Junio

Payqa manchay wajcha kasqanrayku, imastachus necesitasqanta mana rantikuyta atillajchu. Jinapis payqa qolqe churana cajasman qayllaykuspa, mana reparayllata iskay qolqesitusta churarqa. Chay qolqesqa juchʼuysitus kasqankurayku, manasina sonallarqankupischu. Jesusqa yacharqa, chay viuda pisi valorniyoj iskay qolqesitusta churasqanta. Chay tiempopi chay qolqeqa, aswan pisi valorniyojpaj qhawasqa karqa. Chay qolqeqa, mana ni uj juchʼuy pʼisqetuta rantinapajpis alcanzajchu. Chay pʼisqetutaqa mikhunapaj rantikoj kanku. Jesusqa imatachus chay viuda ruwasqanmanta tʼukorqa. Chayrayku discipulosninta wajyaspa, paykunaman nerqa: “Kay wajcha viudaqa qolqe churana cajasman aswan ashkhata churan, tukuy churajkunamanta nisqaqa. Tukuypis puchojllataña churanku, kay viudatajrí wajcha kayninpi tukuy kapusqanta churaykun”, nispa (Mar. 12:43, 44). Chay wajcha viudaqa, tukuy kapusqantapuni chay día churarqa. Ajinamantataj Jehová payta cuidananpi atienekusharqa (Sal. 26:3). w21.04 pág. 6 párrs. 17, 18

Jesusqa kay jallpʼapi kashaspa tukuy sonqo predicarqa. Munantaj yachachisqasninpis kikillantataj predicananchejta (Juan 4:35, 36). Jesuspa discipulosnenqa paywan kashaspa tukuy sonqo predicarqanku (Luc. 10:1, 5-11, 17). Jinapis Jesusta enemigosnin presochaytawan wañuchejtinku, paykunaqa niña predicasharqankuchu (Juan 16:32). Jesustaj kausarimuytawan, yachachisqasninta kallpacharqa tukuy atisqankuta predicanallankupajpuni. Paykunaqa Jesús cielopiña kashajtinpis ajinallatapuni predicarqanku. Chayrayku enemigosninkoqa kay pʼunchaypaj textopi nisqanta nerqanku. Jesusqa ñaupa tiempomanta cristianosta predicanankupaj maytapuni yanaparqa, Jehová Diostaj chay ruwasqankupi bendicerqa. Chayrayku may chhika runas sumaj willaykunata japʼikorqanku. Pentecostés 33 watapeqa 3 mil runas jina bautizakorqanku (Hech. 2:41). Chaymanta aswan qhepamantaj, Jesuspa yachachisqasnenqa astawan astawan yapakushallarqankupuni (Hech. 6:7). Chantapis Jesús nerqa, qhepa pʼunchaykunapi may chhika runas sumaj willaykunata japʼikunankuta (Juan 14:12; Hech. 1:8). w21.05 pág. 14 párrs. 1, 2

Bibliamanta yachakushaspaqa, repararqanchej yachakusqanchej cheqapuni kasqanta. Chayrayku ichá yuyarqanchej tukuy chayta yachakuyta munanankuta. Mayta munarqanchej runas Bibliaj nisqanwan yanapachikunankuta, uj sumaj suyakuyniyojtaj kanankuta (Sal. 119:105). Chayrayku imastachus yachakushasqanchejta kusiywan willarerqanchej amigosninchejman, familiaresninchejman ima. Jinapis paykunamanta ashkhasqa mana uyariwarqanchejchu. Runas Diosmanta willasqanchejta mana uyariwajtinchejqa, mana tʼukunanchejchu tiyan. Jesustapis Diospa atiyninwan milagrosta ruwajtinpis, ashkha runasqa nillataj uyarerqankuchu. Uj pacha Jesusqa, Lazarota kausarichimorqa, enemigosnintaj mana chayta negayta aterqankuchu. Jinapis judiospa religionninkuta kamachejkunaqa, manapuni Jesusta Mesiasta jinachu qhawarqanku. Astawanpis paykunaqa Jesusta, Lazarota ima wañuchiyta munarqanku (Juan 11:47, 48, 53; 12:9-11). w21.05 pág. 2 párrs. 1, 2

Reunionesman ama faltakunachu. Chaykunapeqa hermanoswan purajmanta kallpachanakunchej, paykunatataj sumajta rejsinchej. Congregacionpi Jehová Diosta sirviyta ñaupajman churaj hermanoswan amigos kana. Paykunamantaqa mayta yachakusunman noqanchejmanta aswan kuraj chayri sullkʼa kajtinkupis, manachayrí waj culturamanta kajtinkupis. Bibliaqa nin: “Machu runasqa sumaj yachayniyoj kanku”, nispa (Job 12:12). Kuraj hermanospis yachakullankumantaj jovenesmanta. Davidqa Jonatanmanta nisqa aswan sullkʼa karqa. Jinapis paykunaqa sumaj amigos karqanku (1 Sam. 18:1). Paykunaqa sinchʼi llakiykunapi kaspapis, purajmanta kallpachanakorqanku Jehovata sirvinallankupajpuni (1 Sam. 23:16-18). Hermana Irinamanta parlarina, payqa familianmanta sapallan testigo, nintaj: “Congregacionmanta hermanosninchej, hermanasninchejpis, tatasninchej jina, hermanosninchej jinataj kankuman. Jehovaqa hermanosta churapuwanchej familianchej jina kanankupaj”, nispa. Amigosninchejqa mayta kallpachariyta, yanapariyta ima munawanchej. Jinapis sumajta yanaparinawanchejpajqa, willarinanchej tiyan imaynachus kashasqanchejta. w21.06 págs. 10, 11 párrs. 9-11

Jesusqa uj kikinchaypi uj reymanta, kamachinmantawan parlarqa. Reyqa kamachinpa may chhika manunta perdonasqa, payman ni imawan juntʼayta atisqanrayku. Aswan qhepamantaj chay kamacheqa, waj kamachi masinta mana perdonayta munasqachu pisi manulla kajtinpis. Chayrayku reyqa, chay mana khuyakoj kamachita carcelman wisqʼaykuchisqa. Chay sajra kamacheqa, kamachi masinta mana perdonasqanrayku, mana payllachu llakiypi rikhurerqa, manaqa wajkunapis. Payqa mana kamachi masinta khuyarikorqachu, carcelmantaj wisqʼaykucherqa manunta juntʼanankama. Chaytaj kamachi masisnintapis llakichillarqataj. Jesús nerqa: “Kamachi masisnintaj chayta rikuspa mayta llakikusqanku”, nispa (Mat. 18:30, 31). Noqanchejpis ajinallatataj ruwasqanchejwan wajkunata llakichisunman. Sonqonchejta nanachiwanchej chay hermanota chayri chay hermanata mana perdonayta munaspaqa, llakichisunman, mana munakusunmanchu, nitaj parlapaytapis munasunmanchu. Arí, wajkunawan mana allinpi kaspaqa, congregacionmanta waj hermanostapis llakichisunman. w21.06 pág. 22 párrs. 11, 12

Diosqa payman rijchʼakojta runasta ruwawarqanchej. Jinapis Satanasqa sajra imasta ruwanapaj tanqawanchej. Noejpa tiemponpi Jehovaqa, “rikorqa runaspa ashkha millay sajra ruwasqasninkuta”. Chayrayku “pesachikorqa runasta ruwasqanmanta, mayta sonqonta nanachikuspa” (Gén. 6:5, 6, 11). Chaymantapacha runasqa sajra imasllatapuni ruwashanku. Kuraj Supayqa mayta kusikun runas imaymana khuchichakuy juchapi urmasqankumanta. Payqa mayta kusikullantaj warmipura, qharipura chayri uj qhariwan uj warmiwan khuchichakuy juchapi urmasqankumanta (Efe. 4:18, 19). Chantapis Satanasqa astawanraj kusikun Jehovaj mayqen kamachillanpis juchallikojtin. Kay mundo Satanaspa makinpi kasqanrayku, “runaqa runa masinta chakisnin uraman churan paypa mana allinnillampaj”. Jehovaqa munarqa jallpʼata, animalesta ima runas cuidanankuta. Jinapis mana chayta ruwashankuchu (Ecl. 8:9; Gén. 1:28). Wakin yachayniyoj runasqa ninku: “Kay jamoj wataspi runas may chhika animalesta, plantitasta ima chinkachej jina kashanku”, nispa. w21.07 pág. 12 párrs. 13, 14

Diospa kamachisninmanta wakintaqa unay juchasta ruwasqankumanta sonqonku juchachallanpuni. Chay juchasninkumanta arrepientekojtinkupis yuyanku Jehová nipuni perdonananta. Sichus ajina sientekunchej chayqa, sumajta yuyarikuna tiyan Jehová mayta munakuwasqanchejta. Chay yanapawasun manaña ajina sientekunapaj. ‘Jesuspa yawarnin tukuy juchamanta llimphuchawanchej’. Chayrayku Jehová Diostaqa kusisqa sirviyta atinchej, llimphu sonqowantaj (1 Juan 1:7). Sichus imapi pantanchej chayqa, yuyarikuna Jehová Diosqa arrepientekojtinchej mayta perdonayta munawasqanchejta. David nerqa Diosqa munakuwasqanchejrayku perdonawasqanchejta. Pay nerqa: “Imaynatachus cieloqa jallpʼamanta allin patapipuni kashan, ajinallataj Diospa munakuynenqa may jina jatun payta manchachikojkunapaj. Imaynatachus inti llojsimuy ladoqa may jina karupi kashan inti yaykuy ladomanta, ajinata Diosqa pantasqasninchejta noqanchejmanta may jina karuman churan”, nispa (Sal. 103:11, 12). w21.11 pág. 6 párrs. 12, 13   

Cristiano qosasqa señorankuta sumajpaj qhawananku tiyan (1 Ped. 3:7). Paykunawanqa kʼacha kananku tiyan, respetanankutaj tiyan. Señoranta sumajpaj qhawaj qosaqa, señoranmanta maychus kajllata suyan, nitaj waj warmiswan kikinchanchu. ¿Imaraykutaj mana allinchu qosas señorankuta wajkunawan kikinchananku? Hermana Rosamanta parlarina. Paypa qosanqa mana testigochu, sapa kutitaj waj warmiswan kikinchan. Payqa millay imasta nispa, hermana Rosaj sonqonta mayta nanachin. Ajinamanta hermanaqa ni pi munakusqanta yuyan. Pay nin: “Sapa kuti suyani Jehová munakuwasqanta yuyarichinawankuta”, nispa. Jinapis cristiano qosasqa mana jinachu kanku. Astawanpis señorankuta sumajpaj qhawanku. Imajtinchus yachanku ajinallamanta señorankuwan allinta kausakunankuta, Jehovawanpis allinpi kanankuta. Señoranta sumajpaj qhawaj qosaqa, paymanta allinta parlan. Chantapis “mayta munakuyki, allinta ruwanki” nispa nin. w21.07 pág. 22 párrs. 7, 8

Ichapis uj encomiendata suyakushasunman. Chay encomiendataqa maytapuni necesitashasunman, nitaj usqhayta chayamunmanchu. Chaytaj llakichishawasunman. Jinapis imajtinpunichus manaraj chamusqanta yachaspaqa, pacienciawan suyakuyta atillasun. Biblia nin: “Uj runa usqhayllata qhapajyan chayqa, tantasqan imasnenqa pisimanta pisi tukukaponqa. Uj runa pisimanta pisi qhapajyajtintaj kapuynenqa yapakonqa”, nispa (Pro. 13:11). Kay versiculomanta yachakunchej pacienciayoj kananchej kasqanta. Arí, imata ruwashaspapis pacienciakunanchej tiyan, nitaj usqhay usqhayllatachu ruwarparinanchej tiyan. Proverbios 4:18 nin: “Cheqan runaspa ñanninkoqa sutʼiyamuyta inti llojsimushaj jina, pʼunchayamusqanman jinarí astawan kʼancharin”, nispa. Kay versiculoqa sutʼita reparachiwanchej Jehová Diosqa munayninta pisimanta pisi llajtanman yachachisqanta. Reparachillawanchejtaj uj cristiano kausayninta pisimanta pisi cambiasqanta, Jehová Diosmantaj qayllaykusqanta. Arí, uj cristianoqa Jehovaj llajtanpi pisimanta pisi ñauparin. w21.08 pág. 8 párrs. 1, 3, 4

Kay mundoqa tukukuyninman chayashanña. Jehovaj llajtanpi llankʼayninchejtaj astawan yapakushan (Mat. 24:14; Luc. 10:2; 1 Ped. 5:2). Tukuyninchej Jehovata tukuy atisqanchejta sirviyta munanchej. Ashkhasqa Jehovapaj astawan llankʼashanku. Wakenqa kallpachakushanku precursores kanankupaj. Wakintaj Betelpi sirviyta chayri Diosta yupaychana wasista ruwaysikuspa yanapakuyta munashanku. Ashkha hermanostaj kallpachakushanku siervos ministeriales chayri ancianos kanankupaj (1 Tim. 3:1, 8). Jehovaqa maytachá kusikun kamachisnin paypaj astawan llankʼayta munasqankuta rikuspa (Sal. 110:3). Ichapis llakisqa kashanchej Jehovapaj mana astawan llankʼayta atisqanchejmanta. Jina kajtenqa payman willakusunman imaynachus kashasqanchejta (Sal. 37:5-7). Chantapis experienciayoj hermanoswan parlarisunman imapichus astawan kallpachakunanchej kasqanta yuyaycharinawanchejpaj, chayman jina ruwanapajtaj kallpachakusunman. Chayta ruwaspaqa ichá imapichus yanapakuyta munashanchej chaypi yanapakuyta atisun. w21.08 pág. 20 párr. 1; pág. 21 párr. 4

Profetiza Anaqa 84 watasniyoj viuda karqa, templomantaj rillajpuni. Chayrayku Jehová Diosqa paytapis saqellarqataj Jesusta wawita kashajtin rejsinanta (Luc. 2:36-38). Kay tiempopi machitu hermanosninchejmantaqa jóvenes kajkuna mayta yachakusunman. Tiempochakusunman paykunawan parlarinapaj, tapurisunmantaj: “Diospa llajtanpi, ¿imasta ruwaspataj kusisqa karqanki?”, nispa. Willariwajtinchejtaj sumajta uyarisunman. Chaytaj mayta kallpachawasun. Jehovaqa, machitu hermanosninchejta may valorniyojpaj qhawan. Noqanchejpis ajinallatataj paykunata qhawanchej. Machitu hermanosqa rikorqanku Jehová llajtanta, paykunata ima mayta bendecisqanta. Paykunaqa pantasqasninkumantapis mayta yachakorqanku. Machitu hermanosninchejqa sumaj yachayniyoj, sumaj experienciayojtaj kanku. Paykunamantataj mayta yachakusunman (Pro. 18:4). Paykunata allinta rejsinapaj kallpachakusun chayqa, creeyninchej astawan sinchʼiyanqa. w21.09 pág. 3 párr. 4; pág. 4 párrs. 7, 8; pág. 5 párrs. 11, 13

Isaías nisqanman jina, chay ashkha imasta yachasqankoqa ‘nacionespa aswan sumaj mikhunanku’ jina (Isa. 60:5, 16). Tukuyninchejtaj qharis, warmis ima imastachus ruwayta yachasqanchejwan 240 suyuspi, lugarespi ima predicashanchej, 1.000 kuraj parlaykunapitaj publicacionesta orqhoshanchej. Kay qhepa pʼunchaykunapi Jehová Dios nacionesta kharkatichishasqanrayku, runasqa imatachus kausayninkuwan ruwanankuta ajllananku tiyan. Runasqa ajllakunanku tiyan Diospa Gobiernonta kasukuytachus chayri kay mundomanta gobiernospi atienekuytachus. Jehovaj kamachisnenqa tiyakunku chay suyoj leyesninta kasukunku, jinapis mana politicaman chhapukunkuchu (Rom. 13:1-7). Paykunaqa sutʼita yachanku Diospa Gobiernollan allin kausayta apamunanta. Diospa Gobiernontaj mana kay mundomanta gobiernos jinachu (Juan 18:36, 37). w21.09 págs. 17, 18 párrs. 13, 14

Uj familiarniyki Jehovata wasanchapun chayqa, Jehovaj qayllanpi kanaykipaj, familiaykitapis yanapanaykipaj kallpachakullaypuni. Chaypajtaj sapa día Bibliata leeriy, leerisqaykipi tʼukuriy, reunionesmanpis ama faltakuychu. Juanamanta parlarina. Paypa tatanwan hermananwanqa congregacionmanta qharqochikorqanku. Pay nin: “Bibliapi Abigailmanta, Estermanta, Jobmanta, Josemanta, Jesusmanta ima leejteyqa sonqoy tiyaykun. Paykunaj kausayninmanta leespaqa allin imaspi yuyani. Chaytaj yanapawan mana anchata sonqoy nananawanpaj”, nispa. Sinchʼi llakisqa kashaspaqa Diosmanta mañakuy. Munakuyniyoj Tatanchejmanta mañarikuy, pay jina yuyanaykipaj yanapasunanta. Paytaj ‘yachachisonqa, yuyaychasonqataj mayqen ñantachus rinaykita’ (Sal. 32:6-8). Ichá mana atillankichu Jehovaman willariyta imaynapunichus kashasqaykita. Jinapis payqa sumajta entiendesunki. Jehovaqa payman llakiyniykita willakunaykita munan (Éxo. 34:6; Sal. 62:7). w21.09 págs. 27, 28 párrs. 9, 10

Kay 32 watapi Pascua pasayta Pedrowan, Santiagowan, Juanwan ima Jesusta uj jina rijchʼayniyojman tukusqanta rikorqanku. Chaytaj ichapis Hermón orqo patapi kanman karqa. Biblia nin: “Uyanqa inti jina kʼancharerqa, ropantaj yurajman tukorqa kʼanchay jina”, nispa (Mat. 17:1-4). Apostolesqa chaypi kashaspa Diosta kayta nimojta uyarerqanku: “Kaymin munasqa Wawayqa, pitachus allinpaj qhawani. Payta uyariychej”, nispa. Kinsantin apostolesqa, kausayninkupi imastachus ruwasqankuwan Jesusta uyarisqankuta sutʼita rikucherqanku. Noqanchejpis paykuna jina Jesusta uyariyta munanchej. Mayta agradecekunchej Jehová Dios munakuywan yanapashawasqanchejmanta. Payqa Jesusnejta yanapashawanchej, pichus “congregacionpa uman” (Efe. 5:23). Noqanchejqa apóstol Pedro jina, Santiago jina, Juan jinataj Jesusta uyariytapuni munanchej. Chayta ruwaspaqa, kunan ashkha bendicionesta japʼisunchej, wiñay wiñaypajtaj kusisqa kasunchej. w21.12 pág. 22 párr. 1; pág. 27 párr. 19

Corintomanta uj runaqa khuchichakuy juchapi kausasharqa, imaraykuchus tatanpa warminwan tiyakusharqa. Apóstol Pablotaj cristianosman nerqa congregacionmanta qharqonankuta. Chay runaj millay kausaynenqa wakin hermanosta pantachisharqa. Wakenqa chay runaj juchanta mana jatun juchapaj jinachu qhawasharqanku (1 Cor. 5:1, 2, 13). Tiemponmantaj Pabloqa uyarerqa chay juchallikoj cristiano sonqomantapacha pesachikusqanta. Chayrayku Corintomanta hermanosman nerqa: ‘Chay runata perdonaychej, sonqochaychejtaj, anchata llakikusqanwan ama atipachikunanpaj’, nispa. Pabloqa chay pesachikoj runata khuyakorqa. Payqa mana munarqachu chay juchallikoj runa anchata llakikusqanwan atipachikunanta, sonqon juchachasqanraykutaj niña perdonasqa kayta suyakunanta (2 Cor. 2:5-8, 11). Ancianosqa Jehová jinallataj mayta wajkunata khuyakunku. Paykunaqa juchallikojta congregacionmanta qharqonanku kajtin, qharqonku, jinapis khuyakuyninkuta rikuchinanku kajtenqa khuyakunku. Chantapis juchallikojta mana qharqospaqa, mana khuyakushankumanchu, astawanpis gustonta ruwajta saqeshallankuman. w21.10 pág. 11 párrs. 12-15

Pillapis sonqonchejta nanachiwasqanchejqa, uj herida jina. Wakin kutisqa tumpalla kanman, wakin kutistaj sinchʼi kanman. Kaypi piensarina. Ichapis waykʼushaspa makinchejta tumpata khuchurpakusunman. Qallariypeqa ichá mayta nanawasunman. Jinapis uj mashkha dianmanqa sanoyapunman. Niñataj reparasunmanchu maynejtachus khuchuykukusqanchejta. Ajinallatataj mayqen amigonchej mana allinta piensaspalla imata nispa chayri ruwaspa phiñachiwasunman, chayri sonqonchejta nanachiwasunman. Jinapis mana anchachu kasqanrayku payta perdonayta atillasunman. Jinapis jatunta khuchuykukuspa chayri jatun heridata ruwaykukuspaqa, doctorman rispa jampichikunchej. Chay heridata tʼojpillasunmanpuni chayqa, astawan infectaykuchisunman. Ajinallatataj noqanchejpis phiñasqallapuni kaspaqa, heridanchejtapis tʼojpishasunman jina kanman. Pillapis sonqonchejta nanachiwasqallanchejpi chayri imatapis ruwawasqallanchejpi piensaspaqa, sonqollanchejta astawan nanachikusunman. Chayrayku may sumajpuni kay diapaj textoj nisqanta kasukunanchejqa. w21.12 pág. 12 párr. 15

Ichapis uj ancianoqa uj hermano imaynatachus vistikusqanmanta chayri kʼachanchakusqanmanta llakisqa kashanman, piensarinmantaj: “¿Kay hermano yuyaycharinata necesitashanpunichu?”, nispa. Payqa yachan mana imatapis munasqanman jinallachu ruwanan kasqanta. Chayrayku waj ancianota chayri creeypi sinchʼi sayasqa hermanota tapurikunman, khuskataj qhawaykurinkuman vistikuymanta, kʼachanchakuymantawan imatachus Pablo nisqanta (1 Tim. 2:9, 10). Pabloqa mana nerqachu imastachus ruwana kasqanta, imastatajchus mana ruwanachu kasqanta. Astawanpis payqa nerqa Diospa Palabran yuyaychasqanman jina maychus kajta, allin yuyaywantaj pʼachallikuna kasqanta. Payqa yacharqa hermanos Diospa Palabran yuyaychasqanman jina pʼachallikuyta, kʼachanchakuyta ima ajllayta atisqankuta. Ancianosqa pillatapis yuyaycharinankupaj sumajta qhawarinanku tiyan maychus kajtachus, allin yuyaywantajchus manachus pʼachallikushasqanta. Creeypi sinchʼi sayasqa iskay hermanosqa, mana kikintapunichu imatapis ajllanku. Jinapis mana nisunmanchu ujnenqa allinta yuyasqanta, ujnintaj pantasqa kashasqanta. Chayrayku ama hermanosta ninachu imachus noqanchejman allin rijchʼawasqanchejta ruwanankuta. w22.02 pág. 16 párrs. 9, 10

Imajtinchus purajmanta munanakunanchej kasqantaqa Bibliapi qhawarina. Bibliaqa nin: “Munakuymanta, cheqa kajmantapis amapuni karunchakuychu”. “Ajinamanta allinpaj qhawasqa kanki, allin yachayniyoj kasqaykipis sutʼi kanqa Diospa qhawayninpi, runaspa qhawayninpipis”. “Uj runa kʼacha kajtenqa pay kikinpaj allin kajta tarin”. “Cheqan runa kananpaj, munakuyniyoj kananpaj kallpachakojqa, kausayta tarenqa” (Pro. 3:3, 4; 11:17; 21:21). Chay versiculospi reparanchej kinsa imasrayku purajmanta munanakunanchej kasqanta. 1) Purajmanta munanakojtinchej Diosqa may valorniyojpaj qhawawanchej. 2) Purajmanta munanakusqanchejqa allinninchejpaj. Imajtinchus sumaj amigosniyoj kayta atinchej. 3) Purajmanta munanakojtinchej aswan qhepaman ashkha bendicionesta japʼisun, wiñay kausaytapis. Chayrayku Jehová kamachiwasqanchejta kasukunapuni. Pay kamachiwanchej: ‘Purajmanta munanakuychej, khuyanakuychejtaj’, nispa. w21.11 pág. 8 párrs. 1, 2

Ñaupajpi chayri kunallanraj llakiykunapi kaspa, ichá pisi creeyniyoj kasqaykita reparakunki. Jinapis ama desanimakuychu. Manaqa astawan creeyniykita kallpachallaypuni. Sinchʼi llakiykunapi kashaspa tukuy sonqo Jehová Diosmanta mañakuy. Chantapis saqey Jehová Dios familiaykinejta chayri hermanosnejta yanapasunanta. Llakiykunapi kashaspa Jehovawan yanapachikunki chayqa, aswan qhepaman llakiykunapi kashaspapis, yanapasunanpi atienekunki. Jesusqa discipulosnin imaspichus creeyninkuta astawan kallpachananku kasqanta nerqa. Jinapis yacharqa Jehovaj yanapayninwan aswan qhepaman llakiykunata atipayta atinankuta (Juan 14:1; 16:33). Payqa yachallarqataj may chhika runas sinchʼi creeyniyoj kasqankurayku manchay ñakʼariy tiempopi mana wañunankuta (Apo. 7:9, 14). Noqanchejpis Jehovaj yanapayninwanqa chay may chhika runasmanta ujnin kasun. Chaypajtaj kunanmantapacha creeyninchejta astawan sinchʼiyachinapaj kallpachakuna (Heb. 10:39). w21.11 pág. 25 párrs. 18, 19

Noqanchejqa kay tiempopi mana uj milagronejtachu jarkʼasqas kayta suyakunchej. Jinapis noqanchejqa sutʼita yachanchej, Jehová Diospi atienekojkunaqa, wañuchisqas kaspapis wiñay kausayta japʼinankutapuni. Tumpamantawanqa Jehová Dios jarkʼayta atiwasqanchejpi atienekusqanchej pruebaman churasqa kanqa. Magogmanta Gog, nisunman uj qotu naciones contranchejpi oqharikojtinku, ichapis yuyasunman chinkachinawanchejta. Chaypachataj noqanchejqa, tukuy atisqanchejta atienekunanchej kanqa Jehová libranawanchejpi. Chay nacionesqa mana piniyoj runasta jina qhawawasun (Eze. 38:10-12). Paykunaqa mana armasniyoj kasqanchejrayku, nitaj maqanakuyta yachasqanchejrayku chay rato chinkarparichinawanchejta yuyanqanku. Paykunaqa mana reparanqankuchu Jehovaj angelesnin jarkʼanawanchejta. Jinapis noqanchejqa sinchʼi creeyniyoj kasqanchejrayku yachanchej jarkʼanawanchejtapuni. Chay qotu nacionesqa tʼukulla qhepakonqanku, Jehovaj angelesnin yanapaj jamuwasqanchejta rikuspa (Apo. 19:11, 14, 15). w22.01 pág. 6 párrs. 12, 13

Jehová Diosqa tukuy hermanosninchejta allinpaj qhawan, noqanchejpis ajinallatataj qhawananchej tiyan. Chantapis wakichisqa kayta munanchej hermanosninchejta jarkʼananchejpaj, cuidananchejpaj ima. Hermanonchejta phiñarpachisqanchejta chayri sonqonta nanarpachisqanchejta reparanchej chayqa, ama ninachu “payqa imitallamantapis phiñakullanpuni, qonqashanqachá” nispa. ¿Imaraykutaj wakin hermanos phiñakunkuman? Ichapis wakenqa pisipaj qhawakunku imayna uywasqaschus kasqankurayku. Wakinkunataj mosojllaraj kasqankurayku manaraj yachakunkuchu wajkuna pantajtinku perdonananku kasqanta. Imayna kajtinpis, mayta kallpachakuna hermanosninchejwan allinyakunapaj. Chantá imamantapis usqhayllata phiñakoj runaqa, reparakunan tiyan mana ajina kananpaj kallpachakunan kasqanta. Chaytaqa ruwananpuni tiyan paypa allinninrayku, wajkunaj allinninraykutaj. w21.06 pág. 21 párr. 7

Jesusqa yachan imayna llakisqachus kashasqanchejta. Uj amigonchej llakisqa kashajtinchej sonqochawasqanchejqa may allinpuni. Astawanraj noqanchej jina problemasniyoj karqa chayqa. Jesusqa ajina llakiykunapi rikukoj amigonchej. Payqa sutʼita yachan llakiykunapi kashaspa imaynachus sientekusqanchejta, yanapatataj necesitasqanchejta. Yachallantaj pantaj runas kasqanchejta. Chayrayku “yanapata necesitashajtinchejpuni” yanapawasun (Heb. 4:15, 16). Jesusqa Getsemaní huertapi uj angelwan yanapachikorqa. Noqanchejpis Jehovawan yanapachikuna. Payqa yanapawanchej uj publicacionnejta, uj videonejta, uj discursonejta chayri uj ancianonejta, manachayrí creeypi sinchʼi sayasqa amigonchejnejta (Luc. 22:39-44). Jehovaqa sonqo tiyaykuyta qowasun, kallpachawasuntaj. Orakojtinchejqa Dios ‘sonqo tiyaykuyta qowanchej, mayqentachus runas mana entiendeyta atinkuchu chayta’ (Fili. 4:6, 7). w22.01 pág. 18 párrs. 17-19

Jehová Diosqa cheqan kajtapuni ruwan. Jinapis ichá mana atienekuyta atillasunmanchu llajtanta ñaupajman apajkunapi. Wakin kutisqa ichá nisunman: “Jehovaj llajtanta ñaupajman apajkuna, ¿paypa nisqanman jinapunichu imatapis ruwanku chayri yuyayninkuman jinallachu?”, nispa. Jehovaqa llajtanta ñaupajman apajkunapi atienekun. Chayrayku mana paykunapi atienekuspaqa, nillataj Jehovapipis atienekushasunmanchu. Jehovaqa kay tiempopi llajtanta ñaupajman apashan, ‘allin kamachi yuyayniyojnejta’ (Mat. 24:45). Allin kamachi yuyayniyojtaj, ñaupa cristianospa tiemponkupi jinallataj Diospa llajtanta kamachishan, congregacionesmanta ancianostataj yanapashan imaynatachus imatapis ruwanankupaj. Ancianostaj congregacionpi hermanosta yanapanku, yuyaychaykunata japʼisqankuman jina imatapis ruwanankupaj. Jehová llajtannejta, ancianosnejta imastachus yuyaychawasqanchejta kasukuspaqa, Jehovapi atienekusqanchejta rikuchishanchej. w22.02 pág. 4 párrs. 7, 8

Maytapuni kusikunchej Jehovaj testigosnin kasqanchejmanta. Chantapis mayta kusikunchej ‘wiñay kausayta japʼinankupaj allin sonqoyoj’ kajkunata Diospa kamachisninman tukunankupaj yanapaspa (Hech. 13:48). Noqanchejqa Jesús jina kusikunchej. Payqa “espíritu santowan juntʼa kaspa mayta kusikorqa” discipulosnin predicacionmanta kutimojtinku, allin risqantataj willarejtinku (Luc. 10:1, 17, 21). Apóstol Pabloqa Timoteoman yuyaychashaspa ajinata nerqa: ‘Qan kikiykita, imatachus yachachisqaykitapis sapa kuti allinta qhawarikuy’, nispa. Chantá nillarqataj: ‘Imaraykuchus chayta ruwaspaqa, qan kikiykita salvakunki, jinallataj uyarisojkunatapis’, nispa (1 Tim. 4:16). Apóstol Pabloj nisqanqa reparachiwanchej, runas salvakunankupaj predicananchejpuni kasqanta. Kausayninchejta sumajta qhawarikunchej, imajtinchus Diospa Gobiernonpa kamachiyninpi kanchej. Jehová Diosta jatunchanapaj jinapuni kausayta munanchej, sumaj willaykunata willasqanchejpi creesqanchejman jinataj (Fili. 1:27). Chantapis imatachus yachachisqanchejtaqa allinta qhawarikunchej predicanapaj sumajta wakichikuspa, Jehovamantataj yanapata mañakuspa paymanta waj runasman parlarinapaj. w21.10 pág. 24 párrs. 1, 2

Diospa qosqan mosoj kausaywan pʼachallikoj runaqa Jehová jina yuyan, ruwantaj. Chanta, ¿imaynatá chay mosoj kausaywan pʼachallikunchej? Diospa espiritunpa poqoyninman jina kausakuspa. Nisunman Diospa espiritunpa poqoyninta yuyasqanchejpi, ruwasqanchejpipis rikuchispa. Mosoj kausaywan pʼachallikoj runaqa Jehovata, kamachisninta ima munakun (Mat. 22:36-39). Pruebaspi kaspapis kusisqallapuni (Sant. 1:2-4). Allin kausay kananpaj yanapakun (Mat. 5:9). Chantapis wajkunawan pacienciakun, kʼachataj (Col. 3:13). Allin kajtapuni ruwan (Luc. 6:35). Ruwasqasninpitaj sutʼita rikuchin Tatanchej Jehovapi sinchʼita atienekusqanta (Sant. 2:18). Paypaj sajrata rimajtinkupis, llampʼu sonqollapuni, nitaj munayninwan atipachikunchu (1 Cor. 9:25, 27; Tito 3:2). Mosoj kausaywan pʼachallikunapajqa, mana Gálatas 5:22, 23 nisqanman jinallachu kausana tiyan, manaqa waj textospi yuyaychawasqanchejtapis kasukunallataj tiyan. w22.03 págs. 8, 9 párrs. 3, 4

Ancianosqa wasimanta wasi willamuspapis, apóstol Pablo jina mayllapipis kashaspa predicanankupaj wakichisqas kankuman (Efe. 6:14, 15). Chantapis paykunaqa apóstol Pablo jina predicacionpi kashaspa hermanosta, siervos ministerialesta ima aswan wakichisqa kanankupaj yachachinkuman (1 Ped. 5:1, 2). Ancianosqa ashkha ruwanasniyoj kaspapis, predicanankupaj tiempochakunankupuni tiyan (Mat. 28:19, 20). Ancianos ruwanasninkuta sumajta juntʼanankupaj, ichá wakin kutis wakin ruwaykunata manaña japʼikunankuchu kanqa. Paykunaqa allinta piensarispa, orakuspa ima, ichá reparakonqanku waj ruwanastawan japʼikuspaqa, imastachus ruwanankupuni kasqanta niña ruwayta atinankuta. Ancianosqa familiapi Diosta yupaychanapaj tantakuyta sapa semana ruwananku tiyan, predicacionpi ñaupajpi kananku tiyan, wawasninkumanpis sumajta predicayta yachachinanku tiyan. Jehovaqa sumajpaj qhawan ancianos ruwanasninkuta sumajta juntʼanankurayku, wakin ruwanasta mana japʼikusqankuta. w22.03 pág. 27 párrs. 4, 7; pág. 28 párr. 8

Bibliata estudiayta qallarishaspaqa, ichá noqanchejpis Jehovaj testigon kayta manchachikorqanchej. Chantapis ichá yuyarqanchej ni jaykʼaj wasimanta wasi predicaj riyta atinanchejta. Chayrí ichá manchachikorqanchej familianchej, amigosninchej ima churanakunawanchejta. Chayrayku estudionchej ajinata sientekojtin imaynachus kashasqanta entiendenchej. Jesusqa nerqa, wakin runas chay imasta manchachikunankuta. Jinapis payqa, yachachisqasninta kallpacharqa Jehovata sirvinallankupajpuni (Mat. 10:16, 17, 27). Estudionchejta pisimanta pisi yachachina yachakusqanta wajkunaman willarinanpaj. Jesusqa yachachisqasninta predicamunankupaj kacharqa. Ichapis paykunaqa chayta ruwayta manchachikorqanku. Jinapis Jesusqa paykunata yanaparqa maymanchus rinankuta nispa, chantá imatachus willanankuta nispa (Mat. 10:5-7). ¿Imaynatá Jesús jina ruwasunman? Estudionchejta predicananpaj yanaparispa. Chaypajqa ichapis tapurisunman: “Bibliapi kayta yachakusqayki, ¿pi rejsisqaykitapis yanapanmanchu?”, nispa. Chantá yanaparisunman imaynatachus chayta sutʼincharinanpaj. w21.06 pág. 6 párrs. 15, 16

Nepal suyupi 2015 watapi uj jallpʼa ikhakuy karqa. Chay jallpʼa ikhakuymanta wakin salvakojkunamanta ujqa kay jinata nerqa: “Tiendas, ñaupa tiempo ruwasqa edificios ima uj ratopi chinkaykorqanku”, nispa. Wajtaj nerqa: “Runasqa ancha mancharisqas kasharqanku, ashkhastaj nerqanku uj ratopi chay tukuy imas pasasqanta. Jinapis noqapajqa may chhika unaypis kanman jina karqa”, nispa. Jinapis kay tiempopeqa Jehová Dios waj jinamanta jallpʼantinta kharkatichispa jinashan. Profeta Hageoqa jinata nerqa: ‘Pisimantawanqa cielota, kay pachatawan kharkatichisaj’, nispa (Hageo 2:6). Jallpʼa ikhakoyqa llakiyllata apamun. Hageo kharkatichiymanta parlasqantaj mana jallpʼa ikhakuy jinachu. Jehovaqa kayta nerqa: “Tukuy nacionesta kharkatichisaj, tukuy nacionestaj tiyapusqanta apamonqanku, Temploytataj may uyarisqa kaywan juntʼachisaj”, nispa. w21.09 pág. 14 párrs. 1-3

Sumaj amigosqa, ni imata pakanakuspa sapa kuti parlarikunku. Jehová Dioswanpis ajinallatataj ruwasunman. Payman willarikusunman imaynachus kashasqanchejta, imatachus yuyasqanchejta, imachus llakichiwasqanchejtapis. Ajinamanta rikuchisun paypi atienekusqanchejta, munakuwasqanchejmanta mana iskayrayasqanchejtapis (Sal. 94:17-19; 1 Juan 5:14, 15). Ama hermanosninchejmanta karunchakunachu. Paykunaqa Jehová Diosmanta uj sumaj regalo jina kanku (Sant. 1:17). Jehová Diosqa, paykunata familianchej kanankupaj qowanchej. Paykunataj tukuy tiempo munakuwanchej. Ajinamanta Jehovaqa, sapa ujninchejmanta llakikusqanta rikuchiwanchej (Pro. 17:17). Pabloqa colosensesman qhelqasqan cartanpi, wakin cristianospa sutisninkuta oqharerqa. Payqa nerqa chay cristianos mayta yanapasqankuta, sonqochasqankutataj (Col. 4:10, 11). Jesustapis amigosnin, ángeles ima yanapallarqankutaj. Chaymantataj payqa mayta agradecekorqa (Luc. 22:43). Diosta yupaychaypi sinchʼi sayasqa hermanoman, imachus llakichiwasqanchejta willarikuna. Chayta ruwaspaqa mana pisi creeyniyoj kasqanchejtachu rikuchishanchej, manaqa yanaparichikuyta munasqanchejta. w21.04 págs. 24, 25 párrs. 14-16

Uj hermano chayri uj hermana ruwasqasninwan mayta phiñachiwanchej chay, ¿imatá ruwasunman? Mayta kallpachakuna paywan allinyakapunapaj. Jehová Diosmantaj willarikuna imaynapunichus kashasqanchejta. Chantá Jehovamanta mañakuna chay hermanota bendecinanpaj. Yanapata mañakunallataj chay hermanota pay jina qhawananchejpaj (Luc. 6:28). Manapuni hermanota perdonayta atinchejchu chaytaj, piensarina imaynamantachus paywan parlarinapi. Astawanpis piensarina hermanoqa mana sonqonchejta nanachiyta munawasqanchejraykuchu imatapis ruwasqanpi (Mat. 5:23, 24). Hermanowanqa allinyakuyta munaspa parlana. Jinapis manapuni noqanchejwan allinyakuyta munanchu chay, ¿imatá ruwasunman? Biblia nin: “Ujkuna ujkunawan aguantanakullaychejpuni”, nispa. Chayrayku paywan pacienciakunallapuni (Col. 3:13). Ni imarayku hermanopaj phiñasqallapuni kanachu. Imaraykuchus ajinallapuni kasunman chayqa, Jehovamanta karunchakusunman. Ni ima pantachinawanchejta saqenachu. Ajinamantaqa tukuy imamanta nisqa, Jehová Diosta astawan munakusqanchejta rikuchisun (Sal. 119:165). w21.06 pág. 23 párr. 15