LEYEQKUNA TAPUKUYANQAN

Juan 11:35 textu ninqannöpis, ¿imanirtaq Läzaruta manaraq kawaritsirnin Jesus waqarqan?

Juk kastantsik wanuriptinqa, manana rikänantsikpaq kaqta musyarmi waqantsik. Läzaruta alläpa kuyarnimpis, manam wanunqanrëkurtsu Jesus waqarqan, sinöqa, sïgueq kaq versïculu ninqannöpis, kastankunata y amïgunkunata llakiparninmi (Juan 11:36).

Läzaru qeshyëkanqanta musyëkarnimpis, Jesusqa manam tsë hörallatsu ëwarqan kachakätsinampaq. Bibliam kënö willakun: “Lazaru qeshyecanqanta willecayaptinpis, ishque junaqran tse quecanqancho quedacorqan” (Juan 11:6). ¿Imanirtaq demorarqan? Kikin Jesusmi kënö willakun: “Tse qeshyawanqa manam wanushqa quedaconqantsu, sinoqa nunacunam Diospa puedeq queninta ricayanqa, y tserecurmi tsurinpa puedeq quenintapis ricayanqa” (Juan 11:4). Qeshyawan Läzaru wanurirqa, manam wanushqatsu këdakunan karqan. Jesusqa, “Diospa puedeq queninta” rikatsikunampaqmi, Läzaru wanunqanta utilisarqan. ¿Imanötaq rurarqan? Yatun milagruta rurarmi, amïgunta wanunqampita kawariratsimunan karqan.

Discïpulunkunawan Jesus parlarninqa, wanïta igualatsirqan punukashqa këtawanmi. Tsëmi kënö nirqan: “Amiguntsic Lazaroqa punicanllam, peru ewarmi riyaratsimushaq” (Juan 11:11). Jesuspaqqa kawaritsiqa karqan, juk teyta punukashqa wamranta riyaratseq cuentanöllam. Tsëmi Läzaru wanunqampaqqa alläpa llakinarqantsu.

Tsëpenqa, ¿imanirtaq Jesusqa waqarqan? Yapëmi sïgueq kaq versïculu entienditsimantsik. Läzarupa panin Marïata watukaq ëwanqanchömi, Jesusqa rikarqan, Marïata y wakin nunakunatapis alläpa waqëkäyaqta, tsëmi pëpis ‘allapa llaquir shonquncho nanatsicurqan’. Tsëmi “waqarqan” (Juan 11:33, 35).

Kë willakïmi rikätsimantsik, Jesuspa podernin kanqanta y shamoq tiempuchö kuyashqa kastantsikkunata kawaritsimunampaq y alli saludnin qonampaq kaqta. Jina rikätsimantsikmi, kastantsikkuna wanuyaptin Jesusqa ankupämanqantsikta (llakipamanqantsikta). Jina yachatsimantsikmi, wanupakushqa këkaqkunawan ankupäkoq kanantsikpaq.

Jesusqa musyarqanmi Läzaruta kawaritsimunampaq kaqta. Tsënö kaptimpis, amïgunkunata alläpa kuyarnin y ankuparninmi waqarirqan. Tsënö kaqllam noqantsikpis alläpa ankupäkoq karnin “waqacoqcunawan” waqantsik (Rom. 12:15). Pipis wanupakur waqarninqa, manam kawariyämunanman mana creinqantatsu rikätsikun. Tsëmi Jesuspis Läzaruta manaraq kawaritsimurnin waqarirqan, tsëwanmi yachatsimarquntsik wanupakushqa këkaqkunata ankupänantsikpaq.