PARLAPAR QALLANËKIPAQ
2 KAQ YACHAKUNËKIPAQ
Conviëninqan höra parlapë
Bibliachö kënö ninqanman pensë: “Conviëneqchö imatapis parlakurinqanqa alläpa shumaqmi” (Prov. 15:23).
¿Imatataq Felïpi rurarqan?
1. VIDEUTA rikë o Hëchus 8:30 a 31 ninqanta leyi. Tsëpitana këkunaman pensë:
¿Imanötan Etiopïapita nunata Felïpi parlapar qallarqan?
Manaraq musyanqanta yachatsinampaq imanö parlapar qallanqanqa, ¿imanirtan alli karqan?
¿Imatataq yachakuntsik Felïpi ruranqampita?
2. Conviëninqan hörachö Bibliapita parlapar qallashqaqa, tranquïlu sientikurmi nunakuna wiyamënintsikta munayanqa.
Felïpi ruranqannö rurë
3. Rikanqëkiman pensë. ¿Imatataq rikätsikun tsë nuna o warmi imanö shëkanqan, imanö parlanqan y cäran imanö këkanqan? ¿Parlëta munanqantaku rikätsikun? Bibliapita parlapar qallanëkipaqqa capaz kënö nirinkiman: “¿Musyarqëkiku…?”. Parlëta mana munaptinqa, ama parlapar sïguitsu.
4. Pacienciayoq kë. Qallananllapitaqa ama Bibliapita parlapëtsu. Bibliapita parlapänëkipaqqa conviëninqanyaqraq shuyë. Höraqa capazchi yapë watukaq kutir-raq Bibliapita parlapëta puëdinki.
5. Parlapanqëki nunaman pensë. Höraqa juk asuntupita parlëta munëkaptikim juk asuntupaq parlapäshunki. Tsënö pasaptinqa, pensëkanqëki asuntupita parlapänëkipa rantin musyëta munanqampita parlapë.