¿Imanirtaj Jesuspäga Jehovapa jutin alapa importante caycan?

1, 2. 1) Wanunanpäna caycar, ¿imata Jesús rurargan chay chacaycho? 2) ¿Imata yachacushun cay yachacuycho?

CHAY chacay cargan jueves junaj, 33 watacho, 14 nisán quilla; walcalana pishiycargan Jesús traiciunashga cananpaj, astananpaj, magananpaj y juzgar wanuchinanpaj. Payga apostulnincunawan juc wasipa altusnincho shuntacashga caycargan. Cenata usharirna apostulcunata shacyächiylapa parlapargan. Nircur apostulcuna manaraj aywacuptin shongupita Taytanta mañacurgan. Mañacushganpita Juan 17 caj capitulucho caycan, quiquin Juan guelgashgan.

² Tantiarcushun imata yachacunchi Jesús mañacushganpita. ¿Mañacushgan horacho Jesús imapita yarpachacoj? Y cay Pachacho caycar caway vidancho, ¿imata paypaj más ali cashga?

“JUTIQUITA REGUICHISHCÄ”

3. ¿Imata nergan Jesús Taytanpa jutinpita, y ima niyta munaycargan? (Juan 17:6, 26).

³ Mañacuynincho Jesús Taytan Jehovata nergan: “Jutiquita reguichishcä”. Paypäga alapa alimi cargan, chaymi ishcay cuti “jutiquita reguichishcä” nergan (leiriy Juan 17:6, 26, TNM).a ¿Jesús discipuluncunata yachaycächerganchu Diospa jutin Jehová cashganta? Manami. Discipuluncuna musyapäcurgan imata Diospa jutin cashganta. Unay testamentucho Diospa jutin yurimushga waranga cutipitapis maschomi. “Jutiquita reguichishcä” nerga parlaycargan Jehová imano cashganta, cuyacoj cashganta, imata munashganta y rurashgantapis. Manami pipis Jesusno reguirganchu Taytan Jehovata, chaymi paynoga manami pipis yachachicunmanchu Taytanpita.

4, 5. 1) ¿Imanirtaj pipa jutinpis cuyashga y respetashga canman noganchipaj? Wilacaramuy juc tincuchicuywan. 2) ¿Imanopataj Jehovapa jutin respetashga y cuyashga cashga apostulcunapaj?

⁴ Cayman yarpäshun, capazchi congregaciunniquicho reguishcanqui juc anciano operacoj cashganta, jutinshi Daniel, y achca watapana payta reguinquipis. Y gueshya capazchi ilajpita charishunqui, chay hora rasla apashunqui hospitalcho hermano arushganman, y pay yachashganwan yanapäshunqui vidayquita salvananpaj. ¿Manacu yanapäshushgayquipita chay hermanuta alapa cuyanqui? Jina jutinta wiyarpis, ¿manacu yarpanqui imano chay hermano yanapäshushgayquita? Chaypita Danielta manami ancianuyquitanolachu ricanqui sinoga caway vidayquita salvashushgayquita. Cananga más alita ricanqui taytayquitanomi.

⁵ Chaynolami Jesuspa discipuluncuna Jehovapa jutinta reguirpis, paycunaga Jehová imano cashganta masmi reguipäcurgan. Payga ricächicurgan rurayninwan y parlayninwan imano Taytan cuyacoj cashganta. Jesús runacunata cuyacuywan yachachishganta ali tratashganta ricar apostulnincuna Jehovata masraj reguirgan (Juan 14:9; 17:3).

“QUIQUIQUIPA JUTIQUITA GOMASHGAYQUITA”

6. “Quiquiquipa jutiquita gomashgayquita” niptenga, ¿ima niytataj munaycargan Jesús? (Juan 17:11, 12).

⁶ Discipuluncunaman yarpar, Jesús cayno mañacurgan Taytan Jehovata: “quiquiquipa jutiquita gomashgayquita, chapayculay paycunata jutiquiraycu” (Juan 17:11, 12, TNM). Chauraga, ¿chaypita niycargancu Jesuspa jutin Jehová cashganta? Manami. Cayman yarpay: Jesús mañacuynincho niycargan “quiquiquipa jutiquita gomashgayquita”. Chaywanga Jesús jutinta manami trucachirganchu Jehovapa jutinwan. Jehová Jesusta cachamurgan paypa jutincho parlananpaj y milagrucunatapis ruraj Taytanpa jutinchomi (Juan 5:43; 10:25). Jina, Jesuspa jutin ninan “Jehová salvacojmi caycan”. Chauraga Jesuspa jutinpita parlarga parlaycanchi Jehovapa jutinpitapis.

7. Juc tincuchicuywan wilacaramuy imanirtaj Jesús Taytanpa jutincho parlargan.

⁷ Shumaj tantiananchipaj cayman yarpäshun: jatun carguyoj runa juc runata acran jutincho parlananpaj. Chaypita chay runa, juc autoridäwan parlaptin quiquin jatun carguyoj runa parlashganno caycanga. Chaynolami Jehovaga Jesusta acrargan jutincho parlananpaj (Mat. 21:9; Luc. 13:35).

8. Jesús cay Pachaman manaraj shamuptin, ¿imanopataj Jehovapa jutin Jesuscho caycargan? (Éxodo 23:20, 21).

⁸ Biblia wilamanchi Jesusga Jehovapa Palabran cashganta, chaymi Jehová Jesusta acrashga jutincho parlananpaj angelcunawan y runacunawanpis (Juan 1:1-3). Capazchi Jehová juc angeltano Jesusta mandargan, jäcoj o chunyaj jircacho israelitacunata yanapänanpaj y pushananpajpis. ¿Imanirtaj chay angelta cäsucunan cargan? Jehová nergan: “Jutëmi paycho caycan” (Ex. 23:20, 21, TNM).b ¿Imanopataj Jehovapa jutin caycargan Jesuscho? Jesús Jehovapa jutincho parlar paypaj favornincho sharcun, y musyachicun jutintapis santificashga cananpaj.

“PAPÄ, JUTIQUITA RESPETACHIY”

9. Jesuspaj Taytanpa jutin, ¿imanirtaj alapa importante cashga?

⁹ Yachacushganchino Jesús cay Pachaman manaraj shamur paypäga Taytanpa jutin más importante caycargan. Y cay Pachacho caycarna ricächicurgan rurashgancunawan Taytan Jehovapa jutin ali ricashga caycänanpaj cajta. Mañacushgancho usharir cayno nergan: “Papä, jutiquita respetachiy” nir. Y mañacushganta wiyar cielupita Taytan fuertipa cayno contestamurgan: “Respetachishcämi y yapaypis respetachishaj” (Juan 12:28, TNM).

10, 11. 1) ¿Imanopataj Jesús Taytanpa jutinta respetachergan? (Dibujutapis ricay). 2) ¿Imanirtaj Jehovapa jutinta santificashwan y defendishwan?

¹⁰ Jesuspis Taytanpa jutinta respetachergan, ¿imanopataj chayta rurargan? Runacunata yachachir Taytan cuyacoj cashganta, y imaycancunata camashganpitapis. Jina Jesús musyachicurgan Taytanpa jutin santo puro limpio cashganta y lutancunata parlashganpita defindirganmi. Jesús munargan Taytanpa jutin alapa respetashga, santo y limpio cananpaj, y waquincuna lutanta parlashganpitapis defendirgan. Jesús discipuluncunata mañacunanpaj yachachir cayno nergan: “Jana patsacho kaykaq Papä, qampa jutiki respitashqa kaykulätsun” (Mat. 6:9).

¹¹ ¿Imanirtaj santificashwan y defendishwan Jehovapa jutinta? Edén huertacho Satanás mana cajta parlar Jehovapita nergan lulapar Adán Evata ali cajcunata michäcur alicunata mana goshganta (Gén. 3:1-5). Jina Satanás nergan Jehová mana alita ruraycashganta, chay nishganwan Jehovapa jutinta ganratachergan. Y Jobpita parlar nergan Dios bendeciptinlami pay sirvishganta. Noganchipajpis chay lulacoj nin Jehovata sirviycanchi bendecimashganchiraycurla, pero imayca pruebacunapa pasaptinchi manana Jehovata sirvishunnachu (Job 1:9-11; 2:4). Tiempuwanrämi musyachicurgan pitaj lulacoj caycan: Jehová o Satanás.

“CAWAY VIDÄTA ENTREGAYCÖ”

12. ¿Imata rurananpätaj Jesús listo caycargan Taytanpa jutinraycu?

¹² Jesús Taytanta alapa cuyashganraycu imaycacunata rurargan jutin santificashga y respetashga cananpaj. Chaymi nergan: “Caway vidäta entregaycö” (Juan 10:17, 18, TNM). Chauraga Jesús listo caycargan Taytanpa jutinraycu wanunanpaj.c Ichanga Adán y Eva Satanasta cäsucur Jehovapa contrancho churacargan. Pero Jesusga Taytanta cuyashpanmi cay Pachaman shamur lapancho payta cäsucurgan (Heb. 4:15; 5:7-10). Paymi nacananpaj guerucho wanushgancama Taytalanta imaypis cäsucurgan y yäracurganpis (Heb. 12:2). Chayno musyachicurgan Jehovata y jutintapis alapa cuyashganta.

13. ¿Imanirtaj Jesusla musyachicunman cargan Satanás lulacoj cashganta? (Dibujutapis ricay).

¹³ Jesús caway vidancho Päpaninta cäsucur ricächicurgan Satanás lula cashganta, manami Jehovachu (Juan 8:44). Jesuslami pipitapis más Taytanta reguin. Satanás imaycacunata lulacur Jehovapita parlargan, maygalanpis parlashganga rasun captenga Jesús musyanman cargan. Payga decidido caycargan Taytanpa jutinta defendinanpaj. Wanunanpäna caycaptin Papänin cacharishganta yarparpis cuyacoj Taytanman yäracur listo caycargan cäsucunanpaj (Mat. 27:46).d

“LAPAN NIMASHQAYKIKUNATA KAY PATSACHO CUMPLISHQÄ”

14. Jesús cäsucushganpita, ¿imanotaj Jehová bendecirgan?

¹⁴ Juc chacaycho manaraj wanur Jesús Taytanta mañacur cayno nergan: “Runakuna alabashunaykipaqmi lapan nimashqaykikunata kay patsacho cumplishqä”. Payga musyargan cäsucushganpita Taytan bendicinanpaj cajta (Juan 17:4). Y chaynomi cashga, Jehovaga manami permitirganchu pamparashgalancho quedacunanpaj (Hech. 2:23, 24). Chaypa trucan cawariycächimur paytaga cielucho churashga “lapanpitapis mas munayniyuq kananpaq” (Filip. 2:8, 9). Nircur achca wata pasariptin Jesús cielucho gobernar galaycush. ¿Y imataj ruranga chay Gobierno? Jesús Jehovata imano mañacunapaj yachachimashganchicho chay Gobiernupita cayno nergan: “Kay patsacho mandaq kanaykipaq aywaykalämuy. Jana patsacho cäsukushushqaykino kay patsachöpis cäsukuykuläshunki” (Mat. 6:10).

15. ¿Imatataj más Jesús ruranga?

¹⁵ Ichiclachona Armagedón guerracho Jesús chipyaypa ushacächenga Diospa contrancho caycajcunata y mana ali cajcunatapis (Apoc. 16:14, 16; 19:11-16). Nircur Satanastapis wichganga “wanwanyaykaq” sitiuman, chaycho caycar imatapis rurayta puedinganachu (Apoc. 20:1-3). Chaypitana Waranga Wata Jesús gobernar galaycuptin cay Pachacho runacuna mana wanuypa y jaucala cawacunga. Wanojcunatapis cawarachimunga y entero Pachata shumaj huertaman ticrachimunga, chaynopa Jehová munashganno canga. (Apoc. 21:1-4).

16. Waranga Wata Jesús gobernar ushariptinna, ¿imanoraj cawacushun?

¹⁶ Waranga Wata Jesús gobernar ushariptinna, ¿imanoraj cawacushun? Lapan runacuna juchaynaj cashun, ni pï runapis wanunganachu. Pipis juchata mana ruraptin Jesuspa jutincho perdunta mañacunganachu. Ni Jesuspa favurninta ni cielupaj acrashga cajcunapita manami necesitashunnachu Jehovaman guelicunanchipaj. Adán juchalicushgan wanuyga mananami canganachu, chayga chipyaypa ushacanga. Wanojcunapis cawarimunga, cay Pachacho cawajcunapis lapanmi juchaynaj cangapaj (1 Cor. 15:25, 26).

17, 18. 1) ¿Imataj pasanga waranga wata Jesús gobernashganta ushariptin? 2) ¿Imata ruranga Jesús gobernar ushariptinna? (1 Corintios 15:24, 28; dibujutapis ricay).

¹⁷ ¿Imaraj más pasanga Waranga Wata Jesús gobernar ushariptin? Chay wichan cushicuypämi canga: Jehovapa jutin respetashga, santo y limpio captin. Edén huertacho Satanás lutanta parlar nergan Jehová lulacoj cashganta, mana ali mandacoj cashganta ni runacunatapis mana cuyashganta. Chayno captinpis, chay wichanpita canancama Jehovapa sirvejnincuna paypa jutinta respetaycanchi. Y waranga wata Jesús gobernar ushariptinna, Jehová cuyacoj y ali mandacoj cashganta lapancunami musyapäcunga. Aumi, Taytalanchi Jehová ricächimanchi alapa cuyamashganchita.

¹⁸ Chay wichan lapancuna musyapäcunga Satanás lulacoj cashganta. ¿Imata Jesús ruranga gobernar ushariptinna? ¿Satanasnochu canga y Diospa contrancho sharcunga? ¡Manami! (Leiriy 1 Corintios 15:24, 28). Jesusga manami Satanasnochu. Payga Taytanta cuyashpanmi Gobiernunta maquinman cutichenga.

19. Jesús Taytanpa jutin cuyashganraycu, ¿imata rurashga y imata ruranga?

¹⁹ Jehová Jesusta shumaj reguirmi jutinta payta gorgan y jutincho parlananpäpis permitirgan. Jesús imayca rurashgancunachopis musyachicurgan Taytanno cashganta. Chauraga Jesuspäga Jehovapa jutin imapitapis más valuryojmi caycan, chayraycu listo caycargan wanunanpaj. Waranga Wata gobernar usharirna Gobiernunta Taytanpa maquinman cutichinanpaj listo caycanga. Y noganchipis Jesusno, ¿imatataj rurashwan? Caypita yachacushun gatejnin yachachicuycho.