Jehovä Diosnintsikqa alläpa kuyakoqmi

1, 2. ¿Imanötan wakin wawqikuna y panikuna sientikuyan mana allikunapa pasarnin?

PENSARISHUN lamar chowpinchö juk barcu këkanqanman. Alläpa vientuptinmi yakuqa laqcheqsar barcuta wakman këman apakun y hundikäratsita munan. ¿Imatataq rurayan barcuta yaku mana apakunampaq? Tsaränampaqmi anclata lamar rurinman jitarkuyan.

² Imanömi alläpa vientuptin barcuta yaku wakman këman kuyutsin, tsënöchi sientikunki imëka mana allikunapa pasarnin. Capazchi höraqa següru këkanki Jehovä Diosnintsik kuyashunqëkita y yanapashunqëkita. Peru tsëpitaqa capazchi pensanki imanö sientikunqëkita ni ichikllapis mana musyanqanta (Sal. 10:1; 13:1). O capazchi juk amïguyki shumaq parlapärishuptiki kushishqa sientikurinkiman (Prov. 17:17; 25:11). Peru tsëpitaqa capazchi yapë pensarinkiman qampaqqa Jehovä Diosnintsik ni ichikllapis mana yarpachakunqanta. Tsënö sientikurqa, ¿imatataq rurankiman Jehovä Diosnintsik kuyashunqëkita y yanapashunqëkita següru kanëkipaq?

3. (1) ¿Ima ninantan ‘alläpa kuyakoq’ ninanqa? (Salmus 31:7; 136:1). (2) ¿Imanirtan Jehovä Diosnintsiklla tsënö kuyakoqqa? (Dibüjuta rikäri).

³ Imëka mana allikunapa pasarqa, barcuta tsaränampaq “anclata jitaq” cuentam, Jehovä Diosnintsik alläpa kuyakoq kanqanta yarpänantsik (leyi Salmus 31:7; 136:1). Kë textukunachö ‘alläpa kuyakoq’ ninqanqa entienditsikun, juk nuna, nuna mayinta llapan shonqunwan imëpis kuyanqantam. Y tsënö kuyakoqqa Jehovä Diosnintsikllam. Tsëmi Bibliachöqa nimantsik sirweqninkunata ‘alläpa kuyanqanta’ (Ex. 34:6, 7; Sal. 86:5). Tsëwanmi entiendintsik, ¡Jehovä Diosnintsikqa sirweqninkunata imëpis mana dejanqanta! Tsënö kuyakoq kanqanta yarpanqëkim yanapashunki mana allikunapa pasarnin alli aguantanëkipaq (Sal. 23:4).

JEHOVÄ KUYAKOQ KANQANQA BIBLIAPA PRINCIPAL YACHATSIKUYNINMI

4. ¿Imakunatan kayan Bibliapa principal yachatsikuyninkuna? Y tsëkunata alli musyarirqa, ¿imanirtan juknöpa yachatsimanqantsikkunataqa creintsiknatsu?

⁴ ¿Ima mastataq rurashwan imëka problëmakunapa pasarnin alli aguantanapaq? Anclata jitaq cuentam, Dios kuyakoq kanqanqa Bibliapa principal yachatsikuynin kanqanta yarpänantsik. ¿Imatan Bibliapa principal yachatsikuyninkunaqa? Bibliawan rasumpa kaqkunata entiendinqantsikkunam. Këkunallaman pensarishun: Bibliata yachakurmi entiendirqantsik Diospa jutinqa Jehovä kanqanta, Jesusqa Diospa japallan Tsurin kanqanta, wanushqakuna imatapis mana musyayanqanta, kë Patsa Shumaq Patsaman tikranampaq kaqta y tsëchö mana wanurna kawakunapaq kaqta (Sal. 83:18; Ecl. 9:5; Juan 3:16; Apoc. 21:3, 4). Tsëkuna rasumpa kanqanta alli musyarirqa, manam tsë asuntupaq juknöpa yachatsimanqantsikkunataqa creintsiknatsu. Tsënöllam Jehovä kuyakoq kanqampis Bibliapa principal yachatsikuynin, y tsëta yarparqa mananam Jehovä Diosnintsik mana kuyamanqantsikta pensarqa yarpachakushunnatsu. Këpitam maslla yachakurishun.

5. ¿Imatan yanapashurqëki unë creinqëkikunata dejanëkipaq?

⁵ Bibliapita yachakur qallanqëki witsanqa, ¿imatan yanapashurqëki unë creinqëkikunata dejanëkipaq? Capazchi Bibliapita yachakunqëkikunata igualatsirqëki religionnikichö yachatsiyäshunqëkitawan. Këllaman pensarishun: capazchi unëqa creirqëki, Jesusqa Dios kanqanta. Peru Bibliapita maslla yachakurchi pensarqëki, “¿tsë creinqäqa rasumpatsuraq?” nirnin. Tsëpitanachi Bibliapita alli yachakurnin cuentata qokurqëki creinqëkikunaqa mana rasumpa kanqanta. Tsëchi Biblia ninqannöna, Jesusqa Diospa “punta kaq” Tsurin y ‘japallan Tsurin’ kanqanta creirqëki (Col. 1:15; Juan 3:18). Peru rasumpa kaqchöqa, shonquntsikchö y peqantsikchö o umantsikchö “alli patsakashqa” kaptinmi unë creinqantsikkunata dejananqa fäciltsu karqan (2 Cor. 10:4, 5). Peru Biblia ninqankunaman creiskirqa, mananam unë creinqantsikkunamanqa yapëqa creirqantsiknatsu (Filip. 3:13).

6. ¿Imanirtan Salmus 136 textuchöqa Jehovä Diosnintsikpaq atska kuti nin “imëpis alläpa kuyakoq” kanqanta?

⁶ Tsëtam ruranëki alläpa problëmakunapa pasanqëki hörakuna Jehovä mana kuyashunqëkita pensarpis. Kënömi pensanëki: “¿Pensëkanqäqa rasumpatsuraq?”. Tsëpitanam tsë pensëkanqëkita Salmus 136:1 textuchö Jehovä alläpa kuyakoq kanqampaq ninqanta igualatsinëki. ¿Imanirtan Jehoväqa nin alläpa ‘kuyakoq’ kanqanta? ¿Imanirtan tsë Salmuschö 26 kutipa nin Jehoväqa “imëpis alläpa kuyakoq” kanqanta? Yachakurinqantsiknömi, Jehovä Diosnintsik kuyakoq kanqanqa wakin yachatsikuykunanöpis Bibliapa mas principal yachatsikuynin. Jehovä Diosnintsik mana kuyashunqëkita pensanqëkiqa, manam rasumpatsu. Tsëmi mana alli creenciakunata dejanqëkinö, Jehovä mana kuyashunqëkita pensanqëkitapis dejanëki.

7. ¿Ima textukunatan yanapamantsik Jehovä kuyamanqantsikta següru kanantsikpaq?

⁷ Diosnintsikqa Palabran Bibliachömi mëtsika kuti nimantsik kuyamanqantsikta. Ishkë textullata rikärishun. Jesusmi qateqninkunata kënö nirqan: “Qamkunaqa mëtsika pichuysankapitapis masmi väliyanki” (Mat. 10:31). Jesusqa manam, “capazchi pichuysankapitapis mas väliyanki” nirqantsu. Y Jehoväpis sirweqninkunatam kënö nirqan: “Noqam kallpayoq kayänëkipaq yanapayashqëki. Awmi, noqam yanapayashqëki. Allita ruraq derëcha makïwanmi alli tsaräyashqëki” (Is. 41:10). Jehoväqa manam, “capazchi yanapayashqëki” nirqantsu. Kë textukunachöqa nikämantsik rasumpa yanapamänapaq kaqtam. Tsëmi mana allikunapa pasanqëki hörakuna Jehovä mana kuyashunqëkita pensaptikiqa, tsë textukuna yanapashunki Jehovä kuyashunqëkita següru kanëkipaq. Tsë textukuna ninqanman pensë y imanö sientikunqëkita Jehoväta confianzawan willë. Tsëta rurarqa, punta cristiänukunanömi kënö ninki: “Teyta Dios imanö kuyamanqantsiktam musyantsik, y tsëmanmi creintsik” (1 Juan 4:16).a

8. ¿Ima mastataq rurashwan Jehovä Diosnintsik mana kuyamanqantsikta pensarqa?

⁸ Y tsëkunata rurashqana këkarpis Diosnintsik mana kuyashunqëkita sientirqa, ¿imatataq rurankiman? Imanö sientikunqëkitam musyanqëkitawan igualatsinëki. Diosnintsik mana kuyashunqëkita sientirpis, allim musyanki Jehovä Diosnintsik kuyashunqëkita, y Bibliachöqa clärum nimantsik Diosqa alläpa kuyakoq kanqanta. Imanö sientikunqantsikqa, mana rasumpa kaqtapis creitsimashwanmi, peru Diospa Palabranqa imëpis rasumpa kaqllatam nimantsik. Tsëmi Diosnintsik mana kuyashunqëkita pensarqa, Diosnintsik alläpa kuyakoq kanqampaq Biblia ninqanta mana kaqpaq churëkankiman (1 Juan 4:8).

“KIKIN TEYTA” KUYAMANQANTSIKMAN PENSASHUN

9, 10. ¿Ima nitataq Jesus munëkarqan “qamkunataqa kikin Teyta[m] kuyayäshunki” nirqa? (Juan 16:26, 27; fötukunata rikäri).

⁹ ¿Ima mastan yanapamäshun Jehovä kuyamanqantsikta següru kanantsikpaq? Qateqninkunata Jesus kënö ninqanman pensanqantsikmi: “Qamkunataqa kikin Teyta[m] kuyayäshunki” (leyi Juan 16:26, 27). ¿Imanirtan tsënö nirqan? ¿Alli sientikuyänanta munarllaku tsënö nikarqan? Manam. Tsëta ninqan höraqa Jesus parlapëkarqan Diosnintsikman mañakuyänampaqmi y manam imanö sientikuyanqampaqtsu.

¹⁰ Jesusqa qateqninkunatam nikarqan pëpa jutinchö mañakuyänampaq, peru manam nikarqantsu pëman mañakuyänampaqqa (Juan 16:23, 24). Tsëta alli musyayänantam Jesusqa munarqan. ¿Imanir? Capazchi Jesuspa qateqninkunaqa pensayanman karqan, wanunqampita kawarirkamurqa pëman mañakuyaptin amïgunkuna kashqa karnin wiyanampaq kaqta y mañakuyanqanta Jehoväta willanampaq kaqta. Tsënö pensayanqanqa manam allitsu kanman karqan, tsëmi Jesusqa kënö nir cläru entienditsirqan: “Qamkunataqa kikin Teyta[m] kuyayäshunki”. Awmi, Jehoväqa alläpam kuyamantsik, tsëmi mañakunqantsiktaqa kikin wiyan. Tsëtam Bibliachöqa cläru yachatsimantsik. Tsëmi alläpa kuyashunqëkiman pensanëki. Bibliata estudiarmi, qampis Jesusta reqirqunki y kananqa kuyankim (Juan 14:21). Peru punta cristiänukunanömi mañakurninqa, kikin Diosnintsikman confianzawan mañakunëki. Jehoväman cada mañakurmi rikätsikuykanki “kikin Teyta” kuyashunqëkita següru këkanqëkita (1 Juan 5:14).

¿IMANIRTAN PENSANTSIK JEHOVÄ MANA KUYAMANQANTSIKTA?

11. ¿Imanirtan Satanasqa alläpa kushikun Jehovä mana kuyamanqantsikta pensashqa?

¹¹ ¿Pitan munan Jehovä mana kuyamanqantsikta pensanata? Satanasmi. Pëqa trampanman ishkitsimënintsikta munarmi Jehovä Diosnintsik mana kuyamanqantsikta creinata munan (1 Pëd. 5:8). Diosnintsikqa jutsapita libramänapaq pagakurmi Tsurin wanunanta permitirqan, tsëmi Satanasqa tsë päguta mana merecinqantsikta pensanata munan (Heb. 2:9). Tsëqa, ¿pitan alläpa kushikun Jehovä mana kuyamanqantsikta pensashqa y problëmakunapa pasarnin Jehoväta dejarishqa? Satanasmi. Peru këman pensarishun: rasumpa kaqchöqa, ¿pitataq Diosnintsik kuyannatsu? Satanastam. Tsëmi pëqa Jehovä mana kuyamanqantsikta y amïgun këta mana puëdinqantsikta pensanata munan. Satanasqa tsë trampatam masqa utilizan Jehoväpita rakimänantsikpaq (Efes. 6:11). Peru Satanaspa trampankuna imanö kanqanta musyarqa, manam tsë trampaman ishkishuntsu y llapan shonquntsikwanmi contran churakäshun (Sant. 4:7).

12, 13. ¿Imanirtan jutsasapa kanqantsikqa Jehovä mana kuyamanqantsikta pensatsimashwan?

¹² ¿Imanir mastan Jehovä mana kuyamanqantsikta pensantsik? Jutsasapa karmi (Sal. 51:5; Rom. 5:12). Jutsata Adan rurariptinqa, mananam Jehoväpa amïgun këta puëdirqantsiknatsu. Y jutsasapa karmi mana allikunata pensantsik, mana alli sientikuntsik y hasta cuerpuntsikpis sänunatsu.

¹³ Jutsasapa kanqantsikta yarparmi alläpa yarpachakuntsik, mantsakuntsik, penqakuntsik y jutsata rurashqanö sientikuntsik. Jutsata rurarqa masran mana alli sientikuntsik. Peru Jehoväqa manam tsënö sientikunapaqtsu kamamarqantsik (Rom. 8:20, 21). Këllaman pensarishun: imanömi cärrupa juk kaq llantan pashtariptin avancëta puëdinnatsu, tsënömi noqantsikpis jutsasapa karnin Diosnintsik munanqannöqa pensëta puëdintsiknatsu. Tsëmi höra höraqa Jehovä mana kuyamanqantsikta pensantsik. Peru tsë hörakunam yarpänantsik Jehoväpaq Bibliachö kënö ninqanta: “Qamqa alläpa puëdeq y respetashqam kanki. Kuyashoqnikikunata y mandakunqëkita cäsukoqkunataqa imëpis kuyëkankim” (Neh. 1:5).

14. ¿Imanirtan jutsantsikpita libramänapaq Jesus wanunqanman pensanqantsikqa yanapamantsik Jehovä kuyamanqantsikta següru kanapaq? (Romänus 5:8; leyi “‘Engañakoq jutsapita’ cuidakuy” neq recuadruta).

¹⁴ Capazchi höraqa pensashwan Diosnintsik kuyamänata mana merecinqantsikta, y rasumpa kaqchöqa manam merecintsiktsu. Kikin Jehovä mana kuyamashqaqa, kuyamänapaq imëkata ruranqantsikpis manam tinkunmantsu. Tsënö këkaptimpis, Jehovä Diosnintsikqa alläpa kuyamarnintsikmi jutsapita libramänantsikpaq Tsurin wanunanta permitirqan (1 Juan 4:10). Jesusqa manam jutsannaq nunakunapaqtsu wanurqan, sinöqa jutsasapakunapaqmi (leyi Romänus 5:8). Y Jehoväqa musyanmi jutsasapa kanqantsikta, tsëmi shuyarantsu imatapis allillata ruranantsiktaqa. Tsëqa, ¿imanirtan pensantsik Diosnintsik mana kuyamanqantsikta? Jutsasapa karmi. Tsëta alli musyarqa, Jehovä mana kuyamanqantsikta mana pensanapaqmi kallpachakushun (Rom. 7:24, 25).

JEHOVÄTA IMËPIS MANA DEJANAPAQ DECIDISHUN

15, 16. Jehovä Diosnintsikta mana dejarqa, ¿imapitataq següru kanantsik, y imanir? (2 Samuel 22:26).

¹⁵ Jehovä Diosnintsikqa munan imëka mana allikunapa pasarpis, pëman confiakunantsikta y mana dejanantsiktam (Deut. 30:19, 20). Jehoväta mana dejarninqa, segürum kanantsik ima pasakuptimpis Jehovä Diosnintsik mana dejamänapaq kaqta (leyi 2 Samuel 22:26).

¹⁶ Yachakurinqantsiknöpis, mana allikunapa pasanqantsik hörakunaqa, “anclata jitaq” cuentam yarpänantsik Jehovä Diosnintsik kuyamanqantsikta y yanapëkämanqantsikta. ¿Y imatataq rurashwan Jehovä Diosnintsik mana kuyamanqantsikta pensarqa? Imanö sientikunqantsikllaman yarparäkunapa rantinmi, Jehovä alläpa kuyamanqantsikta yarpänantsik. Ama imëpis qonqashuntsu, Bibliapa principal yachatsikuyninqa Jehovä Diosnintsik imëpis alläpa kuyakoq kanqanta.