¿Imanötan Jehoväqa mañakunqantsikta contestamun?

1, 2. ¿Imatataq höraqa tapukurquntsik?

¿“MAÑAKUNQÄTA Jehovä contestamuntsuraq” nir imëllapis tapukurqunkiku? Manam qamllatsu tsënöqa tapukunki. Jehoväpa mëtsikaq sirweqninkunam mana allikunapa pasayanqan hörakuna tsënö tapukuyashqa. Noqantsikpis mana allikunapa pasarninqa, capazchi mañakunqantsikta Jehovä mana contestamunqanta pensashwan.

² Këchömi yachakushun, mañakunqantsikta Jehovä contestamunqanta imanir següru kanantsikpaq (1 Juan 5:15). Tsënöllam yachakushun, mañakunqantsikta Jehovä mana contestamunqanta pensashqapis imanö contestamunqanta.

HÖRAQA MANAM SHUYARANQANTSIKNÖTSU MAÑAKUNQANTSIKTA CONTESTAMUNQA

3. ¿Imanirtan Jehoväqa pëman mañakunantsikta munan?

³ Bibliachöqa nimantsik Jehovä alläpa kuyamanqantsikta y valoramanqantsiktam (Ageu 2:7; 1 Juan 4:10). Tsëmi Diosnintsikqa, yanapamänantsikpaq pëman mañakunantsikta munan (1 Pëd. 5:6, 7). Diosnintsikqa pëpita mana rakikäkurinapaq y ima problëmata pasarpis alli aguantanapaqmi yanapamënintsikta munan.

4. ¿Imanötan musyantsik sirweqninkuna mañakuyaptin Jehovä contestamunqanta? (Rikäri dibüjuta).

⁴ Bibliachömi tarintsik mëtsikaq sirweqninkuna mañakuyaptin Jehovä imanö contestanqanta. Jukqa karqan gobernanti Davidmi. Wanutsita munayaptinmi imëka mana allikunapa pasarqan, peru Jehovämanmi yanapëkunampaq imëpis mañakoq. Juk kutim kënö nirqan: “Teyta Jehovä, mañakamuptï wiyëkallämë. Yanapamänëkipaq rogakamuptï wiyëkallämë. Qamqa llapan änikunqëkitam cumplinki y alli ruraqmi kanki, wiyëkallämë” (Sal. 143:1). Y Jehoväqa mañakunqanta wiyarmi salvarqan (1 Sam. 19:10, 18-20; 2 Sam. 5:17-25). Tsëmi Davidqa Jehoväman confiakurnin kënö nirqan: “Teyta Jehoväqa, pëman llapan qayakoqkunapa lädunchömi këkan”. Noqantsikpis pënömi confiakunantsik (Sal. 145:18).

5. ¿Jehoväqa sirweqninkuna shuyaräyanqannöku imëpis contestamun? Juk igualatsikuywan willakaramuy. (Rikäri dibüjuta).

⁵ Capazchi Jehoväqa shuyaranqantsiknötsu mañakunqantsikta contestamunqa. Tsëmi apostol Pablutapis pasarqan. Pëqa alläpa sufrirmi Diosnintsikman mañakurqan yanapëkunampaq. ¿Wiyarqanku Diosnintsik? Awmi, peru manam Pablu mañakunqantatsu rurarqan. Problëmanta ushakätsinampa rantinmi mana dejëpa sirwinampaq kallpanwan yanaparqan (2 Cor. 12:7-10).

6. ¿Imanirtan höraqa pensashwan mañakunqantsikta Jehovä mana contestamunqanta?

⁶ Noqantsik mañakushqapis Jehoväqa mana shuyaranqantsiktam ruraramunman. Peru confiakunantsikmi tsë ruramunqanqa noqantsikpaq mas alli kaq kanqanta. Diosnintsikqa, ‘mañakunqantsikpita y pensanqantsikpitapis’ mastam rurëta puëdin (Efes. 3:20). Tsëmi Jehoväqa, mana pensanqantsik höra y mana shuyaranqantsiknö mañakunqantsikta contestamunman.

7. ¿Imanirtan höraqa juknöpana Diosnintsikman mañakunantsik? Pasakunqanta willakaramuy.

⁷ Höraqa Jehovä imata munanqanta entiendirirqa, juknöpanam mañakunantsik. Tsëmi pasarqan Martin Poetzinger jutiyoq wawqintsikta. Pëtaqa casakuriptinllam, alläpa sufritsikoq carcelman näzi gobiernu carcelaratsirqan. Wawqintsik Martinqa qallananllachöqa, warminwan juntu këta munar y yachatsikuyta munarmi libri dejariyänampaq Jehoväman mañakurqan. Peru ishkë semäna pasariptinmi, cuentata qokurirqan mana librayänampaq kaqta. Tsëmi Jehoväman kënöna mañakurqan: “Teyta Jehovä yanapëkamë imata ruranäta munanqëkita cuentata qokunäpaq”. Tsëpitam alli pensarnin cuentata qokurirqan alläpa sufritsikoq carcelchö këkaq wawqikuna alläpa sufrikäyanqanta. Pëkunaqa warminkunawan y wamrankunawan juntu këta munarmi alläpa yarpachakuyaq. Tsëmi wawqi Martinqa kënö nirna Jehoväman mañakurqan: “Gracias këchö yanapakunäpaq churamanqëkipita. Kananqa yanapëkallämë wawqïkunata llapan puëdinqämannö yanapëkunäpaq”. Tsëtam wawqi Martinqa nuëvi watapa sufritsikoq carcelchö kanqan witsan rurarqan.

8. Diosnintsikman mañakurninqa, ¿imatataq yarpänantsik?

⁸ Yarpänantsikmi änimanqantsikkunata Jehovä ruramunampaq kaqkunata. Tsë ruramunampaq kaqqa llapan sufrimientuntsikkunata ushakätsimunampaq kaqmi. Manam kanqanatsu desgraciakuna, qeshyakuna ni wanuypis. Tsëtaqa Jehovä ruramunqa Gobiernunwanmi (Dan. 2:44; Apoc. 21:3, 4). Peru tsë tiempu chämunqanyaqqa, kë munduta Satanas gobernanantam Jehovä permitikan (Juan 12:31; Apoc. 12:9).b Kanan tiempullana llapan sufrimientuntsikkunata Jehovä ushakäratsimuptinqa, ¿manatsuraq Satanas alli gobernëkämunqanta pensashwan? Tsëmi änimanqantsikkunata Jehovä cumplimunanta shuyarashwan, peru shuyaranqantsik tiempuchöpis Jehoväqa yanapëkämäshunllam. Noqantsikpaq Jehovä imakunata ruramunampaq kaqta rikärishun.

¿IMANÖTAN JEHOVÄQA MAÑAKUNQANTSIKTA CONTESTAMUN?

9. ¿Imanötan Jehoväqa yanapamantsik imatapis allita decidinantsikpaq? Pasanqanwan willakaramuy.

⁹ Alli pensëkur decidinapaqmi yanapamantsik. Jehoväqa änimarquntsik imatapis decidinapaqqa, alli pensëkur ruranantsikpaq yanapamänapaqmi. Y masqa casakunantsikpaq o mana casakunantsikpaqpis decidinqantsikkunachömi yanapamantsik (Sant. 1:5). Soltëra panintsik Marïa pasanqanta rikärishun.c Pëqa precursöra regularmi karqan y Jehoväta kushishqa sirwikarmi juk wawqita reqirirqan. Marïam kënö willakun: “Tsë turiwanqa amïgum tikrariyarqä y tiempuwanqa gustanakurmi qallëkuyarqä. Tsëmi pëwan casakunäpaq o mana casakunäpaq kaqtapis kikï decidinä karqan. Y tsëpaqqa, yanapamänampaqmi Jehoväman mañakurqä”. Marïaqa cuentatam qokurqan mañakunqanta Jehovä contestamunqanta. ¿Imanötan yanaparqan? Publicacionkunachömi casädu vïdapaq parlaq yachatsikuykunata tarirqan y Testïgu mamäninmi shumaq consejarqan. Tsënöpam Marïaqa allita decidirqan.

10. Filipensis 4:13 ninqannö, ¿imanötan Jehovä sirweqninkunata yanapanqa? Pasakunqanta willakaramuy. (Rikäri fötuta).

¹⁰ Mana allikunapa pasanqantsik höram kallpayoqta tikratsimantsik. Jehoväqa apostol Pabluta yanapanqannöllam, noqantsiktapis mana allikunapa pasanqantsik hörakuna alli tsarakunapaq yanapamäshun (leyi Filipensis 4:13). Tsënömi yanaparqan Africa nacionpita Benjamin jutiyoq wawqintsikta. Pëqa jövin kanqampitam markankunapita qeshpir ëwakoqkunapaq campamentuchö familianwan atska watapa täkurqan. Benjaminmi kënö nin: “Jehovätam seguïdu mañakoq kä imëpis alli kaqta ruranäpaq kallpayoqta tikratsimänampaq. Jehoväqa mañakunqäta contestamurmi publicacionkunawan yanapamarqan tranquïlu sientikunäpaq y mana mantsakushpa yachatsikunäpaq”. Y tsëpitanam kënö nin: “Wakin Testïgukuna imakunapa pasëkäyanqanta leyinqämi yanapamarqan Jehoväta mana dejanäpaq y mana qelanäkurinäpaq”.

11, 12. ¿Imanötan Jehoväqa wawqi panintsikkunata utilizanman mañakunqantsikta contestamunampaq? (Rikäri fötuta).

¹¹ Wawqi panintsikkunawanmi yanapamantsik. Wanutsiyänampaq prësuyanqan paqasmi, Jesusqa Teytanman kutin kutin mañakurqan. “Diospa contranmi churakashqa” nir wanutsiyänampaq kaqpita librëkunampaqmi mañakurqan. Peru Jehoväqa libranampa rantinmi, juk angelta mandarqan yanapanampaq (Lüc. 22:42, 43). Tsënöllam Jehoväqa noqantsiktapis wawqi panintsikkunawan yanapamënintsikta puëdin. Pëkunaqa capaz qayamarnintsik o watukamarnintsik shumaq parlapäramashwan. Y llapantsikmi wawqi panintsikkunata ‘shumaq parlaparnin’ animarita puëdintsik (Prov. 12:25).

¹² Panintsik Miriam pasanqanta rikärishun. Qowan o runan wanunqampita semänakuna pasariptinmi, pëqa alläpa llakishqa waqarnin wayinchö japallan këkarqan y pillawampis parlakuritam munarqan. Panintsik Miriammi kënö nin: “Manam pillatapis qayarinäpaq valornï karqantsu, tsëmi Jehoväman mañakurqä. Y waqarëkar Jehoväman mañakuykaptïmi, telëfunupa qayarayämarqan. Juk anciänum kanaq, pëwanqa alli amïgum kayarqä”. Kë anciänuqa warminwanmi Miriamta shumaq consolayarqan, y Miriamqa cuentatam qokurqan tsë höra qayarinampaq kë anciänuta Jehovä utilicëkanqanta.

13. ¿Imanötan Jehoväqa mañakunqantsikta contestamunampaq mana sirweqnin nunakunatapis utilicëta puëdin? Jukta willakaramuy.

¹³ Mañakunqantsikta contestamunampaqqa, mana sirweqnin nunakunatapis Jehoväqa utilicëta puëdinmi (Prov. 21:1). Jehoväqa höraqa mañakunqantsikta contestamunampaqmi mana sirweqnin nunakunatapis utilizan. Këllaman pensarishun: gobernanti Artajerjestam utilizarqan trabäjumpita Nehemïasta permïsunampaq, tsënöpa Jerusalenta ëwanampaq y markata shäritsir yanapakunampaq (Neh. 2:3-6). Kanan witsampis Jehoväqa mañakunqantsikta contestamunampaqqa, mana Testïgu nunakunatam yanapamänantsikpaq utilicëta puëdin.

14. ¿Imanötan yanapashunki panintsik Soo Hing pasanqan? (Rikäri fötuta).

¹⁴ Soo Hing jutiyoq panintsikpis willakunmi, yanapanampaq juk doctorta Jehovä utilizanqanta. Soo Hingpa ollqu wamranqa peqampitam o umampitam qeshyarqan y tsënö këkarmi ishkirir accidentäkurirqan. Tsëmi pëta cuidayänampaq Soo Hing y qowampis o runampis trabajëta dejariyarqan, y manana trabajarmi faltapakur qallëkuyarqan. Y alläpa faltapakurmi Soo Hingqa ima rurëtapis puëdirqannatsu. Tsënö këkarmi yanapëkunampaq Jehoväman llapan shonqunwan mañakurqan. Tsënam doctorqa yanaparqan gobiernupita yanapakuyta chaskiyänampaq y täkuyänampaqmi barätullachö wayita tariyarqan. Panintsik Soo Hingmi kënö nin: “Tsëchömi rikäyarqä Jehovä imanö yanapëkäyämanqanta. ‘Mañakunqantsiktaqa [Jehovä] wiyanmi’” (Sal. 65:2).

MAÑAKUNQANTSIKTA JEHOVÄ CONTESTAMUNQANTA MUSYANAPAQQA MARKÄKUNANTSIKMI

15. ¿Imanötan juk pani cuentata qokurqan mañakunqanta Jehovä contestamushqa kanqanta?

¹⁵ Mañakunqantsikta Jehovä contestamunqanmi yanapamäshun Diosnintsikta sirwirnin sïguinapaq. Peru mañakunqantsiktaqa manam llapan nunakuna rikäyänampaqtsu contestamunqa, tsëmi imanö contestëkämunqanta musyanapaqqa alkäbu kanantsik. Yoko jutiyoq panintsikta pasanqanta rikärishun. Pëqa pensarqan mañakunqanta Diosnintsik mana contestamunqantam. Peru tsëpitam, Jehoväman llapan mañakunqanta apuntar qallëkurqan. Y tiempuwannam, apuntanqankunata rikarnin cuentata qokurqan cäsi llapan mañakunqanta contestamushqa kanqanta, hasta mana yarpanqankunatapis. Tsëmi höra höraqa alli kanman mañakunqantsikkunata Jehovä imanö contestamushqa kanqanman alli pensanantsik (Sal. 66:19, 20).

16. ¿Imanötan mañakunqantsik höra yanapamantsik markäkunqantsik o yärakunqantsik? (Hebrëus 11:6).

¹⁶ Manam Diosnintsikman mañakunallapaqtsu markäkoq o yärakoq kanantsik, sinöqa imanö contestëkämunqanta chaskikunapaqpis markäkunantsikmi (leyi Hebrëus 11:6). Wawqintsik Mikewan warmin Chrissy pasayanqanta rikärishun. Pëkunaqa Betelchömi yanapakuyta munayarqan. Mikem kënö nin: “Betelchö yanapakuyta munarmi mëtsika kuti solicitüta llenayarqä y tsë asuntupaqmi Jehoväman imëpis mañakuyaq kayä, peru manam imëpis Betelman trabajaq invitayämarqantsu”. Tsënö kaptimpis, Mikewan Chrissyqa musyayarqanmi mëchö mas alli yanapakuyänampaq kaqta Jehovä musyanqanta. Tsëmi yachatsikoqkunata mas wanayanqan sitiukunachö precursornö yanapakuyarqan y Diosnintsikta adoranantsik wayikunata rurëchöpis llapan puëdiyanqanmannö yanapakuyarqan. Y kananqa congregacionkunata watukarmi yanapakuyan. Mikem kënö nin: “Mañakuyanqätaqa Jehovä contestamurqanmi, peru manam noqakuna munayanqänötsu karqan. Contestamunqanqa pensayanqäpitapis masmi karqan”.

17, 18. Salmus 86:6 y 7 ninqannö, ¿imapitataq següru këkantsik?

¹⁷ (Leyi Salmus 86:6, 7). Gobernanti Davidqa segürum karqan mañakunqanta Jehovä wiyanqanta y contestamunqanta. Y noqantsikpis tsënöllam següru kanantsik. Kanan yachakurinqantsiknömi Jehoväqa imatapis alli pensëkur ruranapaq yanapamäshun y mana allikunapa pasanqantsik hörakunam kallpayoqta tikratsimäshun. Tsënöllam yachakurquntsik yanapamänantsikpaqqa, wawqi panikunata o hasta mana Testïgu nunakunatapis utilizanqanta.

¹⁸ Höraqa manam shuyaranqantsiknötsu mañakunqantsikta Jehovä contestamunqa, peru necesitanqantsik höra y tiempunchömi yanapamäshun. Tsëmi markäkurnin o yärakurnin mañakunantsik. Pëqa kanampis cuidamäshunmi y shamoq tiempuchönam ‘shonquntsik llapan munanqanta ruramunqa’ (Sal. 37:4).