Septiembre

Allintapuni parlasun chayqa, wajkuna sutʼita reparanqanku “pichus Diosta sirvisqanta, pitajchus mana sirvisqantapis” (Mal. 3:18). Arí, runasqa parlasqanchejpi sutʼita reparanqanku Jehovata sirvisqanchejta. Hermana Kimberlymanta parlarina. Uj pacha paywan compañeranwanqa khuska tareankuta ruwarqanku. Compañerantaj repararqa Kimberlyqa, mana wakin compañerasnin jinachu kasqanta. Payqa wajkunamanta allin kajtapuni parlaj, mana wasankumanta rimakojchu, nitaj millay palabrastapis parlajchu. Compañeranqa imajtinchus Kimberly ajina kasqanta yachayta munarqa, tiemponmantaj Bibliata estudiayta qallarerqa. Jehovaqa maytapuni kusikun allinta parlasqanchejrayku runas paymanta yachakuyta munajtinku. Tukuy munanchej parlasqanchejwan Jehovata jatunchayta. w22.04 págs. 5, 6 párrs. 5-7

Jesusqa qanchis supaykunata María Magdalenamanta qharqorqa. Paytaj maytachá agradecekorqa. Chayrayku Jesusta qhaterqa, yanaparqataj (Luc. 8:1-3). María imatachus Jesús payrayku ruwasqanmanta mayta agradecekojtinpis, ichapis mana sumajta entienderqachu Jesusqa tumpamantawan aswan sumajtaraj ruwananta. Jesusqa kausayninta qonan karqa, “ajinamanta pillapis paypi creejqa” wiñay kausayta japʼinanpaj (Juan 3:16). Chayta mana sumajta entiendejtinpis, Mariaqa may agradecesqa kasqanta rikucherqa Jesusta mana saqerparispa. Jesús kʼaspipi clavasqa kashajtin, payqa chay qayllapi qhepakorqa Jesusta, chaypi kajkunatawan sonqochananpaj (Juan 19:25). Jesús sepulturapi kashajtintaj, Mariawan iskay warmiswan, sumaj qʼapayniyoj qhorasta aparqanku Jesuspa ayanman churamunankupaj (Mar. 16:1, 2). Mariapajqa may jatun kusiypuni karqa Jesusta kausarisqata rikusqan, paywantaj parlarisqan. Chaytaqa Jesuspa uj mashkha discipulosnillan ruwayta aterqanku (Juan 20:11-18). w23.01 pág. 27 párr. 4

Mana yuyanachu tiyan Jehovapaj ñaupajta tukuy atisqanchejta ruwasqanchejrayku, kunan niña kallpachakunanchejchu kasqanta. Ichá kunanqa manaña ñaupajta jinachu ruwayta atinchej. Jinapis tukuy atisqanchejta kallpachakunanchej tiyan, ‘Señorpa ruwayninpi ashkhata llankʼanallapajpuni’. Chantapis kay sajra mundoj tukukuynin chayamunankama, wakichisqallapuni kananchej tiyan, rijchʼarisqallapunitaj (1 Cor. 15:58; Mat. 24:13; Mar. 13:33). Jehovata kusiywan, tukuy sonqotaj sirvina. Jesús Laodiceamanta cristianosman uj willayta willachishaspa, waj problemayoj kasqankuta nerqa. Paykunaqa Diosta yupaychaypi ‘as qʼoñilla, mana chirichu, nitaj ruphachu’ kasharqanku. Jesusqa paykunaman nerqa mana imayoj, lastimay khuyay kashasqankuta. Chayrayku watejmanta Jehovata tukuy sonqo sirvej churakunanku karqa (Apo. 3:16, 17, 19). ¿Imatá chaymanta yachakusunman? Manaña Jehovata kusiywanchu sirvishanchej chayqa, kallpachakunanchej tiyan Jehová allin imasta qowasqanchejmanta astawan agradecekunapaj (Apo. 3:18). Ichapis tukuy imayoj kayta munaspa mayta trabajayta munashanchej. Jinapis chayqa mana Jehovata yupaychajta saqewasunchu. Chayrayku kallpachakuna Jehovata yupaychayta kausayninchejpi ñaupajmanpuni churanapaj. w22.05 págs. 3, 4 párrs. 7, 8

Jehovaqa may chhika watastaña uj libropi sutista qhelqashan. Chay listaqa Abelwan qallarin. Payqa atienekunapaj jina ñaupaj kaj testigo (Luc. 11:50, 51). Tiempo pasasqanman jina Jehovaqa chay libroman sutista yapashallanpuni, kunankamataj may chhika sutisña tiyan. Bibliapeqa chay libromanta parlananpaj kay sutista oqharin: ‘yuyarisqa kanankupaj libro’, ‘kausay libro’, ‘kausay kʼuyuna libro’ (Mal. 3:16; Apo. 3:5; 17:8). Chay sumaj libropeqa tukuy Jehovata yupaychajkunaj sutisninku qhelqasqa kashan, pikunachus payta manchachikunku chayri jatunpaj qhawanku, sutintapis munakunku chaykunaj sutisninku. Paykunaqa suyakushanku wiñay kausayta japʼiyta, cielopi chayri kay jallpʼapi. Sutinchejpis chay libropi qhelqasqa kayta atillanmantaj Jehovaman astawan qayllaykojtinchej. Paymantaj astawan qayllaykuyta atinchej Wawan Jesucristoj wañuyninnejta (Juan 3:16, 36). Tukuy munanchej chay libropi sutinchej qhelqasqa kananta, ¿icharí? w22.09 pág. 14 párrs. 1, 2

Apocalipsis libroqa parlallantaj ‘uj jatun puka sierpemanta’ (Apo. 12:3). Chay jatun sierpeqa Jesuswan angelesninwan ima maqanakun (Apo. 12:7-9). Chantapis Diospa llajtanta qhatiykachan, gobiernosmantaj atiyta qon (Apo. 12:17; 13:4). ¿Pitaj chay jatun sierpe? Payqa ñaupa katari, “pichus sutichasqa Diablo, Satanastaj” chay (Apo. 12:9; 20:2). Paytaj Jehovaj tukuynin enemigosninta kamachishan. ¿Imataj kanqa jatun sierpewan? Apocalipsis 20:1-3 nin uj ángel Satanasta chinkay ukhuman wijchʼuykunanta. Chaypi Satanasqa carcelpi jina 1.000 watasta wisqʼasqa kanqa. Jinamanta manaña nacionesta chʼaukiyanqachu chay tiempo juntʼakunankama. Chaymantataj Satanaswan supaykunasninwanqa “azufre nina qochaman” wijchʼuykusqa kanqanku. Chaytaj niyta munan wiñaypaj chinkachisqa kanankuta. Satanaswan supaykunasninwan kay jallpʼamanta chinkachisqa kajtinku, kausayqa may sumajpuni kanqa. w22.05 pág. 14 párrs. 19, 20

Jesusqa sumaj trabajador karqa. Payqa joven kashaspa carpintero karqa (Mar. 6:3). Familianpeqa ashkha ukhu karqanku. Tatasnintaj maytachá agradecekorqanku Jesús trabajaspa paykunata yanapasqanmanta. Jesusqa mana pantaj runa kasqanrayku may kʼachitustachá tukuy imata ruwaj. Tukuychá imatapis paywan ruwachikuyta munaj kanku. Jesusqa tukuy chay imasta kusiywanchá ruwaj. Jinapis tiempochakojpuni Jehovata sirvinanpaj (Juan 7:15). Payqa predicayta qallarisqanmanta qhepaman nerqa: “Ama pʼosqoj mikhunaraykuchu llankʼaychej, manachayqa wiñay kausayta qoj mikhunarayku”, nispa (Juan 6:27). Orqopi Yachachishaspataj nerqa: “Valorniyoj imastaqa cielopi tantaychej”, nispa (Mat. 6:20). Jehová yachayta qowasqanchejrayku trabajomanta maychus kajllata yuyayta atinchej. Cristianosqa sinchʼita trabajanchej, allin kajtapunitaj ruwanchej. w22.05 pág. 22 párrs. 9, 10

Timoteoqa maytachá mamanmanta yachakorqa. Payqa sutʼita rikorqa maman mayta Jehovata munakusqanta, chaytataj Euniceqa ruwasqasninwan rikucherqa. Timoteoqa rikullarqatajchá maman Jehovata sirvispa kusisqa kasqanta. Ashkha mamaspis, Eunice jinallataj familiankuta yanapanku ni imata nispalla (1 Ped. 3:1, 2). Qanrí, ¿imatá ruwawaj familiaykita yanapanaykipaj? Jehovata sirviyta ñaupajman churay (Deu. 6:5, 6). Qanqa ashkha mamas jinallatajchá wawasniykiman tukuy ima necesitasqankuta qonaykipaj mayta kallpachakunki. Chaypajqa maymantapis tiempota, qolqeta ima orqhonki. Wakin kutisqa ichá mana sumajtachu puñukunki. Jinapis orakunaykipaj, sapallaykipi Bibliata estudianaykipaj, reunionesman rinaykipajpis tiempochakunallaykitaj tiyan. Chay imasta ruwaytaqa amapuni saqeychu. Ajinamanta astawan Jehovaman qayllaykunki. Familiaykiwan wajkunawantaj chayta ruwasqaykimanta mayta yachakonqanku. w22.04 pág. 16 párr. 1; pág. 19 párrs. 12, 13

Mana noqanchejchu ninanchej kashan imaynatachus wajkuna juzgasqa kanankuta. Chaytaqa Jehová Dioslla ruwanqa Tukuy Atiyniyoj Juez kasqanrayku. Chayta yachaspataj mayta kusikunchej (Rom. 14:10-12). Yachanchej Jehovaqa imachus allin, imatajchus mana allin kasqanman jina cheqantapuni juzgananta (Gén. 18:25). Jehovaqa ni jaykʼaj mana cheqan kajta ruwanmanchu. Jucharayku, pantaj runas kasqanchejrayku, imaymana llakiykunapi rikukunchej, Jehovataj tukuy chayta allinchanqa. Chaytaqa maytapuni suyakushanchej. Payqa tʼirisninchejta sanoyachiwasun, imaschus llakichiwasqanchejtapis qonqachiwasun. Chaytaj mana uj ratollapajchu kanqa (Sal. 72:12-14; Apo. 21:3, 4). Chay imasqa qonqasqata qonqasqa kanqa. Chay tiempo chayamunankamataj, Jehová wajkunata perdonayta atinapaj jina ruwawasqanchejmanta agradecekusqanchejta rikuchinallapuni. w22.06 pág. 13 párrs. 18, 19

Uj sumaj juezqa leyesta sumajta rejsinan tiyan. Chantapis uj demandata atiendeshaspaqa niraj pitapis juchachashaspa, sumajtaraj tukuy imata qhawaykun. Jehovataj ajinata ruwan, chayrayku ni pi jina sumaj Juezpuni. Juecesqa quejasta atiendeshaspa mana tukuy imatapunichu yachanku. Jehovatajrí tukuy imata yachan (Gén. 18:20, 21; Sal. 90:8). Jehovaqa mana runas rikusqankuman jinallachu, nitaj uyarisqankuman jinallachu juzgan. Runasqa imatapis ruwanchej imayna tatasniyojchus kasqanchejman jina, imayna uywasqachus kasqanchejman jina, maypichus tiyakusqanchejman jina, imayna sonqoyojchus kasqanchejman jina. Jehovataj chayta sumajta yachan. Chantapis payqa sumajta sonqonchejta rejsin. Chayrayku sumajta reparan imajtinchus uj runa imatapis ruwasqanta. Jehovaj qhawayninmantaqa mana imapis pakasqa kayta atinmanchu (Heb. 4:13). Jehovaqa perdonanawanchejpaj tukuy imataña qhawaykorqa. Chayman jina perdonawarqanchej. w22.06 pág. 4 párrs. 8, 9

Sumajta reparananchej tiyan imaswanchus Satanás Jobta urmachiyta munasqanta. Kunanpis chay imasllawantaj urmachiyta munawanchej. Satanasqa nisharqa Jehovata mana tukuy sonqochu munakusqanchejta, kausananchejraykutaj Jehovata wasanchananchejta. Chantapis Satanasqa nillantaj Jehová mana munakuwasqanchejta, payta kusichinapaj kallpachakusqanchejpis qhasilla kasqanta. Jehovapi suyakojkunaqa mana Satanaswan engañachikunchejchu. Imajtinchus yachanchej ima mañasniyojchus kasqanta. Pruebasqa reparachiwanchej imaspichus astawan kallpachakunanchej kasqanta. Jobpis pruebaspi kaspa reparakorqa, imaspichus astawan kallpachakunan kasqanta. Payqa reparakorqa aswan kʼumuykukoj sonqo kanan kasqanta (Job 42:3). Ajinallatataj noqanchejpis imaspichus kallpachakunanchejta reparakuyta atisunman. Imaspichus kallpachakunanchej kasqanta reparakuspataj, chayta ruwanapaj kallpachakuna. w22.06 pág. 23 párrs. 13, 14

Jehovaqa yanapanawanchejtapuni niwanchej. Payqa niraj “testigosniy kankichej” nishaspa, kayta nerqa: “Yakuta chimpashajtiyki noqa qanwan kasaj, mayusta chimpashajtiykipis yakoqa mana apakapusonqachu. Nina chaupita pasashajtiyki mana ruphasonqachu, nina laurayqa mana qʼasparasonqachu”, nispa (Isa. 43:2). Wakin kutis predicashaspaqa chʼampaykunapi, pruebaspipis rikukusunman. Chaykunataj kankuman mayus jina chayri nina lauray jina. Jinapis Jehovaj yanapayninwanqa predicallanchejpuni (Isa. 41:13). Ashkha runasqa mana willasqanchejta uyariyta munawanchejchu. Jinapis chayqa mana ninayanchu mana allintachu willasqanchejta. Jehovaqa mayta kusikun mana saykʼuspa willallasqanchejmantapuni, chayta yachaytaj mayta sonqochawanchej, kallpachawanchejtaj. Apóstol Pablo nerqa: “Sapa uj ruwasqanman jina tʼinkanta japʼenqa”, nispa (1 Cor. 3:8; 4:1, 2). w22.11 pág. 4 párrs. 5, 6

Sutʼita rikushanchej Bibliaj profeciasnin juntʼakushasqantapuni. “Nacionesmanta tukuy laya parlayniyoj” runas ‘llimphu parlayta’ yachakushanku, nisunman Bibliaj cheqa yachachiykunasninta (Zac. 8:23; Sof. 3:9). Kay tiempopeqa Jehovaj llajtanpi 8 millonesmanta astawanña kanchej, 240 suyuspi, lugarespi imataj kashanchej. Sapa watataj may chhika runas bautizakushallankupuni. Chantapis bautizakojkunaqa ‘mosoj kausaywan pʼachallikunku’, nisunman sumaj cristianos jina kausakuyta yachakunku (Col. 3:8-10). Ashkhasqa chʼichi kausayninkuta saqepunku, niña phiña runaschu kanku, niña wajkunata chejnikunkuchu, niñataj nacionninkuman sayasqachu kanku. Isaías 2:4 versiculopi profeciaqa juntʼakushanpuni, ‘manaña guerrapi maqanakuyta yachakushankuchu’. Mosoj kausaywan pʼachallikunapaj kallpachakusqanchejrayku, runasta yanapanchej Diospa llajtanman yaykumunankupaj, sutʼitataj rikuchinchej kamachejninchej Jesucristota qhatikushasqanchejta (Juan 13:35). Chaytataj ruwayta atinchej Jesuspa yanapaynillanwan. w22.07 pág. 9 párrs. 7, 8

Jehovamanta mañakushaspaqa ama mitanchejwan jinachu parlana, manaqa respetowanpuni. Imatachus Isaías, Ezequiel, Daniel, Juan ima rikusqankupi piensarina. Paykunaqa Jehovata may atiyniyoj Reyta jina rikorqanku. Isaiasqa ‘Jehová Diosta rikorqa kamachina tiyananpi tiyasqata, manchay patapi, altopi’ (Isa. 6:1-3). Ezequielqa Jehovata rikorqa carretanpi tiyasqata, payqa kʼanchaywan muyurisqa kasharqa, ‘chay kʼanchayqa kʼuychi jina karqa’ (Eze. 1:26-28). Danielqa ‘Ashkha Watasniyoj Machituta’ rikorqa, yuraj ropayojta, kamachina tiyananmantataj nina lauray jina llojsimusharqa (Dan. 7:9, 10). Juanpis Jehovata kamachina tiyananpi tiyasqata rikorqa, chay kamachina tiyanantaqa uj kʼuychi muyuykusharqa, esmeralda rumiman jina rijchʼakoj (Apo. 4:2-4). Jehová ajina may atiyniyoj kasqanpi piensarispa, mayta agradecekunchej paymanta mañakuyta atisqanchejmanta, may respetowantaj chayta ruwayta munanchej. w22.07 pág. 20 párr. 3

Joven, Satanasqa tukuy imata ruwanqa creeyniyki ama sinchʼiyananpaj, nitaj Jehovaman astawan qayllaykunaykipaj. Chayrayku payqa Bibliaj yachachiykunasninmanta iskayrayachiyta munasunki. Ichapis wakin runasqa creechiytapuni munasonqanku mana Dioschu ruwawasqanchejta, manachayqa jinallamanta rikhurisqanchejta. Wawallaraj kashaspaqa ichapis mana chaypi anchata yuyajchu kanki. Kunantaj jovencitoña kasqaykirayku, ichapis profesoresniyki kausay jinallamanta rikhurisqanta yachachisonqanku. Chayta yachachisusqankutaj ajinapuni kaspa jinanman, creenapaj jinataj kanman. Jinapis ichá paykunaqa ni jaykʼaj ukhuncharqankuchu Dios kasqantapunichus manachus. Yuyarikuy imatachus Proverbios 18:17 versiculopi nisqanta. Chaypi nin: “Juiciopi ñaupajta parlajqa cheqanta parlaspa jinan, contrariontaj allin allinta tapurispa sutʼiman orqhon ajinachus manachus kasqanta”, nispa. Chayrayku mana creenallaykichu tiyan escuelapi tukuy ima yachachisusqankuta. Astawanpis Bibliata, publicacionesta ima sumajta estudianayki tiyan. w22.08 pág. 2 párr. 2; pág. 4 párr. 8

Bibliapi leesqanchejtaqa entiendeyta munanchej. Mana entiendespaqa mana chaywan sumajta yanapachikusunchu. Qhawarina imatachus Jesús nerqa ‘Leymanta sumajta yachaj runaman’ (Luc. 10:25-29). Chay runaqa yachayta munarqa imatachus ruwananta wiñay kausayta japʼinanpaj. Jesustaj Diospa Palabranpi tʼukuricherqa. Pay nerqa: “¿Imataj Leypi qhelqasqa kashan? ¿Imatá entiendenki leesqaykimanta?”, nispa. Chay runataj sumajta kuticherqa. Payqa nerqa Diosmanta Qhelqasqapeqa Diostawan runa masinchejtawan munakunata nishasqanta (Lev. 19:18; Deu. 6:5). Pero Jesusta taporqa: “¿Pitaj chanta runa masiyri?”, nispa. Chaywan sutʼita rikucherqa leesqanta mana allintachu entiendesqanta. Chayrayku mana yacharqachu imaynatachus chayta kasukunan kasqanta. Jehovaj yanapayninwanqa Bibliata entiendeyta atisunman. Chayrayku espíritu santonta mañakuna leeshaspa mana waj imaspi yuyashanapaj, leesqanchejman jina kausakunapaj yanapanawanchejpajpis. w23.02 pág. 9 párrs. 4, 5

“¿Imaynamantataj testigoman tukorqanki?” Ashkha kutispichá chay tapuyman kuticherqanchej. Waj hermanosta rejsispa chayta tapunakuyta yachanchej. Mayta kusikunchej hermanosninchej imaynatachus Jehovata rejsisqankuta, munakusqankuta willariwasqanchejta uyarispa. Noqanchejpis kusiywan willarinchej imajtinchus cheqa kajta munakusqanchejta (Rom. 1:11). Ajinata willanarikuspa yuyarikunchej Jehovaj testigosnin kayqa may sumajpuni kasqanta. Chantapis astawan munanchej ‘cheqa kajpi purillaytapuni’, nisunman Jehovata kusichinapaj jina, bendecinawanchejpaj jina kausakullaytapuni. Cheqa kajtaqa ashkha imasrayku munakunchej. Astawanqa Jehovata munakusqanchejrayku, cheqa kajqa paymanta jamun. Palabran Biblianejta yachakunchej Diosqa tukuy atiyniyoj kasqanta, cielotapis jallpʼatapis pay ruwasqanta. Chantapis yachakunchej Tatanchej kasqanta, munakuwasqanchejta, noqanchejmantapis llakikusqanta (1 Ped. 5:7). w22.08 pág. 14 párrs. 1, 3

Apóstol Pabloqa hermanosninta nerqa ‘allin ruwaykunata’ ruwaspa munakuyninkuta rikuchinankuta (Heb. 10:24). Payqa mana simillamantachu chayta nerqa, manaqa ruwasqasninwan chayta rikucherqa. Judeamanta cristianos sinchʼi yarqhaypi kashajtinku, yanapata apajkunamanta ujnenqa Pablo karqa (Hech. 11:27-30). Pabloqa predicaspa, yachachispa ima ocupasqa kaspapis, wajcha cristianosta imaynallamantapis yanapananpaj kallpachakojpuni. Ajinamanta hermanosta yanaparqa Jehová cuidananpi astawan atienekunankupaj. Noqanchejrí, ¿imaynatá kay tiempopi hermanosninchejta astawan sinchʼi creeyniyoj kanankupaj yanapasunman? Tiemponchejwan, kallpanchejwan, imastachus ruwayta yachasqanchejwan llakiypi kaj hermanosta yanapakoj rispa, jallpʼantinpi Bibliamanta yachachinapaj qolqesitunchejwan yanapakuspa ima. Chaykunata, waj imastawan ruwaspaqa hermanosninchejta yanapanchej Jehová ni jaykʼaj paykunata saqerparinanpi atienekunankupaj. w22.08 pág. 24 párr. 14

Bibliamanta ashkha profeciasqa juntʼakunña. Chaykunamanta wakenqa juntʼakusqankumanta may chhika watas ñaupajtaña qhelqasqa karqanku. Runas ñaupa tiempopi imaschus pasasqanmanta estudiasqankutaj, chay profecías juntʼakusqanta sutʼita rikuchin. Chaytaj mana tʼukuchiwanchejchu. Noqanchejqa yachanchej chay profeciasqa Jehovamanta jamusqanta. Manchay atiyniyoj Babilonia llajta chinkarparichisqa kasqanpi piensarina. Jaqay 778, 732 watas chaynejpi Jesús niraj jamushajtin, Jehovaqa profeta Isaiasta yuyaycharqa Babilonia llajta atipasqa kananmanta qhelqananpaj. Chantapis chay llajtata atipajqa Ciro kananta nerqa, sumajsitutataj sutʼincharqa imaynatachus llajtaman yaykuykunanta (Isa. 44:27–45:2). Nillarqataj tiempowanqa Babilonia thuñisqa kananta, niñataj ni pi chaypi tiyakunanta (Isa. 13:19, 20). 539 watapi Jesús niraj jamushajtin, medoswan persaswanqa Babiloniaman yaykuykuspa japʼikaporqanku. Kunanqa maypichus chay sumaj jatun llajta karqa chay lugarqa raqayllaña kashan, nisunman laqayasllaña. w23.01 pág. 4 párr. 10

Jehovaqa jallpʼantinpi kaj familianman yaykunapaj ajllawarqanchej. Chaytaj may sumajpuni, ashkha bendicionestataj apamuwanchej (Mar. 10:29, 30). Jallpʼantinmanta hermanosninchejqa noqanchej jinallataj Jehovata munakunku, kamachiykunasninman jina kausakunankupajtaj kallpachakunku. Parlayninchej, maymantachus kasqanchej, imaynatachus vistikusqanchej mana kikinchu kajtinpis, paykunataqa primera vez rejsisqanchejmantapacha munakunchej. Paykunawan khuska Tatanchej Jehovata jatunchaspa, yupaychaspaqa astawanraj kusikunchej (Sal. 133:1). Llakiykunapi kashajtinchej paykunaqa yanapariwanchejpuni (Rom. 15:1; Gál. 6:2). Chantapis yanapallawanchejtaj Jehovata sirvinallapajpuni, paypa qayllallanpipunitaj kanapaj (Heb. 10:23-25). Congregacionmanta hermanosninchejqa Satanaspa contranpi, sajra mundonpa contranpi sinchʼita sayaykunapaj yanapawanchej. Imachus noqanchejwan kanmanpis mana paykuna yanapawajtinchejqa. w22.09 págs. 2, 3 párrs. 3, 4

Redes socialesman yaykuspa, mana chayta ruwayta atillasunmanchu. Mana allinta qhawarikuspaqa, mana willananchej imasta ashkhasman aparachisunman. Apachispañataj mana niyta atisunmanchu wajkuna imaynatachus apaykachanankuta. Chay apachisqanchej wajkunaj sonqonkuta nanachejtintaj, niña allinchayta atisunmanchu. Chantapis ichá enemigosninchejqa, engañaspa imatapis hermanosninchejmanta parlachiyta munawasunman. Parlasqanchejta midirikuyta yachanchej chayqa, mana imatapis willasunchu hermanosninchejta llakiypi rikhurichinapaj jinaqa. Chayqa kanman ima suyupichus testigos prohibisqa kanku chaypi policías tapuykachawajtinchej. Chay kutispi, waj kutispipis Bibliaj kay yuyaychasqan yanapawasunman: ‘Simiyman yukumata chayri ñukuta churakusaj’ (Sal. 39:1). De confianza runas kananchej tiyan familianchejpaj, amigosninchejpaj, hermanosninchejpaj, waj runaspajpis. Chaypajtaj parlasqanchejta midirikuyta yachananchejpuni tiyan. w22.09 pág. 13 párr. 16

Cheqamantapuni kusisqa kanapajqa Diospa Palabranta leenanchej, estudiananchejtaj tiyan. Necesitanchejpunitaj chayta ruwayta. Chayrayku Jesús nerqa: “Runaqa mana tʼantallawanchu kausanqa, astawanqa Jehová Diospa siminmanta tukuy llojsimoj palabraswan kausanqa”, nispa (Mat. 4:4). Chayrayku sapa día Diospa Palabran Bibliata leenanchej tiyan. Jehovaqa munakuwasqanchejrayku, kusisqa kanapaj imatachus ruwananchejta Biblianejta niwanchej. Bibliapi yachakunchej imapajchus Dios kausayta rikhurichisqanta, imaynatachus amigosnin kayta atisqanchejta, juchasninchejta perdonanawanchejpajpis imatachus ruwananchej kasqanta. Yachakullanchejtaj ima sumaj suyakuytachus Dios qowasqanchejta (Jer. 29:11). Biblianejta tukuy chay imasta yachakuspaqa, may kusisqapuni kanchej. Llakiykunasninchejrayku desanimasqa kashanchej chayqa, Diospa Palabranta astawan leerina, chaypitaj tʼukurina. w22.10 pág. 7 párrs. 4-6

Bibliaqa niwanchej amaña mana yachayniyojkuna kananchejta. Bibliaj yuyaychaykunasninman jina kausakuspa yachayniyojman tukunchej. Pisimanta pisi noqanchejpuni reparanchej, chay yuyaychaykunaqa mayta yanapawasqanchejta imatapis allinta ajllanapaj, problemasmantapis karunchakunapaj. Allin kanman sapa ujninchej qhawarikunanchej maykamañachus ñauparishasqanchejta. Ichapis unaytaña Bibliata estudiashanki, reunionesmanpis rishanki, manarajtaj Jehovaman kausayniykita qopunkichu, nitaj bautizakunkirajchu. Jina kajtenqa imaraykuchus mana chayta ruwasqaykipi piensariwaj. Bautizasqaña kanki chaytaj, ¿aswan sumajtañachu predicayta, yachachiytapis yachanki? Imatachus ajllasqayki, ¿sutʼitachu rikuchin Bibliaj yuyaychaykunasninman jina ruwasqaykita? ¿Jesús jinachu wajkunawan kanki? Sichus reparakunchej imapipis mejorananchej kasqanta chayqa, Jehová imastachus yuyarichiwasqanchejta sumajta uyarina. Chaykunaqa ‘mana yachayniyojta yachayniyojman tukuchin’ (Sal. 19:7). w22.10 pág. 20 párr. 8

Ezequielqa rikorqa Diospa espíritu santonqa may atiyniyojpuni kasqanta. Ezequielqa mosqoypi jina rikusqanpi repararqa, Jehovaqa espíritu santonwan atiyniyoj angelesta yanapashasqanta, carretanpa jatuchaj ruedasnintapis purichishasqanta (Eze. 1:21). Chayta rikuspa, ¿imaynataj Ezequiel kasharqa? Pay qhelqarqa: “Chayta rikuspa pampakama kʼumuykukorqani”, nispa. Payqa tʼukulla kasharqa, chayraykutaj pampakama kʼumuykukorqa (Eze. 1:28). Ezequielqa imatachus mosqoypi jina rikusqanpi sapa piensarispa, astawanchá convencekorqa espíritu santoj yanapayninwanqa willayninta juntʼanantapuni. Jehovaqa Ezequielta kamacherqa: “Runaj wawan, sayariy qanwan parlanaypaj”, nispa. Jehová chayta kamachisqan, espíritu santonta qosqanpis payman kallpata qorqa sayarikunanpaj (Eze. 2:1, 2). Chaymanta qhepaman Diosqa Ezequielta tukuy willayninpi yanaparqa ‘makinwan’, nisunman espíritu santonwan (Eze. 3:22; 8:1; 33:22; 37:1; 40:1). w22.11 pág. 4 párrs. 7, 8

Profeta Isaiasqa Jehovata kikinchasharqa yachakojkunaj qhepankuta rej yachachejwan, purisqankuta sumajta qhawaspa, maynintachus rinankuta sutʼita rikuchispa ima. ¿Imaynamantataj kay tiempopi Diospa parlasqanta wasanchejmanta uyarinchej? Bibliata leespa. Bibliapeqa Diospa nisqasnin ashkha watas ñaupajtaña qhelqakorqa. Chayrayku Bibliata leespaqa, ñaupa tiempopi qhelqachisqanta uyarishanchej, chaytaj Jehovaj parlasqanta wasanchejmantapis uyarishasunman jina (Isa. 51:4). ¿Imatá ruwasunman pusashawasqanchejwan sumajta yanapachikunapaj? Isaiasqa iskay imasmanta parlarqa. Ñaupajta nerqa: “Kaymin cheqan ñanqa”, nispa. Chantá nerqa: “Kayninta riy”, nispa. Chayrayku mana ‘ñanta’ rejsinallanchejchu tiyan, manachayqa chayninta ‘rinanchej’ tiyan. Diospa Palabranpi, llajtan imastachus sutʼinchawasqanchejpipis, yachakunchej imatachus Jehová ruwananchejta munasqanta, imaynatachus chay yachakusqanchejman jina ruwanatapis. Chay iskay imasta ruwananchej tiyan Jehovata sirvispa kusiywan aguantanallapajpuni. Ajinallamanta mana iskayrayasunchu Jehová bendecinawanchejmanta. w22.11 pág. 11 párrs. 10, 11

Jesuspa casi tukuynin apostolesnin wañupusqankumanta pisi tiemponman, llulla cristianos congregacionman yaykuykuyta qallarerqanku (Mat. 13:24-27, 37-39). Chay runastaj ‘cheqa kajta qʼewej kanku creejkunata paykunaj qhepankuta pusanankupaj’ (Hech. 20:30). Tiemponmanqa yachachiyta qallarerqanku Jesusqa mana ‘uj kutillatachu wiñaypaj jaywasqa kasqanta, ashkha runaspa juchasninkuta apananpaj’. Chaytaj cheqa kajta qʼewispa yachachisqankumanta ujnin karqa. Paykunaqa yachachej kanku Cristoqa kutin kutita wañunan kasqanta, Bibliataj mana chaytachu yachachin (Heb. 9:27, 28). Kunanpis allin sonqoyoj ashkha runasqa chay llulla yachachiypi creellankutaj. Paykunaqa sapa semana, wakin kutitaj sapa día iglesiaman rinku Jesuspa wañuyninta yuyarinankupaj. Chay tantakuyta catolicosqa sutichanku el sacrificio de la misa nispa. Wakin religionestajrí maypi jinalla Jesuspa wañuyninta yuyarikunku. Jinapis chay iglesiasman rejkunamanta ashkhasqa, mana sutʼita entiendenkuchu imayna valorniyojpunichus Jesuspa wañuynin kasqanta. w23.01 pág. 21 párr. 5

Waranqa watasta Jesús kamachishajtin wañusqasta kausarichimonqa, tukuy kasukojkunatataj yanapanqa mana juchayojman tukunankupaj. Pikunatachus Jehová cheqan runaspaj qhawanqa chaykunaqa “kay jallpʼata herenciata jina japʼenqanku, kay jallpʼapitaj wiñaypaj kausakonqanku” (Sal. 37:10, 11, 29). “Qhepa kaj enemigoqa wañuy, chaytaj chinkachisqa kanqa” (1 Cor. 15:26). ¡Chayqa may kusiypuni! Diospa Palabranpipuni nishasqanrayku, wiñaypaj kausakuyta suyakushanchej. Chay suyakuytaj yanapawanchej kay qhepa pʼunchaykunapi kausay may llakiy kashajtinpis, Jehovata mana wasanchaspa sirvikunallapajpuni. Jinapis Jehovata kusichiyta munanchej chayqa, mana salvakuyta munaspallachu Jehovata, Jesustapis mana wasanchasun, manachayqa paykunata tukuy sonqo munakusqanchejrayku (2 Cor. 5:14, 15). Chay munakuytaj tanqawanchej paykuna jina ruwanapaj, suyakusqanchejmantataj wajkunaman willarinapaj (Rom. 10:13-15). Mana noqallanchejpi yuyanapaj, wajkunaman qorikuytapis yachanapaj astawan kallpachakusqanchejman jina, Jehovaqa astawan munanqa wiñaypaj amigonchej kayta. w22.12 pág. 7 párrs. 15, 16

Qhatiykachasqa kajtinchejqa imaschus kusisqa, sonqo tiyasqataj kanapaj yanapawanchej chay imasta manaña ruwayta atillasunmanchu. Ichapis imachus qhepaman kananmanta llakikusunman. Ajinata sientekusqanchejqa entiendenapaj jinalla. Jinapis allinta qhawarikunanchej tiyan. Jesusqa discipulosninman nerqa qhatiykachasqa kajtinku creeyninku chinkayta atisqanta (Juan 16:1, 2). Chayrayku, ¿imatá ruwasunman qhatiykachasqa kajtinchejpis sonqo tiyasqallapuni kanapaj? Jesusqa niwarqanchej qhatiykachasqa kananchejta, jinapis nillawarqanchejtaj atipayta atinanchejta (Juan 15:20; 16:33). Manaña predicajta saqewajtinchej chayri prohibiwajtinchejqa, ichapis sucursalta kamachejkuna chayri ancianos kamachiykunata qowasunchej jarkʼanawanchejpaj, Diosmanta sumaj yachachiykunata japʼinallapajpuni, atikusqanman jinataj predicanallapajpuni (Sant. 3:17). Chantapis runas hermanosninchejmanta mana yachananku imasta tapuwajtinchej, ama paykunaman imatapis willanachu (Ecl. 3:7). w22.12 págs. 20, 21 párrs. 14-16

Jesusqa nisqanman jina kay tiempopi discipulosninta yanapashallanpuni Diospa Gobiernonmanta jallpʼantinpi willanankupaj. Payqa Jehovaj llajtannejta wakichiwanchej sumaj willaykunata willanapaj, chaypajtaj necesitasqanchej yanapasta qowanchej (Mat. 28:18-20). Noqanchejtaj kʼuchis kananchej tiyan runasman predicaspa, yachachispa ima. Chantapis Jehová kay sajra mundota tukuchinanta suyakunanchejkama rijchʼarisqasllapuni kana. Hebreos 6:11, 12 yuyaychasqanman jina ruwasunchej chayqa, “tukukuykama” suyakuyninchejmanta chʼipakuyta atisun. Jehovaqa ninña maykʼajchus Satanaspa mundonta chinkarparichinanta. Chay pʼunchay chayamojtin, payqa Bibliaj profeciasninta juntʼanqapuni. Wakin kutis ichá yuyasunman kay mundoj imasninpa tukukuynin mana usqhayllatachu chayamushasqanta. Jinapis Jehovaj pʼunchaynenqa “mana qhepataqa chayamonqachu” (Hab. 2:3). Chayrayku Miqueas 7:7 nisqanta ruwayta munanchej. Chaypi nin: “Jehová Diosta suyakullasajpuni, salvawajniy Diosta pacienciawan suyakusaj”, nispa. w23.02 pág. 19 párrs. 15, 16

Lomaman wichariyta yachaj runaqa, loma puntamanpuni chayayta munan. Jinapis wicharishaspaqa ashkha lugarespi sayaspa kʼachitu imasta qhawaykacharin. Ajinallatataj noqanchejpis sapa kuti tumpata sayarinanchej tiyan, imaynatachus Jehová uj pruebata aguantanapaj yanapashawasqanchejpi piensarinapaj. Chayrayku sapa día tukukuyta tapurikusunman: “¿Ima bendicionestataj Jehovamanta kay pʼunchaypi japʼini? Llakiyllapipuni kashajtiypis, ¿imaynamantataj Jehová aguantanaypaj yanapashawan?”, nispa. Sapa día kallpachakuna Jehová bendeciwasqanchejmanta ujllatapis reparanapaj. Uj pruebapi kashaspaqa, tukuypis Jehovamanta mañakunchejpuni chay pruebanchejta tukuchinallantaña (Fili. 4:6). Jinapis ama qonqanachu imaynatachus kunan Jehová bendecishawasqanchejta. Jehovaqa niwanchej kallpata qonawanchejta, aguantanapajtaj yanapanawanchejta. Chayrayku yanapawasqanchejmanta agradecekunapuni. Chayta ruwasun chayqa, reparasun Jehovaqa pruebaspi kashajtinchejpis allin rinawanchejpaj yanapashawasqanchejta (Gén. 41:51, 52). w23.01 pág. 19 párrs. 17, 18

Kay tapuykunapi piensarina: ¿Kausayniypi sutʼichu rikukun kay mundoj tukukuynin may qayllitapiña kashasqanta entiendesqay? Universidadman riymantawan trabajomantawan imatachus yuyasqay, ¿rikuchinchu Jehovata sirviy aswan importante noqapaj kasqanta? ¿Atienekunichu Jehová noqata, familiaytapis cuidanawaykupi? Jehovaqa mayta kusikun munayninman jina kausakunapaj kallpachakojtinchej (Mat. 6:25-27, 33; Fili. 4:12, 13). Sapa kuti qhawarikunallanchejpuni tiyan imaynatachus yuyashasqanchejta, cambiananchej kajtintaj cambiana tiyan. Pabloqa Corintomanta cristianosman kayta yuyaycharqa: “Allinta qhawarikullaychejpuni, creeypi sinchʼitachus manachus sayashasqaykichejta yachanaykichejpaj. Allinta qhawarikullaychejpuni imayna runachus kasqaykichejta”, nispa (2 Cor. 13:5). Chayrayku yuyayninchejta mosojyachinallapuni tiyan. Chaypajtaj Diospa Palabranta leena, imaynatachus pay yuyasqanman jina yuyayta yachakuna. Cambiananchej kasqanta reparakuspataj payta kusichinapaj cambiana (1 Cor. 2:14-16). w23.01 pág. 9 párrs. 5, 6