Noviembre

Jehovaqa waj jinasmanta yanapallawanchejtaj. Predicacionpi runas kʼamiykuwajtinchejpis sonqo tiyasqalla kanapaj yanapawanchej. Diosmanta yachakuyta munaj runawan parlarishajtinchejtaj chay runata yanapananpaj jina textota yuyarikunapaj yanapawanchej. Chantapis maypichus predicanchej chaypi runas mana uyariwajtinchejqa, kallpata qowanchej predicanallapajpuni (Jer. 20:7-9). Jehovaqa sumajta wakichiwanchej predicanapaj. Ajinamanta kʼacha kasqanta rikuchillawanchejtaj. Cristiano Kausayninchej tantakuypeqa aswan sumajta predicanapaj, yachachinapaj ima yachakunchej. Ichapis qallariypeqa waj jinasmanta predicananchej kasqanta yachaspaqa tumpata manchachikusunman. Jinapis chayman jina ruwajtinchejqa allin riwanchej. Ichapis ni jaykʼaj waj jinasmanta predicarqanchejchu. Jinapis reunionespi, asambleaspi imaqa waj jinasmanta predicanapaj kallpachawanchej. Chayta ruwaytapis ichá manchachikullasunmantaj. Jinapis chayta ruwajtinchejqa Jehová bendeciwasun. w21.08 pág. 27 párrs. 5, 6

Apóstol Pabloqa Corintopi tiyakoj cristianosman ujnin cartanpi mana manchachikuspa sutʼita yuyaycharerqa. Chay cartata paykunaman apachiytawantaj Titota kacharqa. Payqa mayta kusikorqa hermanos chay yuyaychasqanta kasukusqankuta yachaspa (2 Cor. 7:6, 7). Ancianosqa apóstol Pablo jina, hermanoswan karinankupaj tiempochakunkuman. Chaypajqa reunionesman ñaupajta chayankuman, hermanoswan sumajta parlarinankupaj. Hermanosta kallpacharinapajqa pisi minutoslla necesitakun (Rom. 1:12). Apóstol Pablo jina ruwaj ancianosqa, Bibliawan hermanosta kallpacharinku, Dios paykunata mayta munakusqantataj reparachinku. Paykunaqa hermanosman allin imasta ruwasqankumanta kusikusqankuta ninku. Uj hermanota yuyaycharinanku kajtintaj, Bibliawanpuni yuyaycharinku. Ancianosqa hermanosta sutʼita yuyaycharinku. Imaraykuchus munanku chay yuyaychasqankuwan yanapachikunankuta (Gál. 6:1). w22.03 págs. 28, 29 párrs. 11, 12

Kay tiempopipis Jehová Diosqa, payta tukuy sonqo sirvinallapajpuni ‘may sumaj atiyta’ qowanchej. Chay atiyta japʼinapajtaj orakuna tiyan. Pabloqa Efesios 6:18 versiculopi nerqa: “Sapa pʼunchay Diosmanta mañakuychej”, nispa. Chayta ruwajtinchejqa, Jehová Dios kallpachawasun. Wakin kutisqa sinchʼi llakisqa kashasqanchejrayku, mana yachanchejchu imatachus Jehovamanta mañakunanchejta. Jinapis Jehová Diosqa munan paywan parlarinanchejtapuni (Rom. 8:26, 27). Jehovaqa Biblianejta kallpachawanchej. Noqanchejpis Pablo jina sapa día Bibliata leesunman sinchʼita sayanapaj, sonqochakunapaj ima (Rom. 15:4). Bibliata leerispa tʼukurejtinchejqa, Jehová yanapawasunman reparanapaj imaynamantachus Biblia kausayninchejpi yanapawasqanchejta (Heb. 4:12). w21.05 pág. 22 párrs. 8-10

Jehová Diosmanta yachachimunanchejpuni kasqanta yachanchej. Jinapis ichá mana atillanchejchu. Ichá yuyanchej mana munasqanchejman jinapunichu ruwayta atisqanchejta. Wakin hermanosqa viejitosña kanchej chayri onqosqas kashanchej. Jinapis, ¿imatá ruwasunman? Telefononejta chayri Internetnejta Bibliamanta runasman yachachiyta atisunman. Chayrayku ichá wasinchejmantapacha pillamanpis Bibliamanta yachachiyta qallarisunman. Wakin runasqa Bibliamanta yachakuyta munanku. Jinapis mana atinkuchu predicashanchej chay horaspi yachakuyta. Paykunaqa ichá sutʼiyayta chayri chʼisiyayta yachakunankupaj tiempituyoj kanku. Chayrayku allin kanman chay horaspi yachachinanchejpaj tiempochakunanchej. Jesuspis Nicodemoman chʼisinpi yachacherqa. Imaraykuchus Nicodemoqa chay horaspi yachakuyta munarqa (Juan 3:1, 2). w21.07 pág. 5 párrs. 10, 11

Juanpa discipulosnenqa mayta tʼukorqanku, Jesuspa discipulosnin mana ayunasqankumanta. Jesustaj paykunaman sutʼincharqa discipulosnenqa mana ayunanankuchu kasqanta, imaraykuchus payqa kausakusharqaraj (Mat. 9:14-17). Jinapis fariseoswan Jesusman churanakoj runaswanqa, payta juchacharqanku mana costumbresninkuta ruwasqanmanta. Chayrayku Samarikuna Pʼunchaypi Jesús onqosqasta sanoyachejtin, mayta phiñakorqanku (Mar. 3:1-6; Juan 9:16). Chay runasqa Samarikuna Pʼunchayta ruwanapuni kasqanta nej kanku. Jinapis paykunallataj chay nisqankuta pʼakej kanku. Imaraykuchus chay pʼunchaypeqa templopi negociosninkuta ruwallaj kanku. Jesús chayta ruwasqankumanta juchachajtintaj, mayta phiñakoj kanku (Mat. 21:12, 13, 15). Chantapis uj pacha Jesús Nazaretpi kaj Sinagogapi yachachishajtin, payta uyarejkunaqa mayta phiñakorqanku. Imajtinchus Jesusqa israelitaswan paykunata kikinchaspa reparacherqa, imatapis paykunallapaj munasqankuta, pisi creeyniyojtaj kasqankuta (Luc. 4:16, 25-30). Ashkha runasqa Jesusmanta karunchakaporqanku, mana suyasqankuman jinachu imatapis ruwasqanrayku (Mat. 11:16-19). w21.05 págs. 5, 6 párrs. 13, 14

Jehovaqa sutʼita willawanchej jatunchakuy, tukuy imata munapayay ima, Satanaspa trampasnin kasqanta. Jinapis chay trampasmanta ayqeyta atinchej. Chayrayku Jehovaqa Bibliapi qhelqacherqa, chay trampaspi urmaj wakin kamachisninpa kausayninkumanta, mana paykuna jina urmananchejpaj. Tukuy imata astawan munapayaymanta parlaspaqa, ichá Satanaspi piensarinchej. Payqa Jehovaj angelnin kashaspa, payta may kusisqachá sirverqa. Jinapis payqa mana chaywan contentakorqachu. Payqa munarqa Jehová jina yupaychachikuyta. Satanasqa pay jina kananchejta munan. Chayrayku payqa tanqawanchej kapuwasqanchej imaswan mana contentakunanchejpaj. Evawanpis chayta ruwarqa. Jehovaqa Adantawan Evatawan mayta munakorqa. Chayrayku paykunaman nerqa, Edén huertapi kaj tukuynin sachʼasmanta mikhunankuta, uj sachʼallamantataj mana mikhunankuta (Gén. 2:16). Jinapis Satanasqa, Evata engañaykorqa, mana mikhunanku sachʼamanta mikhuykunanpaj. Evataj imatachus Jehová paykunaman qosqanwan mana contentakusqanrayku, chay uj sachʼamantawan mikhuykorqa. Jinamantataj Jehovaj contranpi juchallikorqa, tiemponmantaj wañorqa (Gén. 3:6, 19). w21.06 pág. 14 párrs. 2, 3; pág. 17 párr. 9

Jehová Diosqa munarqa Adanwan Evawan wawasniyoj kanankuta, jallpʼatataj cuidanankuta. Adanwan Evawanqa Diosta kasuspa, munaynintataj juntʼaspa, wiñaypaj Diospa familiallanmantapuni kankuman karqa paykuna, wawasninku ima. Jehovaqa Adantawan Evatawan may valorniyojpaj qhawarqa. Chayrayku paykunaqa familianmanta karqanku. Davidqa, imaynachus runa ruwasqa kashasqanmanta parlaspa, kayta Jehovaman nerqa: “Runataqa casi angelesta jina ruwarqanki. Runamanqa jatun kayta, allinpaj qhawasqa kaytapis coronata jina churaykorqanki”, nispa (Sal. 8:5). Jehovaqa runasta mana angelesta jinachu ruwawarqanchej. Imajtinchus angelestaqa aswan yuyayniyojta, atiyniyojta, yachayniyojta ima ruwarqa (Sal. 103:20). Jinapis angelesmanta tumpa menosllata ruwawarqanchej. Adanwan Evawanqa mana Jehová Diosta kasukusqankurayku, manaña familianmantachu karqanku. Paykuna mana kasukusqankuraykutaj wawasninkupis ashkha llakiykunapi rikukorqanku. Jinapis Jehovaqa munashallanpuni kasukoj runas, wiñaypaj wawasnin kanankuta. w21.08 págs. 2, 3 párrs. 2-4

Kay tiempopi testigosmanqa runas churanakuwanchej. Wakin hermanosqa tiyakunku, gobiernos mana willajta saqewanchejchu chay lugarespi. Chay hermanosmanta wakenqa presochasqas kanku, apasqastaj kanku “kamachejkunaman, reyesman ima”. Ajinamanta autoridadespis Diosmanta willayta uyarinku (Mat. 10:17, 18). Wakin hermanosninchejtaj waj llakiykunasniyoj kanku. Paykunataqa tiyakunku chaypi mana gobiernos qhatiykachajtinkupis, familiaresninkuñataj mana Jehovata sirvejta saqenkuchu (Mat. 10:32-36). Jinapis wakin hermanostaqa Jehovata sirvillasqankupunirayku, niña familiaresninku imatapis ninkuchu. Chantapis ñaupajta mayta churanakuwarqanchej chay runasmanta wakenqa, kunanqa Jehovata sirvishanku. Chayrayku pí churanakuwajtinchejpis mana manchachikuspa Jehovata sirvinallapuni. Noqanchejtaqa Jehová yanapawasun espíritu santonwan. Chayrayku ama imatapis manchachikunachu. w22.03 pág. 16 párr. 8

Bibliaqa nin Jehovaqa mayta chejnikusqanta “may maylla qhawaykachaj ñawista, llullakoj simita, mana juchayoj runata wañuchej makista” ima (Pro. 6:16, 17). Chantapis payqa chejnikullantaj “runa wañuchista, engañaj runastapis” (Sal. 5:6). Jehovaqa tukuy chay imasta maytapuni chejnikun. Noej tiemponpeqa sajra runas kay jallpʼata maqanakuykunawan juntʼacherqanku. Chayraykutaj Jehovaqa paykunata tukuyninkuta chinkacherqa (Gén. 6:13). Chantapis Jehovaqa profeta Malaquiasnejta nillarqataj imatawanchus chejnikusqanta. Pay nerqa pillapis qosanmanta chayri warminmanta divorciakuyta munaspa wasanchajtaqa, mayta chejnikusqanta. Jehovaqa chay runaspa yupaychasqankuta mana allinpajchu qhawan, paykunatataj juzganqa (Mal. 2:13-16; Heb. 13:4). Jehovaqa kamachiwanchej: “Sajra kajtaqa chejnisqata chejnikuychej”, nispa (Rom. 12:9). Imatapis chejnisqata chejnikuspa chayri millachikuspaqa mana rikuyllatapis munanchejchu. Ajinallatataj Jehovaj chejnikusqan imastapis chejnikunanchej tiyan. w22.03 págs. 4, 5 párrs. 11, 12

Tumpamantawanqa Tatanchej Jehová Gobiernonnejta may chhika bendicionesta qowasun. Jehovapi suyakojkunaqa may chhika bendicionesta japʼisunchej kay tiempopi, mosoj pachapipis. Mosoj pachapiña kausakushaspaqa, niña kay tiempopi jina ujtawan aguantananchejchu kanqa problemasta, nitaj llakiykunatapis. Mana pipis qhasimanta sufrichiwasunchu, manataj ima nanay kanqachu (Apo. 21:4). Nillataj llakikusunchu imachus faltanawanchejmanta, imajtinchus tukuy ima jinantin kanqa (Sal. 72:16; Isa. 54:13). Chayqa sumaj bendicionpuni kanqa. Chaykamataj Jehovaqa chejnisqan imasta saqepunapaj, kʼacha cristianosmantaj tukunapaj yanapashawanchej. Ajinamanta wakichishawanchej mosoj pachapi kausakunapaj. Chayrayku ama saykʼuspa Jehovata sirvinallapuni. Sumaj kausayqa qayllitapiña kashan. Arí, pacienciawan suyakunallapuni Jehová imatachus niwasqanchejta juntʼananta. w21.08 pág. 13 párrs. 17-19

Chay yuyaychayqa may sumajpuni karqa. Imaraykuchus apóstol Pabloj yuyaychasqanmanta pisi tiemponman, Judeamanta cristianosqa wasisninkuta, negociosninkuta, Diosta mana sirvej parientesninkutapis saqespa ‘orqosman ayqekorqanku’ (Mat. 24:16). Chay cristianosqa chay pacha purajmanta yanapanakunankupuni karqa. Chayrayku Pabloj yuyaychasqanta kasukusharqankuña chayqa, waj lugarpi pisi imasllawan kausakuyta atillarqankuchá. Hermanosninchejqa imatapis necesitaspa ichá mana willawasunchu. Chayrayku hermanos qayllaykamunawanchejpaj jina kana. Congregacionpeqa kanpuni wajkunata yanapariyta yachaj hermanos, hermanaspis. Paykunaqa tukuy sonqo wajkunata yanapanku, manataj obligasqa jinallachu. Chayrayku sutʼita yachanchej, imata necesitajtinchejpis paykunaqa yanapanawanchejtapuni. Noqanchejpis paykuna jina kayta munanchej. w22.02 págs. 23, 24 párrs. 13-15

Kay qhepa wataspi ashkha congregacionesta ujchaykukorqa. Ajinamanta wakin congregacionesqa waj circuitoman cambiasqa karqanku. Congregacionmanta cambiakunanchej kajtenqa amigosninchejta, familiaresninchejta saqeyqa mana facilchu kanman. Jehová Diosqa mana ancianosman ninchu, mayqen hermanotachus mayqen congregacionmanpis kachanankuta. Chayrayku wakin hermanosqa, mana kasukuyta atillankumanchu ancianospa nisqankuta. Jehovaqa ancianospi atienekun. Chayrayku saqen chay imasta ajllanankuta. Noqanchejpis Jehová jinallataj ancianospi atienekunanchej tiyan. ¿Imajtintaj ancianosta kasukunanchej tiyan, imatachus ajllasqanku mana munasqanchejman jinachu kajtinpis? Imajtinchus paykunata kasukuspaqa Diospa llajtanpi ujchasqallapuni kasunchej. Hermanos kʼumuykukoj sonqowan ancianosta kasukojtinku, congregacionqa astawan ñauparin (Heb. 13:17). Jehovaqa ancianosta churan noqanchejta cuidanawanchejpaj. Chayrayku paykunata kasukuspaqa Jehovapi atienekusqanchejta rikuchishanchej (Hech. 20:28). w22.02 págs. 4, 5 párrs. 9, 10

Bautizasqa hermano kanki chayqa, kallpachakuwaj discursashaspa sumajta parlanaykipaj, yachachinaykipaj ima. Imajtinchus sumajta leespa, sumajta parlaspa, sumajta yachachispa ima, uyarisojkunata sumajta yanapanki (1 Tim. 4:15). Leellaypuni, yachachillaypunitaj nisqa folletoj sapa yachaqananta estudianaykipaj, chayman jinataj ruwanaykipaj kallpachakuy. Chay folletoj sapa yachaqananta estudiay, yachakusqaykiman jina wasiykipi wakichikuy, discursashaspataj chayman jina ruwanaykipaj kallpachakuy. Chantapis yuyaychaj ancianota chayri waj ancianosta tapurikuwaj imapichus astawan kallpachakunayki kasqanta yachanaykipaj. Paykunaqa “Diospa palabranmanta parlanankupaj, yachachinankupaj ima, sinchʼita llankʼanku” (1 Tim. 5:17). Yachachillaypuni nisqa folletopi yachakusqaykiman jina ruwanaykipaj kallpachakojtiykipis, uyarisojkunaj creeyninkuta kallpachanaykipaj, yachakusqankuman jinataj kausakunankupaj yanapay. Chayta ruwaspaqa aswan kusisqa kanki, uyarisojkunapis kusisqallataj kanqanku. w21.08 pág. 24 párr. 17

Wajkunata noqanchejmanta nisqa aswan kurajta jina qhawasun chayqa, imatapis sumajta ruwayta yachasqankumanta chayri sumaj yuyayniyoj kasqankumanta kusikusun. Astawanraj kusikusun chay yachasqankuwan Jehovata sirvishasqankumanta. Ajinamanta tukuy yanapakusun congregacionpi allinta, ujchasqataj kausakunapaj. ¿Imatá ruwasunman mana envidiakunapaj? Mana tukuy imatachu ruwayta atisqanchejta reparakuna. Ajinamantaqa, mana wajkunata imapipis atipaytapuni munasunchu. Astawanpis pikunachus noqanchejmanta nisqa imatapis aswan sumajta ruwanku, paykunamanta yachakusun. Ichapis uj hermanoqa sumajta discursan. Jina kajtin imaynatachus wakichikusqanta tapurisunman. Uj hermana miskʼita waykʼuyta yachan chaytaj, imitaswanchus ajinata waykʼusqanta tapurisunman. w21.07 pág. 16 párrs. 8, 9

Números libropi nin Jehová kamachisqanta, uj israelita samarikuna pʼunchaypi llantʼata pallasqanrayku wañuchisqapuni kananta. Iskay kaj Samuelpitaj nin Jehovaqa Davidta perdonasqanta, khuchichakuspa, runata wañuchispataj juchallikojtinpis (Núm. 15:32, 35; 2 Sam. 12:9, 13). Jehovaqa Davidta millay juchata ruwajtinpis perdonarqa, llantʼata pallakoj runatataj wañuchinankuta kamacherqa. ¿Imajtintaj chayta ruwarqa? Bibliaqa mana tukuy imitatapunichu willan. Davidqa juchallikusqanmanta maytapuni arrepientekorqa (Sal. 51:2-4). Jinapis samarikuna pʼunchayta mana kasukoj runa, ¿imayna runataj kanman karqa? ¿Mana kasukusqanmanta arrepientekunmanchu karqa? Aswan ñaupajpi, ¿Jehovaj leyesninta pʼakillanmantajchu karqa? Jehová yuyaychajtin, ¿kasukorqachu chayri qhesacharqachu? Bibliaqa mana willanchu. Chaywanpis sutʼita yachanchej ‘Jehová Diospa tukuy ñankunasnenqa cheqanpuni kasqankuta’ (Sal. 145:17). w22.02 págs. 2, 3 párrs. 3, 4

Llampʼu sonqo runaqa imatapis atisqanman jinalla ruwan. Ajinamantataj payqa kusisqa, sumajtataj yanapakullanpuni. Llampʼu sonqo runataqa kikinchasunman autota apaykachaj runawan. Payqa wichayman rishaspa mana auto sayarpananpaj cajata cambianan tiyan, chayta ruwajtin calmallawan rinan kajtinpis. Ajinallatataj llampʼu sonqo runaqa, yachan maykʼajchus chay “autoj cajanta jina” ruwanasninta cambianan kasqanta Jehovata sirvinallanpajpuni, wajkunata yanapananpajtaj (Fili. 4:5). Barzilaimanta parlarina. Paytaqa 80 watasniyoj kashajtin rey David kamachina wasinpi trabajananpaj wajyarerqa. Payqa yacharqa manaña wakin imasta ruwayta atisqanta. Chayrayku mana reypa wasinman rerqachu. Astawanpis Quimam paypa cuentanmanta rinanta nerqa. Quimamqa paymanta nisqa aswan joven karqa (2 Sam. 19:35-37). Ajinamanta Barzilaiqa llampʼu sonqo kasqanta rikucherqa. Machitu hermanosqa Barzilái jina munanku joven hermanos wakin ruwanasmanta encargakunankuta. w21.09 pág. 10 párrs. 6, 7

Ichá wakenqa Jehová Diosta mana munakuyniyoj Tatanchejta jina qhawayta atillanchejchu. Chaytaj kanman wawas kashajtinchej tatanchej sufrichiwasqanchejrayku. Jehovaqa yachan imaynachus kashasqanchejta, imaraykuchus ajina kashasqanchejtapis. Qayllallanchejpipunitaj kayta munan. Chayta yachaytaj mayta sonqochawanchej. Chayrayku Palabranqa niwanchej: “Diosman qayllaykuychej, paytaj qankunaman qayllaykamusonqachej”, nispa (Sant. 4:8). Jehovaqa mayta munakuwanchej, sumaj Tata kasqantataj niwanchej. Jesusqa yanapawasunman Jehovaman astawan qayllaykunapaj. Payqa Tatanta allinta rejsin, Tatan jinapunitaj tukuy imata ruwan. Chayrayku pay nerqa: “Noqata rikuwajqa Tataytapis rikullantaj”, nispa (Juan 14:9). Jesusqa kuraj hermanonchej jina Tatanchej Jehovata kasukuyta, respetayta ima yachachiwanchej. Yachachillawanchejtaj imastachus ruwanata kusichinapaj, allinpaj qhawanawanchejpaj ima. Chantapis Jesusqa kay jallpʼapi kashaspa imastachus ruwasqanwan, sutʼita reparachiwanchej Jehová may kʼacha, munakuyniyojtaj kasqanta. w21.09 pág. 21 párrs. 4, 5

Diospa llajtanpi kajkunaqa payta ujchasqa sirvinchej. Jehovaqa ancianosman kamachin congregacionta llimphuta japʼinankuta. Uj hermano jatun juchapi urmajtin, Jehovaqa suyan ancianos chay hermano qharqosqachus manachus kananta allinta qhawaykurinankuta. Chaypajqa sumajta qhawaykurinanku tiyan, juchallikoj sonqomantapachapunichus manachus arrepientekusqanta. Ichapis juchallikojqa arrepientesqa kashasqanta ninman. Jinapis, ¿sonqomantapachapunichu arrepientesqa kashan? ¿Ujtawan niñapuni chay juchata ruwananpaj jinapunichu arrepientesqa kashan? Mana allin amigoswan purisqanrayku chay juchapi urmarqa chay, ¿paykunamanta karunchakunanpaj kallpachakushanchu? Ancianosqa juchallikojpa juchanta qhawaykurishaspa, Jehovamanta mañakunku, imapichus juchallikusqantataj Bibliawan sumajta qhawaykurinku. Chantapis sumajta qhawaykurillankutaj juchallikoj imaynatachus juchanta qhawasqanta. Ancianosqa chay tukuy imasta ruwaytawan, nenqanku juchallikoj congregacionmanta qharqosqachus manachus kananta (1 Cor. 5:11-13). w22.02 pág. 5 párrs. 11, 12

Kunallanraj chayri unayña bautizasqa kaspapis, Jehová Diosta kusichinapaj jinapuni kausakuyta munanchej. Chaypajtaj imaspichus yuyasqanchejta allinta qhawarikuna tiyan. Imajtinchus runasqa imatachus yuyasqanchejman jina imatapis ruwanchej. Sajra munaynillanchejpi yuyashanchej chayqa, ima ratollapis chayman jina mana allin imasta parlasun chayri ruwasun (Efe. 4:17-19). Allin imaspi yuyasun chaytaj, imatapis Jehovaj munayninman jina parlasun chayri ruwasun (Gál. 5:16). Yuyayninchejmantaqa sajra yuyaykunata mana tukuysitunta orqhoyta atisunpunichu. Jinapis kallpachakuyta atinchej mana chay sajra yuyayninchejman jina imatapis ruwanapaj. Jehovaj chejnisqan imasta ruwayta, parlayta imaqa niraj bautizakushaspa saqepunanchej tiyan. Ajinallamanta ñaupa kausayninchejta saqepuyta atisun. Chantapis Jehovata astawan kusichinapajqa, paypa ‘qosqan mosoj kausaywan pʼachallikunanchej’ tiyan. w22.03 pág. 8 párrs. 1, 2

Ancianosqa mana yachayta atillankuchu jatun juchapi urmaj hermano tukuy sonqo arrepientekusqanta. Imajtinchus paykunaqa mana yachankuchu imachus sonqonpi kashasqanta. Chayrayku paykunaqa mayta kallpachakunku juchallikoj hermano tukuy sonqo pesachikusqanta reparanankupaj. Chayrayku ancianosqa rikuyta munanku chay hermano kausayninta, yuyayninta, ruwasqanta ima cambiasqantapuni. Ichapis chay juchallikoj hermanoqa, unaypi cambianqa arrepientekusqantapuni rikuchinanpaj. ¿Imatá congregacionmanta qharqochikoj ruwanan tiyan arrepientekusqanta rikuchinanpaj? Reunionesman mana faltakunanchu tiyan, ancianos yuyaycharisqankuman jinataj orakunallanpuni, Bibliatapis estudianallanpuni tiyan. Chantapis mayta kallpachakunan tiyan imaschus watejmanta juchapi urmachinman chay imasta mana ruwananpaj. Jehovaman qayllaykunanpaj kallpachakojtin, Jehová Diosqa tukuy juchasninta perdonanqa, ancianospis congregacionman kutinpunanpaj yanapanqanku. w21.10 pág. 6 párrs. 16-18

Jesusqa Jehovata maytapuni munakusqanrayku pay sapallanta yupaycharqa, cielopi kashaspa, kay jallpʼapi kashaspapis (Luc. 4:8). Discipulosninmanpis chayllatataj yachacherqa. Jesuswan discipulosninwanqa mana santosta apaykacharqankuchu Diosta yupaychanankupaj. Diosqa mana rikukoj cuerpoyoj. Chayrayku runaspa ima santota ruwasqankupis manapuni payman rijchʼakuyta atinmanchu (Isa. 46:5). ¿Allinchu kanman wakin runas santos kasqankuta yuyaspa chay runasman rijchʼakoj lantista ruway, paykunamantaj rezakuy? Chunka Kamachiykunamanta iskay kajpi Jehová nerqa kay pʼunchaypaj textota. Payqa mana munanchu santosta yupaychananchejta, noqanchejtaj chayta sumajta yachanchej. Ñaupa tiempomanta qhelqaj runasqa ninku, apostolespa tiemponmanta cristianosqa Diosllata yupaychasqankuta. Kay tiempopipis Jehovaj testigosnenqa ñaupa tiempomanta cristianos jinallataj Diosta yupaychanchej. w21.10 págs. 19, 20 párrs. 5, 6

Jesusqa ñaupa cristianosman willarqaña “Jerusalenta soldadoswan muyurisqata” rikunankuta (Luc. 21:20-24). Paykunaqa chayta rikuspa orqosman ayqekunanku karqa. Ajinallamanta salvakuyta atinkuman karqa. Jinapis ashkha imasninkuta saqenanku karqa. Pasaj wataspi La Atalaya revistapi ajinata nerqa: “Paykunaqa wasisninkuta, jallpʼasninkuta saqespa riporqanku. Wasinkumantapis ni imata aparqankuchu. Paykunaqa Jehová cuidananpi, yanapananpitaj atienekorqanku. Chayrayku tukuy imamanta nisqa Jehovata sirviyta ñaupajman churarqanku”. Chay kikin revistallapitaj nin: “Ichá noqanchejpis aswan qhepaman Judeamanta cristianos jina, imastachus kausayninchejpi ñaupajman churasqanchejta rikuchinanchej kanqa”, nispa. Chay tiempopi noqanchejpaj, ¿imastaj aswan importante kanqa? ¿Kapuwasqanchej imaschu chayri Jehovata kasukusqanchejrayku salvasqa kananchejchu? Ichapis kay mundoj tukukuynin chayamojtenqa ashkha llakiykunapi rikukusun, imaschus kapuwasqanchejtataj saqenanchej kanqa. Noqanchejpis tukuy atisqanchejta kallpachakunanchej tiyan wakichisqa kanapaj. w22.01 pág. 4 párrs. 7, 8

Israelitas Egiptomanta llojsimusqankumanta pisi tiemponman, Jehová Diosqa paypa sutinmanta, imaynachus kasqanmantawan Moiseswan parlarqa. Nerqataj: “Jehová Dios, Jehová Dios, khuyakoj Dios, kʼacha sonqoyoj, pacienciayoj, may jina munakuyniyoj, nisqantapis juntʼanpuni. Munakuynenqa waranqa waranqa runaspaj, perdonantaj runaspa pantasqasninkuta, mana kasukuspa imatapis ruwasqankuta, juchasninkuta ima”, nispa (Éxo. 34:6, 7). Chay kʼacha palabraswan Jehová Diosqa, munakuynin imaynachus kasqanta sutʼincharqa. Astawan chaymanta yachakuna. Jehová Diosqa mana munakuyniyoj kasqallantachu nerqa, manachayqa “may jina munakuyniyoj” kasqanta. “May jina munakuyniyoj” palabrasqa Bibliapi sojta kutistawan rikhurin (Núm. 14:18; Neh. 9:17; Sal. 86:15; 103:8; Joel 2:13; Jon. 4:2). Chay tukuyninpitaj Jehovaj munakuyninmanta parlan, manataj runaspa munakuyninkumantachu. Chaypi reparanchej Jehová Diosqa may jina munakuyniyoj kasqanta. w21.11 págs. 2, 3 párrs. 3, 4

Qhariwarmisqa, apóstol Pedromanta señoranmanta ima maytapuni yachakunkuman. Apóstol Pedroqa, Jesusta rejsisqanmanta sojta killanman jina ancha kaspa watanman jina, imatachus ruwananta ajllanan karqa. Payqa pescadosta japʼispa trabajaj. Chayrayku Jesús paypa qhepanta rinanpaj wajyarejtin, piensarerqachá imaynatachus familianta uywananpi (Luc. 5:1-11). Pedroqa mana iskayrayaspa Jesuswan khuska predicaj rerqa, señoranpis apoyarqa. Imajtinchus Bibliaqa nin, Jesús kausarimusqantawan apóstol Pedrowan khuska uj tiempota viajasqanta (1 Cor. 9:5). Chantapis Pedroqa señoran sumaj warmi kasqanrayku, mana manchachikuspa yuyaycharqa cristiano qosasman, warmisman ima (1 Ped. 3:1-7). Reparanchej jina, apóstol Pedrowan señoranwanqa Diospa Gobiernonta ñaupajman churajtinku Jehová Dios ni imata faltachinanpi atienekorqanku (Mat. 6:31-34). w21.11 pág. 18 párr. 14

Apóstol Pabloqa hermanosta maytapuni munakoj, tukuy atisqantataj paykunata yanaparqa (Hech. 20:31). Hermanospis apóstol Pablota maytapuni munakullarqankutaj. Uj pacha Efesomanta ancianosqa apóstol Pablota manaña ujtawan rikunankuta yacharqanku. Chayraykutaj paykunaqa “tukuyninku mayta waqarikorqanku” (Hech. 20:37). Kunanpis ancianosninchejqa hermanosta, hermanasta ima maytapuni munakunku, tukuy imatataj ruwanku paykunata yanapanankupaj (Fili. 2:16, 17). Jinapis ancianosqa wakin kutis congregacionmanta tukuy ruwanasninkuta mana ruwayta atillankuchu. ¿Imastaj paykunata yanapanman? Ancianosqa apóstol Pablo jinallataj ruwayta atinkuman. Payqa mana ángeles jinachu ruwayta aterqa. Apóstol Pabloqa pantaj runa karqa. Chayraykutaj wakin kutis allin kajta ruwananpaj mayta kallpachakunan karqa (Rom. 7:18-20). Payqa wakin llakiykunasniyoj karqa, jinapis hermanosta mana saykʼuspa, kusisqallapunitaj yanaparqa. Ancianospis apóstol Pablo jina ruwaspa, tukuy ruwanasninkuta juntʼayta atinkuman, kusisqallapunitaj Jehová Diosta sirvinkuman. w22.03 pág. 26 párrs. 1, 2  

Levítico 19:3 nin samarikuna pʼunchayta jatunpaj qhawanata. Cristianosqa manaña Moisespa Leyninman jinachu kausakunchej. Chayrayku manaña samarikuna pʼunchayta ruwanchejchu. Jinapis mayta yachakusunman imatachus israelitas chay día ruwaj kanku chaymanta, ima bendicionestachus japʼisqankumantapis. Israelitasqa chay día mana trabajanankuchu karqa, Jehová Diostataj yupaychananku karqa. Chayrayku Jesusqa chay día sinagogaman rispa Diospa Palabranta leej (Éxo. 31:12-15; Luc. 4:16-18). ¿Imatataj Levítico 19:3 versiculomanta yachakunchej? Manaña samarikuna pʼunchayta ruwajtinchejpis, tiempochakunanchej tiyan Diospaj ruwanasninchejta ñaupajman churanapaj. Ichá reparanchej chaypaj astawan kallpachakunanchej kasqanta. Jehová Diosta sirvinapaj tiempochakusun chayqa, astawan payman qayllaykusun. Llimphus kanapajqa chaytapuni ruwananchej kashan. w21.12 pág. 5 párr. 13

Jesusqa kay jallpʼapi kashaspa tukuy laya runaswan masichakorqa. Payqa qhapajkunawan, judiospa religionninkuta kamachejkunamanta wakinwan ima mikhorqa. Jinapis astawanqa pobreswan, yanapata necesitajkunawan ima karqa. Chantapis khuyakorqa juchasapasta jina qhawaj kanku, chay runasta. Wakin jatunchakoj runastaj, Jesús imatachus ruwasqanmanta mayta phiñakorqanku. Chayrayku Jesuspa discipulosninta taporqanku: “¿Imaraykutaj mikhunkichej, ujyankichejtaj impuesteroswan juchasapaswan khuskari?”, nispa. Jesustaj paykunaman kay pʼunchaypaj ajllasqa textopi nisqanta kuticherqa (Luc. 5:29-31). Manaraj Mesías jamushajtin, profeta Isaiasqa nerqaña kay mundomanta runas Mesiasta qhesachanankuta. Pay nerqa: “Runasqa payta qhesacharqanku, pisipaj qhawarqanku. [...] Paymanta uyanchejta pakaykorqanchej; payta qhesacharqanchej, manataj paytaqa munakuywan qhawarqanchejchu”, nispa (Isa. 53:3). Profeciaspeqa sutʼita nerqa ‘runas’ Mesiasta qhesachanankuta. Chayrayku judiosqa, yachananku karqa Mesiasta runas qhesachanankupuni kasqanta. w21.05 págs. 8, 9 párrs. 3, 4

Wakin ñaupa cristianosqa mana Diospa Palabranta usqhayta kasukuyta atillarqankuchu (Sant. 1:22). Wakin cristianostajrí qhapajkunallata aswan allinpaj qhawaj kanku (Sant. 2:1-3). Wakintajrí imatapis parlarparillaj kanku (Sant. 3:8-10). Chay cristianosqa manapuni allintachu ruwasharqanku. Jinapis Santiagoqa yacharqa paykuna cambiayta atisqankuta. Chayrayku paykunata kʼachallamanta, sutʼitataj yuyaycharerqa. Diosta yupaychaypi pisi kallpas kajkunatataj, yuyaycharerqa ancianoswan yanapachikunankuta (Sant. 5:13, 14). ¿Imatá yachakunchej? Runasqa ichapis mana cambiayta atillanqankuchu, jinapis cambianqankupuni. Bibliamanta yachakojkunamanta ashkhasqa, mana Bibliaj nisqanta kasukuyta atillankuchu (Sant. 4:1-4). Ichá wakenqa cristianos jina kausakunankupaj mana sajra kausayninkuta saqeyta atillanqankuchu. Chayrayku paykunaman sutʼita ninanchej tiyan, imaspichus cambianankuta. Paykunaqa cambiayta atenqankupuni. Jehovaqa kʼumuykukoj sonqo runasta llajtanman pusamushan, kallpatataj qon cambianankupaj (Sant. 4:10). w22.01 pág. 11 párrs. 11, 12

Tukuy cristianosqa Jehová jina khuyakuyniyoj kayta munanchej. Imaraykuchus mana wajkunata khuyakojtinchejqa, mañakojtinchej Jehová mana uyariwasunchu. Noqanchejtaj munanchej uyarinawanchejtapuni. Chayrayku wajkunamanta khuyakunapaj mayta kallpachakunchej. Uj hermanonchej llakisqa kashan chayqa, wakichisqapuni kashanchej payta uyarinapaj. Chantapis Santiago 2:13 nin: ‘Wajkunata mana khuyakojqa, manallataj juzgasqa kashaspa khuyasqachu kanqa’, nispa. Chaytataj sumajta japʼikunchej. Noqanchejpis wajkuna khuyakunawanchejta necesitanchej. Chayta mana qonqasunchu chayqa, wajkunata khuyakuyta atillasun. Astawanqa khuyakuyta munanchej juchasninmanta pesachikuspa congregacionman kutinpoj hermanota. Bibliata leespaqa Diospa kamachisninmanta yachakunchej wajkunamanta khuyakunanchej kasqanta, nitaj llakichinanchejchu kasqanta. w21.10 pág. 12 párrs. 16, 17

Jesusqa kay jallpʼapi willayninta tukuchashaspa, wañucherqanku chay ñaupaj chʼisin chʼinnejman rerqa. Chayqa karqa Getsemaní huerta. Chaypitaj orakorqa, tʼukurerqataj. Jesusqa chaypi discipulosninman yuyaycharqa imajtinchus orakunankupuni kasqanta. Jesuswan apostolesninwanqa, ichapis chaupi tuta pasaytaña Getsemaní huertaman chayarqanku. Chaypitaj apostolesninman rijchʼarisqallapuni kaychej niytawan, aswan ñaupajman rispa Diosmanta mañakorqa (Mat. 26:37-39). Jinapis paykuna kasharqanku chayman kutispa, puñushajta tariparqa. Chayraykutaj paykunaman nerqa: “Rijchʼarisqallapuni kaychej, Diosmantapis mañakullaychejpuni”, nispa (Mat. 26:40, 41). Jesusqa yacharqa apostolesnin sinchʼi llakisqas, saykʼusqastaj kashasqankuta. Chayrayku paykunata khuyakorqa, nerqataj: “Runaqa cheqa kajtapuni ruwayta munan, cuerpontajrí mana chaypaj jinachu”, nispa. Jesusqa iskay kutitawan orakoj rerqa. Jinapis sapa kutimuspa, apostolesninta orakushajta taripananmantaqa puñushajllatapuni tariparqa (Mat. 26:42-45). w22.01 pág. 28 párrs. 10, 11