Abril

Ñaupa tiempomanta Jehovaj kamachisnenqa mana yuyasqanku llakiykunapi rikhurerqanku. Ujnenqa karqa Jacob. Tatanqa kamacherqa tion Labanpa ujnin wawanwan casarakamunanta, chay tionqa Jehovata yupaychallajtaj. Chantapis nillarqataj Jehová ashkha bendicionesta qonanta (Gén. 28:1-4). Jacobqa kasukuspa allin kajta ruwarqa. Payqa Canaanman riporqa, viajarqataj tion Labán tiyakorqa chaykama. Labanpataqa iskay warmi wawasnin tiyaporqa, ujnin Lea sutikorqa, ujnintaj Raquel. Jacobqa sullkʼa kajta munakorqa, Raquelta. Paywan casarakunanraykutaj Labanpaj qanchis watasta trabajapunanta nerqa (Gén. 29:18). Jinapis mana yuyasqanman jinachu karqa. Labanqa Jacobta engañaykuspa kuraj wawan Leata warmin kananpaj qorqa. Semananmantaj wawan Raquelwanñataj casaracherqa. Chayrayku Jacobqa qanchis watastawanraj paypaj trabajanan karqa (Gén. 29:26, 27). Labanqa mana chayllatachu Jacobta ruwarqa. Payqa 20 watastapuni mana allinta pagaspa Jacobta trabajacherqa (Gén. 31:41, 42). w23.04 pág. 15 párr. 5

Sonqochayta chayri yuyaychayta necesitajtinchej, ¿pimantataj yanapata mañakusunman? Sutʼita yachanchej Jehovamanta mañakuyta atisqanchejta. Payllataj chayta ruwananchejta niwanchej. Pay munan paymanta ‘mana saykʼuspa mañakunallanchejtapuni’ (1 Tes. 5:17). Mana manchachikuspa paymanta mañakuyta atinchej. Chantapis kausayninchejpi imata ruwananchejpajpis paypa yuyaychayninta mañakuyta atinchej (Pro. 3:5, 6). Jehovaqa mana tiemponta michʼakunchu uyarinawanchejpaj, chayrayku payqa niwanchej mashkha kutistapis paymanta mañakunallanchejta. Jesusqa yacharqa orakusqanchejta Jehová may jatunpaj qhawasqanta. Payqa niraj jallpʼaman jamushaspa rikorqa imaynatachus Tatan kamachisninpa mañakusqankuta uyarisqanta. Anapis, Davidpis, Eliaspis, waj kamachisninpis Jehovamanta tukuy sonqo mañakorqanku, Jesustaj Tatanpa ladonpi kasharqa paykunaj mañakusqankuman kutichishajtin (1 Sam. 1:10, 11, 20; 1 Rey. 19:4-6; Sal. 32:5). Chayrayku Jesusqa discipulosninman nerqa mana saykʼuspa mañakunankuta, mana manchachikuspataj (Mat. 7:7-11). w23.05 pág. 2 párrs. 1, 3

Kuraj kaj sacerdote Jehoiadaqa Jehovata manchachikorqa. Jezabelpa wawan Ataliaqa Judapi kamachiyta qallarerqa mana paychu reina kanan kashajtinpis. Jehoiadataj chaypacha Jehovata manchachikusqanta rikucherqa. Ataliataqa tukuy manchachikoj kanku. Payqa manchay sajra warmipuni karqa, may atiyniyojtaj kayta munarqa. Chayrayku kamachinanpajqa reypa tukuy wawasninta wañurachiyta munarqa, allchhisnillantaj kashajtinkupis (2 Cró. 22:10, 11). Jinapis Jehoiadaj warmin Jehosabeat yanapasqanrayku, uj wawita salvakorqa. Payqa Jehoás sutikorqa. Jehoiadawan warminwanqa chay wawitata pakaykuspa cuidarqanku, ajinamanta Davidpa familianmanta reyes mana chinkananpaj yanapakorqanku. Jehoiadaqa Jehovata mana wasanchananrayku, Ataliata manchachikuspapis allin kajtapuni ruwarqa. Jehoás 7 watasniyoj kashajtin, Jehoiadaqa watejmanta rikucherqa Jehovata mana wasanchasqanta. Payqa uj imata ruwananta yuyaychakorqa. Chay yuyaychakusqan allin llojsejtenqa Jehoás rey kanman karqa, paytaj Davidpa mirayninmanta karqa. Mana allin llojsejtintaj Jehoiadaqa wañunman karqa. Pero Jehovaj yanapayninwanqa tukuy ima allin llojserqa. w23.06 pág. 17 párrs. 12, 13

Rey Nabucodonosorqa yuyayta atinman karqa Daniel contranpi oqharikushasqanta, wañuchinankutataj kamachinman karqa. Jinapis Danielqa mana manchachikuspa tukuy imata sutʼincharqa. ¿Imataj Danielta yanaparqa mana manchachikunanpaj? Jovenmantapacha maytachá tatasninmanta yachakorqa (Deu. 6:6-9). Danielqa mana Chunka Kamachiykunallatachu yacharqa. Payqa sumajta yacharqa ima mikhunastachus israelitas mikhuyta atisqankuta, imastatajchus mana (Lev. 11:4-8; Dan. 1:8, 11-13). Chantapis yacharqa imastachus Diospa llajtan ruwasqanta, mana kamachiykunasninta kasukojtintaj imapichus rikukusqanta (Dan. 9:10, 11). Tukuy kausayninpi imaschus pasasqanqa sutʼita payman rikucherqa Jehovawan, atiyniyoj angelesninwanqa yanapanankupaj paywanpuni kashasqankuta (Dan. 2:19-24; 10:12, 18, 19). w23.08 pág. 3 párrs. 5, 6

Rebecaqa sumaj yuyayniyoj warmi karqa, mana manchachikuspataj imatapis ruwaj. Chantapis yachaj maykʼajchus, imaynatachus imatapis ruwananta (Gén. 24:58; 27:5-17). Chantapis wajkunata respetaj, kasukojtaj (Gén. 24:17, 18, 65). Sichus qanpis Rebeca jinallataj kʼumuykukoj sonqo kanki, pikunamanchus Jehová atiyta qon chaykunatataj respetanki chayqa, familiaykipaj, congregacionpajpis sumaj ejemplo kanki. Tukuynin wiñay tukusqa cristianasqa llampʼu sonqollataj kananku tiyan. Diospa kamachin Esterpis ajina karqa. Reina kananpaj churajtinku payqa mana umata oqharerqachu. Chantapis payqa primon Mardoqueoj nisqanta uyarerqa, chayman jinataj ruwarqa (Est. 2:10, 20, 22). Qanpis pay jina kawaj wajkunawan yuyaycharichikuspa, chayman jinataj ruwaspa (Tito 2:3-5). Esterqa waj jinamanta rikuchillarqataj llampʼu sonqo kasqanta. Payqa “may kʼachita karqa, kʼachitu cuerpoyojtaj”. Jinapis mana alabachikuytachu maskʼarqa (Est. 2:7, 15). w23.12 págs. 19, 20 párrs. 6-8

Anchatañataj sonqonchej juchachawajtinchejqa, uj llasa qʼepi jina kanman. Sichus juchanchejta rimarinchejña, arrepientekunchejña, manaña chay juchapi urmanapajtaj kallpachakushanchej chayqa, ama iskayrayanachu Jehová perdonawasqanchejmanta (Hech. 3:19). Sichus chaykunata ruwanchejña chayqa, Jehovaqa munan manaña sonqonchej juchachanawanchejta. Payqa yachan ancha unaytañataj sonqonchej juchachawajtinchej, manapuni allinchu noqanchejpaj kasqanta (Sal. 31:10). Llakiywan atipachikusunman chayqa, wiñay kausayta japʼinapaj correshanchej chay ñanmanta llojsipusunman (2 Cor. 2:7). Sonqonchej anchatañataj juchachashawanchej chayqa, piensarina Diosninchej ‘perdonaspaqa perdonasqatapuni’ perdonawasqanchejpi (Sal. 130:4). Pipis sonqomantapacha arrepientekun chayqa, Jehová kayta nin: “Manañataj juchankumanta yuyarikusajchu”, nispa (Jer. 31:34). Chayqa niyta munan Jehová Diosninchejqa chay juchanchejta niña ujtawan yuyarichinawanchejta. Juchanchejrayku congregacionpi ruwanasta mana japʼiyta atinchej chayqa, ama saqenachu sonqonchej juchachanallawanchejtapuni. Jehovaqa qonqapunña ima juchastachus ruwasqanchejmanta. Noqanchejpis kikillantataj ruwana. w23.08 págs. 30, 31 párrs. 14, 15

Coronavirus onqoy tiempopi imaymana llulla noticias uyarikorqa. Chaykunata kasojkunataj imaymana problemaspi, llakiykunapi ima rikhurerqanku. Pero Jehovaj testigosnenqa Diospa llajtanpa kamachisqanta kasukusqankurayku mana chay imaspi rikukorqankuchu (Mat. 24:45). Chayrayku imaschus aswan allin imas kasqanta reparayta yachananchej tiyan (Fili. 1:9, 10). Imawanpis musphaykachaspaqa tiempollanchejta, kallpallanchejta usuchinchej. ¿Imastaj musphaykachachiwasunman? Mikhuy, ujyay, kusirikuy chayri trabajay. Chaykuna mana juchachu kajtinpis chaykunata ruwayllapi yuyasun chayqa musphaykachasunman (Luc. 21:34, 35). Chantapis sapa día uyarinchej chʼajwas kashasqanta, politicospis japʼinakushasqankuta. Ama saqenachu noqanchejtapis chay imas musphaykachachinawanchejta. Saqesunman chayqa sonqollanchejpipis paykunata apoyayta qallarisunman. Noqanchejqa allin kajtapuni ruwayta munanchej. Jinapis Satanasqa ashkha imasmanta valekun manaña sinchʼita sayananchejpaj. w23.07 págs. 16, 17 párrs. 12, 13

Sapa wata Jehovaj testigosninpaj aswan jatun pʼunchayqa Jesuspa wañuyninta yuyarikuy. Jesusqa chayllata yuyarikunanchejta kamachiwarqanchej (Luc. 22:19, 20). Chay tantakoyqa yuyarichiwanchej Jesuspa wañuyninmanta imaynasmantachus agradecekuyta atisqanchejta (2 Cor. 5:14, 15). Chantapis yanapallawanchejtaj hermanosninchejwan khuska karikunapaj, purajmantataj kallpachanakunapaj (Rom. 1:12). Ashkha runastaj chay tantakuypi imatachus rikusqankumanta, uyarisqankumantapis tʼukunku. Chayraykutaj Bibliamanta yachakuyta qallarinku. Chay diaqa Jehovaj llajtan imayna ujchasqachus kasqanta rikusunchej. Tukuy chay imasrayku Señorpa Cenanqa may sumajpuni noqanchejpaj. w24.01 pág. 8 párrs. 1-3

Jehovawan Jesuswan may jatun preciotapuni pagasqankupi tʼukurispaqa, aswan sumajta entiendesun sapa ujninchejta may jinatapunichus paykuna munakuwasqanchejta (Gál. 2:20). Jehovaqa munakuwasqanchejrayku chayta ruwarqa. Payqa saqerqa may munasqa Wawan sufrispa noqanchejrayku wañunanta. Ajinamanta rikuchiwarqanchej munakuwasqanchejta. Jehovaqa mana munakullawanchejchu, manachayqa munakuwasqanchejta niwanchej (Jer. 31:3). Jehovaqa munakuwasqanchejrayku payman pusamuwanchej (Deuteronomio 7:7, 8, kikinchay). Diospa munakuyninmantaqa ni pi, nitaj imapis tʼaqayta atiwasunmanchu (Rom. 8:38, 39). ¿Imaynataj sonqonchej kashan chaypi piensarispa? w24.01 pág. 28 párrs. 10, 11

Ajllasqa cristianosqa cielopi kausayta suyakusqankuta may jatunpaj qhawanku. Por ejemplo 1991 watapi, hermano Frederick Franz nerqa: “Imatachus suyakusqaykoqa juntʼakonqapuni. 144.000 ajllasqa cristianosqa imatachus Dios niwasqaykuta japʼisqaykupuni. Tʼinkaykoqa imaschus kapuwayku chaymantapis aswan sumajraj kanqa”, nispa. Chantá nillarqataj: “Imatachus suyakusqaykuta may valorniyojllapajpuni qhawayku, astawan suyakusqaykuman jina astawan chay suyakuyniykumanta agradecekuyku, unayta suyanayku kajtinpis suyakullaykumanpuni, mana qhasitachu suyakushayku. Kunanqa suyakuyniyta ni jaykʼaj jina aswan sumajpajraj qhawani”, nispa. Cielopi chayri kay jallpʼapi kausakuyta suyakuspapis, tukuyninchej may kusisqas kashanchej chay suyakuyniyoj kasqanchejmanta. Chay suyakuyninchejtaj, tiempo pasasqanman jina astawanraj sinchʼiyanman. w23.12 pág. 9 párr. 6; pág. 10 párr. 8

Diosta yupaychana toldo punkupeqa cobremanta uj ñaupa altar karqa, chaypitaj Jehovaman uywasta jaywaj kanku (Éxo. 27:1, 2; 40:29). Chaywanpis chay jaywanasqa mana runaspa juchasninkuta tukuyninta chinkachiyta atejchu (Heb. 10:1-3). Diosta yupaychana toldopi sapa kuti uywasta jaywakusqanqa, ninakorqa runaspa juchasninkuta qʼalatapuni pichanan karqa chay jaywanawan. Jesusqa yacharqa Jehovaqa payta kay jallpʼaman kachamusqanta kausayninta qonanpaj, chaywan runasta kacharichinanpaj (Mat. 20:28). Chayrayku Jesusqa bautizakushaspa Jehovaj ñaupaqenman rerqa munayninta ruwananpaj (Juan 6:38; Gál. 1:4). Payqa kausayninta “uj kutillata wiñaypaj” jaywarqa. Ajinamanta paypi creejkunaj juchasninku qʼala llimphuchasqa kananpaj (Heb. 10:5-7, 10). w23.10 págs. 26, 27 párrs. 10, 11

Sapallanchejmantaqa juchamantawan wañuymantawan ni jaykʼaj kacharichikuyta atisunmanchu karqa (Sal. 49:7, 8). Chayrayku Jehovaqa munasqa Wawanta kachamorqa kausayninta noqanchejrayku qonanpaj, ajinamanta iskayninku uj jatun preciota pagarqanku. Jehovawan Jesuswan noqanchejrayku imatachus ruwasqankupi astawan tʼukurispaqa, juchamanta kacharichisqa kasqanchejta aswan valorniyojpaj qhawasun. Adanqa juchallikusqantawan manaña wiñaypaj kausakuyta aterqachu, nillataj wawasninpis. Jesustaj imatachus Adán pierderqa chayta watejmanta japʼinanchejpaj mana pantayniyoj kausayninta qorqa. Jesusqa kay jallpʼapi kashajtin “mana ima juchatapis ruwarqachu, nitaj siminpi ima llullakuypis karqachu” (1 Ped. 2:22). Pay wañupushajtintaj mana pantayniyoj karqa. Chayrayku kausaynenqa Adán pierderqa chay jina valornillayojtaj karqa (1 Cor. 15:45; 1 Tim. 2:6). w24.01 pág. 10 párrs. 5, 6

Jesusqa kausarimuytawan mana rikukoj templomanta Aswan Santo Lugarman yaykorqa. Jehová payllata yupaychananchejpaj imatachus wakichisqanqa aswan sumajpuni. Chaytaj Jesuspa wañuyninpi sayachisqa kashan, Kuraj kaj Sacerdote Jesucristotaj pusashan. Toldopi kaj Aswan Santo Lugarqa runaspa makisnillanwan ruwasqa karqa, chaymantaj Israelmanta kuraj kaj sacerdote yaykoj animalespa yawarninku aparisqa. Jesustajrí chaymanta nisqa aswan santo lugarmanpuni yaykorqa: “Cielomanpuni”, Jehovaj ñaupaqenman. Chaypitaj mana juchayoj kausayninpa valorninta tukuyninchejrayku jaywarqa. “Ajinamanta pay kikin jaywaykukusqanwan juchata chinkachinanpaj” (Heb. 9:24-26). Cielopi chayri kay jallpʼapi kausakuyta suyakuspapis, Jehovaj mana rikukoj templonpi tukuyninchej payta yupaychayta atinchej. w23.10 pág. 28 párrs. 13, 14

Piensarina imatachus Jesús cielopi ruwashasqanpi Rey jina, khuyakoj Kuraj kaj Sacerdote jinataj. Jesusnejta “jatun khuyakuyta qoj Diospa kamachina tiyananman” qayllaykuyta atinchej mañakuynejta, khuyakuynintataj mañakuyta atinchej “yanapata necesitashajtinchejpuni” (Heb. 4:14, 15). Sapa día tʼukurinapuni Jehovawan Jesuswan imastañachus noqanchejrayku ruwasqankupi, imastatajchus kunan ruwashasqankupiwan. Paykuna munakuwasqanchejqa sonqonchejta kuyurichinan tiyan, tanqanawanchejtaj tiyan Jehovata sonqo kʼajaywan sirvinapaj (2 Cor. 5:14, 15). ¿Imaynamantataj agradecekusqanchejta rikuchisunman? Kallpachakuna runasta yanapanapaj Jehovaj testigosninman tukunankupaj, Cristoj discipulosninmanpis tukunankupaj (Mat. 28:19, 20). Apóstol Pablopis chayta ruwarqa, payqa yacharqa Diosqa munasqanta “tukuy laya runas salvakunankuta, cheqa kajtataj allinta rejsinankuta” (1 Tim. 2:3, 4). w23.10 págs. 22, 23 párrs. 13, 14

Chay textotaqa predicashaspa ashkha kutista oqharinchej runasta sonqocharinapaj, imaynachus kausay paraisopi kanantapis willarinapaj. ¿Imaynatá runasta yanapasunman Apocalipsis 21:3, 4 nisqan juntʼakunanpipuni atienekunankupaj? Noqanchejrí, ¿imatá ruwasunman Jehovapi, nisqasninpipis astawan atienekunapaj? Jehovaqa mana imatachus ruwanallantachu willawarqanchej, manaqa imaraykuchus chay nisqanpi atienekunanchejtapis willallawarqanchejtaj. Qhepan versiculospi reparanchej imaraykuchus Jehová paraíso kananta nisqanpi atienekuyta atisqanchejta. Chaypi nin: “Kamachina tiyanapi tiyasqa kajqa nerqa: ‘Tukuy imata mosojyachishani’, nispa. Nillarqataj: ‘Qhelqay, kay palabrasqa atienekunapaj jina kanku, cheqataj kanku’, nispa. Niwarqataj: ‘¡Juntʼakunña! Noqa kani Alfataj Omegataj, qallariytaj tukukuytaj’”, nispa (Apo. 21:5, 6 qallariynin). w23.11 pág. 3 párrs. 3-5

Jovenesqa Jehová jina yuyasqankuta rikuchinkuman imaynatachus vistikusqankuwan, imaynatachus peinakusqankuwanpis. Ropasta ruwajkuna, chay ropasta vendenankupaj propagandasta ruwajkunapis, mana Jehovata respetankuchu, astawanpis millay kausayniyoj kanku. Chayrayku ropa ruwasqankoqa manchay matʼiñataj kanku, chayta churakuspataj qharisqa warmis jina purinku. Uj joven wiñay tukusqa cristiano kayta munan chayqa, Bibliaj yuyaychaykunasninpiraj piensarenqa, congregacionmanta wiñay tukusqa cristianos jinataj ruwanqa vistikushaspa, arreglakushaspapis. Kay tapuykunapi piensarinman: “¿Ruwasqaywan rikuchinichu allin yuyayniyoj kasqayta, wajkunaj yuyasqankutapis respetasqayta? ¿Vistikusqaypi sutʼitachu rikuchini Jehovata sirvisqayta?” (1 Cor. 10:31-33). Allinta tanteayta yachaj jovenestaqa mana hermanosllachu respetanku, manaqa Tatanchej Jehovapis. w23.12 pág. 26 párr. 7

Pasaj wataspi “sur ladomanta rey” Jehovaj llajtanta qhatiykachallarqataj (Dan. 11:40). Primera Guerra Mundial kashajtin, Segunda Guerra Mundial kashajtinpis, guerraman mana riyta munasqankurayku ashkha hermanosninchejta carcelman wisqʼaykorqanku, wakin testigo wawastapis escuelamanta wijchʼorqanku. Jinapis kay qhepa watasllapi chay reypa kamachiyninpi tiyakoj hermanosqa, waj jinasmanta pruebaman churasqa kanku. Elecciones kajtin, ichapis uj cristianotaqa uj partidota chayri uj politicota apoyananpaj sonqon aysanman. Ni pipaj votajtinpis, ichapis yuyayninpi, sonqonpi munanman uj político ganananta. Politicaman ni imaynitata chhapukunapajqa, mana ruwasqallanchejtachu qhawarikunanchej tiyan, manaqa imatachus yuyasqanchejta, imachus sonqonchejpi kasqantapis (Juan 15:18, 19). w23.08 pág. 12 párr. 17

Wiñay kausayta premiota jina japʼinapajqa kay yuyaychayman jina ruwananchej tiyan: “Qankunapis premiota japʼinaykichejpaj jina correychej” (1 Cor. 9:24). Jesusqa kayta nerqa: “Pajtataj sonqoykichej atipachikunman anchata mikhuywan, anchata ujyaywan, kay kausaypa llakiykunasninwan ima”, nispa (Luc. 21:34). Kay versículo, waj versiculospis yanapawasun cambiananchej kajtenqa cambianapaj, ajinamanta wiñay kausayta japʼinanchejkama correnallapajpuni. Jehová kallpata qowasun tukukuykama correnapaj. Chayrayku sutʼita yachanchej wiñay kausayta japʼinakama correyta atisqanchejta (Isa. 40:29-31). Chayrayku ama saykʼunachu. Apóstol Pablo jina kana. Payqa tukuy atisqanta kallpachakorqa premiota japʼinanpaj (Fili. 3:13, 14). Ni pi noqanchejpaj correpuwasunmanchu, noqanchejpuni correnanchej tiyan. Jinapis Jehová chaypi kashan yanapanawanchejpaj. Pay qʼepinchejta apaysiwasun, yanapawasuntaj mana necesitasqanchej qʼepista wijchʼupunapaj. Paypa yanapayninwanqa tukukuykama correllasunpuni, atipasuntaj. w23.08 pág. 31 párrs. 16, 17

Jesusqa 12 watasniyoj kashajtin familianwan khuska Jerusalenman rerqa, watapi uj kutita ruwakoj chay fiestasmanta ujninman (Luc. 2:46-52). Josewan Mariawanqa Jerusalenmanta kutinpushaspa, mana repararqankuchu Jesusqa mana paykunawanchu kashasqanta. Tukuynin wawasninkuta paykuna tatas jina sumajta qhawananku karqa. Jesusta tariytawantaj Mariaqa kʼamerqa. Jesusqa niyta atinman karqa payta kʼamispa mana allintachu ruwashasqanta, jinapis mana chaytachu nerqa. Astawanpis respetowan kuticherqa. Josewan Mariawantaj “mana entienderqankuchu chay nisqanta”. Jinapis Jesusqa paykunata “kasukullarqapuni”. Joven, tatasniyki pantajtinku chayri mana entiendesojtinku, ¿kasukuyta atillankichu? ¿Imataj yanapasunkiman kasukuyta atinallaykipaj? Yuyarikuy kasukojtiyki imaynachus Jehová kashasqanta. Bibliaqa nin wawas tatasninkuta kasukusqanku ‘Señorta mayta kusichisqanta’ (Col. 3:20). Jehovaqa yachan wakin kutis tatasniyki mana entiendesusqankuta, chayri mana kasukuyta atinaykipaj jina kamachiykunata qosusqankuta. Ajina kajtinpis paykunata kasukunkipuni chayqa, Jehovata mayta kusichinki. w23.10 pág. 7 párrs. 5, 6

Ichapis colegiomanta uj compañeronchej niwasunman Jehovaj testigosnin qharipura chayri warmipura puñuykuymanta imatachus yuyasqanchejta cambiananchej kasqanta. Ichapis payman willarinanchej kanqa tukuy runaspa yuyasqankuta respetasqanchejta (1 Ped. 2:17). Ajinamanta ichapis saqewasun sutʼincharinanchejta imaraykuchus Bibliaj nisqanta kasukuy allin kasqanta. Ichá pillapis niwasunman creenciasninchejta manapuni allinpajchu qhawasqanta. Jina kajtin, ¿chay ratochu nisunman imatachus yuyasqanta allinta yachasqanchejtaña? Mana allinchu kanman chayta ruwananchejqa. Ichá colegiomanta uj compañeroyki nisunkiman “Diospeqa sonsoslla creenku” nispa. ¿Chayraykuchu niwaj Diospi mana creesqanta, tukuy imatañataj chaymanta yachasqanta? Ichapis ni jaykʼaj paypuni chayta ukhuncharqachu. Ichapis jw.org nisqapi kaj uj yachaqanamanta chayri uj videomanta uj linkta apachiwaj, maypichus Dios tukuy imata ruwasqanmanta parlashan chayta. Chayta ruwajtiyki, ichapis qhepanpi astawan yachayta munanman. Respetowan parlarinki chayqa, ichapis manaña ajinatachu yuyanman, Bibliamantapis yachakuyta munanman. w23.09 pág. 17 párrs. 12, 13

Pantajtinchejpis Jehovapaj watejmanta llankʼayta atisunman, bendicionesnintapis watejmanta japʼiyta atisunman. Pero chaypajqa tukuy atisqanchejta kallpachakunanchej tiyan cambianapaj, Jehovapitaj atienekunallapajpuni (Pro. 28:13). Sansonqa pantaj runa kaspapis, Dalilawan sonqonta suwachikuspa mana allinta ruwaspapis, kallpachakullarqapuni Jehovata sirvinanpaj. Jehovataj mana wijchʼurparqachu, astawanpis paynejta tʼukuna imasta ruwallarqapuni. Jehovaqa sinchʼi creeyniyoj runata jinallapuni Sansonta qhawarqa. Chayrayku Hebreos 11 capitulopi kasukoj kamachisninpa sutisninkuta churachispa, Sansonpa sutintawan churacherqa. Tatanchej Jehovaqa mayta munakuwanchej, kallpatataj qoyta munawanchej, astawanraj problemaspi kashajtinchej, yanapaynintataj necesitajtinchej. Chayta yachaytaj mayta kallpachawanchej. Chayrayku Sansón jinallataj Jehovamanta mañakuna: ‘Ama jina kaspa noqamanta yuyarikuway ari. Diosníy, ama jina kaspa kallpata qoway ari’, nispa (Jue. 16:28). w23.09 págs. 6, 7 párrs. 18, 19

Noqanchejqa yachanchej Jehovaj pʼunchaynin qayllitapiña kashasqanta. Chayrayku munanchej wajkunaman Diospa Gobiernonmanta tukuy atisqanchejta willariyta. Pero wakin kutisqa ichá manchikusunman willariyta. ¿Imajtin? Runata manchikusqanchejrayku. Pedropis ajinapi rikukorqa Jesusta juzgasharqanku chay chʼisi. Pedroqa mana Jesuspa discipulon jinachu rejsichikorqa, kinsa kutispitaj Jesusta mana rejsisqanta nerqa (Mat. 26:69-75). Jinapis Pedroqa manchikuyninta atiparqa. Aswan qhepamantaj nerqa: “Ama manchachikuychejchu imastachus runas manchachikunku chayta, nitaj llakikuychejchu”, nispa (1 Ped. 3:14). Chay nisqanpi sutʼita reparanchej manchikuyninchejta atipayta atisqanchejta. ¿Imataj yanapawasun runata manchachikuyta atipanapaj? Pedroj yuyaychasqan. Pay nerqa: “Sonqoykichejpi Cristota Señorniykichejta jina jatunchaychej”, nispa (1 Ped. 3:15). Chaypajtaj tʼukurinanchej tiyan Señorninchej Jesucristoqa Reyña kasqanpi, may atiyniyojtaj kasqanpi. w23.09 pág. 27 párrs. 6-8

Sumajta qhawarikunanchej tiyan ama “laqha kajpa qhasi manakaj ruwaykunasninta” ruwaysikunanchejpaj (Efe. 5:11). Sutʼita yachakun pichus chʼichi imasta, khuchichakuy imasta qhawallanpuni, uyarillanpuni, chay imasllamantapuni parlan chayqa, juchaman facilta urmayta atisqanta (Gén. 3:6; Sant. 1:14, 15). Satanaspa ujnin trampanqa kay kashan: Payqa runaspa yuyayninkuta laqhayachiyta munan allin kajta, mana allin kajtapis mana reparanankupaj (Isa. 5:20; 2 Cor. 4:4). Chayrayku kay mundoqa creechiyta munawanchej imatachus Jehová chʼichipaj, millaypaj qhawasqanqa mana sajrapunichu kasqanta (2 Ped. 2:19). Chayraykuchá may chhika peliculaspi, telepi programaspi, Internetpipis mana allin imas rikhurin. Chaykunataj mana yanapawanchejchu Jehovaj kamachiykunasninman jina yuyanapaj. Kay mundopi runasqa imatapis ruwarpallanku, kausayninkupis may millay. Diablotaj yuyachiyta munawanchej chaykunaqa mana sajrachu kasqanta (Efe. 5:6). w24.03 pág. 22 párrs. 8-10

Diosta yupaychana toldotaqa Dioswan tinkukuna toldo nispa sutichallajtaj kanku. Chaypitaj israelitas tantakoj kanku Diosta yupaychanankupaj, uywastataj ofrendasta jina jaywanankupaj (Éxo. 29:43-46). Diosta yupaychana toldotaqa maymanchá rej kanku chayman apallajtaj kanku (Éxo. 25:8, 9; Núm. 9:22). Chaypi Diosta yupaycharqanku casi 500 watasta jina, Jerusalenpi templo ruwakunankama. Diosta yupaychana toldoqa ‘cielopi kaj imaspa’ llanthun jinalla karqa, ninakorqataj Jehovaj mana rikukoj jatun templonwan. Apóstol Pablo nerqa: “Chay toldoqa kay tiempopi imaschus kashan chaykunawan kikinchakun”, nispa (Heb. 9:9). Chayrayku hebreosman chayta qhelqashajtin, Diospa mana rikukoj templonqa karqaña. Chay mana rikukoj temploqa 29 watapi rikhurerqa. Chay watapi Jesusqa bautizakuspa Jehovaj mana rikukoj templonpi ‘aswan kuraj kaj sacerdote jina’ sirviyta qallarerqa (Heb. 4:14; Hech. 10:37, 38). w23.10 pág. 26 párrs. 6, 7

Kausayninchejpi llakiykuna rikhurejtin, Jehovata kusiywan sirvinallapajpuni, ¿imatá ruwasunman? Kausayninchejpi imapis cambiajtin chayman yachaykukuna, wajkunaj nisqankuta, imatachus ajllakusqankutapis respetaspa. Jehovata sirvejkunaqa mana nisqanchejtapunichu valechiyta munanchej. Chantapis munallanchejtaj kʼumuykukoj sonqos kayta, khuyakuytapis. Bibliaqa nin Jehovaqa “pakakuna Chhanka” kasqanta, chhanka jina sinchʼi sayasqa kasqanrayku (Deu. 32:4). Jinapis Jehovaqa mana nisqantapunichu valechin. ¿Imaraykú chayta ninchej? Kay mundopi tukuy ima cambiajtinpis payqa chay cambiosman jina tukuy imata ruwallanpuni munayninta juntʼananpaj. Noqanchejpis Jehovaj rijchʼayninman jina ruwasqa kasqanchejrayku, kausayninchejpi imapis cambiajtin Jehová jina ruwayta atillanchejtaj. Jehovaqa palabranpi sumaj sutʼi yuyaychaykunata qowanchej. Chaytaj yanapawanchej ima problema kajtinpis allin kajtapuni ajllanapaj. Imaynatachus Jehová imatapis ruwasqanpi, ima yuyaychaykunatachus qowasqanchejpi sutʼita reparanchej payqa sinchʼi sayasqa Dios kasqanta, jinapis mana nisqantapunichu valechisqanta. w23.07 pág. 20 párrs. 1-3

Jehovaqa Bibliapi may kʼacha mamawan kikinchakun (Isa. 66:12, 13). Uj mama wawitanta manchay munakuywan cuidasqanpi piensarina. Mamaqa ima kajtinpis chay rato wawitanta atiendej corren. Ajinallatataj Jehovapis llakiypi kashajtinchej ladonchejpipuni kanqa. Pantajtinchejpis payqa munakullawanchejpuni (Sal. 103:8). Israelitasqa Jehovata kutin kutita phiñacherqanku, chaywanpis paykuna arrepientekojtinku, Jehovaqa paykunata munakullasqantapuni rikucherqa. Uj kutipi Jehovaqa llajtanman nerqa: “Ñaupaqeypeqa valorniyojman tukorqanki, jatunchasqa karqanki, noqataj munakuyki”, nispa (Isa. 43:4, 5). Kunanpis Jehovaqa kikillanpuni, mana cambianchu. Jatun juchapi urmajtinchejpis, sichus arrepientekusun, paymantaj kutinpusun chayqa, payqa munakullawasunpuni. Payqa niwanchej “mana michʼakuspa” perdonanawanchejta (Isa. 55:7). Bibliaqa nin Jehová perdonawajtinchej noqanchejpaj “samarikuna tiempos” jamusqanta (Hech. 3:19). w24.01 pág. 27 párrs. 4, 5

Pruebaspi rikukojtinchej Jehová yanapawasunman. Ichapis uj asambleaman rinanchejpaj jefenchejmanta permisota mañakunanchej kanqa, chayri jefenchejwan parlananchej kanqa reunionesman mana faltakunapaj horarionchejta cambianawanchejta. Chay kutispi sutʼita reparayta atisunman Jehová noqanchejwan kashasqanta. Ichapis tʼukunapaj jina may allinpuni riwasun, Jehovapitaj astawan atienekusun. Esdrasqa kʼumuykukoj sonqo karqa, Jehovamantataj yanapata mañakorqa. Payqa imatapis mana ruwayta atispa, Jehovamanta kʼumuykukoj sonqowan yanapata mañakoj (Esd. 8:21-23; 9:3-5). Wajkunataj Diospi atienekusqanta rikuspa Esdrasta yanaparqanku, pay jinataj creeyniyoj karqanku (Esd. 10:1-4). Noqanchejpis qolqemanta pisisqa kasqanchejrayku, chayri familianchejmanta llakikusqanchejrayku ichá ni puñukuytapis atinchejchu. Jina kajtenqa Jehovamanta yanapata mañakuna, nitaj iskayrayanachu pay yanapanawanchejmanta. w23.11 pág. 18 párrs. 15-17

Jehovaqa mana ninchu cheqan runaspaj qhawanawanchejpaj, Abrahán imastachus ruwarqa chay kikin imasllatataj ruwananchejta. Ashkha imaynasmanta rikuchisunman creeyniyoj kasqanchejta. Congregacionninchejpi mosojkunata tukuy sonqo japʼikusunman, necesitaj hermanosta yanaparisunman, familiaresninchejtapis yanaparisunman. Tukuy chayqa Jehovata mayta kusichin (Rom. 15:7; 1 Tim. 5:4, 8; 1 Juan 3:18). Chaykunamanta aswan sumajtaj sonqo kʼajaywan predicay. Chaywan creeyninchejta rikuchillanchejtaj (1 Tim. 4:16). Tukuyninchej ruwasqasninchejwan rikuchisunman, Jehová nisqasninta juntʼananpi creesqanchejta, payllataj tukuy imata may sumajta ruwasqanpi creesqanchejta. Chayta ruwasun chayqa Diosninchejqa cheqan runaspaj, amigosninpajtaj qhawawasun. w23.12 pág. 2 párr. 3; pág. 6 párr. 15

Apóstol Pabloqa kay pʼunchaypaj textopi nisqanta corintiosman yuyaycharqa. Allin kanman tukuy cristiano qharis chay yuyaychayta kasukunanku. Kausayninkupi allin rinanpajqa, Jehovaj kamachiykunasninta kasuyta yachakunanku tiyan, Bibliaj yuyaychaykunasninman jinataj kausakunanku tiyan (Luc. 2:52). ¿Imaraykutaj sumaj kanman jovencitos wiñay tukusqa cristianosman tukunanku? Qhari hermanosqa ashkha ruwanasniyoj kanku wasinkupi, congregacionpipis. Jovencitollaraj kanki chay, ichapis piensarerqanki aswan qhepaman imaspichus yanapakunaykita. Ichapis precursor kayta munanki, chayri siervo ministerial, aswan qhepamantaj anciano. Ichá munallankitaj casarakuyta, wawasniyoj kaytapis (Efe. 6:4; 1 Tim. 3:1). Chay tukuy imasta ruwanaykipaj, sumajtaj risunanpajqa wiñay tukusqa cristiano kanayki tiyan. w23.12 pág. 24 párrs. 1, 2

Jehová ancianosta churan munasqa ovejitasninta cuidanankupaj. Paykunaqa mayta agradecekunku Jehová chay cargota paykunaman qosqanmanta, ‘allin michejkuna’ kanankupajtaj kallpachakunku (Jer. 23:4; 1 Ped. 5:2). May sumajpuni ajina ancianos congregacionespi kasqanqa. Ancianosqa mayta yachakunkuman juez Gedeonmanta (Heb. 6:12). Payqa Diospa llajtanta cuidaj, ovejitasta jinataj michej (Jue. 2:16; 1 Cró. 17:6). Kay llakiy tiempospipis, ancianosqa Gedeón jinallataj Diospa llajtanta cuidananku tiyan (Hech. 20:28; 2 Tim. 3:1). Chayrayku Gedeón llampʼu sonqo, kʼumuykukoj sonqo, kasukoj kasqanmanta, aguantasqanmantapis mayta yachakunkuman. Noqanchejpis Gedeonmanta yachakullasunmantaj ancianospa ruwasqankuta sapa día jatunpaj qhawayta, tukuy sonqotaj paykunata yanapayta (Heb. 13:17). w23.06 pág. 2 párrs. 1, 3