18 KAQ
Reunionkunachö animanakushun
“Alli reqinakushun, y […] juknintsik juknintsik animanakur këkäshun” (HEB. 10:24, 25).
88 KAQ CANCION Jehovä, nänikita reqïkatsillämë
¿IMATATAQ YACHAKUSHUN?a
1. ¿Imanirtan reunionkunachö parlakuntsik?
¿IMANIRTAN reunionkunaman ëwantsik? Jehovä Diosnintsikta alabëta munarmi (Sal. 26:12; 111:1). Y kë ushanan tiempukunachö cristiänu mayintsikkunata animëta munarmi (1 Tes. 5:11). Tsëtaqa lograntsik reunionkunachö parlakurninmi.
2. ¿Imëtan reunionkunachöqa parlakuyta puëdishwan?
2 Reunionkunachöqa cada semänam parlakuyta puëdintsik. Këllaman pensarishun: semäna ushë rurakaq reunionchöqa, Täpakoq revistapita yachakunqantsikchömi parlakuyta puëdintsik. Y semänachö rurakaq reunionchönam “Imakunata yachakunqantsik” neqchö, “Bibliapita yachakunapaq libru” neqchö y maskunata tapukayämuptimpis parlakuyta puëdintsik.
3. (1) ¿Imanirtan höraqa reunionkunachö parlakuyta puëdishwantsu? (2) ¿Imanötan yanapamantsik Hebrëus 10:24 y 25 ninqan?
3 Llapantsikmi reunionkunachö parlakurnin Jehoväta alabëta y cristiänu mayintsikkunata animëta munantsik. Peru ¿imanirtan höraqa reunionkunachö parlakuyta puëdishwantsu? Capazchi parlakuyta mantsapakushwan o capazchi mëtsika kuti makintsikta pallarishqapis, höra höralla parlakunapaq nimashwan. Tsëqa, ¿imatan yanapamäshun? Hebreu cristiänukunaman apostol Pablu cartakunqanmi. ¿Ima nirqantan? Reunionkunapaq parlarmi nirqan “juknintsik juknintsik animanakur” këkänapaq kaqman mas yarpachakunapaq (leyi Hebrëus 10:24, 25). Cristiänu mayintsikkunata animëta pensarqa, manam parlakunantsikpaq makintsikta pallarita mantsapakushuntsu. Y gustamanqantsiknö mëtsika kuti parlakuyta mana puëdirqa, ¿imatataq rurashwan? Wakinkuna parlakayämunqampitam kushikushwan (1 Pëd. 3:8).
4. ¿Imatataq këchö yachakushun?
4 Këchömi yachakushun wawqi panintsikkuna wallkaqlla kayanqan congregacionchö imanö parlakunapaq kaqta, tsëchöqa wallkaqlla kayaptinmi maslla parlakuyta puëdishun. Tsëpitanam yachakushun wawqi panikuna mëtsikaq kayanqan congregacionchö imanö parlakunapaq, tsëchöqa mëtsikaqchi parlakuyta munayan. Y tsëpitanam yachakushun wakinkunata rasumpa yanapanapaqqa, imanö parlakunapaq kaqta.
WAWQI PANIKUNA WALLKAQLLA KAYANQAN CONGREGACIONCHÖ, ¿IMANÖTAN ANIMANAKUSHWAN?
5. Wallkaqlla wawqi panikuna kayanqan congregacionchö animanakunantsikpaqqa, ¿imatataq rurashwan?
5 Wallkaqlla wawqi panikuna kayanqan congregacionchö o grüpuchöqa, wallkaqllam reunionkunachö parlakuyänampaq kayan. Tsëmi höraqa, reunionta dirigeqqa tapukuyta rurarirpis, juk räturaq shuyaränan makinkunata pallariyänampaq. Tsëmi reunionqa despaciu rurakan, y tsëqa manam yanapakunllatsu. Tsënö kaptinqa, ¿imatataq rurashwan? Atska kuti parlakunapaqmi alli preparakushwan. Tsënöpam wakinkunata animashun.
6, 7. ¿Imatataq rurankiman reunionkunachö parlakuyta mantsapakurqa?
6 Wakinkunaqa reunionkunachö parlakuyta mantsakuyanmi. Tsënö mantsakurqa, ¿imatataq rurankiman? Parlakuyta mana mantsapakunëkipaqmi yanapakuykunata ashinëki, tsënöpam wakinkunata parlakunqëkiwan animanki.
7 Tsë yanapakuykunataqa tarinki puntatana yarqamushqa Täpakoq revistakunachömi.b Tsë revistakunachömi alli preparakunqantsik yanapamanqantsikta nimantsik (Prov. 21:5). Yachakuykanqëkikunata alli entiendirqa, manam parlakunëkipaq makikita pallarita mantsapakunkitsu. Tsënöllam yanapashunki wallkallata parlakunqëki (Prov. 15:23; 17:27). Wallkallata parlakurqa, manam mantsapakunkitsu. Tsënöllam wallkallata parlakuptikiqa, wiyayäshoqnikikunapis mas fäcil-lla entiendiyäshunki y parlanqëkitapis manam qonqayanqatsu. Y entiendinqëkimannö parlakuptikiqa, cuentatam qokuyanqa alli preparakushqa kanqëkita y alli entiendinqëkita.
8. Reunionkunachö parlakunantsikpaq preparakunqantsikpita, ¿imanötan Jehovä sientikun?
8 Tsë revistakuna niyanqannö rurëkarpis mantsapakurnin juk o ishkë kutilla parlakuyta puëdirqa, ¿imatataq rurankiman? Yarpänëkim reunionchö parlakunëkipaq preparakunqëkita Jehovä alläpa valoranqanta (Lüc. 21:1-4). Tsënöllam yarpänëki puëdinqëkipita masta Jehovä mana shuyaranqanta (Filip. 4:5). Tsëmi kikiki alli rikänëki reunionkunachö ëka kuti parlakunëkipaq kaqta y Jehovätam mañakunëki yanapashunëkipaq. Capazchi qallananchöqa preparakunkiman cada reunionchö juk kutilla y wallkallata parlakunëkipaq.
WAWQI PANIKUNA ATSKAQ KAYANQAN CONGREGACIONCHÖ, ¿IMANÖTAN ANIMANAKUSHWAN?
9. ¿Imatan pasakunman wawqi panikuna mëtsikaq kayanqan congregacionchö?
9 Congregacionnikichö wawqi panikuna mëtsikaq kayaptinqa, capazchi makinkunata mëtsikaq pallariyaptin qamqa parlakuyta puëdinkitsu. Panintsik Danielletac pasanqanta rikärishun. Pëtaqa reunionkunachö parlakuy alläpam gustan. ¿Imanirtan alläpa gustan? Kikinmi nin parlakurqa Jehoväta adorëkanqanta, wawqi panikunata animëkanqanta y Bibliapita yachakunqankunata yarpänampaq yanapanqanta. Peru atskaq wawqi panikuna kayanqan congregacionman yanapakoq ëwarirqa, mananam alläpaqa parlakuyta puëdeqnatsu y höraqa ni juk kutillapis manaraq parlakuptinmi reunionqa ushareq. Kikinmi kënö willakun: “Alläpam llakikurqä y jutsallakushqanömi sientikurqä. Y höraqa reunionta dirigeq turi makïta pallarikaqta rikëkämarpis, mana cäsumanqantam pensarqä”.
10. ¿Imatataq rurankiman reunionkunachö parlakunëkipaq?
10 ¿Imëllapis Daniellenö sientikurqunkiku? Tsënö karqa, capaz kënö pensarqunki: “Mejorqa wiyakushaqlla, mananam makïta pallarishaqnatsu”. Tsënö nir qelanäkurinëkipa rantinqa, ¿imatataq rurankiman reunionkunachö parlakunëkipaq? Juk kutilla parlakunëkipaq preparakunëkipa rantinmi, atska pärrafukunata preparakunëki. Tsënöpam qallanan kaq pärrafukunachö mana parlakurpis, wakin kaq pärrafukunachöqa parlakuyta puëdinki. Y Täpakoq revistata preparakurqa, cada pärrafu tsë yachakuykanqëki tëmata imanö yanapanqanman pensë. Tsënöpam, yachakuykäyanqëkita alli entiendirqa, parlakuyta puëdinki. Y ¿ima mastataq rurankiman? Fäcil mana entiendinan kaqkunatam alli preparakunkiman (1 Cor. 2:10). Fäcil mana entiendinan kaqkunachöqa, manam alläpaqa makinkunata pallariyanqatsu, tsë hörakunam qamqa parlakurita puëdinki. Peru tsëkunata rurëkarpis atska reunionkunachöna parlakuyta mana puëdirqa, ¿imatataq rurankiman? Reunionta dirigeq wawqitam nirinkiman mëqan pärrafuchöpis parlakuyta munanqëkita.
11. Filipensis 2:4 ninqannö, ¿imatataq cuentachö katsinantsik?
11 (Leyi Filipensis 2:4). Diosnintsik yanapaptinmi apostol Pablu qellqarqan wakinkunamampis yarparänantsikpaq. Y tsëtaqa cäsukuntsik reunionkunachö wakinkunapis parlakuyta munayanqanta cuentachö katsirmi.
Piwampis parlarqa, pëpis parlakamunqantam wiyëta munantsik. Tsënöllam reunionkunachöpis ruranantsik. (Rikäri 12 kaq pärrafuta).
12. ¿Imata rurartan reunionkunachö wakinkunata animashwan? (Rikäri fötuta).
12 Këta entiendirinapaq këllaman pensarishun: juk amïguykiwan parlarqa, ¿qamllaku parlakunki o pëpis parlakamunqantaku wiyëta munanki? Tsënöllam reunionkunachöpis pasakun. Mëtsikaq wawqi panintsikkuna parlakayämunqantam wiyëta munantsik. Y reunionkunachöqa wawqi panintsikkunata animantsik pëkunapis Jehovä Diosnintsikman markäkuyanqampita o yärakuyanqampita parlakayämunanta dejarmi (1 Cor. 10:24). Tsëqa, ¿imatataq rurashwan reunionkunachö mas atskaq parlakayämunampaq?
13. ¿Imatataq rurashwan reunionchö mas atskaq wawqikuna y panikuna parlakuyänampaq?
13 Juknöpaqa, wallkallata parlakunantsikpaqmi preparakushwan. Tsënöpam wakinkuna parlakuyänampaqpis tiempu kanqa. Kë asuntuchöqa, anciänukunam y mas atska watapana Testïgu kaqkunam ejemplu kayänan. Tsënöllam, parlakurninqa atska asuntukunapita parlashwantsu. Juk pärrafuchöqa atska asuntupaqmi parlan y tsë llapanta parlarishqaqa, manam wakinkuna parlakuyänampaq kanqanatsu. Këllaman pensarishun: kë yachakuykanqantsik pärrafuchöqa ishkë respuestam kan. Tsëmi tapukayämuptinqa, mas alliqa kanqa juk kaqllata wallka palabrakunallawan contestanqëki y juk kaqtaqa wakinkunanam parlakayämunqa.
¿Imë hörakunatan reunionkunachö makintsikta pallarishwantsu? (Rikäri 14 kaq pärrafuta).f
14. ¿Imatataq cuentachö katsinantsik tapukayämuptin makintsikta pallarinqantsik höra? (Rikäri fötuta).
14 Tsënöllam makintsikta ëka kuti pallarinapaq kaqta alli pensanantsik. Reunionta dirigeq wawqi cada tapukamuptin makintsikta pallarirqa, obliguëkaq cuentam kashun, y tsëqa wakinkunapis manaraq parlakuyaptinmi noqantsikllata parlakunantsikpaq nimäshun. Y wakinkunaqa, noqantsiklla parlakuyta munanqantsikta pensarmi makinkunata pallariyanqanatsu (Ecl. 3:7).
15. (1) ¿Imanirtan llakikunkimantsu juk reunionchö parlakuyta mana puëdishqa karnin? (2) Reunionta dirigeq wawqi, ¿imatataq cuentachö katsinman? (Rikäri “Yachakunapaq kaq tapukuykunayoq kaptin, ¿imanötan dirigiyanman?” neq recuadruta).
15 Parlakuyänampaq makinkunata mëtsikaq pallariyaptinqa, capazchi munanqëkinöqa parlakuyta puëdinkitsu. Y höraqa capazchi ni juk kutipis manaraq parlakuptiki reunionqa usharinqa. Tsënö pasakuptinqa capazchi llakikunki, peru manam tsënöqa sientikunëkitsu (Ecl. 7:9).
16. ¿Imanötan animashwan reunionchö parlakamoq kaqkunata?
16 Reunionkunachö munanqantsiknö parlakuyta mana puëdirpis, wakinkuna parlakayämunqantaqa alkäbum wiyashwan y tsëpitam parlakayämunqampita animarishwan. Reunionkunachö parlakunqantsiknöllam pëkuna parlakayämunqampita animarinqantsikpis yanaparinqa (Prov. 10:21). Tsënömi parlakayämunqampita shumaq parlaparninqa, wakinkunata animëkantsik.
JUKNÖPAPIS ANIMANAKUSHUN
17. (1) ¿Imatataq teytakuna rurayanman? (2) Videuchö yachakunqantsiknö, ¿ima chusku cösaskunatataq rurashwan reunionkunachö parlakunapaq preparakurnin? (Rikäri nötata).
17 ¿Ima mastataq rurashwan reunionkunachö juknintsik juknintsik animanakunantsikpaq? Wamrayoq karqa, pëkunatam yachatsinëki reunionkunachö parlakuyänampaq (Mat. 21:16). Tsënö kaptimpis, wakin reunionkunachöqa casädu asuntupaq y limpiu portakuypaqmi yachakuntsik, tsëkunachöqa capaz wamrëkikuna parlakuyta puëdiyanqatsu. Tsënö kaptimpis, juk ishkë pärrafullapis kanqam pëkuna parlakuyänampaqnö. Tsënöllam wamrëkikunata entienditsiyänëki makinkunata pallarirpis, höraqa parlakuyta mana puëdiyänampaq kaqta. Tsëta entienditsiyaptikiqa, manam makinkunata pallarikäyaptimpis dirigeq wawqi jukta niriptinqa llakikuyanqatsu (1 Tim. 6:18).d
18. Reunionkunachö parlakurqa, ¿imatataq rurashwan kikintsikllapita alläpa mana parlanapaq? (Proverbius 27:2).
18 Llapantsikmi reunionkunachö Jehoväta alabanapaq y wawqi panintsikkunata animanapaq alli preparakuyta puëdintsik (Prov. 25:11). Höraqa pasamanqantsikkunapitam parlakuyta puëdishun, peru tsënö kaptinqa manam alläpaqa kikintsikpita parlanantsiktsu (leyi Proverbius 27:2; 2 Cor. 10:18). Kikintsikllapita mas parlanantsikpa rantinqa Jehoväpita, Palabrampita y sirweqninkunapitam parlashwan (Apoc. 4:11). Höraqa wakin pärrafukunachöqa nimäshunmi pasanqantsikkunata willakurinapaq, tsëqa allim kanman willakurinqantsik. Qateqnin kaq pärrafuchömi maslla entiendirishun.
19. (1) Wakinkunaman pensashqaqa, ¿imanötan reunionnintsikkuna yanapamäshun? (Romänus 1:11, 12). (2) ¿Imanirtan reunionkunachö parlakuy gustashunki?
19 Reunionkunachö parlakunantsikpaq yachatsimanqantsiknö rurarqa, llapantsikmi reunionkunachö parlakurnin animanakushun. Capazchi wakinkunaqa maslla parlakuyta puëdiyanqa. Peru wakinkunaqa juk ishkëllatapis parlakuriyänampaq permitiyanqampitam kushikuyänan, y wakinkuna parlakuyanqampitapis kushikuyänanmi. Reunion höra wakinkunaman pensarqa, llapantsikmi animanakushun (leyi Romänus 1:11, 12).
93 KAQ CANCION Jehovä, reunionnïkunata bendecïkami
a Reunionkunachö parlakurninmi, wakinkunataqa animantsik. Tsënö kaptimpis, wakinkunaqa reunionkunachö parlakuyta mantsapakuyanmi. Peru wakinkunataqa parlakuy gustanmi. Tsëqa, ¿imanötan wakinkunapaq yarpachakushwan? ¿Y imanötan reunionkunachö parlakunqantsikwan wakinkunata animashwan mas kuyakoq kayänampaq y allikunata rurayänampaq? Tsëtam yachakurishun.
b Tsëtaqa tarinki, 2019 wata enëru killachö yarqamoq Täpakoq revistapa 8 a 13 kaq päginankunachö, y 2003 wata 1 de setiembrichö yarqamoq La Atalaya revistapa 19 a 22 kaq päginankunachömi.
c Wakinkunapa jutinkunaqa jukmi.
d JW.ORG päginachö rikäri Jehoväpa amïgun kë: Reunionchö parlakurinëkipaq alli preparakï neq videuta.
f FÖTUKUNATA MASLLA ENTIENDINAPAQ: Atskaq wawqi panikuna kanqan congregacionchömi, juk wawqi parlakushqana karnin wakinkuna parlakuyänanta munar makinta pallarinnatsu.