Jesús cuyapäcoj Mandaj Sacerdote caycan

1, 2. 1) ¿Imapäraj Jehová wamranta cay pachaman cachamurgan? 2) ¿Cay yachachicuycho imapita yachacushun? (Hebreos 5:7-9).

2.000 watacunanona Jehová cay pachaman cuyashga churinta cachamurgan juchanchipita y wanuypita libramänanchipaj y Satanás rurashgancunata ushacächinanpaj (Juan 3:16; 1 Juan 3:8). Jehová musyarganmi Jesús runano cay pachacho car, runacuna imano sienticushganta tantiar yanapananpaj cuyacuywan tratananpaj chaynopa Mandaj Sacerdote laquipäcoj cananpaj. Chaymi Jesús 29 watacho bautizacurir Mandacoj Sacerdotino arur galaycurgan.a

² Cay yachacuycho yachacushun imanotaj Jesús cay pachacho cawashganga yanapargan laquipäcoj Mandaj Sacerdote cananpaj. Caycunapita shumaj yachacuptinchi mana alita rurashganchiraycu y juchanchiraycu laquishga caycaptinchi facilmi canga shongupita Jehovata mañacunanchipaj, payman masraj guelicunanchipaj (leiriy Hebreos 5:7-9).

JEHOVAPA MÁS CUYAY CHURIN CAY PACHAMAN SHAMURGAN

3, 4. ¿Imanotaj Jesuspa cawaynin cielucho cargan y imanotaj cay pachacho cawaynin cargan?

³ Öraga noganchipäga imayca cambiucunami caycan, capazchi carupa aywar castanchicunata y amigunchicunatapis jaguirishcanchi, chayta rurananchipäga mana facilchu caycan. Noganchi rurashganchega Jesús rurashganwanga manami tincunchu. Jesús lapan angelcunapitapis más munayniyojmi cargan. Payta Jehová alapa cuyargan y papäninpa “alawqa” caj laduncho cushishga arurgan (Sal. 16:11; Prov. 8:30). Chayno captinpis Jesusga “munayniyuq kashqanta kachaykur” cushishga cay pachaman shamurgan juchayoj runacunawan cawapäcunanpaj (Filip. 2:7).

⁴ Yarpäshun, Jesús yurishganpita cay pachacho imano cawaynin cargan. Paypa taytancuna wacchami cargan, chaymi templuman ishcay culcushcunata sacrificiutano rupachinanpaj apaj (Lev. 12:8; Luc. 2:24). Chaypitana fiyu rey Herodes Jesús yurishganta musyarir wanuchiyta munaptin, taytancuna Egiptuman gueshpichir apacurgan wamranpa cawayninta chapananpaj (Mat. 2:13, 15). Jesús cielucho cawashganwan cay pachacho cawashganga manami igualchu cargan.

5. 1) Jesús cay pachacho caycar, ¿imatataj ricargan? 2) Chayta ricar, ¿imanotaj yanapargan cuyapäcoj Mandaj Sacerdote cananpaj? (Dibujutapis ricay).

⁵ Jesús cay pachacho caycar runacuna nacaycashganta ricargan. Jina castancuna wanojtapis ricargan y taytan José wanuptin laquishchi sienticurgan. Yachachicur puriycashgancho ricargan lepra gueshyawan caycajcunata, wiscucunata, cuerpun mana cuyoj runacunata y waquincunapana wamrancuna wanuptin laquish caycajcunata y paycunata ricar cuyapashpan laquipargan (Mat. 9:2, 6; 15:30; 20:34; Mar. 1:40, 41; Luc. 7:13). Jesusga cielupita ricamurgan runacuna nacaycajta, pero cay pachacho runano cawar shumaj musyarganna runacuna imano nacashganta (Is. 53:4). Y Jesuspis cay pachacho cawarga uticargan laquicurgan y yarpachacurganpis, chaymi runacuna imano sienticushganta shumaj tantiargan.

JESÚS RUNACUNATA CUYAPASHPANMI LAQUIPARGAN

6. ¿Imata Isaías wilacurgan Jesuspita y imata yachacunchi chaypita? (Isaías 42:3).

⁶ Jesús yachachicur purishgancho wacchacunata nacachishga y laquishga caycaj runacunata cuyapashpan laquipargan. Chaynopa Jehovapa wilacuynin cumplicargan, Isaías profeta wilacushganno. Biblia tincuchin ali saludyoj y imaycayoj cajcunata cuyaylapaj yörano caycashganta (Sal. 92:12; Is. 61:3; Jer. 31:12). Laquishga y waccha nacachishga caycajcunata tincuchin shogushwan y upinaycaj acchiwanpis (leiriy Isaías 42:3). Cay tincuchicuywan Isaías wilacurgan laquishga caycaj runacunata y mana valejtano ricashga cajcunatapis Jesús cuyacuywan tratananpaj cajta.

7, 8. ¿Imatataj Jesús rurashga Isaías wilacushgan cumplicänanpaj?

⁷ Isaías wilacushganno, Mateo Jesús rurashganpita cayno escribergan: “Manami paquinaycaj shogushtaga paquirengachu, ni upinanpäna caycaj mecheruta upirengachu” (Mat. 12:20). Laquishga y mana valejtano ricashga caycajcunata Jesús milagrucunata rurar yanapargan. Yarpäshun, leprawan gueshyaj runaman, pay yarparganchi gueshyanpita imaypis mana aliyananpaj cajta y familianwanpis manana juntacänanpaj cajta (Luc. 5:12, 13). Yarpanchipis mana wiyaj ni mana rimaj runaman payga runacuna cushishga parlajta ricar pay parlayta mana puedir laquishchi sienticurgan (Mar. 7:32, 33). Pero manami chaylachu cashga.

⁸ Jesuspa tiempuncho judiucunaga yarpapäcoj gueshyajcunaga Diospa castigun cashganta quiquin juchalicushganraycu o taytan juchalicushganraycu chayno nacaycashganta (Juan 9:2). Chaymi gueshyajcunata, gapra y wegru runacunata mana valejtano ricargan. Ichanga Jesús manami chaynochu ricargan sinoga cuyacuywan aliyächergan chayno cuentata gocärergan Jehová paycunata cuyaycashganta. Jesús chayno rurashganga Isaías wilacushgan cumplicargan. ¿Imata yachacunchi chaypita?

9. Hebreos 4:15, 16 nishganno Jesús cuyapäcoj car, ¿imanotaj runacunata tratargan?

⁹ (Leiriy Hebreos 4:15, 16). Jesús cuyapämashpanchimi yanapämanchi. Biblia “cuyapämashpanchi” niptenga tantiachimanchi pipis cuyapäcoj car nacaycajta ricar quiquin nacaycashgantano shonguncho nanachicur sienticushganta. Hebreos 10:34 textuchopis Pablo parlaycan cuyapar carcelcho wichgarajcunata yanapananpaj. Jesús gueshyaycajcunata ricar shonguncho nanachicur sienticurgan. Chaymi shongupita cuyapar milagrucunata rurargan nacaycajcunata alchananpaj. Yarpäshun leprawan gueshyaycaj runaman, Jesusga paytaga carulapitachi aliyächinman cargan, ichanga Jesusga chay gueshyajta alapa cuyapar jinanman aywargan yatananpaj. Capazchi chay runata achca watapana pipis mana yatarganchu. Jina mana wiyaj runaman yarpar Jesusga quiquilanta juc laduman pushaycur aliyächergan. Juc cutichona juc warmi Jesuspa chaquinta weguinwan ushmachergan y ajchanwan chaquichipargan. Chayta ricar juc fariseo shonguncho chay warmipita mana ali yarpargan chay hora Jesús warmita defendir fariseuta anyapargan (Mat. 8:3; Mar. 7:33; Luc. 7:44). Payga manami yarparganchu “gueshyajcunawan y juchayojcunawan manami imaypis juntacächu” nir, más bienga paycunata chasquergan y cuyacuywan tratarganpis. Chaymi noganchipis seguro caycanchi Jesús cuyacuywan tratamashganchita.

MANDAMAJNINCHI SACERDOTE JESUSNO CASHUN

10. ¿Imacunawantaj Jehová Diospita yachachinchi gapra cajcunata y mana wiyaj cajcunata? (Fotucunatapis ricay).

¹⁰ Jesusno cayta munarga waquincunata cuyapashpan laquipar tratashun (1 Ped. 2:21; 3:8). Jesús rurashganno canan tiempuga gapracunata y mana wiyaj cajcunata alchayta manami puedinchichu, pero Jehová Diospita yachachiyta puedinchi. Chaymi mana wiyajcajcunapaj publicaciuninchicuna caycan pachac idiumacunapitapis mascho. Gapracunapajpis publicaciuninchicuna 60 idiomacunapitapis mascho caycan, jina pachac idiomacunachopis videucuna caycan gapra cajcunapis wiyarla yachacunanpaj. Chaynopa gapra cajcuna y mana wiyaj cajcuna Jehová y Jesuspita yachacuyta puedipäcunga.

11. ¿Imanotaj Jehovapa testiguncuna Jesús rurashganno canan wichan rurapäcun? (Hechos 2:5-7, 33; fotucunatapis ricay).

¹¹ Jesús cawarishganpitana, Pentecostés fiestacho discipuluncunaman Diospa santo espiritunta mashtargan, chay fiestaman may chaypita shamojcunata quiquinpa rimaynincho Diospa ali wilacuyninta wilacunanpaj (leiriy Hechos 2:5-7, 33). Jesús rurashganno Jehovapa testiguncunapis munayculanchi may chaypita runacuna Jehovapita yachacunanpaj. Chayraycur waranga idiumacunapitapis mascho publicaciunninchicuna caycan, waquin idiumacunacho walcajla parlajcunapajpis publicaciunninchicuna caycan. Chaynomi caycan América continenticho. Chaycho Jehovapa testiguncuna 160 idiomacunacho publicaciuncunata traducipäcurgan chaynopa runacunapa rimaynincunacho Jehovapita yachacunanpaj. Jina romaní rimaycho parlajcunapaj 20 parlashgan rimaynincunachopis traducishganchi. Chayraycur achca runacuna Jehovata sirvir galaycush.

12. ¿Imatataj más Jehovapa testiguncuna rurapäcun?

¹² Jehovapa testiguncuna runacunata Diospa ali wilacuyninpita yachachicurpis desgraciacunapa pasajcunata cushishgami yanapäcun. Chayta rurananpäga achca hermanunchicuna voluntäninpita yanapacunanpaj listo caycan. Jina localcunatapis sharcachipäcun Jehovata adorananpaj, chaycho cuyacoj Dios cashganpita yachacunanpaj.

MANDAMAJNINCHI SACERDOTE CADA UNUNCHITA YANAPÄMANCHI

13. ¿Imanotaj Jesús yanapämanchi?

¹³ Jesús ali michicoj carmi yanapämanchi Jehovawan más ali amigo cananchipaj (Juan 10:14; Efes. 4:7). Imayca laquicuycunapa pasarga paquinaycaj shogushno o upinaycaj achquinomi sienticushwan. Gueshyanchiraycur o juchata rurashganchiraycur o hermanunchicunawan mana ali apanacushganchiraycur laquishgala sienticushwan. Chaycunapa pasarga sasami canman Jehová aunimashganchiman yarpänanchipaj. Jesús musyanmi imacunapa pasaycashganchita imano senticushganchitapis, chaytaga manami gongashwanchu. Jesús cuyamashpanchimi laquishga caycashganchi hora Jehovapa santo espiritunwan yanapämäshun calpata tarinanchipaj (Juan 16:7; Tito 3:6). Jesuspis yanapämanchi, shacyächimanchi ancianucunawan y hermanucunawanpis (Efes. 4:8).

14. ¿Imata rurananchi laquishgala mana caycänanchipaj?

¹⁴ Laquishga caycashganchicho yarpäshun Jesús Mandamajninchi Sacerdote caycashganman. Yarpäshunpis, Jesús cay pachaman manami shamurganchu wanunanlapäga sinoga yanapämänanchipaj imacunapa pasaycashganchicho y tantiamänanchipaj imano sienticushganchitapis. Chaymi mana alita rurashganchipita o jucha rurashganchipita laquishga caycaptinchi, Jesús cuyapämashpanchimi listo caycan yanapämänanchipaj (Heb. 4:15, 16).

15. ¿Imata juc hermanunchita yanapargan Jehovata yapay sirvinanpaj?

¹⁵ Jesús pushamanchi guepaman cutejcunata ashinanchipaj y yanapänanchipaj paycuna yapay Jehovata sirvinanpaj (Mat. 18:12, 13). Hermanunchi Stefanob juc tiempo congregaciunpita jorgushga caycargan, chunca ishcay watana pasarcuptin reuniunman aywananpaj yarpachacurgan. Pay cayno wilacun: “Yapay salonman yaycunäpaj manchacuptëpis, munargä Jehovata hermanunchicunawan yapay sirvinäpaj. Ancianucunaga cuyacuywan yanapämargan y nimarganpis ‘ali shamushcanqui’ nir. Öraga Jehovata sirvir jaguishgäpita pasaypa pësacur laquicoj cä. Ichanga ancianucunaga yarpächimargan Jehová y Jesús cuyaycämashganta y cutimunäpaj munaycashganta. Congregaciuncho wilacäramuptin Jehovapa Testigunno yapay canäpaj lapan hermanunchicuna nogata y familiäta cuyacuywan y cushishga chasquipäcämargan. Tiempuwanna warmëga Bibliapita yachacur galaycurgan, cananga juntula Jehovata sirvircaycä”. Pipis juchanpita arrepenticur yapay Jehovata sirvinanpaj yanapaptinchi Jesús cuyacoj Mandamajninchi Sacerdote ricämashpanchi cushicun.

16. Mandaj Sacerdote Jesús cuyapäcoj cashganta musyarir, ¿imanotaj sienticunchi?

¹⁶ Jesús cay pachacho cashgan wichan maychicaj runacunata yanapargan nestashgancunacho. Canan tiempupis yäracunchi nestashganchicho Jesús camaripaycämashganchita. Jesusga shamoj tiempuchoga nacaycunata y juchanchicunata chipyaypami ushacärachenga. Chaymi Jehovawan alapa agradecido caycanchi cuyashga churin Jesusta Mandaj Sacerdote cananpaj churashganpita.