PARLAPAR QALLANËKIPAQ
3 KAQ YACHAKUNËKIPAQ
Nunakunata llakipë
Bibliachö kënö ninqanman pensë: “Kuyakoqqa [...] llakipäkoqmi” (1 Cor. 13:4).
¿Imatataq Jesus rurarqan?
1. VIDEUTA rikë o Juan 9:1 a 7 ninqanta leyi. Tsëpitana këkunaman pensë:
¿Imatataq puntataqa wisku nunapaq Jesus rurarqan: alli noticiakunataku willarqan o nawintaku alliyätsirqan? (Rikäri Juan 9:35 a 38 ninqanta).
¿Imanirtan tsë nunaqa Jesusta wiyëta munarqan?
¿Imatataq yachakuntsik Jesus ruranqampita?
2. Pëkunapaq yarpachakunqantsikta rikarqa masmi nunakuna wiyamënintsikta munayanqa.
Jesus ruranqannö rurë
3. Nunakunaman pensë. Tsë nuna o warmi imanö sientikunqanman pensë.
Këkunaman pensë: “¿Imakunapaqraq yarpachakur këkan? ¿Ima asuntupitaraq parlakuyta munanman o imaraq yanaparinman?”. Tsëkunaman pensanqëkim yanapashunki nunakunata shumaq yanapanëkipaq.
Pï nunapis imanö sientikunqanta o imapa pasëkanqanta willashuptikiqa, ama juk asuntupita parlapëtsu. Tsëpa rantinqa, pëpaq rasumpa yarpachakunqëkita rikänampaq willëkäshunqëkita shumaq wiyë.
4. Shumaqlla y respëtuwan parlapë. Pitapis llakipanqantsik y yanapëta munanqantsikqa, imanö parlapanqantsikchömi rikakun. Tsëmi imata ninëkipaq kaqman y imanö ninëkipaq kaqmampis alliraq pensanëki. Tsë nuna o warmi ofendikunampaqnöqa manam imatapis ninëkitsu.
5. Yanapëta procurë. Allinö kaptinqa, tsë nunata o warmita yanapë. Llakipar yanapaptikiqa masmi qamwan parlakuyta munanqa.