Septiembre

Jesuspa tiemponmanta wakin runasqa, paypa yachachisqanta mana creerqankuchu. Astawanpis uj señalta rikuchinanta mañakorqanku. Jinapis Jesús ni ima señalta rikuchejtin, paymanta karunchakaporqanku (Mat. 16:4). Diosmanta Qhelqasqaspi, ¿imatataj Mesiasmanta nerqa? Profeta Isaías nerqa: “Payqa mana qhaparenqachu, nitaj jatunmanta parlanqachu, manataj callespipis sinchʼita parlanqachu”, nispa (Isa. 42:1, 2). Jesusqa Diosmanta willashaspa, mana qhaparispachu purerqa, nitaj jatunpaj qhawachikuytachu munarqa. Jesusqa mana jatuchaj templosta ruwacherqachu. Nillataj runas jatunpaj qhawanankupaj jina ropata churakorqachu. Nitaj runas sumaj sutiswan rejsinankutapis munarqachu. Rey Herodesqa Jesusta juzgashaspa, uj milagrota ruwananta mañarqa. Jesustaj wañuy patapi kashaspapis, mana chay kutipi ima milagrotapis ruwarqachu (Luc. 23:8-11). Jesusqa kay jallpʼapi kashaspa ashkha milagrosta ruwarqa. Jinapis payqa Jehová Diospa Gobiernonmantapuni astawan willarqa. Chayrayku discipulosninman nerqa: “Chaypajmin jamuni”, nispa (Mar. 1:38). w21.05 pág. 4 párrs. 9, 10

Noqanchejqa maskʼanchej “wiñay kausayta japʼinankupaj allin sonqoyoj” kajkunata (Hech. 13:48). Runas Jesuspa yachachisqasninman tukunankupajqa, paykunata yanapananchej tiyan, 1) Bibliamanta yachakushasqanta entiendenankupaj, 2) chaypi creenankupaj, 3) yachakusqankuman jinataj kausanankupaj (Col. 2:6, 7; 1 Tes. 2:13). Paykunataqa tukuy hermanos yanapasunman reunionesman jamojtinku kʼachamanta napaykuspa, allin jamusqa kasqankutataj nispa (Juan 13:35). Ichapis Bibliamanta yachachej hermano chayri hermanaqa estudionta yanapananpaj tiempochakunan, kallpachakunantaj kanqa. Ichapis estudionqa llulla creenciasninta chayri “sumaj jarkʼachasqa perqasman rijchʼakoj” costumbresninta saqenan kashan (2 Cor. 10:4, 5). Wakin estudiosqa ashkha killaspi llulla creenciasninkuta, costumbresninkuta ima saqenku. Chaymantataj bautizakuyta atinku. Jinapis paykunata cambianankupaj yanapasqanchejqa mana qhasichu. w21.07 pág. 3 párr. 6

¿Sutʼitachu yachanchej Jehovaj testigosnin cheqa kajtapuni yachachisqanchejta? ¿Sutʼitachu yachanchej noqanchejpa yupaychasqallanchejta Dios allinpaj qhawasqanta? Apóstol Pabloqa yacharqa Diosmanta yachakusqan cheqapuni kasqanta (1 Tes. 1:5). Payqa Diospa Palabranta sumajta estudiasqanrayku yacharqa cheqapuni kasqanta. Yachallarqataj ‘Diosmanta tukuy Qhelqasqaqa paypa yuyaychasqan’ kasqanta (2 Tim. 3:16). Pabloqa Diospa Palabranta sumajta estudiaspa repararqa Jesuspuni Mesías kasqanta. Chaywanpis judiospa religionninkuta kamachejkunaqa mana Pablo jinachu Diospa Palabranta estudiarqanku. Paykunaqa runasman Diosmanta cheqa kajta yachachisqankuta nej kanku, jinapis Diospa chejnisqan imasta ruwaj kanku (Tito 1:16). Apóstol Pablotaj Diospa Palabranpi tukuy ima nisqanta creerqa, manataj wakillanpichu. Payqa wakichisqa kasharqa ‘Diospa tukuy munayninta’ yachachinanpaj, chayman jinataj kausakunanpaj (Hech. 20:27). w21.10 pág. 18 párrs. 1, 2

Noqanchejqa Diosmanta willaspa plantanchej, qarpanchej ima. Jinapis Jehová Dioslla ‘wiñachin’ (1 Cor. 3:6, 7). Jehovapajqa tukuy runas may valorniyoj kanchej. Chayrayku Jehovaqa, niraj kay mundoj tukukuynin chamushajtin, ashkha runasta llajtanman pusaykamushan. Chay llankʼaypitaj Wawanwan khuska yanapakojta saqewanchej (Isa. 2:2). Piensarina uj mina chayri qhoya minerosta pʼampaykusqanpi. Chay minerosta salvanankupajqa ashkhas yanapakunku. Chay minerosta wakillan salvajtinkupis, tukuyninku imaynallamantapis sumajta yanapakunku. Predicasqanchejwanpis kikillantaj. Mana yachanchejchu, predicasqanchejrayku mashkha runaschus Satanaspa sajra mundonmanta kacharichikunankuta. Jinapis sutʼita yachanchej, Jehovaqa noqanchejnejta, chayri mayqen hermanonejllatapis, runasta yanapayta atisqanta. Hermano Andreas Boliviapi tiyakun. Pay nin: “Kayta sutʼita yachani. Bibliamanta yachakoj bautismoman chayananpajqa, tukuy hermanos yanapakunku”, nispa. Chayrayku kusisqallapuni predicanapaj kallpachakuna. Chayta ruwasun chayqa, Jehová Dios bendeciwasun, predicaspataj aswan kusisqa kasun. w21.05 pág. 19 párrs. 19, 20

Uj cazadorqa tukuy imaynasmanta trampasta wakichin monte animalesta japʼinanpaj chayri wañuchinanpaj. Chay trampasmanta ujtaj Job 18:8-10 versiculospi nisqan kashan. Payqa animalesta, sumajta wateqan maynintachus purisqanta, imatachus mikhusqantapis. Chayman jinataj, sumajta yuyaychakuspa mana reparayllata trampasta wakichin. Satanaspis kikillantataj wateqawanchej imastachus ruwasqanchejta, imaschus gustawasqanchejtapis. Chayta yachaytawantaj mana reparananchejpaj jina trampasta wakichin. Jinapis Bibliaqa niwanchej Satanaspa trampasninpi mana urmanapaj, imastachus ruwanata. Trampasninpi urmanchej chaytaj, Bibliaqa nillawanchejtaj chay trampasmanta kacharichikunapaj imastachus ruwanata. Satanasqa tukuy trampasninmanta, iskay trampaswan astawan runasta urmachin. Chaykunataj kashanku jatunchakuy, tukuy imata munapayay ima. Satanasqa ashkha watastaña chay trampaswan runasta engañashan. Payqa pʼesqota japʼej runa jina, runasta urmachinanpaj mana reparayllata sumajta trampasninta wakichin (Sal. 91:3). Jinapis chay trampasninpeqa mana urmananchejchu tiyan. Imaraykuchus Jehovaqa, sutʼita willawanchej mayqenkunachus chay trampas kasqanta (2 Cor. 2:11). w21.06 pág. 14 párrs. 1, 2

Cheqa sonqo machitu hermanosninchejqa, may valorniyoj kanku. Diospa Palabranqa paykuna yuraj umitas kasqankuta uj pilluwan kikinchan (Pro. 20:29). Jinapis ichá paykunamanta qonqakapushasunman. Machitu hermanosta jatunpaj qhawaj jovenesqa, diamante rumimantapis chay hermanos aswan valorniyoj kasqankuta reparanku. Jehová Diosninchejqa may valorniyojpaj qhawan machitu hermanosninchejta. Payqa yachan imayna runaschus kasqankuta. May allinpajtaj qhawan kʼacha cristianos kasqankuta. Jehovaqa mayta kusikun machitu hermanos watas pasasqanman jina imastachus yachakusqankuta joven hermanosman yachachejtinku (Job 12:12; Pro. 1:1-4). Chantapis Jehovaqa allinpaj qhawan chay hermanos llakiykunata aguantasqankuta (Mal. 3:16). Sinchʼi llakiykunapi kaspapis paykunaqa Jehová Diosmanta manapuni karunchakorqankuchu. Chantapis kunanqa wiñay kausayta japʼinankuta suyakusqanku aswan sinchʼi, qallariymanta nisqaqa. Jehovaqa paykunata munakun, imaraykuchus “machu kayninkupipis” sutinmanta willashallankupuni (Sal. 92:12-15). w21.09 pág. 2 párrs. 2, 3  

Allin kanman sapa kuti kay tapuykunapi piensarinanchej: “¿Wajkunamanta aswan sumaj kasqayta yuyaspallachu kusisqa kani? ¿Imataj congregacionpi yanapakunaypaj tanqawan? ¿Wajkunamanta aswan ñaupajpi kayta munasqaychu? Chayri, ¿mayqen hermanomanta, hermanamanta aswan ñaupajpi kayta munasqaychu? Manachayrí, ¿Jehovata tukuy sonqo sirviyta munasqaychu?”. Bibliaqa niwanchej mana wajkunawan kikinchakunata. Imaraykuchus wajkunawan kikinchakuspaqa, aswan sumaj kasqanchejta yuyakusunman. Ajinamantataj jatunchakusunman chayri pisipaj qhawakusunman (Rom. 12:3). Jehovaqa llajtanman pusamuwarqanchej mana alajitos, alajitas kasqanchejraykuchu, mana sumajta parlasqanchejraykuchu, nitaj sumaj rejsisqa kasqanchejraykuchu. Manaqa payta munakusqanchejrayku, Wawantapis kasukuyta munasqanchejrayku (Juan 6:44; 1 Cor. 1:26-31). w21.07 pág. 15 párrs. 3, 4

Yuyayninchejta mosojyachinapajqa orakunanchej tiyan, Diospa Palabranta estudiananchej tiyan, chaypitaj tʼukurinanchej tiyan. Chantapis Jehovamanta kallpata mañakuna. Jehovaqa atiyninwan yanapawasun mana wajkunawan kikinchakunapaj. Chantapis jatunchakuypi chayri envidiakuypi urmashanchej chayqa, usqhayllata cambianapaj yanapawasun (2 Cró. 6:28-30). Jehovaqa yachan imaynachus kasqanchejta. Chantapis yachallantaj kay sajra mundoj yuyayninwan mana chimpachikunapaj kallpachakushasqanchejta, juchasapa kayninchejwantaj maqanakushasqanchejta. Chayrayku Jehovaqa mayta kallpachakushasqanchejta rikuspa astawan munakuwanchej. Jehovaqa mayta munakuwanchej, imaynatachus uj mama wawitanta munakun ajinata (Isa. 49:15). Jehová Diospis payta sirvinapaj tukuy atisqanchejta kallpachakusqanchejmanta, chay mama jina munakuwanchej. Chayta yachaytaj maytapuni sonqochawanchej. w21.07 págs. 24, 25 párrs. 17-19

Noqanchejpis iskay talentosta japʼej kamachi jina, Jehovaj llajtanpi ima ruwanallatapis sumajta ruwanapaj kallpachakusun chayqa, aswan kusisqa kasun. Tukuy atisqanchejta predicana, congregacionpipis tukuy atisqanchejta yanapakuna (Hech. 18:5; Heb. 10:24, 25). Reunionespi comentariosninchejwan wajkunata kallpachanapaj sumajta wakichikuna. Cristiano Kausayninchej tantakuypaj asignacionta japʼinchej chayqa, sumajta juntʼanapaj kallpachakuna. Congregacionpi imallapipis yanapakunata niwajtinchejqa, tiemponpi tukuna, niwasqanchejman jinataj ruwana. Ama pisipaj qhawanachu wakin ruwanasninchejta, nitaj yuyanachu uj ratollapi ruwarpananchej kasqanta. Imatapis aswan sumajta ruwanapaj mayta kallpachakuna (Pro. 22:29). Jehovapaj astawan llankʼasun chayqa, paywan sumaj amigos kasunchej, aswan kusisqataj (Gál. 6:4). Waj hermanosninchej munasqanchej cargota japʼejtinkupis, mana phiñakusunchu, astawanqa kusikusun (Gál. 5:26). w21.08 pág. 22 párr. 11

Kʼumuykukoj sonqo kana, Jehová yachachinawanchejtataj saqekuna. Imaynatachus uj onqoy corazonninchejta mana allinta funcionajta saqenchu, ajinallatataj jatunchakuypis mana saqewasunmanchu Jehovata kasukojta. Jesuspeqa sutʼi karqa Diospa Wawanpuni kasqan, Diospa espíritu santontapis japʼisqan. Jinapis fariseosqa sonqonkuta rumiyachisqankurayku chayri jatunchakusqankurayku, manapuni paypi creerqankuchu (Juan 12:37-40). Paykunaqa ajina kasqankurayku wiñay kausayta pierderqanku (Mat. 23:13, 33). Tukuy atisqanchejta kallpachakunallapuni, Diospa Palabranwan espíritu santonwan kausayninchejpi, yuyayninchejpipis yanapachikunapaj. Chayman jinataj imatapis kausayninchejpi ruwana. Santiagoqa kʼumuykukoj sonqo kasqanrayku, astawan Jehovamanta yachakuyta munallarqapuni. Chayraykutaj uj sumaj yachachej karqa. w22.01 pág. 10 párr. 7

Mana saykʼuspa Diosmanta mañakusun chayqa, Tatanchej Jehová uyariwasunpuni (Col. 4:2). Ichapis yuyasunman Jehovaqa mañakusqanchejta mana usqhayta uyariwasqanchejta. Jinapis payqa, yanapata necesitashajtinchejpuni uyariwasun (Heb. 4:16). Chayrayku Jehová Dios mañakusqanchejta mana usqhaytachu uyariwasqanchejta yuyanchej chayqa, ama payta juchachanachu. Ashkha hermanosqa unaytaña Jehovamanta mañakushanku Gobiernon kay sajra mundota chinkachinanta. Jesuspis nerqa Diospa Gobiernonta mañakunanchejta (Mat. 6:10). Ichapis mayta suyakusharqanchej Jehová Dios kay sajra mundota chinkachinallantaña. Mana suyakusqanchejman jinachu kasqanraykutaj, ichá Jehovamanta karunchakuyta munasunman. Chaytaj nipuni allinchu kanman (Hab. 2:3; Mat. 24:44). Astawanpis allin kanman Jehovapi suyakunallanchejpuni, creeywantaj mañakunallanchejpuni. Jehová Diosqa kay sajra mundota maychus tiemponpi chinkachenqa. Payqa yachanña ima ‘pʼunchaychus, ima horatajchus’ chayta ruwananta. Chaytaj may sumajpuni kanqa tukuypaj (Mat. 24:36; 2 Ped. 3:15). w21.08 pág. 10 párrs. 10, 11

Kʼumuykukoj sonqo machitu hermanosqa, watas pasasqanman jina sutʼita reparanku manaña jóvenes jinachu ruwayta atisqankuta. Congregacionesta waturej hermanospi piensarina. Paykunaqa 70 watasninkuta juntʼaytawan waj asignacionta japʼinku. Chay hermanosqa manaña congregacionesta waturinankumanta mayta llakikunkuman. Imajtinchus paykunaqa hermanosta yanapaspa mayta kusikoj kanku. Jinapis reparanku joven hermanosñataj congregacionesta waturinanku aswan allin kasqanta. Paykunaqa ñaupa tiempo Israelmanta levitas jina kanku. Levitasqa 50 watasninkuta juntʼaytawan manaña Diosta yupaychana toldopi ruwanasninkuta ruwajchu kanku. Jinapis kusisqallapuni Jehovata atisqankuman jina sirvej kanku, jovenestataj yanapaj kanku (Núm. 8:25, 26). Kay tiempopipis congregacionesta waturej hermanosqa 70 watasninkuta juntʼaytawan manaña ashkha congregacionesta waturispa yanapakuyta atinkuchu. Jinapis congregacionninkupeqa hermanosta sumajta yanapanku, kallpachankutaj. w21.09 págs. 8, 9 párrs. 3, 4

Jesusqa, Lucas 15:11-32 versiculospi chinkasqa qhari wawamanta parlarqa. Chay jovenqa tatanpa contranpi oqharikorqa, wasinmanta riporqa, ‘karu llajtamantaj’ viajarqa. Chaypitaj millay kausaypi purerqa. Jinapis llakiykunapi rikhurispaqa, mana allinta ruwashasqanpi tʼukurerqa. Piensarerqataj tatanpa wasinpeqa allinta kausakusqanpi. Jesús nerqa jina, chay jovenqa ‘yuyayninman churakorqa’, tatanpa wasinman kutiporqa, perdontataj mañakorqa. Chay joven pantasqanta reparakusqanqa allin karqa. Chanta, ¿imaynatá rikucherqa juchallikusqanmanta arrepientekusqanta? Payqa wasinman kutipunanpaj karuta viajarqa. Kay kikinchayqa mana uj kʼacha cuentitollachu. Kay kikinchayqa ancianosta yanapanman sutʼita reparanankupaj mayta juchallikoj hermano arrepientekusqanta. w21.10 pág. 5 párrs. 14, 15

Apóstol Pablo nerqa: “Noqanchejqa mana kuyuchisqa kayta atej gobiernota japʼisunchej. Chayrayku Diosta kusichisqanman jina payta yupaychayta atinchej, payta manchachikuspa”, nispa (Heb. 12:28). Arí, kay pachamanta gobiernos chinkachisqa kajtinku, Diospa Gobiernollanña sinchʼi sayachisqa kanqa (Sal. 110:5, 6; Dan. 2:44). Kunan tiempo kashan runas pitachus sirviyta ajllanankupaj. Kay mundomanta gobiernosta apoyayta ajllakonqanku chayqa, chinkachisqas kanqanku. Kausayninkuta cambiaspa Jehovaj munayninman jina kausakuyta, payta sirviytataj ajllakonqanku chayqa, wiñay kausayta japʼenqanku (Heb. 12:25). Predicaspaqa runasta yanapanchej Diosta sirviyta ajllakunankupaj. Amapuni qonqanachu Señorninchej Jesuspa nisqasninta. Pay nerqa: “Diospa Gobiernonmanta sumaj willaykunapis jallpʼantinpi willakonqa tukuy laya runas yachanankupaj, chaypachamá tukukoyqa jamonqa”, nispa (Mat. 24:14). w21.09 pág. 19 párrs. 18-20  

Ancianos, Jehovaqa churasunkichej chay qharqochikojpa familiaresninta sonqochanaykichejpaj (1 Tes. 5:14). Chay hermanostaqa niraj reunión qallarishajtin chayri reunión pasayta kallpachariychej. Paykunata visitariychej, orapuychejtaj. Chantapis paykunawan predicawajchej, wakin kutistaj familiapi Diosta yupaychayniykichejman invitariwajchej. Ancianosqa Jehovaj llakisqa ovejitasninta khuyakunanku, munakunanku, yanapananku ima tiyan (1 Tes. 2:7, 8). Jehovaqa “mana munanchu ni pi chinkachisqa kananta. Astawanqa munan tukuy pesachikunankuta” (2 Ped. 3:9). Uj runa jatun juchapi urmajtinpis, Jehovaqa kausayninta may valorniyojllapajpuni qhawan. Payqa sapa ujninchejta, munasqa Wawanpa kausayninwan rantiwarqanchej. Jehová Diosqa paymanta karunchakojkunata munakuywan yanapayta munan payman kutinpunankupaj. Suyashantaj payman kutinpunankutapuni. Chaytataj yachanchej chinkasqa qhari wawamanta Jesús kikinchasqanpi (Luc. 15:11-32). w21.09 págs. 30, 31 párrs. 17-19

Ichapis onqosqa kasqaykirayku manaña ñaupajta jinachu predicayta, yachachiyta ima atinki. Jinapis atisqaykiman jina yanapakuspaqa, kusisqa kawaj. Rey Davidmanta parlarina. Paywan runasninwanqa Amalecmanta suwa runasta maqanakupi atipamorqanku. Familiaresninkuta, tukuy ima suwasqankutataj qhechukanporqanku. Iskay pachaj runasnintaj saykʼusqa kashasqankurayku mana maqanakuman rerqankuchu, qʼepista qhawaspataj qhepakorqanku. Davidqa maqanakumanta kutimuytawan, qhechukanpusqanku imasta tukuyninku uj rejta japʼinankuta nerqa (1 Sam. 30:21-25). Ajinallataj uj runa Jesuspa discipulonman tukojtinpis. Tukuy kusikunchej uj runa Diosmanta yachakojtin, bautizakojtin ima atisqanchejman jina yanapakusqanchejmanta. Jehová Diosqa allinpaj qhawan mayta kallpachakusqanchejta, paytataj munakusqanchejta. Chayraykutaj bendeciwanchej. Chantapis kusisqa kayta yachachiwanchej atisqanchejman jina predicacionpi yanapakusqanchejwan (Juan 14:12). Mana saykʼojtinchejqa, Jehová Dios maytapuni kusikonqa. w21.10 pág. 28 párrs. 15-17

Machuyapushaspaqa ichá manchachikusunman manaña Jehovapaj jóvenes jina kashaspa llankʼayta atinanchejmanta. Ichá kallpanchejpis pisiyanman. Jinapis watas pasasqanman jina imastachus yachasqanchejwan, experiencianchejwan ima jovenesta yanapasunman. Ajinamanta jovenesqa Jehovaj llajtanpi sumajta yanapakonqanku, waj ruwanastataj japʼenqanku. Machitu hermanos jovenesta yanapayta munanku chayqa, kʼumuykukoj sonqo kananku tiyan. Kʼumuykukoj sonqo kajqa wajkunata paykunamanta aswan kurajta jina qhawan (Fili. 2:3, 4). Chay jina machitu kaj hermanosqa, sumajta reparanku Bibliaqa yanapawasqanchejta wakin ruwanasta ashkha imaynasmanta ruwanapaj. Chayrayku paykunaqa mana suyankuchu imaynatachus paykuna ñaupajpi ruwaj kanku ajinatapuni imatapis ruwanankuta (Ecl. 7:10). Paykunaqa unaytaña kausasqankurayku ashkha imasta jovenesman yachachinkuman, jinapis yachanku ‘kay mundoqa, uj jinaman tukushasqanta’. Chayrayku paykunaqa ichá imatapis waj jinamanta ruwayman yachaykukunanku kanqa (1 Cor. 7:31). w21.09 pág. 8 párrs. 1, 3

Jehová Diosqa ni jaykʼaj mañawasunmanchu millay imasta ruwananchejta. Payqa may llimphupuni. Israelitas mana chayta qonqanankupaj, kuraj kaj sacerdotej uma maytʼunanpi oro puritumanta uj cinta tiyarqa. Chay cintapitaj nerqa: “Jehová Diosmin llimphoqa”, nispa (Éxo. 28:36-38). Chay cintapi qhelqasqata rikojqa, sutʼita yachaj Jehová Diosqa tukuy imapi may llimphupuni kasqanta. Jinapis wakin israelitasqa kuraj kaj sacerdoteman mana qayllaykuyta atisqankurayku, mana chay letrasta rikojchu kanku. Jinapis tukuy israelitas yachaj kanku Jehová Diosqa may santo kasqanta. Imajtinchus Leyta ‘qharispa, warmispa, wawaspa’ ñaupaqenpi leekojtin, tukuy israelitas uyarej kanku (Deu. 31:9-12). Noqanchej chaypi kashasunman karqa chayqa, kay palabrasta uyarisunman karqa: ‘Noqa Jehová Diosniykichej kani. Chayrayku qankunapis llimphus kanaykichej tiyan. Qankunaqa ñaupaqeypi llimphus kanaykichej tiyan, imaraykuchus noqa Jehová Diosqa may llimphu kani’ (Lev. 11:44, 45; 20:7, 26). w21.12 pág. 3 párrs. 6, 7

Wakin hermanosqa mikhunamanta, ropamanta, wasimanta ima mayta phutikunku. Ichapis suyunkupeqa wajchaslla kanku, nitaj trabajopis kanchu, familiankuta uywanankupajpis mana ganakuyta atillankuchu. Chayri pichus familiapaj trabajaj chay ichá wañupun, ajinamantataj manaña qolqenku kanchu necesitasqanku imaspaj. Llakikunanchejmantaqa munakuyniyoj Tatanchej Jehovapi atienekuna. Jehovaqa niwanchej payta kausayninchejpi ñaupajman churajtinchej, necesitasqanchej imasta qonawanchejta (Mat. 6:32, 33). Paytaj chayta nisqanta juntʼanpuni (Deu. 8:4, 15, 16; Sal. 37:25). Jehovaqa pʼisqetustapis tʼikitastapis cuidan. Chayrayku ama llakikunachu imatachus mikhunanchejmanta chayri imatachus churakunanchejmanta (Mat. 6:26-30; Fili. 4:6, 7). Kʼacha tatasqa wawasninkuta munakusqankurayku, paykunaman necesitasqanku imasta qonku. Ajinallatataj Tatanchej Jehovapis, kamachisninman necesitasqanchej imasta qowanchej. w21.12 pág. 17 párrs. 4, 5; pág. 18 párr. 8

Ichá pillapis chayri congregacionmanta hermanos sonqonchejta mayta nanachiwarqanchej. Jina kajtenqa Josemanta yachakusunman. Payqa qhasimanta sufrichejtinku, hermanosnin contranpi juchallikojtinkupis, Jehovata sirvillarqapuni, Jehovataj payta bendicerqa pacienciayoj kasqanrayku, aguantasqanraykutaj. Tiemponwantaj Joseqa hermanosninta perdonarqa, rikorqataj imaynatachus Jehová payta bendecisqanta (Gén. 45:5). Noqanchejpis Jehovaman qayllaykuspaqa José jina sonqochasqa kanchej, makinmantaj saqenchej pay maychus tiemponpi justiciata ruwananta (Sal. 7:17; 73:28). Pillapis qhasimanta sufrichiwasqanchejta chayri ima llakiytapis aguantashanchej chayqa, ama qonqanachu Jehovaqa ‘sonqo nanasqaspa qayllanpi kashasqanta’ (Sal. 34:18). Diosqa munakuwanchej pacienciayoj kasqanchejrayku, paymantaj llakiyninchejta saqesqanchejrayku (Sal. 55:22). Jehovaqa pachantinta Juzgaj Dios, tukuy imatataj qhawamushan (1 Ped. 3:12). Chayrayku mana allinchayta atinapaj jina llakiypi kaspaqa, Jehová allinchananpi suyakuna. w21.08 pág. 12 párrs. 14, 16

Jehovata kusichinapaj jinapuni imatapis kausayninchejpi ajllana. Allinta qhawarikuna imastachus ñaupajman churananchejta. Imastachus ruwasqanchej allillan kajtinpis, mana tiempota usuchinapajqa, allinta ajllananchej tiyan imatarajchus ñaupajta ruwananchejta. Chaytaj sutʼi rikukorqa, uj pacha Jesús Martata Mariatawan visitarishajtin. Martaqa imatapis jaywarikuyta yachajpuni. Jesús visitarisqanmantataj may kusisqa kasharqa. Chayrayku Jesuspaj sumajta waykʼorqaporqa. Jinapis hermanan Mariaqa Jesuspa ñaupaqenman tiyaykukuspa yachachisqanta uyarerqa. Martaqa Jesuspaj waykʼupuspa allillanta ruwasharqa. Jinapis Jesusqa nerqa ‘Mariaqa allin kajta ajllakusqanta’ (Luc. 10:38-42). Ichapis Mariaqa chay kutipi imatachus mikhusqanta, aswan qhepaman mana yuyarikorqachu. Jinapis imatachus Jesusmanta yachakusqantaqa nichá qonqakorqachu. Mariaqa Jesús paykunata visitarishajtin, mana tiemponta usucherqachu. Noqanchejpis Jehovapaj tiempota tʼaqaspaqa, tukuy atisqanchejta aprovechana paymanta yachakunapaj. w22.01 pág. 27 párrs. 5, 6

Achabqa Jehovaj ñaupaqenpi kʼumuykukuspapis, imastachus aswan qhepaman ruwasqanwan rikucherqa mana arrepientesqachu kashasqanta. Payqa mana kallpachakorqachu Israelpi Baalta yupaychayta chinkachinanpaj. Nitaj israelitasta yanaparqachu Jehovaman kutirikunankupaj. Achab wañusqantawan, Jehovaqa sutʼita nerqa imaynatachus payta qhawasqanta. Profeta Jehunejta nerqa, Achabqa sajra runa kasqanta (2 Cró. 19:1, 2). Achab arrepientekunman karqa chayqa, profeta Jehuqa nichá paymanta sajra runa kasqanta, Jehovatataj chejnikusqanta ninmanchu karqa. Reparanchej jina, Achabqa sajra imasta ruwasqanmanta llakikuspapis, mana arrepientekorqachu. ¿Imatá Achabpa kausayninmanta yachakunchej? Elías Achabpa familian castigasqa kananta willajtin, payqa kʼumuykukorqa. Chay kutipi kʼumuykukuspapis, aswan qhepaman imastachus ruwasqanwanqa sutʼita rikucherqa mana arrepientekusqanta. Chayrayku arrepientekojqa, mana sajra imasta ruwasqanmanta llakisqa kashasqallantachu ninan tiyan. w21.10 pág. 3 párrs. 4, 5, 7, 8

Isaiasqa Diospa profetan karqa. Señoranpis ichá pay jinallataj Diospaj ruwanasninta ruwarqa. Imajtinchus Bibliaqa ‘profetisa’ kasqanta nin (Isa. 8:1-4). Isaiaswan señoranwanqa Jehovata sirviyta ñaupajman churarqanku. Kay tiempomanta qhariwarmispis, Isaiaswan señoranwan jina tukuy atisqankuta Jehovapaj llankʼankuman. Jehovapi astawan creeyninkuta sinchʼiyachinankupajtaj khuska Bibliaj profeciasninta estudiankuman, imaynatachus chay profecías juntʼakushasqantataj reparankuman (Tito 1:2). Chantapis piensarillankumantaj wakin profecías juntʼakunanpaj imaynatachus yanapakunankupi. Chaypajqa ichá piensarinkuman imatachus Jesús nisqanpi. Jesusqa nerqa Diospa Gobiernonmanta sumaj willaykuna jallpʼantinpi willakunanta, niraj tukukuy jamushajtin. Qhariwarmisqa Bibliaj profeciasnin juntʼakushasqanta rikuspa, astawan Jehovapaj llankʼayta munanqanku. w21.11 pág. 16 párrs. 9, 10

Jesusqa niraj wañuchisqa kashaspa, mayta mamanmanta llakikorqa. Imaraykuchus ichapis mamanqa viudaña kasharqa. Chayrayku Jesusqa mamanta mayta munakusqanrayku, Juanman encargakorqa. Ajinamanta Mariata Jehová Diosta sirvinallanpajpuni yanaparinanpaj. Chay diamantapacha Juanqa Mariata mamanta jina cuidarqa, Mariataj payta wawanta jina qhawarqa. Mariaqa Jesusta wawitamantapacha cuidarqa, wañuchisqa kashajtinpis qayllanpi kasharqa. Chayrayku Jesusqa maytapuni payta munakorqa. ¿Imatataj Jesuspa nisqanmanta yachakusunman? Hermanosninchej, hermanasninchejpis, familianchejmanta nisqa astawan munakuwasqanchejta. Familianchejqa, ichapis churanakuwasun chayri saqerpariwasun. Jinapis Jesús nerqa jina, Jehová Diosta sirvillasunpuni chay, llajtallanpipunitaj kasun chayqa, saqesqanchej imasmanta “pachaj jinastawanraj” japʼisun. Hermanosninchejqa kanku munasqa tatanchej, mamanchej, chayri wawanchej jina (Mar. 10:29, 30). Ajina familiayoj kasqanchejmanta maytapuni kusikunchej. Imaraykuchus Jehová Diosta paykunawan khuska sirvinchej, purajmantataj munanakunchej (Col. 3:14; 1 Ped. 2:17). w21.04 págs. 10, 11 párrs. 7, 8

Wajkunata munakuspaqa mayta kallpachakunchej paykunata yanapanapaj. Kay tiempomanta Jehovaj testigosnenqa, ñaupa tiempomanta Diospa kamachisnin jinallataj ruwanku. Paykunaqa hermanosninkuta mayta munakunku, mana rejsispapis. Chayrayku mayllapipis uj jatun llakiy kajtin, imaynallamantapis chay rato yanapakuyta munanku. Chayri congregacionmanta uj hermano qolqemanta pisisqa kashasqanta yachaspa, chay rato yanapallankutaj. Apostolespa tiemponkupi Macedonia llajtamanta cristianosqa, hermanosninkuta yanapanankupaj “atisqankumantapis astawanraj” qorqanku (2 Cor. 8:3). Kay tiempomanta ashkha hermanospis, llakiypi tarikoj hermanosta yanapanku, maytataj munakunku. Ancianostaj chay hermanosta sumajta ruwashasqankuta ninku. Chay kʼacha palabrasqa chay yanapaj hermanosta mayta kallpachan ñaupajllamanpuni rinankupaj (Isa. 32:1, 2). w21.11 pág. 11 párr. 14; pág. 12 párr. 21

Tukuy necesitanchej pillapis wakin kutis yuyaycharinawanchejta. Wakin kutisqa jatunpaj qhawanchej chay hermanota chayri hermanata noqanchejpuni yuyaycharinawanchejta ninchej. Wakin kutistaj ichá ‘wistʼuykunanchejpajña’ kashajtinchej, uj hermano chayri uj hermana yanapariyta munawasqanchejrayku yuyaychariwanchej (Gál. 6:1). Wakin kutisqa ichapis jatun juchapi urmanchej. Chayrayku hermanosqa kʼamiwanchej yuyaychariwanchejtaj, chaytataj japʼikunanchejpuni tiyan. Imajtinchus yuyaychaykunaqa allinninchejpajpuni, salvakunapajtaj yanapawasun (Pro. 6:23). Kay diapaj textoqa yuyaychawanchej, ‘yachayniyoj runaj parlasqasninta allinta uyarinata’. Mana pipis tukuy imatapuni yachajqa kanchu. Noqanchejmanta nisqa wajkunaqa, wakin imasta astawan sumajta yachanku chayri aswan experienciayoj kanku (Pro. 12:15). Pillapis yuyaychariwasqanchejta japʼikuspaqa, rikuchishanchej kʼumuykukoj sonqo kasqanchejta, mana tukuy imatapunichu ruwayta yachasqanchejta, wajkunaj yanapankuwanpunitaj imatapis allinta ruwayta yachasqanchejta. Rey Salomonqa kayta qhelqarqa: “Ashkhaspa yuyaychayninkuwantaj imallapis allinta ruwakun”, nispa (Pro. 15:22). w22.02 pág. 8 párrs. 1, 2

Tukuy sonqo pesachikojqa imastachus ruwasqanmanta mana may llakisqapuni kashasqallantachu nin. Astawanpis kausayninta, yuyayninta ima cambiasqanta rikuchinan tiyan. Payqa sajra kausayninta saqepunan tiyan, Jehovaj kamachiykunasnintataj watejmanta kasukunan tiyan (Eze. 33:14-16). Chantá mayta kallpachakunan tiyan Jehovawan watejmanta allinpi kananpaj. Chayrayku munasqa amigonchej jatun juchapi urmasqanta yachaspa, ¿imatá ruwasunman? Amigonchejpa juchanta pakaykuspaqa, mana payta yanapashasunmanchu. Chantapis chayqa qhasilla kanman, imajtinchus Jehovaqa tukuy imata qhawamushan (Pro. 5:21, 22). Amigonchejtaqa yanaparisunman ancianos yanapayta munasqankuta nispa. Manapuni ancianosman juchanta willakuyta munajtintaj, noqanchej willananchej tiyan. Jinamanta rikuchisun amigonchejta yanapaytapuni munasqanchejta. w21.10 pág. 7 párrs. 19-21

Tukuyninchej yachakusunman Jesús jina wajkunaj allinninkuta maskʼayta. Bibliaqa Jesusmanta nin: “Esclavo jina karqa”, nispa (Fili. 2:7). Uj esclavo chayri uj kamacheqa, patronninta kusichinanpaj tukuy imata ruwan. Noqanchejqa Jehovaj esclavosnin kanchej, hermanosninchejtataj yanapanchej. Chayrayku astawan Jehovata sirviyta munanchej, hermanosninchejtapis astawan yanapayta munanchej. Kay tapuykunapi piensarina. ¿Wajkunata yanapanapaj kallpachakunchejchu, tiempochakunchejtajchu? Asamblea kajtin limpiezapi chayri Tantakuna Wasita allinchaypi yanapa necesitakojtin, ¿chay ratochu yanapakunchej? Ichapis reparakunchej wajkunata yanapanapaj astawan kallpachakunanchej kasqanta. Jinapis ichá chayta ruwanapaj mana sonqonchej aysawanchejchu. Jina kajtenqa sutʼita chayta Jehovaman willakuna. Payman willakuna imaynachus kashasqanchejta, mañakunataj ‘ruwayta munananchejpaj, ruwayta atinanchejpajtaj’ yanaparinawanchejta (Fili. 2:13). w22.02 págs. 22, 23 párrs. 9-11

Jesusqa munakuyniyoj karqa. Wajkunatapis entienderqa wakin kutis mana atikullajtinpis (Mat. 11:29, 30). Uj pacha uj fenicia warmi Jesusmanta mayta mañakorqa warmi wawanta sanoyachipunanta. Jesustaj qallariypi chay warmita mana uyarispapis, sinchʼi creeyniyoj kasqanta rikuspa, khuyakuspa wawanta sanoyachiporqa (Mat. 15:22-28). Jesusqa wajkunata khuyakuspapis yuyaycharinan kajtenqa, yuyaycharejpuni. Wakin kutisqa munakusqanrayku pitapis sutʼita yuyaycharej. Uj pacha Jesús Jehovaj munayninta ruwayta munajtin, Pedroqa mana ruwananta munarqachu. Jesustaj payta kʼamerqa, wakin discipulosninpa ñaupaqenpi (Mar. 8:32, 33). Jesusqa mana Pedrota kʼumuykachachiyta munaspachu kʼamerqa. Manaqa tukuynin discipulosninman mana jatunchakoj kayta yachachinanpaj, nitaj Pedro jina ruwanankupaj. Pedroqa Jesús kʼamejtin pʼenqakorqachá, jinapis allinninpaj karqa. Pikunatachus munakunchej chaykunawan kʼachas kaspaqa, wakin kutis paykunaman imatapis sutʼita reparachina tiyan. Chaytataj Jesús jina ruwana tiyan, Bibliaj yuyaychaykunasninman jinataj. w22.03 pág. 11 párrs. 12, 13

Jehová Diosta jatunchaspaqa payta yupaychanchej (Sal. 34:1). ¿Imata ruwaspataj Jehovata jatunchanchej? Jehová Diosninchej imaynachus kasqanmanta, imastatajchus ruwasqanmanta runasman willarispa. Jehovaman tukuy sonqo agradecekunchej chayqa, paymanta sumaj imasta parlasunpuni. Jehová sumaj imasta noqanchejrayku ruwasqanpi tʼukurisun chaytaj, payta jatunchasunpuni. Runasman Jehová Diosmanta parlarispaqa, “Diosman uj jaywanatapis jaywashasunman jina” ruwashanchej, nisunman Diosta siminchejwan jatunchashanchej. Niraj orakushaspaqa sumajta piensarinchej imatachus ninanchejpi. Ajinallatataj runasman predicanapajqa sumajta piensarinanchej tiyan imatachus ninanchejpi. Noqanchejqa munanchej Jehová Diosta jatunchasqanchej uj sumaj jaywana jina kananta. Chayrayku runasmanqa Jehová Diosmanta tukuy sonqo willarinchej. w22.03 pág. 21 párr. 8