Jehová Diosga gamta pasaypami cuyashunqui

1, 2. ¿Imata rurashwan seguro caycänanchipaj Jehová cuyamashganchita?

JEHOVÁ lapan sirvejnincunata alapa cuyamanchi. Chayno captinpis öraga waquincuna yarpapäcun “quevä Jehová nogata alapa cuyamanga” nir. Waquincunaga mana ali tratashga cashganraycu mana valejnomi sienticun. Capaz gam imaylapis chayno sienticushcanqui. Chauraga, ¿imata ruranayqui Jehová alapa cuyashushgayquita seguro caycänayquipaj?

² Bibliacho Jehovapa sirvejnincuna imapa pasashganta leir Jehová munashganno waquincunawan cuyanacunanchipaj yachacunqui. Jina yachacunquipis Jehová y Jesús humilde runacunata y mana valejno sienticojcunata alapa cuyashganta, y Jesús cay pachacho caycar chayno caj runacunata respetuwan y cuyacuywan tratashganta (Juan 5:19; Heb. 1:3). ¿Jesús imacunata rurargan Jehová cuyashganta runacunata musyachinanpaj? Y gampis, ¿imataj ruranquiman Jehová cuyashushgayquita seguro caycänayquipaj? (Ageo 2:7). Canan chaycunapita yachacushun.

JESÚS RUNACUNATA MUSYACHIRGAN JEHOVÁ ALAPA CUYASHGANTA

3. Galilea marcapita runacunata, ¿Jesús imanotaj tratargan?

³ Jesús Galileacho predicaycaptin achca runacuna payman guelicurgan yachachinanpaj y gueshyancunapita aliyächinanpaj. Chay runacunata luta religiosucuna ali tucur mana valejtano ricargan, chaymi ‘maldicionädo caycashganta’ nergan (Juan 7:47-49). Pero Jesús manami chaynochu yarpargan paymi runacunata ricargan michiyninaj y ogracashga uyshacunano caycashganta (Mat. 9:36). Chaymi respetulawan y cuyapaylapa paycunata yachachergan y gueshyancunapita aliyächirganpis (Mat. 9:35). Jina apostulnincunatapis yachachergan pay rurashganno achca runacunata yanapananpaj (Mat. 10:5-8).

4. ¿Imata yachacunchi Jesús humilde runacunata imano tratashganpita?

⁴ Jehová y Jesús mana valejtano ricashga runacunata alapa cuyapäcun. Chaymi cay pachacho caycar Jesús paycunataga cuyacuywan y respetuwan tratargan. Jehovata sirviycarpis avecis yarpanquichi ‘Jehová nogata mana cuyamanchu’ nir. Chayno yarpashgayqui hora ama gongaychu Jesús humilde runacunata cuyapar ali tratashganta, chaynopa seguro caycanqui Jehová gamtapis alapa cuyashushgayquita.

5. Galileacho Jesús tincushgan warmiga, ¿imawantaj gueshyargan?

⁵ Jesús achca runacunata yanaparpis cada ununpajmi yarpachacurgan yanapananpaj. Chayta rurargan Galilea marcacho predicaycaptin, chaychoga tincurirgan 12 wata yawar gueshyawan caycaj warmiwan (Mar. 5:25). Chayno gueshyashganpita runacuna payta ganra caycashgantano ricargan, ni yataylatapis puedirganchu. Jina waquincunawan juntacayta y sinagogacho Jehovata aduraytapis puedirganchu (Lev. 15:19, 25). Cay warmiga manami yawar gueshyalawanchu nacaycargan sinoga pay yarpargan pipis mana cuyashganta y mana valejnomi sienticurgan (Mar. 5:26).

6. Yawarwan gueshyaycaj warmiga, ¿imata rurargan gueshyanpita alchacanapaj?

⁶ Cay warmi gueshyashganpita alapa nacaycarpis Jesusta manami mañacurganchu aliyächinanpaj. ¿Imanir? Capaz gueshyanpita pengacurgan, y runacunapa chaupincho caycashganpita Jesús rabiapananta yarparganchi. Chayno yarpar Jesuspa ropanta yataycur payga gueshyanpita aliyächinanpaj cajman segura caycargan (Mar. 5:27, 28). Chaynomi cargan, ¡pay gueshyanpita alchacashnami caycargan! Nircur Jesús ‘pitaj yatamash’ nir tapuptin, pay ima rurashganta wilapargan. Chauraga, ¿imatataj rurargan Jesús?

7. ¿Imanotaj Jesús cay warmita tratargan? (Marcos 5:34).

⁷ Cay warmita “mantsakashqa siksikyaykar” caycashganta ricar Jesús cuyapaylapa y respetuwan parlapargan (Mar. 5:33). Chayraycu Jesús “hïja” nir cuyacuywan gayargan (leiriy Marcos 5:34). Cay pachacho caycar Jesús cay warmilata “hïja” nir gayargan. ¿Imanir? Pay ricargan pasaypa manchacash caycashganta. Jesús cuyapaylapa mana trataptin cay warmiga laquishgala y culpayojchi ricacunman cargan. Chaymi Jesús manami gueshyalantachu jampirgan sinoga musyachicurgan Jehová payta alapa cuyashganta.

8. Renata hermananchi, ¿imacunapa pasargan?

⁸ Canan wichan waquin Jehovapa sirvejnincuna gueshyanraycu laquishgala y mana valejno sienticurcaycan. Brasil naciunpita Renataa hermananchi chayno pasargan. Pay chancaynaj y juc maquilawan yurirgan. Cayno wilacun: “Escuela caycashgächo estudiaj masëcuna tucuynopa ashlipäcamargan y burlapamarganpis, castäcunapis chayno tratapäcamargan”.

9. ¿Pïcunataj yanapargan Renatata Jehová alapa cuyashganta cuentata gocunanpaj?

⁹ Chaycunapa pasashganpita Renataga mana valejno sienticurgan. Tiempuwanna Bibliata yachacur galaycurgan y bautizacurganpis. Congregaciunnincho hermanucuna cuyapaylapa tratargan y Jehovapa ricaynincho ali caycashganta musyachicurgan. Pay cayno wilacun: “Jehovata alapami agradecicö achca hermanucunawan yanapämashganpita, paycunaga ali familianomi caycan. ¡Ayca hermanucuna yanapämashganta ni yupaytapis puedëchu!”. Hermanucuna paypaj lapan rurashgancunata ricar Renata cuentata gocurgan payta Jehová alapa cuyashganta.

10. ¿Imapataj pasargan María Magdalena? (Dibujucunatapis ricay).

¹⁰ Canan yachacushun María Magdalenapita. Ganchis demoniucuna nacachiycaptin Jesusmi yanapargan (Luc. 8:2). Cay demoniucuna capazchi payta locuniraj rurachirgan, chaymi runacuna paypita witicurganchi. Chaypa pasarga laquish, manchacash y pipis mana cuyashgantano sienticurganchi. Chaymi Jesús paypitami demoniucunata gargurgan, y María Jesusman yäracur discipulunman ticrargan. Chaynopa Jehová cuyashganta musyachicurgan. Chauraga, ¿imataraj más rurargan Jesús yanapananpaj?

11. ¿Imatataj Jesús rurargan María Magdalenata Jehová cuyashganta musyachinanpaj? (Dibujucunatapis ricay).

¹¹ Jesús María Magdalenata nergan marcan marcan discipulucunawan predicar aywashgancho yanagänanpaj, y chayga alapa cushicuypajmi cargan.b Payga Jesús achca yachachicushgancunata wiyargan. Jina Jesús cawarimushgan junaj waquin discipuluncunaman manaraj yuripar María Magdalenaman yuripashga, y nerganpis cawarimushganpita apostulcunata wilapänanpaj. Jesús rurashganta ricar María Magdalena segurumi caycargan Jehová payta alapa cuyashganta (Juan 20:11-18).

12. ¿Imanirtaj Lidia yarpargan pipis mana cuyashganta?

¹² María Magdalena pasashganno canan wichanpis achca runacuna yarpapäcun pipis mana cuyashganta. Chaynomi sienticurgan España marcapita Lidia hermananchi. Paypa mamanshi mana yurinanpaj munargan, iti wamrala cashganpita payta manami cuidarganchu y cada cadala nanachicuylapa parlapargan. Paymi nin: “Mamanë mana cuyamashganpita yarpachacoj cä, imacunata ruraptëpis pipis mana cuyamashganta. Chaymi imaypis munargä pilapis cuyamänanpaj cajta”.

13. ¿Imata yanapargan Lidiata seguro caycänanpaj Jehová alapa cuyashganta?

¹³ Tiempuwanna Lidia Bibliata yachacur galaycurgan. Jehovata mañacur, Bibliata leir y hermanucunapa cuyacuyninta chasquir pay cuentata gocurgan Jehová alapa cuyashganta. Pay cayno wilacun: “Runä cutin cutin alapa cuyamashganta nïman, y ali cajcunata rurashgäpita yarpächiman. Chaynolami amigöcuna imaypis shacyächiman”. Capaz gam reguinqui pilapis Lidiano alapa nacaycunapa pasashganta. Chayta musyar, ¿imanopataj shacyächinquiman Jehová alapa valurashganta seguro caycänanpaj?

IMATA RURANQUIMAN JEHOVÁ RICASHUSHGAYQUINO RICACUNAYQUIPAJ

14. 1 Samuel 16:7 texto nishganno, ¿imanotaj Jehová ricamanchi? (“¿Imanirtaj Jehová sirvejnincunata alapa cuyan?” nej recuadrutapis ricay).

¹⁴ Yarpay runacuna ricamashganchino Jehová manami ricamashganchita (leiriy 1 Samuel 16:7). Diosta mana sirvej runacunaga guellayyoj, cuyaylapaj o estudioyoj captiquiraj ali ricashunqui, pero Jehová manami chaynochu ricamanchi (Is. 55:8, 9). Chauraga Jehová ricashushgayquinomi ricacunquiman, manami runacuna ricashushgayquinochu. Chaypäga Bibliacho leinquiman Elías, Noemí, Ana y waquin Diospa sirvejnincunapis mana valejno ricacuptinpis Jehová alapa valurashganta. Jina escribinquiman cawayniquicho imano Jehová cuyacuywan yanapäshushgayqui. Publicaciunninchicunachopis ashinquiman alapa valej cashgayquipita y Jehová cuyashushgayquipitapis.c

15. ¿Imanirtaj Jehová Danielta alapa cuyargan? (Daniel 9:23).

¹⁵ Ama gongaychu mana jaguiypa Jehovata sirvishgayquipita pay alapa cuyashunqui. Profeta Daniel pachac watayojna caycaptinshi juc cuticho calpaynaj y alapa laquishga caycargan (Dan. 9:20, 21). Chaymi Jehová ángel Gabrielta cachargan Danielta shacyächinanpaj. Cay angelga Danieltami nergan Jehová mañacuyninta wiyashganta y alapa cuyashgantapis (leiriy Daniel 9:23). ¿Imanirtaj Jehová Danielta alapa cuyargan? Pay ricargan Daniel cuyacoj y ali ruraj cashganta, y mana jaguiypa payta sirvishganta (Ezeq. 14:14). Jehová Danielta yanapashganta Bibliacho churargan noganchitapis shayächimananchipaj (Rom. 15:4). Gampis Jehovata mana jaguiypa sirvishgayquipita payga alapa cuyashunqui, y Danielta wiyashganno mañacuptiqui pay wiyashunquimi (Miq. 6:8; Heb. 6:10).

16. ¿Imamantaj yarpanquiman cuyacoj taytayquitano Jehovata ricanayquipaj?

¹⁶ Cuyacoj taytayquitano Jehovata ricay. Jehovaga manami pantashgalayquitachu ashiycan, sinoga yanapäshunayquipaj munan (Sal. 130:3; Mat. 7:11; Luc. 12:6, 7). Canan wichan achca runacunami mana valejno sienticärin, pero cayman yarpar yanapashga alina sienticärinanpaj. Chayno sienticurgan España naciunpita Micaela jutiyoj hermananchi. Achca watapashi runan nanaparaylapa parlapaj, chayraycu mana pipis cuyashganta y mana valejno sienticurgan. Cayno wilacun: “Chayno sienticushgä hora yarpämi Jehovapaj tacsha wamrano cashgäta, y pay cuyacuywan malgaycur apamashgantano caycan” (Sal. 28:9). Y Sudáfrica naciunpita Laura jutiyoj hermananchi cayno wilacun: “Jehová cuyacuywanmi congregaciunman apamashga, y yanapacuyninwanrämi waquincunata Bibliata yachachë. Pay yanapämashganta ricar cuentata gocö alapa cuyamashganta” (Juan 6:44).

17. ¿Imanotaj Jehová musyächishunqui ali nawilanwan ricashushgayquita? (Salmo 5:12) (Fotutapis ricay).

¹⁷ Seguro caycay Jehová cuyashushgayquita (leiriy Salmo 5:12). David nergan ‘Jehová munashganno cawaj runacunataga pay cuyashpanmi chapacuna escuduno imapitapis chapashganta’. Laquishga caycar y mana valeshgayquino yarpashgayqui hora Jehová cuyashushgayquipita seguro caycay. Chayno yarpaptiqui yanapäshunqui chapacuna escuduno mana valeshgayquino mana sienticunayquipaj. Y Jehová, ¿imanotaj musyachishunqui ali nawilanwan ricashushgayquita? Bibliata leirmi yachacunqui Jehová alapa cuyashushgayquita, jina ancianucunawan, amiguyquicunawan y waquin hermanucunawanpis Jehová yarpächishunqui rurashgayquicunawan cushishga caycashganta y ali nawilanwan ricashushgayquitapis. Y gam, ¿imanotaj chasquinquiman pilapis ali rurashgayquipita shacyächishuptiqui?

18. Pilapis ali rurashgayquipita shacyächishuptiqui, ¿imanotaj chasquinquiman?

¹⁸ Familiayqui o amiguyquicuna ali rurashgayquipita shacyächishuptiqui ama yarpaychu ‘lulapaycämanchi’ nir. Jehová paycunawanmi niycäshunqui rurashgayquipita alapa cushishga caycashganta. Näga parlashganchi Micaela cayno nin: “Pï hermanulapis ali rurashgäcunapita shacyächiylapa parlapamaptin nogapäga manami facilchu creinäpaj. Pero Jehovapita shamushganta musyarmi paycunata creinäpaj calpachacö”. Ancianucunapis cuyacuywan yanapargan. Cananga precursorano Jehovata sirviycan y wasinpita Betelpaj yanapacuycan.

19. ¿Imanirtaj seguro caycanqui Jehová alapa cuyashushgayquita?

¹⁹ Jesús cay pachacho caycar cuyacuywan yachachimashcanchi Taytalanchi Jehová alapa cuyamashganchita (Luc. 12:24). Chauraga imaypis gongaychu Jehová alapa cuyashushgayquita. Jina calpachacuy waquincunata yachachinayquipaj paycunatapis Jehová cuyashganta y ali nawilanwan ricashganta.