Kushishqa këqa Diospa qarëninmi

KUSHISHQA këta munarpis, llapantsikmi imëka mana allikunapa pasantsik (2 Tim. 3:1). Qeshyapäkuntsik, familiantsikkuna wanuyan, trabäjunnaq kantsik y nunakunapis imëka mana allikunatam rurayan. Tsëkunapa pasarqa itsa kushishqa këta puëdishunnatsu. Tsënö kaptinqa, ¿imataraq rurashwan imëpis kushishqalla kanapaq?

Tsëpaqqa, rikärishun kushishqa kë ima kanqanta, problëmakunapa pasëkarpis kushishqalla sïguiyänampaq Diospa sirweqninkuna imata rurayanqanta y noqantsikpis imata ruranantsikpaq kaqta.

¿IMATAQ KUSHISHQA KËQA?

Kushishqa këqa, manam imëpis asikurlla puritsu. Këllaman pensarishun, juk nuna upyarirqa machashqa karnin itsa pasëpa asikunman. Peru kachakärir problëmankunata yarpärirqa llakishqanam sientikunqa. Tsëqa, ¿rasumpatsuraq kushishqa këkarqan? Manam (Prov. 14:13).

Peru rasumpa kushishqa këqa jukläyam. Imatapis taririrnin o ima allitapis shuyararnin shonquntsikchö chipyëpa kushishqa sientikïmi. Jina allipa o mana allipa pasarnin o mana alli sientikurnimpis, shonquntsikchö kushishqa këmi (1 Tes. 1:6). Këllaman pensarishun, apostolkunataqa Jesuspita yachatsikuyanqanrëkurmi maqayarqan. Peru Bibliaqa nin Judïukunapa Cortimpita “alläpa kushishqa” yarquriyanqantam, porqui pëkunata Dios allitanö rikanqantam musyayarqan (Hëch. 5:41). Manam maqayanqampitatsu kushikuyarqan, sinöqa Dios munanqanta rurëkäyanqampitam.

Kushishqa këtaqa yachakunantsikran, y tsëpaqqa Dios yanapamänatam wanantsik, porqui kushishqa këqa santu espïritumpa wayïninmi. Tsëmi yanapamantsik jukläya nunana kanantsikpaq (Efes. 4:24; Gäl. 5:22). Shonquntsikchö kushishqa karqa, problëmakunapa pasarpis manam alläpaqa llakikushuntsu.

JEHOVÄPITA Y SIRWEQNINKUNAPITA YACHAKUSHUN

Jehoväqa kë Patsata kamarqan llapampis allilla kanampaqmi. Peru nunakunaqa imëka mana allikunatam rurayan. Peru tsëta rikarnimpis Jehoväqa manam llakikurllatsu kakun, tsëmi Palabranqa, “kushishqa këmi pë täranqanchöqa kan” nimantsik (1 Crön. 16:27). Jina sirweqninkuna allikunata ruranqantsikta rikämarnintsikmi alläpa kushikun (Prov. 27:11).

¿Imatataq Jehoväpita yachakuntsik? Imapis mana alli yarquptinqa manam alläpaqa yarpachakunantsiktsu, tsëpa rantinqa altsakänampaq kaqtam pacienciawan shuyaränantsik y allikuna kapamanqantsikmanmi yarparänantsik.a

Diospa unë sirweqninkunapis mana allikunapa pasëkarmi kushishqalla sïguiyarqan. Jukqa karqan Abrahanmi, pëqa tukï problëmakunapam pasarqan y kawënimpis peligruchömi karqan (Gen. 12:10-20; 14:8-16; 16:4, 5; 20:1-18; 21:8, 9). Peru manam llakikurllatsu kakurqan, tsëpa rantinqa Mesïas gobernamuptin alli kawakï kanampaq kaqman yarpararmi kushishqa kawakurqan (Gen. 22:15-18; Heb. 11:10). Y Jesusmi kënö nirqan: “Abrahanqa alläpam kushikurqan shamunäpaq kaq tiemputa rikëta shuyarar” (Juan 8:56). Y noqantsikpis Abrahannö imëka allikunata chaskinantsikpaq kaqman shumaq pensarninqa, kushishqam sientikushun (Rom. 8:21).

Apostol Pabluwan yanaqin Sïlaspis Dios änikunqankunaman yarpararnin y cumplikänampaq kaqman chipyëpa confiakurninmi, mana allikunapa pasëkarpis kushishqalla sïguiyarqan. Juk kutim alli buënu maqakacharkur carcelariyarqan, peru Bibliaqa willakun “mañakur y cancionkunawan Diosta alabarnin” carcelchö këkäyanqantam (Hëch. 16:23-25). Jina Jesuspa jutinrëkur sufriyanqanta musyarninmi kushishqa sientikuyarqan. Noqantsikpis pëkunanö kushishqa këta munarqa, Diosnintsikta sirwirnin imëka allikunata pasamanqantsikmanmi yarparänantsik (Filip. 1:12-14).

Kanan witsampis mëtsika cristiänu mayintsikkunam problëmakunapa pasëkarpis kushishqalla sïguiyashqa. Këllaman pensarishun. 2013 wata noviembri killam alläpa vientu y lamar yaku yarqamurnin Filipïnasta ushakätsirqan. Y Testïgukunapa wayinkunataqa milpitapis mastam ushakäratsipurqan. Tacloban markachö täraq wawqi Georgim kënö nirqan: “Imëkanta oqrashqa këkarpis wawqikuna y panikunaqa kushishqallam këkäyan. Tsënö sientikuyanqätaqa imanö willakïtapis manam musyayätsu”. Noqantsikpis Jehovä imanö yanapamanqantsikman yarparar y agradecikurqa, mana alli tiempukunapa pasarpis kushishqallam këkäshun. ¿Ima mastaq yanapamantsik kushishqalla këkänapaq?

IMËKAM KAN KUSHISHQALLA KËKÄNAPAQQA

Imëkapitapis masqa, Jehoväwan amïgu kanqantsikmi imëpis kushishqalla këkänapaqqa yanapamantsik. Ciëluchö y Patsachö mandakoqtam reqintsik, pëmi amïguntsik, Teytantsik y Diosnintsik (Sal. 71:17, 18).

¿Ima mastaq yanapamantsik kushishqa kanapaq? Kawëkanqantsik, shumaq kawakïta puëdinqantsik, markanman Jehovä chaskimanqantsik, munënin ima kanqanta y imata ruranantsikta munanqanta musyanqantsikmi (Ecl. 3:12, 13; Col. 1:9, 10). Awmi, imapaq kawanqantsikta y alli kawëta shuyaranqantsiktam musyantsik. Peru wakin nunakunaqa manam tsëta musyayantsu. Tsëmi Pabluqa kënö nirqan: “‘Manam nawi rikashqatsu, ni rinri wiyashqatsu, ni manam nunakuna shonqunkunachö pensayashqatsu kuyaqninkunapaq Dios alistanqan kaqkunaman’. Porqui noqantsiktam Diosqa santu espïritunwan musyatsimarquntsik” (1 Cor. 2:9, 10). Awmi, noqantsikpaqqa imëkam kan imëpis kushishqalla kanantsikpaq.

¿Ima mastataq Jehovä rurashqa kushishqa kanantsikpaq? Jutsantsikpitam perdonamarquntsik (1 Juan 2:12). Y llakipämarnintsikmi mushoq Patsachö kawanapaq änimarquntsik, y tsëqa chäramunqanam (Rom. 12:12). Hasta kuyakoq cristiänu mayintsikkunawan juntu adoranantsiktam permitimantsik (Sal. 133:1). Jina Satanaspita y demoniunkunapitam markanta cuidamantsik (Sal. 91:11). Tsë llapan ruramunqankunata valorarninqa kushishqam imëpis kashun (Filip. 4:4).

¿IMATATAQ RURASHWAN IMËPIS KUSHISHQALLA KËKÄNAPAQ?

Jesusmi kënö nirqan: “Tsëkunataqa qamkunata parlapäyarqoq, noqanö kushishqa kayänëkipaqmi, tsënöpa, kushishqa kënikikuna chipyëpa kanampaq” (Juan 15:11). Rikanqantsiknöpis imëpis kushishqalla këtaqa puëdintsikmi. Peru tsëpaqqa kallpachakunantsikmi. Ninaman mas yamtata churapaqnömi, Jehoväta santu espïritunta mañakunantsik, palabran Bibliata leyinantsik y yachakunqantsikman alleq pensanantsik. Tsëmi yanapamäshun imëpis kushishqalla kanantsikpaq (Sal. 1:1, 2; Lüc. 11:13).

Jina imëpis kushishqalla këkänapaqqa yanapamäshun, Jehoväta kushitsinqan kaqkunata imëpis ruranqantsikmi (Sal. 35:27; 112:1). Porqui pëqa munëninta ruranantsikpaqmi kamamarqantsik. Tsëmi Palabranchö nimantsik, nunapa deberninqa ‘Diosta respetë y mandakunqankunata cumpli’ kanqanta (Ecl. 12:13). Tsëmi Jehoväta sirwinqantsikqa, kushishqa kanantsikpaq yanapamantsik.b

KUSHISHQA KËQA, ¿IMANÖTAQ YANAPAMANTSIK?

Kushishqa kanqantsikqa manam shonquntsikchö alli sientikunallapaqtsu yanapamantsik, sinöqa problëmakunachö alli tsarakurnin Diosnintsikta kushitsinapaqpis yanapamantsikmi (Deut. 16:15; 1 Tes. 5:16-18). Jina yanapamantsikmi imëkayoq këta munëman mana ishkinapaq y Diosnintsikpa kaqchö mas yanapanakunapaq (Mat. 13:44). Y tsënö yanapakur alli yarqapakunqantsiknam yanapamäshun, mas kushishqa kanapaq y wakinkunatapis mas kushishqa kayänampaq yanapanapaq (Hëch. 20:35; Filip. 1:3-5).

Jina kushishqa imëpis kanqantsikqa yanapamantsik, alli saloryoq kanantsikpaqmi. Bibliam kënö nin: “Kushishqa këkaq shonquqa, imëka kachakätsikoq jampinömi” (Prov. 17:22 nota). Biblia ninqan rasun kaqlla kanqantam, mëdicukuna rurayanqanta investigaq juk nunapis kënö nirqan: “Sï qamkush kanan kushishqa kawakunki, tsëqa shamoq tiempuchöpis alli saloryoqmi kanki”.

Awmi, mana alli tiempuchö kawëkarpis kushishqa këtaqa puëdintsikmi. Peru tsëpaqqa, Diosnintsiktam santu espïritunta mañakunantsik, Bibliatam alleq estudianantsik y yachakunqantsikmanmi alleq pensanantsik. Jina chaskikanqantsik bendicionkunamanmi pensanantsik, Diospa unë sirweqninkuna rurayanqantam qatinantsik y Jehoväpa munëninta ruranapaqmi kallpachakunantsik. Tsëkunata rurarninmi Salmus 64:10 textu ninqannöpis, Jehoväpaq rurarninqa kushishqa kashun y següru sientikushun.