¿Imanirtaj noganchipäga Jehovapa jutin más importante caycan?

1, 2. ¿Imanirtaj Jesuspäga Jehovapa jutin imapitapis más ali caycan?

JESUSPÄGA Jehovapa jutin imapitapis más importante caycan. Waquinpitapis payga Jehovapa jutinta masmi defendin. Pasaj semana yachacushganchino Jesús Jehovapa jutinraycu wanunanpäpis listo caycargan, chaynopa Taytanpa jutin santo puro cananpaj (Mar. 14:36; Heb. 10:7-9). Jesús Waranga Wata gobernar ushariptinna listumi caycanga Taytanpa Gobiernunta cutichinanpaj, chaynopa Jehovapa jutin santificashga canga (1 Cor. 15:26-28). Jesús Papaninta jutinta amatar cuyashpanmi imaycacunatapis rurargan.

² Jesús cay Pachaman shamurgan Taytanpa jutincho runacunata yachachinanpaj (Juan 5:43; 12:13). Discipuluncunata Taytanpa jutinta reguichergan (Juan 17:6, 26). Jehovapa jutinchopis yachachicurgan y milagrucunatapis rurargan (Juan 10:25). Jehovata mañacushgancho discipuluncunapaj cayno nergan: “Chapayculay jutiquiraycu, quiquiquipa jutiquita gomashgayquita” (Juan 17:11, TNM). Jesuspäga Taytanpa jutin imapitapis más ali cargan. Chauraga pipis ‘cristianumi cä’ nerga Diospa jutinta reguinan y parlananpis.

3. ¿Imata canan yachacushun?

³ Rasunpa cristianucunaga Jesús rurashganno Jehovapa jutinta cuyanchi y respetanchi (1 Ped. 2:21). Canan yachacushun pïcunataj Diospa “ali wilakuyninta” wilacur Jehovapa jutinta apaycan (Mat. 24:14). Jina yachacushun imanirtaj cada ununchipaj Jehovapa jutin imapitapis más importante canman.

‘JUTINTA APAJ MARCAN’

4. 1) Jesús cieluman manaraj cutir, ¿imata discipuluncunata nergan? 2) ¿Ima tapucuyta contestashun?

⁴ Jesús cieluman manaraj cutir discipuluncunata cayno nergan: “Gamcunaman espíritu santo chayamuptinmi testigucunami capäcunqui Jerusalencho, Judea marcacho, Samaria marcacho, may chay marcacunachöpis” (Hech. 1:8, TNM). Chauraga cay ali wilacuycuna manami Israel naciunlapächu cargan, tiempuwanna may chay naciunmanpis chayanga, chaynopa runacuna Jesuspa discipulun capäcunanpaj (Mat. 28:19, 20). Jesusmi nergan “testigücunami capäcunqui”. Chauraga mushoj discipuluncunaga, ¿Jesuspa testiguncunala canman o Jehovapa jutinta reguinanraj cargan? Hechos 15 caj capitulucho caypita shumaj tantiachimanchi.

5. ¿Imata rurartaj Jerusalenpita apostolcuna y ancianucuna musyachicurgan pï may runacuna Jehovapa jutinta gayananpaj cajta? (dibujutapis ricay).

⁵ 49 watacho Jerusalenpita apostulcuna y ancianucuna, shuntacärergan parlapäcunanpaj imata ruranan cargan mana judío caj runacuna cristianuman ticrananpaj. Chay shuntacashgancho ushariptin, Jesuspa wauguin Santiago cayno nergan: “Symeon [o Pedro] ali shumaj wilamashcanchi imano Dios mana judío cajcunatapis cuyar galaycushganta, y paycunapita jutinta apaj marcanta jorgushganta”. Chauraga chay juti, ¿pipa jutinta cargan? Profeta Amós nishganpita, Symeón caytapis nergan: “Waquin runacuna lapan shongunwan Jehovata ashinanpaj mana judío cajcunawan junto jutëpa gayashga cananpaj, Jehovami chayta nin” (Hech. 15:14-18, TNM). Chauraga Jesuspa mushoj discipuluncuna Jehovapita yachacunan, jina Paypa jutinpa gayashga canman. Paycuna Diospa jutinta apar waquincunata paypita wilapanman.

6, 7. 1) ¿Imanirtaj Jesús cay Pachaman shamurgan? 2) Jesús cay Pachaman shamushganpita, ¿imata paypaj más importante cashga?

⁶ Jesuspa jutin ninanmi “Jehová salvacojmi caycan”. Aumi, Jehová camacächergan Jesuspa wanuyninwan lapan yäracoj cajcuna salvacunanpaj. Jesusmi cay Pachaman shamushga runacunaraycu wanur achcajta salvananpämi (Mat. 20:28). Jesuspa wanuynin juc pägunomi cashga, chaynopa juchanchipita perdunashga cananchipaj y imaycamayajpis cawayta tarinanchipäpis (Juan 3:16).

⁷ ¿Imanirtaj noganchiraycu Jesús wanunanraj cargan? Mä yarparcushun Edén huertacho ima pasashganta. Yachacushganchino Adanwan Eva juchalicur imaycamapis cawacuyta ograrergan (Gén. 3:6, 24). Ichanga Jesús cay Pachaman shamurgan manami salvamänanchilapächu sinoga Satanás Jehovapa jutinta ganratashganpita limpiananpaj (Gén. 3:4, 5). Chauraga salvashga cashganchipitaga más importantimi caycan Jehovapa jutin santificashga cananpaj. Jesús Taytanpa jutincho shamurgan y lapancho cäsucur pï runapitapis más Jehovapa jutinta santo, limpio cashganta musyachicun.

8. Jesuspa discipuluncunaga, ¿imata aliraj tantiapäcunman cargan?

⁸ Jesuspa discipuluncuna judío y mana judiucunapis cargan. Paycunaga aliraj tantiapäcunman cargan Jehovapita salvación shamushganta (Juan 17:3). Chauraga Jesusno paycunapis Jehovapa jutinpita gayashga canman. Jinamanpis shongupita munapäcunman Diospa jutin santo cashganta musyachicunanpaj, chaycunata ruraptenga salväcunmanmi (Hech. 2:21, 22). Jina ali discipuluncunaga Jehovapita y Jesuspita shumaj yachacunan cargan. Chaymi Juan 17 caj capitulucho Jesús mañacur usharirna cayno nergan: “Jutiquita reguichishcä y imaypis yachaycächishaj, nogata cuyamashgayquino nogapis paycunata cuyashaj y paycunawanmi caycäshaj” (Juan 17:26, TNM).

“QAMKUNAQA TESTÏGÜKUNAMI KARKAYKANKI”

9. Noganchipäga Jehovapa jutin alapa importante captin, ¿imatataj rurashwan?

⁹ Yachacushganchino rasunpa caj cristianucunapäga Jehovapa jutin santificashga cananpaj imapitapis más importante caycan (Mat. 6:9, 10). Aumi, noganchipäga Jehovapa jutin más importantimi caycan imapitapis. Chaymi ali portacunanchi y alita rurananchi Jehovapa jutinta mana ganratachinanpaj. Ichanga Satanás lulacur Jehovapa jutinta ganratachishga. Chauraga, ¿imatataj rurashwan Jehovapa jutin santificashga cananpaj?

10. 42 a 44 capitulucunacho Isaías libro nishganpita, ¿imata wilamanchi? (Isaías 43:9; 44:7-9; fotucunatapis ricay).

¹⁰ 42 a 44 capitulucunacho Isaías libro tantiachimanchi imata rurananchi Jehovapa jutin santificashga cananpaj. Chay capitulucunacho wilamanchi juiciucho caycashganno, chayno musyacänanpaj pï rasunpa caj Dios cashganta. Jehová mana sirvej runacunata nin ‘mä wilapäcamachun diosniquicuna rasunpa Dios cashganta’. Jinapis pay nin: “Wilakushqa kaptinqa testïgukuna mä nipäkutsun”. Pero manami pipis canchu chay dioscunata defendinanpaj (leiriy Isaías 43:9; 44:7-9).

11. Isaías 43:10-12 textucunacho, ¿imata Jehová sirvejnincunata nin?

¹¹ (Leiriy Isaías 43:10-12). Jehová cuyashgan sirvejnincunata cayno nin: “Qamkunaqa testïgükunami karkaykanki. [...] Noqami TAYTA DIOS kä”. Y caynopis nin: “Noqapita mas juk Dios manami kantsu” (Is. 44:8). Chauraga parlashganchiwan rurashganchicunawanpis musyachicushun Tayta Diosninchi Jehovala rasunpa caj Dios cashganta. Y paypa jutinlami más alto caycan pipa jutinpitapis. Jehovata shongupita cuyashpanchimi pay munashganno cawananchi, y Satanás ima pruebacunata churamaptinchipis Jehovata mana jaguiypa sirviycäshun. Chayno cawarga Jehovapa jutinta santo y limpio cananpaj churaycanchi.

12. Isaías 40:3, 5 wilacushgan, ¿imanotaj cumplicashga?

¹² Jehovapa jutinta defendiptinchega Jesusno ruraycanchi. Isaías wilacurgan Jehová juc runata cachananpaj, pay Jehovapa näninta alchananpaj (Is. 40:3). Jehová bautizacoj Juanta cachamuptinmi cay profecía cumplicashga. Juan nänita camaricächergan wamran Jesús shamunanpaj cajta. Jesús Jehovapa jutincho shamurgan y Paypita parlargan (Mat. 3:3; Mar. 1:2-4; Luc. 3:3-6). Isaías cayno wilacurpis nergan: “TAYTA DIOS munayniyoj cayninta ricacächenga” (Is. 40:5, TDI). Cay wilacushganga cumplicashga Jesús cay Pachaman shamushgan. Pay Taytan Jehová munashganno lapanta rurargan, chaymi quiquin Jehová cay Pachaman shamushganno caycargan (Juan 12:45).

13. ¿Imata rurananchi Jesús rurashganno?

¹³ Jesusno noganchipis Jehovapa testiguncunami canchi. Jehovapa jutinta apanchi y runacunata ali rurashgancunapita wilapanchi. Jehovapa ali Testigo cananchipaj runacunata wilapanchi imata Jesús rurashga y imata ruranga Jehovapa jutin santificashga cananpaj (Hech. 1:8). Jesusnoga manami pipis ali Jehovapa testigun canchu, noganchipis payno cananchi (Apoc. 1:5). Chauraga noganchipäga Jehovapa jutin más importante captenga, ¿imatataj rurananchi?

JEHOVAPA JUTIN ALAPA CUYASHGANCHITA IMANO MUSYACHICUNCHI

14. Salmo 105:3 nishganno, ¿imata sientinchi Jehovapa jutinpaj?

¹⁴ Jehovapa jutinpita alapa cushicuyculanchi (leiriy Salmo 105:3). Jehovapa jutinpita mana pengacuypa parlaptinchi Jehovaga alapa cushicuyculan (Jer. 9:23, 24; 1 Cor. 1:31; 2 Cor. 10:17). Noganchipis cushicuyculanchimi waquincunata parlapaptinchi Jehová lapan ali rurashganpita y santo cashganpitapis. Aroj masinchiwan caycar, estudiaj masinchiwan caycar, marcanchicho o maycho caycarpis manami pengacushwanchu ‘noga Jehovapa Testigunmi cä’ ninanchipaj. Satanás manami munanchu Jehovapa jutinpita runacunata yachachinanchipaj (Jer. 11:21; Apoc. 12:17). Satanás lutan yachachicojcunawan munapäcun runacuna Jehovapa jutinta gongapäcunanpaj (Jer. 23:26, 27). Jehovapa jutinta cuyashpanmi cada junaj alabayta munayculanchi (Sal. 5:11; 89:16).

15. Jehovapa jutinta gayananchipaj, ¿imacunata rurananchi?

¹⁵ Mana jaguiypa Jehovapa jutinpita yachaycächinchi (Joel 2:32; Rom. 10:13, 14). Achca runacuna Jehovapa jutinta reguin, pero Jehovapa jutinpa gayananchipaj pay imano cashganta reguinanchi, payman yaräcunanchi yanapämänanchipaj y pushamänanchipaj payta ashinanchi (Sal. 20:7; 99:6; 116:4; 145:18). Jina Jehovapa jutinpita y imano cashganta waquincunata wilapänanchi. Y runacuna mana ali rurashganpita arrepenticunanpaj y Diospa favorninta chasquinanpajpis yanapänanchi (Is. 12:4; Hech. 2:21, 38).

16. ¿Imanopataj musyachicushwan Satanás lula cashganta?

¹⁶ Jehovapa jutinraycu ima nacaypa pasananchipäpis listo caycanchi (Sant. 5:10, 11). Ima nacaypa pasaptinchipis Jehovata cäsucuptinchi Satanás lulacoj cashganta musyachicuycanchi. Satanás Jehovata Jobpita parlar cayno nergan: “Vïdanta salvananraykula qamtapis ñëgashunkimi”, chaynolami acusargan lapan Diospa sirvejnincunatapis (Job 2:4). Chauraga, Satanás acusamanchi Jehová chapamaptilanchi payta sirvishganchita ichanga ima pruebacunapa pasarga Jehovata jaguirinanchipaj. Job Dios munashganno cawar musyachicurgan Satanás parlashganga mana rasunpa cashganta. Noganchitapis Satanás ima pruebacunata churamaptinchipis mana jaguiypa Jehovata sirviycäshun. Shongupita Jehovaman yäracunchi juntinraycu imaypis cuidamänanchipaj (Juan 17:11).

17. 1 Pedro 2:12 nishganno, ¿imata rurartaj Jehovapa jutinta alabananchi?

¹⁷ Imata rurarpis Jehovapa jutinta alabanchi (Prov. 30:9; Jer. 7:8-11). Jehovapa testigun cashganchita runacuna musyapäcun, chaymi alita rurananchi paypa jutin alabashga cananpaj y manami imatapis rurananchichu jutinta ganratachinanchipaj (leiriy 1 Pedro 2:12). Chauraga, juchayoj captinchipis calpachacunchi ali parlashganchiwan y ali portacushganchiwanpis Jehovapa jutinta alabananchipaj.

18. ¿Imatataj más rurashwan Jehovapa jutinta alabananchipaj? (Wilacuytapis ricay).

¹⁸ Runacuna mana ali ricamaptinchipis Jehovapa jutinta alabanchi (Sal. 138:2). Jehovapa jutinta cuyashpanchimi pay munashganno cawanchi. Chaymi waquin runacuna mana ali ricamashwan.a Jesús juchayoj runano wanunanpaj listo caycargan, Jehovapa jutin alabashga cananpaj. Hebreos 12:2-4 nishganno Jesús pengayta jitaycur wanurgan y manami alapa yarpachacurganchu runacuna mana ali ricananpaj. Payga Taytanpa voluntaninta rurananpaj masmi munaycargan (Mat. 26:39).

19. ¿Imata yarpanqui Jehovapa jutinpita?

¹⁹ Jehovapa Testiguntano runacuna reguimanchi, chaypita mana pengacur Jehovapa jutinta apanchi y alapa cushicuyculanchimi. Chaymi alapa yarpachacunchichu runacuna mana ali ricamashganchita, ali ricamänanchipaj trucan masmi munayculanchi Jehovapa jutin alabashga cananpaj. Satanás ima pruebacunata churamaptinchipis decididumi caycanchi Jehovapa jutinta imaypis alabananchipaj. Jesusno Jehová munashganno cawanchi chaymi noganchipajpis Jehovapa jutin más ali caycan imapitapis.