Julio

Jehová juchallikojta qharqochisqanqa allinninchejpaj, juchallikojpa allinninpajpis. Ichapis wakenqa ninkuman, juchallikojta ancianos qharqospa, pantaykusqankuta. Jinapis paykunaqa ichá mana parlanqankuchu juchallikoj mana allin imasta ruwasqanmanta. Chantapis imaraykupunichus juchallikoj qharqochikusqanmantaqa mana tukuy imatachu yachanchej. Ancianosqa kallpachakorqanku Bibliaj nisqanman jinapuni juchallikojta juzganankupaj, Jehovaj sutinpitaj juzgarqanku (2 Cró. 19:6). Chayrayku paykunaj juzgasqankupi atienekuna. Juchallikoj familiarniyki qharqochikojtin, mana ancianospa juzgasqankuman churanakunkichu chayqa, ichá yanapanki pay Jehovaman kutinpunanpaj. Hermana Elizabeth nin: “Wawayku qharqochikusqantawanqa, niña paywan parlarqaykuchu. Chaymantataj maytapuni sonqoy nanawarqa pay wiñay tukusqaña kajtinpis. Jinapis payqa Jehovaman kutinpuytawan niwarqayku ancianosqa payta qharqospa mana pantasqankuta. Aswan qhepamantaj niwarqayku allin imasta yachakusqanta”, nispa. w21.09 págs. 28, 29 párrs. 11, 12

Wajcha viudaqa ichapis tukuy kapuyninta Jehová Diosman qoyta munarqa. Pisilla kapojtinpis, tukuy kapusqanta Jehová Diosman qorqa. Jesusqa yacharqa chay viudaj churasqanta, Jehová Dios may allinpaj qhawasqanta. ¿Imatataj wajcha viudamanta yachakusunman? Jehová Diosta tukuy sonqo, tukuy kausayninchejwantaj sirvispaqa, payta kusichisqanchejta (Mat. 22:37; Col. 3:23). Payqa mayta kusikun, tukuy atisqanchejta paypaj llankʼajtinchej. Chayrayku payta sirvinapaj, predicacionman rinapaj, reunionesman rinapajpis, tukuy tiemponchejta, kallpanchejta ima churanchej. Wajcha viudamanta yachakusqanchejwan, wajkunata yanaparina. Ichapis uj hermanita onqosqa kasqanrayku, niña ñaupajta jinachu predican. Chayraykutaj ni imapaj valesqanta yuyan. Payman nina tukuy atisqanta ruwasqanqa, Jehová Diosta mayta kusichisqanta. w21.04 pág. 6 párrs. 17, 19, 20

Jehovaqa sumajta yachan maykʼajchus kay sajra mundota tukuchinanta. Pacienciakusqanraykutaj kay tiempopi may chhika runas payta sirvishanchej, jatunchashanchejtaj. Maytapuni agradecekunchej chay chhika unayta aguantasqanmanta. Ajinamanta nacekorqanchej, paymanta yachakorqanchej, kausayninchejtataj payman qoporqanchej. Jehovaqa tukukuykama aguantajkunata mayta bendicenqa. Ajinamanta sutʼi rikukonqa Jehová aguantasqan mana qhasichu kasqanta. Imaraykuchus payqa, Satanás tukuy imaymana nanayta, ñakʼariyta ima rikhurichejtinpis kusisqallapuni (1 Tim. 1:11). Noqanchejpis kusisqallapuni, pacienciawantaj suyakuna Jehová sutinta jatunchananta, paylla gobernananpaj derechoyoj kasqanta rikuchinanta, tukuy sajra kausayta, llakiykunasninchejta ima chinkachinanta. Tatanchej Jehová aguantashasqanta yachayqa, mayta yanapawanchej aguantanapaj, sonqochakunapajtaj. w21.07 pág. 13 párrs. 18, 19

Jesuspa tiemponmanta ashkha runasqa mana paypi creerqankuchu. Paykunaqa uj wajcha carpinteroj wawanta jinalla qhawarqanku. Chantapis Jesusqa Nazaretmanta karqa, chay llajtitataj nisina ancha rejsisqachu karqa. Natanaelpis, niraj Jesuspa discipulon kashaspa nerqa: “¿Atinmanchu Nazaretmanta ima allinpis rikhurimuyta?”, nispa. Ichá Natanaelqa, Miqueas 5:2 nisqanpi piensashanman karqa. Chaypeqa nin Mesías Belenpi nacekunanta manataj Nazaretpichu. Profeta Isaiasqa nerqa, Mesiaspa enemigosnenqa paypa kausayninmanta mana yachayta munanankuta (Isa. 53:8). Chayrayku Jesuspa tiemponmanta runas, chay tukuynin profeciasta estudianankupaj tiempochakunkuman karqa chayqa, reparankuman karqa Jesusqa Belenpi nacekusqanta, rey Davidpa familianmantataj kasqanta (Luc. 2:4-7). Maypichus Jesús nacekusqanqa, Miqueas 5:2 profeciaj nisqanman jinapuni kasharqa. Chanta, ¿imaraykutaj runas mana creerqankuchu Jesús Mesiaspuni kasqanta? Imaraykuchus runasqa, mana allinta yachaspalla imatapis Jesusmanta parlaj kanku. Chayraykutaj paymanta karunchakaporqanku. w21.05 págs. 2, 3 párrs. 4-6

Bibliaqa parlan yuyaychaykunata japʼikoj runasmanta. Paykunatataj Diosqa bendicerqa. Jobmanta parlarina. Payqa Jehovata mayta munakorqa, tukuy imapitaj kusichiyta munarqa, jinapis pantaj runa karqa. Payqa sinchʼi llakisqa kashaspa, mana allin imasta parlarqa. Chayrayku Elihuwan Jehovawan payta yuyaycharqanku. Jobtaj kʼumuykukoj sonqo kasqanrayku, chay yuyaychaykunata japʼikorqa. Pay nerqa: ‘Noqaqa mana allinta yuyaychakuspalla parlarqani’, nispa. Chantá nillarqataj: “Noqaqa mana allinta parlaspa pantaykuni. Chay parlasqaymanta mayta pesachikuni jallpʼa patapi, ushpha patapi tiyaykukuspa”, nispa (Job 42:3-6, 12-17). Chayrayku Elihuj yuyaychasqanta japʼikorqa paymanta aswan joven kajtinpis (Job 32:6, 7). Wakin kutisqa ichá yuyasunman pillapis yuyaychariwasqanchej mana noqanchejpaj jinachu kasqanta. Jinapis kʼumuykukoj sonqo kaspaqa, noqanchejmanta aswan joven hermano yuyaychariwajtinchejpis japʼikusunpuni. Tukuypis kallpachakuyta munanchej sumaj cristianos kanapaj, aswan sumaj yachachejkuna kanapajtaj. w22.02 pág. 11 párr. 8; pág. 12 párr. 12

Tukuy kallpachakunanchej tiyan congregacionpi munakuy kananpaj, allinta kausakunapaj ima. Ajinamanta ni pi sapayakonqachu. Wajkunataqa yanapasunman ruwasqanchejwan, parlasqanchejwan ima. Ashkha hermanosqa familiankumanta sapallanku testigos kanku. ¿Imatá ruwasunman paykuna familiankuta jina qhawanawanchejpaj? Congregacionman recién jamojkunaj amigosninkuman tukunapaj kallpachakuna. Reunionesninchejman recién jamojkunataqa, tukuy sonqo japʼikuna (Rom. 15:7). Jinapis mana chayllatachu ruwananchej tiyan. Tiempo pasasqanman jina, paykunaj amigosninkuman tukunanchej tiyan. Chayrayku paykunawan kʼachas kana, tukuy sonqotaj yanaparina. Problemasniyoj kashajtinku yanaparina ama kausayninkuman satʼikuspalla. Ichá wakenqa mana willariyta atillawasunchu imaynachus kashasqankuta. Chayrayku ama pʼenqachinapaj jina, nitaj obligaspa jina imastapis tapuykachanachu. Astawanpis kʼachallamanta tapurina, pacienciawantaj uyarina. Ichapis tapurisunman imaynatachus Jehovata rejsisqankuta. w21.06 pág. 11 párrs. 13, 14

May agradecesqa kashanchej Jehová Diosta sumaj ujchasqa sirvisqanchejmanta. Imaraykuchus “uj tropalla”, “uj michejniyojllataj” kanchej. Organizados para hacer la voluntad de Jehová nisqa libropi, 165 paginapi nin: “Ujchasqallapuni kanapajqa mayta kallpachakunanchej tiyan”, nispa. Chay libropi nillanpuni: “Hermanosninchejta Jehová jina qhawasun chayqa, paykunawan allintapuni kausakusun”, nispa. Jehová Diosqa “juchʼuykunamanta” kajkunata, mayta munakuwanchej. Noqanchejpis ajinallatataj hermanosninchejta munakunanchej tiyan. Jehovaqa yachan, may allinpajtaj qhawan imastachus hermanosninchejta yanapanapaj, cuidanapaj ima ruwasqanchejta (Mat. 10:42). Hermanosninchejtaqa munakunchej. Chayrayku “mayta kallpachakuna hermanonchejta ama pantachinapaj, nitaj urmachinapaj” (Rom. 14:13). Paykunataqa noqanchejmanta aswan kurajta jina qhawana, tukuy sonqotaj perdonana. Ama saqenachu wajkunaj ruwasqasninku pantachinawanchejta. Astawanpis “tukuy imata ruwana wajkunawan allinpi kausakunapaj, jinallataj purajmanta kallpachanakunapajpis” (Rom. 14:19). w21.06 pág. 24 párrs. 16, 17

Jehová Dios Palabrannejta, llajtannejtataj yachachiwasqanchejta sumajta estudiasun, chayman jinataj kausakusun chayqa, pisimanta pisi Cristo jina yuyayta qallarisun, astawantaj Diosman qayllaykusun. Jesusqa chaymanta parlaspa uj kikinchaywan sutʼincharqa. Jesusqa, Diospa Gobiernonmanta willasqanchejta uj mujituwan kikincharqa. Chay mujituqa kʼacha runaspa sonqonpi pisimanta pisi wiñan. Jesús nerqa: “Mujustaj pʼutumuspa jatuchajta wiñanku, mana paypa [tarpojpa] yachasqallan. Jallpʼaqa sapallanmanta pisimanta pisi poqochin: Ñaupajtaqa yurata wiñachin, chantá espigachin, chantá trigota espigapi poqochin”, nispa (Mar. 4:27, 28). ¿Imatataj Jesús chaywan niyta munasharqa? Uj runa Diospa Gobiernonmanta willayta japʼikojtin, pisimanta pisi Diospa llajtanpi ñauparisqanta, imaynatachus uj plantita pisimanta pisi wiñan ajinata. Chaytataj sutʼita reparanchej estudiosninchej Jehovaman qayllaykojtinku, kausayninkutataj cambiajtinku (Efe. 4:22-24). Jinapis chay mujitutaqa Jehovalla wiñachin. w21.08 págs. 8, 9 párrs. 4, 5

Kusisqa kanapajqa imatachus kay pʼunchaypaj texto nisqan yanapawasunman. Imatachus ‘rikusqan’ imaswan kusikoj runaqa, kapusqan imaswan sonqo juntʼasqa, nisunman imastachus ruwashasqanwan. ‘Qhasi manakaj imasta’ munapayaj runatajrí mana ruwayta atisqan imasllatapuni munapayan. ¿Imatá kaywan yachakunchej? Kusisqa kayta munanchej chayqa, imatachus ruwashanchej chaywan sonqo juntʼasqa kana kasqanta. Manataj imatachus mana ruwayta atisqanchejpi musphaykachanata. Ni pipis tukuy kausayninpi kikin imasllatapuni ruwayta munanchu. Jinapis imachus kapuwasqanchejwan, ¿sonqo juntʼasqa kayta atisunmanchu? Arí. Imastachus ruwashasqanchejwanpis kusisqa kayta atisunman. ¿Imaynapí chayta yachanchej? Chaypajqa Jesuspa qolqe talentosmanta kikinchayninta qhawarisun. Chaytaj kashan Mateo 25:14-30 versiculospi. Chay kikinchaymantaqa yachakusun imatachus kusisqa kanapaj ruwanata, ruwashasqanchej imaswanpis imaynatachus aswan kusisqa kanata. w21.08 pág. 21 párrs. 5, 6

Jehovaqa mayta llakikun ‘kʼumuykukoj sonqo kajkunamanta, sonqo pʼakisqas kajkunamanta’ ima. Chay jina hermanostaqa tukuy yanapayta atinchej, nitaj ancianosllachu. ¿Imaynatá paykunata kallpachasunman? Tukuy sonqo yanaparispa. Jehovaqa munan ovejitasnin pay munakusqanta yachanankuta (Pro. 19:17). Chantapis paykunata yanapallasunmantaj kʼumuykukoj sonqo, llampʼu sonqotaj kaspa. Sumajpaj qhawasqa kayta munasunman chayqa, wajkunata envidiachisunman. Hermanosninchejtaqa yanapayta munanchej imastachus ruwayta atisqanchejwan, yachasqanchejwan ima (1 Ped. 4:10, 11). Jesusqa discipulosninwan kʼacha karqa. Paymantaqa mayta yachakusunman. Jesusqa Diospa Wawan kaspapis “llampʼu sonqo, kʼumuykukoj sonqotaj” karqa (Mat. 11:28-30). Payqa llampʼu sonqoyoj runas entiendenankupaj jina parlaj, yachachejtaj (Luc. 10:21). w21.07 pág. 23 párrs. 11, 12

Machitu hermanosninchejwan parlarinapaj kallpachakuna. Ichapis paykunaqa manaña sutʼitachu rikunku, ñakʼayta purikunku, ñakʼayllatataj parlakunku. Jinapis paykunaqa Jehovapaj llankʼayllatapuni munanku, Jehovaj ñaupaqenpitaj “sumaj runapaj rejsisqa” kanku (Ecl. 7:1). Jehovaqa paykunata may valorniyojpaj qhawan tukuy sonqo sirvisqankurayku. Noqanchejpis ajinallatataj paykunata qhawana. Eliseomanta parlarina. Payqa Eliaswan kashaspa manapuni sapanta saqerpayta munarqachu. Chay diapi kinsa kutita nerqa: ‘Mana sapaykita saqerpasqaykichu’, nispa (2 Rey. 2:2, 4, 6). Machitu hermanosninchejwanqa kʼachallamanta parlarisunman. Ajinamanta rikuchisun paykunata mayta munakusqanchejta (Pro. 1:5; 20:5; 1 Tim. 5:1, 2). Paykunataqa tapurisunman: “Joven kashajtiyki, ¿imataj yanapasorqa Jehovaj testigosnin Diospa llajtanpuni kasqanta yachanaykipaj?”, “¿Imataj yanapasorqa Jehovaman astawan qayllaykunaykipaj?”, “¿Imataj yanapasorqa Jehovata kusisqallapuni sirvinaykipaj?”, nispa (1 Tim. 6:6-8). Chantá paykuna willariwajtinchej sumajta uyarina. w21.09 pág. 7 párrs. 14, 15

Jesusqa kamacherqa predicanata, yachachinata ima. Chayta kasukunapaj tukuy atisqanchejta kallpachakuspaqa, Diosta munakusqanchejta rikuchinchej (1 Juan 5:3). Jehová Diosta munakusqanchejrayku wasimanta wasi predicaj riyta qallarerqanchej. Chaytataj ichá mana atillarqanchejchu. Chantapis qallariypi predicashaspaqa, runaswan parlariyta ichá manchachikorqanchej. Jinapis Jesuspa kamachisqanta kasukusqanchejrayku predicarqanchej. Kunantaj ichá niña anchata manchachikunchejchu. Jinapis Bibliamanta yachachiytañataj manchachikushasunman. Chaypajqa Jehovamanta yanapata, kallpata ima mañakuna. Ajinamanta Jehovaqa yanapawasun runasman Bibliamanta yachachiyta munanapaj. w21.07 pág. 3 párr. 7

Ñaupa tiempopi uj esclavomanqa uj marcata churaykoj kanku, ajinamanta sutʼi yachakunanpaj pejpa esclavonchus kasqan. Kay tiempomanta runaspis suyanqanku tukuy runas makinkupi chayri frentenkupi marcasqa kanankuta. Arí, paykunaqa ruwasqankuwan, yuyasqankuwantaj rikuchenqanku kay mundomanta gobiernospata kasqankuta, apoyasqankutataj. Noqanchejrí, ¿imatá ruwasun? ¿Marcachikusunchu, kay mundomanta gobiernostapis apoyasunchu? Mana marcachikuyta munajkunaqa ashkha llakiykunapi rikukonqanku, qhatiykachasqastaj kanqanku. Apocalipsis libropi nisqanman jinaqa, ‘mana pipis rantiyta chayri vendeyta atenqachu, manachayqa pikunachus marcasqa kanku, chaykunalla’ (Apo. 13:17). Jinapis Diospa kamachisnenqa sutʼita yachanchej Jehová Dios imatachus chay marcachikoj runasta ruwananta (Apo. 14:9, 10). Chayrayku mana chay marcawan marcachikusunchu. Astawanpis makinchejpeqa “Noqaqa Tata Diospata kani” nisqa palabras qhelqasqa jina kashanqa (Isa. 44:5). Kunan tiempo kashan Jehová Diosta tukuy sonqo kasukunanchejpaj. Ajinata ruwajtinchejtaj payqa kusisqa nenqa paypata kasqanchejta. w21.09 pág. 18 párrs. 15, 16

Runasman Diosmanta sumajta willanapajqa, wajkunawan yanapachikuna. Ñaupa tiempopi, apóstol Pabloqa Timoteoman yachacherqa imaynasmantachus predicananta, yachachinanta ima. Chantá nerqa, wajkunatapis kikillantataj yanapananta (1 Cor. 4:17). Noqanchejpis Timoteo jina, congregacionpi experienciayoj hermanoswan mayta yanapachikusunman. Chantapis Jehovamanta yanapata mañakuna. Sapa predicaj rinapaj, Jehovaj yanapanta mañakuna. Imaraykuchus atiynillanwan imatapis ruwayta atisun (Sal. 127:1; Luc. 11:13). Chantapis Jehovamanta mañakushaspaqa, sutʼita nina imapichus yanapanawanchejta. Paymanta mañakusunman, allin sonqoyoj runasta, chayri paymanta yachakuyta munaj runasta tarinapaj yanapanawanchejta. Chantapis Bibliata sapallanchejpi sumajta estudianapaj tiempochakuna. Biblia nin: “Qankunallataj sutʼita reparankichej, Diospa munaynenqa kʼacha, cheqan, payta kusichejtaj kasqanta”, nispa (Rom. 12:2). Bibliata sumajta estudiaspaqa, Jehovata aswan sumajta rejsinchej. Ajinamantataj mana iskayrayaspa wajkunaman predicanchej. w21.05 pág. 18 párrs. 14-16

Ichá estudionchejta yanapanapaj mayta kallpachakunchej, Jehovamantataj sapa kuti paypaj mañapunchej. Manapuni kausayninta cambiajtintaj saqepunchej. Chayri ichá ni uj estudionchej bautismoman chayanchu. Chaymantataj llakikusunman mana allintachu ruwashasqanchejta yuyaspa. Ichá yuyasunman Jehová mana yanapashawasqanchejta. Jehovaqa predicasqanchejta allinpaj qhawan. Payqa kallpachakusqanchejta, aguantasqanchejta ima sumajta yachan. Chantapis mayta kusikun payta munakusqanchejrayku predicajtinchej, runas mana uyariwajtinchejpis. Pablo nerqa: ‘Diosqa cheqan, manataj qonqaponqachu ruwasqaykichejta, sutinta munakusqaykichejtapis. Chaytataj Diospaj tʼaqasqa kajkunata yanapaspa rikucherqankichej, kunanpis yanapashallankichejpuni’, nispa (Heb. 6:10). Jehovaqa ni pita bautismoman chayachejtinchejpis kallpachakusqanchejta, munakusqanchejta ima mana qonqapunchu. Chayrayku imatachus Pablo Corintomanta cristianosman kay pʼunchaypaj textopi nisqanta tukuy sonqo japʼikusunman. w21.10 pág. 25 párrs. 4-6

Jesusqa discipulosninta khuyakorqa, munakorqataj. Payqa yacharqa sapa ujpis mana kikin imastachu ruwayta atisqankuta, waj jina kausayniyojtaj kasqankuta. Chayrayku discipulosnenqa mana kikin cargosta japʼiyta atinkumanchu karqa, nitaj Diospaj llankʼasqankupis kikinchu kanman karqa. Jinapis Jesusqa may allinpaj qhawaj sapa ujpa kallpachakusqanta. Chaytataj reparasunman qolqe talentosmanta parlasqanpi. Jesús nerqa, uj patrón sapa kamachinman atisqanman jina uj ruwanata qosqanta. Ruwanankuta juntʼaj kamachisninmantaqa ujnin astawan ruwasqa. Jinapis patronqa iskayninta nisqa: “Sumajta ruwanki allin kamachi”, nispa (Mat. 25:14-23). Jesusqa noqanchejtapis khuyakuwanchej, munakuwanchejtaj. Payqa yachan mana tukuychu kikin imasta ruwayta atisqanchejta, waj jina kausayniyojtaj kasqanchejta. Jinapis mayta kusikun sapa uj mayta kallpachakusqanchejmanta. Noqanchejpis paymantaqa mayta yachakusunman. w21.07 pág. 23 párrs. 12-14

Rey Davidqa mana tukuy tiempochu wajkunamanta khuyakorqa. Uj pacha Davidqa mayta phiñarikuspa Nabalta, wasinmanta tukuy kajkunatawan wañuchinanta nerqa. Imajtinchus Nabalqa Davidpaj mana allintachu parlasqa, chantapis payman, kamachisninman ima mana mikhunata qoyta munasqachu. Nabalqa phiña runa, sajrataj karqa. Jinapis Nabalpa warmin Abigailqa kʼacha, pacienciayojtaj karqa, usqhayllatataj Davidman mikhunata aparqa. Chayrayku Davidqa, Nabalta, wasinmanta kajkunatapis mana wañucherqachu (1 Sam. 25:9-22, 32-35). Davidqa phiñakuyninwan atipachikusqanrayku, Nabalta wasinmanta kajkunatapis wañuchiyta munarqa. Aswan qhepamantaj Davidqa, Natán ovejata suwakoj runamanta willarejtin, mana khuyarikuspa chay runa wañuchisqa kananta nerqa. David kʼacha runa kashaspapis, mana khuyarikuspa chay runata juzgarqa. Imajtinchus paytaqa, chay kutipi mana allin imasta ruwasqanmanta sonqon mayta juchachasharqa. Wajkunata mana khuyarikuspa juzgajqa, Jehovamanta karunchakushasqanta rikuchin. w21.10 pág. 12 párrs. 17, 18; pág. 13 párr. 20

¿Imatá kay pʼunchaypaj textomanta yachakusunman? Jehová Diosqa may llimphupuni kasqanta, noqanchejpis pay jina kayta atisqanchejta. Ichá yuyasunman pantaj runas kasqanchejrayku mana llimphus kayta atisqanchejta. Jinapis llimphus kananchej tiyan. Apóstol Pedroqa ashkha kutispi pantarqa, jinapis llimphu karqa. Chayrayku noqanchejpis llimphus kayta atisunman. ¿Imaynataj runaspaj llimphu kay chayri santo kay? Ashkha runasqa piensanku llimphus kananchejpajqa manchay serios kananchej kasqanta. Iglesiasta kamachejkuna jina chayri tata curas jina vistikunanchej kasqanta. Jinapis llimphu kayqa mana ajinachu. Bibliaqa nin Jehovaqa ‘kusikuyniyoj Dios’ kasqanta (1 Tim. 1:11). Chantá nillantaj llajtanmanta kajkunapis kusisqallataj kasqankuta (Sal. 144:15). Jesuspa tiemponpi ashkha runasqa, Jehová Diosta sirvishasqankuta rikuchiyta munaspa manchay jatuchaj ropasniyoj puriykachaj kanku. Runaswan rikuchikuyta munaspallataj allin kajta ruwaj kanku. Jesustaj paykunata juchacharqa (Mat. 6:1; Mar. 12:38). Cristianosqa Bibliapi sutʼita yachakunchej imaynachus llimphu kay kasqanta. Yachanchej Jehovaqa mayta munakuwasqanchejta, nitaj jaykʼajpis mana ruway atinasta mañanawanchejta. w21.12 pág. 2 párrs. 1, 3

Diosqa munakuwasqanchejrayku tukuy imata qowanchej. Chantapis payta yupaychajta saqewanchej. Chayrayku kamachiykunasninta kasukuspaqa, payta munakusqanchejta rikuchinchej (1 Juan 5:3). Jehovaqa munan Jesuspa kamachisqanta kasukunanchejta. Jesusqa kamachiwarqanchej, runasman yachachimunanchejta discipulosninman tukunankupaj (Mat. 28:19). Jesusqa kamachillawarqanchejtaj purajmanta munanakunanchejta (Juan 13:35). Jehovaqa payta kasukojkunata familianpaj rejsikaponqa (Sal. 15:1, 2). Runa masinchejta munakuna. Jehovaqa may munakuyniyoj Dios (1 Juan 4:8). Diosqa niraj payta rejsishajtinchejpis munakuwarqanchejña (1 Juan 4:9, 10). Noqanchejpis runa masinchejta munakuspaqa pay jina ruwanchej (Efe. 5:1). Chayrayku runastaqa tiempo kashajtillanraj Diosmanta yachakunankupaj yanapanchej. Ajinamantataj paykunata munakusqanchejta rikuchinchej (Mat. 9:36-38). Chayta ruwaspaqa paykunata yanapanchej Diospa familianmanta kayta atinankupaj. w21.08 págs. 5, 6 párrs. 13, 14

Jesusqa maytapuni Jehovata munakorqa. Chayraykutaj tukuy imapi payta kasorqa, noqanchejraykutaj kausayninta qorqa (Juan 14:31). Kay jallpʼapi imaynatachus kausakusqanwantaj, sutʼita rikucherqa runasta mayta munakusqanta. Jesusqa payman churanakoj runaswanpis kʼacha, khuyakoj runataj karqa. Chaytataj rikucherqa runasman Diospa Gobiernonmanta willarispa (Luc. 4:43, 44). Chantapis payqa saqerqa juchasapa runas sufrichinankuta, wañuchinankuta ima. Ajinamanta runasqa wiñaypaj kausayta suyakuyta atinchej. Chaytataj Jesusqa ruwarqa Diosta, runastapis mayta munakusqanrayku. Tatanchej Jehovata munakusqanchejrayku, payman kausayninchejta qoporqanchej, bautizakorqanchejtaj. Chayrayku Jehovata munakusqanchejrayku Jesús jina runasta munakuna. Apóstol Juan nerqa: “Sichus rikusqan hermanonta mana munakunchu chayqa, ¿imaynatataj munakunman mana rikusqan Diostari?”, nispa (1 Juan 4:20). w22.03 pág. 10 párrs. 8, 9

Jehová Diospaj tiempochakuspa kusisqa kajtinchejpis, wakin kutisqa mana tiempochakuyta atillanchejchu. Ashkha ruwanasniyoj kasqanchejrayku, Jehová Diosta yupaychanapaj mana tiempochakuyta atillanchejchu. Imajtinchus trabajananchej tiyan, familianchejta atiendenanchej tiyan, ruwanasninchejtapis juntʼananchej tiyan. Chayrayku wakin kutisqa, ichá orakunanchejpaj, estudiananchejpajpis niña tiempo alcanzawasunmanchu. ¿Imataj Jehová Diosta yupaychanapaj mana tiempoyojta japʼillawasunmantaj? Wakin ruwanasqa allillan kajtinpis, Jehová Diosman qayllaykunapaj mana tiempoyojta japʼiwasunman. Tukuypis tumpata kusirikunapaj ruwanasninchejmanta samarikuyta munanchej. Jinapis kusirikuyllaman qokusun chayqa, Jehovata sirvinapaj niña tiemponchej kanqachu. Chayrayku allinta qhawarikuna ama kusirikuyllaman anchata qokunapaj (Pro. 25:27; 1 Tim. 4:8). w22.01 pág. 26 párrs. 2, 3

Jehová israelitasman runa masinkuta munakunankuta nispaqa, mana israelitaspuralla munanakunankutachu nisharqa. Paykunamanqa nisharqa paykunawan tiyakoj forasterostapis munakunallankutataj. Chaytaqa Levítico 19:33, 34 sutʼita nin. Israelitasqa ‘forasterosta llajta masinkuta jina qhawananku karqa, paykuna kikinkuta jinataj munakunanku karqa’. Paykunaqa chajrankuta mana tukuynintachu ruthunanku karqa, tʼakasqankutapis mana oqharinankuchu karqa. Ajinamanta wajcha runaswan forasteroswan pallakunankupaj (Lev. 19:9, 10). Kay tiempopipis cristianosqa forasterosta munakunallanchejtaj tiyan (Luc. 10:30-37). Mundontinpi may chhika runasqa tukuy ladoman tiyakoj ripunku. Paykunamanta wakintaj ichapis wasinchej chaynejman jampunku. Paykunataqa munakunanchejpuni tiyan, respetananchejpunitaj tiyan. w21.12 pág. 12 párr. 16

Kay tiempopi Jehová Diospa yanapanta maskʼasun chayqa, qhepamanpis yanapanallawanchejpipuni atienekusun. Kaypi piensarina. Uj asambleaman rinanchejpajqa patronninchejmanta permisota mañakunanchej kanqa. Chayrí tukuynin reunionesman rinapaj, astawan predicanapajpis, wakin horariosta cambianawanchejta ninanchej kanqa. Chaykunata ruwanapajqa sinchʼi creeyniyoj kananchej tiyan, Jehovapitaj atienekunanchej tiyan. Patronninchej mana uyariwajtinchej, trabajomantataj kachapuwajtinchej, ¿imatá ruwasun? ¿Atienekusunchu Jehová Dios ni jaykʼaj saqerparinawanchejpi, necesitasqanchej imastataj qonawanchejpipuni? (Heb. 13:5). Ashkha hermanosqa Jehovapaj astawan llankʼanankupaj, ashkha tiemponkuta churanku. Paykunaqa sutʼita rikorqanku, imaynatachus Jehová necesitashajtinkupuni yanapasqanta. Arí, Jehová Diosqa ni jaykʼaj saqerpariwasunchu. Noqanchejqa Jehovawan kashanchej, chayrayku amapuni manchachikunachu imachus aswan qhepaman kananmanta. Jehovata kausayninchejpi ñaupajman churasun chayqa, payqa ni jaykʼaj saqerpawasunchu. w22.01 pág. 7 párrs. 16, 17

Qharqochikoj amigonchej kajtenqa, ichapis ancianos imatachus ajllasqankupi mana atienekuyta atillasunmanchu. Ichá yuyasunman mana tukuy imatapunichu allinta qhawaykurisqankuta. Chayri ichá yuyasunman mana Jehovaj yuyasqanman jinapunichu ruwasqankuta. ¿Imataj yanapawasunman ancianos imatachus ajllasqankuta allinpaj qhawanapaj? Juchallikojta congregacionmanta qharqonataqa Jehová kamachin. Chaytaj yanapan congregacionmanta hermanosta, jinallataj juchallikojtapis. Mana arrepientekuyta munaj juchallikoj congregacionllapipuni qhepakunman chayqa, wajkunatapis juchallichinman (Gál. 5:9). Chantapis payqa ichá juchallikusqanta allillanpaj qhawanman. Yuyanmantaj Jehová watejmanta allinpaj qhawananpaj, imatachus piensasqanta, ruwasqantapis mana cambiananpunichu kasqanta (Ecl. 8:11). Ancianosqa juchallikojta qharqospa Jehovaj munayninman jinapuni ruwanku. w22.02 págs. 5, 6 párrs. 13, 14

Wakin kutisqa ichá uj hermano chayri uj hermana, Bibliawan yuyaychasqanchejta mana japʼikonqachu, chayrí mana usqhayta kasukonqachu. Ajina kajtin ancianosqa mana phiñakunankuchu tiyan, manaqa astawan pacienciakunanku tiyan, kʼachastaj kananku tiyan. Paykunaqa Jesús jina kananku tiyan. Chayrayku ancianosqa Jehovamanta mañakunkuman, yuyaycharishanku chay hermanota chayri chay hermanata yanaparinanta, chay yuyaychayta necesitasqantapuni reparananpaj, kasukunanpajtaj. Ichapis yuyaychayta japʼej hermanoqa, piensarinanraj kanqa imatachus anciano yuyaycharisqanpi. Ancianos pacienciakonqanku, kʼachastaj kanqanku chayqa, yuyaychayta japʼej hermanoqa imatachus yuyaychasqankupi astawan piensarenqa, manataj imaynatachus yuyaychasqankupichu. Ancianospa yuyaycharisqankoqa Bibliaj nisqanman jinapuni kanan tiyan. Hermanosninchejtaqa yanaparinapaj jinapuni yuyaycharina. Ajinamanta ‘sonqonkuta kusichisun’ (Pro. 27:9). w22.02 pág. 18 párr. 17; pág. 19 párr. 19  

Ichapis Jehová Diosmantaqa, uj problemata aguantanapaj kallpata mañakunchej chayri paypa chejnisqan imasta atipanapaj yanapata mañakunchej. Jinapis ichá yuyasunman mana usqhaytachu uyarishawasqanchejta. ¿Imaraykutaj Jehová Dios mana chay ratochu tukuy ima mañakusqanchejta uyariwanchej? Payqa yachan mañakojtinchej creeyniyoj kasqanchejta (Heb. 11:6). Jehová Diosqa yachaytapuni munan mañakusqanchejman jina kausayta munasqanchejta, munaynintataj ruwayta munasqanchejta (1 Juan 3:22). Chayrayku Jehová Diospaj chejnisqan imasta saqepunapaj mayta kallpachakushanchej chayqa, ichapis pacienciakunanchej kanqa, mañakusqanchejman jinataj kausakunanchej kanqa. Jesús nerqa: “Mañakullaychejpuni qosonqachejtaj, maskʼallaychejpuni tarinkichejtaj, punkutapis takallaychejpuni kicharisonqachejtaj. Mañakojqa japʼin, maskʼajpis tarin, punkuta takajtapis kicharenqanku”, nispa (Mat. 7:7, 8). w21.08 pág. 8 párr. 1; pág. 10 párrs. 9, 10

Diospa Palabranta estudianallanchejpuni tiyan Diospi creesqanchejta astawan kallpachanapaj (Jos. 1:8). Bibliata ashkha runas qhelqajtinkupis uj yuyaylla kashan, chaypi nisqantaj juntʼakunpuni. Chayta yachaspaqa ni imarayku iskayrayasunchu yachayniyoj, munakuyniyoj Diospuni ruwawasqanchejmanta, Biblia qhelqakunanpajpis payllataj yuyaychasqanmanta (2 Tim. 3:14; 2 Ped. 1:21). Diospa Palabranta estudiashaspaqa, reparana yuyaychasqanqa maytapuni yanapawasqanchejta. Bibliaqa unayña nerqa qolqeta munakuy mana allinchu kasqanta, ‘imaymana llakiykunatataj’ apamusqanta (1 Tim. 6:9, 10; Pro. 28:20; Mat. 6:24). Biblia manapuni qolqeta munakunanchejta yuyaychawasqanchejqa may sumajpuni. Ichá yuyarikullanchejtaj Bibliapi waj imasta yuyaychasqanpis yanapawasqanchejta. Diosninchej Palabrannejta yuyaychawasqanchejta japʼikusun chayqa, astawan paypi atienekusun (Sant. 1:5). Ajinamantataj aswan kusisqa kausakusun (Isa. 48:17, 18). w21.08 págs. 17, 18 párrs. 12, 13

Viejituña chayri viejitaña kanki chayqa, Jehová Diosqa imastachus paypaj pasaj wataspi ruwasqaykita mana qonqapunchu. Qanqa predicacionpi kusiywan yanapakorqanki. Llakiykunata aguantarqanki, wakin mana aguantay atina kajtinpis. Bibliaj yuyaychaykunasninta kasukorqanki, nitaj saqerqankichu wajkuna pisipaj qhawanankuta. Diospa llajtanpi jatuchaj ruwanasta japʼisqaykita allinta juntʼarqanki, wajkunatapis sumajta wakicherqanki. Mayta kallpachakorqanki Jehovaj llajtanpi wakin cambios kajtin, chayman usqhayllata yachaykukunaykipaj. Diospaj tukuy atisqankuta llankʼajkunatapis yanaparqanki, kallpacharqankitaj. Chayrayku Jehová Diosqa maytapuni munakusunki payta tukuy sonqo sirvisqaykimanta. Chantapis Diosqa niwanchej “paypaj tʼaqasqa kajkunamanta” mana qonqapunanta (Sal. 37:28). Jehová Diosqa nillasunkitaj: ‘Yuraj chujchallaña kanaykikama wawata jina apaykachasqayki’, nispa (Isa. 46:4). Ama yuyaychu viejitaña chayri viejitoña kasqaykirayku Diospa llajtanpi niña imata ruwayta atisqaykita. Jehovapajqa may valorniyojllapuni kanki. w21.09 pág. 3 párr. 4

Jehovaqa khuyakuwanchej may yachayniyoj kasqanrayku. Payqa imatapis allinninchejpajpuni ajllan. Bibliaqa nin: ‘Patamanta jamoj yachayqa, khuyakuywan juntʼa, allin poqoykunasniyoj’, nispa (Sant. 3:17). Imaynatachus uj tata wawasninta khuyan, ajinallatataj Jehovaqa khuyakuwanchej (Isa. 49:15). Chayrayku pantaj runas kaspapis aswan qhepaman allin kausayta suyakuyta atinchej. Chantapis Jehovaqa may yachayniyoj kasqanrayku, khuyakunapaj jina kajtinchej, khuyakuwanchej. Jinapis yachan maykʼajchus mana khuyakunawanchejchu kasqanta. Payqa mana saqellanchu pipis gustonta ruwananta. Ajinamanta rikuchin may yachayniyoj kasqanta. Kaypi piensarina. Uj hermano yachashaspa millay kausaypi puriyta ajllanman. Jina kajtin, ¿imatá ruwasunman? Apóstol Pablo nerqa chay jina runawanqa amaña purinanchejta (1 Cor. 5:11). Mana juchankumanta arrepientekojkunaqa, congregacionmanta qharqosqa kanku. Paykunaqa qharqosqapuni kananku tiyan Jehovata tukuy sonqo yupaychajkunata jarkʼanapaj, Jehová llimphu kasqanta rikuchinapajtaj. w21.10 págs. 9, 10 párrs. 7, 8

Diospa Gobiernonmanta willanapaj qolqesitunchejwan yanapakuspa, Jehovata yupaychanchej. Israelitasqa Jehová Diospa ñaupaqenman mana chʼusaj makillachu rinanku karqa (Deu. 16:16). Paykunaqa atisqankuman jina Diosman uj jaywanata apananku karqa. Ajinamanta rikucherqanku, Jehová paykunarayku imastachus ruwasqanmanta mayta agradecekusqankuta. Noqanchejrí, ¿imatá ruwasunman Jehovata munakusqanchejta rikuchinapaj, noqanchejrayku imastachus ruwasqanmantataj agradecekunapaj? Atisqanchejman jina qolqesitunchejmanta churarisunman congregacionninchejmanta gastospaj, jallpʼantinpi willakunanpajpis. Apóstol Pabloqa chaymanta parlaspa nerqa: “Sichus pipis sonqomantapacha imatapis qon chayqa, Diosqa chayta allinpaj qhawan. Imaraykuchus payqa suyan sapa uj atisqanman jina qonanta, nitaj mana atisqanman jinachu”, nispa (2 Cor. 8:4, 12). Jehovaqa atisqanchejman jina qolqesitunchejmanta qojtinchej mayta kusikun, pisilla kajtinpis (Mar. 12:42-44). w22.03 pág. 24 párr. 13

Ancianosqa mana hermanospa llakiykunasninkuta chinkachiyta atinkuchu. Jinapis Jehovaqa munan mayta kallpachakunankuta ovejitasninta kallpachanankupaj, jarkʼanankupaj ima. ¿Imaynatataj ancianos ashkha ruwanasniyoj kaspapis, hermanosta yanapanankupaj tiempochakunkuman? Apóstol Pabloj ruwasqanmanta yachakunkuman. Payqa wakichisqa karqa hermanosta allinta ruwasqankuta ninanpaj, kallpachananpaj ima. Ancianosqa Pablo jina may sumajtapuni ruwanku, hermanosta munakuywan kallpachaspa (1 Tes. 2:7). Pabloqa hermanosman nerqa paywan Jehovawan mayta paykunata munakusqankuta (2 Cor. 2:4; Efe. 2:4, 5). Payqa congregacionmanta hermanosta amigosninta jina qhawarqa. Chayrayku paykunawan karinanpaj tiempochakorqa. Pabloqa sutʼita paykunaman willarqa, imastachus manchachikusqanmanta, pantaj runa kasqanmantapis (2 Cor. 7:5; 1 Tim. 1:15). Apóstol Pabloqa llakiykunasnillanpi anchata yuyananmanta, hermanosta maytapuni yanapayta munarqa. w22.03 pág. 28 párrs. 9, 10