Pï llakitsimashqapis ama Jehoväta dejashuntsu

1. ¿Ima bendicionkunatataq chaskintsik Jehoväpa markanchö kanqantsikpita?

JEHOVÄPA markanchö këqa, ¡alläpa kushikuypaqmi! Kë ushanan tiempukunachö kawanan mana fäcil kaptimpis, Jehoväqa familianchö kanatam permitimarquntsik (Sal. 133:1). Consëjunkunam yanapamantsik familiachö kushishqa kawakunapaq (Efes. 5:33–6:1). Y mana väleqnö sientikunqantsik hörakunam yachëyoqta tikratsimantsik alli tsarakunapaq, tsënöpam kushishqa kantsik.

2. ¿Imatataq ruranantsik, y imanir?

² Tsënö kaptimpis, Jehovä Diosnintsikta sirwita mana dejanapaqqa alliran kallpachakunantsik. ¿Imanir? Höraqa wawqintsikkuna o panintsikkunam ofendiramashwan. O imatapis pantarqa o kutin kutin pantarqa, Jehovä Diosnintsikta sirwitam qelanärishwan. ¿Imataraq rurashwan wawqintsik o panintsik ofendimashqa, majantsik llakitsimashqa o jutsata ruranqantsikpita llakikurqa? Tsëkunachö tsarakunapaqmi Biblia willakunqan nunakunapita yachakushun, tsëmi yanapamäshun Jehovä Diosnintsikta sirwita mana dejanapaq.

JUK WAWQI O PANI OFENDIMASHQA

3. ¿Ima problëmakunapatan Jehoväpa sirweqninkuna pasashwan?

³ Problëma. Rasumpa kaqchöqa, wawqi panintsikkunaqa höraqa pacienciantsiktam perditsiyämunqa, llakitsimäshunmi o mana allim tratamäshun. Hasta anciänukunapis höraqa pantayanqam. Tsë llapan pasakuptinqa, capazchi wakinkunaqa, “¿Jehoväpa markanchöku këkä o manaku?” nir pensar qallëkuyanman. Y mananam wawqi panintsikkunawan juntuqa Jehovä Diosta sirwita munayanqanatsu, y ofendeqninkunatapis capaz parlapëta munayanqanatsu o reunionkunamampis ëwayanqanatsu (Sof. 3:9). ¿Tsëta rurayanqan allitsuraq kanman? Bibliachö yachakurishun tsëkunapa pasarnin juk nuna imata ruranqanta.

4. ¿Ima problëmakunapatan apostol Pablu pasarqan?

⁴ Biblia willakunqan. Apostol Pabluqa musyarqanmi wawqi panikunaqa jutsa ruraq kayanqanta, tsëmi llapantapis allillata rurayänantaqa shuyararqantsu. ¿Imatan pasakurqan? Jerusalenchö congregacionman ëwar qallëkuptinmi, Pablutaqa wawqi panikuna mantsayarqan y manam pëman confiakuyarqantsu (Hëch. 9:26). Tiempuwannam, wawqi panikuna rimayarqan (2 Cor. 10:10). Juk poqushqa cristiänutam Pablu rikarqan mana allikunata ruraqta. Tsëta rikarqa, wakin cristiänukunaqa capazchi Jehovä sirwita dejariyanman karqan (Gäl. 2:11, 12). Y alläpam llakikurqan yanaqaqnin Marcus dejariptin (Hëch. 15:37, 38). ¿Imatataq Pablu rurarqan tsë llapanta rikarnin? ¿Dejarirqanku tsë wawqi panikunawan juntakëta? Manam. Tsëpa rantinqa, pëkunapaqmi allikunata pensarqan y Jehovä Diosnintsiktam sirwirnin sïguirqan. ¿Imatan yanaparqan?

5. ¿Imatan Pabluta yanaparqan wawqi panikunapita mana rakikäkurinampaq? (Colosensis 3:13, 14; rikäri dibüjuta).

⁵ Apostol Pabluqa wawqi panikunata alläpam kuyaq. Tsëmi pantayanqankunallaman yarparänampa rantin, alli kayanqanta masqa yarparaq. Tsënöllam kuyakoq karnin ofendeqninkunata perdonarqan, tsëtam kikin consejakurqan Colosensis 3:13, 14 (leyi) textuchö. Y ¿apostol Pabluqa problëmankunata Marcuswan arreglayarqanku? Awmi. Punta kaq viäjinchö Marcus pëwan mana ëwashqa këkaptimpis, Pabluqa manam cölerashqallatsu kakurqan. Tiempuwanmi, Colösas congregacionman cartakunqanchö Marcuspaq nirqan alläpa yanapanqanta y shoqashqa kanqanta (Col. 4:10, 11). Y Römachö prësu këkarnam mañakurqan Marcus yanapanampaq (2 Tim. 4:11). Tsëkunawanmi cläru musyantsik Pabluqa wawqi panikunapita mana rakikäkurishqa kanqanta. ¿Imatataq Pablupita yachakuntsik?

6, 7. ¿Imaraq yanapamäshun ofendimashqapis wawqi panikunata kuyarnin sïguinapaq? (1 Juan 4:7).

⁶ ¿Imatataq yachakuntsik? Jehoväqa munan wawqi panintsikkunata kuyanantsiktam (leyi 1 Juan 4:7). Mëqanllapis ofendimashqaqa, manam tsëman yarparäkur kakunantsiktsu. Tsëpa rantinqa, pensanantsik pantashqa kanqanta y mas alli kanampaq kallpachakuykanqantam (Prov. 12:18). Jehovä Diosnintsikqa jutsa ruraq kashqapis, alläpam kuyamantsik. Y jutsata rurarishqapis manam dejaramantsiktsu ni manam cölerashqallatsu kakun (Sal. 103:9). ¡Teytantsik Jehovänömi kanantsik y wakinkunatam perdonanantsik! (Efes. 4:32–5:1).

⁷ Manam qonqanantsiktsu ushanan tiempuchöna kawëkanqantsikta. Wawqi panintsikkunawanmi mas juntu kanantsik. Chikimaqnintsikkunaqa qatikachämäshunmi y capazchi carcelamäshumpis. Tsë hörakunachömi wawqi panintsikkuna yanapamänataqa mas wanashun (Prov. 17:17). Tsëmi pasarqan Espäña nacionpita Josepa jutiyoq anciänuta. Pëtaqa ejercituman ëwëta mana munaptinmi, wakin wawqikunatawan juntu carcelariyarqan. Josepmi kënö nin: “Carcelchöqa llapäkuna juntum kayarqä, tsëmi imallapitapis cöleratsinakuyaq kayä. Tsëmi aguantanakuyta y rasumpa perdonanakuyta yachakuyarqä. Tsëmi yanapayämarqan mas unïdu kayänäpaq y wakin prësukunapita llapäkuna juntu defendikuyänäpaq. Juk kutim, rikräta malograkurirqä y manam ima rurëta puëdirqätsu. Tsëmi juk wawqi yanapamarqan röpäta taqshar y juk rurëkunata rurarnin. Wawqikuna kuyakoq kayanqantaqa mas wananqä hörachömi rikarqä”. Tsëmi noqantsikpis wawqi panikunawan ofendinakushqa karqa, tsë problëmata jinan höra altsanantsik.

MAJANTSIK LLAKITSIMASHQA

8. ¿Ima problëmakunapatan casädukuna pasayan?

⁸ Problëma. Diospa Palabranqa clärum nin casädukunaqa ‘vïdankunachö problëmakunapa’ pasayänampaq kaqta (1 Cor. 7:28). ¿Imanirtan tsënöqa nin? Ollqu kaqpis y warmi kaqpis jutsasapa kayaptinmi. Tsënöllam ishkankunapis jukläya jukläya geniuyoq kayan y imata munayanqampis jukläyam. Y jukläya jukläya costumbriyoq familiachömi ishkampis winayashqa. Tsëmi casädukunaqa, tiempuwan cuentata qokuriyanqa imatapis pantaq kayanqanta y noviu këkarnin tsënö kayanqanta cuentata mana qokushqa kayanqanta. Tsëkunapa pasarqa, manam kushishqatsu kawayanqa. Y ishkampis pantaq kayanqanta yarpayänampa rantin y tsë problëmata juntu arreglayänampa rantinqa, capazchi pensayanqa rakikäkuriyänan o divorciakuyänan mas alliqa kanqanta. ¿Peru tsëta rurayanqan allitsuraq kanman?b Bibliachö yachakurishun tsënöpa pasarnin juk warmi imata ruranqanta.

9. ¿Imakunapatan pasarqan Abigail?

⁹ Biblia willakunqan. Abigailqa Nabalwanmi casakushqa karqan, y Nabalpaqqa Biblia willakun malagracia y mana allikunata ruraq nuna kanqantam (1 Sam. 25:3). Abigailpaqqa, manachi fäciltsu karqan tsënö nunawan kawëqa. Peru Abigailqa juk kutim Nabalpita librakurita puëdinman karqan. ¿Imatan pasakurqan? Nabalmi Davidta y soldädunkunata mana alli tratashqa karqan, tsëmi Davidqa Nabalta wanutsita munarqan (1 Sam. 25:9-13). Y ¿Abigailqa Nabalta David wanutsinanta munarku kikillan qeshpir ëwakurqan? Manam. Tsëpa rantinqa, Davidtam rogarqan Nabalta mana wanutsinampaq (1 Sam. 25:23-27). ¿Imanirtan tsënö rogakurqan?

10. Casäda vïdanchö mana allikunapa pasëkarpis, ¿imanirtan Abigailqa qowanta o runanta salvarqan?

¹⁰ Abigailqa Jehovätam alläpa kuyaq y casädu kawakuypaq imata pensanqantam cuentachö katsirqan. Capazchi musyarqan Adantawan Ëvata casatsirnin imata ninqanta (Gen. 2:24). Abigailqa clärum musyarqan casädu kawakuyqa Jehoväpaq sagrädu kanqanta. Tsëmi Jehovä munanqanta rurëta munar qowanta o runanta y wayinchö kaqkunata salvarqan. Y salvanampaqqa, jutsata mana rurashqa këkarmi jinan höra ëwarnin perdonta mañakurqan. Kë valienti y kuyakoq warmitaqa, Jehoväqa alläpachi kuyarqan. ¿Imatataq Abigailpita yachakuyanman casädukuna?

11. (1) ¿Casädukuna imata rurayänantataq Jehovä shuyaran? (Efesius 5:33). (2) ¿Imatataq yachakuntsik Carmenpita? (Rikäri dibüjuta).

¹¹ ¿Imatataq yachakuntsik? Jehoväqa munan casädukuna, casädu vïdankunata respetayänantam. Tsëmi qowankuna o warminkuna mana alli geniuyoq kayaptimpis respetayänan. Diosnintsikqa alläpachi kushikun casädukuna problëmankunata arreglayaptin, respëtuwan y kuyakuywan tratanakuyaptin (leyi Efesius 5:33). Carmenta pasanqampaq parlarishun. Carmenqa seis watapana casäda këkarmi Testïgukunawan Bibliapita yachakur qallëkurqan y bautizakurirqan. Carmenmi kënö nin: “Tsëta decidinqätaqa, manam qowäta o runäta gustarqantsu. Jehoväwanmi alläpa cölerakurqan, mana allim tratamaq y hasta wayïpita ëwakunampaq kaqtam nimaq”. Tsënö kaptimpis, Carmenqa aguantarqanmi. 50 watapam qowanta respëtuwan y kuyëllapa tratarqan. Kënömi nin: “Tiempu pasanqanmannömi qowäta maslla entiendirqä y respëtuwan parlapëta yachakurqä. Casädu vïda Jehoväpaq sagrädu kanqanta musyarmi qowäpita rakikäkuritaqa pensarqätsu. Jehoväta kuyanqämi yanapamarqan aguantanäpaq”.c Tsënöllam qampis casädu vïdëkichö problëma kaptinqa, yarpänëki Jehovä Diosnintsik yanapashunëkipaq kaqta.

JUTSATA RURANQANTSIK LLAKITSIMASHQA

12. Jutsata rurarirqa, ¿imanöraq sientikushwan?

¹² Problëma. Capazchi jutsata rurarirqa, imapaqpis mana sirwinqantsikta pensashwan. Bibliachömi nin jutsata rurarirqa, ‘shonquntsikchö alläpa llakikunqantsikta’ (Sal. 51:17). Tsëmi pasarqan Robert jutiyoq wawqita. Pëqa siervu ministerial kanampaqmi atska watapa kallpachakurqan. Peru siervu ministerial tikrarirqa, jutsatam rurarirqan y Jehoväta traicionashqa kanqantam pensarqan. Robertmi kënö nin: “Jutsata ruranqäpitaqa alläpam llakikurqä; mëtsika ladrïllu nitirkamaqtanömi sientirqä. Pachäpis nanarqanmi, alläpam waqarqä y Jehovätam mañakurqä. Peru mañakunqäta Jehovä manana wiyamanqantam pensarqä. Imanö kaptimpis, Jehovätam llakitsishqa karqä”. Jutsata rurashqa karqa, capazchi qampis Jehovä dejarishunqëkita y sirwitapis manana puëdinëkipaq kaqta pensar alläpa llakikuykanki (Sal. 38:4). Tsënö kaptinqa, Bibliachö yachakurishun tsënöpa pasarnin Jehoväta sirwir sïguinampaq juk nunata ima yanapanqanta.

13. ¿Ima jutsatataq Pëdru rurarqan, y imanöpatan tsë jutsa rurëman charqan?

¹³ Biblia willakunqan. Wanutsiyänampaq Jesusta prësuyanqan paqasmi, apostol Pëdruqa mana allikunata rurarqan y ruranqampitam alläpa mana alli sientikurqan. ¿Imatataq rurashqa karqan? Kikinman confiakurmi, wakin apostolninkuna dejayaptimpis Jesusta mana dejanampaq kaqta nirqan (Mar. 14:27-29). Getsemanï huertachönam atska kuti punukarqan (Mar. 14:32, 37-41). Jesusta prësuriyaptinnam dejarir ëwakurqan (Mar. 14:50). Y tsëpitanam, Jesusta reqinqanta kima kutipa negarqan, hasta jurakurqanraqmi (Mar. 14:66-71). ¿Imanötan Pëdru sientikurqan tsë jutsata ruranqampita? Mana alli sientikurmi alläpa waqarqan (Mar. 14:72). ¿Y imanöraq sientikurqan Jesusta qeruchö warkurëkaqta rikarnin? Imapaqpis mana välinqantachi pensarqan.

14. ¿Imatan Pëdruta yanaparqan Jehoväta mana dejanampaq? (Rikäri jana qaranchö këkaq dibüjuta).

¹⁴ Tsëkunapa pasarpis, Pëdruqa manam Jehoväta dejarqantsu. ¿Imatan yanaparqan? Manam cristiänu mayinkunapita rakikäkurirqantsu, pëkunachi yanapayarqan Jehoväta sirwir sïguinampaq (Lüc. 24:33). Y Jesus kawarkamurqa Pëdrutam yuripurqan, capazchi animanampaq karqan (Lüc. 24:34; 1 Cor. 15:5). Jesusqa, jutsata rurashqa kanqanta Pëdruta yarpätsinampa rantinmi, mas cargukunata chaskinampaq kaqta nirqan (Juan 21:15-17). Pëdruqa clärum musyarqan alläpa jutsata rurashqa kanqanta, peru manam qelanäkurirqantsu. Pëqa segürum këkarqan Jesus perdonashqa kanqanta y cristiänu mayinkunapis yanapayänampaq kaqta. ¿Imatataq Pëdrupita yachakuntsik?

15. ¿Imapita següru kanatataq Jehovä munan? (Salmus 86:5; Romänus 8:38, 39; rikäri fötuta).

¹⁵ ¿Imatataq yachakuntsik? Jehoväqa munan kuyamanqantsikta y perdonamanqantsikta següru kanantsiktam (leyi Salmus 86:5; Romänus 8:38, 39). Rasunmi, jutsata rurarirqa alläpa mana allim sientikuntsik. Peru manam pensanantsiktsu Jehovä manana kuyamanqantsikta y mana perdonamanqantsiktaqa. Tsëpa rantinqa, yanapamänapaqmi ashinantsik. 12 kaq pärrafuchö parlanqantsik Robertmi kënö nin: “Jutsa rurëmanqa ishkirqä tentacionkunapa pasarnin kikïlla alli tsarakunäpaq kaqta pensarmi”. Peru Robertqa cuentata qokurqan anciänukunawan parlëta wananqantam. Kënömi nin: “Anciänukunawan parlaptïqa, manam niyämarqantsu imapaqpis mana sirwinqäta, sinöqa Jehovä kuyëkämanqanta y mana dejamanqantam niyämarqan”. Robertnömi següru kanantsik jutsata ruranqantsikpita arrepentikushqa, yanapamänapaq ashishqa y tsë jutsakunata manana rurashqaqa, Jehovä imëpis kuyëkämänapaq kaqta y perdonamänapaq kaqta (1 Juan 1:8, 9). Jutsata rurarishqapis, Jehovä kuyëkämanqantsikllata cuentachö katsinqantsikmi yanapamäshun mana qelanäkurinapaq.

16. ¿Imanirtan qamqa imëkapa pasarpis Jehovä Diosnintsikta sirwita dejëta munankitsu?

¹⁶ Ushanan tiempukunachö sirwinqantsiktaqa Jehoväqa alläpam valoran. Imëkapa pasashqapis mana dejanapaq y sirwirnin sïguinapaqmi yanapamäshun. Tsëmi wawqi panintsikkunata kuyanapaq y perdonanapaq maslla kallpachakunantsik. Casädu vïdachö problëma kaptin shumaq altsarninmi, Jehoväta kuyanqantsikta y casädu vïdata respetanqantsikta rikätsikunantsik. Y jutsata rurashqa karqa, Jehoväpa consëjuntam ashinantsik, kuyamanqantsikta y perdonamanqantsiktam valoranantsik y sirwirmi sïguinantsik. “Ama dejashuntsu alli kaqta rurëta”, tsëta rurarqa Jehovä Diosnintsikpitam mëtsika bendicionta chaskishun (Gäl. 6:9).