Abril

Kay tapuykunapi piensarisunman: “Wajkuna yuyaychawajtinku, ¿imatá ruwani? ¿Juchayta reconocenichu chayri achakistachu churani? ¿Wajkunatachu juchachani?”. Bibliapi Diospa waj kamachisninmanta leeshaspaqa, imaynatachus problemasninkuta allinchasqankupi piensarina. Pimantachus leeshasqanchejpi tʼukurispa tapurikusunman: “¿Imatá ruwayman pay jina Jehová Diosta tukuy sonqo sirvinaypaj?”. Kay tiempomanta hermanosninchejmantapis mayta yachakullasunmantaj, jóvenes kajtinkupis chayri mayores kajtinkupis. Ichá piensarisunman congregacionninchejmanta uj hermanito llakiykunata aguantashasqanpi. Paytaqa ichapis compañerosnin sajra imasman tanqashankuman, familian churanakushanman chayri onqosqa kashanman. ¿Imatá paymanta yachakusunman? Imaynatachus chay hermanito llakiyninta aguantasqanta rikuspaqa, noqanchejpis pay jina llakiykunasninchejta aguantanapaj kallpachakusunman. Maytapuni agradecekunchej Diospa llajtanpi chay jina hermanos, hermanas kasqankumanta. Imajtinchus paykuna jina ruwaspaqa mayta kusikunchej (Heb. 13:7). w22.04 pág. 13 párrs. 13, 14

Agradecekunchej llakiypi kashajtinchej uj munakuyniyoj anciano uyariwasqanchejmanta, sonqochariwasqanchejmanta ima. Mayta agradecekullanchejtaj uj experienciayoj precursor estudionchejman acompañarispa yanapariwasqanchejmanta, yuyaychariwasqanchejmanta ima. Chay hermanosqa mayta kusikunku wajkunata yanaparispa. Noqanchejpis paykuna jina kusikusunman hermanosninchejta yanaparispa. Chaykunasta ruwaspa chayri waj jinasmanta Jehovata astawan sirviyta munanchej chay, ¿imatá ruwasunman? Imapichus astawan ñaupariyta munasqanchejqa sutʼi kanan tiyan. Ichá nisunman: “Congregacionpi astawan yanapakuyta munayman”, nispa. Ajinata nispaqa mana yachayta atillasunmanchu imapichus astawan yanapakuyta munasqanchejta, nillataj yachayta atisunmanchu yanapakushasqanchejtañachus manachus. Chayrayku imapichus ñaupariyta munasqanchejta sutʼita yachananchej tiyan. Allin kanman anotakunanchej imapichus ñaupariyta munasqanchejta, imaynatatajchus chayta ruwananchejtapis. w22.04 pág. 25 párrs. 12, 13

Kay tiemponchejpi Jehovaqa “may chhika runasta” tantashan, wakichishantaj Gobiernonpa kamachiyninpi kausakunankupaj (Apo. 7:9, 10). Kay mundopi runas chejninakusqankurayku, guerras kasqanrayku tʼaqanasqa kajtinkupis, Dios tantashan chay runasqa mayta kallpachakushanku sonqonkumanta tukuy chejnikuyta tʼiranankupaj. Paykunaqa espadasninkumanta arado rejastapis ruwakushankumanña jina kashanku (Miq. 4:3). Nitaj guerrasman rinkuchu, maypichus may chhika runas wañunku chayman. Astawanpis runasta yanapanku “cheqa kaj kausayta” japʼikunankupaj. Chaytataj ruwanku Diosmanta, munayninmantawan yachachispa (1 Tim. 6:19). Diospa Gobiernonta apoyasqankurayku, ichapis familiaresninku paykunaman churanakunku chayri qolqemanta pisisqa kanku. Jinapis Jehovaqa imatachus necesitasqankuta paykunaman qonpuni (Mat. 6:25, 30-33; Luc. 18:29, 30). Tukuy kaytaj rikuchiwanchej Diospa Gobiernonqa kasqantapuni, Jehovaj munaynintataj juntʼanallantapuni. w22.12 pág. 6 párr. 13

Waranqa watas tukukuyta, runasqa manaña pantaj runaschu kasun. Chaypachaqa Adán ima llakiykunamanchus vendeykuwasqanchejmanta kacharichisqa kasun (Rom. 5:12). Adanpa rikhurichisqan juchaqa, wiñaypaj chinkachisqa kanqa. Ajinamanta chay 1.000 watas tukukojtin, jallpʼapi kausaj runasqa mana pantajkunaman tukusun. Chaytaj wañuymantapis kausarishasunman jina kanqa (Apo. 20:5). Jesusqa Satanás tukuy imapi urmachiyta munajtinpis, manapuni Diosta wasancharqachu. Mana pantaj runasrí, ¿ajinallatatajchu ruwanqanku Satanás paykunata pruebaman churajtin? Chay tapuytaqa sapa uj kutichinanku kanqa 1.000 watas tukukojtin, Satanastaj chinkay ukhumanta kacharichisqa kajtin (Apo. 20:7). Qhepa kaj pruebapi Jehovata mana wasanchajkunaqa, wiñay kausayta japʼenqanku. Chaymantapachataj niña ujtawan juchaj esclavosninchu kanqanku (Rom. 8:21). Jinapis Jehovaj contranpi oqharikojkunaqa, wiñaypaj chinkachisqa kanqanku (Apo. 20:8-10). w22.05 pág. 19 párrs. 18, 19

Kay profeciaqa juntʼakorqa maypachachus Satanás judiosta, romanostapis Diospa Wawanta wañuchinankupaj tanqarqa chaypacha (Luc. 23:13, 20-24). Imaynatachus pillapis chaki talonninta imanarpakojtin uj tiempota mana puriyta atinchu, ajinallatataj Jesuspis sepulturapi kashaspa kinsa diasta ni imata ruwayta aterqachu (Mat. 16:21). Génesis 3:15 profecía juntʼakunanpaj, Jesusqa mana sepulturapichu qhepakunan karqa. ¿Imajtin? Chay profecía nerqa warmej miraynin katarej umanta pʼaltarparinanta. Chaypajqa Jesús kausarimunanpuni karqa, ajinapunitaj karqa. Jesusqa kinsa diasninman ni jaykʼaj wañunanpaj kausarimorqa, cielopi kausakunanpaj cuerpoyoj. Diospa nisqan tiempopi, Jesusqa Satanasta chinkasqata chinkarparichenqa (Heb. 2:14). Cristowan khuska kamachejkunapis, jallpʼamanta tukuynin Diospa enemigosninta chinkarparichiypi yanapakonqanku, nisunman katarej mirayninta (Apo. 17:14; 20:4, 10). w22.07 pág. 16 párrs. 11, 12

Tatamamas, wawasniykichejta yanapaychej sumaj amigosniyoj kanankupaj. Bibliaqa sutʼita nin amigosninchejqa allin kaj ruwayman chayri mana allin kaj ruwayman tanqawasqanchejta. Chayrayku, ¿yachankichejchu pikunachus wawasniykichejpa amigosninku kasqankuta? ¿Imatá ruwawajchej wawasniykichej Jehovata munakojkunawan amigos kanankupaj? (1 Cor. 15:33). Familiapi imata ruwanaykichejpajpis, ichá Jehovata munakoj hermanosta wajyarikuwajchej. Ajinamanta wawasniykichejta yanapankichej sumaj amigosniyoj kanankupaj (Sal. 119:63). Tony sutiyoj tata nin: “Watas pasasqanman jina señoraywanqa, ashkha hermanosta, tukuy edadniyojtataj wasiykuman wajyarikuyta yachaj kayku. Paykunawan khuska mikhurej kayku, familiapi Diosta yupaychanapaj tantakuytapis ruwaj kayku. Ajinamanta paykunata sumajta rejserqayku. Paykunaqa Jehovata mayta munakunku, kusisqataj sirvinku. […] Chay hermanospa experienciasninkumanta, sonqo kʼajaywan, tukuy sonqotaj Jehovata sirvisqankumanta wawasniykoqa maytapuni yachakorqanku. Chaytaj wawasniykuta yanaparqa astawan Jehovaman qayllaykunankupaj”, nispa. w22.05 págs. 29, 30 párrs. 14, 15

Ancianosqa juchallikojwan tantakushaspa, kallpachakunku imatachus Jehová cielopi chay juchallikojpaj ninña chayllatataj ninankupaj. ¿Imaynatataj chay ruwakusqan congregacionta yanapan? Mana arrepientekoj juchallikojta congregacionmanta qharqokusqanqa, Jehovaj munasqa kamachisninta jarkʼan chay juchallikojmanta (1 Cor. 5:6, 7, 11-13; Tito 3:10, 11). Juchallikojtataj yanapan arrepientekunanpaj, jinamanta Jehovaj perdonninta tarinanpaj (Luc. 5:32). Ancianosqa tukuy sonqo arrepientekojpaj Jehovamanta mañapunku, payman watejmanta qayllaykunanpaj yanaparinanta (Sant. 5:15). Juchallikoj, ancianoswan tantakushaspa mana arrepientesqachu kashan chayqa, congregacionmanta qharqosqa kanqa. Jinapis juchallikoj aswan qhepaman pantasqantapuni reparakun, tukuy sonqo arrepientekun, cambiantaj chayqa, Jehovaqa payta perdonananpaj wakichisqa kashan (Luc. 15:17-24). Juchallikoj jatun juchata ruwajtinpis Jehovaqa perdonanqapuni (2 Cró. 33:9, 12, 13; 1 Tim. 1:15). w22.06 pág. 9 párrs. 5, 6

Jallpʼantinmanta ashkha hermanosninchejqa, Jehovaj yanapayninwan sinchʼi llakiykunata atipanku, Diabloj contranpitaj sayaykunku (1 Ped. 5:9). Noqanchejpis chayta ruwayta atillanchejtaj. Tumpamantawan Jehovaqa Jesusta, paywan khuska gobernamojkunatawan nenqa ‘Diabloj ruwasqasninta tukuchinankuta’ (1 Juan 3:8). Chay qhepatataj kay jallpʼapi tiyakoj Jehovaj kamachisnenqa, kay nisqanta juntʼakojta rikonqanku: “Ni imapis manchachisonqachu, ni imamanta manchachikunayki kanqachu” (Isa. 54:14; Miq. 4:4). Chay día chayamunankama kallpachakuna manchikuyninchejta atipanapaj. Astawan astawan atienekuna Jehová kamachisninta munakusqanpi, cuidasqanpitaj. ¿Imatá chaypaj ruwasunman? Tʼukurina imaynatachus Jehová ñaupajmantapachaña kamachisninta cuidasqanpi, wajkunawantaj chaymanta parlarina. Tʼukurinallataj imaynatachus noqanchejtapis llakiykunapi kashajtinchej yanapawasqanchejta. Jehovaj yanapayninwanqa manchikuyninchejta atipayta atisun (Sal. 34:4). w22.06 pág. 19 párrs. 19, 20

Reino Unidowan Estados Unidoswanqa ninakun fierromantawan tʼurumantawan ruwasqa chakiswan, paytaj kamachishanña. Kamachiytataj qallarerqa Primera Guerra Mundial kashajtin, maypachachus Reino Unidowan Estados Unidoswan ujchaykukorqanku chaypacha. Nabucodonosorpa mosqoyninmanta lanteqa iskay imasta reparachiwanchej kay qhepa kaj atiyniyoj gobiernomanta. Chaytaj ñaupaj gobiernosmanta waj jina kasqanta rikuchin. Ñaupaj kaj, chay mosqoymanta ñaupaj kaj atiyniyoj gobiernosqa oromanta jina, qolqemanta jina uj metalllamanta karqanku. Reino Unidowan Estados Unidoswantaj fierrowan tʼuruwan chajrusqa karqanku. Tʼuroqa ninakun “runaspa mirayninwan” (Dan. 2:43, sutʼinchaynin). Kay tiempopi sutʼita rikushanchej runasqa elecciones kajtin nisqankutapuni valechiyta munasqankuta. Derechosninkuta valechiyta munaspa campañasta ruwanku, marchasta ruwanku, sindicatospi organizasqas kanku. Chayrayku kay qhepa kaj atiyniyoj gobiernoqa mana munayninta ruwayta atillanchu. w22.07 págs. 4, 5 párrs. 9, 10

¿Bautizakuymanta iskayrayankichu? Jina kajtin kayta tapurikuy: “¿Imatá bautizakunaypaj suyashani?”, nispa (Hech. 8:36). Jesusqa nerqa Tatanpa munayninta ruwayqa mikhunan jina kasqanta. ¿Imaraykú chayta nerqa? Mikhuna allinninchejpaj kasqanrayku. Jesusqa yacharqa Jehová tukuy imata mañawasqanchejqa allinninchejpajpuni kasqanta. Jehovaqa imachus mana allinninchejpaj kasqanta mana mañawasunmanchu. Paytaj munan bautizakunaykita (Hech. 2:38). Chayrayku bautizakunata kamachisqanta kasukunaykeqa allinniykipajpuni kanqa. May sumaj miskʼi mikhunitata jaywarisojtinkoqa, ¿chay ratocharí mana iskayrayaspa mikhuykuwaj? Bautizakuymantapis amallataj iskayrayaychu. ¿Imaraykutaj wakinkuna manaraj bautizakunkurajchu? Ichapis yuyanku manaraj wakichisqachu kashasqankuta. Jehovaman kausayniykita qopuypis bautizakuypis mana imatapis ajllay jinallachu. Chayrayku sumajta piensariy. Wakichisqa kanaykeqa mana uj ratopajchu, maytataj kallpachakunayki tiyan. w23.03 pág. 7 párrs. 18-20

Jesusqa Diospa kʼata Wawan jina espíritu santowan ajllasqa karqa. Ajinamanta warmej ñaupaj kaj mirayninman tukorqa. Jesús wañuymanta kausarimusqantawan, Diosqa “jatun kayta, jatunpaj qhawasqa kaytapis coronata jina” churaykorqa, qorqataj ‘tukuy atiyta cielopi, jinallataj kay jallpʼapipis’. Atiyta qollarqataj “Diabloj ruwasqasninta tukuchinanpaj” (Heb. 2:7; Mat. 28:18; 1 Juan 3:8). Warmej miraynenqa Jesusmanta wajkunapiwan kanallankutaj karqa. Apóstol Pabloqa pikunachus chay wajkuna kasqankumanta parlaspa judiosman, waj nacionesmanta ajllasqa cristianosmanpis nerqa: “Sichus Cristojta kankichej chayqa, Abrahanpa miraynin kankichej. Diospa nisqanman jinataj herenciata japʼinkichej”, nispa (Gál. 3:28, 29). Jehová uj cristianota espíritu santowan ajllajtin, chay cristianoqa warmej miraynillanmantaj tukun. Chayrayku warmej miraynenqa Jesuswan 144.000 ajllasqa cristianoswan kanku, pikunachus Jesuswan khuska kamachenqanku chaykuna (Apo. 14:1). Paykunaqa Tatanku Jehová jina yuyanankupaj, ruwanankupaj ima kallpachakunku. w22.07 pág. 16 párrs. 8, 9

Yachanchej qhepa pʼunchaykunapeqa llakiykunapi rikukunanchejta (2 Tim. 3:1). Ajinapi rikukuspaqa mayta llakikusunman, nitaj ni imanakuyta atisunmanchu, astawanraj uj llakiyniyoj kashajtinchej waj llakiyñataj chayamuwajtinchej, chayri ashkha llakiykuna ujllapi chayamuwajtinchej. Jinapis yuyarikuna Jehová cuidashawasqanchejta. Yanapayninwanqa ima llakiytapis aguantayta atisun. Qhawarina imaynatachus Jehová Jobta yanapasqanta. Paytaqa pisi tiempollapi ashkha sinchʼi llakiykuna qhatirerqa. Uj diallapi yacharqa tukuynin uywasninta, kamachisninta, munasqa wawasninta ima pierdesqanta (Job 1:13-19). Pisi tiemponmantaj lastimay llakisqa kashajtillanraj, payñataj uj millay onqoywan sinchʼita onqoykorqa (Job 2:7). Jehovaqa imachus Jobta qhatirishasqanta sumajta yacharqa. Payqa Jobta munakusqanrayku llakiykunasninta aguantananpaj, paymantataj mana karunchakunanpaj tukuy ima necesitasqanpi yanaparqa. w22.08 pág. 11 párrs. 8-10

Cheqanchasqa kajtinchejqa mayta sonqonchej nanawasunman. Jinaspataj yuyasunman qhasimanta cheqanchawasqanchejta, nitaj noqanchejpaj jinachu chay cheqanchay kasqanta. Chantapis qonqapusunman Jehovaqa munakuwasqanchejrayku cheqanchawasqanchejta (Heb. 12:5, 11). Chayrayku cheqanchawasqanchejta japʼikuna, necesitakusqanman jinataj cambiana. Jesusqa ashkha kutispi Pedrota kʼamerqa waj apostolespa ñaupaqenkupi (Mar. 8:33; Luc. 22:31-34). Pedropajqa pʼenqaychá karqa. Jinapis manapuni Jesusmanta karunchakorqachu, astawanpis kʼamichikusqanta japʼikorqa, pantasqasninmantataj yachakorqa. Chayrayku Jehovaqa Pedrota bendicerqa, congregacionpitaj jatuchaj ruwaykunata qorqa (Juan 21:15-17; Hech. 10:24-33; 1 Ped. 1:1). Noqanchejpis pʼenqaypi rikhurisqallanchejpi yuyanamantaqa, cheqanchawasqanchejta japʼikuna, necesitakusqanman jinataj cambiana. Chaytaj allinninchejpaj, wajkunaj allinninkupaj ima. Ajinamanta Jehovaqa llajtanpi astawan ruwanasta qowasun, hermanosninchejtapis astawan yanapasun. w22.11 págs. 21, 22 párrs. 6, 7

Abrahanqa yacharqa Diosqa ni jaykʼaj mana cheqan kajta ruwananta, chayri sajra sonqowan ruwananta. Apóstol Pablo sutʼinchasqanman jina, Abrahanqa creerqa Jehovaqa munasqa wawan Isaacta kausarichiyta atisqanta (Heb. 11:17-19). Jehovaqa nisqaña Isaacqa uj nacionpa ñaupa tatan kananta, chaypachataj Isaacqa manaraj wawasniyojchu karqa. Abrahanqa Jehovata munakorqa. Chayrayku yacharqa Diosqa cheqan kajman jinapuni ruwananta. Mana ruwayta atinanpaj jina kajtinpis, sinchʼi creeyniyoj kasqanrayku kasukorqa (Gén. 22:1-12). ¿Imaynatá Abrahán jina ruwasunman? Jehovata sapa kuti aswan sumajta rejsinanchej tiyan. Chayta ruwaspaqa payman qayllaykusun, astawantaj munakusun (Sal. 73:28). Conciencianchejtapis yachachisun Diospa yuyasqanman jina yuyananpaj (Heb. 5:14). Ajinamanta pillapis juchaman urmachiyta munawajtinchej chay rato qhesachasun. Ni yuyallasunpischu Tatanchej Jehovaj sonqonta nanachinapaj jina imatapis ruwaytaqa, chayri paymanta karunchanawanchejpaj jina imatapis ruwaytaqa. w22.08 págs. 28, 29 párrs. 11, 12

Apóstol Pablowan Bernabewanqa Listraman, Iconioman, Antioquiaman kutispa “sapa congregacionpi ancianosta churarqanku” (Hech. 14:21-23). Chay ancianosqa kay tiempopi jinallataj, maytapuni chay congregacionesmanta hermanosta kallpacharqanku. Pabloqa hermanosninta yuyaricherqa, ‘may chhika testigos’ imaymana sinchʼi llakiykunata aguantasqankuta Jehová kallpata qosqanrayku (Heb. 12:1). Payqa yacharqa Jehová Diospa ñaupa tiempomanta kamachisninpa kausayninku, chay cristianosta yanapananta mana manchachikunankupaj, ‘kausaj Diospa llajtanpitaj’ astawan yuyanankupaj (Heb. 12:22). Noqanchejtapis yanapallawasunmantaj. Tukuypis mayta kallpachakunchej Jehová imaynatachus Gedeonta, Baracta, Davidta, Samuelta, waj kamachisnintapis yanapasqanta leespa (Heb. 11:32-35). w22.08 págs. 21, 22 párrs. 5, 6

¿Ima ‘ruwasqasninkumantataj’ kausarimojkuna juzgasqa kanqanku? ¿Niraj wañupushaspa imastachus ruwasqasninkumantachu? Mana. Juchasninkoqa wañupojtinku perdonasqaña karqa. Chayrayku kay diapaj versiculopi ‘ruwasqasninkumanta’ nispaqa, mana niraj wañupushaspa ruwasqasninkumantachu parlashanman. Astawanpis kaypi parlashaspa jinan, mosoj jallpʼapi yachachisqa kasqankutawanña imastachus ruwanankumanta. Noé, Samuel, David, Daniel, Jehovata kasukoj waj kamachisninpis, Jesucristomanta yachakunanku kanqa, wañusqanpitaj creenanku kanqa. Paykunachus chayta ruwananku kanqa chayqa, astawanrajchá mana cheqan runasqa. ¿Imataj kanqa manapuni kasukuyta munajkunawan? Apocalipsis 20:15 nin: “Pikunachus kausay libropi mana qhelqasqa kajkunaqa nina qochaman wijchʼuykusqa karqanku”, nispa. Arí, paykunaqa wiñaypaj chinkasqata chinkachisqa kanqanku. Chayrayku mayta kallpachakunanchej tiyan kausay libropi sutinchej qhelqasqa kananpaj, qhelqasqallapunitaj qhepakunanpaj. w22.09 pág. 19 párrs. 17-19

Sanitos kanapaj chayri ima tratamientotapis ruwanapajqa, Bibliamanta yachakusqanchejman jinapuni ashkha imasta ajllanchej (1 Tim. 3:9). Chayrayku imatachus ruwananchejta ajllashaspa, chaykunamantataj wajkunawan parlashaspa, allinpuni kanman imatachus Filipenses 4:5 versiculopi nisqanta yuyarikunanchej. Chaypi nin: “Tukuy runas rikuchunku mana nisqaykichejtapuni valechiyta munaj runaschu kasqaykichejta”, nispa. Chaypajqa mana sanitos kay yuyayllachu kana tiyan. Hermanosninchej mana noqanchej jinachu ajllajtinkupis paykunata munakunchej, respetanchejtaj (Rom. 14:10-12). Qallariypi nerqanchej jina Jehovamin kausay yaku jutureqa. Payman may agradecesqa kashasqanchejta rikuchisunman cuidakuspa, noqanchejmantataj aswan sumaj kajta qospa (Apo. 4:11). Kay tiempopeqa onqosunpuni, problemaspis kapuwasunpuni. Jinapis Jehovaqa mana ajinata kausakunanchejtachu munarqa. Chayrayku payqa tumpamantawan wiñay kausayta qowasun. Chaypeqa manaña kanqachu ni nanaypis, ni wañuypis (Apo. 21:4). Chaykamataj kausayninchejta valoranallapuni, kausashaspataj munakuyniyoj Tatanchej Jehovata sirvinallapuni. Paymin kausaytaqa uj regalota jina qowanchej. w23.02 pág. 25 párrs. 17, 18

Jehovaqa sutʼita rikucherqa ‘autoridadesmantaqa’ aswan patapipuni kashasqanta (Rom. 13:1). Kinsamanta parlarina. Egiptomanta faraonqa esclavosta jina Diospa llajtanta trabajachej, kutin kutita mana munajchu kachariyta. Jehová Diostaj kacharicherqa llajtanta, faraontataj Puka mar qochapi yakuwan pʼampaykorqa (Éxo. 14:26-28; Sal. 136:15). Babiloniamanta rey Belsasar uj jatun fiestata wakicherqa, ‘cielospi kaj Señormantaj sayaykorqa’. Jehovata alabananmantataj ‘qolqemanta ruwasqa diosesta, chantá qorimanta’ ruwasqa diosesta alabarqa (Dan. 5:22, 23). Jinapis Jehová Diosqa chay machu machu runata kʼumuykachacherqa. Chay chʼisipacha Belsasarqa wañuchisqa karqa, gobiernontataj medosmanwan persasmanwan qoporqa (Dan. 5:30, 31). Palestinamanta rey Herodes Agripa I apóstol Santiagota wañucherqa, chantá apóstol Pedrota presocharqa wañuchinallanpajtaj. Diostaj mana saqerqachu chayta ruwajta. “Jehová Diospa angelnenqa Herodesta onqoykucherqa”, Herodestaj wañorqa (Hech. 12:1-5, 21-23). w22.10 pág. 15 párr. 12

Jehová imaynatachus ñaupa tiempo kamachisninta cuidasqanmanta leespaqa, suyakuyninchej astawan astawan sinchʼiyan. Diospa Palabranpi tukuy ima qhelqakusqanqa “yachachinawanchejpaj qhelqasqa karqa, jinallataj suyakuyniyoj kananchejpaj. Imaraykuchus Diosmanta Qhelqasqaqa sinchʼita sayanapaj, sonqochakunapaj ima yanapawanchej” (Rom. 15:4). Imaynatachus Jehová Abrahanman nisqanta juntʼasqanpi tʼukurina. Abrahanwan Sarawanqa machitusña kasqankurayku manaña wawayoj kayta atinkumanchu karqa. Jinapis Diosqa nerqa wawitayoj kanankuta (Gén. 18:10). ¿Abrahán creerqachu chaypi? Biblia nin: ‘Creerqa ashkha nacionespa tatan kananta’, nispa (Rom. 4:18). Abrahanqa mana yacharqachu imaynatachus Jehová chay nisqanta juntʼananta. Jinapis chayta juntʼananmanta mana iskayrayarqachu. Payqa rikorqa imatachus Dios payman nisqanta juntʼasqantapuni (Rom. 4:19-21). Abrahanmanta, wajkunamanta ima leespa, yachakunchej Jehová nisqanta juntʼananpi atienekuyta atisqanchejta. w22.10 pág. 27 párrs. 13, 14

Chay palabrasqa judíos Babiloniamanta kacharichisqa kajtinku juntʼakorqa. Jehovaqa chaypacha rikucherqa Sumaj Yachachejninku kasqanta. Jehová judiosta ajinata yanapasqanrayku, watejmanta payllata yupaychayta aterqanku. Kunanpis Jehovaqa Sumaj Yachachejnillanchejtaj, chaytaj maytapuni kusichiwanchej. Isaiasqa yachakojkunawan kikinchawanchej, pikunamanchus Jehová yachachin. Isaiasqa kayta nin: “Sumaj Yachachejniykitaqa ñawisniykiwanpuni rikunki”, nispa. Kay kikinchaypi yachachejqa yachakojkunaj ñaupaqenpi sayashan. ¿Imaynamantá Jehová kay tiempopi yachachiwanchej? Llajtannejta. Maytapuni agradecekunchej llajtan reunionesnejta, publicacionesnejta, videosnejta, waj imasnejtawan sutʼita yachachiwasqanchejmanta. Ajinata Jehová pusashawasqanchejqa, llakiy tiempospi kusiywan aguantanapaj yanapawanchej. w22.11 pág. 10 párrs. 8, 9

Jerusalenwan templonwan thuñisqa kanankumanta, kay mundoj imasninpa tukukuyninmantawan, Jesús nerqa: “Chay pʼunchaymanta, chay horamantawanqa mana pipis yachanchu, ni cielopi kashaj angelespis ni noqapis, chaytaqa Tatallay yachan”, nispa. Chaymantataj kayta paykunaman yuyaycharqa: “Rijchʼarisqallapuni kaychej”, nispa (Mar. 13:32-37). Ñaupa tiempomanta judío cristianosqa rijchʼarisqasllapuni kananku karqa. Kausayninkoqa chaymanta kasharqa. Jesusqa payta qhatejkunaman nerqa: “Jerusalenta soldadoswan muyurisqata rikuspaqa, yachaychej thuñikuynin qayllapiña kasqanta”, nispa. Jesús nisqanman jina, payta qhatejkunaqa chayta rikuytawankama orqosman ayqekunanku karqa (Luc. 21:20, 21). Jesuspa nisqanta kasukojkunaqa, niraj romanos Jerusalenta thuñiykushajtinku ayqekorqanku, salvakorqankutaj. Noqanchejqa kay sajra mundoj tukukuynin tiempopi kausashanchej. Chayrayku ñaupa tiempomanta cristianos jina yuyaynillanchejpipuni kana tiyan, rijchʼarisqastaj. w23.02 pág. 14 párrs. 1-3

Jehovaqa kamachisninman yachachin honrados kayta, cheqan kajta ruwaytapis. Chaytaj paykunata yanapan paykuna kikinkuta allinpaj qhawakunankupaj, sonqo tiyasqastaj kanankupaj (Pro. 13:5, 6). Qanwanpis ajinallatajchá karqa Bibliata estudiayta qallarisqaykimantapacha. Yachakunkiña Jehovaj ñankunasnillan aswan sumaj kasqanta runaspajpis qanpajpis (Sal. 77:13). Chayrayku Jehovaj cheqan kamachiykunasninta kasukuyta munanki (Mat. 6:33). Munallankitaj cheqa kajman sayakusqaykita rikuchiyta, Diosninchejmanta imastachus Satanás nisqan llulla kasqanta rikuchiytapis. ¿Imaynatá chayta rikuchiwaj? Kausayniykipi imastachus ruwasqaykiwanqa kay imasta sutʼita rikuchinki: Satanaspa llullasninta qhesachasqaykita, cheqa kajman sayakusqaykita, Jehová kamachejniyki kananta munasqaykita, cheqan kamachiykunasnintataj kasukuyta munasqaykita. Chayta kausayniykiwan rikuchinaykipajqa, Jehovaman uj oracionpi ninayki tiyan payta wiñaypaj sirvinaykita. Chaymantataj bautizakunayki tiyan Jehovaman kausayniykita qopusqaykita wajkuna rikunankupaj. Cheqa kajta, cheqan kajtawan munakusqaykeqa sonqoykita aysanqapuni bautizakunaykipaj. w23.03 pág. 3 párrs. 4, 5

Kay mundomanta runasqa mana yachankuchu ‘Dios sonqo tiyaykuyta’ qowasqanchej imaynachus kasqanta. Chay sonqo tiyaykuyta qowasqanchejqa sonqonchejta phaj nirichin. Ajina sonqo tiyasqataj kanchej Tatanchej Jehovaman qayllaykuspalla. Pay sonqo tiyaykuyta qowajtinchejqa ni imata manchachikunchejchu (Fili. 4:6, 7). Chantapis Jehovata munakojkunawan amigos kanchej, ‘sonqo tiyaykuyta qoj Dioswanpis’ sumaj amigosllataj kanchej (1 Tes. 5:23). Tatanchej Jehovata rejsejtinchej, paypi atienekojtinchej, kasukojtinchejtaj payqa sonqo tiyaykuyta qowanchej. Chaytaj llakiykunapi rikukojtinchej sonqonchejta tiyaykuchin. Llakiykuna kajtin, ¿cheqamantapunichu Dios sonqo tiyaykuyta qowasunman? ¿Sonqonchej phaj niyta atinmanchu wañuchej onqoykuna rikhurejtin, kaymanta jinalla ima llakiypis kajtin, chʼajwas kajtin, chayri qhatiykachasqa kajtinchej? Chay imasqa tukuyta manchachiwasunman. Ashkha hermanos, hermanaspis Jesús kay pʼunchaypaj textopi nisqanman jina ruwarqanku. Jehovaj yanapayninwanqa, sinchʼi pruebaspi kaspapis sonqo tiyasqallapuni kayta aterqanku. w22.12 pág. 16 párrs. 1, 2

Kausayninchejpi imaschus pasanantaqa mana ajllayta atinchejchu. Chayrayku ama yuyanachu Jehovaqa asignacionesninchejraykulla allinpaj qhawawasqanchejta. Nitaj kikinchakunachu imaynatachus waj hermanos Jehovata sirvishasqankuwan (Gál. 6:4). Chayrayku allin kanman kallpachakunanchej hermanosninchejta waj jinasmanta yanapanapaj, Jehovatapis waj jinasmanta sirvinapaj. Kapuwasqallanchejwan kausakusun, nitaj qhasi manakajta manuchakusunchu chayqa, astawan Jehovaj llajtanpi yanapakunanchejpaj tiemponchej kallanqa. Kunan kallpachakuna imaspichus ñaupariyta munanchej chayta juntʼananchejpaj. Ajinamanta imastachus aswan qhepaman ruwayta munasqanchejtapis juntʼayta atillasun. Por ejemplo, precursor regular kayta munanchej chayqa, kunan precursor auxiliar kanapaj kallpachakusunman. Siervos ministeriales kayta munanchej chayrí, ¿imatá ruwasunman? Kallpachakusunman astawan predicanapaj. Imastachus kunan ruwasqanchejqa, yanapawasun aswan qhepaman waj asignacionesta japʼinapaj. Chayrayku mayta kallpachakuna Jehovapaj tukuy atisqanchejta imatapis ruwanapaj. w22.04 pág. 26 párrs. 16, 17

Jehovaqa problemasta aguantanapaj, kusiywantaj payta sirvinapaj yanapayta atiwanchej. Ima llakiyninchej kajtin Diosninchejmanta mañakojtinchej, payqa ichapis ñaupajta aguantanapaj kallpataraj qowasun. Chay llakiyninchej munasqanchejman jina mana chay rato chinkajtintaj, ichapis chayta aguantanapaj kutin kutita kallpata mañakunanchej kanqa. Jehovataj chaytapuni ruwananchejta niwanchej. Chaytataj reparanchej Isaiaspa kay nisqanpi: ‘Payta ama samarichiychejchu’, nisunman Jehovata (Isa. 62:7). ¿Ima niytá munan chay? Jehovamanta kutin kutita mañakunanchej kasqanta, chaytaj manapis samarichishasunmanchu jina kanman. Chayqa yuyarichiwanchej imatachus Jesús Lucas 11:8-10, 13 versiculospi mañakuymanta nisqanta. Ashkha kikinchaykunata oqharispa niwarqanchej espíritu santotapis mañakunallanchejtapuni. Chantapis Jehovamanta mañakullasunmantaj imatapis allinta ajllanapaj yanapanawanchejta. w22.11 pág. 8 párr. 1; pág. 9 párrs. 6, 7

Kunanmantapacha familiaykiwan wakichikuwaj qhatiykachasqa kasun chay tiempopaj. Imaschus chay tiempopi pasasunaykichejpi yuyanaykichejmantaqa, Jehovaman astawan qayllaykuychej, wawasniykichejtapis chayta ruwanallankupajtaj yanapaychej. Wakin kutis mayta llakikunkichej chayqa, chay llakiyniykichejta Jehovaman willakuychej (Sal. 62:7, 8). Familiaykichejwan parlariychej imaraykuchus Jehovapi atienekuyta atisqaykichejta. Imaynatachus kaymanta jinalla ima llakiy kananpajpis wakichikuspa wawasniykichejta yanapankichej, ajinallatataj qhatiykachasqa kanapaj wakichikuspapis paykunata yanapankichej. Ajinamanta paykunaqa mana manchachikonqankuchu, sonqo tiyasqallataj kanqanku Jehovapi atienekuyta yachachisqaykichejrayku. Dios sonqo tiyaykuyta qowasqanchejrayku, mana imatapis manchachikunchejchu (Fili. 4:6, 7). Wañuchej onqoykuna rikhurejtin, kaymanta jinalla ima llakiypis kajtin, chayri qhatiykachasqa kajtinchej Jehovaqa sonqo tiyaykuyta qowasqanchejwan sonqonchejta phaj nirichin. Payqa sinchʼita llankʼaj ancianosnejta ovejitasta jina cuidawanchej. Chantapis tukuyninchej purajmanta yanapanakuyta atisqanchejta niwanchej. Kay tiempopi sonqo tiyasqa kayta atishaspa, wakichikuna qhepaman jamoj aswan jatuchaj pruebaspaj, “manchay ñakʼariy” tiempopajpis (Mat. 24:21). w22.12 pág. 27 párrs. 17, 18

Ñaupajta jatun juchasta ruwarqanchej chaypis, kallpachakuna amaña chaymanta sonqonchej juchachanawanchejpaj. Chaywanqa mana nishanchejchu, “Jesús kausayninta qosqanrayku Dios perdonallawanqa” nispa ‘yachashaspa juchallikunallanchejta’ (Heb. 10:26-31). Jinapis sichus jatun juchata ruwasqanchejmanta tukuy sonqo arrepientekorqanchej, Jehovaj yanapayninta, ancianospa yanapaynintapis maskʼarqanchej, cambiarqanchejtaj chayqa, ama iskayrayanachu, Jehovaqa perdonawanchejña (Isa. 55:7; Hech. 3:19). Jesús kausayninta qosqanrayku tukuy juchasninchejmanta perdonasqa kayta atinchej, paraisopi kausakuytapis suyakunchej. Paraisopeqa ni jaykʼaj aburrikusunchu. Tukuy laya runas kanqapuni tʼukuna imasta willarinawanchejpaj, kusichinawanchejpaj jina trabajopis kapuwasunpuni. Chantapis Tatanchej Jehovata sapa día astawan rejsillasunpuni, bendicionesnintapis japʼillasunpuni. Chaytaj imamantapis aswan sumaj kanqa. Ni jaykʼaj tukusunchu paymanta, ruwasqasninmantapis mosoj imasta yachakuyta. w22.12 pág. 13 párrs. 17, 19

‘Warmeqa’ mana Evachu kanman. Chay profeciapeqa nin warmej miraynin katarej umanta ‘pʼaltarparinanta’. Katareqa sajra ángel Satanás, chayrayku Evaj mirayninmanta ni pi runapis payta pʼaltarpayta atinmanchu. Jina kajtin, ¿imaynamantá Satanás chinkachisqa kanman? Génesis 3:15 versiculopi warmi pichus kasqanta Apocalipsis libropi willawanchej (Apo. 12:1, 2, 5, 10). Chay warmeqa mana kay jallpʼamanta warmis jinachu. “Chakisnin urapeqa killa kasharqa, uman patapitaj uj corona 12 estrellasniyoj”. Payqa uj qhari wawata nacechikorqa, nisunman Diospa Gobiernonta. Chay Gobiernoqa cielopi kashan, chayrayku chay warmipis cielollapitaj kashan. Chay warmeqa ninakun cielopi kaj Diospa llajtanwan, nisunman kasukoj angeleswan (Gál. 4:26). Bibliaqa sutʼinchallawanchejtaj pichus warmej ñaupaj kaj miraynin kasqanta. Chay mirayqa Abrahanpa mirayninmanta jamunan karqa (Gén. 22:15-18). w22.07 págs. 15, 16 párrs. 6-8

Jehovaqa Bibliata uj sumaj regalota jina qowanchej, chaypitaj yachaynin juntʼa kashan. Yuyaychaykunasnenqa runasta maytapuni yanapan. Bibliaqa runaspa kausayninkuta cambiayta atin. Bibliaj ñaupaj kaj librosninta qhelqashaspa, Moisesqa Diospa llajtan israelitasman nerqa: “Kay nisqasneyqa mana qhasi parlaykunallachu kanku, manachayqa kausayniykichej kanku”, nispa (Deu. 32:47). Diospa Palabranta kasukojkunaqa kusisqas kausakunkuman karqa, allintaj rinman karqa (Sal. 1:2, 3). Bibliaqa may chhika unayña qhelqasqa kajtinpis, runaspa kausayninta cambiananpaj atiyniyojllapuni. Bibliaj sumaj yuyaychaykunasnintajrí wiñaypaj. Tukuy tiempomanta runasta kunankama yanapashallanpuni. Bibliata leejtinchej, yuyaychaykunasninpitaj tʼukurejtinchej, Diosqa atiyniyoj espíritu santonwan yanapawanchej Bibliaj yuyaychaykunasninman jina kausakunanchejpaj (Sal. 119:27; Mal. 3:16; Heb. 4:12). Bibliata qhelqachej Diosqa tukuy sonqo yanapayta munawanchej. ¿Manachu chay tanqawanchej Bibliata leeyman yachaykukunapaj? w23.02 pág. 3 párrs. 5, 6

Apocalipsis 13 capitulopi niwanchej imatachus ruwasqanta millay phiña animalpa qanchis kaj uman, nisunman Gran Bretañawan Estados Unidoswan. Chaypi nin uj ‘cordero jina iskay wajrasniyoj kasqanta, uj sierpe jinataj parlayta qallarisqanta’. Chay millay phiña animalqa “manchay jatuchaj señalesta ruwan, ninatapis cielomanta jallpʼaman uraykuchimun runaspa rikunanta” (Apo. 13:11-15). Apocalipsis 16 chantá 19 capítulo sutichan ‘llulla profeta’ nispa (Apo. 16:13; 19:20). Danielpis imatachus chay atiyniyoj gobierno, nisunman Gran Bretañawan Estados Unidoswan ruwanankumanta parlaspa nerqa: “Manchay tʼukunatapuni tukuchenqa”, nispa (Dan. 8:19, 23, 24). Chaytapunitaj ruwarqa Segunda Guerra Mundialpi. Imajtinchus Gran Bretañamanta, Estados Unidosmantawan cientificosqa, ujchaykukuspa bombas atómicas nisqata ruwarqanku. Iskay bombasta kachaykojtinkutaj, Segunda Guerra Mundial tukukorqa. Jinamanta chay iskay nacionesqa, ‘ninata cielomanta jallpʼaman uraykuchimorqanku’. w22.05 pág. 10 párr. 9