Mayo

Juanqa cielopi kaj grupota rikuytawan, “may chhika” runastañataj rikorqa. Iskay kaj grupoqa 144.000 ajllasqa cristianosmanta nisqa mana yupay atina kanku. ¿Pikunataj paykuna kanku? Juan uyarisqanman jina, paykunaqa “manchay ñakʼariymanta llojsimojkuna kanku, jatun ropasninkutataj Corderoj yawarninpi tʼajsaspa yurajyacherqanku” (Apo. 7:14). May chhika runasmanta kajkunaqa, manchay ñakʼariymanta kausashaj llojsiytawan kay jallpʼapi kausakonqanku, ashkha bendicionestataj japʼenqanku (Sal. 37:9-11, 27-29; Pro. 2:21, 22; Apo. 7:16, 17). Cieloman rinapaj ajllasqa kaspapis chayri kay jallpʼapi kausakuyta suyakuspapis, mana iskayrayananchejchu tiyan Apocalipsis 7 capitulomanta profecías juntʼakunanmanta. Chay profeciasta juntʼakojta rikoyqa, may sumajpuni kanqa iskaynin grupospi kaj Jehovaj kamachisninpaj. Chaypachaqa maytapuni kusikusun Jehovaj Gobiernonta apoyayta ajllasqanchejmanta. w22.05 pág. 16 párrs. 6, 7

Kausayninchejpi imatapis ajllanapajqa Jehovamanta yachayta mañakunchejpuni, astawanraj chay ajllasqanchej kausayninchejta cambianan kajtenqa. Chay kutispi Jehovaj yachayninta mayta necesitanchej (Sant. 1:5). Rey Salomón nerqa: “Yachayniyoj kayqa tukuy imamanta nisqa aswan sumaj”, nispa (Pro. 4:7). Salomonqa mana runaj yachayninmantachu parlasharqa, manaqa Jehovamanta jamoj yachaymanta. Jinapis, ¿Jehovamanta jamoj yachay problemasninchejpi yanapawasunmanchu? Yanapawasunmanpuni. Salomonwan Jesuswanqa may yachayniyoj runas karqanku. Paykunaj yachachisqankuta estudiaspa, chayman jina ruwaspataj noqanchejpis sumaj yachayniyoj kasunman. Ñaupajtaqa Salomonmanta parlarina. Bibliaqa paymanta nin: “Diosqa Salomonman qorqa sumaj yachayta, sumajta tanteayta yachaytawan”, nispa (1 Rey. 4:29). Chantá parlarinallataj Jesusmanta. Payqa jallpʼapi kaj runasmanta aswan yachayniyoj karqa (Mat. 12:42). Jesusmantaqa uj profecía nerqa: “Paypa patanmantaj Jehová Diospa espiritun tiyaykonqa. Chayrayku payqa yachayniyoj, sumaj yuyayniyoj kanqa”, nispa (Isa. 11:2). w22.05 pág. 20 párrs. 1, 2

Mayorcitosña kaspapis, Diospa llajtanpi astawan ñauparinapaj kallpachakullasunmanpuni. Qhawarina imatachus hermana Beverley ruwasqanta. Payqa 75 watasniyojña. Onqosqeta kasqanraykutaj mana allinta purikuyta atejchu. Jinapis Jesuspa Wañuyninta Yuyarinapaj tantakuyman maytapuni runasta wajyariyta munarqa. Chayrayku imaynasmantachus runasta wajyarinanpaj sutʼita yuyaychakorqa. Chayman jina ruwaspataj mayta kusikorqa. Chay hermana mayta kallpachakusqanqa, waj hermanostapis yanapallarqataj Jehovapaj astawan ruwanankupaj. Jehovaqa kuraj hermanitos paypaj tukuy atisqankuta llankʼasqankuta, may allinpaj qhawan (Sal. 71:17). Imaspichus ñaupariyta munasqanchejta sutʼita ajllana. Sumaj cristianos kanapaj kallpachakuna, ajinamanta Jehová Diosta kusichisun. Sumaj imasta ruwayta yachakunallapuni Jehovaj llajtanpi astawan yanapakunapaj. Hermanosninchejtapis imaynallamantapis astawan yanaparina. Chayta ruwajtinchejqa Jehová bendeciwasun, hermanostaj Timoteopi jina sutʼita reparanqanku ñauparishasqanchejta (1 Tim. 4:15). w22.04 pág. 27 párrs. 18, 19

Wawasniykita yanapanaykipaj mayta kallpachakojtiykipis, ichá ujnin wawayki niña Jehovata sirviyta munanmanchu. Jina kajtenqa ama yuyaychu mana allin tatachu kasqaykita. Jehovaqa tukuyta saqewanchej payta sirviytachus manachus ajllananchejta. Ama yuyaychu ni jaykʼaj Jehovaman kutinpunanta. Yuyarikuy chinkasqa qhari wawamanta kikinchayta (Luc. 15:11-19, 22-24). Chay chinkasqa qhari wawaqa ashkha sajra imasta ruwaspapis, wasinman kutiporqa. Tatas, Jehovaqa kamachisunkichej wawasniykichejta payta sirvinankupaj yanapanaykichejta. Chay kamachiytaj may sumajpuni (Sal. 78:4-6). Chayta ruwayqa mana atikullanchu, jinapis sumajta ruwashankichej tukuy atisqaykichejta kallpachakuspa wawasniykichejta Jehovata munakunankupaj yanapaspa, paypa nisqanman jina cheqanchaspa, payta kasukunankupajtaj yachachispa. Chayta ruwankichej chayqa, munakuyniyoj Tatanchej Jehovaqa mayta kusikonqa (Efe. 6:4). w22.05 págs. 30, 31 párrs. 16-18

Jehovata sirvinapaj tukuy atisqanchejta kallpachakusun chayqa, congregacionpi allinta kausakusun, ujchasqataj kasun. Apostolespa tiemponkupi kausaj cristianosmanta parlarina. Paykunaqa sapa uj, Diospa espiritunpa yanapayninwan ashkha imasta ruwarqanku (1 Cor. 12:4, 7-11). Jinapis chayqa mana atipanakusta chayri tʼaqanakusta rikhurichinankupajchu karqa. Astawanpis Pabloqa sapa ujta kallpacharqa yanapanakunankuta “Cristoj cuerponta wiñachinankupaj”. Pabloqa Efesomanta cristianosman nerqa: “Cuerpoj sapa uj iman ruwananta sumajta juntʼajtin, cuerpoqa sumajta wiñan, munakuypi sumaj sayasqa kananpaj”, nispa (Efe. 4:1-3, 11, 12). Pabloj nisqanta kasukojkunaqa, yanapakorqanku congregacionpi allinta kausakunankupaj, ujchasqataj kanankupaj. Congregacionesninchejpipis chayllatataj rikunchej. Ni imarayku wajkunawan kikinchakunachu. Astawanqa Jesusmanta yachakuna, pay jina kʼacha runa kanapajtaj kallpachakuna. Jehovaqa cheqan, manataj qonqapunchu imastachus paypaj ruwasqanchejta (Heb. 6:10). Payqa may allinpaj qhawan tukuy sonqo payta sirvinapaj kallpachakusqanchejta. w22.04 pág. 14 párrs. 15, 16

Juchallikojta Jehová perdonananqa mana noqanchejmantachu kashan, chaymantataj mayta agradecekunchej. Jinapis wakin imastaqa noqanchejpuni ajllananchej tiyan. Wakin kutisqa ichá pillapis contranchejpi jatun juchata ruwanman. Chay ruwasqanmantataj perdonta mañakuwasunman chayri mana. Imayna kajtinpis chay hermanota perdonasunman. Kallpachakusunmantaj mana paywan phiñasqallapuni kanapaj, nitaj rabiasqa kanapaj. Chaytaj tiempopaj kanman, nitaj atikullanmanchu, astawanraj sonqonchej may nanasqapuni kashan chayqa. La Atalaya 15 de septiembre de 1994 nin: “Juchallikojta perdonaspaqa mana imatachus ruwasqan allillan kasqantachu nishanchej. Payta perdonaspaqa Jehovaj makinman tukuy imata saqepushanchej. Jehovaqa tukuymanta aswan cheqan Juez, maychus tiemponpitaj justiciata ruwanqa”. w22.06 pág. 9 párrs. 6, 7

Jehovaqa nerqaña kay tiempopi tukuy nacionesmanta, tukuy ayllusmanta, tukuy parlaykunamanta runasta tantananta, payllata ujchasqa yupaychanankupaj. Kunantaj paykunaqa ‘may chhika runasmanta’ kanku (Apo. 7:9, 10). Paykuna ukhupi tukuy laya qharis, warmis, wawas kajtinkupis, jallpʼantinpi uj familia jinalla ujchasqa kanku (Sal. 133:1; Juan 10:16). Paykunaqa sumaj kausay kananta suyakushanku, wakichisqapunitaj kanku uyariyta munajkunaman predicanankupaj (Mat. 28:19, 20; Apo. 14:6, 7; 22:17). May chhika runasmanta kanki chayqa, maytachá agradecekunki allin imas kananta suyakushasqaykimanta. Diabloqa mana munanchu Jehovapi atienekunanchejta. Payqa creechiyta munawanchej Jehová mana nisqasninta juntʼananta. Chayta creechiwasunman chayqa, kallpanchej pisiyanman, niñataj Jehovatapis sirvisunmanchu. w22.06 págs. 20, 21 párrs. 2, 3

Tumpamantawan allin kausay kananta suyakusqanchejqa, yanapawanchej sinchʼi llakiykunata aguantanapaj. Jesusqa nerqapuni qhatiykachasqa kananchejta (Juan 15:20). Chayrayku ima tʼinkatachus Jehová qonawanchejpi tʼukureyqa, yanapawanchej payta sirvinallapajpuni. Jesusmanta parlarina. Payqa yacharqa mana khuyakuspa wañuchinankuta. Jinapis suyakuynin yanaparqa Jehovata mana wasanchananpaj. Pentecostés 33 watapi apóstol Pedroqa, Salmosmanta uj profeciata oqharerqa. Chaypitaj kʼachituta nin Jesús sonqo tiyasqa kasqanmanta, Jehovapitaj atienekusqanmanta: ‘Diospi atienekuspa kausakusaj, qanqa mana Sepulturapi saqerpariwankichu, nillataj saqenkichu cuerpoy ismunanta, imaraykuchus qanta kasukuyki. Allinpaj qhawawajtiykitaj jatun kusiywan sonqoyta juntʼachiwanki’ (Hech. 2:25-28; Sal. 16:8-11). Jesusqa mana iskayrayaspa suyakorqa Jehová kausarichinanpi, may kusiywantaj cieloman Tatanpa ladonman kutipunanpi (Heb. 12:2, 3). w22.10 pág. 25 párrs. 4, 5

Uj pacha Santiagowan Juanwanqa mamankuwan Jesusman nicherqanku Gobiernonpi sumaj puestosta qonanta (Mat. 20:20, 21). Chaypi chay apóstoles rikucherqanku jatunchakusqankuta, wajkunamantataj aswan importantes kayta munasqankuta (Pro. 16:18). Mana Santiagowan Juanllawanchu chay kutipi sumaj puestosta japʼiyta munarqanku. Bibliaqa nin, ‘chunka discipulosninpis chayta yachaspa, chay iskay hermanospaj phiñakusqankuta’ (Mat. 20:24). Santiagowan Juanwan, chay waj apostoleswanqa sinchʼitachá discutej churakorqanku. ¿Imatá Jesús chaypacha ruwarqa? Payqa mana phiñakorqachu. Mana nerqachu aswan sumaj apostolesta maskʼamunanta, kʼumuykukoj sonqoyoj runasta, munanakuyta yachaj runasta. Astawanpis allin sonqoyoj kasqankuta yachasqanrayku pacienciawan paykunata reparacherqa (Mat. 20:25-28). Jesusqa munakuywanpuni paykunata qhawarqa. w23.03 págs. 28, 29 párrs. 10-13

Kunankamaqa ashkha imastaña ruwarqanki, Bibliata sumajta estudiarqanki, ichapis ashkha watasta. Chaytaj yanapasorqa Bibliaqa Diospa Palabranpuni kasqanta reparanaykipaj. Mana chayllachu, Diostapis sumajtaña rejsinki, munakunkitaj. Jehovata mayta munakusqaykiraykutaj kausayniykita payman jaywaporqanki, bautizakorqankitaj. Chayta ruwasqaykeqa may sumajpuni. Niraj bautizakushaspaqa ichapis ashkha pruebaspi rikukorqanki. Jinapis Diospa llajtanpi wiñasqaykiman jina waj pruebas kallanqapuni. Satanasqa tukuy imata ruwanqa Jehovata munakusqayki pisiyananpaj, paymantataj karunchakunaykipaj (Efe. 4:14). Ama gustunta qoychu. ¿Imatá ruwawaj Jehovata kasukunallaykipajpuni, payta sirvinaykita nisqaykitapis juntʼanaykipaj? Ñauparinallaykipuni tiyan, nisunman “wiñay tukusqa” cristianoman tukunaykipaj kallpachakunallaykipuni tiyan (Heb. 6:1). w22.08 pág. 2 párrs. 1, 2

Familiamanta sapa ujqa, yachananku tiyan imachus paykuna ukhupi kasqanta mana pimanpis willarayta. Ichapis uj qosaqa yuyanman señoranpa ujnin mañitan asikunapaj jina kasqanta. Chaytaqa mana wajkunaman willarallanmanchu, ¿icharí? Munakusqanrayku ni imarayku munanmanchu pʼenqachiyta chayri sonqonta nanachiyta (Efe. 5:33). Tataspis yuyarikunanku tiyan jovencitosqa respetasqa kayta munasqankuta. Chayrayku mana munankumanchu pantasqasninkumanta wajkunaman willaspa pisipaj qhawachiyta (Col. 3:21). Wawastajrí chʼin kakuyta yachananku tiyan, nitaj familiankumanta pillatapis pʼenqaypi rikhurichinankupaj jina imatapis willarqonankuchu tiyan. Familiamanta tukuyninku imachus paykuna ukhupi kasqanta mana pimanpis willarqonankupaj kallpachakonqanku chayqa, aswan ujchasqa kanqanku. w22.09 pág. 10 párr. 9

Jehovapuni Jobwan parlarerqa, yuyaricherqataj manchay yachayniyoj kasqanta, tukuy wawasnintataj munakuywan cuidasqanta. Diosqa tʼukuna animalesmanta parlarerqa (Job 38:1, 2; 39:9, 13, 19, 27; 40:15; 41:1, 2). Chantapis Jehovaqa joven Elihuta kacharqa Jobta kallpacharinanpaj, sonqocharinanpaj ima. Elihuqa Jobta yuyaricherqa Jehovaqa payta sirvejkunata aguantasqankumanta bendecisqantapuni. Jinapis Jehovaqa munallarqataj wakin imitaspi Jobta yuyaycharinanta. Elihuqa munakuywan Jobta yuyaricherqa runasqa tukuy imata Ruwaj Jehová Dioswan kikinchasqaqa ni imapis kasqanchejta. Ajinamanta yanaparqa amaña payllapi anchata yuyananpaj. Chantapis Jehovaqa Jobman uj ruwayta qollarqataj: Kinsantin juchallikoj amigosninpaj orapunanta nerqa (Job 42:8-10). Kay tiempopirí, llakiykunapi kashajtinchej, ¿imaynatataj Jehová yanapawanchej? Jehovaqa mana Jobwan jinachu noqanchejwan kay tiempopi parlan. Jinapis Palabran Biblianejta parlawanchej (Rom. 15:4). w22.08 pág. 11 párrs. 10, 11

Romapi congregacionmanta wakin hermanosqa judíos karqanku, wakintaj waj nacionesmanta. Manaña Moisespa Leyninpa atiyninpichu kasqankurayku, tukuy mikhunasta mikhuyta atillajña kanku (Mar. 7:19). Chayrayku wakin judío cristianosqa tukuy imata mikhullajña kanku, wakin judío cristianostaj manapuni chayta allinpajchu qhawarqanku. Chayrayku congregacionpi tʼaqanakus karqa. Apóstol Pablotaj hermanospura allinpi kananku may importante kasqanta nerqa. Pabloqa chayta nispa hermanosninta reparachisharqa chay chʼajwasqa paykunapaj mana allinchu kasqanta, nitaj congregacionpajpis (Rom. 14:19, 20). Paypis wajkunata mana pantachinanrayku, wakin imasta manaña ruwarqañachu (1 Cor. 9:19-22). Noqanchejpis mana nisqanchejtapunichu valechiyta maskʼasun chayqa, Pablo jinallataj hermanosta kallpachasun, paykunawantaj allinta kausakusun. w22.08 pág. 22 párr. 7

Diosta yupaychaypi imatapis ruwayta munanchej chayqa, ruwananchejkamapuni kallpachakunchej, ¿icharí? Cheqan kajta munakunapajpis ajinallatataj kallpachakunanchej tiyan. Jehovataj pacienciawan yanapawasun, tiempo pasasqanman jina cheqan kajta astawan munakunapaj (Sal. 84:5, 7). Jehovaqa munakuywan yuyarichiwanchej cheqan kajta ruwayqa atina jinalla kasqanta (1 Juan 5:3). Astawanpis chayqa jarkʼawanchej, sapa diataj chayta necesitanchej. Piensarina apóstol Pablo Diospa qosqan maqanakuna ropamanta parlasqanpi (Efe. 6:14-18). Chay ropamanta, ¿mayqentaj sonqota jarkʼan? Pecherawan ninakoj ‘justicia’. Chaytaj Jehovaj cheqan kamachiykunasninwan ninakun. Imaynatachus uj pechera sonqota jarkʼan, ajinallatataj Jehovaj kamachiykunasninpis sonqonchejta jarkʼan, nisunman imatachus munasqanchejta, imaynachus kasqanchejta, yuyasqanchejtapis. Chayrayku Diospa qosqan maqanakuna ropanchejpeqa, pecherawan ninakoj justicia kananpuni tiyan (Pro. 4:23). w22.08 pág. 29 párrs. 13, 14

Diospa Palabranqa may chhika watastaña Diospa kamachisninta sumajta yanapan. Pero, ¿imaynamantá chayta ruwayta atin? Jehovaqa chay qhelqasqasta copiacherqa. Chay copiajkuna pantaj runas kajtinkupis, sumajsituta copianankupaj kallpachakorqanku. Hebreo Qhelqasqasmanta parlaspa uj yachayniyoj runa nerqa: “Bibliaqa imatachus qallariypi nerqa chay kikillantapuni kunanpis nishan, nitaj mayqen librotapis ajinata ruwarqankuchu”, nispa. Sutʼita rikunchej kay tiempopi Biblianchejpi leesqanchejqa, Diospa yuyayninpuni kasqanta. “Tukuy ima allin kaj regaloqa, aswan sumaj regalopis” Jehovamanta jamun. Imastachus Jehová qowanchej chaykunamantataj, Biblia aswan sumaj regalo kashan (Sant. 1:17). Pillapis imata regalawasqanchejpi reparanchej sumajta rejsiwasqanchejta, imatachus necesitasqanchejtapis yachasqanta. Bibliawanpis ajinallataj. Chayta estudiaspaqa mayta Jehovamanta yachakunchej. Reparanchej payqa sumajta rejsiwasqanchejta, imatachus necesitasqanchejtapis yachasqanta. w23.02 págs. 2, 3 párrs. 3, 4

Cristo waranqa watasta kamachishajtin wañusqas kay jallpʼapi kausarimuyta qallarisqanku pʼunchayqa, may kusiypuni kanqa. Munasqa wañupoj familiaresninchejtaqa, tukuypis maytapuni watejmanta rikukapuyta munashanchej. Jehovapis paykunata rikukapuyta munashallantaj (Job 14:15). Tukuypis manchay kusisqachá kay jallpʼapi kashanqanku munasqa familiaresninku kausarinpojtinku. Kausay libropi sutisninku qhelqasqa kashan chay ‘cheqan runasqa’, “wiñay kausayta japʼinankupaj” kausarimonqanku (Hech. 24:15; Juan 5:29). Ichapis munasqa familiaresninchejmanta ashkhasqa, kay jallpʼapi ñaupajta kausarimojkunamanta kanqanku. ‘Mana cheqan runastaj’, pikunachus niraj wañupushaspa mana Jehovata rejsiyta aterqankuchu chayri mana payta sirviyta aterqankuchu chaykunaqa, “juzgasqa kanankupaj” kausarimonqanku. Tukuy chay kausarimojkunaqa ashkhataraj yachakunanku kanqa (Isa. 26:9; 61:11). Chayrayku tukuy runasman ni jaykʼaj jina yachachikunan kanqa (Isa. 11:10). w22.09 pág. 20 párrs. 1, 2

Jehovaqa rikucherqa ujchasqa gobiernosmanta aswan patapi kasqanta. Payqa maqanakorqa israelitasrayku, yanaparqataj sumaj jallpʼamanta casi tukuyninta japʼikapunankupaj (Jos. 11:4-6, 20; 12:1, 7, 24). Jehová Diosqa kutin kutita rikucherqa Patapi kaj Dios kasqanta. Babiloniamanta rey Nabucodonosorqa mayta creekorqa kallpayoj kasqanmanta, atiyniyoj kasqanmanta, jatunchasqa kasqanmantapis. Nitaj kʼumuykukoj sonqowan reconocerqachu Jehovalla jatunchanapaj jina kasqanta. Chayrayku Jehová Diosqa locoyacherqa. Yuyayninman kutispataj, Nabucodonosorqa “Patapi kaj Diosta” alabarqa. Repararqataj “kamachiynenqa wiñaypaj” kasqanta, “manataj pipis jarkʼayta” atisqanta imata ruwananpajpis (Dan. 4:30, 33-35). Uj salmista kayta nerqa: “Kusisqamin uj nación Jehová Dios chay nacionpa Diosnin kajtenqa. Kusisqamin uj llajtaqa sichus Dios chay llajtata paypata kananpaj ajllakun chayqa”, nispa (Sal. 33:12). Chayrayku tukuy sonqo Jehová Diosta kasukuyta munanchej. w22.10 págs. 15, 16 párrs. 13-15

Bibliaj ashkha profeciasnenqa juntʼakunña. Chayta yachaytaj Dios imastachus aswan qhepaman ruwasaj nisqasninmanta aswan seguros kanapaj yanapawanchej. Noqanchejqa uj salmista Jehovaman orakushaspa nerqa ajinallatataj ninchej: “Mayta munani salvanawaykita. Palabraykipi atienekuni”, nispa (Sal. 119:81). Jehovaqa munakuywan Biblianejta niwanchej ‘aswan qhepaman allinta kausakunanchejta’ munasqanta (Jer. 29:11). Aswan qhepapaj suyakuyninchejqa Jehovaj nisqasninmanta kashan, manataj runa imatachus ruwananmantachu. Bibliaj profeciasninta sumajta estudianallapuni, ajinamanta Diospa Palabranpi astawan confianapaj. Bibliaj yuyaychaykunasnenqa kasukojkunata yanapan. Chayrayku Bibliapi confiallanchejtaj (Sal. 119:66, 138). Ashkha qhariwarmisqa divorciakunankupajña kasharqanku. Bibliaj yuyaychaykunasninta kasukusqankuraykutaj kunanqa kusisqas, ujchasqastaj kashanku. Chayrayku chay cristiana familiaspeqa munanakuy tiyan, wawasninkupis sumaj cuidasqas, munasqastaj kanku (Efe. 5:22-29). w23.01 pág. 5 párrs. 12, 13

¿Tʼukuriyta yachanchejchu imastachus Jehová noqanchejpaj Palabranpi nisqanman jina ruwapuwasqanchejpiña? Jesusqa nerqa Jehová kausakunanchejpaj imatachus necesitasqanchejta qonawanchejtapuni (Mat. 6:32, 33). Nillarqataj Jehovamanta espíritu santonta mañakojtinchej qonawanchejtapuni (Luc. 11:13). Jehovataj chay nisqasninta juntʼanpuni. Ichapis yuyarikunchej ima nisqasnintañachus kausayninchejpi juntʼasqanta: perdonawasqanchejta, sonqochawasqanchejta, qayllallanpipuni kanapajtaj yanapawasqanchejta (Mat. 6:14; 24:45; 2 Cor. 1:3). Imastañachus Jehová ruwapuwasqanchejpi tʼukurispaqa, aswan qhepaman imastachus ruwanantapis mana iskayrayaspa suyakusun. Noqanchejpis yachanchej Jehová nisqasninta juntʼanantapuni, chayrayku suyakuyninchejmanta kusikuyta atillanchejtaj. Uj salmista nerqa: ‘Kusikuyniyojmin Jehová Diosninpi atienekojqa. Payqa tukuy tiempo atienekunapaj jina’, nispa (Sal. 146:5, 6). w22.10 pág. 28 párrs. 15, 17

Jehovallata watejmanta yupaychaymanta profecía, ¿kay tiemponchejpi juntʼakullantajchu? Arí. 1919 watamantapacha may chhika runas Jatun Babiloniamanta, nisunman mundontinpi llulla religionesmanta kacharichisqa karqanku. Paykunaqa Sumaj Jallpʼamanta nisqa, aswan sumaj lugarman apasqa karqanku. Chaytaj uj paraíso jina (Isa. 51:3; 66:8). Ajllasqa cristianosqa 1919 watamantapacha chay paraisoman yaykunku. Tiempo pasasqanman jinataj, waj ovejasmanta kajkunapis nisunman kay jallpʼapi kausakuyta suyakoj cristianospis, chay paraisoman yaykullankutaj, may chhika bendicionestataj Jehovamanta japʼinku (Juan 10:16; Isa. 25:6; 65:13). Kay tiempopi chay paraisoqa jallpʼantinpi kashan. Chayrayku Jehovallata tukuy sonqo yupaychasun chayqa, maypi tiyakuspapis chay paraisopi kayta atinchej. w22.11 págs. 11, 12 párrs. 12-15

Jehová “wiñaypaj wiñaynintinpaj” kasqanta, ¿nichu entiendeyta atillanki? (Isa. 40:28). Mana qanllachu ajinapi rikukunki. Elihupis Diosmanta kayta nerqa: “Payqa mana yupay atina watasniyoj”, nispa (Job 36:26). Uj imata mana entiendesqanchejqa, mana niyta munanchu chay mana kasqanta. Sutʼincharinapaj: Ichapis mana entiendeyta atillasunmanchu imaynachus kʼanchay kasqanta. Jinapis chayqa mana niyta munanchu kʼanchay mana kasqanta. Ajinallatataj ichapis runasqa mana jaykʼaj entiendeyta atillasunchu Jehová mana qallariyniyoj, nitaj tukukuyniyoj kasqanta. Jinapis chayqa mana niyta munanchu Dios mana wiñaypajchu kasqanta. Ruwawajninchej imaynachus kasqanqa mana noqanchej entiendeyta atisqanchejmantachu kashan (Rom. 11:33-36). Chantapis payqa niraj kay jallpʼapi kaj imaspis, ni cielopi kaj imaspis, nisunman ni intipis, ni estrellaspis kashajtin karqaña. ‘Paymin cielotapis mastʼarqa’ (Jer. 51:15). w22.12 págs. 2, 3 párrs. 3, 4

Wakin kuteqa ichapis wajkunaj ñaupaqenkupi orananchej kanqa. Ichá uj hermanaqa estudionman waj hermanawan rispa, chay hermanata oracionwan qallarinanta ninman. Hermanataj yachakojta manaraj allinta rejsisqanrayku, ninman estudiayta tukuytawan oracionta ruwananta. Ajinamanta yachanqaña imatachus yachakojpaj mañapunanta. Ichapis uj hermanota ninkuman predicacionman llojsinapaj tantakuypi, chayri congregacionmanta tantakuypi oracionta ruwananta. Oracionta ruwaj hermanosqa, yuyarikunanku tiyan imapajchus chay tantakuykuna kasqanta. Oracionta ruwayqa mana wajkunata yuyaychanapajchu, nitaj imata willanapajchu. Casi tukuy tantakuykunapeqa, phishqa minutosta tʼaqakun takinapaj, oracionta ruwanapajwan. Chayrayku oracionta ruwaj hermanoqa ama ‘ashkhata parlananchu’ tiyan, astawanraj tantakuy qallarikunanpaj oracionta ruwashaspa (Mat. 6:7). w22.07 pág. 24 párrs. 17, 18

Jesusqa nerqa qhepa pʼunchaykunapi ‘kaynejpi jaqaynejpi’ wañuchej onqoykuna rikhurinanta (Luc. 21:11). Chayta yachayqa sonqonchejta tiyaykuchin. Imajtinchus yacharqanchejña chay imas pasananta. Chayrayku chayqa mana tʼukuchiwanchejchu. Kunantaj rikushanchej Jesús nisqanman jinapuni tukuy ima kashasqanta. Chayrayku qhepa pʼunchaykunapi kausakojkunapaj imatachus Jesús yuyaychasqanman jina ruwanchej. Pay nerqa: “Chaymantaqa ama mancharikunkichejchu”, nispa. Uj wañuchej onqoy rikhurejtenqa, manaña ñaupajta jina imatapis ruwayta atillanchejchu. Jinapis sapallanchejpi Bibliata estudianallapuni, reunionesmanpis rinallapuni. Publicacionesninchejta leespa, videostapis qhawaspa, yuyarikunchej hermanosninchejpis kikin problemasllapitaj rikukushasqankuta, Jehovatataj sirvishallasqankutapuni. w22.12 pág. 17 párrs. 4, 6

Tukuy yacharqanku Jacobqa wawan Joseta mayta munakusqanta (Gén. 37:3, 4). Chayrayku Josej kuraj hermanosnenqa paymanta envidiakorqanku. Atiytawankamataj ranqhero madianitasman vendeykorqanku. Chay madianitasqa Joseta Egiptoman aparqanku, Egiptoqa may karupi kasharqa. Chaypitaj Potifarmanñataj vendeykorqanku. Potifarqa faraonpa guardiasninpa kamachejnin karqa. Josej kausaynenqa ujllata cambiarqa. May munasqa wawa kashaspa, Egiptoman apajtinku esclavoman tukorqa (Gén. 39:1). Wakin kutisqa “tukuy runas jinallataj” problemaspi rikukunchej (1 Cor. 10:13). Chayrí ichapis Jesuspa discipulosnin kasqanchejraykulla runas burlakuwasunman, churanakuwasunman, qhatiykachawasunman ima (2 Tim. 3:12). Imapi rikukojtinchejpis Jehovaqa allin rinawanchejpaj yanapayta atiwanchej. w23.01 págs. 14, 15 párrs. 3, 4

Ichapis wakin kutisqa yuyasunman phiñachiwarqanchej chay hermanowan parlarinanchej kasqanta. Jinapis niraj chayta ruwashaspa kayta tapurikuna: “Imachus pasasqanta, ¿allintapunichu yachani? (Pro. 18:13). ¿Al intentopunichu ruwanman karqa? (Ecl. 7:20). ¿Nichu noqapis kikillantataj waj kutispi ruwarqani? (Ecl. 7:21, 22). Sichus hermanowan parlasaj chayqa, ¿nichu allinchanaymantaqa astawan problemallata ruwaykusaj?”, nispa. Chay tapuykunapi tʼukurispaqa, ichapis reparasunchej aswan allin kasqanta hermanonchejta munakunanchej, phiñachiwasqanchejtataj qonqapunanchej. Jinapis, ¿imaynatá sapa ujninchej cheqa cristianos kasqanchejta rikuchillasunmantaj? Hermanosninchej pantajtinkupis tukuy sonqo paykunata munakuspa. Chayta rikuspataj ichapis wakenqa cuentata qokunkuman cheqa religión kasqanchejta, noqanchejwan khuskataj Diosninchej Jehovata yupaychayta munanqanku. Chayrayku kallpachakunallapuni purajmanta munanakunapaj. Chaypi yachakun cheqa cristianos kasqanchej. w23.03 pág. 31 párrs. 18, 19

Bibliaqa rikuchin Jehovaj kʼacha kaykunasninmanta aswan kurajqa munakuy kasqanta. Mayta munakuwasqanchejrayku, Jehovaqa mana necesitasqanchej imasta mana Bibliapi qhelqacherqachu (Juan 21:25). ¿Imaynatataj Jehová munakuwasqanchejta rikuchillawanchejtaj? Payqa mana kʼumuykachachinawanchejpaj jinachu parlawanchej. Jehovaqa mana may chhika kamachiykunatachu Bibliapi qowanchej, mana tukuy imitapajchu niwanchej imatachus ruwanata, imatatajchus mana ruwanata. Astawanpis ñaupa runaspa kausayninkumanta willawasqanchejwan, may sumaj profeciasninwan, sumaj yuyaychaykunawan ima kausayninchejpi allin imasta ajllanapaj yanapawanchej. Ajinamanta Bibliaqa sonqonchejta aysan Jehovata munakunanchejpaj, tukuy sonqotaj kasukunanchejpaj. Bibliaqa rikuchin Jehová maytapuni noqanchejmanta llakikusqanta. ¿Imajtín chayta ninchej? Imajtinchus Palabranpeqa ashkha ñaupa tiempo runasmanta parlan. Paykunataj noqanchej jinallataj llakiyniyoj, kusiyniyoj karqanku, ‘noqanchej jina runaslla kasqankurayku’ (Sant. 5:17). Mana chayllachu, noqanchej jina runaswan imaynachus Jehová kasqanta Bibliapi ukhunchaspaqa, astawan sumajta entiendenchej “Jehová Diosqa manchay munakuyniyoj, khuyakuyniyojtaj kasqanta” (Sant. 5:11). w23.02 pág. 6 párrs. 13-15

Bibliaj último libronqa kay jinata nispa qallarin: “Kayqa Jesucristoj sutʼinchasqan kashan Diosmanta japʼisqanman jina, kamachisninman rejsichinanpaj imaschus tumpamantawan kanan kashan chay imasta”, nispa (Apo. 1:1). Chayrayku yachaytapuni munanchej imaschus kay mundopi pasashasqanta, chaykuna imaynatachus Bibliaj profeciasninta juntʼashasqantapis. Chantapis ichá gustawanchej chaykunamanta hermanoswan parlay. Bibliaj profeciasninmanta parlashaspaqa, wakin imasta parlaymanta cuidakunanchej tiyan. Mana munanchejchu imatapis yuyasqanchejman jinalla niyta. Imaraykuchus chayqa congregacionta tʼaqanachinman. Ichapis uyarisunman kay mundomanta kamachejkuna uj chʼampayta allinchanankupaj imatachus ruwanankuta nishasqankuta, tukuy imapis allillan, ni imamanta llakikuna kanchu ninankupajpis imatachus ruwayta munashasqankuta. Chayta uyarispaqa ama ninachu chay nisqanku 1 Tesalonicenses 5:3 versiculopi profeciata juntʼashasqanta. Astawanpis al día kana kunallanraj sutʼinchakusqanwan. Jehovaj llajtan sutʼinchasqanman jinapuni imatapis nisun chayqa, congregacionpi ‘uj sonqolla’ sumaj ujchasqa kanapaj yanapakusun (1 Cor. 1:10; 4:6). w23.02 pág. 16 párrs. 4, 5

¿Imaraykutaj Jesucristota munakunki? Jesusqa cheqa kajta, kʼumuykukoj sonqoyoj kayta, justiciatapis munakun. Sichus qanpis cheqa kajta, cheqan kajtawan munakunki chayqa, Jesustapis munakullankitaj. Jesusqa mana manchachikuspa cheqa kajman, cheqan kajmanpis sumajta sayakorqa (Juan 18:37). Chanta, ¿imaynatá kʼumuykukoj sonqo kayta munakusqanta rikucherqa? Jesusqa nisqasninwan ruwasqasninwan rikucherqa kʼumuykukoj sonqo kasqanta. Payqa Tatantapuni jatunchaj, nitaj paychu jatunchachikuyta munaj (Mar. 10:17, 18; Juan 5:19). ¿Imatá yuyanki Jesús kʼumuykukoj sonqo kasqanmanta? ¿Sonqoykita aysancharí Diospa Wawanta munakunaykipaj, pay jinataj ruwanaykipaj? ¿Imaraykutaj Jesús kʼumuykukoj sonqo? Payqa ajina, Jehová kʼumuykukoj sonqo kasqanrayku. Chantapis Tatanta munakun, tukuy imapitaj Tatanman rijchʼakun (Sal. 18:35; Heb. 1:3). ¿Manachu chayqa Jesusman qayllaykuchisunki? w23.03 págs. 3, 4 párrs. 6, 7

Bibliaqa iskay grupos kausarichisqas kanankumanta parlan. Paykunaqa kay jallpʼapi wiñaypaj kausakuyta atenqanku. Chaykuna kanku ‘cheqan runas’, ‘mana cheqan runas’. ‘Cheqan runasqa’ wañupunankukama Jehovata sirverqanku chaykuna kanku. ‘Mana cheqan runastaj’ Jehovata mana sirverqankuchu. Chay iskay grupos kausarimunanku, ¿ninayanchu sutisninku kausay libropi qhelqasqa kashasqanta? ‘Cheqan runaspa’ sutisninkoqa, niraj wañupushajtinku kausay libropi qhelqasqaña karqa. Wañupojtinkurí, ¿chay libromanta sutisninku borrakorqachu? Mana. Paykunaqa Jehovaj yuyayninpi ‘kausakushallankupuni’. Diosqa “mana wañusqaspa Diosninchu, manachayqa kausajkunajta. Paypajqa tukuyninku kausashanku” (Luc. 20:38). Chayqa niyta munan cheqan runas kay jallpʼapi kausarichisqa kajtinku, sutisninkoqa kausay libropi qhelqasqallapuni kashananta. Jinapis qallariypeqa lapizllawanrajpis qhelqasqa kanman jina kanqa (Luc. 14:14). w22.09 pág. 16 párrs. 9, 10

Jehovaqa munarqa ruwasqasninwan Adán kusikunanta. Chayrayku uj kʼachitu paraisoman churarqa chaypi kausakunanpaj. Kamacherqataj chay paraisota sumajta cuidananta, wiñachinantataj (Gén. 2:8, 9). Adanqa maytachá kusirikorqa mujusta pʼuturarimushajta rikuspa, plantastapis tʼikarishajta rikuspa. Adanpajqa Edén huertata cuiday may sumaj llankʼaypuni karqa. Jehovaqa Adanta nillarqataj animalitosman sutista churananta (Gén. 2:19, 20). Jehovaqa paylla chayta ruwayta atinman karqa, jinapis Adanman chay ruwayta qorqa. Adanqa animalesta sumajtachá qhawarerqa imaynachus kasqankuta, imatachus ruwasqankuta chayman jina sutista churananpaj. Chayta ruwaspataj maytachá kusikorqa. Chaytaj yanaparqachá reparananpaj Tatan Jehová may yachayniyoj kasqanta, tukuy ima ruwasqasnintaj may kʼachitus, tʼukunapaj jinataj kasqanta. w23.03 pág. 15 párr. 3

Reino Unidowan Estados Unidoswan lantej chakinwan ninakusqankurayku, manaña paykunaj qhepanta waj atiyniyoj gobierno kanqañachu (Dan. 2:31-33). Paykuna kanku qhepa kaj atiyniyoj gobierno. Chay atiyniyoj gobiernotataj Diospa Gobiernon Armagedonpi waj gobiernostawan khuska chinkachenqa (Apo. 16:13, 14, 16; 19:19, 20). ¿Imaynatá kay profecía yanapawanchej? Danielpa profecianqa tukukuy tiempopi kausakushasqanchejmanta waj imastawan nin. 2.500 watas ñaupajtaña Danielqa nerqa Babiloniaj qhepanta waj tawa atiyniyoj gobiernoswan kananta. Chay atiyniyoj gobiernospa jallpʼasninkupitaj Diospa llajtanmanta ashkhas tiyakunanku karqa chayri Diospa llajtanta chay gobiernos qhatiykachananku karqa. Chantapis nillarqataj Reino Unidowan Estados Unidoswanqa qhepa kaj atiyniyoj gobierno kananta. Chayta yachayqa sonqochawanchej, yanapawanchejtaj suyakunapaj Diospa Gobiernon tumpamantawan tukuynin gobiernosta chinkachinanta, chay gobiernollañataj kay jallpʼata kamachinanta. w22.07 pág. 4 párr. 9; pág. 5 párrs. 11, 12