2 Timoteu

3 Peru këtam musyanëki, ushanan tiempuchöqa+ alläpa mana alli y mana aguantëpaqnö tiempukunam kanqa. 2 Nunakunam kayanqa kikinkunallata kuyakoq, qellëta kuyaq, alabakoq,* allish tukoq, Teyta Diosta ofendeq, papäninkunata mana cäsukoq, mana agradecikoq y jukkunata dejaq, 3 manam kuyakoqtsu kayanqa, manam acuerduman chëta munayanqatsu, calumniakoqmi kayanqa, manam controlakuyta yachayanqatsu, mantsëpaqmi kayanqa, manam alli kaqta kuyayanqatsu, 4 traicionakoqmi kayanqa y manam ima niyanqantapis cäsukuyanqatsu, alläpa orgullösum kayanqa, Teyta Diosta kuyayänampa rantinmi kikinkuna munayanqanta rurayanqa, 5 jukkunapa rikëninchö Teyta Diosta adoraq* tukuykarpis, manam rurayanqanchöqa Teyta Diosta adorayanqanta rikätsikuyanqatsu.+ Pëkunapitaqa witikuy. 6 Pëkunapitam engañakur wayikunaman yëkoq nunakuna yuriyämun, y mana alli këkaq mëtsika jutsayoq* y shonqunkuna munanqanta rurëta munaq warmikunatam shumaqllapa engañayan. 7 Pëkunaqa imëpis yachakurllam këkäyan, peru rasumpa kaqta alli yachakuytaqa manam puëdiyantsu.

8 Jänes y Jambres nunakuna Moisespa contran churakäyanqannömi, pëkunapis rasumpa kaqpa contran këkäyan. Tsë nunakunaqa alläpa mana alli pensëyoqmi kayan, cristiänukuna creikuyanqannö mana kawarmi, Teyta Diospa rikëninchö allitsu këkäyan. 9 Tsënö kaptimpis, llapankuna juiciunnaq* kayanqanta cuentata qokuyaptinmi, tsë ishkan nunakunawan pasanqannölla imatapis lograyanqatsu.+ 10 Peru qamqa allim sïguikanki imanö yachatsikunqäta, imanö kawanqäta, kawë vïdachö ima rurëta munanqäta,+ markäkoq o yärakoq kanqäta, pacienciayoq kanqäta, kuyakoq kanqäta y alli tsarakunqäta, 11 y musyankim Antioquïachö,+ Iconiuchö+ y Listrachö+ pasamanqannölla, imëkata rurar sufritsiyämanqanta y imëka mana allikunapa pasanqäta. Tsënö kaptimpis, imëkata rurar sufritsiyämaptimpis allim tsarakurqä y tsë llapanta pasanqächömi Señor salvamarqan.+ 12 Rasumpa kaqchöqa, Teyta Diosta llapan shonqunkunawan sirwita munaq Cristu Jesuspa llapan qateqninkunatam, imëkata rurar sufritsiyanqa.+ 13 Peru mana alli y engañakoq nunakunaqa, jukkunata engañar y kikinkunata engañakurmi, mana allipita mas mana alliman chäyanqa.+

14 Peru qamqa, yachakunqëkiman y creinëkipaq yanapayäshunqëkiman creir sïgui.+ Qamqa musyankim pikunapita tsëkunata yachakunqëkita, 15 y llullullaraq kanqëkipitam*+ sagrädu librukunachö qellqarëkanqanta musyanki.+ Tsëkunaqa yachaqta tikratsishurnikim, Cristu Jesusman markäkoq o yärakoq karnin salvacionta tarinëkipaq yanapayäshunki.+ 16 Llapan qellqarëkaqmi Teyta Diospita shamun+ y allim yachatsikunapaq,+ pitapis correginapaq, imatapis correginapaq y alli kanqanmannö pitapis yachatsinapaq,*+ 17 tsënöpa Teyta Diospa sirweqnin imatapis alli yachanampaq y imëka allikunata ruranampaq listu këkänampaq.