Julio

Jehovaqa parlayta atinapaj jina ruwawarqanchej. Pisi tiemponmanqa Evaman Satanás llulla imasta nerqa. Chayrayku runasqa juchallikunchej, pantaj runastaj kanchej (Gén. 3:1-4). Adanqa Evata, Jehovata ima juchacharqa pay pantaykuspapis. Ajinamanta mana allintachu parlarqa (Gén. 3:12). Caintaj hermanon Abelta wañuchiytawan Jehovaman llullaykukorqa (Gén. 4:9). Kunan tiempopis casi tukuy peliculaspi millay palabrasta uyarikun. Chay jina palabrasllatataj wawaspis escuelankupi uyarinku, kuraj runastaj trabajonkupi. Ichapis yachaykukusunman millay palabrasta uyariyman. Mana sumajta qhawarikuspataj ichá noqanchejpis kikinta parlayta qallarisunman. Cristianosqa Jehovata kusichiyta munasqanchejrayku ni imarayku millay palabrasta parlanchejchu. Astawanpis kallpachakunchej allinta parlasqanchejwan Jehovata jatunchanapaj. w22.04 pág. 4 párrs. 1-3

Jesusqa kapuyniyoj kaymanta maychus kajllata yuyaj. Payqa sumajta mikhurikoj, ujyarikojpis (Luc. 19:2, 6, 7). Ñaupaj kaj milagronta ruwashaspaqa yakuta sumaj vinoman tukucherqa (Juan 2:10, 11). Wañucherqanku chay diapis may valesqa ropayoj kasharqa (Juan 19:23, 24). Jinapis mana kapuyniyoj kaytachu astawan maskʼarqa. Jesusqa yachacherqa Diospa Gobiernonta ñaupajta maskʼajtinchej, Jehovaqa imatachus necesitasqanchejta qonawanchejta (Mat. 6:31-33). Jehovaqa imaynatachus qolqeta qhawanamanta sumajta yuyaychawanchej. Ashkha hermanostaj chaywan yanapachikorqanku. Hermanonchej Danielmanta parlarina. Payqa soltero, nintaj: “Jovencitomantapacha Jehovata sirviyta ñaupajman churanayta nerqani”, nispa. Danielqa mayta kallpachakorqa pisi imasllawan kausakunanpaj. Chayrayku imastachus ruwayta yachasqanwan Diospa llajtanpi yanapakuyta aterqa. Pay nillanpuni: “Jehová may chhika bendicionesta qowasqantaqa, ni mashkha qolqewanpis rantiyta atiymanchu”, nispa. w22.05 págs. 21, 22 párrs. 6, 7

Cheqa kajta munakusqanchejta rikuchisunman Bibliata, publicacionesninchejtapis estudiaspallapuni. Unayña testigos kajtinchejpis manapis, mosoj imasta yachakullanchejpuni. Bibliata estudianapajqa mayta kallpachakuna tiyan, chayta ruwaytaj mayta yanapawanchej. Leeypis estudiaypis mana tukuymanchu gustawanchej. Jinapis Jehovaqa niwanchej yachayninta ‘maskʼanallanchejtapuni’, ajinamanta cheqa kajta aswan sumajta entiendenanchejpaj (Pro. 2:4-6). Tukuy atisqanchejta chayta ruwayqa mayta yanapawasun. Corey sutiyoj hermanoqa Bibliata leeshaspa uj versiculota sumajta ukhunchan. Pay nin: “Chay versiculoj sutʼinchaykunasninta leeni, referencias marginalesta maskʼani, chay versiculomanta waj imastawan maskʼani. Ajinamanta ashkha imasta yachakuni”, nispa. Chay hermano jina estudiaspapis chayri waj jinamanta estudiaspapis, Bibliata estudianapaj tiempochakusun, kallpachakusuntaj chayqa, cheqa kajta may valorniyojpaj qhawasqanchejta rikuchisun (Sal. 1:1-3). w22.08 pág. 17 párr. 13; pág. 18 párrs. 15, 16

Jesusqa kay jallpʼapi kashaspa, Diospa ruwasqasninwan Tatanmanta ashkha imasta yachachisqasninman yachacherqa. Chaykunamanta ujta qhawarina. Jehovaqa tukuyman munakuyninta rikuchin. Jesusqa Orqopi Yachachishaspa, discipulosninman parlarqa intimantawan paramantawan. Chaykunataqa kausanapaj necesitanchejpuni. Jinapis ashkha runasqa mana chay imaspi tʼukuriyta yachankuchu. Jehovaqa munakuyniyoj kasqanrayku tukuypaj intita llojsichimun, parachimunpis, payta mana sirvejkunapajpis (Mat. 5:43-45). Jesusqa chay iskay imasmanta parlaspa discipulosninman yachacherqa, Jehovaqa tukuy runasta munakunanchejta munasqanta. Inti chinkaykapushajtin kʼachituta cielo pukayarisqanta rikuspa, chayri chhulla parita frescariwajtinchej, piensarina Jehovaj munakuyninpi, tukuytataj uj rejllata qhawasqanpi. Jehová ajina kasqanqa, sonqonchejta aysanman tukuyman predicaspa ajina munakuyllatataj rikuchinapaj. w23.03 pág. 17 párrs. 9, 10

Apóstol Juanqa uj warmita uj millay phiña animalpa patanpi tiyasqata rikorqa. Chayta rikuspataj ‘maytapuni tʼukorqa’. Chay warmeqa ‘atiyniyoj khuchi warmi’, sutintaj “Jatun Babilonia”. Payqa “jallpʼamanta reyeswan khuchichakuy juchapi purin” (Apo. 17:1-5). ¿Pitaj “Jatun Babilonia”? Kay warmeqa mana gobiernoswan ninakunmanchu. Imajtinchus Apocalipsis libroqa nin jallpʼamanta reyeswan khuchichakusqanta, nisunman gobiernoswan (Apo. 18:9). Chay warmi uj puka millay phiña animalpa patanpi tiyasqa kasqanqa, niyta munan gobiernosta munayninta ruwachiyta munasqanta. Chay khuchi warmeqa nillataj kay mundomanta comercianteswanpis ninakunmanchu. Imajtinchus Apocalipsis libropeqa, waj partepi paykunamanta parlan, sutichantaj ‘jallpʼapi kaj comerciantes’, nispa (Apo. 18:11, 15, 16). Ñaupa tiempomanta Babilonia llajtaqa, llulla religionesmanta juntʼa karqa. Chayrayku Jatun Babiloniaqa, tukuy llulla yupaychaykunawan ninakun. Imajtinchus Jatun Babiloniapeqa kay mundomanta tukuynin llulla religiones kashanku (Apo. 17:5, 18). w22.05 pág. 11 párrs. 14-16

Mamasqa wakin kutis llakikunkupuni wawasninku Jehovata sirvinankumantachus manachus. Jinapis tatasqa sumajta yachanku, wawasninku Satanaspa mundonpi sajra imasta ruwayman tanqasqas kanankuta. Mana chayllachu, ashkha mamasqa sapallanku wawasninkuta uywanku chayri paykunaj qosasninkoqa mana testigoschu kanku. Chaywanpis mana sapallanku Jehovata sirvej tatamamasllachu Eunice jina rikukunku, manaqa qhariwarmi Jehovata sirvejkunapis. Qanpis ajinapi rikukunki chayqa ama llakikuychu, Jehová yanapasonqa. Chantapis waj tatasta tapurikuwaj imaynatachus familiaspaj yanapaswan familiapi Diosta yupaychanapaj tantakuyta ruwasqankuta (Pro. 11:14). Jehovamanta yanapata mañakuy wawasniykiwan allinta parlarinaykipaj. Ajinamanta yachanki imatachus paykuna yuyasqankuta, imaynachus kashasqankutapis (Pro. 20:5). w22.04 pág. 17 párrs. 4, 7; pág. 18 párr. 9

Jehovataqa astawan munakusunman Wawanta aswan sumajta rejsispa. Payqa Tatan jinapuni imatapis ruwan (Heb. 1:3). Jesustaqa aswan sumajta rejsisunman Mateo, Marcos, Lucas, Juan librosta estudiaspa. ¿Yachasqachu kanki sapa día Bibliata leeyman? Manaraj yachasqachu kanki chayqa, kunanmantapacha qallariwaj. Jesuspa ruwasqasninmanta, nisqasninmanta leeshaspataj imaynachus kasqanpi piensariwaj. Jesusqa qayllaykunapaj jinalla karqa, wawitastapis marqʼarikorqa (Mar. 10:13-16). Payqa may kʼacha karqa. Chayrayku discipulosnenqa mana manchachikuspa imatachus yuyasqankuta niyta atillaj kanku (Mat. 16:22). Jesusqa ajina karqa Tatan Jehovapuni qayllaykunapaj jina kasqanrayku. Chayrayku Diosmanta mañakuyta atinchej, imachus sonqonchejpi kasqantataj willakuyta atinchej. Yachanchejtaj chayta willakojtinchej Jehovaqa mana juzganawanchejta. Payqa munakuwanchej, noqanchejmantataj llakikun (1 Ped. 5:7). w22.08 pág. 3 párrs. 4, 5

Jehovaqa ruwawajninchej kasqanrayku sumajta rejsiwanchej. Kaypi tʼukurina: Payqa tukuy imitatapuni sapa runamanta yachan (Sal. 139:15-17). Jehovaqa yachan tatasninchej pantaj runas kasqankurayku noqanchejpis pantaj runasllataj kasqanchejta. Chantapis yachan imaraykuchus sapa ujpis waj jina caracterniyoj kasqanchejta. Runasta ajina sumajta rejsiwasqanchejrayku khuyakuwanchej (Sal. 78:39; 103:13, 14). Jehovaqa rikuchiwanchejña perdonaytapuni munawasqanchejta. Payqa yachan Adán juchallikusqanrayku tukuyman juchapis wañuypis chayawasqanchejta (Rom. 5:12). Noqallanchejmantaqa nipuni kacharichikuyta atisunmanchu juchamanta, wañuymantapis, nillataj wajkunatapis kacharichisunmanchu (Sal. 49:7-9). Munakuyniyoj Diosninchejtaj khuyakuwasqanchejrayku kacharichiwarqanchej. Juan 3:16 versiculopi nin, Jehovaqa kʼata Wawanta kachamusqanta noqanchejrayku wañunanpaj (Mat. 20:28; Rom. 5:19). w22.06 pág. 3 párrs. 5, 6

Perdonajkunaqa perdonasqallataj kanqanku. Jehovaqa kamachin Jobman chayman rijchʼakojllatataj nerqa. Elifaz, Bildad, Zofarpis parlasqankuwan maytapuni Jobpa sonqonta nanacherqanku. Jehovataj Jobta nerqa paykunapaj mañapunanta. Job chayta ruwajtintaj Jehová bendicerqa (Job 42:8-10). Phiñasqallapuni kayqa noqallanchejpajtaj mana allinchu. Phiñasqallapuni kayqa uj llasa qʼepi jina. Jehovataj munan amaña chay llasa qʼepita qʼepinanchejta (Efe. 4:31, 32). Jehová niwanchej: “Ama rabiakuychu, nitaj phiñakuychu”, nispa (Sal. 37:8). Chayta kasukoyqa allinnillanchejpajtaj, imajtinchus phiñasqallapuni kaspaqa onqoykusunman (Pro. 14:30). Wajpaj phiñasqallapuni kajtinchejqa mana paychu sufrenqa, imaynatachus venenota tomaykuspa noqallanchejtaj sufrinchej ajinata. Chayrayku wajkunata perdonaspaqa, noqallanchejpajtaj allin kajta tarinchej, sonqo tiyasqa kanchej, Jehovatapis sirviyta atillanchejpuni. w22.06 pág. 10 párrs. 9, 10

Suyakuyninchejqa uj montera jina yuyayninchejta jarkʼan, yanapawanchejtaj mana munayninchejman jinalla kausanapaj. Imaraykuchus chay jina kausayqa Jehovamanta karunchawasunman (1 Cor. 15:33, 34). Suyakuyninchejqa jarkʼallawanchejtaj ama yuyanapaj Jehovata kusichinapaj kallpachakusqanchej qhasilla kasqanta. Yuyarikuna Jobpa mana allin amigon Elifazmanta. Payqa Jobta nerqa: “¿Imataj runa kasqa llimphu kausayniyoj kananpajri?”, nispa. Chantá nillarqataj: “Diosqa ni angelesninpipis atienekunchu. Qhawayninpeqa ni cielopis llimphuchu”, nispa (Job 15:14, 15). Chayqa allin llullapuni. Satanás munan ajinata yuyananchejta. Payqa yachan ajinata yuyajtillanchejpuneqa suyakuyninchej pisiyananta. Chayrayku ama chay llullapi creenachu. Kaymantaqa ni jaykʼaj iskayrayanachu: Jehovaqa munan tukuynin kamachisnin wiñaypaj kausakunanchejta, chaypajtaj yanapawasunpuni (1 Tim. 2:3, 4). w22.10 págs. 25, 26 párrs. 8-10

Satanasqa Jobta creechiyta munarqa Jehová niña allinpaj qhawasqanrayku sufrishasqanta. Jobpa 10 wawasnenqa uj wasipi khuska mikhusharqanku. Satanastaj sinchʼi wayrawan chay wasita urmaykucherqa (Job 1:18, 19). Chantapis cielomanta ninata urmachimuspa, Jobpa uywasninta, kamachisnintapis ruphaykucherqa (Job 1:16). Ninawan wayrawan cielomanta jamusqanrayku, Jobqa yuyarqa Jehovapuni chayta apachimusqanta. Chayrayku yuyarqa Jehovata phiñachisqanta. Chaywanpis Jobqa mana Tatan Jehovata maldeciyta munarqachu. Astawanpis yuyarikorqa Jehová may chhika watastaña payman ashkha allin imasta qosqanta. Chayrayku nerqa mana allin imasllatachu Jehovamanta kusiywan japʼikunanta, manaqa mana allin kajtapis japʼikunallantataj. Payqa nerqa: “Jehová Diospa sutenqa jatunchasqallapuni kachun”, nispa (Job 1:20, 21). w22.06 pág. 21 párr. 7

Aswan qhepaman Jesusqa Juan 17:14 versiculopi nillarqataj discipulosnin chejnisqa kanankuta. Ajinapunitaj kasqanta reparanchej, astawanraj kay qhepa pachaj wataspi. ¿Imaynamanta? Jesusqa 1914 watapi Diospa Gobiernonmanta Rey jina churasqa karqa. Pisi tiemponmantaj Satanasta cielomanta wijchʼumorqa. Diabloqa kay jallpʼaman wijchʼuchikamusqanrayku, kay jallpʼallapiña imatapis ruwayta atin, chinkachisqa kayllatañataj suyashan (Apo. 12:9, 12). Jinapis mana jinallachu suyashan. Satanasqa may phiñasqa kasqanrayku tukuy imata ruwashan, phiñakuynintataj Diospa llajtanwan pagachikushan (Apo. 12:13, 17). Chayrayku Satanaspa mundonmanta runasqa astawan chejnikuwanchej. Jinapis mana manchikunanchejchu tiyan ni Satanastapis ni payta qhatejkunatapis. Astawanpis apóstol Pablo jinallataj niyta atinchej. Pay nerqa: “Sichus Dios noqanchejwan kashan chayqa, ¿pitaj contranchejpi kayta atinmanri?”, nispa (Rom. 8:31). Chayrayku Jehová Diospi astawan atienekuyta atinchej. w22.07 pág. 18 párrs. 14, 15

Jesusqa mana iskayrayarqachu kay mundoj imasninpa tukukuynin tiempopi ashkha willajkuna kananmanta. Payqa yacharqa salmista kayta nisqan juntʼakunantapuni: “Soldadosniykita guerraman pusanki chay pʼunchaypi, kamachisniykeqa wakichisqa kanqanku yanapakunankupaj” (Sal. 110:3). Noqanchejpis sumaj willaykunata willashanchej chayqa, Jesustawan allin kamachi yuyayniyojtawan yanapakushanchej, chay profeciatataj juntʼashanchej. Sumaj willaykunata willakushajtillanpunipis, wakin kuteqa mana facilchu. Diospa Gobiernonmanta willajkunamanqa runas churanakunku. Diospa contranta oqharikojkuna, religionesta kamachejkuna, politicospis predicacionmanta llullasta parlanku. Sichus familiaresninchej, rejsisqasninchej, trabajomanta compañerosninchej chay llullasta creenkuman chayqa, Jehovata sirviyta, predicaytapis saqechiyta munawasunman. Wakin nacionespi enemigosninchejqa manchachiyta munawasunman, imata ruwaykunawanchejta niwasunman, presochawasunman chayri carcelmanpis wisqʼaykuwasunman. w22.07 pág. 8 párr. 1; pág. 9 párrs. 5, 6

Jehovaqa munan sapa día Bibliata estudiananchejta, leesqanchejpitaj tʼukurinanchejta. Yachakusqanchejman jina kausakojtinchejqa creeyninchej astawan sinchʼiyanqa, Jehovamantaj astawan qayllaykusun. Chaytaj kallpata qowasun aguantanapaj. Chantapis Palabranpi atienekusun chayqa, Jehová espíritu santonta qowasun. Chay espirituntaj ima pruebatapis aguantanapaj ‘sumaj atiyta’ qowasun (2 Cor. 4:7-10). ‘Allin kamachi yuyayniyojqa’ Jehovaj yanapayninwan ashkha yachaqanasta, videosta, takiykunata ima qowanchej. Chaykunataj yanapawanchej sinchʼi creeyniyoj kanapaj, Jehovaj qayllallanpipunitaj kanapaj (Mat. 24:45). Jehovaqa kamachisninman yachachin purajmanta munanakuyta, llakiy tiempospitaj purajmanta sonqochanakuyta (2 Cor. 1:3, 4; 1 Tes. 4:9). Hermanosninchejqa llakiykunapi kashajtinchej, creeypi sinchʼi sayasqallapuni kanapaj yanapariwanchej. w22.08 pág. 12 párrs. 12-14

Hermanospa allin ruwasqasninkumanta parlana. Ajinamanta hermanosta yanapasun astawan munanakunankupaj, aswan sumaj amigostaj kanankupaj. Wiñay tukusqa cristianospis wakin kutisqa mana de acuerdo churakuyta atillankumanchu, chayri phiñanakunkuman ima. Chay pasarqa apóstol Pablotawan Bernabetawan, sumaj amigos kajtinkupis. Misioneros jina ujtawan viajananku kashajtin, ujqa Marcosta pusayta munarqa, ujnintaj mana. “Chayrayku paykunapura sinchʼita phiñanakuspa tʼaqanakorqanku” (Hech. 15:37-39). Jinapis Pablo, Bernabé, Marcos imaqa allinyakaporqanku. Aswan qhepamantaj Pabloqa Bernabemanta, Marcosmantapis allinta parlarqa (1 Cor. 9:6; Col. 4:10). Noqanchejpis congregacionmanta mayqen hermanollawanpis phiñasqa kashanchej chayqa, allinyakapuna, allin imasta ruwasqantataj reparayta yachana. Ajinamanta congregacionpi tukuywan allinpi, ujchasqataj kasunchej. w22.08 pág. 23 párrs. 10, 11

Jehovaj cheqan kamachiykunasninman jina kausakunapaj kallpachakojtinchejpis, mana wajkunata juzgananchejchu tiyan, nitaj yuyananchejchu tiyan paykunamanta aswan cheqan runas kasqanchejta. Yuyarikuna tiyan Jehovalla “jallpʼantinmanta Juez” kasqanta (Gén. 18:25). Diosqa mana noqanchejtachu jueces kanapaj churawanchej. Josemanta parlarina. Payqa cheqan kajtapuni ruwarqa. Joseqa mana wajkunata juzgarqachu, mayta ñakʼarichejtinkupis. Paytaqa hermanosnillantaj mayta sufricherqanku, esclavota jina vendeykorqanku, tatanmanpis wañupusqanta creeykucherqanku. Ashkha watasninmantaj Joseqa watejmanta paykunawan tinkorqa. Chaypacha payqa atiyniyoj kamachejña kasqanrayku, hermanosninta mana khuyarikuspa juzgayta atinman karqa, vengakuytapis. Hermanosnintaj chayta ruwanantapuni manchachikorqanku, imatachus payta ruwasqankumanta mayta arrepientekuspañapis. Josetajrí paykunata nerqa: “Ama chaymantaqa manchachikuychejchu. ¿Noqaqa Dioschu kasqani imatajri?”, nispa (Gén. 37:18-20, 27, 28, 31-35; 50:15-21). Joseqa kʼumuykukoj sonqo karqa, repararqataj Jehovalla hermanosninta juzgananpaj derechoyoj kasqanta. w22.08 pág. 30 párrs. 18, 19

¿Yacharqankichu? Jehovaqa uj hermano rogakuspa mañakusqanman qannejta kutichiyta atin. Chaytataj ruwan ancianos, siervos ministeriales, precursores, publicadores, jóvenes, mayorcitos, qharis chayri warmis kajtinchejpis. Sichus pillapis Jehovata munakun, yanapantataj mañakun chayqa, Diosninchejqa ashkha kutispi ancianosnejta chayri waj kamachisninnejta ‘mayta sonqochan’ (Col. 4:11). Ajinata Jehová Diosninchejta, hermanosninchejtapis sirveyqa may sumajpuni. Chaytataj ruwayta atinchej uj wañuchej onqoy rikhurejtin, kaymanta jinalla ima llakiypis kajtin chayri qhatiykachasqa kajtinchej. Ichapis mayta munasunman wajkunata yanapariyta. Chaywanpis mana atisunmanchu familianchejpis sufrishasqanrayku. Jinapis hermanosninchejta yanapariytapuni munasqanchejta rikuspa, Jehovaqa mayta kusikun (Pro. 19:17). w22.12 pág. 22 párrs. 1, 2

Munakoyqa uj cimiento jina de confianza kanapaj. Jesusqa nerqa aswan kuraj kamachiykunaqa iskay kasqankuta: Jehovata munakuy, runa masinchejta munakuy ima (Mat. 22:37-39). Jehovata munakusqanchejrayku pay jina kayta munanchej. Jehová jinaqa ni pi aswan de confianza kanchu. Hermanosninchejta munakusqanchejraykutaj, imatachus willariwasqanchejta mana wajkunaman willaranchejchu. Amapuni paykunamanta imatapis wajkunaman willaranachu sonqonkuta nanachinapaj jina kajtin, chayri pʼenqachinapaj jina kajtin. Kʼumuykukoj sonqo kayqa de confianza kanapaj yanapawasun. Kʼumuykukoj sonqo cristianoqa mana imatapis payrajpuni ñaupajta willarqoyta munanqachu wajkunawan allinpaj qhawachikunanrayku (Fili. 2:3). Manallataj wajkunata yuyachenqachu pay tukuy imata yachasqanta, nitaj chayta wajkunaman willayta atisqanta. Bibliapi, publicacionesninchejpipis wakin imasmantaqa mana parlanchu. Kʼumuykukoj sonqo kanchej chaytaj, imastachus chaykunamanta yuyasqanchejta mana wajkunaman willasunchu. w22.09 pág. 12 párrs. 12, 13

Uj angelqa Danielman nerqa, Diospa llajtanqa Daniel libromanta profeciasta aswan sumajta entiendenanta. Jinapis “ni mayqen sajra runapis kay imasta entiendenqachu” (Dan. 12:10). Kunan tiempo kashan rikuchinapaj mana sajra runas partechu kasqanchejta (Mal. 3:16-18). Jehovaqa paypata kajkunata tantashan ‘sumaj llajtan’ kanankupaj. Noqanchejpis paykuna ukhupi kayta munanchej. Kay tiempopeqa tʼukuna imasta rikushanchej, aswan qhepamantaj aswan tʼukuna imasraj kanqa. Tukuy sajra imas chinkachisqa kanqa chay pʼunchay qayllaykamushanña. Chay pasaytataj rikusunchej imaynatachus juntʼakonqa imatachus Jehová Danielman nisqan. Pay nerqa: “Tukukuy pʼunchaykunapi sayarimunki imachus chayasusqanta japʼinaykipaj”, nispa (Dan. 12:13). Maytachá munashanchej Danielwan, wañuporqanku chay munasqa familiaresninchejwan kausarimonqanku chay pʼunchay chayamunallantaña, ¿icharí? Jina kajtenqa tukuy atisqanchejta kallpachakuna Jehovata kasukunallapajpuni. Ajinamanta sutinchejqa Jehovaj kausay libronpi qhelqasqa qhepakonqa. w22.09 pág. 24 párr. 17; pág. 25 párrs. 19, 20

Jehová chayta nisqanqa maytachá Ezequielta kallpacharqa. Payqa yuyarikorqachá Jehovaqa Moisestawan Isaiastawan profetasnin kanankupaj ajllashaspa, chayman rijchʼakullajtataj nisqanta (Éxo. 3:10; Isa. 6:8). Ezequielqa yacharqa Jehovaqa chay profetasninta, mana atinapaj jina ruwaykunata juntʼanankupaj yanapasqanta. Chayrayku Jehová iskay kutispi “kachashayki” nispa nejtin, payqa yacharqa Jehová yanapanantapuni. Chantapis Ezequielqa qhelqasqan libropi ashkha kutista kayta nerqa: “Jehová Diosqa kayta niwarqa”, nispa (Eze. 3:16). Ashkha kutispi qhelqallarqataj: “Watejmanta Jehová Diosqa niwarqa”, nispa (Eze. 6:1). Arí, Ezequielqa mana iskayrayarqachu Jehovapuni payta kachasqanmanta. Chantapis tatanqa sacerdote karqa, payqa yachacherqachá Jehovaqa profetasninman yanapanantapuni nisqanta. Jehovaqa Isaacman, Jacobman, Jeremiasman ima nisqa: “Noqa qanwan kashani”, nispa (Gén. 26:24; 28:15; Jer. 1:8). w22.11 pág. 2 párr. 3

Adanwan Evawan juchallikusqankurayku, tukuy wawasnin wañuyta herenciata jina japʼinchej. Jinapis Jehovaqa munayninta mana cambiarqachu (Isa. 55:11). Payqa munashallanpuni kasukoj runas wiñaypaj kausakunankuta. Qhawarina imastachus Jehová nisqanta, ruwasqanta ima munayninta juntʼananpaj. Jehovaqa ninña wañusqasta kausarichimunanta, wiñaypajtaj kausakuyta atinankuta (Hech. 24:15; Tito 1:1, 2). Jobqa sutʼita yacharqa Jehovaqa wañusqasta mayta kausarichiyta munashasqanta (Job 14:14, 15). Profeta Danielpis yacharqa runasqa kausarimunankuta, wiñaypajtaj kausakuyta atinankuta (Sal. 37:29; Dan. 12:2, 13). Jesuspa tiemponmanta judiospis, yachallarqankutaj Jehovaqa cheqa sonqo kamachisninman “wiñay kausayta” qonanta (Luc. 10:25; 18:18). Jesusqa ashkha kutispi kausarimuy kananmanta parlarqa, paytapis Tatan kausarichimorqa (Mat. 19:29; 22:31, 32; Luc. 18:30; Juan 11:25). w22.12 págs. 4, 5 párrs. 8, 9

Jehovaqa niwanchej payman qayllaykunanchejta (Sant. 4:8). Payqa munan Diosninchej, Tatanchej, amigonchejtaj kayta. Mañakusqanchejman kutichiwanchej, problemasniyoj kajtinchejtaj yanapawanchej. Chantapis llajtannejta yachachiwanchej, cuidawanchejtaj. Jehovaman qayllaykusunman orakuspa, Palabranta leespa, chaypitaj tʼukurispa. Chayta ruwaspaqa payta astawan munakusun, agradecekusuntaj. Chantapis payta kasukuyta, jatunchaytataj munasunchej, paylla chaypaj jina kasqanrayku (Apo. 4:11). Jehovata astawan rejsispaqa paypi astawan atienekusun, jinallataj llajtanpipis, mayqentachus cuidanawanchejpaj churan. Diabloqa tukuy imata ruwan pisimanta pisi Jehovapi, llajtanpipis niña atienekunanchejpaj. Jinapis Diabloj contranpi sayaykuyta atinchej. Sichus sinchʼi creeyniyoj kasun chay, Jehovapitaj tukuy sonqo atienekusun chay, mana paymanta, nitaj llajtanmantapis tʼaqakusunchu (Sal. 31:13, 14). w22.11 pág. 14 párrs. 1-3

Ashkha cristianosqa, Tukuyta Kamachej Reyninku Jehovata munakusqankurayku carcelpi wisqʼasqa karqanku, kausayninkutapis wañuy pataman churarqanku. Chay cristianosqa Jehovata tukuy sonqo kasukullaytapuni munanku. Paykunaqa kinsa hebreos jina kanku, pikunachus laurashaj hornomanta salvakorqanku, Patapi kaj Diosta kasukusqankurayku. Davidqa yacharqa Jehovata tukuy sonqo kasukuy may importante kasqanta. Pay qhelqarqa. “Jehová Diosqa tukuy runasta juzganqa. Jehová Diosníy, justiciata ruwapuway cheqan kajta ruwasqayman jina, mana juchayoj kasqayman jinataj”, nispa (Sal. 7:8). Nillarqataj: “Mana juchachana kasqaypis cheqan kasqaypis waqaychawachun”, nispa (Sal. 25:21). Sumajta, kusisqataj kausakunapajqa Jehovata tukuy sonqo sirvinallapuni. Ajinamanta salmista jina nisun: “Kusisqamin kanku […] mana juchayoj purejkuna [chayri tukuy sonqo kasukojkuna], Jehová Diospa leyninpi purejkuna” (Sal. 119:1). w22.10 pág. 17 párrs. 18, 19

Jobpajqa tukuy kausayninpi wajkunawan parlarisqasninmanta, Jehovawan parlarisqanchá aswan sumaj karqa. Jehovaqa Jobta nerqa tʼukunapaj jina ruwasqasninmanta wakinta qhawarinanta. Ajinamanta Jehová may yachayniyoj kasqanta reparananpaj, kamachisninta cuidayta atisqanpitaj atienekunanpaj. Jehovaqa Jobta yuyaricherqa payta cuidanantapuni, imaynatachus animalesta cuidan ajinata (Job 38:39-41; 39:1, 5, 13-16). Jobqa Jehovaj ruwasqasninpi piensarispa, Jehovaj kʼacha kaykunasninmanta ashkha imasta yachakorqa. Noqanchejpis Jehovaj ruwasqasninta qhawarispa astawan paymanta yachakusunman. Jinapis wakin kutisqa ichá mana atillasunmanchu. Llajta ukhupi tiyakunchej chayqa mana Diospa ruwasqasninwan muyurisqachu kanchej. Chayrayku mana qhawariyta atillasunmanchu. Campopi tiyakuspapis ichapis yuyasunman Diospa ruwasqasninta qhawarinapaj mana tiemponchej kasqanta. Chayrayku allinpuni Jehovaj ruwasqasninta qhawarinapaj tiempochakunanchej. w23.03 pág. 15 párrs. 1, 2

Jesusqa discipulosninman nerqa, niraj tukukuy chayamushajtin “sinchʼi terremotos”, waj imaspiwan kananta (Luc. 21:11). Chantapis nillarqataj sajra kausay yapakunanta, kay tiempopitaj ajinapuni kashan. Suwas, maqanakuspis astawan yapakun, ujllapi ashkhasta wañuchisqankupis yapakullantaj (Mat. 24:12). Jesusqa ni jaykʼaj nerqachu Jehovamanta karupi kajkunalla chay imaspi rikukunankuta. Diospa ashkha kamachisninpis desastres naturales kasqanrayku sufrillankutaj (Isa. 57:1; 2 Cor. 11:25). Ichapis Jehovaqa chay llakiykunamanta mana milagroswan jarkʼawasunchu, jinapis tukuy ima necesitasqanchejta qowasun sonqo tiyasqalla kanapaj, nitaj anchata llakikunapaj. Ñaupajmantaña wakichikuspaqa, sonqo tiyasqa kayta atillasun. Jinapis ñaupajmantaña wakichikuspa, ¿nichu rikuchishasunman Jehovapi mana atienekusqanchejta? Mana. Astawanpis ñaupajmantaña wakichikuspaqa, rikuchishanchej ima llakiy kajtinpis pay cuidanawanchejpipuni atienekusqanchejta. ¿Imaraykú chayta ninchej? Imaraykuchus Bibliaqa yuyaychawanchej ima llakiypajpis wakichisqa kananchejta. w22.12 pág. 18 párrs. 9, 10

José carcelpi kashajtin, Jehovaqa Egiptomanta reyta iskay kutipi mosqoykucherqa. José mosqoykunata sutʼinchayta atisqanta yachaspataj wajyachimorqa. Josetaj Jehovaj yanapayninwan mana chay reypa mosqokusqasnillantachu sutʼincharqa, manaqa imatachus ruwanantapis nillarqataj. Chaytaj faraonta mayta tʼukucherqa. Joseta Jehová yanapashasqanta reparaspataj, faraonqa tukuynin Egiptomanta mikhunata jallchʼananpaj encargadota churarqa (Gén. 41:38, 41-44). Watasninmantaj ashkha watasta yarqhay karqa, mana Egiptollapichu, manaqa Canaanpipis. Chaypeqa Josej familian tiyakorqa. Joseqa mikhunasmanta encargado kasqanrayku, familianta salvayta aterqa. Ajinamanta paykunaqa Mesiaspa ñaupa tatasninman tukorqanku. Sutʼita reparanchej Josetaqa Jehovapuni yanapasqanta tukuy ima ruwasqanpi allin rinanpaj. Joseta hermanosnin wañuchiyta munajtinkupis, Jehovaqa chayta allinman tukucherqa munayninta juntʼananpaj. w23.01 pág. 17 párrs. 11, 12

¿Imatá ruwasunman noqanchej kikinchejta allinta qhawarikunapaj? Imaschus Jehovamanta karunchawasunman chayta allinta reparayta yachana, tukuy atisqanchejtataj ruwana chaykunamanta karunchakunapaj. Ajinamanta Diospa munakuynillanpipuni kasunchej (Pro. 22:3; Jud. 20, 21). Apóstol Pabloqa cristianosman nerqa allinta qhawarikunankuta. Efesomanta cristianosman kayta qhelqarqa: “Allinta qhawarikuychej imaynatachus kausashasqaykichejta. Ama wampus jina kausaychejchu, manachayqa yachayniyojkuna jina”, nispa (Efe. 5:15, 16). Satanasqa tukuy imata ruwashan Jehovamanta karunchanawanchejpaj. Chayrayku Bibliaqa yuyaychawanchej allinta reparanata “imachus Jehová Diospa munaynin kasqanta”. Chayta ruwaspaqa Satanasmanta jarkʼakusun (Efe. 5:17). Sumajta ajllanapajqa allinta reparayta yachananchej tiyan “imachus Jehová Diospa munaynin kasqanta”. ¿Imaynatá chayta ruwasunman? Diospa Palabranta estudiaspapuni, chaypitaj tʼukurispapuni. Imachus Jehovaj munaynin kasqanta aswan sumajta entiendesun chay, “Cristoj yuyaynin” kapunawanchejpajtaj astawan kallpachakusun chayqa, atillasun “yachayniyojkuna jina” imatapis ruwayta, imatachus ruwanamanta mana uj kamachiy kajtinpis (1 Cor. 2:14-16). w23.02 págs. 16, 17 párrs. 7-9

¿Sapa mashkha kutitaj wasiykita pichayta yachanki? Ichapis chaypi tiyakuyta qallarinaykipajqa kʼuchuy kʼuchuta picharqanki. Pero, ¿imataj kanman manaña pichajtiyki? Yachanchej jina polvowan chʼichiwanqa chay rato juntʼaykunkuman. Wasita llimphituta japʼinapajqa sapa kuti pichanallanchejpuni tiyan. Chayman rijchʼakojllatataj ruwananchej tiyan yuyasqanchejwan, imayna runachus kasqanchejwanpis. Niraj bautizakushaspaqa mayta kallpachakorqanchej kausayninchejta cambianapaj, sonqonchejtapis ‘tukuy chʼichi kajmanta llimphuchanapaj’ (2 Cor. 7:1). Kunantaj apóstol Pablo kayta nisqanta kasukuna tiyan: “Qankunaqa yuyayniykichejta mosojyachinallaykichejpuni tiyan” (Efe. 4:23). Kay mundoj chʼichinwan polvonwanqa chay rato ukhunchejpi tantaykukunman. ¿Imatá ruwasunman Jehovaj ñaupaqenpi llimphusllapuni kanapaj? Sapa kuti qhawaykurikunanchej tiyan imaynachus yuyayninchej kasqanta, imayna runachus kasqanchejta, imatachus sonqonchej munasqantapis. w23.01 pág. 8 párrs. 1, 2

¿Imaynataj kanman karqa Jesuspa yachachisqanta uyariy? Payqa parlasqanpi Diosmanta Qhelqasqamantapuni de memoria oqharej. Jesusqa bautizakushajtin, espíritu santowantaj ajllasqa kashajtin, yuyarikorqasina imaynachus niraj kay jallpʼaman jamushajtin cielopi kausaynin kasqanta. Chaytataj sutʼita reparanchej bautizakuytawan imastachus ñaupajta nisqanpi, niraj wañupushaspa imastachus nisqanpipis (Deu. 8:3; Sal. 31:5; Luc. 4:4; 23:46). Jesús kay jallpʼapi kinsa wata khuskanniyojta Diosmanta yachachishaspa, Diosmanta Qhelqasqamantapuni runaspaj leepoj, imatachus chaypi nisqanta oqharej, sutʼinchajtaj (Mat. 5:17, 18, 21, 22, 27, 28; Luc. 4:16-20). Jesusqa niraj kay jallpʼapi Diosmanta willayta qallarishajtin, Diospa Palabranta leejña, sumajtataj uyarej wajkuna leejtinku, chaymanta parlajtinkupis. Payqa maman Mariawan Josewan Diosmanta Qhelqasqamanta parlasqankuta uyarejchá (Deu. 6:6, 7). Jesusqa sapa samarikuna pʼunchaypi familianwan sinagogaman rejpuni, Diosmanta Qhelqasqata leekusqantataj sumajta uyarej (Luc. 4:16). w23.02 pág. 8 párrs. 1, 2

Jehovata munakunapajqa ashkha razones tiyan. Qanqa yachakorqanki pay “kausay yaku juturi” kasqanta, chantá ‘tukuy ima allin kaj regalota, aswan sumaj regalotapis’ pay qowasqanchejta (Sal. 36:9; Sant. 1:17). Ajinapuni, tukuy allin imas kapuwasqanchejqa Jehovamanta jamun. Payqa mana michʼakuspa imatapis qowanchej, maytataj munakuwanchej. Jehová Wawanta kacharichisqa kananchejpaj kachamusqanqa, Jehovamanta may sumaj regalopuni. ¿Imaraykú chayta ninchej? Tʼukurina mashkhatachus Jehovawan Wawanwan munanakusqankupi. Jesús nerqa: “Tatayqa munakuwan”. Chantá nillarqataj: ‘Tatayta munakuni’, nispa (Juan 10:17; 14:31). Munanakusqankutaj astawan astawan sinchʼiyarqa may chhika watas pasasqanman jina (Pro. 8:22, 23, 30). Kaypi tʼukuriy: Jehovaqa saqerqa Wawanta sufrichinankuta, wañuchinankutapis. Chaymantataj maytachá sonqon nanarqa. Jinapis Jehovaqa runasta mayta munakusqanrayku, qantapis munakususqanrayku, munasqa Wawanta qorqa. Ajinamanta tukuy runas wiñaypaj kausakuyta atinanchejpaj (Juan 3:16; Gál. 2:20). Chaymanta aswan jatun razonqa mana kanmanchu Jehovata munakunapaj. w23.03 págs. 4, 5 párrs. 11-13

Diosta wasanchajkunaj yachachisqankuta ama japʼikunachu. Jesusqa Pergamopi kaj wakin cristianosta kʼamerqa. Imaraykuchus paykunaqa tʼaqanakusta, sectasta ima rikhurichisharqanku (Apo. 2:14-16). Jinapis Jesusqa Tiatira congregacionmanta cristianosman nerqa allinta ruwasqankuta, ‘Satanaspa llulla yachachiykunasninta’ mana japʼikuspa, kallpacharqataj cheqa yachachiyta japʼikunallankupajpuni (Apo. 2:24-26). Diosta yupaychaypi chiriyapoj, llulla yachachiykunatataj japʼikoj cristianosqa arrepientekunanku karqa. Noqanchejpis ima yachachiyllapis mana Jehovaj munayninman jinachu kajtenqa, qhesachananchej tiyan. Diosta wasanchajkunaqa ‘tukuy sonqo yupaychajkunaman rijchʼakullanku, manataj chayman jinachu kausanku’ (2 Tim. 3:5). Diospa Palabranta sumajta estudiasun chayqa, llulla yachachiykunata chay rato reparasun, qhesachasuntaj (2 Tim. 3:14-17; Jud. 3, 4). Jehová yupaychayninchejta allinpajchus manachus qhawashasqanta allinta qhawarikunanchej tiyan. Imatapis mana allintachu ruwashanchej chayqa, kallpachakuna usqhayllata cambianapaj (Apo. 2:5, 16; 3:3, 16). w22.05 pág. 4 párr. 9; pág. 5 párr. 11