Mateu

26 Tsëkunata parlar usharirnam Jesusqa qateqninkunata kënö nirqan: 2 “Musyayanqëkinöpis këpita ishkë junaqtam Pascua Fiesta kanqa,+ y qeruchö wanutsiyänampaqmi o wañutsiyänampaqmi Nunapa Tsurinta entregayanqa”.+

3 Tsënam mandakoq sacerdötikuna y markachö dirigeqkunaqa, Caifas jutiyoq mas mandakoq sacerdötipa patiunchö juntakäyarqan.+ 4 Tsëchömi Jesusta yachëllapa prësuyänampaq y wanutsiyänampaq llapankuna yachatsinakuyarqan.+ 5 Tsënö kaptimpis, “ama fiestachöqa, nunakuna büllar contrantsik mana sharkuyänampaq” niyarqanmi.

6 Betaniachö lepra qeshyayoq nir reqiyanqan Simonpa wayinchö Jesus këkaptinnam,+ 7 alabastru botëllachö* alläpa cuestaq perfümita aparkur juk warmi pëman witirqan, y mikuykaptinmi tsë perfümita peqanman o umanman jichar qallëkurqan. 8 Tsëta rikarnam qateqninkunaqa cölerar kënö niyarqan: “¿Imapaqtan tsë perfümita perditsin? 9 Tsë perfümitaqa atska qellëchö rantikuykurchi, tsë qellëta waktsakunata qarëkushwan karqan”. 10 Tsëta cuentata qokurirmi Jesusqa pëkunata kënö nirqan: “¿Imanirtan kë warmipaq tsënö parlayanki? Pëqa alläpa allitam noqapaq ruramushqa. 11 Waktsakunaqa qamkunawanmi imëpis këkäyanqa,+ peru noqaqa manam llapan tiemputsu qamkunawan këkäshaq.+ 12 Kë warmi perfümita janäman jichamurqa, pampashqa kanäpaqmi alistëkäman.+ 13 Noqam qamkunata nï,* mëchöpis alli noticiakunata willakuyanqanchöqa, kë warmi yarpashqa kanampaqmi ruranqanta willakuyanqa”.+

14 Tsënam döci apostolninkunapita Jüdas Iscariöti+ jutiyoq kaq, mandakoq sacerdötikunaman ëwar+ 15 kënö tapurqan: “¿Imatataq äniyämanki Jesusta traicionanäpaq?”.+ Tsënam pëkunaqa treinta yuraq pläta qellëta äniyarqan.+ 16 Tsë junaqpitam Jüdasqa Jesusta traicionanampaq imë mas alli kanampaq kaqta pensarqan.

17 Levadürannaq Tantata Mikuyänan Fiesta qallanan junaqmi,+ qateqninkuna Jesusman shamur, “¿mëchötan Pascua mikuyta mikunëkipaq alistayämunäta munanki?” nir tapuyarqan.+ 18 Pënam nirqan: “Markaman ëwar tal nunata këta niyë: ‘Maestrum kënö nin: “Ichikllachönam wanukushaq.* Wayikichömi qatimaqnïkunawan Pascua Fiestata pasashaq”’”. 19 Tsënam qateqninkunaqa Jesus mandanqannölla rurar Pascua Fiestapaq alistapakuyarqan.

20 Inti o rupay jeqarkuptinnam+ Jesusqa döci qateqninkunawan mësa kaqchö jamarëkarqan.+ 21 Y llapankuna mikuykäyaptinmi pëqa, “noqam qamkunata nï,* qamkunapita juknikikunam tracionamanqa” nirqan.+ 22 Tsënö niptinnam alläpa llakikur juknin juknin kënö niyarqan: “Teytë, ¿manam noqatsu kallä aw?”. 23 Tsënam pëqa nirqan: “Noqawan juntu tazonman tantanta tullpoqmi traicionamanqa.+ 24 Rasunmi, Nunapa Tsurinqa pëpaq qellqarëkanqannömi dejariyäshunki, peru ¡allaw,+ Nunapa Tsurinta traicionaq nuna!+ Mana yurikunqanmi tsë nunapaqqa mas alli kanman karqan”.+ 25 Tsënam traicionanampaqna këkaq Jüdasqa, “Maestru, ¿manam noqatsu kallä aw?” nir tapurqan. Jesusnam, “awmi, kikikim nikanki” nir contestarqan.

26 Mikuykäyaptinnam Jesusqa tantata aptarkur Teyta Diosman mañakuskir pakirirqan,+ tsëpitanam qateqninkunata kënö nir qararqan: “Kë tantata mikuyë. Këqa cuerpü cuentam”.+ 27 Y vïnuyoq cöpata aptarkur Diosta agradecikurirmi kënö nir pëkunata makyarqan: “Kë cöpapita llapëki upuyë.+ 28 Kë cöpachö vïnuqa, ‘acuerduta välitseq+ yawarnï’ cuentam,+ y mëtsikaq nunakuna jutsankunapita* perdonashqa kayänampaqmi+ entregashqa kanqa.+ 29 Peru noqam qamkunata nï,* Teytäpa Gobiernunchö qamkunawan llullu vïnuta yapë upunqä junaqyaqmi, vïnutaqa upushaqnatsu”.+ 30 Tsëpitanam cantarnin Teyta Diosta alabëkur* Olïvus jirkata ëwakuyarqan.+

31 Tsënam Jesusqa kënö nirqan: “‘Üshakuna wakpa këpa ëwakuyänampaqmi mitsikoqta wanutsishaq’ nir qellqarëkanqan cumplikänampaqmi, kanan paqasqa llapëki dejarayämanki.*+ 32 Peru kawariramurqa, Galilëa provinciamanmi puntëkikunata ëwashaq”.+ 33 Tsënam Pëdruqa nirqan: “Pasashunqëkita rikar llapankuna dejayäshuptikipis,* ¡noqaqa mana imëpis dejashqëkitsu!”.+ 34 Jesusnam, “noqam qamta neq, kanan paqas gällu manaraq cantaptinmi, kima kuti negamanki” nirqan.+ 35 Tsënam Pëdruqa, “qamwan juntu wanunä o wañunä kaptimpis, manam imëpis negashqëkitsu”+ nirqan. Y wakin qateqninkunapis tsënöllam niyarqan.

36 Tsëpitanam Jesusqa Getsemanï+ niyanqan sitiuman qateqninkunawan ëwarqan, y tsëchömi kënö nirqan: “Washa läduta Teyta Diosman mañakoq ëwanqäyaq këchö tëkäyë”.+ 37 Tsënö nirmi Pëdrutawan Zebedeupa ishkan tsurinkunata pusharkur ëwakurqan, y alläpa llakikur y yarpachakurmi+ 38 pëkunata kënö nirqan: “Alläpa llakikurmi wanuykaqnöna sientikü. Këchö quedakur noqanö mana punukarlla këkäyë”.+ 39 Tsënö nirmi mas washaman ëwëkur urkumpis patsaman chanqanyaq qonqurikuykur kënö mañakurqan:+ “Teytallä, puëdikaptinqa kë cöpata noqapita pasëkatsillë.+ Peru ama noqa munanqänöqa katsuntsu, sinöqa qam munanqëkinö kallätsun”.+

40 Qateqninkunaman kutir punuykaqta tarirnam Pëdruta kënö tapurqan: “¿Manaku juk hörallapis noqanö riyëkar o rikchëkar këta puëdiyarqunki?+ 41 Tentacionman mana ishkiyänëkipaq,+ alkäbu alkäbu+ y mañakur këkäyë.+ Awmi, nuna allita rurëta munaptimpis, höraqa manam alli kaqta ruranampaq kallpan kantsu”.+ 42 Tsënöllam ishkë kaq kutichöpis ëwar kënö mañakurqan: “Teytallä, puëdikaptinqa ama kë cöpapita upulläshaqtsu, peru qam munanqëkinö kallätsun”.+ 43 Qateqninkunata punuy venciptinmi, yapë kutirpis punukashqata tarirqan. 44 Tsëmi pëkunata dejëkur kima kaq kutipana mañakoq ëwarqan, y puntata mañakunqannöllam mañakurqan. 45 Tsëpitanam qateqninkunaman kutïkur kënö nirqan: “¡Kënö hörachöku qamkunaqa descansar punuykäyanki! ¡Rikäyë! Höranam jutsata* ruraqkunapa makinman Nunapa Tsurinta entregayänampaq.* 46 Sharkuyë, ëwakushun. Rikäyë, traicionamaqqa chëkämunnam”. 47 Manaraq parlar ushaptinmi, döci apostolninkunapita Jüdas chäramurqan. Pëwanmi mandakoq sacerdötikuna y markachö dirigeqkuna mandayanqan mëtsika nunakunapis espädankunawan y garrutinkunawan* chäriyarqan.+

48 Traicionaq kaqqa pëkunatam kënö nishqa karqan: “Mutsanqä kaqmi kanqa, pëta prësuyanki”. 49 Tsëmi Jesusman defrenti ëwëkur, “¿yamëllaku Maestru?”* nir kuyëllapa mutsëkurqan. 50 Tsënam Jesusqa kënö tapurqan: “Amïgu, ¿imaqtan shamurqunki?”.+ Tsë höram Jesusman witïkur prësuyarqan. 51 Tsënam Jesuswan këkaq juk qateqnin espädanta sutarkur, mas mandakoq sacerdötipa sirweqnimpa rinrinta walluskapurqan.+ 52 Tsënam Jesusqa nirqan: “Espädëkita sitiunman kutitsi,+ espädawan pelyaqkunataqa, espädawanmi wanutsiyanqa.+ 53 ¿O döci grüpu angelkunata mandamunampaq Teytäta rogakuyta mana puëdinqätaku pensanki?+ 54 Tsëta ruraptïqa, ¿imanöraq cumplikanman këkuna pasanampaq Diospa Palabran willakunqan?”. 55 Tsë höram Jesusqa tsëchö nunakunata kënö nirqan: “¿Suwakoqtanö prësuyämänëkipaqku espädëkikunawan y garrutikikunawan shayämurqunki? Waran waran templuchö tëkur yachatsikur këkaptïpis,+ qamkunaqa manam prësuyämarqëkitsu.+ 56 Peru kë llapanqa pasashqa Diospa willakoqninkuna qellqayanqan cumplikänampaqmi”.+ Tsënam llapan qateqninkuna pëta dejëkur qeshpir ëwakuyarqan.+

57 Jesusta presoqkunaqa mas mandakoq sacerdöti Caifaspa+ wayimanmi apayarqan, tsëchömi Ley qellqaqkuna y markachö dirigeqkunapis juntarëkäyarqan.+ 58 Pëdruqa tsë llapan imachö ushanampaq kaqta musyëta munarmi karu qepanta ëwarqan mas mandakoq sacerdötipa patiunyaq, tsëman yëkurnam wayichö sirwipakoqkunawan juntu jamakurirqan.+

59 Tsëyaqnam mandakoq sacerdötikuna y Judïukunapa Jatun Cortinchö llapan trabajaqkunaqa, wanutsiyänanrëkur Jesuspaq mana kaqta parlayänampaq testïgukunata ashiyarqan.+ 60 Peru mana kaqta parlaq testïgukuna mëtsikaq chäyaptimpis, manam culpayänampaq imatapis tariyarqantsu.+ Tsëpitanam ishkaq testïgukuna chëkur 61 kënö niyarqan: “Kë nunaqa kënömi nirqan: ‘Diospa templunta juchuratsirmi* noqaqa kima junaqllachö sharkatsishaq’”.+ 62 Tsënam mas mandakoq sacerdötiqa sharkur kënö nirqan: “¿Manaku imatapis ninki? ¿Ima ninkitan kë nunakuna qampaq nikäyanqampita?”.+ 63 Peru Jesus imatapis mana niptinmi mas mandakoq sacerdötiqa kënö nirqan:+ “¡Kawëkaq Diospa jutinchö jurar niyämë qam Diospa Tsurin Cristu kanqëkita o mana kanqëkita!”.+ 64 Jesusnam kënö nirqan: “Awmi, kikikim nirqunki. Peru noqam qamkunata nï,* kanampitaqa llapanta puëdeqpa* derëcha lädunchö tëkaqta+ y pukutë jananchö shamuykaqtam+ Nunapa Tsurinta rikäyanki”.+ 65 Tsënam mas mandakoq sacerdötiqa janan kaq röpanta rachir kënö nirqan: “¡Diostam ofendishqa! ¿Imapaqnatan mas testïgukunata wanantsik?* ¡Rikäyë, wiyayarqunkim Diosta ofendinqanta! 66 ¿Ima niyankitan?”. Tsënam, “kë nunaqa wanunanmi o wañunanmi” niyarqan.+ 67 Tsëpitanam cäranchö toqapur+ kutar ushayarqan,+ y wakinnam laqyar+ 68 kënö niyarqan: “Qam Cristu, Diospa willakoqnin karqa, mä niyämë, ¿pitan maqashurqunki?”.

69 Waqta patiuchö tëkaptinnam juk sirwipakoq warmi Pëdruman witïkur kënö nirqan: “¡Qampis Galilëapita Jesuswanmi pureq kanki!”.+ 70 Peru pëqa llapankunapa jananchömi, “manam musyätsu imapaq parlëkanqëkita” nirnin negarqan. 71 Y yëkuna punkuman yarquriptinnam, juk shipashna Pëdruta rikëkur tsëchö këkaqkunata kënö nirqan: “Kë nunaqa Nazaretpita Jesuswanmi pureq”.+ 72 Y yapëmi jurar, “¡manam tsë nunata reqïtsu!” nirnin negarqan. 73 Rätunllatanam tsëchö këkaqkuna Pëdruman witïkur kënö niyarqan: “Qampis pëkunawanmi pureq kanki, imanö parlanqëkipitam tsëta musyayä”. 74 Tsënam Pëdruqa jurar y kikinta maldicikur, “¡manam tsë nunata reqïtsu!” nirqan, y tsë höram juk gällu cantarirqan. 75 Tsënam Pëdruqa Jesus kënö ninqanta yarpaskirqan: “Manaraq gällu cantaptinmi, kima kuti negamanki”.+ Y waqtaman yarqurmi llakikur alläpa waqarqan.