Lücas

11 Juk kutinam juk sitiuchö mañakur këkarqan, y mañakur ushariptinmi juk qateqnin kënö nirqan: “Teytë, qateqninkunata Juan yachatsinqannölla imanö mañakuyänäpaq yachëkatsiyämë”.

2 Tsënam pëqa nirqan: “Mañakurqa kënö niyanki: ‘Teyta, jutillëki respetashqa këkullätsun.*+ Gobiernuyki shamuykullätsun.+ 3 Wanayanqämannö* cada junaqpaq mikuylläkuna këkutsun.+ 4 Noqakunapis conträkuna jutsallakoqkunata* perdonayanqänölla,+ jutsalläkunapita perdonëkayämë,+ y jutsaman imapis mana ishkitsiyämänampaq yanapëkayämë’”.+

5 Tsëpitanam nirqan: “Mëqëkipapis juk amïguykikuna kanman, y pullan paqas pëman ëwëkur kënö niyankiman: ‘Amïgu, kima tantata prestëkallämë, 6 juk amïgümi karupita chämushqa, y manam qaranäpaq imäpis kantsu’. 7 Tsëna wayi rurimpita kënö contestayäshunkiman: ‘Ama fastidiakamuynatsu. Punkupis alli segurashqanam këkan, noqapis y wamräkunapis cämachönam punuykäyä. Manam imatapis makyanaqpaq sharkamuyta puëdïnatsu’. 8 Qamkunatam këta nï,* amïgun këkar imatapis qaranampaq mana sharkurpis, kutin kutin+ rogakunqanrëkurmi sharkur llapan wananqanta* makyanqa. 9 Tsëqa, mañakur sïguiyë, y chaskiyankim; ashir sïguiyë,+ y tariyankim; punkuta takakur sïguiyë, y kichapuyäshunkim.+ 10 Llapan mañakoqkunam chaskiyan,+ llapan asheqkunam tariyan, y punkuta llapan takakoqkunatam kichapuyanqa. 11 Rasumpa kaqchöqa, ¿mëqëkiraq wamrëkikuna pescäduta mañayäshuptiki, pescädupa rantin culebran qarëkuyankiman?+ 12 ¿O runtuta* mañayäshuptiki, atoq kurun qarëkuyankiman? 13 Tsëqa, qamkuna mana alli nuna këkarpis tsurikikunata allikunata qarëkäyaptikiqa, ciëluchö këkaq Teytëkikunanäqa, ¡masraqmi santu espïritunta mañakoqkunata poderninwan yanapanqa!”.+

14 Tsëpitanam demoniuyoq karnin müduyashqa* nunapita demoniuta qarqurqan.+ Tsë demoniu yarquriptin müdu nuna parlar qallëkuptinnam, tsëchö mëtsika nunakunaqa alläpa espantakuyarqan.+ 15 Peru wakinkunaqa kënömi niyarqan: “Kë nunaqa demoniukunata gobernaq Diablu* yanapaptinmi demoniukunata qarqun”.+ 16 Y wakinnam mana alliman chätsita munar, ciëlupita ima señal-llatapis rikätsikunampaq exigiyarqan.+ 17 Y imata pensëkäyanqanta musyarmi,+ Jesusqa kënö nirqan: “Mëqan gobiernuchöpis pelyar rakikarqa, mana allichömi ushayanqa, y mëqan familiachöpis mana acuerdu karqa, rakikarmi ushayanqa. 18 Qamkunaqa Diablu* yanapamaptin demoniukunata qarqunqätam niyanki, peru Diablu kikimpa contranlla këkaptinqa, ¿imanöraq gobiernun tsarakunman?. 19 Y Diablu* yanapamaptin demoniukunata qarquptïqa, ¿pï yanapaptintaq qatiräyäshoqnikikunaqa demoniukunata qarquyan? Tsëmi qatiräyäshoqnikikunalla qamkunata juzgayäshunki. 20 Peru Teyta Diospa poderninwan* demoniukunata qarquptïqa,+ Diospa Gobiernunmi janëkikunachöna këkan.+ 21 Kallpayoq nuna imëka armankunawan wayinta* cuidaptinqa, imëkampis segürum këkan. 22 Peru pëpitapis mas kallpayoq nuna ëwar vencirninqa, confiakunqan armankunata qochïkurmi o qechuykurmi llapan apakunqanta wakinkunata rakipunqa. 23 Noqaman mana qaqämoqqa conträmi këkan, y noqawan mana juntaqqa nunakunatam rakikätsin.+

24 Mana alli espïritu nunapita yarqurqa, jamanampaq sitiuta ashirmi tsaki sitiukunapa pasan, peru mana tarirmi, ‘dejamunqä wayïman kutikushaq’+ nin. 25 Y tsë wayiman charqa, pitsashqata y shumaq churapakushqatam tarin. 26 Tsënam ëwar kikimpitapis mas mana alli qanchis espïritukunata tsë wayiman pushamun, y yëkuykurmi llapankuna tsëchö kawar quedakuyan, y tsë nunaqa punta kanqampitapis mas peormi tikraskin”.

27 Tsëkunata nikaptinnam mëtsikaq nunakuna rurimpita juk warmi fuertipa kënö nirqan: “¡Imaraq kushikun pachanchö apashoqniki y chichishoqniki* warmiqa!”.+ 28 Tsënam Jesusqa, “¡manam! ¡Diospa palabranta wiyaqkuna y cäsukoqkunam kushishqaqa kayan!”+ nirqan.

29 Mëtsikaq nunakuna kichkinakur-raq lädunman juntakäriyaptinmi, pëqa kënö nir qallëkurqan: “Kanan witsan mana alli nunakunam milagruta rikëta munayan, peru manam ni ima milagrutapis rikäyanqatsu, sinöqa Jonasta pasanqan milagrullatam.+ 30 Nïnivi nunakunapaq Jonas+ juk señal kanqannöllam, Nunapa Tsurimpis kanan witsan nunakunapaq juk señal kanqa. 31 Säbata* gobernaq reinapis+ Juiciu Junaqchö kawarimurmi kanan witsan nunakunata condenanqa. Pëqa patsapa mas karu kuchumpitam Salomon yachaq kanqanta wiyaq shamurqan. Peru ¡rikäyë!, Salomonpitapis mas mejormi këchö këkan.+ 32 Juiciu Junaqchö kanan witsan nunakunawan kawarimurmi, Nïnivi nunakunaqa pëkunata condenayanqa. Nïnivi nunakunaqa Jonas willakunqanta cäsukurmi arrepentikuyarqan.+ Peru ¡rikäyë!, Jonaspitapis mas mejormi këchö këkan. 33 Chiwchita tsaritsirqa manam pakarëkaq sitiumantsu churayan ni canastawantsu tsaparkuyan, sinöqa wayiman yëkoqkunata aktsinampaqmi churaränanman churayan.+ 34 Nawiqa cuerpupa aktsinmi. Tsëmi nawiki alli kaqllata rikaptinqa,* entëru cuerpuyki atsikyanqa. Peru nawiki envidiösu* kaptinqa, entëru cuerpuykim ampiranqa o tsakanqa.*+ 35 Tsëmi cuidädu kanëki qamchö këkaq aktsi, ampi o tsakë* mana kanampaq. 36 Llapan cuerpuyki chipapaptin y juk kuchunllapis mana ampiraptinqa o tsakaptinqa,* chiwchi aktsishuptikinömi llapampis chipapëkanqa”.

37 Tsëkunata parlar ushariptinnam, juk fariseu wayinman mikoq invitarqan. Tsëmi pëqa yëkur mësa kaqman jamakurqan. 38 Peru mikunampaq makinta yakuwan mana awikunqanta* rikarmi, tsë fariseuqa espantakurqan.+ 39 Tsënam Señorqa fariseukunata kënö nirqan: “Qamkunaqa cöpapata y plätupatapis jananllatam limpiayanki, peru ruripaqa, imëkapaq mallaqäkoq y alläpa mana alli ruraqkunam kayanki.+ 40 ¡Juiciunnaqkuna! Jananta ruraqmi rurintapis rurashqa, ¿aw? 41 Tsëqa, wanëkaqkunata* yanaparqa shonqupita rurayë, y ¡rikäyë!, tsënö rurarqa llapanchöpis limpium kayanki. 42 Peru ¡allaw allish tukoq fariseukuna! ¡Qamkunaqa mentapita, rüdapita y wakin mikuna plantakunapitam diezmuta entregayanki,+ tsënö kaptimpis Teyta Diosta kuyanapaq mandakuyta y rikënimpaq alli kaq rurëtaqa mana kaqpaqmi churayanki! Tsëkunapita diezmuta entregayänëki kaptimpis, manam tsëkunataqa mana kaqpaq churayänëkitsu karqan.+ 43 ¡Allaw qamkuna, fariseukuna! ¡Qamkunaqa Diosta adorayänan wayikunachö punta puntaman* jamakuyta, y rantikuyänan pampakunachö shumaq saludayäshunëkitam gustayanki!+ 44 ¡Allaw qamkuna! ¡Qamkunaqa mana rikakoq* sepultürakunanömi kayanki, y mana rikakuptinmi+ nunakunaqa mana musyar tsëkuna janampa puriyan!”.

45 Tsëta contestarnam Leyta alli reqeqkunapita juknin kënö nirqan: “Maestru, tsëta nirqa noqakunatapis insultëkäyämankim”. 46 Tsënam Jesusqa nirqan: “¡Allaw qamkunapis, Leyta alli reqeqkuna! ¡Lasaq cargakunata nunakunaman churarpis, qamkunaqa manam juk dëduykunallawampis kuyutsita munayankitsu!+

47 ¡Allaw qamkuna! ¡Qamkunaqa Diospa willakoqninkunapaqmi sepultürakunata rurayanki, peru unë kastëkikunam pëkunata wanutsiyarqan o wañutsiyarqan!+ 48 Rasumpa kaqchöqa, qamkunaqa musyayankim unë kastëkikuna rurayanqanta, tsënö kaptimpis rurayanqankunawan acuerdum kayanki. Pëkunaqa Diospa willakoqninkunatam wanutsiyarqan,+ y qamkunanam sepultürakunata rurayanki. 49 Tsëmi Diospis yachëyoq këninchö kënö nirqan: ‘Noqaqa willakoqkunata y apostolkunatam pëkunaman mandashaq, y wakintam wanutsiyanqa o wañutsiyanqa, y wakintanam imëkata rurar sufritsiyanqa. 50 Tsënöpa patsachö nunakuna yurikur qallayanqampita, Diospa willakoqninkunapa yawarnimpita kanan witsan nunakuna culpayoq kayänampaq,*+ 51 Abelpa+ yawarnimpita qallëkur Zacarïaspa yawarninyaq. Pëtam altarpa y templupa chowpinchö* wanutsiyarqan o wañutsiyarqan’.+ Awmi, noqam qamkunata nï,* tsë llapampitam kanan witsan nunakunaqa castïguta chaskiyanqa.

52 ¡Allaw Leyta alli reqeqkuna! ¡Qamkunaqa Teyta Diospita yachakuyänantam nunakunata michäyarqunki!* Tsëmi qamkunapis yëkuyarqunkitsu, y yëkuykaqkunatapis michëtam tïrayanki!”.+

53 Tsë sitiupita yarquriptinnam, Ley qellqaqkuna y fariseukunaqa imëkanöpa cöleratsita munar imëkata tapuyarqan, 54 parlanqanchö mana alliman chätsita munar.+