Marzo

Apóstol Pedroqa hermanosninta nerqa, imatachus allinta ruwayta yachasqankuwan hermanosninkuta yanapanankuta. Pay nerqa: “Sapa ujniykichej ruwanapaj atiyta Diosmanta japʼisqaykichejman jina purajmanta sirvinakuychej, Diospa jatun khuyakuyninmanta sumaj mayordomos jina”, nispa (1 Ped. 4:10). Imatachus sumajta ruwayta yachasqanchejtaqa ama manchachikuspa ruwana. Nitaj yuyanachu chaywan wajkunata envidiachinanchejta chayrí llakichinanchejta. Jinapis allinta qhawarikuna mana chaymanta jatunchakunapaj (1 Cor. 4:6). Imatapis sumajta ruwayta yachasqanchejqa Diosmanta jamun. Chaywan hermanosninchejta yanapana, amataj chaymanta jatunchakunachu (Fili. 2:3). Imatachus sumajta ruwayta yachasqanchejwan, kallpanchejwan ima Jehovaj munayninta ruwaspaqa, kusisqa kasun. Imajtinchus chaytaqa ruwanchej Jehová Diosta jatunchanapaj, mana wajkunamanta astawan ruwayta munaspachu, nitaj wajkunamanta aswan kurajta jina qhawachikuyta munaspachu. w22.04 págs. 11, 12 párrs. 7-9

Jesusqa Diosmanta Qhelqasqata mayta munakoj. Salmo 40:8 versiculopi nerqaña imayna sumajpajchus qhawananta. Chaypi nin: “Diosníy, munayniykita ruwaspa maytapuni kusikuni. Leyniykeqa sonqoy ukhupipuni kashan”, nispa. Jesusqa Diospa Palabranta may jinatapuni munakusqanrayku kusisqa karqa, Jehovatataj sirvillarqapuni. Noqanchejpis Diospa Palabranta leenapaj, munakunapaj ima kallpachakusun chayqa, kusisqallataj kasun, Jehovatapis sirvillasunpuni (Sal. 1:1-3). Jesuspa nisqasnin, ruwasqanpis sonqonchejta aysan Bibliata aswan sumajta leeyman, estudiayman ima yachaykukunapaj. Leesqanchejta aswan sumajta entiendenapajqa Jehovamanta mañakuna, ama apurallatachu leena, tapuykunata ruwakuna, wakin imastataj anotakuna. Leesqanchejta allinta entiendeyta yachanapajqa, sumajsituta ukhuncharina publicacionesninchejwan yanapachikuspa. Diospa Palabran cambianapaj yanapanawanchejpajtaj, allin sonqowanpuni leena. Tukuy chayta ruwasun chayqa, Bibliata leesqanchejwan astawan yanapachikusun, astawantaj Jehovaman qayllaykusun (Sal. 119:17; Sant. 4:8). w23.02 pág. 13 párrs. 15, 16

Imapichus ñaupariyta munasqanchejpi piensarina. Chaymantataj chayta juntʼanapaj kallpachakuna. ¿Imaynatá chayta ruwasunman? Aswan sumajta yachachiyta munanchej chayqa, sumajta estudiasunman Leellaypuni, yachachillaypunitaj nisqa folletota. Chaupi semana tantakuypi uj asignación kapuwanchej chayqa, ñaupajmantaña uj experienciayoj hermanota nisunman uyarinawanchejta, chayman jinataj yuyaycharinawanchejta. Asignacionesninchejta ñaupajmantaña wakichikojtinchejqa, wajkuna reparanqanku kallpachakusqanchejta, ruwanasninchejtapis sumajta juntʼasqanchejta (2 Cor. 8:22). Imapichus astawan ñaupariyta munashanchej chayta mana ruwayta atillanchejchu chayqa, ama desanimakunachu. Bibliaqa mana ninchu Timoteo sumaj discursante chayrí sumaj yachachej kasqanta. Jinapis Pabloj yuyaychasqanta japʼikorqa. Chayrayku pisimanta pisi sumaj discursanteman, sumaj yachachejmantaj tukorqa, ruwanasnintapis sumajta juntʼarqa (2 Tim. 3:10). w22.04 pág. 24 párrs. 8-11

Qanchis umasniyoj millay phiña animal, ¿pikunawantaj ninakun? Chay millay phiña animalqa chʼejchi leonman rijchʼakun. Jinapis chakisnenqa jukumarejta jina, simintaj leonpata jina, chunka wajrasniyojtaj. Daniel 7 capitulopi parlan chay tawa jatuchaj animalesqa chay jina rijchʼayniyojllataj kasqankuta. Apocalipsis libropitaj nin uj millay phiña animalllapi chay tawantin imas rikukusqanta, manataj tawa animaleschu kasqankuta. Chay millay phiña animalqa mana uj atiyniyoj gobiernollawanchu ninakun. Apocalipsis libroqa nin atiyta japʼisqanta kamachinanpaj “tukuy ayllusta, tukuy laya runasta, tukuy laya parlayniyojkunata, tukuy nacionestawan”. Chayrayku mayqen gobiernomantapis aswan atiyniyoj (Apo. 13:7). Chaynejta chay millay phiña animalqa ninakun, “tukuy tiempo runa masinta chakisnin uraman” churaj gobiernoswan (Ecl. 8:9). Bibliaqa número diezta oqhariyta yachan imamantapis tukuyninmanta parlanapaj. w22.05 pág. 9 párr. 6

¿Pikunataj chay bendicionesta japʼenqanku? Ñaupajtaqa Armagedón guerrata kausashaj pasaj may chhika runas, mosoj jallpʼapi nacekoj wawitas ima. Jinapis mana paykunallachu japʼenqanku. Apocalipsis 20 capituloqa nin wañusqas kausarimunankuta (Apo. 20:11-13). Chanta, ¿pikunataj kausarimonqanku? ‘Cheqan runas’. Paykunaqa kanku Jehovata tukuy sonqo sirvispa wañuporqanku chaykuna. Kausarimullanqankutaj ‘mana cheqan runaspis’. Paykunaqa kanku niraj wañupushaspa mana Jehovata rejsiyta aterqankuchu chaykuna (Hech. 24:15; Juan 5:28, 29). ¿Chay niytachu munan Diospa Gobiernon 1.000 watasta kamachimushajtin tukuy runaspuni kausarimunankuta? Mana. Pikunachus niraj wañupushaspa nipuni Jehovata sirviyta munarqankuchu chaykunaqa, mana kausarimonqankuchu. Paykunaqa Jehovata sirviyta aterqanku, jinapis mana munarqankuchu. Chaywantaj rikucherqanku mana paraisopi kausakuyta munasqankuta (Mat. 25:46; 2 Tes. 1:9; Apo. 17:8; 20:15). w22.05 pág. 18 párrs. 16, 17

Jesusqa allin kamachi yuyayniyojnejta kay jallpʼapi Diospa llajtanta sayaricherqa, Jehovallata yupaychanankupaj (Mat. 24:45). ¿Imaynataj sientekunki Diospa llajtanpi kasqaykimanta? Ichapis apóstol Pedro jina niwaj. Payqa Jesusta kay pʼunchaypaj textopi nisqanta nerqa. Sichus Jehovaj llajtanta mana rejsisunmanchu karqa chayqa, imachus noqanchejmanta kanmanpis karqa. Diospa llajtannejta Jesucristoqa sumaj yachachiykunata mikhunata jina qowanchej. Chantapis sumaj yachachejkuna kanapaj wakichiwanchej, mosoj kausaywan pʼachallikunanchejpajpis yanapawanchej, ajinamanta Jehovata kusichinanchejpaj (Efe. 4:24). Jesusqa llakiy tiempos kajtin, imatachus ruwananchejta yachananchejpaj sumajta yuyaychawanchej. Chaytaj sutʼita rikukorqa kay coronavirus onqoy rikhurejtin. Kay mundomanta ashkhasqa mana yacharqankuchu imatachus ruwanankuta. Jesustajrí cuidakunanchejpaj sumaj yuyaychaykunata qowarqanchej. w22.07 pág. 12 párrs. 13, 14

Jehovaqa israelitasman kamacherqa wawasninkuman sapa día yachachinankuta (Deut. 6:6, 7). Chay tiempomanta tatasqa wawasninkuwan khuskapuni kasqankurayku, wawasninkuman Jehovamanta yachachiyta atillaj kanku, payta munakunankupajtaj yanapayta atej kanku. Por ejemplo uj qhari wawaqa, tatanta tarpuysispa chayri cosechaysispa diantinta yanapaj. Warmi wawataj mamanta siraysispa, awaysispa chayri wasipi waj imasta ruwaysispa diantinta yanapaj. Tatasqa wawasninkuwan khuska trabajaspa, ashkha imasmanta parlariyta atej kanku. Por ejemplo tatasqa wawasninkuwan parlariyta atej kanku, imayna kʼachachus Jehová kasqanmanta, imaynatachus familiankuta yanapashasqanmantapis. Ashkha lugarespeqa tataspis wawaspis ocupasqaslla kanku. Imajtinchus tatasqa trabajonkupi kanku, wawastaj escuelankupi kanku. Chayrayku tatasqa kallpachakunanku tiyan wawasninkuwan parlarinankupajpuni (Efe. 5:15, 16). w22.05 pág. 28 párrs. 10, 11

Jatuchaj juchasqa Jehová Diospa leyninpa contranpi kashan. Uj cristiano jatun juchata ruwan chayqa, Jehovamanta perdonta mañakunan tiyan, chaymantataj congregacionmanta ancianoswan parlanan tiyan (Sal. 32:5; Sant. 5:14). Ancianosrí, ¿imatataj ruwananku tiyan? Jehová Dioslla juchastaqa perdonasqata perdonayta atin. Chaytataj ruwan Jesús kausayninta qosqanrayku. Jehovaqa ancianosta churan Bibliawan yanapachikuspa ninankupaj juchallikoj congregacionllapipunichus manachus kananta (1 Cor. 5:12). Chaypajtaj ancianosqa kay tapuykunapi piensarinku: Juchallikoj, ¿ñaupajmantañachu yuyaychakorqa chay juchata ruwananpaj? ¿Juchanta pakaykuytachu munarqa? ¿Unaytañachu chay juchata ruwasharqa? ¿Sutʼipunichu yachakun Jehovaj contranpi juchallikusqanmanta arrepientekusqan? ¿Imastaj rikuchin Jehová juchallikojta perdonasqantapuni? (Hech. 3:19). w22.06 pág. 9 párr. 4

Jesusqa cheqan kajta maskʼana kasqanta nerqa (Mat. 5:6). Chaypajtaj imatachus Dios cheqanpaj, allinpaj, llimphupaj qhawan chaykunata tukuy sonqo ruwayta munananchej tiyan. Qanpis munakunkichá cheqa kajta, cheqan kajtapis. Chayrayku chejnikunki llullakuyta, mana allin ruwaykunata, sajra ruwaykunatapis (Sal. 119:128, 163). Llullakojkunaqa Satanás jina ruwanku, paymin kay mundota kamachejqa (Juan 8:44; 12:31). Satanasqa Jehová Diospa santo sutinta chʼichichayta munan. Chayrayku payqa Edén huertapi runas Diospa contranpi oqharikusqankumantapacha, Diosninchejmanta llullasta parlashan. Edenpi nisqanwanqa runasta yuyachiyta munarqa Jehovaqa sajra, llulla kamachejtaj kasqanta, runasmantataj allin imasta jarkʼasqanta (Gén. 3:1, 4, 5). Chay jina millay llullasta parlasqanraykutaj, ashkha runasqa mana allinpajchu Jehovata qhawanku. Wakin runasqa paykunapuni mana munankuchu cheqa kajta ruwayta. Chayraykutaj Satanasqa paykunata ruwachinman tukuy mana cheqan kajta, sajra kajtapis (Rom. 1:25-31). w23.03 pág. 2 párr. 3

Ichapis mayta kallpachakushanki uj mana allin imata ruwayta qonqanaykipaj, jinapis wakin kuti chaypi urmankiraj. Manachayrí ichá yuyanki manarajpuni bautizakuyta atisqaykita. Chaytaj desanimachisunkiman. Mana saykʼupunaykipajqa Jehovata munakuy yanapasonqa. Jehovata munakusqaykeqa imamantapis aswan sumajpuni (Pro. 3:3-6). Payta tukuy kallpaykiwan munakunki chayqa, ima llakiy kajtinpis payta sirvillankipuni. Bibliaqa ashkha kutispi nin Jehovaqa kamachisninta munakusqanta. Chaytaj niyta munan Jehovaqa ni jaykʼaj kamachisninta saqerparinanta, nisunman paykunata munakunallantapuni. Qantaj Diospa rijchʼayninman jina ruwasqa kanki (Gén. 1:26). Chanta, ¿imaynatataj chay kikin munakuyllatataj rikuchiwaj? Ñaupajtaqa agradecekuyta yachanayki tiyan (1 Tes. 5:18). Sapa día kayta tapurikuy: “¿Imaynamantataj kunan día Jehová munakuwasqanta rikuchiwan?”, nispa. Orakushaspataj chay imasmanta agradecekuy. Reparay Jehovaqa munakususqanrayku allin imasta qanpaj ruwapususqanta. w23.03 pág. 12 párrs. 17-19

Jesusqa apostolesninta kʼachamanta, munakuywantaj yanapaykorqa. ¿Imatá yachakunchej? Wajkuna pantajtinkupis aswan importanteqa mana phiñakunanchej. Chayrayku ujnin hermanonchej pantajtin phiñarikunchej chayqa, kayta tapurikuna: “¿Imajtintaj pantasqan chay jinatapuni phiñachiwan? ¿Imallapipis mejoranay faltashawanchu? ¿Ima problemachu hermanojta kapunman? Phiñakunaypaj jina kajtinpis, ¿nichu aswan allin kanman munakuywan pasachinallay?”, nispa. Wajkunata munakusunpuni chayqa, cheqa cristianos kasqanchejta rikuchisun. Jesusmanta yachakullasunmantaj hermanosninchejta entiendenapaj kallpachakuna kasqanta (Pro. 20:5). Jesusqa yacharqa imatachus runas sonqonkupi piensasqankuta, noqanchejtajrí mana yachayta atinchejchu. Jinapis hermanosninchejwan pacienciakuyta atinchej pantajtinku (Efe. 4:1, 2; 1 Ped. 3:8). Chayta ruwanapajtaj paykunata sumajta rejsinanchej tiyan. w23.03 pág. 30 párrs. 14-16

Wakin kuti, Satanasqa onqoykusqanchejmanta valekuspa Jehovamanta karunchachiyta munawasunman. Ichapis doctores, mana testigo familiaresninchejpis matʼiwasunman yawarta churachikunanchejpaj. Chaytaj Diospa leyninpa contranpi kashan. Chayri ichá pillapis niwasunman uj tratamientota ruwachikunallanchejta, Bibliaj yuyaychaykunasninpa contranpi kashajtinpis. Ni pipis wañuyta munanchejchu. Jinapis yachanchej wañupojtinchejpis Jehovaqa munakunallawanchejtapuni (Rom. 8:37-39). Jehovaj amigosnin wañupojtinkupis, paypa yuyayninpeqa kausashallankupuni (Luc. 20:37). Payqa maytapuni amigosninta kausarichiyta munashan (Job 14:15). Chayrayku Jehovaqa Wawanta kachamorqa ‘wiñay kausayniyoj kananchejpaj’ (Juan 3:16). Yachanchej Jehovaqa mayta munakuwasqanchejta, cuidawasqanchejtapis. Chayrayku onqosqa kajtinchejpis chayri wañuchinawanchejta niwajtinchejpis, mana paymanta karunchakunchejchu. Astawanqa payman qayllaykunchej sonqochanawanchejpaj, yachayta qonawanchejpaj, kallpachanawanchejpajpis (Sal. 41:3). w22.06 pág. 18 párrs. 16, 17

Biblia nin: “Jehová Diosta manchachikuymin yachaypa qallariynenqa, Aswan Santo Diosmanta yachakuspaqa allin yuyayta japʼinkichej”, nispa (Pro. 9:10). Chayrayku imatapis ajllanapajqa ‘Aswan Santo Diosmanta yachakusqanchejman jina’ ruwana, nisunman imatachus Jehová yuyasqanman jina. Chaypajtaj Bibliata, publicacionesninchejtawan estudiana. Chayta ruwasun chayqa cheqamanta yachayniyoj kasqanchejta rikuchisun (Pro. 2:5-7). Cheqa yachayqa Jehovallamanta jamun (Rom. 16:27). ¿Imajtín chayta ninchej? Kinsa imasrayku. Ñaupaj kaj: Jehová Ruwawajninchej, ruwasqasninmantataj tukuy imata sumajta yachan (Sal. 104:24). Iskay kaj: Tukuy ima ruwasqasnin rikuchin Jehová yachayniyoj kasqanta (Rom. 11:33). Kinsa kaj: Sumaj yuyaychaykunasnenqa kasukojkunata yanapanpuni (Pro. 2:10-12). Cheqamanta yachayniyoj kayta munanchej chayqa, chay kinsa imasta sutʼita yachananchej tiyan, chayman jina imatapis ajllananchej tiyan, ruwananchejtaj tiyan. w22.10 pág. 19 párrs. 3, 4

Apocalipsis capítulo 12 nisqanman jina, Satanasqa chay guerrapi atipachikorqa, paywan demoniosninwantaj kay jallpʼaman wijchʼuchikamorqanku. Satanastaj may phiñasqa kasqanrayku kay jallpʼapi runaswan rabianta pagachikuyta qallarerqa. Chayrayku Bibliaqa nin: “Ay jallpʼamanta”, nispa (Apo. 12:9-12). ¿Imaynatá kay profecías yanapawanchej? Kay mundo astawan sajrayasqan, runaspis astawan sajrayasqankoqa reparachiwanchej Jesús Rey jina kamachiyta qallarisqantaña. Chayrayku runas paykunallapaj imatapis munasqankuta rikuspa chayri astawan sajrayasqankuta rikuspa llakikunamantaqa, yuyarikuna ajina kasqankuwan Bibliaj profecianta juntʼashasqankuta. Chayqa rikuchin Diospa Gobiernon kamachishasqantaña (Sal. 37:1). Armagedón astawan qayllamusqanman jinataj kay mundoqa astawan sajrayallanqapuni (Mar. 13:8; 2 Tim. 3:13). Mayta agradecekunchej munakuyniyoj Tatanchej Jehovaman, kay mundopi imaraykuchus chay imas kashasqanta entiendechiwasqanchejmanta. w22.07 págs. 3, 4 párrs. 7, 8

Jehovamanta mañakusunman cristiano hermanosninchejta yanapananta paykuna onqoykojtinku, qhatiykachasqa kajtinku, guerra kajtin, sinchʼi para, terremotos, waj llakiykunas kajtinpis. Wakin hermanosninchejqa wajkunata yanapanankupaj mayta llankʼanku, paykunapajpis mañapullasunmantaj. Ichapis ajina llakiypi kaj hermanosta rejsinchej. Paykunapajpis sutisninkuta oqharispa mañapusunman. Jehová paykunata yanapananta mañakuspaqa, mayta munakusqanchejta rikuchinchej. Congregacionta ñaupajman apajkunaqa, mayta agradecekunku paykunapaj mañapusqanchejmanta. Chay mañakusqanchejqa paykunata mayta yanapan. Apóstol Pablopis yacharqa wajkuna paypaj mañapunankuta necesitasqanta. Chayrayku nerqa: “Noqapajpis Diosmanta mañapullawaychejtaj. Ajinamanta simiyta kicharejtiy, Diospa pakasqa yachayninmanta sumaj willaykunata mana manchachikuspa willayta atinaypaj”, nispa (Efe. 6:19). Kunanpis ashkha hermanos congregacionpi sinchʼita llankʼanku. Paykunata yanapananpaj Jehovamanta mañakuspaqa, paykunata munakusqanchejta rikuchinchej. w22.07 págs. 23, 24 párrs. 14-16

Uj soldadoqa monterata churakun umanta jarkʼakunanpaj. Noqanchejpis Satanaswan uj maqanakuypi jina kashanchej. Chayrayku yuyayninchejta Satanasmanta jarkʼakunanchej tiyan. Payqa tukuy imata ruwan juchaman urmachinawanchejpaj, yuyayninchejtapis chʼichichananpaj. Imaynatachus uj montera soldadoj umanta jarkʼan, ajinallatataj suyakuyninchejpis yuyayninchejta jarkʼan Jehovamanta mana karunchakunanchejpaj. Pero imastachus munasqallanchejpi yuyajtinchejqa suyakuyninchej pisiyapunman. Tʼukurina imachus pasasqanta Corinto llajtamanta wakin cristianosta. Paykunaqa manaña creerqankuchu Dios kausarimuy kananta nisqanpi, chaypi creey may importante kashajtinpis (1 Cor. 15:12). Pablo nerqa mana kausarimuypi creejkunaqa, munayninkuta ruwanallankupaj kausasqankuta (1 Cor. 15:32). Kay tiempomanta ashkha runaspis, mana Diospa nisqasninpi creellankutajchu. Chayrayku paykunaj munayninkuta ruwanallankupaj kausanku, tukuy imatataj ruwanku kay tiempollapi kusisqa kayta munaspa. Noqanchejtajrí mayta atienekunchej Dios allin kausayta apamunanta nisqanpi. w22.10 págs. 25, 26 párrs. 8, 9

Jehovaqa paymanta mañakunanchejta munan. Payqa yachan ima llakiyniyojchus kashasqanchejta, niwanchejtaj ima ratollapis paymanta mañakuyta atisqanchejta, uyarinawanchejtataj. Kamachisninpa mañakusqankoqa paypa sonqonta kusichin (Pro. 15:8). Sapallanchej sientekuspa, ¿imatá Jehovaman nisunman? Tukuy imata payman willakusunman (Sal. 62:8). Willakuna imachus llakichiwasqanchejta, imaynachus sonqonchej kashasqantapis. Mañakuna imatachus ruwananchejta reparachinawanchejta. Qanpis kallpata, yachayta mañakuwaj creeyniykimanta respetowan sutʼincharinaykipaj (Luc. 21:14, 15). Desanimasqa kashanki chayrí, ¿imatá ruwawaj? Jehovamanta mañakuy creeypi sinchʼi sayasqa hermanowan parlarinaykipaj yanapasunanta, chay hermanotataj entiendesunanpaj yanaparinanta. Mana sapallanchej sientekunapajqa, imaynatachus kutichiwasqanchejta sumajta reparana, wajkunawantaj yanapachikuna. w22.08 pág. 10 párr. 6

Tesalónica llajtapi mosoj congregacionmanta cristianosqa sinchʼi qhatiykachasqas karqanku. Sajra runasqa ‘wakin hermanosta qhatataspa aparqanku llajtata kamachejkunaman’ (Hech. 17:6). Chay mosoj cristianosqa maytachá mancharikorqanku. Paykunaqa ajinapi rikukuspa ichapis manaña sonqo kʼajaywanchu Jehovata sirvinkuman karqa. Apóstol Pablotaj mana munarqachu ajinapi rikukunankuta. Chayrayku mana chay mosoj congregacionta jinallatachu saqerparqa. Aswan qhepaman Pabloqa Tesalonicamanta hermanosta yuyaricherqa: ‘Hermanonchej Timoteota qankunaman kachamorqayku kallpachasunaykichejpaj, sonqochasunaykichejpaj, ajinamantataj creeyniykichej sinchʼi kananpaj. Ajinapi mana pipis chay ñakʼariykunarayku llauchhiyananpaj’, nispa (1 Tes. 3:2, 3). Timoteoqa Listrapi kashaspa rikorqaña imaynatachus Pablo chay llajtamanta cristianosta kallpachasqanta, Jehovapis yanapasqanta. Chayrayku Timoteoqa Tesalonicamanta mosoj cristianosman niyta aterqa, Jehovaj yanapayninwan paykunatapis allin rinanta (Hech. 14:8, 19-22; Heb. 12:2). w22.08 pág. 21 párr. 4

Uj qotu Bibliamanta yachaqajkunaqa, 1870 watapi Diospa Palabranta sumajta ukhunchayta qallarerqanku. Paykunamanta umataj Charles Russell karqa. Paykunaqa sumajta entiendeyta munarqanku imayna valorniyojpunichus Jesuspa wañuynin kasqanta, imaynatachus chay wañuyninta yuyarikunankutapis. Kunanqa chay ukhuncharisqanku noqanchejta mayta yanapawanchej. Chayrayku sutʼita entiendenchej imayna valorniyojpunichus Jesuspa wañuynin kasqanta, imaschus wañusqanrayku ruwakunantapis (1 Juan 2:1, 2). Chantapis yachakullanchejtaj Bibliaqa Diosta kasukoj runaspaj iskay suyakuykunamanta parlasqanta. Wakenqa cieloman ripuspa mana jaykʼaj wañoj cuerpoyoj kayta suyakushanku. Wakintaj kay jallpʼapi wiñaypaj kausakuyta suyakushanku. Jehová mayta munakuwasqanchejpi piensarispa, Jesuspa wañuynin imaynatapunichus sapa ujninchejta yanapawasqanchejpi piensarispa ima, Jehovaman astawan qayllaykunchej (1 Ped. 3:18). Chayrayku ñaupa tiempomanta hermanosninchej jinallataj, waj runasta wajyarinchej Jesuspa Wañuyninta Yuyarinapaj tantakuyman jamunankupaj. Chay tantakuytaqa ruwanchej Jesús nisqanman jinapuni. w23.01 pág. 21 párrs. 6, 7

Jesusqa runasman yachacherqa Diospa Gobiernon sumaj imasta ruwananta. Kacharichisqa kasqanchejmantaqa mayta agradecekunchej, imaraykuchus chaynejta Jehovaj sumaj amigosnin kayta atinchej, Jesuspatapis. Mana chayllachu, Jesuspi creejkunaqa suyakushallanchejtaj wiñaypaj kausakuyta, munasqa wañupoj familiaresninchejtapis watejmanta rikukapuyta (Juan 5:28, 29; Rom. 6:23). Chay sumaj bendicionesta japʼinapajtaj ni imata ruwarqanchejchu. Ni jaykʼaj Diosman, Cristomanpis pagayta atisunchu imatachus noqanchejrayku ruwasqankumanta (Rom. 5:8, 20, 21). Jinapis, ¿imaynatá rikuchisunman paykunaman may agradecesqa kashasqanchejta? Tukuy kapuyninchejwan Jehovata sirvispa. Ichapis tiempochakusunman Diosta yupaychanapaj wasista ruwaypi, allinchaypi ima yanapakamunapaj. w23.01 pág. 26 párr. 3; pág. 28 párr. 5

Diospa Gobiernonpi kamachejkunaqa, may chhika waranqa waranqa runasta jallpʼantinpi kamachenqanku. Chay 144.000 ajllasqasqa, Jesús jinallataj reyestaj sacerdotestaj kanqanku (Apo. 5:10). Moisespa Leyninpi kashajtinku, sacerdotesqa israelitasta yanapananku karqa mana onqonankupaj, Jehovamantapis mana karunchakunankupaj. Chay ruwayninku aswan importante karqa. Chay Leytaj “jamunan kashan chay sumaj imaspa llanthullan” karqa. Chayrayku Jesuswan khuska kamachenqanku chaykunapis, chay sumaj ruwayllatataj ruwanqanku: Diospa llajtanta yanapanqanku sanitos kanankupaj, Diospa qayllallanpipunitaj kanankupaj (Heb. 10:1). Manaraj yachanchejchu imaynatachus paykuna Diospa Gobiernon kamachishajtin kay jallpʼapi kausakojkunawan parlanankuta. Jinapis yachanchej paraisopi kausakojkunata Jehová yanapanantapuni (Apo. 21:3, 4). w22.12 pág. 11 párrs. 11-13

¿Imaraykutaj runasta Jesuspa Wañuyninta Yuyarinapaj tantakuyman invitarinchej? Munanchej yachanankuta imatachus Jehovawan Jesuswan tukuy runasrayku ruwasqankuta (Juan 3:16). Imatachus chay chʼisi primera vez rikusqanku, uyarisqankupis sonqonkuta aysananta munanchej Jehovata astawan rejsinankupaj, kamachisnintaj kayta munanankupaj. Invitallanchejtaj chiriyapoj hermanostapis. Paykunataqa invitarinchej Diosninchej paykunata munakullasqantapuni yuyarichinapaj. Maytataj kusikunchej paykunamanta ashkhas jamojtinku. Chay tantakuypi kaspaqa yuyarikunku Jehovata sirvishaspa imayna kusisqachus karqanku chayta (Sal. 103:1-4). Invitajtinchej runas jamojtinkupis manapis, tukuy atisqanchejta kallpachakunchej invitarinapaj. Imaraykuchus noqanchejqa yachanchej Jehovapajqa aswan importante runas kasqanta (Luc. 15:7; 1 Tim. 2:3, 4). w23.01 pág. 20 párr. 1; pág. 23 párrs. 9-11

Jesusqa wañupunan ñaupaj chʼisita Tatanmanta mañakorqa discipulosninta jarkʼananta (Juan 17:15, 20). Jehovaqa kamachisninta jarkʼanpuni, cuidanpunitaj. Jinapis Jesusqa yacharqa Satanasqa discipulosninta ni jaykʼaj jina astawan qhatiykachananta, chayraykutaj Jehovaj yanapayninta necesitanankuta. Satanaspa mundonqa cristianosta tukuy imaymanamanta matʼin. Problemaspi rikukojtinchejqa kallpanchej pisiyanman, Jehovatapis niña kasukuyta atisunmanchu. Jinapis mana manchachikunanchejchu tiyan. Jehovaqa cuidawanchejpuni. Payqa qhawamushan imapichus rikukushasqanchejta, yanapanawanchejpajtaj wakichisqapuni kashan. Arí, ‘Jehová Dios payta manchikojkunata libran’ (Sal. 33:18-20). w22.08 pág. 8 párrs. 1, 2

Jesuspa Wañuyninta Yuyarinapaj tantakuy ñaupaj semanasta, chay pasaytapis wañuyninta may jatunpaj qhawasqanchejta rikuchinchej. ¿Imaynamanta? Tiempochakunchej orakunapaj, Jesuspa wañuynin may valorniyoj kasqanpitaj tʼukurinapaj. Chantapis chay sumaj tantakuyman tukuy atisqanchejta runasta invitarinchej. Astawanpis ni ima jarkʼanawanchejta munanchejchu Jesuspa Wañuyninta Yuyarinapaj tantakuyman rinanchejpaj. Chaypitaj yachakunchej imaraykuchus kacharichisqa kayta necesitasqanchejta, imaynatatajchus uj runaj wañuyninnejllata ashkha runaspa juchasninku perdonasqa kayta atisqanta. Chaypeqa yuyarichillawanchejtaj pikunachus tʼantata mikhusqankuta, vinotapis ujyasqankuta. Chantá imawanchus chaykuna ninakusqantapis (Luc. 22:19, 20). Chay discursota uyarishaspaqa tʼukurinchej kay jallpʼapi kausakuyta suyakojkuna ima bendicionestachus japʼinankupi (Isa. 35:5, 6; 65:17, 21-23). Chay cheqa yachachiykunata entiendesqanchejqa may sumajpuni. w23.01 pág. 20 párr. 2; pág. 21 párr. 4

Diosqa Wawanpa kausayninta qorqa juchasninchejmanta perdonasqa kananchejpaj, ajinamanta wiñay kausayta japʼiyta atinanchejpaj (Mat. 20:28). Chaymanta parlaspa apóstol Pablo nerqa: “Imaynatachus wañoyqa uj runanejta rikhurerqa, ajinallatataj wañuymanta kausarimuypis uj runanejllatataj kanqa. Imaynatachus Adannejta tukuy wañushanku, ajinallatataj Cristonejta tukuy kausarichisqa kanqanku”, nispa (1 Cor. 15:21, 22). Jesusqa discipulosninman yachacherqa, orakushaspa Diospa Gobiernon jamunanta mañakunankuta, kay jallpʼapi Tatanpa munaynin ruwakunantapis (Mat. 6:9, 10). Diospa munaynin ukhupitaj kashan, runas kay jallpʼapi wiñaypaj kausakunanku. Chaypajtaj Jehovaqa Wawanta Gobiernonmanta Rey kananpaj churarqa, 144.000 runastataj tantashan munayninta juntʼaypi Jesusta yanapanankupaj (Apo. 5:9, 10). w22.12 pág. 5 párrs. 11, 12

May munasqa familiarninchej chayri amigonchej wañupojtenqa mayta faltachanchej. Qallariypeqa mayta sonqonchej nanawanchej, astawanraj mayta sufrispa wañuporqa chayqa. Tiempowanraj paymanta wakin imasta yuyarikuspa watejmanta kusisqa kayta atisunman. Ichapis yuyarikusunman kallpacharinawanchejpaj chayri asirichinawanchejpaj uj imata yachachiwasqanchejta, uj imata ruwasqanta chayri nisqanta. Ajinallatataj llakikusunman Jesús mayta sufrisqanmanta, wañusqanmanta ima leespa. Jesuspa Wañuyninta Yuyarinapaj tantakuy semanaspeqa, astawanraj tiempochakunchej Jesuspa wañuynin may valorniyoj kasqanpi tʼukurinapaj (1 Cor. 11:24, 25). Chaywanpis Jesús kay jallpʼapi kashaspa imatachus ruwasqanpi, imatachus nisqanpi tʼukurispaqa mayta kusikunchej. Chantapis kallpata japʼinchej imatachus kunan ruwashasqanpi, imatachus aswan qhepamanpis noqanchejpaj ruwananpi tʼukurispa. w23.01 pág. 26 párrs. 1, 2

Jesús wañupojtenqa discipulosnin mayta llakikorqanku. Paykunajtaqa mana sumaj amigollankuchu wañuporqa, manachayqa manañapis suyakuyniyojchu kankuman jina sientekorqanku (Luc. 24:17-21). Aswan qhepamantaj Jesusqa paykunaman rikhurerqa, tiempochakorqataj Bibliamanta profeciasta juntʼashasqanta sutʼinchananpaj. Chantapis uj sumaj ruwayta paykunaman qorqa (Luc. 24:26, 27, 45-48). Jesús cieloman ripushajtintaj, discipulosninpa llakiyninkoqa jatun kusiymanña tukorqa. Paykunaqa may kusisqa kasharqanku Jesús kausakushasqanta yachaspa, mosoj llankʼayninkuta juntʼanankupajtaj yanapananta yachaspa. Chay kusiyninkutaj paykunata tanqarqa Jehovata mana saykʼuspa jatunchanankupaj (Luc. 24:52, 53; Hech. 5:42). Jesuspa discipulosnin jina ruwasunman Diospa Gobiernonta kausayninchejpi ñaupajman churaspa. Jehovataqa mana saykʼuspa sirvinallanchejpuni tiyan. Payqa niwanchej chayta ruwajtinchej mayta bendecinawanchejta (Pro. 10:22). w23.01 págs. 30, 31 párrs. 15, 16

Noqanchejqa mana Adanman, nitaj Evamanpis rijchʼakuyta munanchejchu. Chayrayku mana paykuna jina pantanapajqa Jehovata astawan rejsinanchej tiyan, imayna Dioschus kasqanmanta agradecekunanchej tiyan, imaynatachus yuyasqanta entiendenapajtaj kallpachakunanchej tiyan. Chayta ruwasun chayqa payta astawan munakusun. Abrahanmanta parlarina. Payqa Diosninta maytapuni munakorqa. Jehová imatachus ruwasaj nisqanta mana entiendeyta atillajtinpis, mana paypa contranta oqharikorqachu. Astawanqa Diosta aswan sumajta rejsinanpaj kallpachakorqa. Sodomatawan Gomorratawan Jehová chinkarparichinanta yachaspa, qallariypeqa manchachikorqa ‘jallpʼantinmanta Juezqa’ sajra runasta chinkachishaspa cheqan runastapis chinkarparichinanta. “Diosqa ni chayta ruwanmanchu” nispachá yuyarqa, chayrayku kʼumuykukoj sonqowan Jehovata tapurerqa. Jehovataj paywan pacienciakorqa, tapusqanmantaj kuticherqa. Parlayta tukusqankutawantaj, Abrahanqa entienderqa Jehovaqa tukuy runaspa sonqosninkuta qhawasqanta. Nitaj jaykʼajpis mana juchayoj runasta, juchayoj runastawan khuska castigananta (Gén. 18:20-32). w22.08 pág. 28 párrs. 9, 10

Kamachej Nehemiasqa Jerusalenpa perqasninta allinchayta tukusqankutawan, 455 watapi Jesús niraj jamushajtin, de confianza runasta churarqa llajtamanta cargoyoj kanankupaj. Chay runasmanta ujnintaj Hananías karqa, payqa “soldadospa wasinmanta capitán karqa”. Bibliaqa Hananiasmanta nin: “De confianza runa karqa, wajkunamanta nisqataj cheqa Diosta astawan manchachikoj”, nispa (Neh. 7:2). Hananiasqa Jehovata munakusqanrayku, paypa sonqontataj nanachiyta manchachikusqanrayku, ima ruwanastachus qosqankuta sumajta juntʼaj. Noqanchejtapis chay imasllataj yanapawasun de confianza cristianos kanapaj. Pabloj de confianza amigon Tiquicomantañataj parlarina. Pabloqa paymanta nerqa “Señorpa sumaj kamachin” kasqanta (Efe. 6:21, 22). Pabloqa Tiquicopi confiasqanrayku Efesomanta, Colosasmanta hermanosman cartasta paywan apacherqa. Jinapis mana cartasllatachu apacherqa. Manachayqa Tiquicota kacharqa hermanosta kallpachananpaj, sonqochananpaj ima. Kay tiempopipis, Tíquico jina Jehovata tukuy sonqo sirvej de confianza cristianos tiyallantaj. Paykunataj Diospa qayllallanpipuni kanapaj yanapawanchej (Col. 4:7-9). w22.09 págs. 9, 10 párrs. 5, 6

Joseqa 13 watasta jinapuni, imaymana sinchʼi pruebaspi rikukorqa. Joseqa yuyayta atinman karqa Jehová mana munakusqanta, llakiypi kashajtintaj saqerparisqanta. Jinapis mana phiñakuywan atipachikorqachu. Astawanpis yuyaynillanpipuni karqa, sonqo tiyasqallapunitaj karqa. Hermanosninmanta vengakuyta atispañataj, mana vengakorqachu. Astawanpis paykunata munakusqanta rikucherqa, perdonarqataj (Gén. 45:4, 5). ¿Imajtín chayta ruwarqa? Sumajta piensarisqanrayku. Problemasnillanpi yuyananmantaqa, imachus Jehovaj munaynin kasqanpi astawan yuyarqa (Gén. 50:19-21). ¿Imatá Josemanta yachakunchej? Pillapis sonqonchejta nanachiwanchej chayqa, ama Jehovapaj phiñakunachu, nitaj yuyanachu Jehová noqanchejmanta qonqapusqanta. Astawanpis imaynatachus Jehová llakiyninchejta aguantanapaj yanapashawasqanchejpi tʼukurina. Chantapis perdonanapaj wakichisqa kana, yuyarikunataj ‘munakoyqa ashkha juchasta pʼampasqanta’. w22.11 pág. 21 párr. 4

Profeta Danielpa mosqoypi jina rikusqanqa, sutʼita reparachiwanchej Jehová Dioslla tukuy autoridadesmanta aswan patapi kasqanta. Ñaupajta rikorqa tawa jatuchaj animalesta, pikunachus kikinchakun atiyniyoj gobiernoswan, ñaupa tiempomantapacha kunankama. Chaykuna kashanku Babilonia, Medopersia, Grecia, Roma, chantá Reino Unidowan Estados Unidoswan ima. Chay iskay nacionesqa uj atiyniyoj gobiernolla kanku, kay tiempopitaj kamachishanku (Dan. 7:1-3, 17). Chantá Daniel Jehovata rikorqa kamachina tiyananpi tiyasqata, Juzgana Tribunalpi (Dan. 7:9, 10, sutʼinchaynin). Danielqa rikorqa Jehová Dios tukuy atiyta qhechusqanta gobiernosmanta, qosqantataj piskunachus atiyta japʼinapaj jina kanku, aswan atiyniyojtaj kanku chaykunaman. ¿Pikunataj paykuna kanku? ‘Runaj wawanman rijchʼakoj’, nisunman Jesucristo, chantá ‘Patapi kaj Diospa santosnin’, nisunman 144.000 ajllasqas. Paykunaqa gobernanqanku “wiñaypaj wiñaynintinpaj” (Dan. 7:13, 14, 18). Sutʼita yachanchej Jehovalla Patapi kaj Dios kasqanta. Imatachus profeta Daniel mosqoypi jina rikusqanqa, ñaupajpiña nisqanman jina karqa. Daniel nerqa: ‘Cielopi kaj Diosqa Reyesta churantaj, orqhontaj’, nispa (Dan. 2:19-21). w22.10 págs. 14, 15 párrs. 9-11