7 KAQ YACHATSIKÏ

Rasumpa y markäkïpaq kaqta willakï

Lücas 1:3

KËPAQMI PARLAN: Imatapis alli entienditsinëkipaqqa markäkïpaq o yärakuypa kaq willakïkunapita parlë.

Markäkïpaq o yärakuypa kaq willakïkunapita parlë. Diospa Palabrampitam masqa parlanëki. Cientïficukuna niyanqanta, noticiakunata o maskunata willakunëkipaqqa, tsëllaraq yarqamushqa y markäkïpaq librukunatam utilizänëki.
Bibliata y maskunata alli estudië. Juk textuta entienditsikunëkipaqqa, këkunatam alli rikänëki: qepan kaq y puntan kaq versïculukuna imata nikanqanta, imata yachatsikïkanqanta y “alli juiciuyoq y markäkïpaq” publicacionkunachö imata yachatsikuyanqanta (Mat. 24:45). Juk librukunapita willakurqa imata ninqanta y imarëkur escribiyanqantam alli rikänëki.

Manam maskunata yaparkur willakunëkitsu y nümerukuna kaptimpis manam maskunata yapanëkitsu. Tsënöpa mana kaqta mana entienditsikunëkipaq. “Wakin nunakuna” niptinqa, manam “llapankuna” ninëkitsu o “hörantaqa” niptinqa, manam “imëpis” ninëkitsu.
Shumaq entienditsikïta procurë. Yachatsikïkanqëkita maslla entiendiyänampaqqa, juk textuta leyirnin o ima libruchöpis ninqampita willakïta usharirmi, tapukïkunata ruranëki o tsëpaq parlaq juk cäsukunata willakur shumaq entienditsinëki.