Junio

Jobqa Jehovaj sumaj amigon karqa. Familianqa jatun, ujchasqataj karqa. Chantapis Jobqa qhapaj karqa (Job 1:1-5). Jinapis Jobqa uj diallapi casi tukuy imanta pierderqa. Ñaupajtaqa kapuyninta pierderqa (Job 1:13-17). Chaymantataj tukuynin wawasnin wañorqanku. Jobwan warminwanqa maytachá waqarqanku, nichá ni imanakuytapis aterqankuchu chunkantin wawasninkupuni wasiwan pʼampaykusqa wañusqankumanta. Chayraykuchá Jobqa ropanta llikʼirakorqa, pampaman qonqoriykukuspataj kʼumuykukorqa (Job 1:18-20). Chaymantataj Satanasqa Jobta millay onqoywan onqoykucherqa, pisipajtaj qhawacherqa (Job 2:6-8). Ñaupajtaqa Job sumaj respetasqa runa karqa. Runasqa payta maskʼajpuni kanku yuyaycharichikunankupaj (Job 31:18). Onqoykojtintaj niña payman qayllaykuytapis munarqankuchu. Hermanosnin, rejsisqasnin, kamachisninpis niña paymanta yachayta munarqankuchu (Job 19:13, 14, 16). w22.06 pág. 21 párrs. 5, 6

Bautizakojkunaqa imatachus apóstol Pablo Efesomanta cristianosman yuyaycharqa, chayta kasukunanchej tiyan. Paykunata nerqa cristiano kausayninkupi “wiñay tukusqa runas” kanankuta (Efe. 4:13). Chaywantaj “ñauparillaychejpuni” nishanmanpis jina karqa. Jehovata mayta munakuspañapis astawan munakuyta atiwaj. Apóstol Pablo nerqa imaynatachus chayta ruwanata. Chay nisqan kashan Filipenses 1:9 versiculopi. Pabloqa Jehovamanta mañakorqa Filiposmanta cristianospa munakuyninku “astawan astawan wiñananta”. Chaypi reparanchej Jehovataqa astawan munakuyta atisqanchejta. Chaypajqa necesitanchej ‘cheqa yachayta, sumajta reparayta ima’. Jehovata astawan rejsispaqa astawan payta munakunchej. Maytataj kusikunchej Jehová kʼacha kasqanmanta, imata ruwasqanpis may sumaj kasqanmanta. Mayta munanchej payta kusichiyta, ni imarayku munanchejchu sonqonta nanachiyta. Mayta kallpachakunchej imatachus ruwananchejta munasqanta entiendenapaj, chayman jinataj ruwanapaj. w22.08 págs. 2, 3 párrs. 3, 4

Apocalipsis libropi qhelqasqa kaj imasqa tukuy Jehovaj kamachisnillanpaj kashan, manataj tukuy runaspajchu. Noqanchejqa chay profecías juntʼakunanpaj yanapakushanchej. Chaytaj mana tʼukunapajchu. Apóstol Juanqa maykʼajchus chay profecías juntʼakunanmanta parlaspa nerqa: “Diospa espiritunwan juntʼa kaspa Señorpa pʼunchayninpi rikhurerqani”, nispa (Apo. 1:10). Juanqa chay palabrasta qhelqarqa 96 wata chaynejta. Chay kutispajqa ‘Señorpa pʼunchayninpaj’ unayraj faltarqa (Mat. 25:14, 19; Luc. 19:12). Jinapis profecías nisqanman jinaqa, Señorpa pʼunchaynin 1914 watapi qallarerqa, Jesús cielopi Rey jina gobernayta qallarishajtin. Chay watamantapacha Apocalipsis libropi Diospa llajtanmanta parlaj profecías juntʼakuyta qallarerqa. Chayrayku nisunman “Señorpa pʼunchayninpi” kausashasqanchejta (Apo. 1:3). w22.05 pág. 2 párrs. 2, 3

Millay phiña animalwan falso profetawanqa, kausashaj wijchʼuykusqa karqanku azufrewan laurashaj nina qochaman. Reparanchej jina, Jehová Diosqa kay mundomanta enemigosninta kamachishajtillankuraj wiñaypaj chinkarparichenqa. ¿Imatá yachakunchej? Cristianosqa Diosta, Gobiernollantawan tukuy sonqo apoyananchej tiyan (Juan 18:36). Chayrayku kallpachakunanchej tiyan ni tumpitallatapis politicaman chhapukunapaj. Jinapis chayqa ichá mana atikullanmanchu. Imajtinchus gobiernosqa munanku tukuy imapi apoyananchejta. Chay gobiernosta apoyajkunataj, millay phiña animalpa marcanwan marcachikushanku (Apo. 13:16, 17). Chay marcasqa kajkunataqa, niña Jehová allinpajchu qhawan, nitaj wiñay kausaytapis japʼiyta atenqankuchu (Apo. 14:9, 10; 20:4). Chayrayku gobiernos paykunata apoyananchejpaj tukuy imata ruwajtinkupis, amapuni kay mundomanta politicaman chhapukunachu. w22.05 págs. 10, 11 párrs. 12, 13

Kallpachakuna sumaj imasta ruwayta yachakunapaj. Chayta ruwanapaj kallpachakusun chayqa, Jehovaj llajtanpi astawan yanapakuyta atisun. Betel wasista, Jatun Tantakuna Wasista, Tantakuna Wasista ima ruwaysikuspa yanapakojkunapi piensarina. Paykunamanta ashkhasqa, experienciayoj hermanoswan trabajaspa sumaj imasta ruwayta yachakorqanku. Hermanospis hermanaspis Jatun Tantakuna Wasista, Tantakuna Wasista ima allinchayta yachakushanku. Chay jinasmanta Jehová Dioswan Jesuswanqa, chay hermanosnejta ashkha imasta ruwashanku. Imajtinchus Jehová Diosqa ‘wiñaypaj wiñaynintinpaj Rey’, Jesucristotaj “kamachejkunaj Reynin” (1 Tim. 1:17; 6:15). Chayrayku munanchej sinchʼita trabajayta, imastachus ruwayta yachasqanchejwantaj Jehovata jatunchayta, manataj noqanchej jatunchakuytachu (Juan 8:54). w22.04 pág. 24 párrs. 7, 11

Salomonqa manchay qhapaj runa karqa, tukuy ima patapitaj kausakorqa (1 Rey. 10:7, 14, 15). Jesustaj pisi imasnillayoj karqa, ni wasinpis tiyaporqachu (Mat. 8:20). Jinapis paykunaqa Jehová yachayta qosqanrayku, kapuyniyoj kaymanta maychus kajllata yuyarqanku. Salomonqa yacharqa qolqeta necesitasqanchejta kausayninchejpi imastachus necesitasqanchejta rantikunapaj chayri imatapis munaspa rantirikunapaj. Salomonqa qhapaj kaspapis, sutʼita repararqa mana chay imaschu aswan sumaj kasqanta. Pay nerqa: “Allinpaj qhawasqa kayqa aswan sumaj manchay qhapaj kanamantaqa”, nispa (Pro. 22:1). Payqa reparallarqataj qhapajyayta munaj runasqa, imaschus kapusqankuwan mana contentoschu kasqankuta (Ecl. 5:10, 12). Salomonqa nerqa ashkha qolqeyoj kaypi atienekoyqa mana allinchu kasqanta, imajtinchus qolqeqa ujta qhawarinallapaj (Pro. 23:4, 5). w22.05 pág. 21 párrs. 4, 5

Jehová ima bendicionestachus kunan qowasqanchejpi piensarispaqa, astawan payman qayllaykunchej. Jehová ima bendicionestachus qhepaman qonawanchejpi tʼukurispataj, tukuy sonqo suyakullasunpuni payta wiñaypaj sirviyta. Tukuy chaytaj yanapawasun Jehovata aswan kusisqa sirvinapaj. Jehovaqa kay mundota chinkachishajtin, yanapanawanchejpaj ‘sayarenqa’. ‘Justiciata ruwaj Dios’ kasqanrayku, yachanchej payqa Satanaspa mundonta maychus tiemponpipuni chinkachinanta (Isa. 25:9). Jehovapis noqanchejpis pacienciawan suyakushanchej, kacharichisqa kananchej pʼunchay chayamunanta. Chaykamataj may jatunpaj qhawayta munanchej paymanta mañakuyta, Palabranta estudiayta, chayman jina kausakuyta, bendicionesninchejpipis tʼukuriyta. Tukuy chayta ruwasun chayqa, Jehová yanapawasun payta sirvispa kusiywan aguantanallapajpuni. w22.11 pág. 13 párrs. 18, 19

Timoteo bautizakushasqanpi piensarina. Bibliaqa mana imatapis chaymanta parlanchu. Jinapis maman Euniceqa, chay día may kusisqachá kasharqa (Pro. 23:25). Euniceqa maytapuni kallpachakorqa, wawanman Jehovata, Jesucristota ima munakuyta yachachinanpaj. Timoteoj tatasnenqa mana kikin religionniyojchu karqanku. Tatanqa griego karqa, mamanwan awelitanwantaj judías karqanku (Hech. 16:1). Timoteoqa jovencitoñasina kasharqa maman Eunicewan, awelitan Loidawan cristianasman tukushajtinku. Jinapis tatanqa mana cristianoman tukorqachu. ¿Imatá ruwanman karqa? Kay tiempomanta cristiana mamaspis, Eunice jinallataj familiankuta mayta munakunku. Astawanqa wawasninkuta yanapayta munanku Jehovaj amigosnin kanankupaj. Jehovataj chayta ruwanankupaj mayta kallpachakusqankuta jatunpaj qhawan (Pro. 1:8, 9). Jehovaqa ashkha mamasta yanapan wawasninkuman payta munakuyta, sirviyta ima yachachinankupaj. w22.04 págs. 16, 17 párrs. 1-3

Jehovaqa tumpamantawan gobiernospa sonqonkuman churanqa paypa munayninta ruwanankupaj. Chay ‘chunka reyesqa’ nisunman chay gobiernosqa, tukuynin llulla religionespa contranpi churakuspa tukuyninta chinkarparichenqanku (Apo. 17:1, 2, 12, 16). ¿Imajtintaj nisunman Jatun Babilonia chinkachisqa kananpajña kashasqanta? Chayta yachanapajqa ñaupa tiempopi Babilonia llajtamanta yuyarikuna. Chay llajtaqa jatun Éufrates mayuwan sumaj jarkʼasqa karqa. Apocalipsis libroqa Jatun Babiloniapi kajkunata ‘yakuswan’ kikinchan (Apo. 17:15). Jinapis nillantaj chay yakus chʼakipunanta. Chaywantaj nishan mundontinmanta tukuy llulla religionesmanta ashkhas llojsipunankuta (Apo. 16:12). Kunantaj chay profeciaqa juntʼakushan. Ashkha runasqa llulla religionmanta llojsipushanku, waj imaspitaj problemasninkupaj yanapata maskʼashanku. w22.07 págs. 5, 6 párrs. 14, 15

Perdonaspaqa Jehovaman agradecekushanchej. Jesusqa uj rijchʼanachinapi Jehovata uj reywan kikincharqa, pichus kamachinpa mana pagay atina manunta perdonarqa. Chay kamachitaj kamachi masinta mana khuyakusqachu, manun paypamanta nisqa aswan pisilla kajtinpis (Mat. 18:23-35). ¿Imatataj Jesús chaywan yachachiwanchej? Jehová mayta khuyakuwasqanchejmanta tukuy sonqo agradecekunchej chayqa, sonqonchej aysawasun wajkunata perdonananchejpaj (Sal. 103:9). Unay watasña Torremanta Qhawaj revistapi inglés parlaypi nerqa: “Runa masinchejta may chhikata perdonaspapis Jehová Cristonejta perdonawasqanchejman, khuyakuwasqanchejman ni jaykʼaj ni kantunmanpis chayasunmanchu”, nispa. Perdonajkunaqa perdonasqallataj kanqanku. Jehovaqa khuyakojkunata khuyakullantaj (Mat. 5:7). Jesusqa discipulosninman orakuyta yachachishaspa chayta sutʼita nerqa (Mat. 6:14, 15). w22.06 pág. 10 párrs. 8, 9

Jesusqa runaman tukuspa kay jallpʼaman jamorqa, Tatan jinapunitaj tukuy imata ruwarqa (Juan 14:9). Jinamanta paynejta Jehová Diosta rejsiyta, munakuytapis aterqanchej. Chantapis Jesuspa yachachisqasnin, imaynatachus kay tiempopi Diospa llajtanta kamachisqanpis yanapallawanchejtaj. Jesusqa yachachiwarqanchej imaynatachus Jehová allinpaj qhawanawanchejpaj jina kausakuyta. Jesús kausarichisqa kaytawan yawarninta uj sumaj jaywanata jina jaywarqa ‘tukuy juchamanta llimphuchanawanchejpaj’ (1 Juan 1:7). Kunanqa Jesús may atiyniyoj, mana jaykʼaj wañoj Reytaj. Payqa pisimantawan katarej umanta pʼaltarparenqa (Gén. 3:15). Satanás chinkachisqa kajtin Diosta yupaychajkunaqa mayta kusikusun. Chaykamataj ama saykʼunachu. Diosninchejqa atienekunapaj jinapuni. Payqa kay jallpʼapi ‘tukuy nacionesta’ mayta bendicenqa. w22.07 pág. 18 párr. 13; pág. 19 párr. 19

Imapichus ñaupariyta munasqanchejta mana munasqanchejman jinapunichu juntʼaspaqa, ama llakikunachu. Imajtinchus kausayninchejpeqa imaspis pasanqapuni. Apóstol Pablomanta parlarina. Payqa Tesalónica llajtapi uj mosoj congregacionta rikhuricherqa. Jinapis Pabloqa enemigosnin payman churanakusqankurayku chay llajtamanta ayqekorqa (Hech. 17:1-5, 10). Pablo chay llajtapi qhepakunman karqa chayqa, hermanostawan llakiypi rikhurichinman karqa. Pabloqa, ajina llakiypi rikukuspapis hermanosta yanapallarqapuni. Aswan qhepamantaj Timoteota kacharqa Tesalonicapi mosoj hermanosta yanapananpaj (1 Tes. 3:1, 2). Tesalonicamanta hermanosqa maytachá agradecekorqanku. Pablo Tesalónica llajtapi imapichus rikukusqanmanta mayta yachakusunman. Ichá imapi ñauparinapajpis mayta kallpachakushanchej. Jinapis kausayninchejpi cambios kasqanrayku mana atillanchejchu (Ecl. 9:11). Ajinapi rikukushanchej chayqa, atisqanchejman jina waj imasta ruwanapaj kallpachakuna. w22.04 págs. 25, 26 párrs. 14, 15

Jehovaqa aswan qhepapaj uj suyakuyta qowasqanchejwan sonqochawanchej. Qhawarina ima versiculoschus sonqochawasunman llakiykunapi kashajtinchej. Jehovaqa Palabranpi sutʼita niwanchej, ni aswan sinchʼi pruebaspis ‘tʼaqayta atinawanchejta paypa munakuyninmanta’ (Rom. 8:38, 39). Nillawanchejtaj pikunachus payman qhaparikunku chaykunaj qayllankupi kashasqanta, nisunman mañakusqanchejta uyarisqanta (Sal. 145:18). Jehovaqa niwanchej paypi atienekuspa ima pruebatapis aguantayta atisqanchejta, sufrispapis kusisqa kayta atisqanchejta (1 Cor. 10:13; Sant. 1:2). Chantapis Diospa Palabranqa, yuyarichiwanchej pruebasninchejqa uj tiempollapaj kasqanta. Chaykunaqa ni imapischu Jehová wiñay kausayta qonawanchejta niwasqanchejwan (2 Cor. 4:16-18). Jehovaqa niwanchej pikunachus problemasta apamuwanchej chaykunata chinkachinanta: Satanasta, tukuy pay jina kajkunatawan (Sal. 37:10). ¿De memoriachu textosta yachanki qhepaman pruebaspi rikukuspa kallpachasunanpaj? w22.08 pág. 11 párr. 11

Ichapis yuyanchej Jehovaj kamachiykunasninman jina sapa día, sapa wata mana kausakuyta atinanchejta. Jina kajtin, Jehovaqa nin ‘cheqan kayninchejqa mar qochaj qhollchoqeyasqan jina kayta’ atisqanta (Isa. 48:18). Mar kantupi chukuykuspaqa, rikunchej yakoqa mana sayaspa qhollchoqeyasqanta. Chayta rikuspa, ¿chay qhollchoqeyasqan maykʼajllapis sayapunanpirajchu piensasunman? Mana, ¿icharí? Yachanchej yakoqa qhollchoqeyanallantapuni. Noqanchejrí, ¿imatá ruwananchej tiyan cheqan kayninchej mar qochaj qhollchoqeyasqan jina kananpaj? Imatapis ruwayta ajllanapajqa, piensarinaraj imatachus Jehová ruwananchejta munasqanpi, chaymantaraj ruwana. Imatapis ruwayta mana ajllayta atillajtinchejqa, Tatanchej Jehovaqa kallpata qowasunpuni, yanapawasuntaj sapa día cheqan kamachiykunasninta kasukunallapajpuni (Isa. 40:29-31). w22.08 pág. 30 párrs. 15-17

Chay 1.000 watas tukukuytaqa Satanás kacharisqa kanqa, mana pantaj runastataj engañayta munanqa. Chay pruebapeqa tukuy rikuchinanku kanqa, Jehovaj sutinta respetasqankutachus manachus, kamachiynintapis apoyasqankutachus manachus (Apo. 20:8-10). Imatachus chaypacha ruwasqankumanta kanqa, sutisninku kausay libropi wiñaypaj qhelqasqachus manachus kanan. Wakenqa Adanwan Evawan jina mana Jehovaj Gobiernonta apoyanqankuchu, nitaj yachakunchu mashkhachus paykuna kanankuta. ¿Imataj paykunawan kanqa? Apocalipsis 20:15 niwanchej: “Pikunachus kausay libropi mana qhelqasqa kajkunaqa nina qochaman wijchʼuykusqa karqanku”, nispa. Arí, chay mana kasukojkunaqa wiñaypaj chinkasqata chinkarparichisqa kanqanku. Jinapis chay mana pantaj runasmanta mayoriaqa, chay qhepa kaj pruebata atipanqanku. w22.09 págs. 23, 24 párrs. 15, 16

Ñaupa tiempopeqa mana judío kajkuna cristianosman tukusharqanku. Congregacionmanta wakintaj paykuna circuncidakunankupuni kasqanta nej kanku. Chaytataj ichapis nej kanku mana runaswan qhawarachikunankupaj (Gál. 6:12). Apóstol Pablo chay yuyasqankuwan manapuni de acuerdochu kajtinpis, mana yuyasqanman jinapunichu hermanosta ruwachiyta munarqa. Manaqa kʼumuykukoj sonqowan chay problemata Jerusalenpi kaj apostolesman, ancianosman ima aparqa (Hech. 15:2). Chayta ruwasqanwan congregacionmanta hermanosta yanaparqa allillanpipuni kanankupaj, kusisqataj kanankupaj (Hech. 15:30, 31). Mayqen hermanollawanpis mana kikintachu yuyasqanchejrayku phiñanakunapaj jina kashanchej chayqa, Jehová congregacionta cuidanankupaj churan chay hermanoswan yanapachikusunman. Ajinamanta hermanoswan allillanpipuni kasun. Publicacionesninchejpi, Jehovaj llajtan kamachiykunata qowasqanchejpipis, Bibliaman jina sumaj yuyaychaykunata tarisun. Chay yuyaychaykunaman jina ruwasun, manataj yuyasqanchejman jinallachu chayqa, congregacionpi allinpi kanapaj yanapakusun. w22.08 pág. 22 párrs. 8, 9

Maykʼajllapis imapis pasashawasqanchejmanta uj sumaj amigonchejman willarikuyta necesitanchejpuni. Chayta ruwaytaj wakin kutisqa mana atikullanmanchu. Ichapis imaynapunichus kashasqanchejta mana wajkunaman willariyta yachanchejchu, mana chayta ruwayman yachasqachu kasqanchejrayku. Wakin kutitaj ichá uj amigonchejman imatapis willarerqanchej. Chayta wajkunaman willarasqanta yachaspataj, mayta llakikorqanchej. Sumaj de confianza amigos kapuwajtinchejqa mayta agradecekunchej. Paykunaqa imatapis willarejtinchej mana wajkunaman willarqonkuchu. Wajkunaman mana imatapis willarqoj ancianosqa, “wayramanta pakakunapaj jina” kanku (Isa. 32:2). Chay jina ancianosmanqa imatapis willakuyta atillanchej. Imaraykuchus yachanchej ni piman willanankuta. Paykunataqa mana matʼinchejchu imatapis willarqonawanchejpaj. Ancianospa señorasninkutapis mayta agradecekunchej. Imajtinchus paykunaqa mana qosasninkuta tapuykachankuchu imastachus hermanosmanta yachasqankuta. Chantapis ancianos imatachus hermanospa kausayninkumanta yachasqankuta mana señorasninkuman willasqankoqa, uj bendicionpuni. w22.09 pág. 11 párrs. 10, 11

Seguros kashanchej Jehovaqa tukuy sonqo kasukoj kamachisninta “manchay ñakʼariy” tiempopi salvanawanchejtapuni (Mat. 24:21; Dan. 12:1). Chaytaqa ruwanqa maypachachus uj qotu ujchasqa naciones Magogmanta Gog sutiyoj, mundo enteropi mana khuyarikuspa Diospa kamachisninpa contranpi oqharikojtin. Naciones Unidasqa 193 suyusniyoj. Chay tukuynin suyus ujchaykukojtinkupis Jehovapaj, cielopi ejercitosninpajpis chʼuspi jinalla kanqanku. Jehová nin: “Jatun kayniyta rikuchisaj, santo Dios kasqaytapis, ashkha nacionespa rikunankuta rejsichikusaj. Yachanqankutaj noqa Jehová Dios kasqayta”, nispa (Eze. 38:14-16, 23). Armagedón guerraqa qallarenqa Gog Diospa llajtanta chinkachiyta munajtin. Chay último maqanakuypi Jehová ‘jallpʼantinmanta reyesta’ chinkachenqa (Apo. 16:14, 16; 19:19-21). Chantá cheqan runaslla kay jallpʼapi tiyakonqanku, tukuy sonqo kasukojkunalla kay jallpʼapi qhepakonqanku (Pro. 2:21). w22.10 págs. 16, 17 párrs. 16, 17

Noqanchejqa mana yachayta atisunmanchu imachus runaspa sonqonkupi kasqanta. ‘Jehová Dioslla yachan imayna sonqowanchus imatapis ruwasqankuta’ (Pro. 16:2). Jehovaqa tukuy laya runasta munakun, maymanta kajtinkupis chayri imayna culturayoj kajtinkupis. Payqa “sonqoykichejta jatunta kichariychej” nispa kamachiwanchej (2 Cor. 6:13). Munanchej tukuy hermanosninchejta munakuyta, manataj juzgaytachu. Waj runastapis manallataj juzganchejchu. Mana testigoschu kanku chay familiaresninchejtaqa mana juzganchejchu, nitaj yuyanchejchu ni jaykʼaj testigoman tukunankuta. Chaytachus ruwashasunman chayqa jatunchakushasunman, wajkunamanta aswan cheqan runas kasqanchejtataj yuyakushasunman. Jehovaqa ‘tukuynejpi, tukuy runas’ arrepientekuyta atinankupaj tiempota qoshanraj (Hech. 17:30). Kayta amapuni qonqanachu: Jehovaqa wajkunamanta aswan cheqan runas kasqankuta yuyakojkunata, mana cheqan runasta jinachu qhawan. Jehovaj justicianta munakusun chayqa kusisqa kausakusun, wajkunapis noqanchej jina ruwayta munanqanku. Ajinamanta astawan munakuwasun, Diosninchejtapis astawan munakonqanku. w22.08 pág. 31 párrs. 20-22

Predicanchej chay runasmanta wakin churanakuwajtinchejqa mana tʼukunchejchu, qhepamanqa ichapis astawanraj churanakuwasun (Dan. 11:44; 2 Tim. 3:12; Apo. 16:21). Jinapis mana iskayrayanchejchu Jehová yanapanawanchejmanta. ¿Imajtintaj chayta ninchej? Jehovaqa ñaupa tiempopi kamachisninta yanaparqapuni ima llankʼaytachus qosqanta juntʼanankupaj, chay llankʼay mana atinapaj jina kajtinpis. Profeta Ezequielpa kausayninmanta wakin imasta qhawarina. Payqa Babiloniaman preso apasqa kaj judiosman predicarqa. Ezequiel predicanan karqa chay runas, ¿imaynataj karqanku? Jehovaqa chay judiosta nerqa “mana kasukoj”, “mana uyarikoj”, ‘kʼullu sonqoyojtaj’ kasqankuta. Paykunaqa khishkas jina sajras karqanku, alacranes jina peligrosostaj. Chayraykuchá Jehovaqa Ezequielman kutin kutita nerqa: ‘Ama manchachikuychu’, nispa (Eze. 2:3-6). Ezequieltaqa kay kinsa imas yanaparqa imatachus Jehová kamachisqanta juntʼananpaj: 1) Jehová payta kacharqa, 2) Jehová espíritu santonwan payta kallpacharqa, 3) Diospa Palabrantaj creeyninta astawan sinchʼiyacherqa. w22.11 pág. 2 párrs. 1, 2

Jehová kay jallpʼapi tukuy kausayniyojkunata ruwasqanmantaqa, runaslla mana wañunankuchu karqa. Paykunamanqa kay sumaj suyakuyta qorqa: Wiñaypaj kausakuyta atinankuta. Chantapis Jehovaqa wiñaypaj kausakuyta mayta munanapaj jina ruwawarqanchej. Biblia nin jina, Diosqa ‘runaspa sonqosninkuman wiñay kausayta churarqa’ (Ecl. 3:11). Chayrayku nisunman wañoyqa noqanchejpaj uj enemigo kasqanta (1 Cor. 15:26). Kaypi tʼukurina: Sinchʼita onqoykojtinchej, ¿jinallachu kakunchej? ¿Nichu imatapis ruwanchej? Mana, ¿icharí? Astawanpis doctorman rinchej, jampistapis tomanchej sanoyakunapaj. Arí, tukuy imata ruwanchej mana wañuyta munaspa. Chantapis uj munasqa familiarninchej wañupojtin, jovenpis machitupis kachun, mayta llakikunchej. Chay llakiyninchejtaj mana uj ratollapichu chinkapun (Juan 11:32, 33). Noqanchejqa yachanchej Ruwawajninchej Jehovaqa, mayta munakuwasqanchejta. Chayrayku manachus munaynin kanman karqa chayqa, mana wiñaypaj kausakuyta munanapaj jinachu ruwawasunman karqa. w22.12 pág. 3 párr. 5; pág. 4 párr. 7

Kay llakiy tiempopeqa ashkha hermanosninchej ichá onqosqas, mancharisqas chayri sapallanku kashanku. Tukuy atisqanchejta kallpachakuna hermanosninchejwan parlarinallapajpuni. Uj wañuchej onqoy kajtin, chayri uj onqoy tukuynejman chayajtin niña wajkunaman anchata qayllaykuyta atisunmanchu, ni hermanosninchejmanpis. Ajinapi rikukuspa apóstol Juan jina sientekusunman. Payqa amigon Gayowan uyapura parlarikuyta munarqa (3 Juan 13, 14). Jinapis pay nerqa amigon Gayowan uj tiempota mana tinkuyta atinanta. Chayrayku imatachus ruwayta aterqa chayta ruwarqa: Uj cartata apacherqa. Noqanchejpis hermanosninchejwan mana uyapura tinkuyta atispaqa, paykunata waj jinasmanta waturisunman. Hermanosninchejwan parlarillaspapuneqa mana sapallanchej kashasqanchejta yuyakunchejchu, sonqo tiyasqastaj kanchej. Sinchʼi llakisqas kashanchej chaytaj, ancianoswan parlarina, tukuy sonqotaj japʼikuna munakuywan yuyaychariwasqanchejta (Isa. 32:1, 2). w22.12 págs. 17, 18 párrs. 6, 7

Bibliaqa nillantaj uj tiempota Josej chakisninta, kunkantapis cadenaswan wataykusqankuta (Sal. 105:17, 18). Josej kausaynenqa aswan mana allinmanpuni tukorqa. De confianza esclavo kashaspa presomanñataj tukorqa. Maykʼajllapis ichá uj llakiypi rikukorqanchej. Chay llakiyninchejtaj Jehovamanta mayta mañakojtinchejpis aswan mana allinmanraj tukorqa. Chayqa pasanmanpuni. Kay mundo Satanaspa makinpi kashasqanrayku, Jehovaqa mana pruebasmanta jarkʼawanchejchu (1 Juan 5:19). Jinapis mana iskayrayasunmanchu Tatanchej Jehovaqa imaspichus rikukushasqanchejta sumajta qhawamushasqanmanta, maytataj noqanchejmanta llakikusqanmanta (Mat. 10:29-31; 1 Ped. 5:6, 7). Chantapis Jehovaqa niwanchej: “Mana jaykʼajpis saqerparisqaykichu. Nitaj jaykʼajpis wijchʼurparisqaykichu”, nispa (Heb. 13:5). Uj problemanchej nipuni allinyananpaj jinachu kaspa jinajtinpis, Jehovaj yanapayninwanqa aguantayta atinchej. w23.01 pág. 16 párrs. 7, 8

Biblia niwanchej Diosqa pantajtinchej mana wijchʼurparinawanchejta. Israelitasqa kutin kutita Jehovaj contranpi juchallikoj kanku. Jinapis tukuy sonqo arrepientekojtinku Jehovaqa perdonajpuni. Ñaupa tiempomanta cristianospis yachallarqankutaj Jehová paykunata mayta munakusqanta. Chay tiempopi uj runa jatun juchata ruwasqa, arrepientekusqataj. Jehovataj apóstol Pablota yuyaycharqa hermanosninta ninanpaj chay runata perdonanankuta, sonqochanankutataj (1 Cor. 5:1-5; 2 Cor. 2:6, 7). Jehovaqa kamachisnin pantajtinku mana wijchʼurparejchu. Astawanqa munakuywan paykunata yanapaj, cheqanchaj, payman kutinpunankutataj nej. Chayta yachaytaj mayta tʼukuchiwanchej. Payqa kay tiempopipis kikillantataj ruwananta nin pipis juchallikojtin, arrepientekojtintaj (Sant. 4:8-10). Bibliaqa yachachiwanchej Jehová cheqan kasqanta, yachayniyoj kasqanta, maytataj munakuwasqanchejta. Chantapis Bibliaqa sutʼita rikuchiwanchej Jehovaqa rejsinanchejta munasqanta, amigosnintaj kananchejta munasqanta. w23.02 pág. 7 párrs. 16, 17

¿Imajtintaj maytapuni yachayta munanchej mundo enteropi imaschus pasashasqan imaynatachus Bibliaj profeciasninta juntʼashasqanta? Ashkha razonesrayku. Por ejemplo, Jesusqa Satanaspa mundonpa tukukuynin qayllitapiña kashasqanta yachanapaj, ashkha imas pasananta nerqa (Mat. 24:3-14). Apóstol Pedropis Bibliaj profeciasnin juntʼakushasqanta reparanapaj, sumajta uyariyta yachananchejta niwarqanchej. Ajinamanta creeyninchej sinchʼillapuni kananpaj (2 Ped. 1:20, 21). Bibliaj profeciasninta ukhuncharishaspaqa maychus kajllata qhawananchej tiyan. Chaypajtaj apóstol Pedro yanapawanchej. Payqa niwanchej ‘Jehová Diospa pʼunchaynin chayamunanta ama qonqaspa’ suyanata (2 Ped. 3:11-13). ¿Imarayku? Mana Jehová ‘ima pʼunchaychus, ima horatajchus’ Armagedonta apamunanta yachayta munasqanchejraykuchu, manaqa tiempo kashajtillanraj ‘Diosta tukuy sonqo yupaychasqanchejta ruwasqasninchejwan rikuchiyta’ munasqanchejrayku (Mat. 24:36; Luc. 12:40). Munanchej allinta puriyta, Jehovapajtaj mayta munakusqanchejrayku imatapis ruwayta. Chaypajtaj noqanchej allinta qhawarikunanchej tiyan. w23.02 pág. 16 párrs. 4, 6

‘Waj ovejasmanta’ kajkunaqa, kunanña wakin imasta ruwashananku tiyan paraisopi kausakuyta atinankupaj. Jesusta munakusqanchejta rikuchinanchej tiyan. Chayta ruwasunman ajllasqa hermanosninta imaynatachus yanapasqanchejwan. Jesusqa nerqa chayman jina ninanta pikunachus ovejaswan ninakusqankuta (Mat. 25:31-40). Paykunata yanapanchej tukuy sonqo predicaspa, runastapis Jesuspa discipulosninman tukuchispa (Mat. 28:18-20). Imayna runastachus Jehová paraisopi kausakunankuta munan chay jina runas kanapajqa, mana paraisokamachu suyananchej tiyan. Kunanmantapachaña kallpachakusunman honrados kanapaj, mana llullakunapaj, munayninchejwan mana atipachikunapajpis. Chantapis Jehovata, qosanchejta chayri warminchejta, hermanosninchejtapis mana wasanchanachu. Sichus kay sajra mundopi kausakushaspaña Diospa kamachiykunasninta kasukunapaj tukuy atisqanchejta kallpachakusun chayqa, paraisopeqa aswan facilta kasukuyta atisun. Chantapis kallpachakusunman wakin imasta ruwayta yachakunapajña, aswan kʼacha cristianos kanapajpis. Chaytaj rikuchenqa paraisopi kausakunapaj wakichikushasqanchejtaña. w22.12 págs. 11, 12 párrs. 14-16

Jesusqa pimanta nisqapis may sumaj kamachejpuni. Chayrayku Reyninchej kasqanmanta mayta kusikunchej. Jehovapuni paytaqa Rey kananpaj wakicherqa, churarqataj (Isa. 50:4, 5). Chantapis piensarina maytapuni Jesús munakuwasqanchejpi, nitaj chaymanta imatapis mañawasqanchejpi (Juan 13:1). Jesús Reyninchej kasqanrayku, tukuy sonqo payta munakunanchej tiyan. ¿Imaynatá tukuy sonqo munakusqanchejta rikuchisunman? Payllataj nerqa payta munakojkunaqa kamachiykunasninta kasukunankuta (Juan 14:15; 15:14, 15). Jehovaj Wawanpa amigosnin kaytaj, may sumajpuni. Jesusqa kʼumuykukoj sonqo, tukuy imapitaj Tatan jinapuni. Chantapis yachakorqanki Jesusqa yarqhachikojkunata mikhuchisqanta, llakisqasta sonqochasqanta, onqosqastapis sanoyachisqanta (Mat. 14:14-21). Chantapis qanpuni rikunki Jesusqa Diospa llajtanta kay tiempopi ñaupajman apashasqanta (Mat. 23:10). Yachankitaj Diospa Gobiernonmanta Rey kasqanrayku, Jesusqa aswan qhepaman noqanchejpaj sumaj imasta ruwananta. Chanta, ¿imaynatá Jesusta munakusqaykita rikuchiwaj? Pay jina ruwaspa. Chaypaj, ¿imatá ñaupajta ruwanayki tiyan? Jehovaman kausayniykita qopuy, bautizakuytaj. w23.03 pág. 4 párrs. 8, 10

Jehovaqa mana cielollapichu tʼukuna imasta ruwarqa, manaqa kay jallpʼapipis mar qochapipis. Chaykunata qhawarispataj Jehovamanta ashkha imasta yachakusunman (Sal. 104:24, 25). Chantapis piensarina imaynatachus Jehová ruwawasqanchejpi. Payqa tukuy ima ruwasqasninta qhawarispa kusirikunapaj jina ruwawarqanchej. Chantapis Jehovaqa ruwawarqanchej rikuyta atinapaj jina, uyariyta atinapaj jina, sienteyta atinapaj jina, mikhusqanchejwan miskʼirichikunapaj jina, muskhiyta atinapaj jina. Ajinata ruwawasqanchejraykutaj tukuy ima ruwasqanwan kusirikuyta atinchej. ¿Imaraykutaj Jehovaj ruwasqasninta sumajta qhawarinallanchejtaj tiyan? Imaraykuchus Jehovaj kʼacha kaykunasninta aswan sumajta rejsinapaj yanapawanchej (Rom. 1:20). Por ejemplo Jehovaj ruwasqasninta qhawarispa, reparanchej imayna kʼachitutapunichus tukuy imata ruwasqanta. Chaytaj yachachiwanchej payqa may yachayniyojpuni kasqanta. Chantapis piensarina may chhika mikhunasta mikhurispa kusirikuyta atisqanchejpi. Chayqa rikuchiwanchej Jehová munakuwasqanchejta. Paypa ruwasqasninpi kʼacha kaykunasninta reparayqa, yanapawanchej payta astawan rejsinapaj, paymantaj astawan qayllaykunapaj. w23.03 pág. 16 párrs. 4, 5

Kay mundoqa aswan mana allinman tukonqa, cheqa kajpi creesqanchejtaj pruebaman churasqa kanqa. Noqanchejqa yachanchej Bibliaqa cheqa kajtapuni yachachisqanta, allin kamachi yuyayniyojtataj Jehová churasqanta llajtanta pusananpaj. Runastaj chaymanta iskayrayachiyta munawasunman. Sichus noqanchej Diospa Palabran cheqanpuni kasqanmanta seguros kashanchej chayqa, mana chay nisqankuta kasusunchu. Chantapis Jehovaj kamachiykunasninta ‘wañunanchejkama wiñaypaj’ kasukusunpuni (Sal. 119:112). ‘Mana pʼenqakusunchu’ wajkunaman cheqa kajmanta willariyta, Bibliaj yuyaychaykunasninman jina kausakunankupajpis yanapariyta (Sal. 119:46). Chantapis “pacienciawan, kusiywantaj” aswan sinchʼi pruebasta aguantayta atisun, qhatiykachasqa kaytapis (Col. 1:11; Sal. 119:143, 157). Kay mundopeqa diamanta día astawan chʼajwaslla tiyan, runastaj má yachankuchu imatachus ruwanankuta. Noqanchejtatajrí cheqa kaj yanapawanchej sonqo tiyasqa kanapaj, imatachus kausayninchejwan ruwanata yachanapaj, allintataj kausakunapaj. Chantapis cheqa kajta yachasqanchejrayku Diospa Gobiernon kamachishajtin allin kausay kananta suyakushanchej. w23.01 pág. 7 párrs. 16, 17

Jesusqa wañupunan chʼisi ñaupajta unayta discipulosninpaj mañaporqa, Tatan paykunata ‘Diablomanta jarkʼananpaj’ (Juan 17:15). Chaytaj rikucherqa Jesús mayta paykunata munakusqanta. Payqa tumpamantawan sinchʼita ñakʼarinanta yachaspapis, discipulosninmanta llakikullarqapuni. Noqanchejpis Jesús jinallataj mana imatachus necesitasqallanchejpichu yuyanchej, manaqa hermanosninchejpajpis mañapunchejpuni. Chayta ruwaspaqa Jesús purajmanta munanakunanchejta kamachisqanta kasukushanchej, Jehovamantaj rikuchishanchej hermanosninchejta mayta munakusqanchejta. Hermanosninchejpaj mañapusqanchejqa mana qhasichu. Bibliaqa nin “cheqan runaj mañakuynenqa manchay atiyniyoj” kasqanta (Sant. 5:16). Hermanosninchejqa imaymana llakiykunata aguantanku. Chayrayku necesitanku paykunapaj mañapunanchejta. w22.07 pág. 23 párrs. 13-15