Agosto

Chayta nispa Jesusqa ichapis payta clavarqanku chay romano soldadosta perdonananta nisharqa. Jesusqa mayta ñakʼarichejtinkupis, mana paykunapaj phiñakorqachu, nitaj paykunawan pagachikorqachu (1 Ped. 2:23). Noqanchejpis Jesús jina, wajkunata perdonanapaj wakichisqa kananchej tiyan (Col. 3:13). Ichá runas chayri familiaresninchej contranchejpi oqharikunkuman. Paykunaqa, imaraykuchus wakin imasta mana ruwasqanchejta, chayri imaynatachus kausakusqanchejta mana entiendenkuchu. Chayrayku ichá noqanchejmanta llullasta parlanqanku chayri wajkunaj ñaupaqenpi kʼumuykachachiwasun. Manachayrí publicacionesninchejta llikʼipuwasun, chayri maqaykuyta munawasun. Ajinata ruwawajtinchej ama phiñakunachu. Astawanpis Jehovamanta mañakuna paykunata cheqa kajta yachakunankupaj yanapananta (Mat. 5:44, 45). Ichá wakenqa qhasimantapuni mayta ñakʼarichiwasun, chayri imallatapis ruwawasun. Ajina kajtintaj ichapis mana paykunata perdonayta atillasunchu. Jinapis paykunata mana perdonasunchu, phiñasqallapunitaj kasun chayqa, noqallanchejpajtaj mana allinchu kanqa (Sal. 37:8). Wajkunata perdonaspaqa, manaña paykunapaj phiñasqallapunichu purinchej imastachus ruwawasqanchejmanta (Efe. 4:31, 32). w21.04 págs. 8, 9 párrs. 3, 4

Congregacionmanta pillapis qharqochikojtenqa familiaresnin may llakisqas qhepakunku. Jehová Diosqa maytachá llakikorqa ashkha ángeles paymanta karunchakojtinku (Jud. 6). Chantapis Jehovaj sonqonqa maytachá nanarqa ajllakusqan llajta kutin kutinta paypa contranpi oqharikojtinku (Sal. 78:41). Ujnin familiarniyki qharqochikojtenqa, munakuyniyoj Tatanchej Jehovapis mayta llakikullantaj. Payqa yachan may llakisqapuni kashasqaykita. Khuyakususqanraykutaj kallpachasonqa, yanapasonqa ima. Ashkha tatasqa munasqa wawanku congregacionmanta qharqochikojtin ninku: “¿Imaraykutaj mana wawayta yanaparqanichu Jehovata sirvinallanpajpuniri?”, nispa. Uj hermano nerqa: “Noqa juchayoj kasqayta yuyarqani”, nispa. Uj hermanapis yuyaj, mana allin mamachu kasqanta, nitaj allintachu Jehovamanta wawanman yachachisqanta. w21.09 pág. 26 párrs. 1, 2, 4

Iglesiaspi yachachejkunamanta wakenqa, religionespa rejsisqa universidadesninkuman chayri escuelasninkuman rinku, Jehová Diosmanta yachachiyta yachakunankupaj. Ashkha runasqa yuyanku mana chay escuelasman risqanchejrayku, Bibliamanta yachachinapaj mana wakichisqachu kasqanchejta. Jinapis tukuy imata allinta qhawaykurinanku kanman. Lucas librota qhelqajqa chayta ruwarqa. Payqa qallariymantapacha imaschus kasqanta sumajta waturerqa. Imaraykuchus payqa munarqa, qhelqasqanta leejkuna Jesusmanta uyarisqanku, cheqapuni kasqanta yachanankuta (Luc. 1:1-4). Bereapi kaj judiospis Lucas jinallataj ruwarqanku. Paykunaqa Jesusmanta sumaj willaykunata uyarispa, Diosmanta Qhelqasqaspi qhawaykurerqanku jinapunichus manachus kasqanta yachanankupaj (Hech. 17:11). Noqanchejpis paykuna jinallataj tukuy imata sumajta qhawaykurina tiyan. Diospa llajtan imatachus yachachiwasqanchejta, sumajta Bibliawan kikincharina tiyan. Chantapis imatachus Diospa llajtan kay tiempopi ruwashasqanta sumajta yachana tiyan. Chay tukuy imasta ruwajtinchejqa, runas Diospa llajtanmanta mana allin imasta parlajtinku, mana creesunchu. w21.05 pág. 3 párrs. 7, 8

Ichá congregacionmanta mayqen hermanollatapis wasinchejman wajyarikusunman. Wakin hermanospa familiaresninkoqa, mana testigos kasqankurayku, wakin fechaspi fiestachakunku. Chay hermanosqa, chay diaspi wasinchejman wajyarikunata mayta necesitanku. Wakin hermanostaj tatanku, mamanku chayri mayqen familiarninkupis wañuporqa chay fechaspi, mayta llakikunku. Chayrayku chay fechaspi chay hermanosta wasinchejman wajyarikojtinchej, paykunaqa mayta agradecekuwasun. Paykunawan karinapaj tiempochakuspaqa, tukuy sonqo yanapariyta munasqanchejta rikuchinchej (Fili. 2:20). Ashkha imasrayku wakin kutis sapayakunchej. Jinapis Jehovaqa yachan imaynachus kashasqanchejta. Chayrayku payqa hermanosnejta yanapawanchej (Mat. 12:48-50). Noqanchejtaj hermanosninchejta yanapanapaj kallpachakuspa, Jehovaman agradecekusqanchejta rikuchinchej. Wakin kutis llakikojtinchej chayri sapayakojtinchej, Jehovaqa ni jaykʼaj saqerpariwasunchu. w21.06 pág. 13 párrs. 18-20

Jesusqa runas mana uyariyta munajtinkupis, kusisqallapuni predicarqa. Imaraykuchus payqa yacharqa, runas Diosmanta yachakunankupuni kasqanta. Chaypajtaj tukuy runasta yanapariyta munarqa. Chantapis yachallarqataj Diospa Gobiernonmanta willayta mana uyariyta munajkunaqa, aswan qhepaman uyariyta munanankuta. Familianwantaj ajinapuni karqa. Jesús kinsa wata khuskanniyojta predicasqanpi, ni mayqen hermanon discipulonman tukorqachu (Juan 7:5). Paykunaqa Jesús kausarimusqanmantaraj, cristianosman tukorqanku (Hech. 1:14). Noqanchejqa mana yachanchejchu, Diospa Gobiernonmanta willajtinchej, pikunachus paypa kamachisninman tukunankuta. Wakin runasqa, mana chay ratochu Diosmanta yachakuyta munanku. Wakintaj willasqanchejta mana uyarispapis, kʼachas kasqanchejta, kusisqallapunitaj willasqanchejta rikuspa, ichapis aswan qhepaman “Diosta jatunchanqanku”. w21.05 pág. 18 párrs. 17, 18

Jesusqa kay jallpʼapi kashaspa yachachisqasninman kamacherqa, Diospa Gobiernonmanta sumaj willaykunata predicanankuta. Yachacherqataj imaynatachus chayta ruwanankuta (Luc. 8:1). Payqa yachachisqasninman nerqa imatachus ruwanankuta runas sumaj willaykunata uyarejtinku chayri mana uyarejtinku (Luc. 9:2-5). Chantapis nillarqataj kay jallpʼaj kʼuchusnintinpi willanankuta “tukuy laya runas yachanankupaj” (Mat. 24:14; Hech. 1:8). Jesusqa yachachisqasninman kamachillarqataj runasman yachachimunankuta, paykunapis kamachisqanta kasukunankupaj. Imajtinchus Jesusqa nerqa chay sumaj willaykunata, yachachisqasnin willanallankutapuni “kay mundoj imasnin tukukunankama” (Mat. 28:18-20). Chantapis Jesusqa, apóstol Juanman uj mosqoypi jina sutʼita nerqa, tukuy yachachisqasnin runasman Jehovamanta yachachinanku kasqanta (Apo. 22:17). w21.07 págs. 2, 3 párrs. 3, 4

Kay mundomanta runasqa, tukuy imata ruwanku paykunalla aswan ñaupajpi kayta munaspa. Ichá uj comercianteqa, comerciante masisninmanta nisqa aswan rejsisqa kayta munaspa wajkunata chʼaukiyanman. Ichá pelotata jaytʼaj runaqa, pujllashaspa ganaytapuni munaspa waj equipomanta kajta imanarpanman. Chayri ichá uj estudianteqa, uj sumaj universidadman yaykuytapuni munaspa, examenta qoshaspa trampata ruwanman. Cristianosqa, chay imasta ruway mana allinchu kasqanta yachanchej. Imaraykuchus chaykunaqa ‘runaj sajra munayninpa ruwasqasninmanta’ kashan (Gál. 5:19-21). Jinapis ichá wakenqa, mana reparakuspalla atipanakusta congregacionpi rikhurichishasunman. Chayrayku sumajta qhawarikuna, mana congregacionta tʼaqanachinapaj. Chantapis ñaupa tiempomanta Diospa wakin kamachisnin mana chayta ruwanankupaj mayta kallpachakusqankumanta yachakuna. w21.07 pág. 14 párrs. 1, 2

Llakisqa kaj hermanosta munakusqanchejrayku yanapanchej. Ashkha hermanosqa, congregacionninkupi llakisqa chayri sonqo pʼakisqa kaj hermanosta yanapashallankupuni. Paykunaqa hermanosninkuta munakusqankurayku tukuy imapi yanapayta munanku (Pro. 12:25; 24:10). Ajinamanta apóstol Pabloj yuyaychasqanta kasukunku. Pay nerqa ‘llakisqa kajkunata sonqochanata, llauchhiyajkunata yanapanata, tukuypajtaj pacienciayoj kanata’ (1 Tes. 5:14). Llakisqa kaj hermanotaqa mayta yanapasunman llakiyninta willariwajtinchej sumajta uyarispa, munakusqanchejta nispataj. Jehová Diosqa, mana qonqapunchu munasqa kamachisninta yanapanapaj tukuy imata ruwasqanchejmanta. Qhawarina Proverbios 19:17 nisqanta, chaypi nin: “Wajcha runata yanaparejqa Jehová Diosman manurin, paytaj chay runaman kutichiponqa chay ruwasqanmanta”, nispa. w21.11 pág. 10 párrs. 11, 12

¿Imastá kunanmantapacha ruwasunman jamoj tiempopaj wakichisqa kanapaj? Kapuwasqanchej imaswan sonqo juntʼasqa kausakuna, Jehová Dioswan amigos kasqanchejmantataj kusikuna. Tukuy atisqanchejta kallpachakuna Jehová Diosninchejta astawan rejsinapaj. Ajinamanta Magogmanta Gog contranchejpi sayaykojtin, Jehová Dios jarkʼanawanchejmanta mana iskaychakusunchu. Kay pʼunchaypaj texto nisqanqa, sutʼita rikuchiwanchej imaraykuchus David Jehová yanapananpi atienekusqanta. Davidqa Jehovapipuni atienekorqa, Jehovataj ni jaykʼaj saqerparqachu. Payqa jovencitollaraj kashaspa, filisteo Goliat sutiyoj wapu soldadowan maqanakorqa, nerqataj: “Kunanpacha Jehová Diosqa qanta makisniyman churasonqa”, nispa (1 Sam. 17:46). Aswan qhepamantaj Davidtaqa rey Saulpaj llankʼashajtin, Saúl ashkha kutispi wañuchiyta munarqa. Jinapis Jehovaqa Davidwanpuni kasharqa (1 Sam. 18:12). Davidqa ñaupajpiña rikorqa imaynatachus Jehová yanapasqanta. Chayrayku sutʼita yacharqa yanapanallantapuni. w22.01 pág. 6 párrs. 14, 15

Jehovaqa imata ruwaspapis pacienciakun. Manataj usqhay usqhayllatachu imatapis ruwarpan. Chaytataj ruwan sutinta jatunchananrayku, wajkunaj allinnintataj munasqanrayku. Jehová Diosqa kay jallpʼata runaspaj ruwashaspa, mana ujllapichu tukuy imata ruwarparqa. Bibliaqa nin “medidasninta churasqanta”, “ima patapichus” sayachisqanta, “cimiento esquina jatun rumita” churasqanta ima (Job 38:5, 6). Chantapis Diosqa ruwasqasninpi sumajta piensarejpuni (Gén. 1:10, 12). Angelesqa Jehovata sapa kuti mosoj imata ruwajta rikuspa, maytachá kusikorqanku. ¿Imatá Jehovamanta yachakunchej? Jehová Diosqa jallpʼata, estrellasta, sachʼasta, animalesta, runata ima may chhika wataspi ruwasqanta. Ruwasqasninta qhawarispataj Diosqa “rikorqa tukuy ima ruwasqanqa sumajpuni kasqanta” (Gén. 1:31). w21.08 pág. 9 párrs. 6, 7

Jesusqa kikinchayninpi parlarqa viajananpajña kashaj runamanta. Chay runaqa niraj viajashaspa kamachisninta wajyachispa sapa ujninkuman qolqe talentosta qosqa. Ajinamanta paykuna chay qolqeta llankʼachinankupaj. Sapa ujmantaj ruwayta atisqankuman jina qosqa. Ujmanqa phishqa talentosta, ujmantaj iskayta, ujninmantaj ujta. Phishqa talentosta japʼej kamachiwan iskay talentosta japʼej kamachiwanqa sumajta yuyaychakuspa, patronninkupaj astawan mirachipusqanku. Uj talentota japʼej kamachitaj mana mirachisqachu. Chayrayku patronnenqa payta kachapusqa. Iskay talentosta japʼej kamacheqa, phishqa talentosta japʼej kamachi jinallataj sumajta llankʼanan kasqanta yacharqa, patronninpajtaj tukuy atisqanta ruwarqa. Ajinamanta iskay talentostawan mirachiporqa. “Patronnintaj nisqa: ‘Sumajta ruwanki allin kamachi. Qanqa pisi kajpi allinta juntʼarqanki. Kunantaj ashkha imasta qhawanaykipaj churasqayki’”, nispa. w21.08 pág. 21 párr. 7; pág. 22 párrs. 9, 10

Jehová Diosqa kay qhepa pʼunchaykunapi runaswan mayta pacienciakushan. Payqa mana munanchu ni pi chinkachisqa kananta (2 Ped. 3:9). Astawanpis munan tukuy runas pesachikunankuta. Jinapis paciencianqa mana wiñaypajchu. Mana pesachikuyta munajkunaqa Moisespa tiemponmanta faraón jina chinkachisqas kanqanku. Jehovaqa faraonman ajinata nerqa: “Sichus makiyta oqhariyman qanta nanachisunaypaj, runasniykitawan manchay castigoswan chayqa, kay pachamanta chinkachisqaña kawaj karqa. Chaywampis kawsajta saqeyki, qampi atiyniyta rikuchinaypaj, qannejta sutiy willasqa kanampaj tukuy kay pachantimpi”, nispa (Éxo. 9:15, 16). Tukuy naciones yachanqanku Jehová Dioslla cheqa Dios kasqanta (Eze. 38:23). Kay pʼunchaypaj textopi nin jinataj, Jehovaqa qhepa kaj kharkatichiypi wiñaypaj chinkachenqa faraón jina mana kamachejninkuta jina qhawayta munajkunata. w21.09 págs. 18, 19 párrs. 17, 18

Ichapis ujnin familiariyki qharqochikusqanmanta sonqoyki mayta nanashasunki. Sichus uj hermano kallpacharisuyta munaspa sonqoykita astawan nanachisojtin, ¿imatá ruwawaj? Mana suyasunmanchu hermanos imatachus uyariyta munasqanchejtapuni ninawanchejta (Sant. 3:2). Tukuy pantaj runas kanchej. Chayrayku ama tʼukuychu pipis ni imaynamanta sonqochayta atisojtin chayri mana munashaspalla sonqoykita nanarpachisojtin. Apóstol Pablo nerqa: “Wajkuna contraykichejpi imata ruwajtinkupis, ujkuna ujkunawan aguantanakullaychejpuni, tukuy sonqotaj perdonanakuychej. Imaynatachus Jehová Dios qankunata tukuy sonqo perdonasorqachej, ajinallatataj qankunapis perdonanakuychej”, nispa (Col. 3:13). Qharqochikojpa familiaresninta yanapanallapuni. Paykunaqa mayta necesitanku munakunanchejta, kallpacharinanchejta ima (Heb. 10:24, 25). Wakin kutisqa, qharqochikojpa familiaresnin repararqanku wakin hermanos niña paykunawan parlayta munasqankuta, paykunapis qharqosqa kashankuman jina. Amapuni noqanchejqa chayta ruwanachu. Qharqosqa tatasniyoj jovenesqa, maytapuni necesitanku kallpachananchejta, “allinta ruwashanki” ninanchejtataj. w21.09 pág. 29 párrs. 13, 14; pág. 30 párr. 16

Uj jovenwan machitu hermanowan parlarispa purajmanta kallpachanakunku (Rom. 1:12). Joven hermanoqa sutʼita reparanqa tukuy sonqo sirvej kamachisninta Jehová sumajta cuidasqanta. Machitu hermanotaj reparanqa munasqa kasqanta, kusiywantaj willarenqa imaynatachus Jehová kausayninpi yanapasqanta. Jóvenes kashaspaqa alajitos kanchej, watas pasasqanman jinataj kʼusuyapunchej. Jinapis Jehovaqa watas pasasqanman jina, payta tukuy sonqo sirvej kamachisninta aswan alajitospaj qhawan (1 Tes. 1:2, 3). Imajtinchus paykunaqa watas pasasqanman jina Dios atiyninwan yachachinanta, cheqanchananta ima saqerqanku. Machitu hermanosninchejta aswan sumajta rejsispa, astawan respetaspa, astawan paykunamanta yachakuspa ima, paykunata aswan valorniyojpaj qhawasun. Jóvenes, machitu hermanosta may valorniyojpaj qhawajtinku, machitu hermanospis jovenesta kikillantataj qhawajtinku, congregacionmanta hermanosqa sumaj kallpachasqas kanku. w21.09 pág. 7 párrs. 15-18

Mayta kallpachakuna mana wajkunata llakichinapaj chayri mana sonqonkuta nanachinapaj. Kallpachakunallataj Tatanchej Jehová jina khuyakuypi qhapaj kanapaj (Efe. 2:4). Khuyakuyniyoj kasqanchejtaqa ruwasqasninchejwan rikuchinanchej tiyan. Chayrayku piensarisunman familianchejpi, congregacionninchejpi, tiyakunchej chaypi pikunatachus yanapariyta atisqanchejpi. Ajinamanta sumajta yanapariyta atisun. Ichá uj hermano chayri uj hermana sonqocharinata necesitashanman. Ajina kajtenqa mikhunitata aparipusunman, chayri waj jinamanta yanaparisunman. Chantapis qharqosqa hermanota congregacionman kutinpojtin yanaparisunman. Ichá payqa kallpachanata, sonqochanata ima necesitashanman. Tiyakunchej chaynejpipis Diosmanta sumaj willaykunata willarispa runasta sonqocharisunman (Job 29:12, 13; Rom. 10:14, 15; Sant. 1:27). Ajinamantaqa sumajta reparasun, pikunachus yanapata necesitashasqankuta. Khuyakuyniyoj kaspaqa, Tatanchej Jehovata mayta kusichisun. Payqa ‘khuyakuyninpi may qhapaj’. w21.10 pág. 13 párrs. 20-22

Davidqa 23 Salmopi parlan, Jehová michejnin kasqanrayku, ima bendicionestachus japʼisqanmanta. Payqa nerqa Jehová ‘cheqan ñanninta pusasqanta’, tukuy imapitaj paywanpuni kasqanta. Davidqa yacharqa Jehovaj ‘qʼomer pampasninpi’ kajtinpis, llakiykunapi rikukunantapuni. Chay llakiykunataj paypajqa karqa ‘manchay laqha wayqʼosta’ puriy jina. Chantapis payqa nillarqataj enemigosniyoj kananta. Davidqa Jehovata Michejninta jina qhawarqa. Chayraykutaj nerqa: “Mana manchachikunichu”, nispa. ¿Ima ‘allin imastaj’ Davidman mana faltarqachu? Paymanqa Jehovaj qayllallanpipuni kananpaj ni ima faltarqachu. Davidqa kusisqa kananpaj mana tukuy imayoj kaytachu necesitarqa. Payqa Jehová imastachus qosqanwan sonqo juntʼasqa kasharqa. Chantapis Davidpajqa aswan importante karqa Jehovaj bendicionnin, payta cuidasqan ima. Davidpa nisqasnenqa yachachiwanchej mana kapuyniyoj kaytachu ñaupajman churananchej kasqanta. w22.01 págs. 3, 4 párrs. 5-7

Watas pasasqanman jina, Jehovaj kamachisnenqa runas mana uyarejtinkupis predicallarqankupuni. Noeqa 50 watasta jina ‘cheqan kajta’ willarqa (2 Ped. 2:5). Payqa runas uyarinankuta suyarqa, jinapis Jehovaqa mana nerqachu tukuy runaspuni uyarinankuta. Astawanpis Jehovaqa Noeman arcata ruwananpaj kamachishaspa, nerqa: “Qanqa arcaman yaykuy, yaykullachunkutaj wawasniyki, warmiyki, ñojchʼasniykipis”, nispa (Gén. 6:18). Noeqa, may chhikanchus arca kananta Jehová nishajtin, repararqachá pisi runaslla uyarinankuta (Gén. 6:15). Ajinapunitaj karqa. Imajtinchus chay tiempopeqa mana uj runallapis Noeta uyarerqachu (Gén. 7:7). Jinapis Jehovaqa ni imarayku yuyarqachu Noé mana allintachu ruwasqanta. Astawanpis Noej willasqantaqa allinpaj qhawarqa. Imajtinchus Noeqa ruwarqa Jehová imaynatachus nisqanman jinapuni (Gén. 6:22). w21.10 pág. 26 párrs. 10, 11

Rutqa chayta uyarispa maytachá llakikorqa. Imajtinchus payqa maytapuni kallpachakorqa Noemita yanapananpaj. Rutqa paywan khuska waqarikorqa, sonqocharqa, ashkha diastataj paywan khuska purerqa. Ajinata paywan khuska waqarikushajtinpis Noemiqa nerqaraj: ‘Jehová Diosqa, chʼusaj makillata kutichimuwan’, nispa. Noemiqa Rutpa ruwasqanta manapis valechinmanchu jina parlasharqa. Noemijpa parlasqanqa, maytachá Rutpa sonqonta nanacherqa. Jinapis payqa manapuni Noemita saqerparqachu (Rut 1:3-18). Llakisqa kaj hermanaqa yanaparinapaj mayta kallpachakojtinchejpis, ichá sonqonchejta nanachinawanchejpaj jina imatapis parlarpanqa. Jinapis mayta kallpachakunchej mana sienterpakunapaj. Chantapis yanapallanchejpuni, Jehovamantataj yanapata mañakunchej imaynallamantapis payta sonqocharinanchejpaj (Pro. 17:17). Ichapis yanapata necesitaj hermanaqa, qallariypi mana yanapananchejta munanmanchu. Jinapis payta munakusqanchejrayku, mana munajtinpis yanapallasunpuni (Gál. 6:2). w21.11 pág. 11 párrs. 17-19

Bibliapeqa llimphu kaymanta chayri santo kaymanta parlaspa, llimphu kausayniyoj kanamanta, Jehovata kamachiykunasninman jina sirvinamanta ima parlashan. Chantapis chay palabrasqa niyta munallanmantaj, Diosta sirvinapaj tʼaqasqa kay. Nisunman llimphus chayri santos kasun llimphu kausayniyoj kaspa, Jehovata munayninman jina sirvispa, paywan sumaj amigos kaspa ima. Mayta kusikunchej pantaj runas kaspapis, may santo Diospa amigosnin kayta atisqanchejmanta. Jehová Diosqa tukuy imapi llimphutaj santotaj. Chaytapunitaj nerqanku Jehová Diospa kamachina tiyananpa muyuyninpi kaj ángeles. Chay angelestaqa serafines sutiwan rejsikun. Paykuna nerqanku: “Santo, santo, santo Jehová Diosqa, paymin angelesta kamachejqa”, nispa (Isa. 6:3). Paykunaqa Jehová Dioswan sumaj amigos kanankupaj llimphus kananku tiyan. w21.12 pág. 3 párrs. 4, 5

Ashkha jovenesqa kausayninkupi imatachus ruwayta mana ajllayta atillankuchu. Imaraykuchus ichá profesoresninku chayrí mana testigo parientesninku paykunata mayta tanqanku universidadman yaykunankupaj. Ajinamanta sumaj trabajoyoj kaspa, ashkha qolqeta gananankupaj. Jinapis universidadman riyta ajllanqanku chayqa, ichapis chayllapaj tiemponku alcanzanqa. Tatasninkuwan congregacionmanta hermanoswantaj, ichá paykunata kallpacharinku Jehovapaj tukuy atisqankuta llankʼanankupaj. Jina kajtin, Jehovata munakoj jóvenes, ¿imatataj ruwawajchej kausayniykichejpi allin kajtapuni ajllanaykichejpaj? Allin kanman Efesios 5:15-17 versiculosta leerinaykichej, imatachus nisqanpitaj tʼukurinaykichej. Chaymantataj kaypi piensariychej, ¿imata ruwanaykichejtataj Jehová munan? ¿Imata ruwayta ajllasqaykichejtataj Jehová allinpaj qhawanman? ¿Universidadman riychu chayri Jehovata sirvinapaj astawan tiempochakuychu aswan sumaj kanman? Amapuni qonqanachu ‘sajra pʼunchaykunapi kausashasqanchejta’. Satanaspa makinpi sajra mundoqa chinkachisqa kananpajña kashan. w22.01 pág. 27 párr. 5

¿Maykʼajtaj Santiago Jesuspa discipulonman tukorqa? Jesusqa kausarinpuytawan “Santiagoman rikhurerqa, chantá tukuynin apostolesman” (1 Cor. 15:7). Santiagoqa Jesús payman rikhurisqanmantapacha, Jesuspa discipulonman tukorqa. Uj pacha Jesuspa apostolesnenqa, Jerusalenpi uj wasej alto patanpi tantasqa kasharqanku. Paykunaqa espíritu santota japʼiyta suyakusharqanku, Santiagotaj paykunawan khuska kasharqa (Hech. 1:13, 14). Aswan qhepamantaj Santiagoqa Diospa llajtanta kamachejkunamanta ujnin karqa (Hech. 15:6, 13-22; Gál. 2:9). Kay 62 wata ñaupajtataj, Santiagoqa Jehovaj yuyaychasqanman jina ajllasqa cristianosman uj cartata qhelqarqa. Chay cartataj kay tiempopi yanapashallawanchejpuni, cielopi chayri kay jallpʼapi kausakuyta suyakojtinchejpis (Sant. 1:1). Ñaupa tiempomanta qhelqaj judío Josefo nisqanman jina, Santiagotaqa Anaspa wawan Ananías wañuchicherqa. Santiagoqa kay jallpʼapi wañupunankama Jehovata mana wasanchaspa sirverqa. w22.01 pág. 8 párr. 3; pág. 9 párr. 5

Kay pʼunchaypaj textomantaqa yachakusunman, creeyninchejrayku ima llakiypi rikukojtinchejpis, Jehová jarkʼanawanchejta mana suyanachu kasqanta. Jesús jinataj wakichisqa kananchej tiyan, Jehová Diosta wañupunanchejkama mana wasanchanapaj (Mat. 16:24, 25). Jehovaqa ‘mana saqenqachu, mana sayay atinakama’ ñakʼarinanchejta (1 Cor. 10:13). Yachakullanchejtaj Jesús jina ichapis qhasillamanta ñakʼarichisqa kananchejta (1 Ped. 2:19, 20). Runasqa churanakuwanchej mana paykuna jina kasqanchejrayku, Diosmanta willasqanchejrayku ima (Juan 17:14; 1 Ped. 4:15, 16). Jesusqa sutʼita yacharqa, imaraykuchus enemigosnin wañuchinankuta Jehová saqeshasqanta. Jinapis Diospa wakin kamachisnenqa, llakiykunapi kaspa ninchej: “¿Imaraykutaj Dios kay jina llakiykunapi kanayta saqenri?”, nispa (Hab. 1:3). Chayta nejtinchejpis Jehová Diosqa sonqochawanchej, manataj yuyanchu pisi creeyniyoj kasqanchejta. Chaytataj ruwan khuyakuyniyoj, pacienciayojtaj kasqanrayku (2 Cor. 1:3, 4). w21.04 pág. 11 párrs. 9, 10

Jehovaqa yupaychasqanchejta allinpaj qhawanqa paypa munayninman jina ruwajtinchej, payta munakojtinchej, jatunpajtaj qhawajtinchej. Noqanchejqa Jehovata mayta munakunchej, yachanchejtaj paylla yupaychanapaj jina kasqanta. Orakuspaqa Jehovata yupaychanchej. Inciensotaqa ñaupa tiempopi sumajta wakichej kanku, Jehovapaj qʼoshñichinankupaj Diosta yupaychana toldopi, aswan qhepamantaj templopi. Bibliataj Diosmanta mañakusqanchejta chay inciensowan kikinchan. Chay inciensoqa Diospaj ima munayta qʼaparej. Ajinallatataj tukuy sonqo Jehovaman orakusqanchejqa “paypa sonqonta kusichin”, pisi palabrasllawan mañakojtinchejpis (Pro. 15:8; Deu. 33:10). Jehová Diosqa payta munakusqanchejta, agradecekusqanchejtataj mayta uyariyta munan. Payqa munallantaj willarinanchejta imastachus ruwayta munasqanchejta, imaschus llakichiwasqanchejta, imastatajchus mayta suyakushasqanchejta. Chayrayku allin kanman, niraj orakushaspa sumajta piensarinanchej imatachus ninanchejpi. Ajinamanta orakusqanchejqa, Tatanchej Jehovapaj ima munay qʼaparej “incienso jina” kanqa. w22.03 pág. 20 párr. 2; pág. 21 párr. 7

Armagedonpeqa pitachus Jehová khuyakunan, pitatajchus mana khuyakunanqa mana noqanchejmantachu kanqa (Mat. 25:34, 41, 46). ¿Jehová imaynatachus juzgasqanpi atienekusunchu, chayri mana allin rijchʼawasqanchejrayku phiñakusunchu? Kunan tukuy atisqanchejta Jehová Diospi atienekuna. Ajinamanta qhepamanpis paypi atienekullasunpuni. Mosoj jallpʼapi kausakoyqa, may sumajpuni kanqa. Chaypeqa manaña kanqachu llulla religiones, qhapajyayta munaj runas, runasta ñakʼarichej gobiernospis. Chaypeqa manaña onqosunchu, niña machuyapusunchu, nitaj familiaresninchejpis wañuponqankuchu. Satanaswan supaykunasninwanqa 1.000 wataspaj watasqa kanqanku. Paykuna Diospa contranpi oqharikusqankurayku sajra imas kasqanpis chinkaponqa (Apo. 20:2, 3). Chaypachaqa maytapuni agradecekusun, Jehová cheqan kajtapuni ruwasqanpi atienekusqanchejmanta. w22.02 págs. 6, 7 párrs. 16, 17

Jesusqa wajkunawan allinpi kananpaj, pay ñaupajta parlaj. Wajkunatataj kallpacharej problemasninkuta allinchanankupaj. Jesusqa runasman yachacherqa, Dios yupaychayninkuta allinpaj qhawananpaj hermanonkuwanraj allinyakunanku kasqanta (Mat. 5:23, 24). Chantapis sapa kuti apostolesninman nerqa, ama siminakunankuta mayqenninkuchus aswan kurajpaj qhawasqa kasqankumanta (Luc. 9:46-48; 22:24-27). Wajkunawan allinpi kausakunapajqa, mayta kallpachakunanchej tiyan mana chʼajwasta rikhurichinapaj. Chantapis wajkunawan allinyakunapaj, hermanosninchejta problemasninkuta allinchanankupaj yuyaycharinapajpis, noqanchej ñaupajta paykunawan parlarinanchej tiyan (Fili. 4:2, 3; Sant. 3:17, 18). Kay tapuykunapi piensarisunman: “¿Tukuy atisqaytachu kallpachakuni wajkunawan allinyakunaypaj? Uj hermano sonqoyta nanarpachiwajtin, ¿phiñasqallapunichu kani? ¿Suyanichu payraj noqawan allinyakunanpaj jamunanta? Chayrí, ¿noqachu allinyakunaykupaj ñaupajta parlani pay juchayoj kasqanta yuyajtiypis?” w22.03 pág. 10 párrs. 10, 11

Bibliaqa unayña nerqa Diospa ‘kamachisnin yanapakunankupaj wakichisqa kanankuta’. Chaytataj ruwananku karqa Jesuspa nisqanman jina Jehovata sirvispa (Sal. 110:3). Chay profeciaqa kay tiempopi juntʼakushan. Sapa wata Jehovaj kamachisnenqa may chhika horasta tukuy atisqankuta predicashanku. Chayta ruwasqankumantaqa mana pagota japʼinkuchu. Astawanpis sonqomantapacha yanapakuyta munasqankurayku ruwanku. Chantapis paykunaqa kallpachakunku, hermanosta imastachus necesitasqankupi yanapanankupaj, creeypi astawan sinchʼi sayasqa kaypi yanapanankupaj, kallpacharinankupaj ima. Ancianoswan siervos ministerialeswanpis tukuy atisqankuta tiempochakunku, reunionespaj wakichikunankupaj, hermanosta visitarispa kallpacharinankupaj ima. Diospa llajtanmanta kajkunaqa chayta ruwanku Jehovata, runa masinkutapis munakusqankurayku (Mat. 22:37-39). Jesusqa wajkunaj allinninkutapuni ñaupajta maskʼarqa. Noqanchejpis mayta kallpachakushanchej pay jina ruwanapaj (Rom. 15:1-3). Chayta ruwaspaqa kusisqa kasun. w22.02 pág. 20 párrs. 1, 2

Israelpeqa casi tukuy runas astawan chajrapi trabajaj kanku. Peonesmantaj chay diapacha niraj inti yaykupushajtin pagapuna kaj. Imaraykuchus peonesqa, chay día trabajasqankuwan familiankuta mikhuchej kanku. Chayrayku mana pagonkuta japʼispaqa, ni imawan familiankuta mikhuchiyta atejchu kanku. Jehovaqa sutʼita nerqa: “Payqa llakiypi kashan, chay qolqetataj suyashan kausakunanpaj”, nispa (Deu. 24:14, 15; Mat. 20:8). Kay tiempopi ashkha runasqa, mana sapa diachu sueldonkuta cobranku. Manaqa killapi ujta chayri iskayta cobranku. Jinapis imatachus Levítico 19:13 yuyaychasqanqa yanapallawanchejpuni. Ashkha runasqa peonesninkuman chayri empleadosninkuman, mana mashkhatachus pagananku kasqantachu pagapunku. Imaraykuchus paykunaqa yachanku pisisituta pagajtinkupis, necesitasqankurayku paykunapaj trabajanallankutapuni. Chay runasqa chayta ruwaspa, empleadosninkoj chayri peonesninkoj sueldonkuta qʼayantinkamapis japʼikapushankuman jina ruwashanku. Uj cristiano negocionpi empleadosniyoj chayqa, allinta qhawarikunan tiyan empleadosninman imaynatachus pagapushasqanta. w21.12 pág. 10 párrs. 9, 10

Jesustaqa maytapuni ñakʼaricherqanku. Chayraykuchá payqa mayta chʼakichikorqa, yakituta jaywarinankutataj munarqa. Jesusqa yanapata mañakuyta mana manchachikorqachu. Noqanchejpis manallataj manchachikunachu tiyan. Ichapis wakin kuteqa, mana piwanpis yanapachikuyta munallanchejchu. Jinapis yanapata necesitaspaqa, wajkunawan yanapachikuna. Machitus chayrí onqosqas kanchej chayqa, rantikoj chayri doctorman rinapaj yanapachikuna. Llakisqa kashanchej chaytaj, uj ancianowan chayri experienciayoj hermanowan parlarina. Paykunataj sumajta uyariwasun, chayri miskʼi palabraswan kallpachariwasun (Pro. 12:25). Hermanosninchejqa mayta munakuwanchej, llakiypi kashajtinchejtaj yanapayta munawanchej (Pro. 17:17). Jinapis llakiyninchejta mana willakusunchu chayqa, mana yachanqankuchu yanapata necesitasqanchejta. w21.04 pág. 12 párrs. 11, 12  

Kausayninchejpi cambios kajtin, wakin kutisqa mana chayman yachaykukuyta atillanchejchu. Wakin hermanosqa unaytaña misioneros jina, Betelpi, construccionpi chayri waj imaspi llankʼashaspa, waj asignacionta japʼerqanku. Wakintaj Diospa llajtanpi imatachus ruwashasqanku mayta gustajtinpis, kurajsitusña kasqankurayku ichá saqeporqanku. Chay imastaj wakin kutisqa llakichiwanchejpuni. Ichá imajtinchus mosoj asignacionta qowasqanchejtaqa mana entiendeyta atillasunchu, nitaj allinchu rijchʼawasun. Kausayninchejpi ima cambiostapis Jehová jina qhawana. Ajinamanta chay cambiosman yachaykukullasun. Jehovaqa kay tiempopi tʼukuna imasta ruwashan, noqanchejtaj chaypi yanapakushanchej (1 Cor. 3:9). Jehovaqa munakullawasunpuni. Chayrayku Diospa llajtanpi waj asignacionman cambiawanchej chayqa, ama imaraykuchus cambiawasqanchejpi yuyanallapunichu. “Unay tiemposqa aswan sumaj karqa” ninamantaqa, Jehovamanta mañakuna mosoj asignacionninchejpi allin imasta reparachinawanchejta (Ecl. 7:10). Imatachus ruwayta atisqanchejpi astawan yuyana. Ajinamanta kausayninchejpi cambios kajtinpis, kusisqallapuni Jehovata sirvisun. w22.03 pág. 17 párrs. 11, 12

¿Pikunamantaj Jehová Dios mana tukukuyniyoj munakuyninta rikuchin? Bibliaqa nin ashkha imasta munakuyta atisqanchejta: ‘chajrata’, ‘yuyaychayta’, “yachayta”, ‘vinota’, ‘aceiteta’, “yachayniyoj kayta”, waj imastawan (2 Cró. 26:10; Pro. 12:1; 21:17; 29:3). Mana tukukoj munakuytaj mana chay imaspaj kanmanchu. Chayqa runasllapaj. Chaywan, ¿nishanchejchu Jehová Dios pi runallatapis ajinata munakusqanta? Mana. Chay munakuytaqa paywan allinpi kajkunallaman rikuchin. Diosninchejpa mana tukukuyniyoj munakuynenqa amigosnillanpaj. Diosqa paykunapaj allin imasta ruwananta ninña. Nitaj jaykʼajpis paykunata saqerparenqachu. Jehová Diosqa tukuy runasman munakuyninta rikuchin. Jesusqa Nicodemo sutiyoj runaman nerqa: “Diosqa chay jinatapuni kay mundomanta runasta munakusqanrayku, uj kʼata Wawanta qorqa, ajinamanta pillapis paypi creejqa mana wañunanpaj, manachayqa wiñay kausayniyoj kananpaj”, nispa (Juan 3:1, 16; Mat. 5:44, 45). w21.11 pág. 2 párr. 3; pág. 3 párrs. 6, 7

Kay mundopi kausayqa llakiylla. Aswan qhepamantaj ichá aswan llakiyraj kanqa (Mat. 24:21). Mayta suyakushanchej kay tukuy imas chinkachisqa kananta. Chinkajtintaj ni jaykʼajpis chaykunamanta yuyarikusunchu, niñataj ujtawan chay jina llakiykuna kanqachu (Isa. 65:16, 17). Chayrayku sinchʼita sayanapaj kallpachakunallapuni. Imaraykuchus Jesusqa nerqa: “Sinchʼita sayasqaykichejrayku salvakunkichej”, nispa (Luc. 21:19). Ashkha hermanosninchejwanqa casi kikin problemasniyoj kanchej. Jinapis paykuna imaynatachus aguantasqankoqa yanapawanchej paykuna jina aguantanapaj. Jehová Diosqa kunankama ashkha imasta aguantashan. ¿Imajtintaj chayta ninchej? Kay mundoqa Kuraj Supaypa atiyninpi kashasqanrayku problemaswan juntʼa kashan. Jehovataj kay sajra mundota kunanpacha chinkarparichiyta atinman, jinallataj problemastapis. Chaywanpis payqa, señalasqan tiempota suyakushan (Rom. 9:22). Chaykamataj, Jehovaqa aguantashallanpuni. Paymantataj mayta yachakusunman. w21.07 pág. 8 párrs. 2-4