¿Imatá ruwasunman paraisopi kausanapaj?

Ñaupaj yachaqanaspeqa yachakorqanchej tumpamantawan Diosqa sajra runasta, llakiykunata ima chinkachinanta. ¿Imaraykutaj chay juntʼakunanpi atienekusunman? Imaraykuchus Diospa Palabran niwanchej:

“Kay mundoqa tukukapushan” (1 JUAN 2:17).

Yachanchej salvakoj runas kanankuta, imaraykuchus chay versiculollapitaj niwanchej:

“Diospa munayninta ruwajrí wiñaypaj kausanqa”.

Chayrayku salvakunapajqa Diosta kasukunanchej tiyan. Payta kasukunapajtaj ñaupajta rejsinanchejraj tiyan.

SALVAKUNAPAJ DIOSTA REJSINA

Fotos: 1) Uj enfermera saykʼusqa, llakisqataj pampapi chukushan. 2) Kikin enfermerallataj teycituta tomaspa reparan ujnin compañeran kusisqa uj revistata leeshasqanta. 3) Compañeranqa Bibliamanta uj textota leeripushan, jw.org paginaman yaykunanpaj uj tarjetitata jaywashan.

Jesús nerqa: “Kaymin wiñay kausayqa: Qan kʼata cheqa Diosta rejsisunanku”, nispa (Juan 17:3). Kay mundoj tukukuynin pʼunchaypi salvakunapaj wiñaypajtaj kausakunapaj Diosta rejsinanchej tiyan. Chaywanpis mana Dios kasqallantachu, chayri paymanta wakin imasllatachu yachananchej tiyan. Astawanpis Diospa amigosnin kananchej tiyan. Pillawanpis amigosta ruwakuyta munanchej chayqa paypaj tiempochakunchej. Dioswan amigos kanapajpis kikillantaj. Bibliamanta wakin yachachiykunasninta qhawarina, chaytaj Diospa amigosnin kanapaj, paymanta mana karunchakunapaj ima yanapawasun.

Biblia yachachin

Dios paraisopi kausananchejtapuni munarqa.

Diosqa ñaupaj kaj runasta ruwarqa, nisunman Adantawan Evatawan. Edén sutiyoj huertamantaj churarqa. Paykunaqa mana pantayniyoj karqanku, chantapis Diosqa kusisqa kausakunankupaj tukuy necesitasqankuta qorqa. Paykuna Diospa amigosnillankupuni kankuman karqa chayqa wiñaypaj kausakunkuman karqa. Chaywanpis, llakikunapaj jina Diospa kamachisqanta mana kasukorqankuchu.

¿Imaraykutaj ñakʼarinchej?

Adanqa, Diosta mana kasukusqanrayku paypaj, mirayninpajpis wiñay kausayta chinkacherqa. Biblia niwanchej: “Uj runanejta jucha kay mundoman yaykumorqa, jucharaykutaj wañuypis tiyan. Ajinamanta wañoyqa tukuy runasman chayarqa”, nispa (Romanos 5:12). Imaynatachus uj wawa tatasninpa onqoyninkuwan nacekunman, ajinallatataj tukuypis Adanpa wawasnin kasqanchejrayku juchayoj nacekunchej, jucharaykutaj machuyanchej, wañupunchej ima.

Diosqa uj imata ruwanña yanapanawanchejpaj.

Biblia nin: “Diosqa chay jinatapuni kay mundomanta runasta munakusqanrayku, uj kʼata Wawanta qorqa, ajinamanta pillapis paypi creejqa mana wañunanpaj, manachayqa wiñay kausayniyoj kananpaj”, nispa (Juan 3:16). Diosqa Jesusta kay jallpʼaman kachamorqa kausayninta noqanchejrayku qonanpaj. 86 watasniyoj Indiamanta Prabhakar sutiyoj runa, Diospa ruwasqanpi tʼukurispa kayta nin: “Jehováa ruwasqanqa mayta munakuwasqanta rikuchiwan. Chay munakuynintaj wiñaypaj kausakuyta suyakunaypaj yanapawan”, nispa.

Dios noqanchejrayku ruwasqanmanta agradecekuna.

Biblia niwanchej Diospa ruwasqanmanta agradecekunapajqa ‘kamachisqasninta kasukunanchej’ tiyan (1 Juan 2:3). Jehová Diosqa munakuywan yachachiwanchej imaynatachus kay tiempopi kusisqa kausakunanchejta (Isaías 48:17, 18). Dios mana munanchu sufrinanchejta, chayrayku payta kasukusun chayqa kay tiempopi kusisqa kausakusun, qhepamantaj wiñay kausayta japʼisun.

BIBLIATA SAPA DÍA LEENA

Enfermeraqa mikhuna horasta Bibliata leeytawan cielota qhawarishan. — Kay mundoj tukukuyninmanta salvakunapajqa Diosmanta yanapata mañakuna, munasqanman jinataj kausakuna.

Kausanapajqa sapa día mikhunchej. Chaywanpis Jesús nerqa: “Runaqa mana tʼantallawanchu kausanqa, astawanqa Jehová Diospa siminmanta tukuy llojsimoj palabraswan kausanqa”, nispa (Mateo 4:4).

Diospa parlasqantaqa Bibliapi yachasunman. Bibliata estudiaspaqa yachakunchej imatachus Dios pasaj tiempopi ruwasqanmanta, imatachus kunan ruwashasqanmanta, imatatajchus qhepaman ruwananmantapis.

DIOSPA YANAPAYNINTA MAÑAKUNA

Wakin kutis Diosta kasukuyta munaspapis paypa chejnisqan imasta mana saqeyta atillasunmanchu. Jinapi rikukojtinchej, ¿imataj yanapawasunman? Diosta allinta rejsiy mayta yanapawasunman.

Sakura sutiyoj warmimanta parlarina. Payqa khuchi kausayniyoj karqa. Chaywanpis Bibliata estudiayta qallarejtin, ‘khuchichakuy juchamanta ayqenanchejta’ Dios kamachisqanta yachakorqa (1 Corintios 6:18). Sakura kausayninta cambiananpaj Diosmanta kallpata mañakorqa, ajinamanta millay kausayninta saqeporqa. Chaywanpis juchapi mana urmananpaj kallpachakushallanpuni. Pay nin: “Khuchi yuyaykuna umayman jamojtin, Jehovaman sutʼita willakuni, imaraykuchus yachani sapallaymantaqa mana atipayta atinayta. Ajinata mañakusqayqa Jehovaman astawan qayllaykuchiwan”, nispa. Sakura jinallataj may ashkha runas Diosta rejsishanku. Diostaj paykunata yanapashan kausayninkuta tijrachinankupaj, paypa munayninman jinataj kausakunankupaj (Filipenses 4:13).

Diosta astawan rejsisun chayqa paypis astawan rejsillawasuntaj, amigosnin jinataj qhawawasun (Gálatas 4:9; Salmo 25:14). Ajinamanta kay mundoj tukukuynin chamojtin salvakusunchej, paraisopitaj kausakuyta atisunchej. Chanta, ¿imaynataj paraíso kanqa? Qhepan yachaqanapi chayta sutʼinchakonqa.

a Bibliaqa nin Diospa sutin Jehová kasqanta.