¡Manam wanïllawantsu llapan ushakärin!

Betaniaqa taksha markallam karqan, y Jerusalenpita kima kilömetruchömi këkarqan (Juan 11:18). Tsëchömi Jesus wanunampaq juk ishkë semänakuna pishikaptin, kuyashqa amïgun Läzaru illaqpita qeshyakurkur wanukïkurqan.

Tsëta musyarirmi, Jesusqa discïpulunkunata kënö nirqan: “Lazaroqa punikanllam, peru ewarmi riyaratsimushaq” (Juan 11:11). Peru ninqanta mana entiendiyaptinnam, ‘Lazaroqa wanushqam’ nirqan (Juan 11:14).

Pampayanqampita chusku junaq pasariptinnam Jesusqa Betaniaman chärirqan, y shoqanampaqmi Läzarupa panin Martata asheq ëwarqan. Tinkuriyaptinnam Martaqa kënö nirqan: “Teyta, sitsun qam quecho quecanquiman carqan, manam turillä wanunmantsu carqan” (Juan 11:17, 21). Tsënam Jesusqa kënö nir contestarqan: “Nogam wañushgacunata cawatsimurnin cawayga cä. Tsaymi pipis nogaman rasumpa firmi criyicurga, wañurpis cawamungalla” (Juan 11:25, NTCN).

Nïkurnam awninqanta rurëta puëdinqanta rikänampaq, Läzaru pamparëkanqanman ëwëkur kënö nir qayarqan: “¡Lazaru, yarqamï!” (Juan 11:43). Tsënam Läzaruqa pamparëkanqampita yarqaramurqan, tsëta rikarnam nunakunaqa alläpa espantakuyarqan.

Jesusqa mas puntachöpis ishkaq nunakunatanam kawaritsishqa karqan. Jukqa Jairupa warmi wamranmi karqan, y tsë kutichöpis wamraqa punïkanllam nirqanmi (Lücas 8:52).

Rikanqantsiknömi Jesusqa wanushqakunaqa pasëpa punukashqalla këkäyanqanta nirqan, tsënö ninqanqa rasun kaqllam. Porqui pasëpa punukashqa këkaqkunaqa manam nanapäkuyantsu ni sufriyantsu, y tsënöllam wanushqakunapis këkäyan (Eclesiastes 9:5; rikäri “Wanïqa pasëpa punukashqa kënöllam” neq recuadruta). Jesuspa punta kaq qateqninkunaqa alleqmi entiendiyarqan wanushqakuna imanö këkäyanqanta. Juk librum kënö nin: “Dios munanqannölla sirwikar wanoqkunapaqqa, wanïqa pasëpa punukashqa kënöllam karqan, y pamparäyanqan sitiunam jamayänan sitiunö karqan”.a

Wanushqakuna pampanqantsikchö punïkäyanqanta y mana sufrikäyanqanta musyanqantsikqa alläpam shoqamantsik. Wanïpita rasumpa kaqta yachakurirqa mananam alläpa mantsakantsiknatsu.

“JUK NUNA WANURQA, ¿YAPË KAWARIMUNMANTSURAQ?”

Llapantsiktam paqaspa shumaq punïqa gustamantsik, peru ¿piraq munanman punurir manana riyakamïtaqa (rikchakamuytaqa)? Läzaru y Jairupa warmi wamran kawariyämunqannö, ¿imëllapis wanushqakuna kawariyämunqatsuraq?

Diosta sirweq Job nunapis alläpa sufrirninmi kënö nir tapukurqan: “Juk nuna wanurqa, ¿yapë kawarimunmantsuraq?” (Job 14:14).

Kikinmi tapukïninta contestarnin, Llapanta Puëdeq Jehoväta kënö nirqan: “Qammi qayaramanki, y noqam contestashqëki. Makikiwan ruranqëkitaqa rikëta munankim” (Job 14:15). Tsënö ninqanwanmi, Jobqa rikätsikurqan Jehovä kawaritsimunampaq kaqta següru këkanqanta.

Nunakunata Jesus kawaritsinqanmi rikätsikun wanushqakunata kawaritsimunampaq Dios podernin qoshqanta. Bibliaqa clärum kënö nir willakun: “Maquïchomi quecan wanïpa [. . .] llabin” (Apocalipsis 1:18). Tsë lläviwanmi pamparëkaqkunapa punkunkunata kichanqa, Läzaru pamparëkanqanta tsapaq qaqata lädutsiyänampaq mandakunqannölla.

Bibliaqa kutin kutinmi wanushqakuna kawariyämunampaq kaqta willakun. Tantiyarinapaq, juk angelmi profëta Danielta kënö nir parlaparqan: “Wanunkim, peru ushanan junaqkunachöqa sharkamunkim paguïkita chaskinëkipaq” (Daniel 12:13). Wanushqakuna kawariyämunanman mana creeq pushakoq religiösukunata y saduceukunatam Jesus kënö nirqan: “¡Qamcunaqa llutantam yarpäyanqui, porqui manam cäyiyanquitsu Diospa palabran escribirëcanqanta, ni Dios allapa poderyoq canqanta!” (Mateu 22:23, 29). Jina apostul Pablupis kënömi nirqan: “Noqapis marcäquicä alli ruraqtapis y mana alli ruraqtapis Teyta Dios cawaritsinanpaq caqta[m]” (Hëchus 24:15).

¿IMËTAQ WANUSHQAKUNA KAWARIYÄMUNQA?

¿Imëtaq alli ruraqkuna y mana alli ruraqkuna kawariyämunqa? Danielta parlapaq angelqa ‘ushanan junaqkunachö’ kanampaq kaqtam nirqan. Läzarupa panin Martapis “ushanan junaqchö” turin kawarimunampaq kaqmanmi markäkurqan (Juan 11:24, NM).

Bibliachö “ushanan junaqchö” nirqa Jesus mandakunan witsampaqmi parlëkan. Pablum kënö nir qellqarqan: “Jesucristuran mandaconqa asta llapan chiqueqnincunata sitiunman churanqanyaq. Tsepitanam permitïconqa por ultimu wanïpis manana cananpaq” (1 Corintius 15:25, 26). Tsërëkurmi Diospa Gobiernun shamunampaq y kë Patsapaq munënin rurakänampaq mañakïkänantsik alläpa precisan.b

Jobqa alleqmi musyarqan, wanushqakunata kawaritsimïta Dios munanqanta. Tsë junaq chämuptinqa, wanïqa manam kanqanatsu, y mananam pipis “¿wanïllawanku llapan ushakärin?” nir tapukunqanatsu.