku tiyan. w21.09 págs. 15, 16 párrs. 8, 9

Apóstol Pabloqa parlasharqa, kapuwasqanchej imaswan sonqo juntʼasqas kausakunamanta (Fili. 4:12). Noqanchejpajqa Jehovaj amigosnin kasqanchej aswan importante, kapuwasqanchej imasmanta nisqaqa (Hab. 3:17, 18). Qhawarina imatachus Moisés israelitasman nisqanta. Moisesqa israelitas 40 watastaña chʼin jallpʼaspi purisqankutawan ajinata nerqa: “Qankunataqa Jehová Diosniykichej bendecisunkichej tukuy ima ruwasqaykichejpi. [...] Jehová Diosniykichejqa kay 40 watasta qankunawan karqa, manataj imatapis pisichisorqachejchu”, nispa (Deu. 2:7). Jehová Diosqa israelitasman 40 watasta maná nisqa mikhunata qorqa. Ropasninkupis Egiptomanta llojsisqankumantapacha mana thantakorqachu (Deu. 8:3, 4). Jehovaqa mayta kusikonqa, kapuwasqanchej imasllawan sonqo juntʼasqas kausakojtinchej. Payqa munan tukuy imata qowasqanchejmanta agradecekunanchejta, paypa bendicionninta jinataj qhawananchejta. w22.01 pág. 5 párrs. 10, 11

Qosas, qankunaqa familiaykichejta uywanaykichej tiyan. Chayrayku mayta kallpachakunkichej paykunata yanapanaykichejpaj, tukuy ima necesitasqankutataj qonaykichejpaj. Problemaspi rikukuspa sapallaykichej allinchayta munaspapis, ama qankunallapi atienekuychejchu. Astawanpis sapallaykichejpi, jinallataj señoraykichejwan khuska tukuy sonqo Jehovamanta yanapata mañakuychej. Chantapis Jehová yanapasunaykichejpajqa Bibliata, publicacionesta ima estudiaychej, chaykunapi yuyaychasqanman jinataj ruwaychej. Ichá wakenqa Bibliaj nisqanman jina ruwasqaykichejta mana allinpajchu qhawankuman. Chantapis ichá ninkuman qolqeyoj, tukuy imayojtaj kaspalla familiaykichejta sumajta yanapanaykichejta. Jinapis rey Jehosafatmanta yuyarikuychej (2 Cró. 20:1-30). Payqa Jehová Diospi atienekorqa, chaytataj ruwasqanwan rikucherqa. Jehovaqa mana payta saqerparqachu, nillataj qankunatapis saqerpasonqachejchu (Sal. 37:28; Heb. 13:5). w21.11 pág. 15 párr. 6; pág. 16 párr. 8

Jehová payman rijchʼakojta ruwawasqanchejrayku, runa masinchejta maychus kajtapuni qhawayta munanchej (Gén. 1:26). Wakin imasmanta tukuy imata yachasqanchejta yuyaspapis, pantaj runas kasqanchejrayku ichá wakin imastaqa mana allinpajchu qhawasunman. Chaytataj Jonaspa kausayninpi sutʼita reparanchej. Payqa Jehová ninivitasta khuyakusqanmanta mayta phiñakorqa (Jon. 3:10–4:1). Jinapis Jehová ninivitasta khuyakusqanrayku, 120.000 ninivitasmanta astawan arrepientekorqanku, salvakorqankutaj. Reparanchej jina Jonás pantasqa kasharqa, manataj Jehovachu. Jehovaqa mana willanawanchejpunichu tiyan imaraykuchus imatapis ruwashasqanta. Ñaupa tiempopi Jehová imatachus ruwananta nejtin, wakin kamachisnenqa imatachus yuyasqankuta payman nerqanku. Jehovataj paykunata uyarerqa (Gén. 18:25; Jon. 4:2, 3). Wakin kutistaj Jehovaqa kamachisninman sutʼincharqa imaraykuchus imatapis ruwashasqanta (Jon. 4:10, 11). Jinapis Jehovaqa imata ruwananpajpis chayri imata ruwaspañapis, mana tapunawanchejpunichu tiyan chayta allinpajchus manachus qhawasqanchejta (Isa. 40:13, 14; 55:9). w22.02 págs. 3, 4 párrs. 5, 6

“Sullkʼa jina” kanapajqa, ‘wajkunata noqanchejmanta aswan kurajta jina qhawananchej’ tiyan (Fili. 2:3). Chayta ruwanapaj kallpachakusun chayqa, mana wajkunata pantachisunchu. Tukuy hermanos, hermanaspis noqanchejmanta nisqa, imallatapis aswan sumajtapuni ruwanku. Chaytataj reparanchej, allin imasta ruwasqankuta rikuspa. Apóstol Pabloqa Corintomanta hermanosman yuyaychashaspa nerqa: “Qanrí, ¿imapitaj wajkunamanta aswan sumaj kankiri? Chantá, ¿imataj tiyapusunki mana Diosmanta japʼisqaykiri? Japʼerqanki chaypis, ¿imaraykutaj jatunchakunki manapis japʼiwajchu jinari?”, nispa (1 Cor. 4:7). Noqanchejpis chayta sumajta japʼikunanchej tiyan. Chayrayku mayta kallpachakuna ama wajkunawan jatunchachikunapaj, nitaj wajkunata pisipaj qhawanapaj. Wakin hermanosqa sumajta umallirichinku. Wakin hermanastaj ashkha runasman Bibliamanta yachachinku. Jinapis chayta ruwayta atisqankumantaqa Jehovata jatunchananku tiyan. w21.06 pág. 22 párrs. 9, 10

Ashkha hermanosqa mana runasta wasisninkupi taripayta atillankuchu. Imaraykuchus ashkha runasqa jatuchaj edificiospi chayri urbanizacionespi tiyakunku. Chaykunamantaj mana pitapis yaykuchillankuchu, chayri invitasqa kajkunalla yaykuyta atinku. Wakin lugarespitaj hermanosqa predicaspa pisi runasllata tarinku. Ichá uj wasimanta waj wasiman rinankupajqa, karusta purinanku tiyan. Wakin kutistaj ni pita wasinkupi tarinkuchu. Chayrayku waj horaspi predicaj rina. Runas wasinkupi sayanku chay horaspi predicaj risun chayqa, ashkha runaswan parlarisun. Imajtinchus runasqa wasinkuman mayllamantapis chayapunkupuni. Ashkha hermanosqa tardeyaykuyta chayri chʼisiyaykuyta predicanku. Imaraykuchus chay horaspi astawan ashkha runasta tarinku. Chantapis runasqa chay horasta tiempituyoj kanku, parlariytataj munallanku. w21.05 pág. 15 párrs. 5, 7

Kay tiempopipis runasqa, Jesuspa tiemponpi jinallataj yuyanku. Noqanchejqa mana ruwanchejchu diachakusta, Navidadta, nitaj waj costumbrestapis. Imaraykuchus chay costumbresqa mana Bibliaj nisqanman jinachu kashan. Chayraykutaj ashkha runasqa noqanchejpaj phiñakunku. Wakin runastaj, suyunchejpa fiestasninta mana ruwasqanchejrayku, chayri wañusqaspaj costumbresta mana ruwasqanchejrayku phiñakunku. Chay costumbresqa mana Bibliaj nisqanman jinachu kashan. Noqanchejpaj phiñakoj runastaj ichapis yuyanku, Diosta yupaychasqanku allillan kasqanta. Jinapis costumbresninkuta ruwallanqankupuni, nitaj Bibliaj nisqanta kasukonqankuchu chayqa, Diosqa mana paykunata allinpaj qhawanqachu (Mar. 7:8, 9). ¿Imatá ruwasunman mana Jesusmanta karunchakunapaj? Jehová Diospa kamachiykunasninman jina kausakunapaj kallpachakuna (Sal. 119:97, 113, 163-165). Jehová Diosta munakusun chayqa, chejnisqan costumbresta ni imarayku ruwasunchu. Astawanqa ima kajtinpis Jehovata munakullasunpuni. w21.05 pág. 6 párrs. 15, 16

¿Imatá ruwasunman apóstol Pabloj qhelqasqanta kasukunapaj? Sinchʼi creeyniyojllapuni kana. Chaypajqa Bibliata sumajta estudiana, mana saykʼuspa Diosmanta mañakuna, Diospajtaj tukuy atisqanchejta llankʼana (2 Tim. 4:4). Sinchʼi creeyniyoj kajtinchejqa, Diospa llajtanmanta llullasta parlajtinku mana creesunchu (Isa. 28:16). Jehovata, hermanosninchejta ima mayta munakuna. Palabrantapis kasukunallapuni, chaytaj yanapawasun Jehovata wasanchajkuna mana pantachinawanchejpaj. Jesuspa tiemponmanta ashkha runasqa, paymanta karunchakaporqanku. Jinapis ashkhasqa paypa yachachisqanta japʼikorqanku. Chaykunamanta ujtaj karqa, judiospa Jatun Juntankumanta uj runa. Chantá “ashkha sacerdotespis creellarqankutaj” (Hech. 6:7; Mat. 27:57-60; Mar. 15:43). Kay tiempopipis ashkha runas Jesuspa yachachisqanta tukuy sonqo japʼikunku. Imaraykuchus paykunaqa, yachanku Bibliaj nisqan cheqapuni kasqanta, chayman jinataj kausakunku. Paykunamanta parlaspa Biblia nin: “Yachachisqasniykita munakojkunaqa sonqo tiyaykusqallapuni kanku, nitaj imapis paykunata miskʼachiyta atinchu”, nispa (Sal. 119:165). w21.05 pág. 13 párrs. 20, 21

Apóstol Pabloqa yacharqa, mana kallpallanwanchu Jehová Diosta sirvisqanta, manaqa Jehová kallpata qosqanwan. Jehovaqa atiyninnejta Pablota kallpacharqa willanallanpajpuni, qhatiykachasqa kajtinpis, wisqʼasqa kajtinpis, chayri waj problemasniyoj kajtinpis. Joven Timoteopis, Jehová Diospaj llankʼayninta juntʼananpaj, paypa atiyninta necesitallarqataj. Timoteoqa Pablo misionero jina viajashajtin, paywan khuska rerqa. Chantapis Pabloqa, waj kutispi Timoteota kacharqa wakin congregacionesta waturimunanpaj, kallpacharimunanpaj ima (1 Cor. 4:17). Ichapis Timoteoqa yuyarqa, chayta ruwananpaj niraj wakichisqachu kasqanta. Chayraykuchá Pablo nerqa: “Ama pipis joven kasqaykirayku pisipaj qhawasuchunchu”, nispa (1 Tim. 4:12). Chantapis Timoteoqa chay tiempollapitaj ‘sapa kuti wijsa nanaywan onqoj’ (1 Tim. 5:23). Jinapis Timoteoqa yacharqa, sumaj willaykunata predicananpaj, hermanosnintapis yanapananpaj Jehová atiyninwan yanapananta (2 Tim. 1:7). w21.05 pág. 21 párrs. 6, 7

Tukuy yuyaychajkunaqa Santiago 1:19 nisqanman jina ruwananku tiyan. Chaypi nin: “Sapa ujpis allinta uyariyta yachanan tiyan, manataj mana yuyaychakuspalla parlananchu tiyan, nitaj usqhayllata phiñakunanchu tiyan”, nispa. Uj ancianoqa mana yuyananchu tiyan, pitapis yuyaycharinanpaj paymanta tukuy imatañapuni yachasqanta. Imajtinchus Proverbios 18:13 nin: “Pipis manaraj allinta uyarishaspa usqhayllata kutichikojqa, wampu jina parlan, chaytaj jatun pʼenqay”, nispa. Pitapis yuyaycharinapajqa paytaraj tapurina, chaymantataj sumajta uyarina. Ancianosqa yuyaychashanku chay hermanota tapurinkuman: “¿Imaynataj kashanki? ¿Imaynatá yanapariykiman?”, nispa. Ancianos imaynachus hermanos kashasqankuta yachanankupaj tukuy atisqankuta kallpachakonqanku chayqa, paykunata yanapariyta, kallpachariyta ima atillanqanku. Pitapis sumajta yuyaycharinapajqa mana textosllatachu leepunanku tiyan, nitaj imastachus ruwanallankutachu ninanku tiyan. Hermanosmanqa sutʼita rikuchinanku tiyan, paykunamanta llakikusqankuta, entiendesqankuta, yanapariytataj munasqankuta. w22.02 pág. 17 párrs. 14, 15